25.10.2021

25.10.2021, कार्तिक (कतक) गटॖ पछॖ (कृष्ण पक्ष) पऻन्च़म (पंचमी) च़ऺन्दॖरवार (सोमवार) श्री सप्तर्षि सम्वत 5097, नक्षत्र मृग, राश मिथुन (दुहचि 2.37 बजि प्यठॖ), ऋतु हरुद (शरद) (चलान) चूंकि पऻन्च़म छि ज़ॖ गछ़ान, ॳज़्युक वॊहरवोद यी पगाह

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

  महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

***************************

सरकार गव कूशिश करान ज़ि मास्टरन हॖन्ज़ॖ मांग न पूर करनॖच तॖ मास्टरन वऻच़ कशमॖकश करान ज़ि तिमन गोछ़ पनुन हक़ मेलुन। तऺजिब छु ज़ि सरकार यूत संगदिल आसुन। बरादरन वॊन तीज़मालि कुन। बोज़ान ॴस्य ज़ि केंच़व मास्टरव मा ओस पनॖन्यन ज़नानन हॖन्द्य ज़ेवरात ताम कॖन्यमॖत्य यि लडऻय लडनॖ बापथ। मामलॖ वोत दपान सुप्रीम कोर्ट ताम। पऺज़्य पऻठ्य। बरादरन प्रुछ़ तीज़मालि हऺरऻनी सान। नबा तॖ अपुज़ क्याज़ि वनय। यी कनन गोम ती छसय वनान। सुप्रीम कोर्टन वॊन सरकारस ज़ि मास्टरन हॖन्ज़ मांग छि वऻजिब तॖ सरकारस आयि ह्यदायत दिनॖ ज़ि जल्द अज़ जल्द गछ़ि मास्टरन त्युहुन्द हक़ युन  वातनावनॖ। शूखुर दयस कुन ज़ि बिच्यार्यन म्यूलुख मॆहनतस फल। वॊन बरादरन तीज़मालि कुन।तीज़मालि त्रऻव असनॖहऻनाह तॖ वॊनुन बरादरस ज़ि असॖल कथ बूज़थॖय नॖ च़्यॆ वुनि। ब्यॆयि रूदा अथ कथि मंज़ बकाया कॆंह। प्रुछ़ बरादरन। दपान हाबा सऻदिक सऻबन आम्पनऻव्य यिम सऻरी मास्टर वारिहासकालस सुप्रीम कोर्टुक फऻसलॖ बूज़िथ ति। ति क्या़ज़ि सना। सवाल प्रुछ़ बरादरन। यि ज़ानि तिहॖन्ज़ गोरॖ गर्दन। ख्वठ नियत ॴस तथ सरकारस तॖ आम्पॖनऻविख बिचऻर्य यिम हक्दार मास्टर नाहकॖ। खबर कॗतिस कालस आस्यख प्योमुत प्रारुन। बरादरन प्रुछ़ तीज़मालि। वारिहास कालस प्रारेयि बिचऻर्य तॖ यॆलि जऻरिस प्यठ आख तॖ गऺयि यि मास्टरन हॖन्ज़ एसोस्येशन दुबारॖ सुप्रीम कोर्टस सरकारॖच बदनियत तॖ अदालत किस फऻस्लस पूरॖ न करनॖच शिकायत ह्यथ। दफ कंट्य्ट ॵफ कोर्ट। बरादरन वॊनॖनस। अवॖ ती। यि अंग्रीज़ छुम नॖ तगान। तीज़मालि वॊन बरादरस। पतॖ क्याह गव। बरादरन प्रुछ़। कथ छि जऻरी

***************************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

****************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)