29.10.2021

29.10.2021, कार्तिक (कतक) गटॖ पछॖ (कृष्ण पक्ष) ॴठम (अष्टमी) देवादेव शॊकुरवार (शुक्रवार/जुम्मा/भार्गववार) श्री सप्तर्षि सम्वत 5097, नक्षत्र तिष्या, राश कर्कट (चलान) ऋतु हरुद (शरद) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

****************************

  महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

***************************

तीज़मालि थऺव कथ जऻरी। म्यॆहाबा छि कऺशीर गरि गरि याद प्यवान। नाय मऻजी कऺशीर कति गछ़ि मऺशिथ। यॆति पनुन ल्वकॖचार आसि द्रामुत, जवऻनी आसि कऺडमॖच़, पनॖन्यन बुज़र्गन हॖन्ज़ि ज़मीनि जायदादस प्यठ थॊद वऺथ्य वऺथ्य दॊह तॖ राथ आसि कॊडॖमुत किथॖ पऻठ्य गछ़ि मऺशिथ। बरादर ति ह्यॊतुन बावुक बनुन। दफ बा सतन पुशतन हॖन्ज़ जाय प्यॆयि ब्रॖंज़िस मंज़ त्रावॖन्य भगवानॖ सॖन्दिस नावस प्यठ। तीज़मालि बऺडरऻव कथ। हऻरवन, शालॖमऻर, निशात, चॆशमाशऻही, नैहरु पार्क, सॊनॖ लऻन्क, रॊपॖ लऻन्क, कोतर खानॖ। तीज़मालि हॖन्ज़ कथ पूरॖ करान गव बरादर ति तॖ वॊनुन शंकराचार, तुलमुल, दीवी आंगन, च़क्रीश्वर, प्वखरीबल, जीलि डल, व्वलर, वेरनाग तलबा थाव व्वंय तीज़मालि करनोव बरादर छ़ॊपॖ। म्यॆ छु ज़न तलवास व्वथान, अख जाया ॴसा। कऺशीर यपऻर्य यपऻर्य ॴस सान्यव दीवी दीवताहव ॴस तपऻर्य तपऻर्य पनॖन्य निशानॖ त्रऻवमॖत्य तॖ ॳस्य ति ॴस दॊहा दॊहा कड़ान त्युहॖन्द नाव ह्यॆय ह्यॆय। तिहॖन्दि अनुग्रह सॗत्य ॴस्य पकान। वऺलिथ मऺलिथ ॴस्य बिहित तति। बरादरन दिच़ ज़ीर ब्यॆयि अदॖ खबर कपऻर्य आव यिमन शिकसलदन वऺकिथ तॖ पऺन्द्य कॊडुख असि गरि गरि। विश्वासगात कॊर यिमव बटन सॖत्य। यिम हाबा छि हून्य लऺट्य। यिम स्यॆदेयि नॖ ज़ांह। यीच़ॖ सरकारॖ आयि तॖ गऺयि। मगर यिम रूद्य तिथी दीनुक थम छुम सीनस प्यठ कूट्य हा मोरनस ख्वदायो। यिमन रूद बस क्वकर छय कुनी ज़ंग। हम क्याह चाहते हैं आज़ादी। बटव कॊर यिमन खऻर परनऻविख लेखनऻविख, अक्ल दिच़हऻक मगर दपान छि क्रय करनस छय रय। बरादरन ति वॊन ज़ि दपान छि युसुय रॊछुम तऺस्य निश रछतम ख्वदायो। यिहॖन्दि हकॖ गऺयि स्वय बऻश्य। कथ छि जऻरी 

****************************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

***************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)