नमस्कार। बॖ छुस भूषण कौल "दीप" ग़ाज़ियाबादॖ प्यठॖ। नेरान अकि फिरि फ़ेरान नॖ वापस, फ़ेरान मगर तम्यकुय कॆंच़स कालस,नम गछ़ान ॳछ यॆलि फ्युर लगान ख़याल, दमफुट्य गछ़ान लगान ब्यॆयि तऺथ्य जंजालस। अज़ छु फऺस्ट मई 2020...बराबर त्रॖह वरी ब्रोंठ यानि फऺस्ट मई 1990-तस मंज़ गव छ़्यनॖ ॳसि निशि अख व्यदवान पंडित सर्वानन्द कौल "प्रेमी" जी युस कऺशीरि मंज़ ह्यनॖ आव ततिक्यव आतंकवाद्यन हॖन्द्यन गोल्यन मंज़ हंगॖ तॖ मंगॖ। अज़ त्रॖह वऺरी ब्रोंठ ओस कऺशीरि मंज़ दहशतगर्दव कोहराम तुलमुत तॖ कऻशिर्य ज़ऻच़ हॖन्द्य बेकसूर मर्द, ज़नानॖ, कोरि लडकॖ बनऻविख पनॖन्यन गोल्यन हॖन्द्य शिकार हॖटॖमॖटस मंज़ तॖ आमादॖ कऺरिख कऻशिर्य बटॖ पनॖन्य जायदाद, गरॖबार तती त्रावनस प्यठ तॖ कऺशीरि प्यठॖ च़लनस प्यठ। सानि समाजिक वतॖहावक, लेखक, व्यदवान आयि ग्रन्दि रॊस कतरावनॖ कऺशीरि मंज़ तॖ स्व मऻज्य कऺशीर बन्यॆयि अख चान्दमऻर। प्रेमी जी ति गव शहीद। सर्वानन्द "प्रेमी" जी सुन्द ज़न्म छु सपद्योमुत ज़ॖ नवम्वर 1924-हस मंज़। प्रेमी जी ओस रूदमुत अख स्वतंत्र सेनानी, गान्धी जीन्यन नक्श क़दमन प्यठ पकनवाल्य प्रेमी जी छि ॴस्यमॖत्य अख नामावार शऻयर ति। वारिहान मज़मूनन प्यठ छि प्रेमी जियन किताबॖ लेछमच़ॖ, वारिहान किताबन कऻशिर्य ज़बऻन्य मंज़ तर्जमॖ कॊरमुत, रामायणस ति छु प्रेमी जियन कऻशुर तर्जमॖ कॊरमुत। पनॖनिस कऻशिर समाजचि बेहबूदी खऻतरॖ छि प्रेमी जियन स्यठाह समाज सीवा कऺरमॖच़। वारिहाव संस्थायव दऺस्य ओस प्रेमी जियस मान, सम्मान, यज़थ तॖ यनामॖ आमॖत्य दिनॖ।  सानि समाजुक अख प्रज़लवुन व्यदवान, अख दयावान, अख शऻयिर, अख लेखऻर्य छु नॖ अज़ असि मंज़ मूजूद मगर तऺम्यसॖन्ज़ॖ करिमच़ॖ काम्यव सॗत्य रोज़ि सु वरी बद्यन अख यादगार शखसियत रूपस मंज़। बॖ छुस प्रेमी जियस पनॖनि तरफॖ श्रद्धांजली दिवान तॖ मंगान भगवानस  ज़ि ॳमिस ॴसिन वैकुण्ठस मंज़ जाय। प्रेमी जीन्यन हाविमच़ॖ वतन प्यठ यॆछ़िन असि पकुन तॖ तऺम्यसॖन्दिस आत्माहस शऻन्ति वातॖनावॖन्य। हालांकि म्योन सम्बंद छु नॖ रूदमुत प्रेमी जियस सॗत्य ज़ऻती तोर पऻठ्य मगर बॖ सपदुस मुतऻसिर प्रेमी जियुन योगदान वुछिथ सानि सभ्यतायि मंज़, सानि संस्कृति मंज़ तॖ प्रज़नथ ज़िन्दॖ थावनस मंज़। प्रेमी जीयिन कऻशिर्य ज़बऻन्य प्यठ महऻरियत, क़लमुक ताक़त थवि प्रेमी जियुन नाव सदा बहार। बॖ छुस यिथ्यन कदावर तॖ नामावार हस्तियन नमन करान।