27.10.2021

27.10.2021 कार्तिक (कतक) गटॖ पछॖ (कृष्ण पक्ष) शॆयम (षष्ठी) देवादेव ब्वदवार (बुधवार) श्री सप्तर्षि सम्वत 5097,नक्षत्र आर्द्रा (चलान) राश कर्कट (रऻच़ हॖन्ज़ॖ 3.06 बजि प्यठॖ) ऋतु हरुद (शरद) (चलान)

****************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

***************************

  महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

***************************

तीज़मालि बदलऻव कथ तॖ द्रास अचानकन पनॖनि म्वखॖ मंज़ॖ लल द्यदि हुन्द वाक् - 

दऺमी डींठॖम नद वहवहनी

दऺमी डींठुम सुम न तॖ तार

दऺमी डींठॖम थऺर फ्वलवॖनी

दऺमी डींठुम गुल न तॖ ख़ार

बरादरन वुछ ज़ि यि वाक् वनान वनान आयि तीज़मालि हन्द्य ॳछ टऻर्य बऺरिथ। रूदुस नॖ पानस ताम। मऻजी च़ॖ हय गऺयख स्यठाह बावुक। न बा कऺशीर प्यॆयम याद। पज़र छु यी ज़ि वख छु नॖ ह्यु रोज़वुन। ॳती ताफ तॖ ॳती शुहुल। च़्येनुन तॖ च़ालुन छु इन्सानसॖय। दफ अमा पॊज़ ज़िन्दगऻनी हॖन्द्य दॊह च़ोर यॊदवय असान तॖ गिन्दान नेरन ती छु लारुन यथ सम्सारस मंज़। मगर असि कऻशिर्य बटन गव प्यवान तालि च़्यल विज़ि विज़ि। अवय गऺयम ॳछ नम हिशॖ। बरादरन द्युतनस दिलासॖ तॖ वॊनॖनस बॖ हय छुस च्यानि कथि सॗत्य पूरॖ इतिफाक थऻविथ। तिमन ति गव नॖ कम न्वक्सान कॆंह यिमव असि प्यठ ज़ुलुम कॊर। अवॖ शिनऻय गऺयख। तिमन गव न्वक्सान पनॖन्यव करतूतव किन्य, ॳस्य आयि ह्यनॖ नाहकॖ। क्वस कऺशीर कऺरॖख वऻरान तॖ वुजारॖ। बरादरस प्यव याद ज़ि यि कऺशीर ॴस वख अकि सतीसर, कश्यप वऻर, मऻज्य कऺशीर, शारदा, जन्नत बे नज़ीर, स्वर्ग मगर स्वय कशीर बनऻवॖख चांदमऻर तॖ जहनम। य्वस सान्यव ज़िठ्यव बसऻवमॖच़ ॴस कमव अरमानव सॗत्य, तमि सरज़मीनि प्यठॖ कऺड्य पर गगरव गर गगरॖय न्यबर तॖ लऺग्य ॳस्य छालन तॖ छॊम्बन। छऺकरावनॖ आयि ॳस्य तॖ ह्यॆच़ॖन असि पनॖन्य संस्कृति रावॖन्य। असि रऻव पनॖन्य परम्परा पनॖन्य ज़बान, पनॖन्य प्रज़नथ, पनॖन्य पऻर्यज़ान। तिम आयि गबि बुथि रामॖ हून्य बऺनिथ, बेछान बेछान तॖ लूठ करान करान कऻशीरि मंज़ तॖ बन्यॆयि मऻलिख तॖ छि करान राजा ताजा बॆखॊफ पऻठ्य तॖ बॆवायि पऻठ्य। कथ छि जऻरी 

****************************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

****************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)