01.04.2020

01.04.2020, च़िथ्थॖर (चैत्र) ज़ूनॖ पछॖ (शुक्ल पक्ष) ॴठम (अष्टमी) ब्वदवार (बुधवार) श्री सप्तर्षि सम्वत 5096, राश मिथुन (चलान) ऋतु बसंत (चलान)...नवरात्र (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
          रक्षा पाने का मंत्र
शूलेन पाहि नो देवि पाहि खड्गेन चाम्बिके।
घण्टास्वनेन न: पाहि चापज्यानि:स्वनेन च
**************************
         महामऻरी नाश का मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
        नुंदॖ ऱेशिन्य श्रुक्य
नामन बलॖ गॊसला करतो
हज तॖ काबॖ गुज़ारतो ज़ीवो
फम्ब कायस सलाह पऻरतो
लऻगिथ नेरतो अरज़नदीव
टॖकान तॖ पुलि सलऻच़ तरतो
अदॖ करतो मुबारक बाद छीवो
        *************
माने:- ही ज़ीवॖ! नामॖ रूपी ज़िकिरि सॗत्य याने श्रानॖ सॗत्य करतॖ मन श्वद। ॳन्दॖर्य हज तॖ काबॖच वतॖ मंडान गुज़ारतॖ पनुन वख्त यिमन पाक जायन मंज़। अरज़न दीवॖन्य पऻठ्य तुल तॖ धनुष तॖ तीरव करतन अपुज़ फना। अदॖ शूबि ॳकिस ज़ीवस मुबारकबाद, यॆलि सु पुलि सलाच़ तरनस कऻबिल बनि।
**************************
पंचान्ग:- अज़ छि दुर्गा ॴठम। यिमन द्वन दोहन यानि अज़ तॖ पगाह ॴस्य कऻशिर बट्टॖ बडॖ श्रद्धायि सान कन्यक्यन पूज़ान मगर यॆमि लटि म्यॆ बासान सप्दिनॖ ति मुम्किन ति क्याज़ि ख्वखॖमॊत छु वुछान यानि कोरोनावायरस छु दपान दूर्यॆर थऺविव, अख ॳकिस मॖ लऺगिव बुथि, गरस म़ंज़ॖय बिहिव, न्यबर मॖ नीरिव, अथॖ छऺलिव साबॖन्य सॗत्य। कन्यकॖ सॊम्बरावॖनि छु नॖ यॆमि लटि मुम्किन। कन्यक्यन पूज़ा करॖन्य ति येमि लटि बंद। यॊदवय सऻरी गरस मंज़ या परस मंज़ वारॖ वति रोज़व, स्व गऺयि बऺड पूज़ा। सु गव बॊड तीर्थॖ कऺरिथ युन। कशीरि मंज़ ओस ॳज़्यकि द्वह च़क्रीश्वरॖ मॊत आसान मत्योमुत। ब्रह्म महूरत प्यठय ओस रस्तॖ लगान बखतन हुन्द। हारी पर्वतॖ ओस शोलाव तॖ ग्रज़ान आरती, कीर्तन घन्टायि शब्दॖ तॖ शॆंकॖ नादॖ सॗत्य। प्रथ मंदरस ॴस आसान लूकन हॖन्ज़ बऺड बीरॖ। तति ओस कन्यकॖ पूज़ायि हुन्द रिवाज कमॖय पाहन यॊताम म्यॆ याद छु। ति क्याज़ि कऺशीरि मंज़ ओस असि कऻशिर्यॆन नवरात्रॖक्य द्वह मनावनुक पनुनुय तरीक पनॖनि परम्परायि मुतऻबिक  यानि ग्वडनिक्यन च़्वन दॊहन ॴस्य सऻरी न्यॆनि ख्यवान। पऻन्च़म प्यठॖ ॴठम ताम ओस आसान न्यॆनि ख्यनस ममऻनियत तॖ पतॖ नवम द्वह ॴस्य शूशनोर तॖ तऺहर या तऺहर तॖ च़रवन ह्यथ खसान च़क्रीश्वर तॖ ख्यावान जानावारन या गऻन्टन। अथ ॴस्य वनान च़ॊट खारुन। मगर बालॖ यपारि यानि कऺशीरि न्यबर लगनॖ पतॖ गऺयि यि प्रथा गऻबॖय यि दऺप्यज़ि ति तॖ वोत असि ति यिम नवरात्र मनावान तिथय पऻठ्य यिथॖ पऻठ्य यपऻरिम लूख मनावान रूद्य मगर यॆमि लटि फऻल्यॆयि महामऻरी तिथ पऻठ्य तॖ तथ वख्तस प्यठ ज़ि नवरात्रॖक द्वह या अथ असनाहस मंज़ ब्यॆयि ति कॆंह व्वतसवॖ मसलन नवरॆह या ज़ंगॖ त्रय द्वह ताम ति आयि नॖ मनावनॖ खुलॖ-डुलॖ तॖ पनॖनि आयि। महऻमऻरी हुन्द प्रकोप छु जऻरी, मरनवाल्यन हॖन्ज़ ग्रन्द छि बडान लगातार। दारि बर त्रॊपरिथ छि सऻरी पनॖन्यन पनॖन्यन गरन मंज़। कॆंह नादान लूख छि नच़ान वुनि ति अनज़ऻन्य मंज़ या ज़ऻनिथ मऻनिथ तॖ कॆंच़न जायन तॖ छि यिवान वलनॖ चलवॖनि ब्यमारि मंज़ तॖ तिहॖन्ज़ि बेकलऻज़ी सॗत्य छि कॆंह नाहकॖ ति बिचऻर्य ॴडरनॖ यिवान। हकीमन हॖन्ज़ तबाबथ छि जऻरी, हऻकिमन हुन्द रोबॖदाब ति छु जऻरी। बखत्यन हॖन्ज़ अबादत ति छि बराबर चलान। दय सॖन्ज़ि दयायि छि हलम दऻरिथ बेतऻबी सान प्रारान ज़ि कर करि मऻज्य सऻन्य अर्ज़ी मनज़ूर तॖ महामऻरी करि सानि गरॖ बरॖ निशि दूर, त्वहि निशि, असि निशि तॖ कुल्यालमस निशि।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

31.03.2020

31.03.2020, च़िथ्थॖर (चैत्र) ज़ूनॖ पछॖ (शुक्ल पक्ष) सतम (सप्तमी) बॊम्वार (मंगलवार) श्री सप्तर्षि सम्वत 5096, राश मिथुन (सुबहॖचि 6.5 बजि प्यठॖ), ऋतु बसंत (चलान)...नवरात्र (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
**************************
       सामूहिक कल्याण मंत्र
देव्या यया ततमिदं जगदात्म शक्तिया
निश्शेष देव गण शक्तिसमूह मूर्त्या।
तामम्बिकाम खिलदेव महर्षि पूज्यां
भक्त्या नता: स्म विदधातु शुभानि सा न:।
**************************
         महामऻरी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
     नुंदॖ ऱेशिन्य श्रुक्य
रूद म्यूठ फलस तॖ जटस
मुठ म्यूठ छिरॖ कटस आसे
रस म्यूठ बुडस सस म्यूठ बटस
न्यॆन्दॖर मीठ द्रऻय लद कटस आसे
         ***********
माने:- रूद छु फलस तॖ पनॖ जौंफरन क्युत मॊदुर सग। मुठ छिरॖ कटस, बुडस रस, वुगरॖ बतॖ
बटस तॖ न्यॆन्दॖर छि द्रेंठेमितिस कटस मीठ लगान।
**************************
पंचान्ग:- नवरात्रॖक्य शॆ द्वह द्रायि तॖ अज़ च़ायि ॳस्य सत्यमिस दॊहस मंज़। फ्रटॖ फ्रठ छु सॗत्य, भय तॖ खौफ़ छु ॳछन मंज़। रॖच़न रॖच़न ख़बरन छि व्वमेदवार सऻरी। प्रारान कुनि दिशायि किन्य यी ना संदेश ज़ि महामऻरी गऺयि सानि कलॖ प्यॆठ दूर। व्वश ह्यु त्रावॖहऻव मगर यॆमि रफ्तारि सान यि महामऻरी छि निवान ॳकिस ॳकिस शखसस यॆमि संसारॖ निशि दूर तॖ करानअसि निशि छ़्यनॖ बासान छु नॖ ज़ि यि तुलि थफ वुनि कॆंंच़स कालस। त्राहि त्राहि छि करान वुनि ति ॳस्य। पनॖनिस पानस छि तसलाह दिवान ज़ि दय करि असि रऻछ, अमीय आशायि सॗत्य छु असि अख अख गऺर तॖ अख अख क्षण  न्यॆरान। तनाव छु कुल आलमस। शहर-ओ गामस। माजि दुर्गायि, रऻज्ञन्यायि, शारिकायि, ज्वालायि, यि दपज़ि ति माजि हॖन्दिस प्रथ रूपस छि हलम दऻर्य दऻर्य ॳस्य मंगान तम्यसुन्द सायि रूज़िन असि सारिनी प्यठॖ युस यॆतिनस छु  रूज़िथ। शंकर भगवानस, नारायणस, परमात्माहस यानि सारिनी दीवी दीवताहऻन छि गुल्य गऺन्डिथ नमस्कार कऺरिथ मंगान ॳस्य अकि सुबॖ प्यठॖ ब्यॆयिस सुबहस ताम ज़ि ही माता असि रऻछ कर तॖ पनुन रहमतुक अथॖ थाव असि सारिनॖय कलस प्यठ। लॊतिस गॊबिस ही माता च़ॖ माफ कर तॖ च़ॖ बख़श असि। च़ॖ कर यऻरी तिमन सारिनी यिम ति यथ ज़गतस मंज़ करोर बऺद्य लूख ह्यनॖ आमॖत्य छि यथ महामऻरी करोनोवायरसकिस ज़ालस मंज़।व्यनती करान छि ही माता च़ॖ कडुख अमि ज़ालॖ मंज़ असान तॖ गिन्दान।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

30.03.2020

30.03.2020 च़िथ्थॖर (चैत्र) ज़ूनॖ पछॖ (शुक्ल पक्ष) शॆयम (षष्ठी) च़ऺन्दॖरवार (सोमवार), श्री सप्तर्षि सम्वत 5096, राश वृष(चलान) ऋतु बसंत (चलान)...नवरात्र (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
         भय नाश - मंत्र
सर्व स्वरूपे सर्वेशे सर्वशक्ति समन्विते, भयेभ्य: त्राहि नो देवी! दुर्गे देवी नमोस्तुते
**************************
         महामऻरी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
         नुंदॖ ऱेशिन्य श्रुक्य
तोशान तोशान व्वदुर बॊरुम
ज़ज़रॖय रखचस वॊलुम पान
ज़ज़ुर बऺर्गस बऺर्गस फॊरुम
कऺरिम ग्वनाह तॖ मोरुम पान
        ***********
माने:- खुशी खुशी बॊरुम वॊदुर पनुन, यॊतान्य बुजरुक ज़ज़ुर च़ाम। अज्ञऻनी ज़ॊज़रोवुस तानॖ तानॖ। यादि दय रॊस कऺरिम व्वफूर ग्वनाह। अम्युक फल रूप नऺसीब ब्रोंहकुन यिथ छुस पान मारान।
**************************
पंचान्ग:- सम्सारक्यन 199 मुल्कन मंज़ छि महामऻरी पनुन ज़ाल वाहरऻविथ वुन्युखताम। 704513 लूख छि अथ कोरोनावायरसकिस ज़दस मंज़ ह्यनॖ आमॖत्य यथ मंज़ राथ शाम ताम कुल 33,519 लूख ॴस्य वऻत्यमॖत्य जन्नतस। अमरीका छु यथ महामऻरी मंज़ सारिवॖय मुल्कन ब्रोंठ यॆति 133094 मरीज़ छि ज़ेरि शक। अमरीकाहस मंज़ छि राथ शाम ताम दपान 2363 लूकव वऺटॖमॖच़ ॳछ। चीनस मंज़ 81439 मरीज़ आमॖत्य नज़रि यिमव मंज़ॖ 3300 वऻत्य स्वर्गस। इटली मंज़ छि दशा बिल्कुल ख़राब। 10,779 लूख मूद्य राथ ताम। सऻनिस वतनस मंज़ छि कोरोनावयरसकिस दायरस मंज़ राथ शाम ताम 1024 नफ़र आमॖत्य वलनॖ तॖ यिमव मंज़ छि  दपान 27 नफ़र गऺयि स्वर्गॖवास राथ शामस ताम। संख्या छि वारॖ वारॖ हुर्रानॖय तॖ कम छे नॖ गछ़ान। मऺरीज़न हॖन्ज़ ति तॖ मरन वाल्यन हॖन्ज़ ति। अकवुहन दॊहन गरसॖय मंज़ बिहुन छु पानस मंज़ॖय अख सज़ा। कम ताम पाफ छि कऺर्यमॖत्य यिमन हुन्द फल भूगान छि ॳस्य सऻरी कुल आलमस सान।सोरुय छु बंद, जनता करफ्यु छु मुकमल। कॆंच़न जायन गव अख़बार ताम वातुन बंद।फ्लैटन मंज़ अख ॳकिस निश युन गछ़ुन बंद।  यि छु शुखुर ज़ि मोबायल छु कऻम करान तॖ अमीय यंत्रॖ दऺस्य छि ह्यकान पनॖनि गरि प्यठय ख़बर अतर या हाल चाल प्रॖछ़िथ। टी वी प्यठॖ छि वुछान रोज़ान ज़गतुक तनाव, लूकन हॖन्ज़ लाचऻरी, बेक़रऻरी, बेतऻबी, बेबसी। केंच़न जायन छु वुछनस तल यिवान ज़ि कॆच़न लूकन छु नॖ देलॖ ति चन्दस ख़र्च करनॖ बापथ। सरकार  ति छु लऺगिथ लूकन हॖन्ज़ मजबूरी दूर करनस, ख्यनॖ च्यनॖ रऺन्ग्य, पौंसॖ टूंग्य रऺन्ग्य मगर तोति छु कांह नतॖ कांह कून यिमव सुविधायवॖ निशि बेखबर, बेसहारॖ। कशमकश छि जऻरी, कूशिश छि जऻरी, प्रथ ॳकिस दऺरिस छि पनॖन्य मजबूरी। हऻकिमस ति तॖ हकीमस ति। वलिव सऻरी गछ़व माजि शर्ण तॖ मंगोस अनुग्रह तॖ अथॖरॊट। नवरात्रॖक द्वह छि चलान। ज़ारॖ पारॖ करव ॳमिस माजि ज़ि असि म्वकलाव अमि महामऻरी निशि तॖ रऻछ कर असि, सऻनिस अयालस तॖ कुल जहानस।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

29.03.2020

29.03.2020,च़िथ्थॖर (चैत्र) ज़ूनॖ पछॖ (शुक्ल पक्ष) पऻन्च़म (पन्चमी) आथवार (रविवार/ एतवार),श्री सप्तर्षि सम्वत 5096, राश वृष (चलान) ऋतु बसंत (चलान)...नवरात्र (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
     उलझनों से छुटकारा -मंत्र
सर्वाबाधा विनिर्मुक्तो धन धान्य समन्विता:
मनुष्यो मतप्रसादेन, भविष्यति न संशय:।
**************************
         महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमस्तुते
**************************
         नुंदॖ ऱेशिन्य श्रुक्य
परान परान पालुन मॊठुम
लेखान लेखान ज़ोलुम दिल
ज़िक्रि सॗती ख्वदाय टुठुम
फिक्रि सॗती रॊछुम शिल
        ***********
माने:- ज्ञानचि किताबॖ परान परान  मॊठुम यि व्यवहारस मंज़ अनुन।लीख्य लीख्य दॊदुम पनॖनुय दिल। मगर तसुन्द बजर वखनान टोठ्योम सु दय यसुन्द ज्ञान व्यवहारस मंज़ ॳनिथ कॊरुम पनुन मन श्वद।
**************************
पंचान्ग:- नवरात्रॖक्य द्वह छि चलान। अज़ च़ायि ॳस्य नवरात्रॖकिस पॗन्च़िमिस दॊहस मंज़। त्रोव पथकुन नवरॆह तॖ जंगॖत्रय। वुछ नॖ स्व चहल-पहल, सु चम-खम, सु जटॖ-जोश तिक्याज़ि कोरोनावायरस महामऻरी थऻव नॖ यिम बऺड्य द्वह मनावनस सॊम्ब सामर्थॖय। भय तॖ खौफ़ रूद युथ ज़ि गरि न्यबर नेरुन गव बंद। क्लामॖ छु ज़्यूठ प्यठ बासान ति क्याज़ि यि महामऻरी छे नॖ वुनि थफ तुलनॖच नावॖय ह्यवान। मन छु गछ़ान क्रुह तिमन लूकन हुन्द हाल वुछिथ यिम बस ॶड्डन प्यठ तरसान छि पनॖन्यन पनॖन्यन गरन वातनॖ बापथ। ॳछव मंज़ छु ऒश यिवान तिमन लूकन हॖन्ज़ हालथ वुछिथ यिमन वतन प्यठ लऻनि मंज़ बॆहनऻविथ छु ख्यन यिवान  ख्यावॖनावॖनॖ। संसारक्यन बाकय मुल्कन मंज़ छि मरनवाल्यन हॖन्ज़ ग्रन्द बडान लगातार तॖ सऻनिस वतनस मंज़ ति छु हुर्रॆ सपदान। दय ज़ानि कॊत ताम रोज़ि यि फ्रटतम असि सॗत्य ति क्याज़ि  कमर कऺसिथ छि महामऻरी फऻल्यॆमॖच़। पनॖन्य पर च़्वपऻर्य वाहरऻव्यमॖत्य अज़कल। दय गछ़ि पनुन अनुग्रह करुन असि कुल्य आलमस असि सान। रहमतॖच नज़र कर ओम् साईं बाबा, च़्यॆय मंज़ अमरनाथ च़्यॆय मंज़ छु काबा। म्वकलाव यॆमि संकटॖ निशि बखतन च़ॖ कर अख सवाबा, रहमतॖच नज़र कर ओम् साईं बाबा। मऻज्यऻय दया कर अज़ नय तॖ अदॖ कर। पापन क्षमा कर, अज़ नय तॖ अदॖ कर।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

28.03.2020

28.03.2020, च़िथ्थॖर (चैत्र) ज़ूनॖ पछॖ (शुक्ल पक्ष) च़ोरम (चतुर्थी) बटॖवार (शनिवार/ शनिश्चरवार) श्री सप्तर्षि सम्वत 5096, राश वृष (रऻच़ हॖन्ज़ॖ 7.29 बजि प्यठॖ), ऋतु बसंत (चलान)...नवरात्र (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
        विपित्ति नाश - मंत्र
शरणागत दीनार्त परित्राण परायणे,
सर्वस्यार्ति हरे देवि नारायणि नमोस्तुते।
**************************
        महामऻरी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमस्तुते
**************************
         नुंदॖ ऱेशिन्य श्रुक्य
सुबहुकि वक्तॖ फऺरिशतॖ वसन
ग्रशन क्वसॖ छवॖ आसन शय
ज़ल यिम च्यावन तॖ मल यिम कासन
तिमन यॆति ख्वतॖ तऺति आसन शय
         *************
माने:- प्रबातस न्यॆन्द्रि वऺथित यॊद दयॖ-ध्यान करनॖ यियि, फिरशतॖ मेनन तिमन इन्सानन हुन्द बाव ब्यॆयि वुछन यि ज़ीव कमि त्रायि छु संसऻर्य पकान। त्रेश रूप अमृत दिथ करन सोन प्यपास दूर। सानि मनुक संशय दूर सपदिथ गछ़ि मन श्वद। यिथिस ज्ञानॖवानस छि यॆतिकि ख्वतॖ पतॖ तति थऺज़ जाय शीरिथ
**************************
पंचान्ग:- वुछान वुछान द्राव कऻशिर्य पंडितन हुन्द ज़ंगॖ त्रय द्वह छ़्वपॖ दम कऺरिथ तॖ  दबॖ दबॖ रॊस। पत्यम्यव त्रॖहन वऺरियन हॖन्ज़ परम्परायि आव छ़्यन युहुस सु छ़्यन यमिच व्वमेद ॴस नॖ कऻन्सि स्वपॖनस मंज़ ति कऺरमॖच़। सान्यन माज्यन, ब्यॆन्यन, न्वश्यन, कोर्यन ह्यॊक नॖ यॆमि लटि अतगथ तॖ नूनॖ लिफ़ाफॖ वातॖनऻविथ संस्थायव दऺस्य तॖ न म्यूल यिमन न्वशन कोर्यॆन मोकय पनुन माल्युन ताम गछ़नुक या मंदरस ताम न्यॆरनुक। वजह छु ॳल्यफॖ प्यठ येयस ताम सारिनॖय ख़बर ज़ि महामऻरी करि वतय बंद अख ॳकिस निश मेलनॖच। ॳस्य ॴस ल्वकचारस बोज़ान ज़ि नागहॗचि बलायव निशि गछ़ि भगवान रछुन मगर माने तॊर तमि कथि हुन्द म्यॆ बासान यॆमि लटि फिकरी। च़्यून अज़ ज़ि क्वसताम शक्ति छि य्वस यि च़्यॆनॖवुन्य दिवान छि ज़ि इन्सान खऺन्यतन ख्वनॖवटॖ ख्वड ताम तोति ह्यॆकि नॖ क्वदरॖक्यन राज़न फाश कऺरिथ।यि इन्सान रोज़ि क्वदर्यतक्यन चमत्कारन निशि हर हमेशॖ अनज़ान तॖ बेखबर। सौंचान छु यि इन्सान ज़ानि दय क्याह क्याह मगर ब्रिज़िच नॖ ख़बर ज़ि सु कमि सातॖ कुस रूप दारि तॖ कस रछि तॖ कस मारि। अपुज़ॖय तॆह छि ॳमिस इन्सानस रूज़मॖच़ अज़ताम मगर ही ज़ीवॖ च़ॖ खम त्राव, नम रोज़, दम छुय ग़नीमथ, क्याह पता कल हो न हॊ। च़ॗ माजि गछ़ शर्ण माजि प्यॆ पर्ण माजि शारिकाये कर सऻ नमन। यपऻर्य वुछान छुस छि तपऻर्य क्रॗहॖन्य काव, क्रुहुन  यि ऒबराह कपऻर्य सना आव, हाव व्वंय बहार मऻज्य, बऺनिथ च़ॖ बुलबुल, व्यनॖ पोश छावय बावय द्वदॖ डुल। रऻज्ञन्या दी ॴज्ञन्या वातय बॖ तुलॖमुल। नवरात्री छि चलान। माजि दीवी छि मंगान पापन क्षमा तॖ रूगन शफा।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

27.03.2020

27.03.2020, च़िथ्थॖर (चैत्र) ज़ूनॖ पछॖ (शुक्ल पक्ष) त्रय (तृतीया) शॊकुरवार (शुक्रवार/ जुम्मा), श्री सप्तर्षी सम्वत 5096, राश मेष (चलान) ऋतु बसंत (चलान)...अज़ छि ज़ंगॖ त्रय ************************** नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ ************************** अपराध क्षमा प्रार्थना आवाहनम् नैव जानामि, नैव जानामि पूजनम्, पूजा भागम् न जानामि, क्षम्यताम परमेश्वर।। ************************** महामारी नाश का मंत्र जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा ममस्तुते ************************** नुंदॖ ऱेशिन्य श्रुक्य अन्दवन नीरिथ तप चरहाव अवहर करहऻव व्वपलहाकस तॖ हन्दे आमच़ॖय च़ख यॊद पथ करहऻव तिय यॊद करहऻव मरहऻव कन्दे ************* माने:- दूर जंगलन मंज़ यॊद तपॖक्य ॴल्य पानस करहऻव, व्वपलहाकस तॖ हन्दि हऻल कऺरिथ तऺथ्य प्यठ कनाथ करहऻव तॖ यॊद च़ख यिथ च़ापहऻव, कोबू करहऻव तॆलि क्याह ओस ज़ीवस म्वलवुन।तिय यॊद करहऻव क्याज़ि मरहऻव दर संसऻर्य। ************************** पंचान्ग:- यदा यदा हि धर्मस्य ग्लानिर्भवति भारत। अभ्युत्थानमधर्मस्य तदात्मानं सृजाम्यहम् परित्राणाय साधूनां विनाशाय च दुष्कृताम् धर्मसंस्थापनार्थाय सम्भवामि युगे युगे।। यिम छि असि कम ताम पाफॖय कऺर्यमॖत्य ज़ि ॳस्य आयि वलनॖ यथ महामऻरी मंज़ तॖ श्रॊपरोव पनुन पान कऻदॖ रूपी कमरन मंज़ तॖ न होर डलुन न योर हिलुन। हारि तोतॖ ति छि नॖ नऺन्य यिमन पनॖन्यन पापन हुन्द प्रायाश्चित करनुक व्वपाय प्रछ़हऻव। हालथ ह्यॆच़ॖन्य वारॖ वारॖ बद ख्वतॖ बद्तर गछ़ॖन्य।किचन सामग्री ह्यॆच़ॖन्य छ़्वकॖन्य, चन्दॖ ह्यॆतिन्य लॊतॖन्य। न छु ॳन्दरॖ वातनस कांह तॖ न छु न्यॆबरॖ बोज़नस कऻंह। गछ़े इनसान तॖ गछ़ि कॊत, करे इनसान तॖ करि क्याह। पनुन ग़म छु मऺशिथ गछ़ान यान्य लूकन हुन्द ग़म नज़रि छु गछ़ान टी वीयस प्यठ वुछान वुछान। छि च़ालॖन्य पनॖन्य दऻद्य पानय, वखतुक छु यी अज़ फसानय, ब्यॆनि बऻय बंध तॖ बांधव छुय व्वंय बस अख बहानय। कॊरुम त्राहि त्राहे,बॊरुत गरॖ छ़ॊर याम नज़र आम।बे-वॊपायि तॖ बेबस लूख वुछिम हतॖबऺद्य मील पैदल पकान द्वदॖ शुर्य क्वछन मंज़ ह्यॆय ह्यॆय तॖ गरॖच गरॖवेठ नखस प्यठ तुल्य तुल्य छ़ान्डान वति कुनि जाय कुल्य शॆहजारा, त्रेशॖ कतराह या यड बरनॖ बापथ च़ॊचि प्यूंता। शुर्य वुछिम बिचऻर्य कृथ नॖ कडान। महामऻरी हुन्द प्रकोप छु स्यठाह कोरूप हऻविथ वुन्यक्यनस च़्वापऻर्य सऻनिस मुल्कस मंज़ॖय योत नॖ बल्कि सम्सारक्यन बाकय केंच़न मुल्कन मंज़ ति। ज़ानि दय कॊत ताम छु असि यि कहर भूगुन ब्यॆयि।मऻज्य शारिका गछ़ि करॖन्य पनुन अथॖरॊट।सान्यन पापन क्षमा। अज़ छि ज़गॖ त्रय। नेरुन छु मन्ना। फेरुन छु मन्ना।मेलुन छु मन्ना। यॆमि लटिच ज़ंगॖ त्रय ति रोज़ि अख यादगार। अतॖगथ कुस कऺमिस दी तॖ नूनॖ पैक्यट कुस कॊत नीय। न रटनस वार न निनस वार। जंगॖ त्रय गऺयि व्वंय मनावॖन्य पनॖनिस फ्लैटस मंज़ अख कमरॖ माल्युन तॖ ब्याख कयरॖ वऻरिव ज़ऻनिथ लठ म्वकलावॖन्य। मऻज्य रऻज्ञन्या यॊद असि पनॖनि ज़ंगि तऺल्य त्रावि तॖ महामऻरी सानि गरॖ बरॖ दूर च़ऺलरावि, सॊय मानव ॳस्य अज़िच असली ज़ंगॖ त्रय। ************************** कऻशुर ह्यॆछव कऻशुर परव कऻशिर्य पऻठ्य पानॖवुन्य कथबात करव ************************** नऺविव तॖ फॊलिव भूषण कौल "दीप" (बूज़िव ॳज़्युक सबक़ म्यानि ज़्यॆवि ति) (koshursabak.blogspot.com)

26.03.2020

26.03.2020, च़िथ्थॖर (चैत्र) ज़ूनॖ पछॖ (शुक्ल पक्ष) द्वय (द्विती) ब्रसवार (वीरवार/ब्रहस्पथवार/ गुरुवार), श्री सप्तर्षी सम्वत 5096, राश मेष(सुबहॖचि 7.15 बजि प्यठॖ), ऋतु बसंत (चलान) द्रठॖपऻन्च़ुक (पंचक) ति समाप्त।
नवरात्र (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
        अपराध क्षमा प्रार्थना
करचर्ण कृतं वाक्कायजं कर्मजंवा, श्रवण नयनजं वा मानसं वा अपराधम्।
विहितम् अविहितम् वा सर्वमेततक्षमस्व, जय जय करुणाब्धे श्री महादेव शम्भो।।
**************************
       महामारी नाश का मंत्र
जयन्ती मन्गला काली भद्रकाली कपालिनी
दुर्गा क्षमा शिवा धात्री स्वहा स्वधा नमस्तुते
**************************
         नुंदॖ ऱेशिन्य श्रुक्य
यि सादॖ व्वपल हाकस तॖ हन्दे
स्वज़न सहज़य ग्रॆन्दे ज़ाव
द्वद त्रऻविथ पोन्य युस मन्दे
सु सम्सारस कन्दे ज़ाव
पर तॖ पान युस ह्युवुय वॆन्दे
सु बवॖ सॆन्दे तऺरिथ गव
        **********
माने:- युस व्वपलहाकस तॖ हन्दि मज़ॖ महसूस करि, सु रुत मनुश्य यियि ज्ञऻनी माननॖ। युस द्वदॖ बदलॖ पोन्य आसि मन्दान (क्वदॖ करनवोल) सु यियि संसऻऱय ब्यॆयि ज़न्मस। युस परस तॖ पानस मंज़ कांह फर्क करि नॖ यानॆ सारिनॖय ज़ीवन मंज़ कुन दय डेंशि, तऺस्य लगि यॆरिलूक्य अपोर तार।
**************************
पंचान्ग:- नवरॆहुक वलॖवलॖ तॖ जोश, नवरात्रक्यन दॊहन हुन्द जटॖ जोश, द्वनवय छि ख़ामोश। दमफुट्य सऻरी देशवासी तॖ परदेसस मंज़ रोज़न वऻल्य कुल आलमॖक्य लुख वुछान क्वदर्यतुक कहर कॊरॊनावायरस महामऻरी रूपस मंज़ यॆमिकि खोफॖ सॗत्य च़म्यॆमॖत्य छि सऻरी पनॖन्यन पनॖन्यन गरन मंज़, मुर्यॆन मंज़, खॗमन मंज़ तॖ प्रारान आरॖहति ज़ि कर हटि यि जनता करफ्यू तॖ तिम ह्यहऻन शाह ह्यु मगर वुन्यि छि नॖ आसार नज़र यिवान राहतक्य कॆंह। हॆह ह्यॊतुन कॆंच़न लूकन गछ़ुन यिम बिचऻर्य दु-वखॖत च़ॊट ॴस मुश्किलन ज़ेनान तॖ पनॖन्य पडाव मेनान तिमन गव ॶथ रोज़गार, कॆंह गऺयि बेकार, कॆंह गऺयि ब्यमार मगर कलॖ फेरनस छु नॖ वार तिक्याज़ि महामऻरी हुन्द यि क्यॊम यि वायरस यि न बोज़नॖ यिनॖवोल छुवाछात छु ज़ागान पनॖनिस शिकारस बेसबरी सान मगर ॳस्य ति ह्यॆतिन्य गछ़ॖन्य फान ब्यॊन ब्यॊन वजहव दऺस्य। सड़कन प्यठ तिम जानवर यिम लूकन हऺन्दिस छ़्यॆटिस ॴस मतान तॖ पनॖन्य यड बरान तिम ति छि ब्वछॆमॖत्य, तिम ति छि वुछान सुनसान वतॖ, क्रख चिख नॖ कुनि, ख्यावन वोल गऻब, तिम ति गऻमॖत्य बेबस। मगर दय छु वुछान प्यठॖकनि। तऺम्य ति आसि ज़रूर सूंचमुत ज़ि किथॖ पऻठ्य दी असि म्वकजार तॖ कडि असि अमि गमॖ मंज़ॖ, अमि संकटचि गरि मंज़ॖ असान तॖ गिन्दान। असि पज़ि थवॖन्य तस दयस मंज़ यछ़ तॖ पछ़। सास रंगॖ ज़िन्दगी छि बदलान, मनॖ मो गछ़ च़ॖ मोयूस। अज़ निराशा छि आशा पगाह रऻच़ हुन्द सफर बस छु क्रूठ।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

25.03.2020

25.03.2020,च़िथ्थॖर (चैत्र) ज़ूनॖ पछॖ (शुक्ल पक्ष) ऒक्दॊह (देवादेव) (प्रथम) ब्वदवार (बुधवार)श्री सप्तर्षी सम्वत 5096, राश मीन (चलान), ऋतु बसंत (चलान)...अज़ छु नवरेह तॖ नवरात्र शुरु...द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
**************************
           अपराध क्षमा प्रार्थना
मन्त्रहीनम् क्रियाहीनं भक्ति हीनम् सुरेश्वरी,
यत पूजिता मया देवी परिपूर्णम् तद्sस्तुमे।।
**************************
         महामारी नाश का मंत्र
जयन्ती मन्गला काली भद्रकाली कपालिनी
दुर्गा क्षमा शिवा धात्री स्वहा स्वधा नमोsस्तुते
**************************
           नुंदॖ ऱेशिन्य श्रुक्य
मीशस खश ना करनस पज़ी
ज़ान तॖ वुछ सुय कपटान
यॊद म्योन ग्वरॖ पद सज़ी
अकुय ज़ुव बडि बुह गिन्दान
          **********
माने:- मवेशन पज़िय नॖ खश करुन, ज़ानुन गछ़ि यि ज़न छु सु म्यॆ कपटान। यॊद म्योन वनुन फिक्री खसिय तॆलि छु यि पॊज़ ज़ि बडि गरिच मीज़मॖच़ सारिनॖय मंज़ कुनिय ज़ितिन्य रूप आत्मा छु तऺस्य सॗत्य ब्यॆयि लय सपदान
**************************
पंचान्ग:- सप्तार्षि स्म्वत 5095 वोत राथ अंद तॖ ॳज़्यकि प्यठॖ छु 5096 शुरु। ॳज़्यकिस दॊहस छि वनान नवरॆह यानि नवि वऺरियुक ग्वडन्युक द्वह। नवरात्रॖ ति छि ॳज़्यकि प्यठॖ शुरु। ॳज़्युक यि नवरॆह द्वह बन्याव अख एतिहासिक द्वह तिक्याज़ि यि छु सु द्वह यॆलि सोन वतन छु अज़ महामऻरी हॖन्दिस ज़दस मंज़ आमॖत्य मूजूब छि सऻरी पनॖन्यन पनॖन्यन गरन मंज़ दारि बर त्रॊपरिथ बिहिथ पनॖनिस ज़ुवस रऻछ करिथ। यि जनता करफ्यू आव ॳज़्यकि प्यठॖ अकवुहन दॊहन खऻतरॖ  ब्यॆयि ब्रौंहकुन बऺडरावनॖ। सोनुय योत देश छु नॖ बऺल्कि संसारॖक्य ब्यॆयि ति वारियाह मुलुख छि आमॖत्य वलनॖ यथ कोरोनावयरस ब्यमारि हॖन्दिस ज़ालस मंज़। नवरॆहस मंज़ ओस वखतॖ अकि मॊत आसान मत्योमुत कऺशीरि मंज़, हारी पर्वतॖ, निशात बागॖ, रामॖच़न्द्रनि, बादाम वारि, हऻरवनॖ,परीमहलॖ, च्यॆशमाशऻही, हुति यॆति मगर यिम त्रॖह वऺरी गऺयि ज़ि व्वंय छि यादनॖय लॊलॖमतॖलाय करान तॖ पनुन सु ॳन्दरिम वलवलॖ या गुब्बार कडान। ॳज़्युक नवरॆह ति रोज़ि अख यादगार बऺनिथ। आज़रस बाज़रस नॖ बुथ वुछुन। नच़ुन फ़ेरुन बंद, अख ॳकिस सॗत्य सामऻजिक दूर्यॆर थवुन। अथॖवास नॖ करुन, नालॖमॊत नॖ करुन। च़ास नॖ करॖन्य, प्वंद नॖ त्रावॖन्य, अथ  बार बार साबनि सॗत्य छलान रोज़ुन। न कांह गरॖ च़ानुन तॖ न कऻन्सि हुन्द गरॖ अच़ुन। यथ नवरॆहस प्यठ पज़्या असि अख ॳकिस मुबारक बाद द्युन  अख बॊड सवाल छु यमुक जवाब छ़ान्डुन छु मुश्किल। कॗतिस कालस छि असि बूगुन्य ब्यॆयि यि महामऻरी हॖन्दंय कठिन द्वह दय ज़ानि। यि दऺप्यज़ि ति ॳज़्युक नवरॆह द्राव पऺन्द्यॖ
**************************
कऻशुर ह्यॆछव कऻशुर परव
कऻशिर पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(,koshursabak.blogspot.com ति वुछिव)

24.03.2020

24.03.2020, च़िथ्थॖर (चैत्र) गटॖ पछॖ (कृष्ण पक्ष) मावस (देवादेव) (अमावस्या) बॊम्वार (मंगलवार) श्री सप्तर्षी सम्वत 5095, राश मीन (चलान) ऋतु बसंत (चलान) द्रठॖपऻन्च़ुक (पंचक) (चलान)...अज़ छु शामन थाल बरुन...यॆमि वऺरियुक यानि सप्तार्षि सम्वत 5095-तुक छु अज़ ॴखरी द्वह तॖ पगाह छु नवरॆह
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
         अपराध क्षमा प्रार्थना
शब्दब्रह्ममयी। स्वच्छे। देवि। त्रिपूरसुन्दरि
यथाशक्ति जपम् पूजां गृहाण परमेश्वरी
दर्शनात् पापशमनी जपात मृत्युविनाशिनी
पूजता दु:ख दौर्भाग्यहरा त्रिपूरसुन्दरी
**************************
        महामारी नाश का मंत्र
जयन्ती मन्गला काली भद्रकाली कपालिनी
दुर्गा क्षमा शिवा धात्री स्वहा स्वधा नमोsस्तुते
**************************
           नुंदॖ ऱेशिन्य श्रुक्य
नफसॖय म्योन छु मदहॊस्तो
ॳम्य हऺस्ती द्युतनस तल
क्रय करनोवनस रॊस्तो
रॊटनस क्या छुम चल
सासस मंज़ अखा लॊसतो
नतॖ सऻरी ह्यतिन तल
       *********
माने:- ॳकिस ज़ीव सुंद नफ़स छु मदहऺसिस बराबर युस यॊद नॖ गंडस यियि रटनॖ यि गछ़ि ज़ोरावार। तसॖन्द्यव कारव व्वथि रुह ति वूर्य वूर्य। मगर सु छुनॖ रॊटुन ति कुनि तिक्याज़ि ॳछ स्वखस पतॖ पतॖ फीरिथ छु ज़ीवस बासान ज़ि तस तॊग ज़िन्दगी हुन्द लुत्फ तुलुन। ही ज़ीवॖ सासॖ मंज़ॖ छु अख युस पायस प्यथ छु नफच़ कोबू कऺरिथ दय लोलस नालॖमऺत्य करान। नतॖ छु हऻवी गऺछ़िथ यि पध्यन तल मांडान।
**************************
पंचान्ग:- त्राहि त्राहि छि करान सऻरी। ख़बर कपऻर्य आयि वऺथित महामऻरी। कर च़लि, किथॖ पऻठ्य च़लि लऺग्यमॖत्य छि सौंचनि सारि ज़गतॖक्य व्यदवान तॖ सायनसदान सऻरी। अकि अंदॖ छु विज्ञान कऻम करान तॖ दॊयिमि अंदॖ छु अध्यात्मिकता ज़ोर रऺटिथ, सऻरी पीर फकीर मोलवी पंडित फादर बेतरी छि पनुन पनुन तर्क तॖ तजरुबॖ आज़मावनस लऺग्यमॖत्य। नॊसखॖ तॖ नसीयहतॖ छि अंदॖ वंदॖ अज़कल यिवान होरॖ योर वातॖनावनॖ तॖ कॆंह छि अमल करान तॖ कॆंच़व छु पुशरोवमुत दयस पान यि ज़ऻनिथ ज़ि सुय छु असली तॖ सारिनी हुन्द रऻछ़दर। यस सु बचावि तस कुस मारि। पनॖनि पनॖनि जायि छि दिलासॖ दिथ सऻरी मगर हकीकत छि यि ज़ि अख अख ज़ीव छु अमि महामऻरी म्वखॖ मरान। साड त्रॆ लछ लूख छि यिमन प्यठ शकॖच सॖच़न नच़ान छि, यिमव मंज़ॖ दपान ड्वड लछ लूकन वोत सही यलाज तॖ गयि ठीख, साड पंदाह सास लूकव वऺट ॳछ, तॖ बाकय छि ज़ेरि यलाज। यि संख्या छि सारिनॖय मुलकन हॖन्ज़ मिलऻविथ। इटली मंज़ छि करीबन पांछ़ सास लूख स्वर्गस वऻत्यमॖत्य वुन्युखताम। सऻनिस देशस मंज़ गऺयि वुन्युखताम नव नफ़र जन्नतस कोरोनोवयरस मूजूब। जन करफ्यु अलावॖ लॊग असली कऺरफ्यू ति कॆंच़न शहरन मंज़ तिक्याज़ि दपान लूख छिनॖ ईमानदऻरी सान करफ्युक पालन करान। ख़बर छि ज़ि ॳज़्यकि प्यठॖ मा यी कोनूनी कारवऻई ति करनॖ तिमन ख़लाफ यिम करफ्यु फॖटॖरावनॖच कूशिश करन। वनॖनुक मतलब छु म्यॆ ज़ि असि पज़ि संजीदगी सान पनॖनि ज़ुवॖच रऻछ करॖन्य। सरकार छुयी छु, दय ति कासि भय जलदॖय।थऺयिव यछ़ तॖ पछ़ पनॖनिस पनॖनिस ग्वरस मंज़, इष्ट दीवस मंज़, पनॖनिस पानस मंज़।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

23.03.2020

23.03.2020,च़िथ्थॖर (चैत्र) गटॖ पछॖ (कृष्ण पक्ष) च़्वदह (देवादेव) (चतुर्दशी) च़ऺन्दॖरवार (सोमवार), श्री सप्तर्षी सम्वत 5095,,राश मीन (शामन 6.36 बजि प्यठॖ), ऋतु बसंत (चलान), द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
         अपराध क्षमा प्रार्थना
आपन्नोस्मि शरण्योsस्मि सर्वास्था च सर्वदा
भगवन्तम् प्रपोन्नोsस्मि रक्षमाम शरणागतम्
**************************
         महामारी नाश का मंत्र
जयन्ती मन्गला काली भद्रकाली कपालिनी
दुर्गा क्षमा शिवा धात्री स्वहा स्वधा नमोsस्तुते
**************************
          नुंदॖ ऱेशिन्य श्रुक्य
श्यॆ वन च़ीनिथ शशकल वुज़ॖम
प्रकथ हुज़ॖम पवनॖ सॗत्य
अशकॖ नारॖ वऻन्लिज बुज़ॖम
छुम अशक माशोक़ ह्यमन सॗत्य
          ***********
माने:- यूगॖक्य श्यॆ पडाव तय ंकऺरिथ वुज़ेयम शशकल सपदुस आनन्दमय। लगातार यूग सादना करनॖ सॗत्य गऺयॆम प्रकथ न्यर्मल। दय लोलॖक्य नारॖ तऺपिथ वुछुम सु माशोक पानसॖय सॗत्य।
           (भावार्थ)
यॆमिस बख्तिस दिव्य दृष्टि प्राप्त सपदि तस छु ॴसकि तालॖ मंज़ॖ अमृत पशपान। यॆमि सॗत्य सु ख्यन च्यनॖ रॊस ज़िन्दॖ छु रूज़िथ ह्यकान
**************************
पंचान्ग:- ब्यॊन ब्यॊन व्वपाय छि यिवान छ़ान्डनॖ ब्यॊन ब्यॊन ज़ऻच़व दऺसय ताकि युथ यि आमॖच़ महामऻरी गछ़ि सानि गरॖ बरॖ दूर तॖ गछ़ि नष्ट बरॖ पूरॖ। राथ रूद कऺरफ्यु सुबॖ प्यठॖ शाम ताम च़्वापऻर्य। टी वी प्यठॖ नन्यव ज़ि जनता करफ्यू रूद मुक्कमल तॖ मऺछ ति ओस नॖ वति नज़रि यिवान फक्थ तिम युहुन्द आसुन ओस दरकार। 31 मार्च 2020-हस ताम दपान बंद आव करनॖ सोरुय यानि रेलॖ आयि रद्द करनॖ, मैट्रो चलनि गऺयि बंद।स्कूल काल्यॆज छि बंदॖय, गरव प्यठॖ बूज़र्गन हुन्द बेमतलब न्यबर नेरुन गव बंद, माल तॖ सिनेमा हाल छि बंद।यि दऺप्यज़ि ति सोरुय भारत बंद छु अकत्रॖह मार्च ताम।दफ्तरन मंज़ आयि छ़्वकरावन कर्मचारी तिमन वॊनुख ज़ि गरि प्यठय दफतरॖच कऻम करॖन्य। इकदामात छि यिवान तुलनॖ पऺह्यपनॖ ताकि यि महामऻरी गऺछ़ नॖ लूकन ताम वातॖन्य। राथ आयि थाल वायनॖ पनॖन्यव पनॖन्यव बालकऻनियव प्यठॖ, गन्टायि आयि वायनॖ, शंख-नाद आव दिनॖ जायि जायि प्यठॖ।बजन कीर्तन आव करनॖ रैडियो भाद्र प्यठॖ तॖ कऻश्र्य समाजक्यन लूकन आयि व्यनती करनॖ ज़ि तिम परन मंत्र पनॖनि पनॖनि गरि प्यठॖ रेडियोभाद्र प्यठॖकिस मंत्रस सॗत्य सॗत्य तॖ युथ यि बासि सामूहिक आरती। दायरॖ आव जनता करफ्युक बऺडरावनॖ। यिम जायि वलनॖ आयि अथ ज़ालस मंज़ तिम जायि ति आयि बंद करनॖ। महामऻरी छि पनुन असर तॖ रफ़तार वारॖवारॖ तेज़ हयवान करॖन्य। ग्रन्दि तलॖ छु ननान ज़ि राथ शामन ताम ॴस्य क़रीबन साड च़्वदह सास लूख  मौतकिस ॴसस मंज़ गऻमॖत्य कुल आलमस मंज़। सानि पनॖनि वतनॖच हालत ति छॆ नॖ साज़गार कॆंह ताहम वुन्युखताम छु दयन परदॖ कॊरमुत तॖ रहमतॖच नज़र छु कऺरिथ। पांछ-सथ नफ़र बिचऻर्य दपान मूद्य वुन्युखताम ब्यॊन ब्यॊन अलाक़न यंज़।बकाया छि ज़ेरि यलाज। लूख छि पनॖनि पनॖनि आयि ईश्वरस शफा मंगान। कांह छु पाठ परान तॖ कांह छु पूज़ा करान। दपान अस्पतालन मंज़ छि कुनि कुनि चीज़च कमी मॊहसूस करान लूख मगर यि ति छु अख पज़र ज़ि थॊद वऺथ्य वऺथ्य छि हकीम तॖ हऻकिम कूशिश करान ज़ि कम ख्वतॖ कम ज़ख गॊछ़ वातुन असि लूकन।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

22.03.2020

22.03.2020, च़िथ्थॖर (चैत्र) गटॖ पछॖ (कृष्ण पक्ष) त्रुवाह (देवादेव) (त्रॆयॊदशी) आथवार (रविवार/ एतवार) श्री सप्तर्षी सम्वत 5095, राश कुम्भ(चलान) ऋतु बसंत (चलान)..द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
         अपराध क्षमा प्रार्थना
माता भवानि च पिता भवानि,
बन्धु भवानि च गुरु भवानि
विद्या भवानि द्रविनम भवानि
यतो: यतो: यानि ततो भवानि
**************************
        महामारी नाश का मंत्र
जयन्ती मन्गला काली भद्रकाली कपालिनी
दुर्गा क्षमा शिवा धात्री स्वहा स्वधा नमोsस्तु ते
**************************
          नुंदॖ ऱेशिन्य श्रुक्य
पानय पुज तॖ पानय कसाब
पानय पानस यिवान ग्राख
पानय पानस ह्यवान हिसाब
छु पानय माज़ तॖ पानय श्राख
         ************
माने:- सु दय छु पुज ति पानय तॖ क्वलाब ति। पानय पानस छिस ग्राख ति यिवान। गाहे छु पऻन्य पानस हिसाब ह्यवान, गाहे छु माज़ ति तॖ श्राख ति पानय।
           (भावार्थ)
यॆलि क्वकर्म कऺरिथ तम्युक फल असि नऺसीबॖ रूप छु ब्रौंठकुन यिवान, ॳस्य छि पायस प्यथ पानस साम ह्यवान। साम ह्यवान ह्यवान हीनॖ बावॖ पऻदॖ सपदिथ छि दयस कुन रजू सपदान। अमि विज़ि छिनॖ ॳस्य पनुन पान पुजि रूप अथस क्यथ श्राख ह्यथ क्वलाबस कुन पनुनुय पान अवेज़ान त्रऻविथ तिकॖ तिकॖ करान । तानॖ तानॖ कऺरिथ छि पतॖ तिमनॖय  कॖनान यिमव वथ ॴसॖस डऻज्यमॖच़। यानि ॳन्द्रिम्यन च़ूरन छु वनि कडान
**************************
पंचान्ग:- अल्यन्द्यन थपॖ। ती ह्यॊत असि व्वंय करुन। राथ शामन आयि थालॖजि वायनि, शेंकॖ-शब्द आयि दिनॖ। सामूहिक प्रार्थना तॖ जंत्री मंज़ॖक्य कॆंह लीलायि तॖ बजन आयि परनॖ शामन सति बजि प्यठॖ नवन बज्यन ताम। रेडियोभाद्रस प्यठ ॴस्य ग्वडय आमॖत्य यिम बजन रिकार्ड करनॖ तॖ कऻशिर्य पंडितन आव व्हाटसापॖ दऺस्य यि वनॖनॖ ज़ि तिम ग्यॆवॖन यिम बजन रॆडियो आवाज़ि सॗत्य सॗत्य। लूकव कॊर ती पनॖन्यन पनॖन्यन गरन मंज़ बिहितॖ जंत्री पानस ब्रौंठॖकनि थऺविथ यि सूंचिथ ज़ि क्याह पताह दयस मा यी आर तॖ बोज़ि सोन ज़ार पार तॖ दी असि ॶमि महामऻरी निशि म्वकॖजार। क्याह पताह कोबिस लथ मा गछ़ि कारगर यि सुंंचिथ द्युत लूकव साथ थालजि वायनस मंज़, शंख वायनस मंज़, मंत्र परनस मंज़। थालज वायनस तॖ वंख वायनस ॴस बाकय ज़ऻच़ हॖन्द्य ति लूख। खोफ़ज़द छि सऻरी वुन्यक्यनस, ह्यॊन्द या मुसलमान, सिख या ईसऻयी। प्रथ धर्मॖक लूख छि परेशान। ट्रेन चलनि गऺयि बंद, हवऻई जहाज़ वुडॖन्य गऺयि बंद। अज़ छु आमुत वनॖनॖ ज़ि सुबॖ प्यठॖ शाम ताम लगि जनता कऺर्फ्यू तॖ लूकन छि हिदायत आमॖच़ दिनॖ ज़ि तिमन पज़ि नॖ नेरुन पनॖन्यव पनॖन्यव आल्यव यानि गरव मंज़ॖ। मानॖनॖ छु यिवान ज़ि महामारी मा गछ़ि ख़तम यिम क़दम तुलनॖ सॗत्य  वुछव अम्युक ति क्याह असर प्यॆयि सऻनिस दुशमन रूपी कोरोनावायरस रुपी यथ महामऻरी प्यठ।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

21.03.2020

[21/03, 04:33] B L KAUL DEEP: 21.03.2020, च़िथ्थॖर (चैत्र) गटॖ पछॖ (कृष्ण पक्ष) बाह (देवादेव) (द्वादऺशी) बटॖवार (शनिवार/ शनिश्चरवार), श्री सप्तर्षी सम्वत 5095, राश कुम्भ (सूबहॖचॖ 6.19 बजि प्यठॖ) ऋतु बसंत (चलान)...ॳज़्यकि प्यठॖ छु द्रठॖपऻन्च़ुक (पंचक) ति शुरु
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
        अपराध क्षमाप्रार्थना
त्वमेव माता च पिता त्वमेव,
त्वमेव बन्धु: च गुरु त्वमेव
त्वमेव विद्या द्रविनम त्वमेव
त्वमेव सर्वंम् मम गुरुदेव
**************************
        महामारी नाश का मंत्र
जयन्ती मन्गला काली भद्रकाली कपालिनी।
दुर्गा क्षमा शिवा धात्री स्वहा स्वधा नमोsस्तु ते
**************************
           नुंदॖ ऱेशिन्य श्रुक्य
बॖ छुस अकुय सॗत्य गॊछ़ुम यार
यारस सॗत्य दम दम पकॖ
यार नय डेंशन गुल गछ़्यम ख़ार
यॆति म्योन यार तति म्योन मकॖ
            ************
माने:- ही ज़ीवॖ च़ॖ छुख कुन, यि छरॆर च़लिही तॆलि यॊद च़ॖ मेलॖहख पनॖनिस यारस युथ तस सॗत्य लरि लॊर पकिथ करहऻख पनॖन्य ज़ान।यॊद नॖ च़ॖ पनुन पान प्रज़नावख पोशॖ रूपॖ मन च्यॊन गछ़ि खार।यॆत्यन च़ॖ यार डेंशहऻन सुय छुय च्योन मकॖ
**************************
पंचान्ग:- दय सॖन्ज़ि दय गऺच़ नमस्कार। कति ॴस पताह ज़ि पनुन पान प्यॆयि श्रपरावुन पनॖनिस गरस मंज़ तॖ कुल आलमस अख भय अच़ुन ज़ि युथ नॖ ऱवख करि कोरोनावायरस सोन कुन। अमि महामारी नी सासॖ बऺद्य लूख ॴडरिथ ब्यॊन ब्यॊन दीशव प्यठॖ तॖ वुनि छि ज़ागान ब्यॆयि ति कॆंहन। दपान यॆलि तॆलि युथ खोफज़दॖ ओस इन्सान गछ़ान यिछ़वॖय हिशव बलायव सॗत्य सु ओस पनुन पान बेवसीलॖ ज़ऻनिथ पुशरावान दयस तॖ ज़ारॖ पारॖ करान ज़ि यिछ़व बलायव निशि दितॖ असि म्वकजार। युथुय ह्यु क़दम तुल गुडगांवक्यव कॆंच़व बख्तव तॖ दोपुख अज़ यानि अकवुह्यमि मार्च तॖ बटॖवारि शामन बेहमव सऻरी पनॖन्यन गरन मंज़ तॖ करव प्रार्थना तॖ मंत्र उच्चारन सिरिफ द्वन गन्टन सति बजि प्यठॖ नवन बज्यन ताम यथ मंज़ जंत्री मंज़ हऻविथ कॆंच़न मंत्रन दिमव फ्युर तॖ परव पनॖनि पनॖनि जायि रॆडियोभद्रस सॗत्य सॗत्य। पनॖनिस लैपटापस प्यठ या मोबाएलस प्यठ बूज़िव रेंडियोभद्र यथ प्यठ यिम मंत्र छि ग्वडय आमॖत्य वनॖनॖ। तऺथ्य सॗत्य सॗत्य छु परुन असि ति पनॖनि जायि बिहिथ तॖ बनावॖन्य यि प्रार्थना तॖ मंत्र उच्चारन सामूहिक विश्वसत्रस प्यठ। महामऻरी च़ऺलरावनुक छु यि ति अख व्वपाय। तॖ रटिव जंत्री ब्रौंठकनि तॖ पऺरिव सऻरी समिथ शामन सति बजि प्यठॖ नवन बज्यन ताम यानि द्वन गन्टन मन लगऻविथ। क्याह क्याह छु परुन सु छु हऻविथ अलग पऻठ्यन।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)
[21/03, 04:35] B L KAUL DEEP: *सामूहिक प्रार्थना तॖ मंत्र उच्चारन*
करनुक व्यच़ार छु आमुत करनॖ अकवुह्यमि मार्च ज़ॖ सास वुह यानि पगाह शामन 7.00 बजि प्यठॖ 9.00 बजन ताम। यि प्रार्थना तॖ मंत्र उच्चारन मी करनॖ रॆडियोभद्र दऺस्य। *रेडियोभद्र* कडिव लिस्नटुमयरेडियो मंज़ॖ तॖ बूज़िव पनॖनिस लैपटापस यमोबाईलस प्यठ। सऻरी समिव पनॖन्यन *पनॖन्यन गरन मंज़ शामन 7.00 बजि प्यठॖ 9.00 बजन ताम तॖ रटिव पनॖन्य जंत्री* या पंचान्ग पानस ब्रौंठॖ कनि तॖ पऺरिव तोह्य ति रेडियोहस सॗत्य सॗत्य।
6.45 शाम...समिव सऻरी पूज़ायि
       जायि या ठोकुर कुठिस मंज़
7.00 शाम... *ह्यमज़ा सतम....*
       (जंत्री हुन्द सफॖ 35)
 ....    *गायत्री मंत्र*
......   अभिनवगुप्त शिवस्तुति
       *(वयाप्त चराचर....सफॖ 41)*
.......शिव चामर     *(अतिभीषण..*
        सफॖ 65)
 ....शिवाय नम: *(आधार ज़गतुक*
      सफॖ 68)
.......विष्णु स्तुति *(जय नारायण..*
        सफॖ 75)
.......गौरी स्तुति *(लीलारब्धस..*
        सफॖ 101)
....... *इन्द्राक्षी स्तोत्र*(सफॖ 128)
...... आरती *(जय जगदीश...*
        सफॖ 140)
*जय शारदा - जय मऻज्य कऺशीर*
        ...................

20.03.2020

20.03.2020, च़िथ्थॖर (चैत्र) गटॖ पछॖ (कृष्ण पक्ष) बाह (द्वादऺशी) शॊकुरवार (शुक्रवार/जुम्मा) श्री सप्तर्षी सम्वत 5095, राश मकर (चलान) ऋतु बसंत (चलान)...चूंकि बाह छि ज़ॖ गछ़ान, ॳज़्युक वॊहरवोद यी पगाह यानि अक्वुहमि मार्च
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
             शान्ति पाठ
उं द्यौ: शान्तिरन्तरिक्ष गुं शान्ति पृथ्वी शान्तिरापा: शान्तिरोषधय: शान्तिवनस्पतया: शान्तिर्विश्वदेवा:  शान्तिर्ब्रह्म शान्ति: सर्वगुं शान्ति: शान्तिर व शान्ति सा मा शान्तिरेधि।।
ऊं शान्ति शान्ति शान्ति ऊं
**************************
       महामारी नाश का मंत्र
जयन्ती मन्गला काली भद्रकाली कपालिनी।
दुर्गा क्षमा शिवा धात्री स्वाहा स्वधा  नमोsस्तु ते
**************************
          नुंदॖ ऱेशिन्य श्रुक्य
नार गछ़ि सॖहुन तॖ आर गछ़ि गालुन
अदहऺर गछ़ि करुन व्वपलहाकस तॖ हन्दे
हदॖ गछ़ि रटुन तॖ मदॖ गछ़ि वालुन
वॆह गछ़ि च़ालुन तॖ तवॖ अच़ि ज़ि ग्रन्दे
श्वब गछ़ि कांछुन तॖ लूब गछ़ि मारुन
पान गछ़ि तारुन बुहु स्यॆन्दे
        ***********
माने:- नार च़ऻपिथ गछ़ि नॖ आर पानस प्यठ युन तिक्याज़ि त्यॆलि छि नॖ ह्यकन फऻसलॖ दिथ। व्वपलहाकस तॖ हन्दि हॖन्ज़ गछ़ि आदत या ज़ऻहिरी प्रॆय करॖन्य। मन शॆमॖरऻविथ गछ़ि दम करनावुन। तसॖन्दि दूरिरुक वॆह च़ऻलिथ बनख थ्यर बऺखॖत्य। सारिनॖय क्युत गछ़ि रुत कांछुन तॖ लूब मारुन। नॆशकाम बावॖ कर्मव लबख अदॖ यॆरिलूक्य तार।
**************************
पंचान्ग:- तनाव छु च़ु तरफानॖ। महामऻरी हुन्द प्रकोप छु ज़बर्दस्त। आपातकाल स्थिति ह्यॆच़ॖन्य बनॖनन्य। लूख छि वाकऺई गाबरेमॖत्य। सडकॖ छि खऻली खऻली नज़र यिवान। कीटनाशक दवा छु यिवान छक्कॖनॖ मकानन, दफ्तरन, दुकानन, अस्पतालन, स्कूलन, कालिज्यन, वाहनन यि दऺप्यज़ि ति बाकॖय आटोहन, कारन, गाड्यन, ट्रकन, होटलन, मंदरन, मस्जिदन। यि दऺप्यज़ि ति कूनॖ कूनॖ छु दवा यिवान छकॖनॖ तॖ अमि महामऻरी निशि बचनॖक्य व्वपाय यिवान करनॖ। ज़ानि दय यि हाल कॗतिस कालस रोज़ि चलवुन। मगर त्रऺहऱयोमुत छु इन्सान पऺज़्य पऻठ्य। म्यानि तरफॖ त्वहि अख व्यनती छुस यछ़ान बॖ करुन ज़ि पनॖन्यन शुर्यन कट्यन हुन्द पूरॖ पूरॖ ख़याल थवुन, ज़िठ्यन त बुॖज़र्गन हुन्द खयाल थवुन। पनॖनि पानुक ख़याल थवुन। मऻज्य दीवी करि रुतुय रुत।
************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

19.03.2020

19.03.2020, च़िथ्थॖर (चैत्र) गटॖ पछॖ (कृष्ण पक्ष) काह (एकादशी) ब्रसवार (वीरवार/ब्रहस्पथवार/गुरुवार), श्री सप्तर्षी सम्वत 5095, राश मकर (चलान) ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
            शान्ति पाठ
ऊं भद्रं कर्णोभि: श्रृणुयाम् देवा: भद्रं पश्येम-अक्षिभि:-यजत्रा।
स्थिरै: अन्गै: तुष्टिवान्स:-तनूभि: व्यशेम देवहितं यदायु:।
स्वस्ति न इन्द्रो वृद्धश्रवा: स्वस्ति न: पूषा विश्ववेदा:।
स्वस्ति नस्ताक्षर्यो अरष्टिनेमि: स्वस्ति नो बृह्स्पतिर्दधातु।
ऊं शान्ति शान्ति शान्ति ओम्
**************************
          नुंदॖ ऱेशिन्य श्रुक्य
मनस खय कास ज़न आईनस
तवॖ ज़नम गछ़ी ज़ऻनी ज़ान
थलि थलि क्या छुय शुर्य म्वखॖ पानस
मरनस ब्रोंठ मर सुय छुय ज्ञान
         ************
माने:- हे ज़ीवॖ पनॖनिस मनस कर मल तिथयपऻठ्य दूर यिथॖ ॳस्य ॴनॖ छिन साफ़ करन। श्वद मन ह्यॆकि मनुष्य तस दयस सॗत्य ज़ान कऺरिथ। दय गछ़ि हर हमेशॖ पानस सॗत्य थवुन यॆमि सॗत्य दय लोल ललॖनऻविथ तॖ रगन सऺनिरऻविथ बासि मनुष्यस हर च़िह्य पनुन पान मरान तसॖन्दिस लोलस मंज़। असली ज्ञान छु सुय।
**************************
पंचान्ग:- छ़्वपॖ छि च़्वापऻर्य तिक्याज़ि कोरोनोवायरस ब्यमऻर्य आयि व्वतलिथ ॳकिस महामऻरी हॖन्दिस रूपस मंज़। यि ब्यमऻर्य दपान गऺयि पऻदॖ चीनस मंज़ तॖ फऻलान फऻलान वऻच़ सऻनिस वतनस मंज़। वुछनॖ छु आमुत ज़ि यि ब्यमऻर्य छि ॳकिस इन्सानस प्यठॖ ब्यॆयिस इन्सानस तरन वाज्यन ब्यमऻर्य तवॖ म्वखॖ दपान गछ़ि नॖ अख ॳकिस सॗत्य अथॖ मिलनावुन। कम से कम शॆ फुटॖ दूर्यॆर थवुन पानॖवुन्य। अमि महामऻरी निशि बचनॖ बापथ आयि तऻलीमी अदारॖ बंद करनॖ, माल बंद करनॖ, सिनेमाहाल बंद करनॖ, कॆंच़न दफ्तरन मंज़ आयि मुलऻज़मन हदायत दिनॖ ज़ि तिम करन गरि प्यठय दफतरॖच कऻम।अस्पतालन मंज़ आयि ज़रूरी इकदामात तुलनॖ युथ तिम ह्यकन पनॖनि यलाजि सॗत्य अथ ब्यमारि मुकाबलॖ कऺरिथ। हवऻई अडन प्यठ, रेल्वे स्टेशनन प्यठ आयि बचावॖक्य वसीलॖ छ़ान्डनॖ। एहत्ययात छु यिवान वरतावनॖ ज़ि यिम बुज़ुर्ग लूख छि तिम गछ़न नॖ कॆंच़स कालस पनॖन्यव पनॖन्यव गरव मंज़ न्यबर नेरॖन्य। ववमेद छि ज़ि यि महामऻरी यी जल्दॖय कोबूहस मंज़। लऺगिथ छि हर धमॖक्य लूख अज़कल ॳथ्य कामि मंज़ छ़ान्डान ब्यमारि निशि बचनॖक्य व्वपाय। हालात वऻत्य यॊत ताम ज़ि बऺड्य बऺड्य धर्मस्थल यानि शिर्डी, वैष्णवदीवी तिरुपति मंदरन हॖन्द्य किवाड आयि बंद करन ताकि लूकन हुन्द जमाव युथ नॖ पऻदॖ गछ़ि तॖ ब्यमारि हॖन्दिस ज़ालस मंज़ लूख फसन। वारियाह लूख गऺयि मऺरिथ, वारियाहन छु यलाज चलान तॖ वारियाह छि आमॖत्य आम लूकन निशि ब्यॊन थावनॖ तिक्याज़ि तिमन मंज़ छु अमि ब्यमारि हॖन्द्य आसार नज़र आमॖत्य। यि महामऻरी छि फऻल्येमॖच़ ब्यॊन ब्यॊन मुल्कन मंज़। सोन वतन ति छु आमुत अथ ज़दस मंज़।भगवान गछ़ि करुन पनुन परदॖ।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

18.03.2020

18.03.2020,च़िथ्थॖर (चैत्र) गटॖ पछॖ (कृष्ण पक्ष) दऺहम (दशमी) ब्वदवार (बुधवार) श्री सप्तर्षी सम्वत 5095, राश मकर (रऻच़ हॖन्ज़ॖ 7.24 बजि प्यठॖ) ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
           शान्ति पाठ
राज स्वस्थि प्रजा स्वस्थि देश स्वस्थि तथैवच, यजमान गृहे स्वस्थे स्वस्थ मौ ब्रहमणेषु च।
नन्दणतु साधका सर्वे विनष्यन्तु विदूषिका, अवस्थाम् शामभवीमsस्तु प्रसन्नस्तु गुरु सदा।
*************************
         नुंदॖ ऱेशिन्य श्रुक्य
बुगि कंदि छावहम हर्यन
वुछख नॖ गनॖ तुलर्यन मऻछी
बॊम्बरा तॖ रोज़ि नॖ थर्यन
नहकॖ छन्यन लर्यन करव रऻछी
         ************
माने:- अज्ञऻनियस छावि दय बठ्यन कुन यॆलि गनॖ तुलर्यन हॖन्द्य पऻठ्य वुछि वुम्बरि माछ बनऻविथ पानॖ खऻली आमुत। बॊम्बुर(आत्मा) ति दरि नॖ पोशॖ रॊस थर्यन प्यठ। नाहकय छि ॳस्य पतॖ छ़रिनॖय लर्यन रऻछ करान यॆलि स्व क्रॆय करनॖ रॊस ज़िन्दॖ रोज़ुन छु बेमकसद।
**************************
पंचान्ग:- ज्योतिष हिसाबॖ छि यिमन सतोवुहन नक्षत्रण ब्यॊन ब्यॊन पहचान। प्यॆठ प्यॆठ वुछव ॳस्य ज़ि केंह नक्षत्र छि कुनि कुनि कामि बापथ श्वब यिवान मानॖनॖ तॖ कॆंह अश्वब। यिमनॖय मंज़ छि पांछ़ नक्षत्र तिम यिमन ॳस्य   द्रठपऻन्च़ुक वनान छि। अथ द्रठपऻंच़कस मंज़ छि कॆंच़न काम्यन हुन्द करुन अश्वब यिवान मानॖनॖ। द्रठपऻच़कस मंज़ मरुन छु नॖ यिवान ठीख मानॖनॖ मगर कॆंच़न जान काम्यन प्यठ छु नॖ अम्युक असर प्यवान। यिमनॖय नक्षत्रण छि ॳस्य महूर्तुक रूप दिवान रोज़ान। सफ़रस मंज़, खान्दरन व्वछ़ब मंज़, ज़्यनस मरनस मंज़, गरॖ बनावन मंज़, परनस लेखनस मंज़ वगैरा वगैरा कामि छि ॳस्य यिमय नक्षत्रण वुछ्य वुछ्य करान रोज़ान। इस्लिए छु यिमन सारिनॖय नक्षत्रण महत्व आमुत दिनॖ ब्यॊन ब्यॊन चीज़व बापथ। प्रथा ॴस कऺशीरि मंज़ ज़ि कांह ति कऻम करनॖ ब्रौंठ ॴस्य पनॖनिस क्वलॖ ब्रह्मनस प्रछ़ान ज़ि सात छा किनॖ न। सफ़रस नेरनॖ ब्रौंठ ति ॴस्य सात वुछान। यॊदवय सात आसिहे नॖ आसान मगर नेरुन ओस ज़रूरी आसान, प्रस्थान ॴस्य कालय थवान कऺडिथ, प्रस्थान यानि कांह इस्तिमाल करन वोल चीज़, बूठ, बन्यान, टूप्य वगैरा ॴस्य गरॖ न्यबर ग्वडय वातॖनऻविथ तॖ यॆमि द्वह नेरुन ओस आसान, न्यबर नीरिथ ॴस्य सु चीज़ लऻगिथ अदॖ सफ़रस नेरान वख्तॖ अकि। यि प्रथा छॆ नॖ व्वंय म्यॆ बासान रूज़मॖच़।  यिमन नक्षत्रण हुन्द फल छु ह्यकान वऺनिथ सुय यस ज्यॊतिष ज्ञान आसि तॖ यस सऺही महऻरियत आसि। श्वब अश्वब तॖ द्रठपऻन्च़ॖकॖक्य नक्षत्र छि ....
श्वब:-  हस्त, अश्वनी, पुनर्वस, अनुराधा, तिष्या, मृगशर तॖ रेवती।
अश्वब:- भरनी, कृतिका या क्रछ़,
ॴद्रा, अशलेशा, मघा, चित्रा, स्वाति तॖ विशिखा
द्रठपऻन्च़ुक : धनिष्टा, शताबिशेक, पूर्व भाद्रा, उत्तर भाद्रा तॖ रेवती।
यिमन मंज़ छि ब्यॊन ब्यॊन चीज़व बापथ ब्यॊन ब्यॊन नक्षत्रण ब्यॊन ब्यॊन महत्व आमुत दिनॖ। व्याख्या ह्यॆकि अख ज़ऻन्यकारॖय ज्यॊतिष कऺरिथ ।
**************************
कऻशुर ह्यॆछव तॖ कऻश्युर पऺरव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(koshursabak.bligspot.com ति वुछिव)

17.03.2020

17.03.2020 च़िथ्थॖर (चैत्र) गटॖ पछॖ (कृष्ण पक्ष) नवम (नवमी) बॊम्वार (मंगलवार) श्री सप्तर्षी सम्वत 5095, राश धनु (चलान) ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
           शान्ति पाठ
ऊं शंनोमित्र:। शं वरुण:।शं नो भवत्वर्यमा। शंनो इन्द्रो बृहस्पति:।
शं नो विष्णुरुरुक्रम:। नमो ब्रह्मणे। नमो वायवे नमस्ते वायो। त्वमेव प्रत्यक्षं ब्रह्यासि। त्वमेव प्रत्यक्षं ब्रह्म वदिष्यामि। ऋतं वदिष्यामि। सत्यं वदिष्यामि। तन्मामावतु, तद्वकतारमवतु, अवतु, मामवतु वक्तारं। ओम् शान्ति शान्ति शान्ति ओम्
**************************
           नुंदॖ ऱेशिन्य श्रुक्य
साहब द्वह अकि दोरा फिरे
यथ संसारस करि लूरॖ पार
द्वन आस्मानन ब्यन मा दरे
सतन तुलि यॆति दफतरवार
गऻरस तॖ ज़ेरस हऻज़रे
दियि नुन्द्यन जनत तॖ डॗंठ्यन नार
             *********
माने:- सु दय करि अकि द्वह संसारस संहार। द्वन आस्मानन तॖ सतन ज़मीनन करि कुन। कयामऺच़ॖ द्वह सऻरिय इकॖवटॖ सऺमिथ यॆलि हऻज़री दिन, दय ज़ालि अज्ञऻनियन नरकॖनि नारॖ, यिम नुंदॖ ऱयशनि त्रायि पकन यानि  ज्ञऻनियन दियि स्वर्गस मंज़ जाय।
**************************
पंचान्ग:- बाहव राश्यव पतॖ करव ॳस्य ऱवख नक्षत्रण कुन। सानि पंचान्गॖ मूजूब छि वऺरियस मंज़ सतोवुह नक्षत्र यिम दॊहय बदलान छि रोज़ान तरतीब वार। यिहिन्द्य नाव छि-1. अश्वनी 2. भरणी 3. कृतिका (क्रछ़) 4. रोहिनी 5. मृगस्त्रा 6. ॴर्द्रा 7. पुनर्वस 8. पुष्यामि 9. अश्ल्यॆशा 10. मघा 11. पूर्व फाल्गुनी 12. उत्तरा फाल्गुनी 13. हस्त 14. चित्रा 15. स्वाति 16. विशाखा 17. अनुराधा 18. ज्यॆष्टा 19. मूला 20. पूर्वाषाढा 21. उत्तरा आषाढा 22. श्रवणा 23. धनिष्टा 24. शताबिशा 25. पूर्व भाद्रा 26.उत्तर भाद्रा 27. रेवती - यिम नक्षत्र छि इन्सानसॖन्ज़ि रऻश सॗत्य सॗत्य पकान रोज़ान। बाहन रऻश्यन मंज़ छि यिम सतोवुह नक्षत्र पनॖन्य जाय बनावान रोज़ान। ज्योतिषाचार्याहव छु अख अख नक्षत्र च़्वन च़्वन पादन मंज़ बऻगरोवमुत तॖ ॳकिस रऻश्य मंज़ छु स्वाद ज़ॖ पाद आसान तॖ करान छि पूरॖ परिक्रमा यिमन बाहन राश्यन मंज़ रूज़िथ। यिमन नक्षत्रण मुतलक करव ब्रौंहकुन कथ पगाह।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

16.03.2020

16.03.2020, च़िथ्थॖर (चैत्र) गटॖ पछॖ (कृष्ण पक्ष) ॴठम (अष्टमी), च़ऺन्दॖरवार (सोमवार),श्री सप्तर्षी सम्वत 5095,राश धनु (दुहचि 11.11 बजि प्यठॖ), ऋतॖ बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
**************************
             गुरु स्तुति
ब्रह्मानन्दं परम-सुखदम केवलं ज्ञानमूर्तिं।
द्वंद्वातीत गगन-सदृशं तत् त्वं अस्यादि लक्ष्यम।।
एकं नित्यं विमलं अचलं सर्वदा साक्षिभूतम्।
भावातीतं त्रिगुण-रहितं सद्गुरुं तं नमामि।।
**************************
            नुंदॖ ऱेशिन्य श्रुक्य
च़ॖय दिवॖ दरथस तॖ गरथस पज़ख
च़ॖय दिवॖ क्रंज़न हूंदुय छ़ांफ
च़ॖय दिवॖ ठॆन्यव रॊस्तुय वज़ख
कुस छुय पॊन्य तॖ कुस छुय पाफ
           ***********
माने:- हे दय च़ॖय छुख ज़मीन तॖ आकाशस मंज़ व्यराजमान। क्ंज़न हुंद आकार दिथ छुख च़ॖ ज़ीवुथ दिनॖवोल। ठस ठिस रॊस वऺज़िथ पाप तॖ पॊन्य ज़ाननवोल ति छुख च़ॖ पानय
**************************
पंचान्ग:- राथ वुछ्य असि वऺर्यिक बाहन ऱयतन हॖन्द्य कऻशिर्य नाव। सॗती वुछ्य असि हफ़तस मंज़ दॊहन हॖन्द्य कऻशिर्य नाव। अज़ पकव ब्रौंहकुन तॖ करव रऻश्यन मुतलक कथबात। ॳकिस वऺरियस मंज़ छि बाह रऻश तॖ सतोवुह नक्षत्र आसान। बाहन रऻश्यन हॖन्द्य नाव छि 1. मेष (Aries) 2. वृष (Taurus) 3. मिथुन (Gemini) 4. कर्कट (Cancer) 5. सिंह(Leo)
6. कन्या (Virgo) 7. तुला (Libra) 8. वृश्चिक (Scorpio), 9. धनु (Sagittarius) 10. मकर (Capricorn) 11. कुम्भ (Aquarius) 12. मीन (Pisces). यॆलि शुर् थनॖ प्यवान छु यानि यथ संसारस मंज़ ज़न्म ह्यवान छु। अमि सॖन्दि ज़्यनॖ विज़ि छु यिवान वुछनॖ ज़ि राश क्वस छि चलान तमि वख्तॖ। स्वय राश छि ॳमिस शुरिस सॗत्य पकान सारि वऻन्सि। अमि रऻश मुतऻबिक छु यिवान ॳमिस शुरिस सुन्द ज़ातुक   बनावनॖ, ट्यॆकिन्य यिवान बनावनॖ। ज्योतिश छु रऻश हुन्द प्रभाव वुछिथ ॳमिस बचॖ सुन्द  ज़ातुक  बनावान तॖ सॗती छु वनान  गवडॖ प्यठॖ ॴखरस ताम रऻश फल तॖ अमिस शुर्य सुन्द भविष्य क्युथ रोज़ि कमि कमि सातॖ तॖ सॗती कॆंच़न कॆंच़न चीज़न जान बनावनॖ बापथ कॆंह कॆंह व्वपाय ति। कथ छि जऻरी
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
  नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

15.03.2020

15.03.2020, च़िथ्थॖर (चैत्र) गट पछॖ (कृष्ण पक्ष) सतम (सप्तमी) आथवार (रविवार/एतवार) श्री सप्तर्षी सम्वत 5095, राश वृश्चिक (चलान) ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
**************************
             गुरु स्तुति
एकं पूर्णं निर्मलहृदयमद्वैतम्
मयातीतं मोक्षोपायं परिव्राजम्
एकऊंकारं परमाराध्यं परमेशम्
वन्दे गुरुदेवं शिष्याराध्यं यतिपादम
**************************
            नुंदॖ ऱेशिन्य श्रुक्य
आशक़ तिम यिम पाक रछन बदन
आशक़ हूरॖ वातनख खऺज़मॖच़ॖय
आह तॖ व्वशि ल्यॆदऱयख बदन
द्यवॖ कुनि म्वखॖ डॆंशन सूरच़ॖय
बिहिशतस ब्रोंठ तिमय पान लदन
यिम यॆति लोलॖ तिहंदि वदन यऺच़ॖय
            ***********
माने:- पऺज़्य आशक़ छि तिमय यिम यॆन्द्रियन कऻबू कऺरिथ पापव निशि पनुन पान दूर थवन। बेशक वातन हूर तिमनॖय निश पऻन्य पानय सीव करनि। लोलॖ नारॖ सॗत्य दज़ान दज़ान त्रावान तिम व्वश। दय लोलस मंज़ यॊतान्य ॴखॖरकार तिमन सपदि साक्षातकार तॖ डेंशन सारिनॖय ज़ीवन मंज़ कुन दय। यिम तिहॖन्दिस लोलस मंज़ ऒश हारान आसान, तिमय प्रावन स्वर्गस मंज़ जाय।
*************************
पंचान्ग:- राथ वुछ सारिवॖय कऻशिर्य बट्व सुबहस न्यॆन्दरि व्वथित थालस बुथ तॖ कॊरुख पतॖ पनुन नित्य कार्यक्रम। सौंथ मानि बसंत ऋतु गव रातॖ प्यठॖ शुरु। त्वहि आसि याद ज़ि ॳस्य कऻशिर्य छि छावान कुल शॆयव कॖसमव मोसुम ॳकिस वऺरियस मंज़। यिमन ऋतु-अन छु ब्यॊन ब्यॊन नाव ब्यॊन ब्यॊन ज़बान्यन मंज़। सानि कऻशिर्य ज़बऻन्य मंज़ छु यिमन मोसमन यानि ऋतु-अन हॖन्द्य नाव 1. बसंत (सौंथ या बहार)2. ग्रीष्म 3. वर्षा (वऺहरात) 4. शरद (हरुद) 5. हेमन्त 6. शिशर। यिथय पऻठ्य छि वऺरियस मंज़ बाह ऱयथ आसान तॖ यिहिन्द्य नाव ति छि 1. च़िथ्थॖर 2. वह्यक 3. ज़्यॆठ 4. हार 5. श्रावुन 6. भऻद्रप्यथ 7. ॴशिद 8. कार्तिक 9. मॊंजहोर 10. पॊह 11. माघ 12. फाल्गुन।  तिथय पऻठ्य छि हफ्तॖक्य दॊहन हॖन्द्य नाव ति कऻशिर्य ज़बऻन्य मंज़ ब्यॊन। नाव छि 1. च़ऺन्दॖरवार 2. बॊम्वार 3. ब्वदॖवार 4. ब्रसवार 5. शॊकॖरवार 6. बट्वार 7. आथवार। म्यऻन्य व्यनती छि म्यान्यन ब्यॆन्यन तॖ बायन ज़ि तिम ह्छनऻवॖन्य  पनॖन्यन शुर्यन पनिनि ज़्बऻन्य मंज़ ऱयतन हॖन्द्य नाव, दॊहन हॖन्द्य नाव तॖ तिमन कऺरिव पऻर्यज़ान पनॖन्यन पंचान्गॖच़।
अमि अलावॖ वुछव कऻशीरि मंज़ कुस कुस फल यानि म्यवॖ छु आसान तति अल्बतॖ हकीकत छि यी ज़ि म्यवॖ छु तती मगर ॳसी छि नॖ तति। च़ून्ठ्य, टंग, बबगोश, त्रेल, च़ेर, च़ॖनॖन्य, ॴर, ग्वरदऻल्य, गिलासॖ (चेरी), डबल गिलास, ॴल्यचि, दछ, दऻन, बादाम, डून्य, क्यनॖबऺब्य, बम्च़ूंठ, खरबूज, ह्यन्दव्यन्द, तुल्य।  यिमन म्यवन मंज़ छि ब्यॊन ब्यॊन कॖसॖम यिहिन्द्य नाव यिन नॖ यॆतिनस वनॖनॖ। कथ छि जऻरी
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

14.03.2020

14.03.2020, च़िथ्थॖर (चैत्र) गटॖ पछॖ (कृष्ण पक्ष) शॆयम (षष्ठी) बटॖवार (शनिवार/शनिश्चरवार) श्री सप्तर्षी सम्वत 5095, राश वृश्चिक (सुबहॖचि 6.40 बजि प्यठॖ), ऋतु बसंत
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
           गुरु स्तुति
कालातीतं कालकरालं कलिनाशं,
कश्मीरस्थं शारदापीठम् काशीशम
ब्रह्मानन्द ब्रह्मस्वरूपं ब्रह्मर्षि
वन्दे गुरुदेवं योगारूढं गुरुमूर्तिम।।
**************************
           नुंदॖ ऱेशिन्य श्रुक्य
यॆम्य ह्यॊत तिहॖन्दि बरॖतलॖ ज़ागुन
तस पनॖन्य शरबत पानॖ चावे
छिस पऻथॖर ब्यॊन ब्यॊन अकुय छु मागुन
सु यस टोठि तॖ सुय अदॖ प्रावे
         ************
माने:- युस दय द्यानस मंज़ थ्यर रोज़ि तस च्यावि सु पनॖन्यव अथव असलुक म्वय। सु दय छु कुनुय मगर ब्यॊन ब्यॊन रंगव छु तम्बलावान यस बख्तिस सु टोठि, सुय प्रावि तस।
**************************
पंचान्ग:- अज़ छु न्यॆन्दरि वऺथितॖय अथस बुथ वुछनॖ पतय राथ शामन बऺर्यमॖतिस थालस बुथ वुछुन तॖ भगवानस मंगुन ज़ि यि सौंथ यानि बहार, नॊव बहार नीरिन्य ह्रॊच़ तॖ फ्रूच़। थालस मंज़ छि कुल त्रुवाह चीज़, यानि क्वदऱयतॖक सऻरी रुप छि अथ थालस मंज़ समिथ। सु गव अन्न (त्वमुल), ग्वडॖ ग्वडॖ ॴस्य थवान दानि, व्वंय छि थवान त्वमुल, बत्तॖ (यानि अन्न देवता), ब्रड (ग्वडॖ ॴस्य थवान कान्दॖर्य वानुक कुल्चि), व्वंय छि थवान ब्रड, क़लम-दवात या प्यन यानि सरस्वती, पौंसॖ यानि लक्ष्मी, पोश यानि प्रकृति यानि बहारॖच निशऻनी (सोंतस प्यठ छि फॖलय नेरान, पोश फ्वलान, नव्यन पोशन बामन फटान, कुल्यन कट्यन ज़ुव अच़ान, टेकॖबट्यन तॖ यॆम्बॖरज़ल पोश बारसस यिवान, बसंतुक आग़ाज़ छु सौंथ, पतॖ गयि डून्य यानि डूनिस अंदर च़ोर गोजि छि च़्वन वेदन हुन्द प्रतीक मानॖनॖ आमुत (च़ोर वेद यानि ऋग्वेद, अथर्वेद,यॆजुर वेद तॖ साम वेद), ओम द्वद, यानि अमृत, ज़ामुत द्वद यानि उत्पादन, वऺय-गंडॖर यानि औषधि (वय छु जडी बूटी तॖ कॆंच़न दाद्यन दवा ता दपान वय गन्डुर तॖ डून्य गूज ख्यनॖ सॗ्त्य छि म्यादॖ/यॆड मंज़ नॖ कुनि कॖसमॖच्य ब्यवऻर्य नॖ व्वतलनॖ दिवान तॖ छु  स्यठाह फऻयदॖमंद रोज़ान, क्रॗलॖ पछ यानि ब्रह्मांडस मंज़ नक्षत्रन हॖन्ज़ गतिविधि हुन्द ज्ञान हावान, नून यानि जीवन-स्वाद, नून छि सानि ज़ऻच़ मंज़ जान श्वगुन यिवान मानॖन, ॴनॖ यानि पनुन अक्स या पनॖन्य छवि नज़र यिवान अर्थात पनुन पान परज़ॖनावान या पानस अंदर नारायण सुन्द वास च़्यॆनुन तॖ रॖच़ कऻम करनॖच निष्ठा पऻदॖ करॖन्य। यिमन बुथ वुछिथ छि पतॖ श्रान ध्यान करान तॖ मनोकामना स्यद गछ़नॖच यछ़ तॖ पछ़ पानस मंज़ बऺडरावान। वारॖ कारॖ यॆछ़िन्य असि सारिनॖय नॊव बहार छावुन तॖ अख ॳकिस पज़ि मनॖ लोल तॖ माय बावुन। काव करान टाव टाव, हऻर वनान सौंथ आव, बिल्यबिचुर रॖच़ शॆछ ह्थ यिवान। कोरोनोवायरस निशि पनुन पान  बचावुन। साबॖनि सॗत्य ठीख पऻठ्य अथॖ ख्वर छलॖन्य ।शुर्यन कट्यन पनॖन्यन परहेज़ करुन हॊरॖ योर नच़नस फेरनस, यारन दोसतन सॗत्य व्वथनस बॆहनस। गाबरुन नॖ। दय करि रहमतॖच नज़र असि सारिनॖय। यस मन आसि साफ़ तस सऻरी ग्वनाह माफ।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

13.03.2020

13.03.2020, च़िथ्थॖर (चैत्र) गटॖ पछॖ (कृष्ण पक्ष) च़ोरम(देवादेव)(चतुर्थी) शॊकुरवार (शुक्रवार/ जुम्मा),श्री सप्तर्षी सम्वत 5095, राश तुला (चलान) ऋतु शिशर (चलान)....चूंकि पगाह छि पऻन्च़म रावान, पगहुक वॊहरवोद यी ॳज़्य यानि च़ोरम द्वह
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
           गुरु स्तुति
ज्ञानं ज्ञेयं ज्ञान प्रसारं ज्ञानेन्द्रं
ज्ञानाकारं ज्ञान प्रबोधं ज्ञानतत्वम्
एकं नित्यं विश्वाराध्यं हृदिवेशं
वन्दे गुरुदेवं शैवयतीन्द्रं भगवन्तम्
**************************
            नुंदॖ ऱेशिन्य श्रुक्य
यामथ नॖ तफ, ज़फ क्रेशी
तामथ नॖ ग्रऺन्ज़ द्वह मंज़ च़ाव
यामथ नॖ सऺहिथ अन तवॖ प्रशी
तामथ सु रॆशतोन कति आव
            **********
माने:- यॊद नॖ तसॖन्दि दर्शनॖच कामना करख तॆलि कति यियि सु अथि। युथुय ही ज़ीवॖ च़ॖ तप ज़फ रूपॖ कमऻय करख, तिथुय आसि स्वय गऺर यॆलि च़ॖ दय पूज़ि हॖन्ज़ि ग्रऺन्ज़ मंज़ अच़ख। यॊद बरदाशतॖ करनुक मादॖ सपदिय नॖ पऻदॖ, पनुन व्वजूद गछ़ी लूपस। पतॖ कति रोज़ि रॆश्यतोन यॆलि नॖ च़ॖ तऺस्य सॗत्य मस आसख सपदमुत।
**************************
पंचान्ग:-अज़ छु शामन थाल बरुन यानि थालस मंज़ त्वमुल, क़लम-दवात या प्यन, डून्य, ओम् द्वद, ज़ामुत द्वद, पोश, बत्त फॊल, लक्ष्मी यानि पौंसॖ, वाय गन्डॖर, फोटु (कऻन्सि दीवी-दीवता सुन्द), ॴनॖ, नून, ब्रड या च़ॊट थावुन। अथ थालस छु पगाह सुबहऻय न्यॆन्दरि वऺथितॖय बुथ वुछुन तॖ अथ सामग्री बऺरिथ थालस प्रणाम करुन। यि करनॖ सॗत्य छि ॳस्य नऺविस सौंतस मंज़ प्रवेश कऺरिथ भगवानस यि मंगान ज़ि यिवुन समयस मंज़ स्वख तॖ सम्पति मेलॖन्य। बसंत बहार यछ़ुन छावुन। मगर याद छु थावुन ज़ि अज़ युस थाल बरव तथ प्यठ छॆ नॖ नऺव जंत्री थावॖन्य। नऺव जंत्री छि थावॖन्य थालस प्यठ दॊयिमि लटि यानि 24.03.2020 द्वह ति क्याज़ि 25.03.2020 द्वह छु नवरेह यानि नॊव वऺरी शुरू। पगहॖकि प्यठॖ गछ़ि बसंत ऋतु ति शुरु यानि पगहॖकि प्यठॖ छु बहारुक मोसॖम। ह्रॊच़ तॖ फ्रूच़ नीर्यनवॖ यिनॖवोल सयय त्वहि सारिनी म्यॆ ह्यथ सॗत्य। विक्रमी सम्वत 2076 वोत अज़ अंद मगर सप्तार्षि सम्वत 5095 वाति अंद 24.03.2020 शामन माने सोन नॊव वऺरी गछ़ि 25.03.2020 प्यठॖ शुरु।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

12.03.2020

12.03.2020, च़िथ्थॖर (चैत्र) गटॖ पछॖ (कृष्ण पक्ष) त्रय (देवादेव) (तृतीय) ब्रसवार (वीरवार/ब्रहस्पथवार/ गुरुवार) श्री सप्तर्षी सम्वत 5095,राश तुला (सुबहॖचि 5.34 बजि प्यठॖ), ऋतु शिशर (चलान)...अज़ छि संकट च़ॊरम (संकट निवार्ण चतुर्थी) ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
            गुरु स्तुति
सत्यं शान्तं शान्तस्वरूपं सत्पन्थं
सन्तं सख्यं सज्जनहृदयं सच्चरितम्
शुद्धं बुद्धं बोधस्वरूपं बोधव्यम्
वन्दे गुरुदेवं त्रिगुणातीतं गुरुपादम्
**************************
          नुंदॖ ऱेशिन्य श्रुक्य
व्वंदनय गऺन्ड्यज़ि तॖ कऻम कति नेरे
वॆह नय खॆज़ि स्रॆह कति फेरे
योरॖनय गऺछ़ि्यज़ि तॖ तोरॖ क्वत यिज़े
लूब नय आसि तॖ वॊन कति यिये
           ************
माने:- तऺहिया कऺरिथ यॊद नॖ मन गंडस मंज़ रटनॖ यियि, तॆलि कति प्रावहोन दय। तसॖन्दिस लोलस मंज़ यॊद नॖ दिल लोलॖ व्यह महसूस करि, तसुन्द श्रॆह रूप ज़खमन दग कति करि महसूस। यॊद नॖ ज़ीव मरि ज़न्म कति ह्यॆयि तॆलि, यॊद नॖ दय लोलच कामना दिलस मंज़ आसि, दय कति लबहोन तॆलि
**************************
अज़ छि फुर्सत। हूल्य ति म्वकलॆयि। सौंथ छु यिनॖवोल। कऻशिर्य सब्ज़ियन दिमव ब्यॆयि अकि फिरि फ्युर ताकि सान्यन शुर्यन ताम वातन यिमन सब्ज़ियन हॖन्द्य नाव। शुर्यन हॖन्द्यन मऻलिस माजि छि व्यनती ज़ि तिम कडन पनॖनि कॗमती समयि मंज़ॖ रछ़ा ब्रुंज़ाह समय तॖ पनॖन्यन शुर्यन ह्यॆछनावन यिमन सब्ज़ियन हॖन्द्य नाव। यिम सारेय सब्ज़ीय ॴसॖ ॳस्य कऺशीरि मंज़ ख्यवान रोज़ान ततिक्यन शहरन या गामन मंज़ मगर बालॖ यपऻर्य लगनॖ पतॖ रोज़ॖ कॆंह सब्ज़ी कऺशीरि मंज़ॖय तॖ केंच़न सब्ज़ियन हुन्द सेवन छि ॳस्य यॆति ति करान रोज़ान। अख खुशी हॖन्ज़ कथ छि ज़ि योर यिथ मिट्यव असि गामॖ शहरुक भेद भाव तॖ बासान ज़न बट्टॖ कथताम नऺविस आलमस मंज़ ह्यु आव।
सब्ज़ियन हॖन्द्य नाव छि :
अल (ज़ीठ अल/ गोल अल), अलॖ
कान्जि, ऒबुज, नुनर, मीथ्य,
हाक् या हाख (बऺद्य हाक्, कान्युल हाक्, काछॖ हाक्, वारि हाक्, तीलॖ ग्वगुल हाक्), गाज़ॖर,शिमला मिरिच, मर्च़ॖवांगन(नील्य/व्वज़ॖल्य), म्वन्जि, मुजि (गोल मुजि/ज़ेछि मुजि), गॊग्जि (सादॖ/फार्मी गॊग्जि), हन्द, ह्यडर, कनॖगॖछ(क्रॖहॖन्य), राज़मा ह्यम्बॖ
ठूलॖ राज़मा, करेलॖ, त्वरैलॖ, व्वस्तॖ हाक्, व्वपलहाक्, क्रछ़, लीसॖ, बुम्म, फूल गोबी, बन्द गोबी, स्वच़ल, नदॖर्य(डलॖक्य/वॊलॖरॖक्य), मटर,ओलुव(वॆठ्य ओलव/दर्मियऻनी/ल्वकॖट्य निक्य या ठूलॖ ओलव), टमाटर, वांगन(वॆठ्य बुज़ॖ वांगन/स्यॆद्य हाकॖ वांगन/फूलॖ वांगन), बम्ब-च़ूंठ्य, च़ॊक्य-मॊदुर्य च़ूंठ्य
"""""""""""""""""""""""""""""""""""""""""""
हॊखॖ स्युन: अलॖ हचि, वांगन हचि, करेल हचि, हॊछि फूल गोबी
"""""""""""""""""""""""""""""""""""""""""""
वारिमुठ, म्वन्गॖ दाल (सोबूत म्वन्ग/दुखऻन्ट्य/छेजमॖच़ म्वन्गॖ दाल), चन्नॖ दाल,करॖ दाल, अर्हर दाल, माह दाल, हॊछि राज़मा (छच़ल राज़मा)
"""""""""""""""""""""""""""""""""""""""""""
कटॖ माज़ (मछ़, रोगन-जोश, कऺलियि, यखॖन्य, कबरगाह, रिस्तॖ, ग्वशताबॖ, च़ॊक च़रवन, शूशॖनोर, छिछर, डऺम्यनि, पाचॖ, कऻड्य)
"""""""""""""""""""""""""""""""""""""""""""
क्वकुर (चिक्कन),पऺछिन, गाडॖ (पचॖ हॊगाडॖ/रज़ हॊगाडॖ/गुरन/रामॖ गुरन) कऻशिर्य गाडॖ, पंज्येब गाडॖ, ट्रौव्ट गाडॖ(प्रंगॖचि ट्रौव्ट गाडॖ)
"""""""""""""""""""""""""""""""""""""""""""
लऻर (बागॖ लऻर), गन्डॖ, पुदनॖ,न्यॊम मवल, ॴल्यचि च्येटिन्य, डून्य च्यॆटिन्य,अदर्क, रोहनॖ
**************************
हालांकि कऻशुर बट्टॖ ओस नॖ वख्तॖ अकि यिमव मंज़ॖ कॆंह कॆंह चीज़ ख्यवानॖय, मसलन गंडॖ, रोहनॖ,टमाटर मगर व्वंय छि टास कऺड्य कऺड्य ख्यवान रोज़ान। अज़कल कुस कऺम्यसुन्द छु बोज़ान। दय ति तिमन त्युथुय सोज़ान।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

11.03.2020

11.03.2020, च़िथ्थॖर (चैत्र) गटॖ पछॖ (कृष्ण पक्ष) द्वय (देवादेव) (द्विती) ब्वदवार (बुधवार) श्री सप्तर्षी सम्वत 5095,राश सिंह (चलान) ऋतु शिशर (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
           गुरु स्तुति
यो गुरु स शिव: प्रोक्तो य: शिव: स गुरु स्मृत:।
उभयोरन्तरं नास्ति गुरोSपि शिवस्य च।।
**************************
            लल वाक्
कॆंच़न द्युतथम ओरय आलव
कॆंच़व रचेयि नालय व्यथ
कॆंच़न मस चथ ॳछ लजि तालव
कॆंच़न पऺपिथ गय हालव ख्यथ
          ************
अर्थात:- प्रभू ने कुछ को स्वयं ही बुलाया तो कईयों ने प्रभू को पाने के लिए पानी में पर्याप्त स्नान संध्याएं की। कुछ ने तो प्रभू के चिंतन में मस्त होकर दृष्टि ऊपर टिका दी, तो कई की फ़सल पक कर भी टिड्डियों द्वारा नष्ट की गई
             (भावार्थ)
कितना भी परिश्रम करो, संध्या स्नान करो, किंतु ईश्वर अनुग्रह ही सर्वोपरि है। अर्थात जिस पर प्रभू की कृपा हो वही परम सत्य को प्राप्त होता है।
            (लक्षार्थ)
मनुष्य ने शरीर पाकर भी प्रभू को न पाकर जीवन व्यर्थ कर दिया।
**************************
            नुंदॖ ऱेशिन्य श्रुक्य
बुह बयि सुत तॖ शरदार त्रोवुम
सऻरॖय वुम्बरि छऻवॖम अकॖय कऻन्थ
सहज़ॖ ज़लॖ यॆलि शरीर नोवुम
बिहिथ सऻर कॊरुम एकांथ
           **********
माने:- संसऻर्य शुर्य, बब-मऻज तॖ बयि त्रऻविथ सारिय वुम्बरि स्वरुम ॳक्यसुन्दुय नाव। दयि ज्ञानॖ रूप ज़लॖ कॊरुम शरीर श्वद तॖ पाक। यॆमि किन्य गरि बिहिथॖय कॊरुम सऻर्यसॖय ब्रह्मांडस सऻर
**************************
पंचान्ग:- कऻशुर बट्टॖ रूद अज़ ताम दुच़्यॆतिस मंज़ म्यॆ बासान कुनि कुनि रन्ग्य। अख रंग रूदुस पंचान्ग यानि विजयेश्वर जंत्री। पऺत्यम्यव कॆंच़व वऺरियव प्यठॖ आव वुछनस तल ज़ि यि जंत्री ख़ास कर ओंकारनाथ जीयिन विजयेश्वर पंचान्ग छॆ नॖ भरूसॖ करनस लायक़ व्वंय। अमि सॗत्य छु इन्सान पनॖनॖहेनि निशी डलान।तिज़न गव ज़ि हेरथ ॴस हावनॖ आमॖच़ अक्वुहमि फर्वरी य्यॊस मनावनॖ आयि वुहिमि फर्वऺरी, स्वति यॆलि तथ मुतलक ओस बऺहस चल्योमुत ज्यॆमिस मंज़ कॆंच़न व्यद्धवानन मंज़ तॖ ओस यि निर्नय छापनॖ आमुत अख़बारस मंज़ युस नॖ सारिनॖय लूकन ताम वोतॖमुत ओस। नतीजन मनऻव लूकव द्वनवऺनीय दॊहन हेरथ। यिथय पऻठ्य छि आमॖच़ हूल्य दिवस हावनॖ पुनिम द्वह यानि ऊतरॖ माने नऺवमि मार्च मगर मनऻव लूकव राथ यानि दऺहमि मार्च। ऊतरॖ बूज़ुम ओस होली दहन द्वह आमुत मनावॖनॖ तॖ हूल्य आयि गिन्दनॖ राथ। कॆंच़व म्यान्यव बायव मनऻव हूल्य ऊतरय यानि नऺवमि मार्च मगर आम लूकव मनऻव हूल्य राथ। हालांकि कोरोनोवयरस वऺहमॖ मूजूब आव नॖ होली जेशॖन ज़्यादॖ हाव बावॖ सान मनावनॖ मगर हूल्य गिन्ज़ लूकव, खूच़्य खूच़ी सऺही, मगर गिन्ज़ॖख। व्हाटसाप रूद ग्रज़ान होल्य हुन्द मुबारक ॳकिस ब्यॆयिस सोज़नॖ सॗत्य, होलि हॖन्द्य फोटु सूज़्य सूज़्य वगैरा वगैरा। हूल्य नीरिन्य सारिनॖय ह्रॆच़ तॖ फ्रूच़। म्योन वनुन छु ज़ि द्वयव मंज़ॖ पज़ि असि व्वंय ॳक्यसॖन्ज़ॖय जंत्री पानॖनावॖन्य तॖ दुच़्यॊत दूर करुन। व्वंय छु थाल बरुन बुथि अथ प्यठ करव ब्रौंहकुन कथ बात।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

10.03.2020

10.03.2020,च़िथ्थॖर (चैत्र) गटॖ पछॖ (कृष्ण पक्ष) ऒक्दॊह (प्रथम)
बॊम्वार (मंगलवार) श्री सप्तर्षी सम्वत 5095, राश सिंह (चलान) ऋतु शिशर (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
           गुरु स्तुति 
यस्य स्मरणमात्रेण ज्ञानमुत्पध्यते स्वयम।
स एव सर्व सम्पत्तिस्तस्मै श्री गुरुवे नम:।।
**************************
            लल वाक्
मंदछि हऻन्कल कर छ़्यन्यम
यॆलि ह्यडुन गेलुन असुन प्रावॖ
आरुक जामॖ कर सना दज़्यम
यॆलि ॳन्दरिम खार्युक रोज़्यम वारॖ
           ***********
अर्थात:- लज्जित होने की मेरी ज़ंजीर कब टूटेगी? जब ग्लानी, निंदा, हंसी को सहन कर सकूंगी, तथा रीति रिवाज रूपी वस्त्रों को कब जलादूं? यह तब ही सम्भव है जब मेरा मन रूपी घोडा मेरे नियंत्रण में रहेगा।
            (भावार्थ)
मन शांत और काबू में हो तो शर्म, ग्लानि, निंद्या, रीति, किर्ति अपकीर्ति आदि का कुछ भी प्रभाव मन पर नहीं पडता है। इस वाक् में ललेश्वरी अपने हृदय की स्वच्छंद अवस्था की कामना करती दिखाई देती है।
**************************
           नुंदॖ ऱेशिन्य श्रुक्य
ज़्यवॖवुन दॊपहम अलकास मलकास
खलकस छ़न्डिथ ॳन्यहम दाय
नानि हॖन्ज़ श्राख कोनॖ छ़न्यहम हलकस
पॊछ़ ॴसिथ ति ज़ज़ ह्यॆन्य तॖ क्याय
             ***********
माने:- माजि हॖन्दि थनॖ प्यनॖ विज़ि वॖज़ॖनऻविख अलख तॖ मलख। यिथॖ तिथॖ ॳनिख दाय, यॆम्य मऻज्य पीनॖनऻविथ बॖ प्योस थनॖ।म्यॆ छु फेरान ज़ि नान च़टनॖ विज़ि कोनॖ छ़ॖन्य नॖ दायि स्व श्राख म्यऻनिस हऺटिस तिक्याज़ि यिथॖ ति खऻर्य म्यॆ पापॖन्य बऻर्य यथ पऺछ़्य रूपॖ पानस
**************************
पंचान्ग:- राथ ओस सानि पंचान्गॖ हिसाबॖ हूल्य गिन्दनुक द्वह यानि हूल्य व्वत्सव मगर कऻत्यहव मनऻव्य यि हूल्य राथ, म्यॆ छु बासान नदारतस बराबर तिक्याज़ि अख बॊड कारण छु ओसमुत कोरोनोवायरस। बोज़नॖ तलॖ आव ज़ि, यि छि छूत छात ब्यमऻर्य शायद या ॳकिस ब्यॆयिस लाग लगनॖच ब्यमऻर्य। तमि मूजूब छु आमुत वनॖनॖ ज़ि अख ॳकिस निशि पनुन पान दूर थावुन।अख ॳकिस सॗत्य नॖ अथॖवास करुन, नालमॊत नॖ करुन, ज़्यादॖ ब्रौंहकुन नॖ रोज़ुन कऻन्सि वगैरा वगैरा। रंगस मंज़ ति दपान मा आसि अमि ब्यमारि हुन्द असर तॖ अमि मूजूब यूत पज़ि ति त्यूत रंग अख ॳकिस मथनस परहेज़ करुन। इन्सान त्रऺहर्यव यि बूज़िथ तॖ ह्यॊतुन लॊब। लूकव कॊर हिरासॖ हूल्य गिन्दनस यानि रंग लागनस अख ॳकिस। दॊयिम वजह छु यि ज़ि सानि जंत्री मंज़ छि लीखित पुनिम द्वह मानि राथ हूल्य मगर बाकॖय ह्यॆन्द्यन दपान हूल्य छि अज़। तिहन्दि हिसाबॖ ॴस राथ होली दहन। तमि हिसाबॖ छि तिमन हूल्य अज़ यानि दऺहमि मार्च। कऻत्या गिन्दन कऻत्याह गिन्दन नॖ, यि ननि अज़।अड्यव कॊर होली दहन राथ यानि हूल्य ज़ालनॖच प्रथा म्वकलऻवॖख राथॖय। ब्यॊन ब्यॊन जायन छि हूल्य ब्यॊन ब्यॊन आयि यिवान गिन्दनॖ तॖ यि द्वह मनावनॖ मगर असि कऻशिर्यन मंज़ ओस अमि दुहुक जोश हना कमॖय पाहन कऺशीरि मंज़ अल्बतॖ ज्यॆमिस मंज़ ॴस्य कऻशिर बटॖ ति यि द्वह मनावान खुलॖ डुलॖ। कॆंच़न जायन छु यि त्योहार रोज़ान सतन दोहन चलवुन तॖ होली मिलनॖकि द्वह छु वातान अंद मगर कोरोनोवायरसन छि खऻरमॖच़ तॗर सारिनिय तॖ अमि मूजूब क्युथ रोज़ि अज़्यकि दुहुक असर तॖ कऺच़न दॊहन रोज़ि अम्युक तच़र, वुछव ॳस्य ति।
************************
कऻशुर ह्यॆछव कऻशुर परव
कऻशर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

09.03.2020

09.03.2020, फाल्गुन (फाल्गुन) ज़ूनॖ पछॖ (शुक्ल पक्ष) पुनिम (पूर्णिमा), च़ऺन्दॖरवार (सोमवार),श्री सप्तर्षी सम्वत 5095, राश सिंह (चलान) ऋतु शिशर (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
          गुरु स्तुति 
गुरु तीर्थं गुरु यज्ञां गुरुदानं गुरुस्तप:
गुरुग्निगुरुं सूर्य: सर्व गुरुमयं जगत्
**************************
           लल वाक् 
नाबद्य बऻरस अटॖ गंड ड्यॊल गोम
दीहकांड हॊल गोम ह्यकॖह कह्यो
ग्वरॖ सुन्द वनुन रावन त्यॊल प्योम
पऺहलि रॊस ख्यॊल गोम ह्यकह कह्यो
          **************
अर्थात:- मेरे द्वारा उठाए गए मिश्री की बोझ की रस्सी ढीली पड गई और बोझा नीचे खिसकने से शरीर झुक गया है। अब बोझा उठाना कठिन हो गया है। जब से गुरु का वचन सुना, ऐसा लग रहा है कि मेरी कोई वस्तु खो गई हो, जिससे मैं दुखी हो रही हूं। गडरिए के बिना भेडों ( इंद्रियों का समूह तथा वासनाएं) के रेवड की तरह बिखर गई हो, अब इनको एवं अपने को कैसे संभालूं
            (भावार्थ)
मन के कारण इन्द्रियां काम करती हैं। जब मन गुरु को दिया तो ललेश्वरी को लग रहा कि उसका कुछ खो गया है। इन्द्रियां नेता के बिना ढीली पडकर बिखर गईं हैं जैसे गडरिये के बिना भेडें इधर उधर बिखर जाती हैं। यह कार्य निभाना वैसा ही कठिन है जैसे नबात का बोझ पीठ पर ढीला पड जाए (नीचे खिसककर चुभने लगे) और शरीर झुक जाए अर्थात इन्द्रिय निरोध अति दुष्कर तथा पीडा दायक है।
**************************
           नुंदॖ ऱेशिन्य श्रुक्य
च़न्दुन च़ऺटिथ अरखॊल सॊगुम
शेतऻन्य ज़ोगुम पतॖ शाहमार
अथॖ ख्वर जछाम अथि नॖ लॊगुम
छॆनॖ कथॖ करान गोम शर्मसार
नकस दिच़ाम न ज़ि कस लॊगुम
संसार ज़ोनुम शुनीकार
           *************
माने:- अज्ञान किन्य च़ॊटुम च़़दॖकुल तमि बदलॖ द्युतुम अरखऺलिस सग। शेहजार निशि महरूम सपदिथ लजिम ज़न सॖच़नि। शैतान रूप शाहमार लॊगुम पतॖ। स्यठाह कूशिश कऺरिथ ति ह्यॊकुम नॖ यि शैतान वनि कऺडिथ। छॆन्यव कथव आव म्यॆ पॊतुस हीनॖ बाव तॖ गोस शर्मि सॗत्य गऺलिथ। तमि पतॖ एहसास गऺछ़िथ नॖ द्युतुम कऻन्सि नऺ ज़ोगुम कऻन्सि हॖन्दिस। मन गोम दय ध्यानस मंज़ थ्यर, संसार बास्योम पतॖ वऻरानजाथ।
**************************
पंचान्ग:- गाज़ियाबाद क्षेत्रस मंज़ चलान कऻशिर्य पंडितन हॖन्ज़ॖ संस्थायन हॖन्द्य सदस्यन हॖन्ज़ अख मिटिंग आयि करनॖ प्रताप विहारॖकिस शिव मंदरस मंज़ राथ यानि ॷठमि मार्च ज़ॖ सास वुह तॖ आथवारि द्वह सुब काह बजे प्यठॖ। सदस्यन हॖन्दिस अथ मेलनस छु नाव दिनॖ आमुत "समुत" तॖ अमिक प्रेज़िडैन्ट छि बिटू जी जद शालमऻर गार्डनॖ प्यठॖ तॖ राज नाथ कौल वसुन्धुरा प्यठॖ।तॖ बाकय सदस्य ब्यॊन ब्यॊन जायन प्यठॖ मगर गाज़ियाबाद क्षेत्रस अंदॖर्य अंदॖरी। मक़सद छु अमि नवि संस्थायि हुन्द यि ज़ि दिल्लि तॖ दिल्लि अंद्य पऺख्य संस्थायि ति पानस सॗत्य पकनऻविथ पनॖनि कऻशिर्य समाजिक कॆंह सामाजि मसलन हल छ़ान्डुन ईकॖवटॖ मीलिथ। ख़याल छु रुत। यि ॴस राथ समुतॖच च़ूरिम मिटिंग। अथ मिटिंग मंज़ आयि राथ कथ बाथ करनॖ वारिहान मसलन प्यठ तॖ सॗत्य सॗत्य गऺयि तिमन मसलन हुन्द हल ति छ़ान्डान कर तॖ किथ पऻठ्य। बाकयन संस्थायन ति पज़ि शऻमिल सप्दुन तॖ पज़न अंज़रावॖन्य पनॖन्य सामाजिक मसलॖ वारॖ वारॖ। हालांकि युथुय प्लेटफार्म ओस बनोवमुत ब्रौंठ ति यथ नाव दिनॖ आमुत छु केपीओऎ यानि कशमीरी पंडित ओर्गनयज़ेशन अलायन्स मगर तथ सॗत्य जुडेयि नॖ सार्यॆय संस्थायि तॖ न छि सार्यॆय संस्थायि जुडिथ समुतस सॗत्य ति। ताहम कूशिश छि जऻरी द्वनवऺन्य पासन। वुछुन छु ज़ि कुस म्युल क्याह करि युस सानि समाजिक दऻद्य हरि। कथ छि जऻरी
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

08.03.2020

08.03.2020, फाल्गुन (फाल्गुन) ज़ूनॖ पछॖ (शुक्ल पक्ष) च़्वदह (चतुर्दशी) आथवार (रविवार/एतवार),श्री सप्तर्षी सम्वत 5095, राश सिहं (सुबहॖचॖ 6.51 बजि प्यठॖ), ऋतु शिशर (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
          गुरु स्तुति     
शांत चित्ता महाप्रज्ञा गुरुदेवा दयाघना
दयासिन्धो सत्स्वरूपा मायातमविनाशिना
**************************
           लल वाक्   
शिलाय हॖन्जॖय व्वतमा बऺज़ॖम
स्वम्बरिथ ट्यॊक पोन्य आसन पठ
मनस अंदर व्यच़ार कॊरुम
वुछुम तॖ ड्यूंठुम शिलॖ कनि वठ
         ************
अर्थात:- शिला पूजन कृत्रिम पूजा है, इसका कोई प्रयोग नहीं
            (भावार्थ)
पत्थर की मूर्ति की पूजा का महत्व मेरी बुद्धि में आया और तिलक, पानी, आसन आदि पूजा
सामग्री जुटाई। अपने मन के अंदर गहन विचार करने पर देखा यह केवल पत्थर ही था इसके अतिरिक्त कुछ भी नहीं
**************************
           नुंदॖ ऱेशिन्य श्रुक्य 
ज़ुवॖ च़ॖ बोज़तो कनॖवान
यि हो मऺर्यनिन्य ख़बर शिनवान छय
कऻल्य हंडिस ज़न निनय पुजवान
यि गासॖ कऻन्य दुनियहिच ब्रमवान छय
           *************
माने:- यि संसऻर्य लॊह लंगर  छु
ब्रमरावान इन्सानस। हे ज़ीवॖ! कनवान यॆलि गछ़ी तथ करतॖ गोर, यि छुय मरुन याद पावान यॊद नॖ ख्यनॖ ख्यनॖ मरुन क्रॆयि विज़ि याद थवख त्यॆलि ह्यख मरनॖ विज़ि वदुन, ज़न निनय पुजवान कटस मारनि
**************************
पंचान्ग:- राथ युस प्रोग्राम आव करनॖ हारमोनी इन्डिया एवार्डस 2020 तरफॖ इन्डिया इन्टरनैशनल सैंटर, नवि दिल्लि, यि प्रोग्राम ओस अख बॆहतरीन प्रोग्राम यथ मंज़ कल्चर्ल प्रोग्रामस सॗत्य सॗत्य एवार्ड आयि दिनॖ ब्यॊन ब्यॊन शख्सियतन ब्यॊन ब्यॊन करामऻच़ॖ करनॖ म्वखॖ। अमि अलावॖ आव अख बऻथ एल्बम्ब रूपस मंज़ रिलीज़ करनॖ तॖ सॗती आव यि बऻथ मंचस प्यठ ति ग्यवनॖ यथ मंज़ ल्वकॖट्य ल्वकॖट्य लडकव तॖ कोर्यॆव पनॖनि आवाज़ि दऺस्य समा रंगीन बनोव। यि बऻथ ओस ल्यूखमुत स्वर्गियि दीना नाथ कौल "नऻदिय" सऻबन। ग़ज़ल कऺर्य पेश श्रीमती डा. राधिका चौपडा जीनि तॖ सौरभ ज़ाडू जीनि दऺस्य। बऻथ आयि ग्यवनॖ वंशका भट, रितिका रैना हॖन्दि दऺस्य। प्रोग्राम रूद बडॖ नफीस। आडिटोरियम ओस शिरकत करन वाल्यन लूकव सॗत्य बऺरिथ। ख्यनॖच च्यनॖच व्यवस्था ति ॴस आमॖच़ करनॖ ठीख पऻठ्य। एंकर ॴस मोनिका पंडिता तॖ रितिका रैना। सौरभ ज़ाडू जियन कॊर ॴखरस मंज यिनॖ वाल्यन लूकन हुन्द शुक्रिया।
श्रीमती निरुपमा कोतरू जी ॴस चीफ ग्यस्ट बापथ आमंत्रित आमॖच़ करनॖ। हारमोनी इन्डिया किस यथ प्रोग्रामस सरांजाम दिनॖ बापथ ॴस्य वारियाह कार्यकर्ता यिहन्दि नावुक फिरिस्त छु बॊड तॖ बॊंड छु नावन हुन्द सु फिरिस्तॖ ति यिमन मान-सम्मान आव दिनॖ।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

07.03.2020

07.03.2020,फाल्गुन (फाल्गुन) ज़ूनॖ पछॖ (शुक्ल पक्ष) बाह (देवादेव) (द्वादऺशी) बटॖवार (शनिवार/शनिश्चरवार),श्री सप्तर्षी सम्वत 5095,राश कर्कट (चलान) ऋतु शिशर (चलान)...चूंकि पगाह छि  त्रुवाह रावान, त्रुवुश हुन्द यानि पगहुक वॊहरवोद यी ॳज़्य
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
**************************
          गुरु स्तुति     
नित्यं शुद्धं निराभासं निराकारम् निरन्यजिनम्
निति बोधं चिद् आनन्दं सद्गुरुं
तम नमाम्यsहम्
**************************
             लल वाक्   
तलॖ छुय ज़्युस तय प्यठॖ छुख नच़न
वनतॖ मालि मन क्यथॖह पच़न छुय
सोरुय स्वंबरिथ यॆत्य छुय म्वच़ुन
वनतॖ मालि अन किथॖ रोच़न छुय
         *************
अर्थात:- अरे प्यारे मनुष्य! तू जिस जगह नाच रहा है ठीक उसी के नीचे एक गहरा गढा है उस की छत किसी भी समय टूटेगी और तू उस में गिर जाएगा। फिर भी उसी के ऊपर सब कुछ संचय (जमा) करता रहता है जो यहीं पर रह जाता है। अर्थात मरते समय कुछ भी साथ नहीं जाता यह सत्य जान कर भी तुझे अन्न खाना कैसे अच्छा लगता है। (मौत सामने हो तो डर से भूख समाप्त हो जाती है।)         
              (भावार्थ)
ललेश्वरी की यथार्थ चेतावनी है कि मनुष्य मृत्यु रूपी गहरी खाई पर जीवन रूपी छत के ऊपर मज़े से नाच कर अर्थात रह कर सारी संपत्ति जमा करता है, जो मरते समय साथ नहीं जाती है। इस बात को जान कर भी संसार की भूख बढती ही जाती है। अर्थात जीवन अस्थाई है फिर भोगों के प्रति रुचि नहीं होनी चाहिए।
**************************
           नुंदॖ ऱेशिन्य श्रुक्य 
केंच़न साहिब्य दिच़ाव क्रच़र
लऻनिस लॆख्यतिस क्या क्युथ क्रय
कॆंह कॊरुन छॊन तॖ केंच़न बऺरच़र
आसिनय ॴरच़र कवॖ पुछ़ि यिज़े
            ***********
माने:- केंच़न दिच़ऻय साहिबन सख्ती, मगर लीखमितिस लऻनिस ह्यकन नॖ कर्म ति बदलऻविथ। केंच़न कॊरुन कम तॖ केंच़न कॊरुन
बऺरच़र। यॊद नॖ बख्ति बाव आसि तॆलि कमि आशि सॗत्य ह्यॆकि ज़ीव कऻन्सि हॖन्दिस सायस तल यिथ।
**************************
पंचान्ग:- सौंथ द्वह कालॖ तॖ नवरेह द्वह कालॖ छि ॳस्य प्रथ वऺरियि थाल बरान तॖ सौंतकि द्वह तॖ नवॖरॆहकि द्वह छि ॳस्य सुबहस न्यॆन्द्रि वऺथितॖय अथ थालस बुथ वुछान तॖ पतॖ पनॖनिस लॊह लंगरस लगान। यि प्रथा छि ॳस्य आमॖत्य पॊत कालॖ प्यठॖ वरतावान  मगर यिथ पऻठ्य सऻन्य प्रधान मंत्री श्री मोदी जियन ह्यॆत्य केंच़न जायन हॖन्द्य नाव बदलावुन्य, तिथय पऻठ्य छि सऻनिस समाजस मंज़ नऺव पुय यछ़ान पनॖन्यन  कॆंच़न दॊहन हॖन्द्य नाव बदलावॖन ति ज़न गव ज़ि हॆरच़ पगाह द्वह यथ "सलाम" वुन्युखताम वनान आमॖत्य छि तम्युक ब्यॆयि कांह नाव यछ़ान द्युन, यिथय पऻठ्य "मुबारक" लफज़स यछ़ान ब्यॆयि कांह नाव द्युन या "व्यलकमस" यछ़ान कऻशुर नाव द्युन। सऻन्य नऺव पुय या सऻन्य कॆंह बऻय छॆ नॖ शायद ग़लत यछ़ान। ॳथ्य असनाहस मंज़ आव म्यॆति अज़ अख ख़याल ज़ि द्वयि लटि थाल बरुन छु नॖ ज़रुरी। अकि फिरि थाल बरुन छु  कऻफी ति कयाज़ि ॳस्य छि सप्तार्षि पंचान्गॖ मुतऻबिक पनुन वऺरियुक कार्यक्रम करान तॖ तमि मूजूब पज़ि असि नवरेह कालॖ थाल बरुन तॖ नवरॆह द्वह सुबहस न्यॆन्द्रि वऺथित बुथ वुछुन। सौंथ छु विक्रमी सम्वतुक नोव वऺरियुक द्वह तॖ यि द्वह छु नॖ सानि बापथ कांह माने थवान। यि रीथ ह्यकव ॳस्य बदलऻविथ म्यानि हिसाबॖ। बदलाव छु ज़रुरी कुनि कुनि सातॖ रोज़ान यॆलि त्यॆलि ज़रुरी बासि। सौंतुक माने छु बहार। नवरॆहुक माने ति छु ती यानि नॊव वऺरी। सौंथ छु उर्दू लफ़ज़ मगर बहार या बसंत छु देवनागरी या कऻशुर लफ़ज़। सौंथ छु विक्रमी सम्वतस सॗत्य जुडिथ मगर नवरॆह छु सप्तार्षि सम्वतस सॗत्य। फऻसलॖ करुन छु तुहॖन्ज़ मनॖच यछ़ा। थाल बरनस छु नॖ अंतर किंहीं सिरिफ नऺव जंत्री थवॖन्य थालस प्यठॖ नवरेह कालॖ य्वॊस नॖ ॳस्य थवान छि सौंथ द्वह कालॖ ति क्याज़ि सोन द्वह छु नवरॆह न कि सौंथ। कथ ज़ि जऻरी।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak۔blogspot۔com ति वु्छिव)

06.03.2020

06.03.2020, फाल्गुन (फाल्गुन) ज़ूनॖ पछॖ (शुक्ल पक्ष) काह (देवादेव) (एकादशी) शॊकुरवार (शुक्रवार/जुम्मा) श्री सप्तर्षी सम्वत 5095,राश कर्कट (सुबहस 4.54 बजि प्यठॖ) ऋतु शिशर (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
            गुरु स्तुति 
नमस्ते दिव्यरुपाय नमस्ते सत्य मूर्तये
नमस्ते गुरुदेवाय गुरुदेवाय नमस्तुते
**************************
            लल वाक् 
परन परन ज़्यव ताल फजिम
च़्यह युग्य क्रय तजिम नॖ ज़ांह
सुमरन फिरन न्यठ तॖ ऒंगजि गज्यम
मनॖच दुय मालि चज़िम नॖ ज़ांह
         **************
अर्थात:- पोथियां पढते जीब और तालू घिस गए, पक गए, परन्तु मुझे तेरे योग्य क्रिया करनी ही नहीं आई। माला फिरते अंगूली और अंगूठा घिस गए, किन्तु मन से द्वैत भाव दूर नहीं हुआ।
             (भावार्थ)
केवल पोथियां पढने तथा माला फेरने से कुछ प्राप्त नहीं होता जब तक न कि प्रभु को पाने की सच्ची क्रिया की जाए अर्थात द्वैत भाव का त्याग जाना वांछित है
**************************
            नुंदॖ ऱेशिन्य श्रुक्य 
ज़ुव क्यथ नॖ रोज़ाख अवलॖचि सॖंज़ॖय
द्वदस सऺदरॖकऻन्ज़ॖय गव
यिम ज़ागान यिथॖ गाडन हऻन्ज़ॖय
च़ऺल्य वांगॖज नऺनंज़ त्रऻविथ लॊतव
           *************
माने:- हे पानॖ, च़ॖ क्याज़ि रोज़ख नॖ पनॖनिस ईमानस प्यठ कऻयिम,यॊतान्य द्वद गव नीरिथ तॖ गोस सऺदरॖकऻन्ज़ मंज़। यिथकऺन्य हऻन्ज़ छि ज़ालॖ मंज़ गाडि ज़ागान तिथय पऻठ्य गछ़ि संसऻर्य लॊहलंगरॖ निश पापव रॊस यॆमि वांगॖजवारि मंज़ॖ नेरनॖच प्रथ सातॖ कूशिश कऺरिथ अपोर तरनॖच वथ सादॖन्य
**************************
पंचाग:- कोरोनोवयरस ब्यमऻर्य य्यॊस दपान चीनॖ प्यठॖ फऻलान फऻलान वऻच़ सऻनिस वतनस ताम तॖ ह्यॆतिन यॆतिक लूख त्रहरॖन्य तॖ अमि ब्यमारि निशि नजात प्रावनॖ म्वखॖ ह्यॆतिख कॆंह ख्वसूसी क़दम तुलॖन्य। अथॖ नॖ मिलावुन, नालमॊत नॖ करुन, अख ॳकिस निशि दूर्यर थवुन, सति साबॖनि अथ छलॖन्य ख्यनॖ च्यनॖ ब्रौंठ, ॴसस बुथि पर्दॖ थावुन, गर्म पोन्य न्यॊम त्रऻविथ च्यॊन वगैरा वगैरा। दपान यि छि छूत-छातॖच ब्यमऻर्य। असुन आव म्यॆ ज़ि ॳक्य बऻय म्यऻन्य द्युत मशवरॖ ज़ि प्रताप विहारस मंज़ युस हवन दपान यी करनॖ पंदऻहमि मार्च, सु मुल्तवी करनॖ बापथ। तऺमिस म्यऻनिस बऻयिस छे नॖ शायद यि ख़बर ज़ि पॊत कालि यॊदवय कुनि जायि ति कुनि कॖस्मुक प्रदूशन ओस आसान या कुनि कॖसमॖक्य नकारात्मक तत्व आसनॖक्य आसार ॴस्य च़्यॆनॖनॖ यिवान, तति ॴस्य हवन करान तॖ दछिन्य खॊवॖर्य बलायि आसॖ दूर गछ़ान या मूलॖ म्वन्जी ख़तम गछ़ान। यि बूज़ म्यॆ ग्वडन्युक नफ़र सु युस दपान यि छूतॖच ब्यऻमऻर्य आसनॖ म्वखॖ हवन तिथि बदलावुन। खऻर, चूंकि ब्यमऻर्य छि फऻलवॖन्य दपान, असि पज़ि परहेज़ करुन कुनि कुनि चीज़स तॖ पनॖन्यन शुर्यन हुन्द ख़ास ख़याल थावुन। पनुन ख़याल थावुन, पनॖनिस हक़स हमसायसुन्द ख़याल थावुन तॖ सॗती ॳकिस ब्यॆयिस बकार युन यिथ्यन मोकन प्यठ। दूर्यर थवनुक मतलब छु नॖ ज़ि रिश्तय च़टुन बऺल्कि दूरि दूरि रूज़िथ पानवुन्य नज़दीकी हुन्द एहसास बरकरार थावुन। यि ति रोज़ि कॆंच़न दॊहन। कमन कमन ब्यमार्यन छ़ोन्ड सान्यव डाक्टरव यलाज तॖ बचोवुख पनुन वतन हर हमेश। यॆमि लटि ति छि आशा ज़ि सऻन्य डाक्टर बऻय गछ़न कामियाब पनॖनिस मुह्यमस मंज़ तॖ म्वकलावन यॆमि छूत छात ब्यमारि हुन्द मूल पूरॖ पऻठ्य।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

05.03.2020

05.03.2020, फाल्गुन (फाल्गुन) ज़ूनॖ पछॖ (शुक्ल पक्ष) दऺहम (देवादेव) (दशमी) ब्रसवार (वीरवार/ब्रहस्पथवार/गुरुवार) श्री सप्तर्षी सम्वत 5095,राश मिथुन (चलान) ऋतु शिशर (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
            गुरु स्तुति     
गुरु: माता पिता चैव गुरुरॖ् देवो हि बान्धव:।
गुरोर् देवात् परं नान्यत् तस्मै श्री गुरुवे नम:।।
**************************
           लल वाक्     
गाटुलाह अख वुछुम ब्वछि सॗत्य मरन
पन ज़न हरन पोहनि वावॖ लाह
न्यशबॊद अख वुछुम वाज़स मारन
तनॖ लल बॊ प्रारन छ़न्यम ना प्राह
           *************
अर्थात:- मैं ने एक बुद्धिमान को भूख से मरते देखा जैसे शरद ऋतु की हवा से पत्ते गिरते हों, अर्थात वह अति निर्बल था। (उस की बुद्धिमानी से वह भूखों मरने से नहीं बच सका)। एक बुद्धिहीन द्वारा रसोइये को पीटते हुए देखा (बावर्ची द्वारा अधिक खाना न देने पर पीटते देखा)। यह सब कार्य उल्टे हो रहे थे। यह सब देखकर तभी से मैं इस प्रतीक्षा में हूं कि कब मेरी यह दुविधा मिटे (कि एसा क्यों होता है)?
             (भावार्थ)   
यह संसार अपनी ही चाल से चलता है। किसी का इस पर कोई बस नहीं है। बुद्धिवान भूखा मरता है और बुद्धिहीन मारता है, किंतु ऐसा क्यों हो रहा है यह मनुष्य की समझ से परे है।
**************************
           नुंदॖ ऱेशिन्य श्रुक्य   
मव कांछ शुर्य मुर्य तॖ गबर
मव बर गुमान छुस दुनियादार
कऻल्य होश थकी त्रॊपनय ज़ॖ बर
अदॖ शुर्य मुर्य तॖ गबर गंडनय लार
        *************
माने:- हे ज़ीवॖ! च़ॖ कमि आशॖ छुख शुर्य मुर्य तॖ गबर कांछान। च़ॖ मऺ फऻंफलाव अहंकार ज़ि बॖ छुस आसनवोल तॖ दनऻड्य। यॆलि च़ॖ यॆमि संसऻर्य दिह त्रावख, शुर्य मुर्य करनय तीच़ जल्दी, ॳछ ज़ॖ बंद कऺरिथ दिनय श्रान तॖ वातनावनय मलगुज़ार यानि शुमशानगाट। ॳकिस च़िहिस दिनय नॖ मऺरिथ गरि ब्यॆहनुक इजाज़त
**************************
पंचान्ग:- यि इन्सान कमि म्यॆच़ि हुन्द बन्योमुत छु यि छु वुनि ति अख राज़ॖय। ज़िन्दॖ रोज़नॖ बापथ कम कम छ़ल तॖ बल आमुत छु करान। यि ज़ऻनिथ ति ज़ि ॳमिस छु ब्यॆयि ॳथ्य म्यॆच़ि सॗत्य मेलुन छ़ॊरुय तॖ छॊनुय तोति छस सारि वऻन्सि त्रॆशना सॊम्बरावनॖच। थपि थ्वसि अनान पज़ि अपज़ि कमऻय कमऻय तॖ बनान अहंकऻरी ज़ि वनान रोज़ान हुति म्योनुय, यिति म्योनुय मगर अकि ब्रंज़ॖच नॖ ख़बर। कुनि चीज़स प्यठ नॖ यख्तियार मगर तोति तृष्णा, लडऻय जगडॖ क्रूद मॊह निशि नॖ ॳमिस इन्सानस छ़्यन गछ़ान। माय महोब्बतस मंज़ वलनॖ यिवान मगर ख्वदग़र्ज़ी हुन्द यॆलि द्वार छुस मुच़रनॖ यिवान पनुन नॖ पनुन बासान, नफरतुक सामान छ़ान्डान तॖ नार, मार तॖ वार कऺरिथ पनॖनि ज़िन्दॖ रोज़नुक आधार बनावनॖच अख ख़ाम कूशिश करान रोज़ान। यि  ज़ऻनिथ ज़ि ॳछ वटनस छु नॖ कांह काल, समय तिक्याज़ि महाकाल छु बरस प्यठ पनॖनिस समयस प्रारान ॳमिस इन्सानस पानस सॗत्य निनॖ बापथ। लल द्यद या नुंदॖ ऱयोश ति असि यिहऻय च़ेनवुन्य दिवान ज़ि दय नाव स्वर स्वय छय असली दौलत, बाकॖय छुय सोरुय म्यॆथ्या। मॊह तॖ लूब थव पानस निशि स्यठाह दूर अदय प्रावख ॴखरतस ईश्वर सुन्द असली नूर
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

04.03.2020

04.03.2020, फाल्गुन (फाल्गुन) ज़ूनॖ पछॖ (शुक्ल पक्ष) नवम (देवादेव) (नवमी) ब्वदवार (बुधवार) श्री सप्तर्षी सम्वत 5095, राश मिथुन (चलान) ऋतु शिशर (चलान)
**************************
          गुरु स्तुति   
स्वतन्त्राय दया क्लृप्त विग्रहाय परमात्मने।
परतन्त्राय भक्तानाम् भव्यानां भव्यरूपिने।।
**************************
           लल वाक् 
क्याह करॖ पान्च़न दऺहन तॖ काहन
व्वखशुन यथ ल्यॆजि कऺरिथ यिम गऺय
सऻरिय समहन यथ रज़ि लमहन
अदॖ क्याज़ि राविहे काहन गाव
          *************
अर्थात:- पांच मनोवृत्तियों (काम, क्रोध, लोभ, मोह तथा अहंकार), दस इन्द्रियों (पांच ज्ञान तथा पांच कर्म इन्द्रयां) तथा ग्यारह (10 इन्द्रियां+मन) को क्या करूं जो अलग अलग मेरी काम रूपी हांडी को उभाड गए। यदि यह सारे  केन्द्रीभूत होकर रस्सी(साधन) को पकड कर काम करते तो मनुष्य की गाय रूपी आत्मा क्यों संसार में भटक कर खो जाती।
**************************
          नुंदॖ ऱेशिन्य श्रुक्य     
करतो क्रॆय तॖ यियि तो पॆंजॆ
मुरखो बोज़तो रंजिविथ
आशकव पुल तॖ पऻतवॖ गंजे
यावुन मुडस च़ॊल रिंज़ॖविथ
           *********
माने:- हे मूर्ख या अज्ञऻन्य ज़ीवॖ, मायि छुसय वनान ज़ि पनुन सऺही तॖ असली मुकाम प्रावनॖ बापथ छिय थऺद्य कर्म करॖन्य। यिम ॳशॖक हकीकी कुन छि लमान तिम छि श्रदायि हॖन्दि सगॖ ब्रौंठकुन पकान मगर यावुन छु अज्ञऻनियस मऺच़ॖरऻविथ वति डालान
**************************
पंचान्ग:- बॖ छुस पानॖ क्रासिंग रिपब्लिकस मंज़ॖ रूज़िथ तॖ यॆति प्यठॖ क़रीबन त्रॆ किलोमीटर दूर छि अख जाय यथ नाव छु डोंडाहेडा तॖ अति रोज़न वाल्यव कऻशिर्य बट्टव छु अख मन्दर निर्मान कॊरमुत यथ मंज़ मां दुर्गा हॖन्ज़ बऺड मूर्त छि आमॖच़ स्थापित करनॖ। मन्दर छु बॊड दफ अमा पॊज़ अथ ॳन्द्य पऺख्य रोज़न वाल्यन कऻशिर्य बट्टन हॖन्ज़ संख्या छि स्यठाह कम या यि दऺप्यज़ि ति न आसनस बराबर मगर मुबारकॖच कथ छि यि ज़ि बडॖ द्यानतदऻरी तॖ मॆहनऺच़ सान छु सामजक्यव कॆंच़व बायव यि दुर्गा मन्दर शूबिदार पऻठ्य खड़ा कॊरमुत। सॗती छु आमुत अख बॊड हाल ति बनावनॖ यॆति ल्वकॖट्य म्वकॖट्य व्वत्सव ह्यकन मनावनॖ यिथ। डोंडाहॆडा गामस मंज़ अथ जायि छु नाव आमुत दिनॖ कश्यप ऋशि विहार तॖ छु नोयडा गौर सिटी नखय। बोज़नस तल आव ज़ि तकरीबन् छि नमथ गरॖ कऻशिर्य बटन हॖन्द्य बन्यॆमॖत्य अति अथ कश्यप ऋशि विहारस मंज़ मगर तिम गरॖ छि खऻली या कॆंह किराय प्यठ आमॖत्य दिनॖ तॖ पानॖ मकानॖ मऻलिक ब्यॆयन जायन गऻमॖत्य रोज़नि। मुम्किन छु ज़ि तमि सातॖ आसिहे नॖ रोज़नॖच जान व्यवस्था मगर व्वंय छि जान बऺस्ती च़्वपऻर्य अथ मन्दरस। सथ ॴठ गरॖ छि वुन्यक्यनस तिम यथ मंज़ कऻशिर बट्टॖ रोज़ान छि तॖ तिमय छि यि मन्दर सम्बऻलिथ। वन्य छु अथ कश्यप ऋशि विहारस अकि अंदॖ गौर सिटी तॖ दॊयिमि अंदॖ क्रासिंग रिपब्लिक। क्रासिंग रिपब्लिकस मंज़ छि क़रीबन शेठ गरॖ ब्यॊन ब्यॊन सोसाइटियन मंज़ तॖ गौर सिटी मंज़ ति छिन ह्यॆतिमॖत्य बट् रोज़न्य।कथ छि मन्दरॖच चलान तॖ अख यछ़ा छि ज़ि अथ मन्दरस पज़ि असि कऻशिर्य बट्टन युन गछ़ुन तॖ अति बन्यॆमॖच़ जाय वरतावॖन्य कॆंच़न बड्यन दॊहन प्यठ। अमि अलावॖ पज़ि अथ नख यिम बट्टॖ रूज़िथ छि तिमन अथ मन्दरस मंज़ यिथ भजन कीर्तन ति करॖन्य, नित्य सुब-शाम आरती करॖन्य तॖ अथ मन्दरस ति पोछर द्युन। राथ तीलॖ ॴठम द्वह ओस अमि मन्दर कऺमीटी पूज़ा पाठ थोवमुत तॖ ओसुख खिर बनोवमुत युस प्रसाद्धसकिस रूपस मंज आव आमॖत्य बखत्यन मंज़ बऻगरावॖनॖ। अमि मन्दर कऺमीटी कॊर फऻसलॖ ज़ि यिनॖ वोल नवरॆह तॖ ज़ंगॖ-त्रय यी मनावनॖ यथ मंज़ भजन कीर्तन करन बऺड्य क्योह ल्वकॖट्य नवरेह द्वह तॖ माज्यन ब्यॆन्यन यी ज़ंगॖ त्रॆयि द्वह ज़ंगि रूपस मंज़ अतॖ गथ तॖ श्वगुन रूपस मंज़ नून लिफाफॖ दिनॖ। त्वहि सारिनी छुवॖ न्यमंत्रन यिवान दिनॖ ज़ि तिमन द्वन दॊहन योर  यिथ मन्दरॖच शूब बऺंडरावॖन्य तॖ पनुन भख्ति बाव बावुन।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

03.03.2020

03.03.2020, फाल्गुन (फाल्गुन) ज़ूनॖ पछॖ (शुक्ल पक्ष) ॴठम (देवादेव) (अष्टमी) बॊम्वार (मंगलवार) ,श्री सप्तर्षी सम्वत 5095, राश मिथुन (रऻच़ हॖन्ज़ॖ 11.2 बजि प्यठॖ), ऋतु शिशर (चलान)
**************************
          गुरु स्तुति       
सर्व-श्रुति-शिरो-रत्न-विराजित-
पदाम्बुज:।
वेदान्ताम्बुज-सूर्यो य: तस्मै श्री गुरुवे नम:।।
**************************
           लल वाक्     
अछ़्यन आय तॖ गछ़ुन गछ़े
पकुन गछ़े द्यन क्यो राथ
योरय आयि तॖ तूर्य गछ़ुन गछ़े
कॆंह न तॖ, कॆंह नतॖ कॆंह, नतॖ क्याह्
           *************
अर्थात:- जीव कब से जन्मता तथा मरता रहा है। जहां (प्रभु) से आये हैं अवश्य वहां अपने स्रोत में  ही जाना चाहिए। यदि माना जाए कि ऐसा कुछ नहीं है फिर भी कुछ न कुछ रहस्य  तो अवश्य ही है। नहीं तो यह सारा तथ्य क्या है। यह जाने बिना यहां रहना व्यर्थ है
**************************
         नुंदॖ ऱेशिन्य श्रुक्य   
काम क्रूध लूब मुह तॖ मद अहंकार
छुय
दोज़खॖ नारॖ छुय दिवान ब्राय
क्रेय तॖ कारन उन्दॖ आदार छुय
चन्दस द्यार छिय मव कर ज़ाय
हज़रत मुहम्मद हवादार छुय
यथ व्यच़ारस बिहि पानॖ ख्वदाय
        *************
माने:- काम क्रूद लूब मुह मद अहंकार छि नर्कॖन्य द्वार। क्रेय तॖ कारन छि ज़गतॖकि व्वजूदुक्य आदार। नॆशकाम बावॖ कर्म करनॖ सॗत्य छि तोर किछ़ फलॖरूप चन्दॖ हार बऺनिथ ज़ीवॖ तार लब्बन। हज़रत मुहम्मद सऻब छि अथॖरॊट कऺरिथ शॆहजार दिनॖवऻल्य। यि व्यच़ार छु पानॖ ख्वदायन सान्यन दिलन मंज़ ब्यॆहनोवमुत।
**************************
पंचान्ग:- क्याज़ि छि नॖ ॳस्य अकुय पंचान्ग यानि अकॖय जंत्री यानि ॳक्यसॖय ज्योतिषि सॖन्ज़ लीछमॖच़ जंत्री वरतावान तॖ प्रथ वऺरियि वारिहाव ज़िकॖ ज़िकॖव निशि म्वक्ती प्रावान। व्वंय छु सिर्यि चूंकि  अज़कल खॊतमुत पुनीत जीयनि लरि ति क्याज़ि दपान तऺम्यसॖन्ज़य जंत्री छि सऺही गणित हावान तॖ ओंकार जियिन छॆ नॖ,त्यॆलि पज़ि असि पुनीत जियनी यऻच़ जंत्री पानॖनावॖन्य तॖ ओंकार जियिन्य नकारॖन्य। तीलॖ ॴठम ॴस राथ ओंकार नाथ जीयनि हिसाबॖ तॖ चूंकि ओंकार नाथ जीयिन जंत्री वऻच़ अज़ ताम ज़्यादॖ संख्यायि मंज़ असि कऻशिर्य पंनड्यतन वरतावान तमि किन्य मनऻव वारिहऻव लूकव राथॖय तीलॖ ॴठम। दॊयिमि जंत्री कुन पनुन मन बनावनस लगि कॆंह समय खासकर तिमन यिम ओंकार नाथ जियिन जंत्री हिसाबय पकान छि।ओंकार नाथ जियन दपान छु मोनमुत ज़ि कैंह ग्लतीय छि रोज़मच़ॖ तऺम्यसॖन्ज़ि जंत्री मंज़। खऻर वनॖनुक मक़सद छु म्यॆ यि
ज़ि तीलॖ ॴठम मनावनस ति बन्यॆयि ज़ॖ फिरकॖ। अड्यव मनऻव राथ तॖ ॳड्य मनावन अज़। अख कथ छि मगर कुनी ज़ि फाकॖ ॴठम छि अज़्य। तीलॖ ॴठम द्वह ॴस वखतॖ अकि यारबल वसान तॖ आर्यन प्यठ च़ऻन्ग्य ज़ऻल्य ज़ऻल्य व्यतस्तायि मंज़ त्रावान तॖ दपान ॴस्य ज़ि यि करनॖ सॗत्य छि पनॖन्यन पूर्वजन, यिम स्वर्गवास गऻमॖत्य छि, तिमन प्रगाश वातान। अथ कथि मंज़ कोताह पज़र तॖ सन्यर छु यि वनुन छु हना मुश्किल मगर यछ़ तॖ पछ़ छि ज़ि यिथॖपऻठ्य पिंडदान कऺरिथ दपान प्यंड छि तिमन स्वर्गीयन वातान तिथय पऻठ्य छि तीलॖ ॴठम पर्वस प्यठ च़ऻन्गय ज़ालनस ति स्वय यछ़ तॖ पछ़ थऺविथ। व्यथ ॴस अज़ शामन ज़ॊतान च़ान्गयव सॗत्य वखतॖ अकि। व्वंय छु सु अख स्वपना। जतूं तू आवाज़ रोज़ि कनन मंज़ ग्रज़ान तॊत ताम योत ताम ॳस्य ब्यॆयि तोत पनॗनिस गरस ताम वातव।यिति बासान ज़न अख स्वपनाह।
**************************
कऻशुर ह्यॆछव कऻशुर परव
कऻशिर पऻठ्य पानवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

02.03.2020

02.03.2020, फाल्गुन (फाल्गुन) ज़ूनॖ पछॖ (शुक्ल पक्ष) सतम (देवादेव) (सप्तमी) च़ऺन्दॖरवार (सोमवार) श्री सप्तर्षी सम्वत 5095, राश वृष (चलान), ऋतु शिशर (चलान)...अज़ छि तीलॖ ॴठम (तील अष्टमी)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
           गुरु स्तुति   
चिन्मयं व्याप्तं सर्वं यत्किंचितचराचरम।
तत्पदम् दर्शितं येन तस्मै श्री गुरुवे नम:।।
**************************
          लल वाक् 
आयस वते गऺयस नॖ वते
स्यमंज़ स्वथि लूसतुम द्वह
चंदस वुछुम तॖ हारॖ नॖ अथे
नावॖ तारस दिमॖ क्या बॊह
         *********
अर्थात:- मैं जिस रास्ते से आई उस रास्ते से वापस नहीं गई। सागर के किनारे पर चलते चलते इसके बीच में ही दिन डूबा और शाम हो गई। जब नाव की उतराई देने के लिए जेब टटोलने लगी तो कुछ नहीं पाया। अब परेशान हूं कि पार जाने की उतराई क्या दूं
**************************
        नुंदॖ ऱेशिन्य श्रुक्य   
सरफस च़ऺल्यज़े अस्तस खंडस
सॖहस च़ऺल्यज़े क्रुहस ताम
दीनदारस च़ऺल्यज़े  वहरस खंडस
लऻनिस च़ऺल्यज़ि नॖ ॳछि मुहस ताम
          ************
माने:- हे इन्सान! सरुफ यॊद बुथि प्यॆयि, तस गछ़ि रछ़ा दूर च़लुन मगर सॖहस गछ़ि ॳकिस क्रुहस तान्य दूर च़लुन। दीनदारस निश यॊद ॳकिस वऺर्यस दूर रोज़क, लऻनिस निशि ह्यकख नॖ ॳकिस ॳछ टिटॖवऻरिस ति दूर च़ऺलिथ।
*************************
पंचान्ग:- अज़ छि तीलॖ ॴठम यानि ॳज़ शामन ॴस्य कऺशीरि मंज़ तॗर ज़ालान यानि कांगरि ख्वरन, फूट्यमॖत्य क्रॆन्जलॖ ख्वरन मंज़ ह्वख गासॖ बऺर्य बऺर्य थवान तॖ गासॖव रज़ बनावनॖ पतॖ स्व रज़ गन्डान अथ कांगरि ख्वरस या क्रन्जिलि ख्वरस तॖ दिवान च़ॖख अथ गासस। च़ॖख दिथ रज़ि थफ कऺरिथ नच़ॖनावान यि दज़वुन कांगरि ख्वर पानस ॳन्द्य ॳन्द्य तॖ ग्यवॖन्य पनॖन अजब  तॖ गज़ब बऻथ तॖ सॗत्य सॗत्य वनान जतूं तूं, जतूं तूं। यारबलॖक्यन चान्दन प्यठ ओस लगान तीलॖ ॴठम शामन मेलॖ ह्यु ल्वकट्यन बड्यन लऺडकन हुन्द। बड्यन बड्यन आंगनन मंज़ ति ॴस्य कऻशिर्य बटॖ बडॖ चिकॖ चावॖ सान मनावान यि ॳज़्युक द्वह। यिथ पऻठ्य छु वातान अंद अज़ हेरऺच़क्यन दॊहन। दपान छि ज़ि वन्दॖस वाति अंद तीलॖ ॴठम शामन। वनॖनॖ छु यिवान ज़ि चिल्लय कलानॖक्य चतजिह द्वह, चिल्ल ख्वरदॖक्य वुह द्वह तॖ चिल्लॖ बचॖक्य दऺह द्वह यानि कुल मिलऻविथ सतथ द्वह तॗरिहॖन्द्य छि वातान अंद तीलॖ ॴठम द्वह। यॆमि पतॖ छि बेसब्री सान प्रारान रोज़ान सोंतस। मंज़ॖ छु यिवान अख ब्याख व्वत्सवॖ यथ वनान छि हूल्य। तमि पतॖ गव थाल बरुन द्वन मोकन प्यठ, अख छु त्रुवाह मार्च तॖ ब्याख छु च़्वॊवुह्यमि मार्च। तॊत ताम छु वुनि वार्या वख। तीलॖ ॴठम नीर्यनवॖ ह्रॊच़ तॖ फ्रूच़
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
 (koshursabak.blogspot.com ति वुछिव)