31.05.2020

31.05.2020 ज़्येठॖ (ज्येष्ठ) ज़ूनॖ पछॖ (शुक्ल पक्ष) नवम (देवादेव) (नवमी) आथवार (रविवार/ एतवार) श्री सप्तर्षि सम्वत 5096, राश कन्या (दुह्यचि 10.18 बजि प्यठॖ) ऋतु ग्रीष्म (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव

**************************

            श्रीचण्डीकवच

प्रेतसंस्थातु चामुण्डा वाराही महिषासना।

एन्द्री गज समारूढा वैष्णवी गरुडासना।।

माहेश्वरी वृषारूढा कौमारी शिखि वाहना।

लक्ष्मी: पद्मासना देवी पद्महस्ता हरिप्रिया।।

           *************

अर्थ:- चामुण्डा देवी प्रेत पर बैठती (सवारी करती) है, वाराही भैंसे पर, ऐन्द्री ऐरावत (हाथी पर), वैष्णवी गरुढ पर और माहेश्वरी बैल पर, कौमारी मोर पर, श्री विष्णु भगवान् की प्रियतमा लक्ष्मीदेवी हाथ में कमल लिए पदम् पर बैठती हैं।।

**************************

       महामारी नाश - मंत्र

जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते

**************************

          नुंदॖ ऱेशिन्य श्रुक्य

व्वथान अथॖ ज़ॖ क्वठ्यन दिवान

बिहान लोरॖ प्यठ ह्यवान त्रान

तॆलि छुस आकाशि बुतलि प्यवान

छुम च़्यतस प्यवान तॆलि शुर्य पान

         **************

माने :- बुजरस मंज़ छु इन्सान क्वठ्यन अथॖ ज़ॖ दिथ थॊद व्वथान तॖ लोरि हुन्द सहारॖ निथ पानस साम ह्यवान। पनुन शुर्य पानॖ याद प्यथ छुस ज़न आकाशि प्यठॖ ज़ऺमीनस दब लगान

**************************

पंचान्ग:- प्रारब्द नऺविस वऺरियस ताम। द्राव असि रातुक द्वह याने ज़्येठॖ ॴठम य्वस मनऻव कऻशिर बटव पनॖनि पनॖनि आयि पनॖन्यन पनन्यन गरन मंज़। हालांकि व्यवस्था ॴस आमॖच़ करनॖ कॆंच़व कार्यकर्त्ताहव दऺस्य लूकन क्षीर भवऻनी, कऺशीरि, पटपटगंज स्थानन सॗत्य जोडनॖच तॖ सामूहिक आरती शामन करनॖच।यि करनॖ सॗत्य ति आसि वारिहान लूकन तसली आमुत मगर वारिहान लूकन आसि याद प्यॊमुत पनुन प्वत काल तॖ आस्यख दिलस ग्राय हिश लऺज्यमॖच़। लूचॖ तॖ नदॖर्यम्वन्जि मा आसॖनख मेजिमच़ॖ। दीवी आंगनस मा आस्यख प्रक्रमॖ आमुत दिनॖ। तुल्यमुलॖ दऺर्यावस मंज़ मा आस्यख श्रान आमुत करनॖ। न आस्यख ह्यॊकॖमुत तुल्यमुलि नागस मंज़ द्वद तॖ कंद बावनॖ। वारिहान चीज़न निशि आसन रूद्यमॖत्य छ़्यनॖ सऻन्य कऻशिर्य बऻय ब्यॆनि। यि दूर्यर तॖ यि कऺमी आसि खल्यॆमॖच़ सारिनी मगर मजबूरी मंज़ नरि दिया नारस इन्सान। चलो यथ नॖ पूश तथ छु नॖ दूष। यि ज़्येठॖ ॴठम हुन्द मेलॖ ओस कऺशीरि मंज़ ब्यॆयि ति ब्यॊन ब्यॊन जायन लगान तॖ मनोवमुत ति मा आसि कऻन्सि कऻन्सि कुनि कुनि जायि दय ज़ानि। मसलन मंज़गाम, टिक्कर, रवयार, लॊकॖट्यपोरा, दिवसरॖ वगैरा वगैरा। म्यॆ छु याद प्यवान ज़ि यॆलि बॖ ओसुस पनुन ऒड अयाल ह्यथ कऺशीरि गोमुत 1916-हस मंज़, तमि लटि आव म्यॆ मॊकॖ ल्वकुट्यपोरा गछ़नुक सुति ज़्येठॖ ॴठम दुहुय। बडॖ जान व्यवस्था ॴस आमॖच़ करनॖ ततिक्यव कऻशिर्य बटव दऺस्य। असि ख्यव फाकॖ बत्तॖ ति तति। जाया ॴस स्यठाह हालांकि देवारबन्दी ॴस नॖ कऺरिथ मन्दरकिस अहातस। ततिक्यन ल्वकट्यन ल्वकट्यन नागन हॖन्ज़ हालथ ति ॴस नॖ ठीख कॆंह। दय ज़ानि बकाया जायन हॖन्ज़ दशा किछ़ आसिहे। खऻर...। म्यॆ तोर नॖ फिकिरी ज़ि सऻन्य बऻय किथॖपऻंठ्य वऻतिमत्य क्षीर भवऻनी, शालॖमऻर गार्डन, तॖ पटपटगंज तिक्याज़ि धर्मस्थलन सारिनी हॖन्द्य दरवाज़ा छि वुनि बंदॖय महामऻरी मूजूब। फोटवव तलॖ छु ननान ज़ि असि छु नॖ नियम थॊवमुत राथ कॆंच़न जायन।

मऻज्य दीवी कऺरिन पनुन अनुग्रह सारिनी युस यॆतिनस छु। माजि गछ़ शर्ण माजि प्यॆ परण, माजि रऻज्ञन्याये करसऻ नमन। सॊय करि दफा सान्यन ग़मन।

**************************

कऻशुर ह्यॆछव कऻशुर परव

कऻशिर्य पऻठ्य पानॖवुन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)

30.05.2020

30.05.2020 ज़्येठॖ (जेष्ठ) ज़ूनॖ पछॖ (शुक्ल पक्ष) ॴठम (अष्टमी) बटॖवार (शनिवार/शनिश्चरवार) श्री सप्तर्षि सम्वत 5096, राश सिंह (चलान) ऋतु ग्रीष्म (चलान)....अज़ छि ज़्येठॖ ॴठम
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
          श्रीचण्डीकवच
यैस्तु भक्त्या स्मृतानूनं तेषां सिद्धि: प्रजायते।
ये त्वां स्मरन्ति देवेशि रक्षसे तान्न संशय:।।
            ************
अर्थ :- हे देवेशि! भक्तिपूर्वक जिन्होंने तुम्हारा स्मरण किया है उन्ही को सिद्धि मिलती है और जो तुम्हारा स्मरण करते हैं उनकी रक्षा तुम निश्चय ही करती हो।
**************************
     महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
        नुंदॖ ऱेशिन्य श्रुक्य
ॳलिम पऺरिथ ज़ोनुख ॳस्य गऺयि वॆठॖय
तिम वॆठॖय ग्वगल टॆठ्य गयॆ
यिम मातम ह्यथ अन्दवन बीठी
तिम तल ॴसिथ पॆठी गऺये
          **********
माने :- ॳलिम (ज्ञान) पऺरिथ छि ॴलिमन (ज्ञऻनियन) गर्दन म्वटान याने अहंकार छुख नाल वलान। मगर तिम छि अमि अहं सॗत्य ट्यॆछर वरतावान तथ बरअकस यिम अन्दरी दय स्वरन तिम छि वऺसिथ ॴसिथ खऺसिथ पद प्रावान
**************************
पंचान्ग:-  रऻज्ञन्या दी ॴज्ञन्या वातय बॖ तुलमुल, व्यनॖ पोश छावय बावय द्वदॖ डुल। अज़ छि ज़्येठॖ ॴठम। ॳज़्यकि द्वह अज़ त्रॖह-अक्त्रॖह वऺरी ब्रोंठ ओस कऺशीरि मंज़ क्षीर भवऻनी याने तुलि मुलि म्वत आसान मत्योमुत। बॊड मेलॖ आसान लॊगमुत। कऻशिर्य बटॖ ॴस्य ब्यॊन ब्यॊन जायव प्यठॖ माजि रऻज्ञन्यायि हॖन्द्यन पादन तल वातान पनुन भख्ति भाव बावनि। कॆंह लूख ॴस्य कालय याने सतम दुहुय गछ़ान तॖ कॆंह ॴस्य ॴठम द्वह गछ़ान। यथ धार्मिकस्थलस छि बडॖ ज़बर्दस्त मान्यता तॖ महिमा न सिरिफ कऻशिर समाजस मंज़ॖय योत बऺल्कि सऻर्यसी हिन्दू धर्मस मंज़ ति। यॆमि द्वह लूख तुलमुल गछ़हऻन, न्यॆनि ख्यथ ॴस्य नॖ गछ़ान। दपान ॴस्य युस न्यॆनि ख्यथ ओर गछ़ि, तऺमिस छु ऒन प्यवान। अमि खोफॖ किन्य ओस नॖ कांह न्यॆनि ख्यथ तुलमुल गछ़ान। पॊज़ क्या अपुज़ क्या, भय ओस, ख़ोफ़ ओस, डर ओस तॖ वुनि ति छु। तुलॖमुलिस मंज़ ॴस्य ॳन्द्य ॳन्द्य हलवऻय वान आसान यिम दुह्यकिस दॊहस ॴस्य लूचि तॖ नदॖर्यम्वन्जि बनावान रोज़ान। तुलॖमुलॖचि लूचि आसॖ स्यठाह मशहूर आसान। तुलॖमुलॖ नागस ॴस्य लूख प्रक्रमॖ दिवान रोज़ान, कांह ओस त्रे प्रक्रमॖ दिवान, कांह दीहे काह या कांह दीहे अखहथ तॖ काह। यॆमिस यिछ़ यछ़ पछ़ आसिहे। शामॖ़च आरती ॴस यिवान करनॖ सामूहिक। रत्नदीप ॴस्य यिवान ज़ालनॖ,द्वद, कन्द तॖ पोश यिवान नागस मंज़ बावनॖ। अदभुत दृश्य ओस आसान अथ तुलमुलिस मंज़ वखतॖ अकि। बटन हुन्द अख बॊड व्वत्सव हेरऺच़ पतॖ। शॆशतरुव काठगर ओस तुलमुलिकिस अहातस ॳन्द्य ॳन्द्य तॖ मुसलमान ओस नॖ अमि काठगरॖ अन्दर क़दम थवान। तिम ॴस्य द्वद, पोश, रत्नदीप काठगरॖ न्यॆबॖर्य न्यॆबॖर्य कॖनान रोज़ान। मगर 1990-तॖ पतॖ यीच़ि लटि ति बॖ गोस तुलमुल, म्यॆ वुछ्य मुसलमान ज़नानॖ दीवी-द्वारस ताम ॳच़िथ खऻली रत्नदीप-टऻक्य सॊम्बरावान तॖ तिमनॖय ब्यॆयि रत्नदीप बनऻविथ लूकन कॖनान। म्यॆ वुछ्य मुसलमान कऺट्य अहातस अन्दर ॳच़िथ नच़ान फ़ेरान बेफ्रूक पऻठ्य। मऻज्य रऻज्ञन्या किथॖपऻठ्य छि तिमन बख्शान, सॊय ज़ानि। सासॖबऺद्य तॖ लछॖबऺद्य लूख ॴस्य आसान तुलॖमुलिस मंज़ ज़्येठॖ ॴठम द्वह ॳड्य श्रान करान, ॳड्य ध्यान करान, ॳड्य ख्यवान ॳड्य च्यवान, ॳड्य प्रदिक्षण दिवान वगैरा वगैरा। बजन कीर्तन, लीलायि, लोलॖ बऻथ, गन्टाय हॖन्ज़ आवाज़, शंख नाद सॗत्य ओस तुलमुल ग्रज़ान तॖ शोलॖ मारान। स्वर्गॖ धारा ओस बासान यि तुलमुल वख्तॖ अकि। गऺयि तिम द्वह। हालांकि बटव बनोव तुलमुल ब्यॊन ब्यॊन जायन कऺशीरि प्यठॖ च़लनॖ पतॖ मगर युस वलॖवलॖ तॖ शॊगुल तथ जायि ओस आसान, सु आव नॖ ब्यॆयि नज़र कुनि जायि ति वुन्युखताम। बजाह रूज़िव सऻरी युस यॆतिनस छुवॖ। महामऻरी निशॖ रऺछिन असि सारिनी माता रऻज्ञन्या। यि ज्येठॖ ॴठम नीरिन असि सारिनी ह्रच़ तॖ फ्रूच़।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

29.05.2020

29.05.2020 ज़्येठॖ (ज्येष्ठ) ज़ूनॖ पछॖ (शुक्ल पक्ष) सतम (सप्तमी) शॊकुरवार (शुक्रवार/जुम्मा) श्री सप्तर्षि सम्वत 5096, राश सिंह (सुबहॖचि 6.57 बजि प्यठॖ), ऋतु ग्रीष्म (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
           श्रीचण्डीकवच
न तेषां जायते किंश्चिदशुभंरण संकटे।
नापदं तस्य पश्यामि शोक दु:ख भयं नहि
**************************
अर्थ:- उन लोगों का युद्ध में या किसी संकट में तनिक भी बुरा नहीं होता (हे माता)। मैं उन लोगों को किसी प्रकार की विपति या शोक़ या दु:ख में नहीं देखता हूं।
**************************
       महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
         नुंदॖ ऱेशिन्य श्रुक्य
लालॖच क़दॖर डूंगल ज़ाने
पॊश क्या ज़ाने सॊथ्य प्यॆठ वथ
शमहॖच क़दॖर लऺश क्या ज़ाने
मऺछ क्या ज़ाने पोम्पॖरॖन्य गथ
           *********
माने :- यस यॆमिच पहचान आसि सुय ह्यॆकि तमिच तिछ़ कदॖर कऺरिथ यिथॖ पऻठ्य डुंगल छु लालस वनि कडान। सॊथ्य प्यॆठ वति पकनस छु पॊश खोच़ान। लऺश छि अनज़ान शमहॖस निश युस पानॖ गटि मंज़ रूज़िथ लूकन छु गाशिरान। तिथॖ क्या कदॖर करि मऺछ पऻम्परस युस शमहस गथ करान छु पनुन पान फिदा करान
**************************
पंचान्ग:- यॆलि यिवान तॆलि छि यिवान च़्वपऻर्य। दपान बदनसीबी छॆ नॖ कुनी ज़ऺन्य यिवान यि छि पानस सॗत्य बदकॖसमऺती ति अनान। महामऻरी हुन्द प्रकोप छुयी छु, हालव आयि व्वतलिथ यॆमि लटि बेशुमार तॖ जुन्डन हॖन्द्य जुन्ड दपान आयि सऻनिस वतनॖक्यन कॆंच़न प्रदेशन मंज़ फ़सलस ज़ख वातनावनॖ बापथ। सऻन्य ग्रॗस्य बऻय तिमन गामन मंज़ गऺयि परेशान तॖ लऺग्य अथ बलायि ति मुकाबलॖ करनि। यूतुययोत नॖ, राथ ओसुस बॖ वुछान टी वी प्यठॖ ज़ि अरबॖ तरफॖ योर नॖ अख जानावार ति नज़र यिवान छु सु रेगिस्तान मुलुख आसनॖ मूजूब तति दपान अचानक आयि कपऻर्य ताम कृहॖन्य काव जुन्डन हॖन्द्य जुन्ड व्वतलिथ। ततिक लूख छि दपान गऻमॖत्य यि वुछिथ हऻरान तॖ परेशान तॖ ह्यकान छि नॖ वऺनिथ ज़ि यिमन कावन कऺम्य हऻव तिमन अलाक़न कुन वथ यॊत नॖ ज़ांह ज़न तॖ ज़ऻन्पुन वातान छु तिमन स्यॆकि मऻदानन मंज़। मतलब म्योन छु ज़ि कॆंह नबनवॖन्य चीज़ ह्यॆतिन बनॖन्य अज़कल। अकि तरफॖ सऺहलाब, अकि तरफॖ हालव मतॖन्य फ़सलस तबाह करनि तॖ ब्यॆयि तरफॖ स्यॆकि शाटन मंज़ कृहॖन्यन कावन हुन्द अचानकन पऻदॖ सपदुन। क्याहताम छु व्यॊखुत सपदवुन बासान छु। ख्वदऻयी ताक़त छु म्यॆ बासान आज़मावान इन्सान सुन्द बर्दाश्त, इन्सान सुन्द ज़मीर, इन्सान सुन्द धर्मस प्यठ पनुन विश्वास। वख छु क्रूठ। ज़िन्दगी सास रंग छि बदलान, मनॖ मो गछ़ च़ॖ मोयूस, अज़ निराशा छि आशा पगाह, रऻच़ हुन्द सफर बस छु क्रूठ। राथ सपुद म्योन पितुर बोय स्वर्गवास ग्रेटर नोयडाहस मंज़, विडम्बना रूज़ म्यानि खऻतरॖ यि ज़ि बॖ ह्यॊकुस नॖ यॆति गाज़ियाबादॖ प्यठॖ तॊत ताम वऻतिथ करोनावयरसकि पाबऺन्द्यव किन्य। तम्यसॖन्ज़ पनॖन्य कूर ति ह्यॆच नॖ मऻल्यसुन्द बुथ वुछिनि बापथ वऻतिथ तिक्याज़ि स्व छि अम्रीका रोज़ान तॖ तति प्यठॖ युन दॊपहऻस छुय नॖ मुम्किन। यिथ्यन हालातन मंज़ छु अज़कलुक इन्सान गऺर गऺर त द्वह द्वह कडान। हालात कुस रंग रटि कमि सातॖ सुय ज़ानि बस अख दय।ॳस्य छि शतरंजॖक्य प्यादॖ, नच़व तिथयपऻठ्य यिथपऻठ्य सु सोन महादेव नच़ॖनावि
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

28.05.2020

28.05.2020 ज़्येठॖ (ज्येष्ठ) ज़ूनॖ पछॖ (शुक्ल पक्ष) शॆयम (षष्ठी) ब्रसवार (वीरवार/बृहस्पतिवार) श्री सप्तर्षि सम्वत 5096, राश कर्कट (चलान) ऋतु ग्रीष्म (चलान)....अज़ छि कुमार शॆयम ति
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
          श्रीचण्डीकवच
अग्निना दह्यमानस्तु शत्रु मध्ये गतो रणे।
विषमे दुर्गमेचैव भयार्त्ता: शरणं गता:।।
             *************
अर्थ:- आग से जलते समय और शत्रुओं के बीच, युद्ध में, संकट के समय और अगम्य स्थान में भय से दु:खी होकर जो आदिशक्ति की शरण में गये हैं (और इन नामों का स्मरण किये हैं)
**************************
     महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
          नुंदॖ ऱेशिन्य श्रुक्य
द्वहय स्वन तॖ ऱवफॖय ज़्यूनुम
द्वहय लुख रूदिम बंदगिये
द्वहय सुवुम कपटूम तॖ म्यूनुम
पतव च़्यूनुम प्यॆयम शरमन्दॖगिये
           ***********
माने :- दय नाव मऺशरिथ ज़्यूनुम द्वहय ऱवफ तॖ स्वन। लूकव कऺरॖम द्वहय सलाम। सुवुम कपटुम तॖ ओंगॖल मीनिम पानस द्वहय। मगर पॊतुस च़्यूनुम ज़ि शरमन्दॖ गऺछ़िथ प्यॆयम च़सुन यॆलि हिसाब लग्यम यथ पानस।
**************************
पंचान्ग :- डाक्टर श्रीमती अद्वैतवादिनी कौल (शाह जी) ओस राथ जे के विचार मंचकि कथ बात प्रोग्रामस मंज़ ईन्टरव्यू आमुत ह्यनॖ श्रीमती वीणा वांचू दऺस्य आन लाईन फेसबुकस प्यठ। डाकटर कौल छि रूज़मॖच़ स्वबावॖ किन्य अख स्यठाह स्यॊद सादॖ पऺरमॖच़ लीछ्यमॖच़ नामावार लेखक तॖ अख संस्कऻरी गृहस्तनी। ॳम्यसुन्द मोल, स्व. श्री जानकी नाथ कौल "कमल" ति छु ओसमुत अख मशहूर शऻयर, लेखक तॖ अख नामावार ॳदीब। श्री उत्पल कौल, अख जाना माना समाज सेवक छु डाक्टर कौल जियुन शौहर तॖ यिहुन्द संतान छु अख नामावार पत्रकार, श्री आदित्य राज कौल। कथ बाथ प्रोग्राम रूद बडॖ जान। जान जान व्यच़ार आयि बावनॖ नवि पुयि खऻतरॖ। शाह जी किथॖपऻठ्य वऻच़ अथ थऺदिस मुकामस प्यठ यि वॊन शाह जी बडॖ व्यसतारॖ सान। सानि कऻशिर बट्टॖ समाजिच़ अख असवॖन्य तॖ प्रज़लवॖन्य नारी छि वाकय सऻन्य आन बान तॖ शान।मऻज्य दीवी रूज़्यनख सहायतस हर हमेशॖ। कोरोनावयरसॖच कथ करव तॖ वदनॖ मंज़ आव असुन राथ यॆलि टी वी प्यठॖ बूज़ ज़ि कॆंह रेलगाडि यिम पकनि ह्यच़न वाच़ॖय नॖ पनॖनिस पनॖनिस मुकामस प्यठ वखतस प्यठ तॖ सऺही वति। वुछनस तल आव यि ज़ि ॳकिस ॳकिस रेलि हुन्द सफर रूद अकि द्वह या द्वयि द्वह बजाय श्यन श्यन सतन सतन दॊहन चलवुन तॖ सवारि तरसेयि त्रेशि कतरन, रूद्य ब्वछि हऺत्य, डॊलुख हुलियय, तॖ वऻत्य पनॖन्यन पनॖन्यन स्टेशनन प्यठ कऺह्य कऺह्य ताम ज़ानि दय कपऻर्य कपऻर्य तॖ कमन कमन जायव फिरिथ। यिथ्यन हालातन मंज़ छु ख्वदा हऻफ़िज़। कत्यन क्वस गल्ती रूज़ अथ खलबली मंज़ तॖ बुरॖ व्यवस्थायि मंज़, वुनि नन्यव नॖ कॆंह। तॗरि कऺड्य फऺट्य यि तमाशि टी वी-यस प्यठ वुछिथ। वुनि क्याह क्याह छु ब्यॆयि वुछुन बुथि, यि छि ख़बर ॳकिस परमात्माहस। ॳस्य छि तऺस्य शरण।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

27.05.2020

27.05.2020, ज़्येठॖ (ज्येष्ठ) ज़ूनॖ पछॖ (शुक्ल पक्ष) पऻन्च़म (पन्चमी) ब्वदवार (बुधवार),श्री सप्तर्षि सम्वत 5096, राश कर्कट (चलान)ऋतु ग्रीष्म (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
            श्रीचण्डीकवच
पन्यचमं स्कन्दमातेति षष्ठं कात्यायनीति च।
सप्तं कालरात्रीति  महागौरीति चाष्टमम्
नवमं सिद्धिदात्री च नवदुर्गा: प्रकीर्तिता:।
उक्तान्येतानि नमानि ब्रह्मणैव महात्मना।।
           ************
अर्थ :- पांचवीं स्कन्दमाता, छठी कात्यायनी, सातवीं कालरात्रि, आठवीं महागौरी तथा नवीं सिद्धिदात्री, इस प्रकार जो नव दुर्गा मानी गयी हैं वे सभी नाम महान् आत्मा श्री ब्रह्मा जी से कहे गये हैं
**************************
       महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
           नुंदॖ ऱेशिन्य श्रुक्य
सु म्यॆ निशे बॖ तस निशे
म्यॆ तस निशे क़रार आव
नहकय छ़ोन्डुम म्यॆ परदीशे
पनॖने दिशे म्यॆ यार आव
         *********
माने :- दय छु म्यॆ निश तॖ बॖ छुस तस निश। म्यॆ छु तऺस्य निश क़रार आमुत। नहकय छ़ोन्डुम पानस न्यबर, सु म्यूल म्यॆ पनॖनिसॖय पानस मंज़
**************************
पंचान्ग :- द्वह द्वह छु नेरान असि सारिनी पनॖनिस पनॖनिस गरस मंज़ॖय। इजाज़थ छु नॖ वुनि दारि बर मुच़रावनुक। नरि ज़ंगॖ वाहरावनुक। युस यॆतिनस छु सु तऺती फस्यॊमुत छु। कॆंच़न जायन दपान राहत छि मीज्यमॖच़ याने यि महामऻरी छि च़ऺजमॖच़ मगर यिमन जायन हॖन्द्य लूख ह्यकन नॖ पनॖनि जायि निश डऺलिथ तॖ ब्यॆयिस जायि वऻतिथ हालांकि कॆंह ग़रीब तब्कॖक्य लूख यिम कॆंच़व दूर दूर देहातव प्यठॖ ॴस्य रोज़गार कमावनॖ मूजूब ब्यॊन ब्यॊन जायन वऻत्यमॖत तॖ महामऻरी दऺहशतन कुठरऻव्यमॖत्य तति, तिम ह्यॆतिन पनॖन्यन पनॖन्यन देहातन वापस गछ़ॖन्य। तिमन बिचार्यन प्यव हतॖबऺद्य तॖ सासॖ बऺद्य मील पैदल सफ़र कडुन पनुन टबुर तॖ अयाल ह्यथ। ॳड्य रूद्य वति, ॳड्य मूद्य वति तॖ ॳड्य वऻत्य पनॖन्यन पनॖन्यन गरन मंज़। अड्यन दपान प्यॆयि काहन पौंसन ग्वरदऻल्य पाव याने गाडि किराय प्यॆयि तिमन ग़रीब लूकन दिन्य दऺह गणॖ प्यठॖ वुह गणॖ ताम मजबूरी तॖ लाचऻरी मंज़। कॆंच़व संस्थायव छि कुनि कुनि जायि ख्यनॖच च्यनॖच व्यवस्था ति कऺरमॖच़ मगर यि सहूलियत तॖ सुविधा छॆ नॖ सारिनी ताम वातान। ताहम हऻकिम छु करान प्रथ कांह कूशिश लूकन अमि महामऻरी निशॖ नजाथ दिनॖ बापथ। गीर छु गोमुत अज़कल यि इन्सान मगर छु बेबस, बेवऺसीलॖ, बेसहारॖ, मजबूर तॖ लाचार। ज़ॖ ऱयथ प्यॆठ्य द्राव वख, वुनि छुनॖ पय ज़ि ब्यॆयि कूताह छु बूगुन। कमर कऺसिथ छि ॳस्य ति, ह्यमथ थऺविथ छि, सबॖर कऺरिथ छि। मनॖच आश छि दऺर। प्रकाश यी, गटॖकार हटि। ॳस्य छि महावीरस मटि। मऻज्य रऻज्ञन्या असि पनॖनिस दऺलिस तल रटि।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

26.05.2020

26.05.2020 ज़्येठॖ (ज्येष्ठ) ज़ूनॖ पछॖ (शुक्ल पक्ष) च़ोरम (चतुर्थी) बॊम्वार (मंगलवार),श्री सप्तर्षि सम्वत 5096, राश कर्कट (रऻच़ हॖन्ज़ि 1.23 बजि प्यठॖ), ऋतु ग्रीष्म (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
             श्रीचण्डीकवच
प्रथमं शैलपुत्री च द्वितीयं ब्रह्मचारिणीय।
तृतीयं चन्द्रघण्टेति कूष्माण्डेति चतुर्थकम्।।
            ***********
अर्थ:- देवी की नौ मूर्तियां हैं जिन्हें नवदुर्गा कहते हैं। पहली शैलपुत्री, दूसरी ब्रह्मचारिणी, तीसरी चन्द्रघण्टा, चौथी कूशमाण्डा।।
**************************
           महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
          नुंदॖ ऱेशिन्य श्रुक्य
ज़ाडॆन मंज़ लाल मो खोलन
ज़ालन मंज़ जानावार बोलन मो
सूरॖ लाद्यन यॆम्बरॖज़लॖ मॊ फ्वलन
काच़ वानन म्वखतॖ हार मेलन मो
             **********
माने :- यिथॖ डॆम्बन मंज़  लाल त्रावि नॖ गाह तॖ ज़ालन मंज़ जानावर करन नॖ बोल बोश, तिथय कऺन्य फ्वलन नॖ सूरॖ लाद्यन मंज़ यॆम्बॖरज़ल तॖ काच़ वानन मेलन नॖ म्वखतॖहार कॆंह।
**************************
पंचान्ग :- पनॖन्यन पनॖन्यन मोबायलन प्यॆयि असि रऻछ करॖन्य ति क्याज़ि म्यॆ छु बासान ब्रोंहकुन यिनॖवोल वख छु असि अख ॳकिस निश दूर रोज़नुक च़्यॆनॖवॖन्य दिवान तॖ बस मैबायलॖय योत रोज़ि अख यंत्र यॆमि दऺस्य ॳस्य ह्यकव पानवुन्य तारॖकानॖज कऺरिथ। मऺशरावुन छु असि पानॖवॖन्य नालॖमऺत्य कऺर्य कऺर्य लोल तॖ माय बऻगरावुन, मऺशरावुन छु असि अख ॳकिस सॗत्य अथॖवास करुन तॖ पानियारुक दावा करुन। मऺशरावुन छु असि ॳक्यसॖय लेफि तल खूर्य शऻन्द्य ॳच़िथ शलफाह करुन। मऺशरावॖन्य छि असि व्वंय कऻन्सि आलत कडॖन्य बऺल्कि यिनॖ वऻलिस छु व्वंय ग्वडॖ सैनॖटायज़रॖ सॗत्य पान श्वद करुन। म्यानि वनॖनुक मतलब छु ज़ि असि छु पानस मंज़ बदलाव अनुन ति क्याज़ि य्यॊस यि महामऻरी टऺकरेययि असि, यि छे नॖ स्यॊद स्यॊद थफ तुलन वाज्यन बासान। यि च़लि तॖ गलि ज़रूर मगर दान्यस दाह कऺरिथ, असि स्यठाह ज़ख वातॖनऻविथ, स्यठाह कष्ट दिथ। दय ज़ानि कॗतिस कालस छु असि ॳम्यसुन्द यि क़हर च़ालुन। वुन्यक्यनॖक हालात वुछिथ छु इन्सान त्रऺहरान। अख ॳकिस निश नॖ वातान। मोत नॖ निनस प्रारान। राथ आयि अख ख़बर ज़ि ॳकिस बरादरस सपुद दॆहान्त बंगलोरस मंज़, तऺम्यसुन्द मोल छु पानॖ ज्यॆमिस मंज़ ज़ेरि यलाज। हाय तोबाह कऺरिथ ति ह्यॊक नॖ वऻतिथ न्यॆचविस निश। नारस दीहे नरि। सुहऻय करिहे तॖ क्याह करिहे। बस मोबायलस प्यठॖय चलोवुन कारॖबार। दय ति ज़न बन्योमुत छु बे-आर बोज़ान नॖ सोन ज़ारॖपार। इन्सान छु गोमुत लाचार। असि छे नॖ ब्यॆयि कांह वथ यलॖ। बस पुशरावुन पान माजि अम्बायि। क्याह पताह पगाह कऻल्यक्यथ मा आसि असि मातायि सॗत्य ति मोबायलॖ प्यठॖय पनॖन्य व्यथा बोज़नावॖन्य। क्याह पताह। कथ बाथ कऺर्यतव खुलॖ डुलॖ पानॖवुन्य, क्याह पताह कल हो न हो।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

25.05.2020

25.05.2020 ज़्येठॖ (ज्येष्ठ) ज़ूनॖ पछॖ (शुक्ल पक्ष) त्रय (तृतीय) च़ऺन्दॖरवार (सोमवार) श्री सप्तर्षि सम्वत 5096, राश मिथुन (चलान) ऋतु ग्रीष्म (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
          ऊं श्री चण्डीकवच
             ब्रह्मोवाच
अस्ति गुह्यतमं विप्र सर्व भूतोप कारकम।
देव्यास्तु कवचं पुण्यं तच्छृणुष्व महामुने।।
               ***********
अर्थ:- ब्रहाजी बोले - हे ब्राह्मम! सब जीवों की भलाई करनेवाला तथा अत्यन्त गोप्य और परम पवित्र देवी का कवच ही है, उसे महामुने! ध्यान से सुनो।
**************************
      महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
          नुंदॖ ऱेशिन्य श्रुक्य
वॊनुन तॖ वनॖ निशॖ लंजे च़चन
कऺह्य च़ऺटिथ लबख हचन फल
कंद्यव माज़ुन डबन तॖ दऺऱयचन
द्यन क्यथॖ बरख ज़चन तल
शैतऻन्य हारॖ वऺतरॖ रचन
कऻल्य हिसाब ह्यनख बछन तल
           ************
माने:- शैतान रूप मनन कऺर रॖच़ि वति हॖन्ज़ निशानदीही। मगर तोर कुन दिच़नस नॖ वथ कॆंह। वनॖ कुलचि लंजि च़ऺटिथ क्या लबि इन्सान हचन फल। तमी हे इन्सानॖ, च़ॖ लाग सु डबन तॖ दरीचन कर शऻही। च़ॖ क्याज़ि गुज़ारख व्यच़ारॖ रॊस पनॖन्य द्वह ज़चन मंज़। ॳम्य शैतान मनन रचि ऱवपयि याने ॳछ स्वखस तुलुन मज़ॖ, मगर पंजन तल रऺटिथ ह्यन यिथ्यन हिसाब ॴखरतस प्यठ
**************************
पंचान्ग :- फिकिरी छु नॖ तरान असि कऻशिर्य बटन ज़ि ॴखॖर असि करुन क्याह छु। कशीरि छा वापस गछ़ुन किनॖ नॖ, अगर गछ़ुन छु तॖ तॆलि कर ह्यु। तोर वऻतिथ छा असि ब्यॆयि नवि सरॖ प्रमाण पत्र हावुन हऻक्यमस ज़ि बॖ छुस पऺज़्यपऻठ्य कऻशुर। तमि बापथ छा म्यॆ डोमिसायल सर्टिफिकेट हावॖन्य ज़रूरी। यि कऻच़ाहि फिरि छु बटस सऻबित द्युन कऺरिथ ज़ि सु छु वाकऻयि कऺशीरि सॗत्य वाबस्त थऻविथ। खऻर रूद हालस यि कऻशुर बटॖ आवुर ब्यॆयिस कामि सॗत्य। नेरनस ब्यॆयि दऺह पंदाह वऺरी यि न्याय ॳन्ज़रावनस मंज़। तॊत ताम आसि हऻकिमन ति पनुन जामॖ बदलोवमुत तॖ कऻशुर बटॖ आसि ब्यॆयि हना छ़्वक्योमुत। कॆंच़व ज़िठ्यव आसि ॳछ वऺटमॖच़ तॖ कॆंच़व ल्वकट्यन आसि व्यलायत कुन प्रस्थान कॊडमुत। सऻरी ख्वाब रूद यि कऻशुर बटॖ वुछान रोज़ान तॖ ख्वाबन तऻबीर छ़ान्डान किताबव दऺस्य, बाषनव दऺस्य, व्हाटसापव दऺस्य या नव्यव नव्यव संस्थायव दऺस्य। प्रारब्द तॊताम कुस आसि तॖ कुस आसि नॖ। डोमिसायल सर्टिफिकेट हुन्द नॊव चमत्कार। सऻरी बटॖ यॆति या तति छि दर इन्तिज़ार। कोरोनावयरस छु पनॖन्य जाय ठीकरावनॖच कूशिश करान। ॳस्य छि अम्युक मूल गालनुक व्वपाय छ़ान्डान। नॖ छि यि महामऻरी थफ तुलान तॖ न छि ॳस्य वुनि पनॖनिस मिशनस मंज़ पास गछ़ान। मगर आस छि बराबर। सबॖर छु बराबर। एहतियात छु बराबर। तस परवरदिगारस ख़बर छा ख़बर। ख़बर छा तस ॳस्य छि कथ अज़ाबस अन्दर
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

24.05.2020

24.05.2020 ज़्येठॖ (ज्येष्ठ) ज़ूनॖ पछॖ (शुक्ल पक्ष) द्वय (द्विती) आथवार (रविवार/एतवार) श्री सप्तर्षि सम्वत 5096 राश मिथुन (शामन 5.33 बजि प्यठॖ) ऋतु ग्रीष्म (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
     ऊं श्री चण्डीकवच
      ऊं नमश्चण्डिकायै
      श्री मार्कण्डेय उवाच
ऊं यद्गुह्यं परमं लोके सर्व रक्षाकरं नृणाम्।
यत्र कस्य चिदाख्यातं तन्मे ब्रूहि पितामह।।
            ************
अर्थ: श्री मार्कण्डेय जी बोले, हे पितामह (ब्रह्माजी) संसार में मनुष्यों की सब तरह से रक्षा करनेवाला, अत्यन्त गोप्य तथा जो किसी से कहा नहीं है, वह मुझ से कहिए।
**************************
      महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
        नुंदॖ ऱेशिन्य श्रुक्य
अनहऻरिस नेन्दॖर प्यॆयम यामथ द्वह गोम ग्रंज़ च़ाम नॖ अख
आदनुक क्रय तॖ कारन वॆह गोम
तथ पंथानस हॆच़ॖम नॖ सख़
तॆलि प्यॊस फिकिरि यॆलि व्वथुन कॊह गोम
ताम आम यार तॖ रूज़ नॖ हख
च़्यूनुम नज़ि याम मंद्युन द्वह गोम
च़्यूनुम नॖ कॆंच़ तॖ लजिम हख
वनुन व्यपुम नॖ पनुन राह गोम
सियाह गोम क़लम लीखिथ कथ
ज़ानॖ कस वऺनिथ यिरॖवुन तॊह गोम
दुनियिहुक मुह गोम च़ऺलिथ कथ
          *************
माने:- अनहॖर्य पानॖ दयि नाव नॖ स्वरिथ गऺयम नीरिथ वऻन्स। अख द्वह ति च़ाम नॖ कर्मच ग्रंज़ मंज़। आदनॖक्व कर्मव सॗत्य ज़न प्यॊम ज़्यतॖ। यॆमि सॗत्य तथ वति ह्यच़म नॖ कॆंह साख वुन्युखताम। बुजरस यॆलि ह्यच़नम तोर सखरॖनॖच फिकिर हिश अच़ॖन्य, म्यॆ ओस थॊद व्वथुन ति क्वडुर बासान। ताम आम यमॖ रूप यार तॖ दॊपनम  यॆति रोज़न छुम नॖ कांह ति हख। बॖ रूदुस पछतावान ज़ि म्यॆ क्याज़ि च़्यून नॖ तॊतान्य यॊतान्य बॖ वऻन्सि हॖन्ज़ि पऺत्यमि गरि वोतुस। कऻन्सि हॖन्ज़ नऺसीहथ मऻनिम नॖ सु छुम पानस तख्सीर। मनस खॊतुम मल। क़लम ति क्याह ह्यॆकिहे लीखिथ। बॖ कस ह्यकॖ वऺनिथ ज़ि त्यूत ल्वच़र लॊगुम ज़न गोस तॊह यीरॖ।संसऻर्य मूहस मंज़ फऺसिथ वॊलुम अन्दकारन नाल। यॆम्य च़लनस ति थवॖम नॖ कांह जाय
**************************
पंचान्ग:- नेरान अकि फिरि फ़ेरान नॖ वापस। फेरान मगर तम्यकुय कॆंच़स कालस। नम गछ़ान ॳछ यॆलि फ्युर लगान ख़यालस। दमफुट्य गछ़ान लगान ब्यॆयि तऺथ्य जंजालस। युस आव तस छु वापस गछ़ुन मोतस क्याह करि सोन पश्युन। मर्ग छु नॖ थवान वखतस कऻन्सि बुथ द्युन लायक़।
कऻन्सि गछ़ान अश तॖ कऻन्सि गछ़ान खश। कथ छि जऻरी। यऻरी कऺरिन्य असि सारिनी मऻज्य शारिका। दूर गऺछ़िन सानि गरॖ बरॖ दूर यि अज़कलॖच महामऻरी।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

23.05.2020

23.05.2020 ज़्येठॖ (ज्येष्ठ) ज़ूनॖ पछॖ (शुक्ल पक्ष) ऒक्दॊह (प्रथम) बटॖवार (शनिवार/ शनिश्चरवार) श्री सप्तर्षि सम्वत 5096, राश वृष (चलान)  ऋतु ग्रीष्म (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
          सप्तश्वलोकी दुर्गा
सर्वबाधा प्रशमनं त्रैलोक्यस्याखिलेश्वरी।
एवमेव त्वया कार्यमस्मद् वैरी विनाशनम्।।
**************************
         महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
         नुंदॖ ऱेशिन्य श्रुक्य
बायो तॆलि गछ़ख हऻरानस
यॆलि पानस थकी दिह
क्या कऺर्यज़ि बलॖ वऺटिस शैतानस
यॆम्य ह्यॆत्य सारि जहानॖक्य प्रॆह
कुन्यसॖय निनय अंद मऻदानस
ॴरतिस पानस पालन प्रॆह
         *************
माने :- बायो तॆलि गछ़ख हऻरान यॆलि पानस ह्यकथ सोरिय। क्या ह्यकख कऺरिथ ह्यमथ तॖ ताकतवर शैतानस युस सऻरयिसॖय जहानस छु तकलीफ दिवान। यॆलि मरख तॆलि निनय कुनिसॖय ज़ऺनिस अंद मऻदान तॖ यिनय कबरि मंज़ सऻविथ। पतॖ छुय पानसॖय बिचऻरिस तकलीफ बरदाश करुन।
**************************
पंचान्ग :- अमि कुठि मंज़ नीरिथ अच़व व्वंय ब्यॆयिस कुठिस मंज़। यि कुठ ओस ल्वकुट म्वकुट कुठ आसान तॖ अथ कुठिस ओस नाव आमुत दीनॖ ठोकुर कु़ठ या पूज़ायि कुठ। दीवी दीवताहन हॖन्ज़ॖ मूर्तियि, फोटु  बेतरी ॴस्य अथ ठोकुर कुठिस मंज़ यिवान थवनॖ। यॊत ताम म्यॆ ज़्वन छु ज़ि कऺशीरि मंज़ ओस प्रथ कऻशिर्य बटॖ गरस मंज़ यि ठोकुर कुठ आसान। अख नियम ओस तति ज़ि गर्युक ज़्युठ मर्द ओस प्रबातन अथॖ बुथ छऺलिथ ठोकुर कुठ ॳच़िथ भगवानस पूज़ा पाठ करान। अथ ठोकुर कुठिस मंज़ ओस शिव लिंग आसान, सालेग्राम आसान, सालेग्रामसॖय ओस ब्याख नाव ठोकुर आसान तॖ अमि नावॖ सॗत्य ओस कुठिस नाव प्यवान ठोकुर कुठ। बकाया कुठ्यन निशि ब्यॊन तॖ आकारस मंज़ ल्वकुट। मंत्रन हुन्द उच्चारन ओस यिवान करनॖ, गन्टा ॴस्य यिवान वायिनॖ। शंख शब्द ओस यिवान दिनॖ। बासान ओस ज़ि कऻशुर बटॖ गरॖ छु। मशीदन मंज़ ॴस्य अज़ान दिवान मौलवी सुबहऻय सुबहऻय तॖ सान्यन मन्दरन मंज़ ओस शंख शब्द यिवान दिनॖ। यिहऻय शंखॖ शब्द ओस यिवान दिनॖ प्रथ बटॖ गरॖ सॖन्दि ठोकुर कुठि प्यठॖ। सऺदियव प्यठॖ चलान आमॖच़ॖ यथ प्रथायि गव छ़्यन यॆलि कऻशिर्य बटस गरॖ-बार त्रऻविथ, ज़ऺमीन जायदाद त्रऻविथ, मंदोरि हिशि बजि बजि लरि त्रऻविथ तती च़लुन प्यव कऺशीरि प्यठॖ पनुन ज़ुव तॖ जान बचावनॖ बापथ ततिक्यन आतंकवाद्यन निशि, ततिक्यन दहशथगर्द्यन निशि, ततिक्यन मारॖवातलन निशि। ठोकुर कुठि किस शंखॖ नादस तॖ गन्टायि हॖन्ज़ि आवाज़ि आव थख अचानकन। कांह रूद नॖ तति अमि कामि बापथ। अज़ गऺयि अकत्रॖह वऺरी व्वंय यि शब्द कनन गछ़नस। हालांकि च़लनॖ पतॖ ति थॊव कऻशिर्य बटन यि पूजा गर सॗत्य सॗत्य मगर गन्टायि हॖन्ज़ आवाज़ तॖ शंख शब्द आव नॖ बोज़नस मंज़ तमि आयि तॖ तमि त्रायि। तमि ओस यिवान शिव लिंगस द्वदॖवान सॗत्य अभिशेक करनॖ। करान छि यॆति ति मगर फरॖख छि कति कोर। हेरथ ॴस्य मनावान ठोकुर कुठ्यन मंज़ तति रऻत्य रातन। ज़र्मॖसतम ॴस यिवान मनावनॖ तति पूज़ायि गरन मंज़, गुगॖ मंज़ुल ओस यिवान बनावनॖ जन्माष्टमी द्वह। दोत्यव तॖ साड्यव सॗत्य  गुगॖ मंज़ुल बनावुन, तथ मंज़ राधा कृष्ण ब्यॆहनऻविथ ख्यावुन च्यावुन, बदलय सऺरूर ओस तिमन दॊहन। बदलय सकून् ओस तमि वखतॖ, यिमॖ कथॖ बावॖन्य छि ज़ख्मन क्रऻल्य तुलनस बराबर। कथ छि जऻरी। महामऻरी छि पनॖन्य कऻम करान, ॳस्य ति छि पनुन पान, ज़ुव जान बचावनॖच कूशिश करान। दय कऺम्यसुन्द छु ज़्यादॖ बोज़ान, दयी ज़ानान। असि छि दयसॖय प्यठ यछ़ तॖ पछ़ ॳस्य डलव नॖ अमि निशि। डलनस छुनॖ वार ति। अज़ छि बटॖवार, व्वमेद छि ज़ि पगाह यी रॖच़ आथवार ति।
**"***********************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

22.05.2020

22.05.2020, ज़्येठॖ (ज्येष्ठ) गटॖ पछॖ (कृष्ण पक्ष) मावस (अमावस्या) शॊकुरवार (शुक्रवार/ जुम्मा) श्री सप्तर्षि सम्वत 5096, राश वृष (सुबहॖच 7.36 बजि प्यठॖ), ऋतु ग्रीष्म
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
           सप्तश्वलोकी दुर्गा
रोगानशेषानपहंसि तुष्टा रुष्टा तु कामान् सकलानभीष्टान्।
त्वामाश्रितानां न विपन्नराणां त्वामाश्रिताहयाश्रयता प्रयान्ति।।
**************************
        महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
         नुंदॖ ऱेशिन्य श्रुक्य
युन नो गॊछ़य अनिगटे
वॊदुर क्वलि मंज़ फटि नॖ ज़ांह
हूनिस ॳडिज रोटिनॖ हटे
कऺमीनस खऺदमथ वॊथि नॖ ज़ांह
      **************
माने:- अज्ञान गटि मंज़ गछ़ि नॖ ज़ीव हॆनॖ युन ज़ांह। यिथॖ हूनिस रोटिनॖ हटि ॳडिज तिथॖ यियि नॖ कऺमीनस कांह ति ब्रूंठ्य, सीवाय हुन्द छु नॖ सवालॖय। यिथॖ वॊदुर फटि नॖ ज़ांह क्वलि तिथॖ गॊछ़ नॖ मनुश पनॖनि क्वव्यच़ारव सॗत्य अज्ञान गटि मंज़ आवरनॖ युन यॆमि संसऻर्य।
**************************
पंचान्ग :- राथ च़ायि ॳस्य यथ ॳकिस कुठिस मंज़। मन गव शांत अमि कुठ्युक वातावर्ण वुछिथ यानि लबन प्यठ बड्यन बड्यन फ्रेमन मंज़ दीवी दीवताहन हॖन्द्य फोटू बासान ज़न आशिर्वादॖ दिनॖ बापथ तयार। पूर्वजन हॖन्द्यन फोटुवन प्यठ मालायि त्रऻविथ बासान संस्कार ब्वरुत गरॖ। मनॖच शऻन्ती आयि पऻन्य पानय। कऺशीरि हुन्द कमरॖ खुलॖ डुलॖ बॊड बॊड। फर्श वाहरऻविथ यानि वगुव तलॖ, तथ प्यठॖ सतॖरऺन्ड, तथ प्यठ मसनन्द बॊड बॊड प्रिन्टिड, लबि सॗत्य गोल तऺकियि, कॆंह कुशन तॖ कॆंह शान्दगऺन्ड्य बासान पऺछ़िस यिनॖ बापथ स्वागतॖच तयऻरी आमॖच़ करनॖ ज़न। म्यॆ बासान यि कथ वनॖन्य छि जऻयिज़ यॆतिनस सॖ कऻशुर बटॖ छु रूदमुत हमेशॖ थॊद पऺछ़िस आवबगत करनस मंज़। पऺछ़िसुन्द युन छु रूदमुत हमेश ज़न भगवानॖसॖन्दिस दर्शनस बराबर। कऻशुर बटॖ ओस नॖ कुनि कॖसमॖच कमी पीशी थवान पऺछ़्यलऻज़्य मंज़। अथ कुठिस आसॖ दारि-पऺट्य तॖ पंजरॖ-पऺट्य ति नज़र यिवान। दारि प्यठ बिहिथ आंगनुक नज़ारॖ वुछनुक ओस अलगॖय माने थवान या दारि प्यठ बिहिथ कोचस मंज़ यिनॖ गछ़न वाल्यन हुन्द आव-गव वुछनस ओस बदलय मज़ॖ, या यॊदवय यि दऻर खुलान आसिहे दऺर्यावॖ तरफॖ तॖ दारि प्यठ बिहिथ दऺर्यावुक नज़ारॖ वुछनुक सॊरूद ओस बिल्कुल ब्यॊन आसान। नावन हुन्द व्यतस्तायि मंज़ होरॖ योर करुन, बहच़न तॖ डून्गन हॖन्ज़ खसॖ-वस करॖन्य या बऺठिस प्यठ बहच़न मंज़ रोज़न वाल्यन हऻन्ज़न हॖन्ज़ वॊथॖ-बेठ वुछनस ओस अलगॖय लुतुफ आसान।ख़ास कर यॆलि हऻन्ज़न पानॖवॖन्य लडऻय ॴस व्वथान तॖ स्व लडऻय ॴस नॖ द्वह वादन म्वकलान। प्रथ शामन ॴस्य तिम हऻन्ज़ पनॖन्य लडऻय फ्वतिस तल थऺविथ दॊयिमॖ द्वह फॊत थॊद तुलिथ लडऻय ब्रोंहकुन पकनावान।  दिल ओस नॖ करान अमि जायि निशॖ डलुन। गरि बिहतॖय अख बे-मिसाल श्वगुल ओस आसान कऺशीरि मंज़ वखतॖ अकि। पंजरॖ पट्यन ॴस्य वंदस अख़बार अनिमॖ सॗत्य या मायि मऺथित चिपकावान तॗरि निशि बचनॖ म्वखॖ। दारि प्यठ बिहिथ वंदॖ रऻच़न शीनुक नज़ारॖ वुछनस ओस आसान पनॖनुय अख खुमार।कथ छि जऻरी। महामऻरी छि पनॖन्य पखॖ वाहरऻविथ करान अख अख शिकारा। ॳस्य छि वुनि दारि बर त्रॊपरिथ प्रारान ज़ि यि महामऻरी कर तुलि तफ तॖ कर त्रावि ॳसि पनॖन्यव ज़ंगव तऺल्य युथ ॳस्य ति मुच़रावहऻव दारि बर पनॖन्यन पनॖन्यन फ्लैटन। कशमॖकश छि ज़ोरन प्यठ तॖ दारोमदार छु माजि हॖन्दिस रहमतस प्यठ। कर यी तस आर बस ॳस्य रोज़ोस करान ज़ारॖपार।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

21.05.2020

21.05.2020 ज़्येठॖ (ज्येष्ठ) गटॖ पछॖ (कृष्ण पक्ष) च़्वदह (चतुर्दशी) ब्रसवार (वीरवार/ब्हस्पतिवार) श्री सप्तर्षि सम्वत 5096, राश मीष (चलान) ऋतु ग्रीष्म (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
            सप्तश्वलोकी दुर्गा
सर्वस्वरूपे सर्वेशे सर्वशक्ति समन्विते।
भयेभ्यस्त्राहि नो देवी दुर्गेदेवी नमोस्तुते।।
**************************
          महामारी नाश- मंत्र
 जयन्ती मन्गला काली भद्रकाली कपालिनी दुर्गा क्षमा धात्री स्वहा स्वधा नमोस्तुते
**************************
          नुंदॖ ऱेशिन्य श्रुक्य
यावनॖ हंग गऻरिथ पर गरस
यामथ ख़रस रऻवी कन
यामथ क्रशख परस
तवॖ गऺरिथ गछ़ी खारस कान
         ***********
माने :- पपि यावनॖ यॊद लोल संसऻर्य रूप पर गरस बरख, खरॖ सॖन्द्य पऻठ्य जखिथ ति लारिय नॖ कॆंह। युथुय पर हॆतु बापथ कर्म करख, फऺलिस नेरिय ह्यॊल या ॳकिस खऻर बनी कान यॆमिकिन्य नॖ पतॖ ज़ांह छ़ान्डॖनुय प्यॆयी कॆंह।
**************************
पंचान्ग :- राथ वुछ असि ज़ि गरस मंज़ नऺव्य नऺव्य चीज़ यिनॖ सॗत्य किथॖ पऻठ्य ह्यॆत्य असि वारॖ वारॖ प्रान्य ची़ज़ लॊब कुन थवॖन्य तॖ सॗत्य सॗत्य ह्यॊतुन सान्यन ख़यालन मंज़ या क्रय करनस मंज़ ति  बदलाव युन। वखतुक तकाज़ॖ छु ती, प्रोन प्रानान तॖ नॊव नवान। सु गव यि ज़ि गैस चूलॖ यिनॖ सॗत्य गव दानस प्यवुन बंद तॖ बंद गव त्वमुल म्वछि हॖन्ज़ आहूति दिन्य  मंत्र परुन ति बास्यव नॖ व्वंय ज़रूरी। गैस चूलॖ बापथ प्यॆयि थऺज़ जाय बनावॖन्य, सनिवारि थवनस सॊम्ब जाय छ़ान्डॖन्य बासेयि नॖ ज़रूरी। त्वहि आसि याद सारिनी ज़ि कऺशीरि मंज़ ॴस्य ॳस्य बत्तॖ पथर बिहिथ चोकि या पीरि प्यठ ख्यवान वखतॖ अकि। म्यॆच़ि सॗत्य अथॖ छलान तॖ अदॖ ॴस्य ह्यवान बत्तॖ ख्यॊन। ख्यनॖ ब्रोंह ॴस्य त्रावान हून्य म्यट थालस न्यबर। दपान छि यि हून्य म्यट छि दर-असॖल हवनॖ म्यॆट। माने ख्यनॖ ब्रौंंह जानावारन, कॆम्यन क्रॗलन हॖन्दि नावॖ अन्न वातॖनावुन। यिम ॴस्य सऻन्य संस्कार। बत्तॖ ख्यनॖ ब्रोंह ॴस्य सऻन्य पूर्वज अख मंत्र परान तॖ बत्तॖ ख्यनॖ पतॖ ति भगवानस शुखुरगुज़ार रोज़नुक मंत्र परान मगर यिम मंत्र आयि नॖ सानि दऺस्य पनॖन्यन शुर्यन ताम वातनावनॖ। संस्कारन बदल्यव माने तॖ हवनॖ म्यॆचि छि व्वंय वनान हून्य म्यॆट। यनॖ सान्यन गरन मंज़ डायनिंग टेबलुक रिवाज आव, ॳस्य छिन व्वंय पऺथरिस प्यठ बिहिथ बतॖ ख्यवान तॖ नॖ छि व्वंय हवनॖ म्यॆटॖय त्रावान मेज़स प्यठ ति करुन गऺयि दपान बद-तहज़ीबी मगर पनुन सु तहज़ीब मऺशरोव पश्चमी सभ्यता पानॖनऻविथ। कुनि कुनि गरस मंज़ यॊदवय यि संस्कार वुनि ति छु यिवान वरतावनॖ, तथ गरस या ततिक्यन बऻच़न छु म्योन नमन। म्यॆच़ि सॗत्य छि नॖ व्वंय अथॖ छलान म्यॆच़ि हॖन्ज़ जाय रऺट साबनि। टचि अथॖ छलनॖ बापथ अख साबन, बुथ अथॖ छलनॖ बाथ ब्याख साबन श्रान वान करनॖ बापथ अलग साबन वगैरा वगैरा। म्यॆच़ि हुन्द दोर म्वकल्याव करताम। यिथय पऻठ्य ह्यॆच़ लॊयिव बानव छ़्यफ तॖ गऺयि गऻबॖय। बारसस आयि चीनॖव्य  कप, मग, प्लास्टिक बॊवॖल बेतरी। खऻस्य, कॆंज़ि खऻस्य समावार,थाल, मुरादाबऻदी बानॖ प्रान्यॆयि तॖ स्टील तॖ शीशॖ सामान आव बारसस।  खऻस्य समावार बनेयि व्वंय शो केस आईटम। वऺलिव व्वंय अच़व कुठिस मंज़। अच़नॖ ब्रोंह ॴस्य तति कऺशीरि मंज़ ख्वरबानॖ कडान कुठि न्यॆबरॖ वुज़स मंज़, ख़बर याद छुवा। अदॖ ॴस्य कुठिस मंज़ क़दम त्रावान। मन ओस ख्वश गछ़ान बासान ओस ज़ि ज़न च़ायि कुनि शान्तिवनस मंज़ तिक्याज़ि कुठ्यक्यन लबन प्यठ ॴस्य आसान दीवी दीवताहन हॖन्द्य बऺड्य बऺड्य फोटू। गरिक्यन बऻच़न हॖन्द्य फोटू ,ब्यॊन ब्यॊन मॊकन प्यठ तुल्यमॖत्य। पूर्वज हॖन्द्य फोटू फ्रेमन मंज़ सजऻविथ मालायव सॗत्य। यिम सऻरी फोटू च़मेयि व्वंय लैपटापन मंज़ॖय योत। कुठ्य लबॖ छि व्वंय खऻल्य नज़र यिवान। कथ छि जऻरी। महामऻरी हुन्द तनाव छु बऺनिथ वुनि ति। ब्यमऻर्य छि फऻलान वारॖ वारॖ नव्यन अलाकन मंज़। कॆंच़न इहातॖन मंज़ दपान ह्यॆच़ॖन यि महामऻरी शांत सपदॖन्य। वारॖ वारॖ ह्यॊछ लूकव ति यिथिस माहोलस मंज़ पनुन पान खडा थवुन।  सबॖर छु करुन, यछ़ तॖ पछ़ छि माजि शारिकायि प्यठ थवॖन्य। जान द्वह ति फेरन जलदॖय।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

20.05.2020

20.05.2020 ज़्येठॖ (ज्येष्ठ) गटॖ पछॖ (कृष्ण पक्ष) त्रुवाह (त्रॆयॊदशी) ब्वदवार (बुधवार) श्री सप्तर्षि सम्वत 5096, राश मेष (चलान) ऋतु ग्रीष्म (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
            सप्तश्वलोकी दुर्गा
शरणागत दीनार्तपरित्राण परायणे।
सर्वस्यार्ति हरे देवि नारायणि नमोsतुते।।
**************************
    महामऻरी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
        नुंदॖ ऱेशिन्य श्रुक्य
अन तोहो ह्यथ गॊलुम ब्योलो
स्कलुय प्रॆह पॊलुम तॖ यछ़
वुछतॖ कॊत इज़रऻयिलस च़लव
वुद्यसॖय नुन्द्य मॆ करमस वछ़
बॖ पानस तॖ पानय म्योनो
लसय तॖ नुन्दॖ मरय तॖ नछ़
          ************
माने :-  अनुक ब्यॊल गॊलुम तॊह ह्यथ। पनॖनि कर्मॖ बूमी ब्योल ववॖनॖ बजायि दितिम यछ़ायि लुकन जिस्मऻनी तकलीफ। यिमव कारनव कति च़लव इज़रऻयलस निशि दूर। सु छु असि सॗत्य सॗत्य। मगर बेदार नुन्द ऱ़श्य रॊट दय नालॖ तॖ बास्योस सु तॖ बु छि कुनी। व्वंय छि तस सॗत्य मस रूज़िथ वनान ज़ि यॊद मनुश्य मरि या लसि हर हालस मंज़ गछ़ि ख्वश रोज़ुन।
**************************
पंचान्ग:- राथ वुछ्य असि कशीरि मंज़ क्याह क्याह बानॖ ॴस्य कऻशिर्य बटॖ पनॖनिस पनॖनिस चोकस मंज़ थवान। हालांकि अख ज़ॖ बानॖ वनॖन गऺयम मऺशिथ मगर म्योन यि सबक़ परनवाल्यव पोव म्यॆ याद ज़ि टूर ति माहरा ओस आसान। याद पावन- वाल्यन हुन्द नाव छु प्रॊफेसर चमन लाल कौल(सराफ) नोयडा प्यठॖ तॖ श्रीमती करुणा रैना न्युज़ीलैंडॖ प्यठॖ। मन गव ख्वश तिहुन्द याद पावुन। ज़िमनी प्यव म्यॆ याद ज़ि कॆंह थाल या टूर्य ॴस्य आसान नक्श्चनिगऻर्य कऺरिथ। तिमन बानन ॴस्य वनान मुरादाबऻदी बानॖ। ब्यॆयि ओस आसान गंगासागर। यि गंगासागर ओस लगान लूकन अथॖ छलनावनस कुनि बऺडिस लूकिस दॊहस। अमि अलावॖ ॴस आसान गंगॖज्य यॆमि सॗत्य ॳस्य ॴस्य पनॖन्यन शुर्यन द्वद च्यावनावान या ठोकुर कुठिस मंज़ सालेग्रामन पोन्य बावान। समय रूद पकान,नऺव्य नऺव्य चीज़ गऺयि बारसस यिवान तॖ प्रान्यव चीज़व ह्यॊत लॊब रटुन। यिमव मंज़ आव गैस स्यलैंडर तॖ गैस चूलॖ। यि चूलॖ यिनॖ सॗत्य त्रोव वारॖ वारॖ असि दानस प्यवुनॖय। हालांकि बऺडिस लूकिस दॊहस प्यठ ॴस्य प्यवान दानस मगर वारॖ वारॖ दूर्यॆव असि निशि त्रु-च़ोर, दु-च़ोर तॖ ऒकॖ-च़ोर दान तॖ हाकोल। पतॖ ह्यॊतुन बिजली सॗत्य पकनवोल कॆंह सामानॖ युन यॆमि कि वजह सॗत्य आव कऻशिर्य बटॖसॖन्दिस चोकस मंज़ इन्कलाब। ब्रड-टोस्टर, ओवुन, ग्रान्यडर,मिक्सर, रायिस-कुकर, ज्यूस-मेकर, वगैरा वगैरा। वय हुमुन याने दानस मंज़ त्वमलॖच आहूति दिन्य गऺयि बंद। अनिमॖ फ्यारुन गव बंद। कऻन्ज़ बनावुन गव बंद। व्वखलस मंज़ कॆंह च़्यॆटुन गव बंद। बदलाव आव चोकस मंज़ पूरॖ पऻठ्य। आर ओ याने पोन्य-फ्यॆरिथ कडनुक आलॖ,  फ्रिज विज यिनॖ सॗत्य बदल्यव इन्सानसुन्द तोरॖ तऺरीकॖ कशीरि मंज़। हालांकि फ्रिजुक ज़रूरत ओस नॖ प्यवान मगर अनन वाल्यव ऒन। पगाह अच़व न्यॆबरिम्यन कुठ्यन। महामऻरी हुन्द प्रकोप छु बरक़रार। सानि सुसाईटि यानि अजनारा जन-एक्स क्रोसिंग रिपब्लिक गाज़ियाबाद कुन ति कॊर अम्य ऱवख तॖ न्यून अख वृद्ध शख्स शक-किस गेरस मंज़ तॖ तथ तमि म्वखॖ दपान आव सु टावर हॆरि प्यठॖ ब्वन ताम सील करनॖ। दय गछ़ि पनुन अनुग्रह करुन। मऻज्य कऺरिन पर्दॖपूशी।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

19.05.2020

19.05.2020 ज़्येठॖ (ज्येष्ठ) गटॖ पछॖ (कृष्ण पक्ष) बाह (देवादेव) (द्वादऺशी) बॊम्वार (मंगलवार) श्री सप्तर्षि सम्वत 5096, राश मेष (शामन 7.52 बजि प्यठॖ), ऋतु ग्रीष्म (चलान), द्रठॖपऻन्च़ुक (पंचक) गछ़ि अज़ समाप्त ************************** नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव ************************** सप्तश्वलोकी दुर्गा सर्व मंगल मांगल्ये शिवे सर्वार्थसाधिके। शरण्ये त्र्यम्बके गौरी नारायणि नमोsस्तुते।। ************************** महामारी नाश - मंत्र जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते ************************** नुंदॖ ऱेशिन्य श्रुक्य आव च़ूरा लूटॖनि गरे व्वंदॖ शैतान ज़ऻहिर शोंतो नसरॖ बर त्रॊप लारान छुय मकॖर सरस लबस नॖ वोंतो। ******** माने:- शरीर रूप गरस आव वॆश्य रूप शैतान च़ूर मनस लूटनि। न्यॆबॖर्य छु शांत तॖ अंदर छु पत्यथ करनुक सामान सॊम्बरान। ऱयॆश छु नसरॖ बाबॖस नसीहथ दिवान ज़ि पनॖनि शरीरॖक्य बर त्रॊपरिथ करुन दय याद। नतॖ फटख संसऻर्य रूप समंदरस युस वॊंतॖ रॊस मगरमछव (वॆशियव) बऺरिथ छु। ************************** पंचान्ग :- अज़ वुछव ॳस्य यथ चोकस मंज़ बानॖ क्याह क्याह ॴस्य आसान कऺशीरि मंज़ बिजली तॖ गैसवऻल्य सामानॖ यिनॖ ब्रोंह। क्रॊछ़, क्रऺछ़ (बऺड, ल्वकॖट), काशवॖ, खऻस्य (लॊयिव), कॆंज़ि- खऻस्य, कवॖल्य, कटोरि, गिलासॖ (शीशिव्य/स्टीलॖक्य), जग, तुम्बॖ, गऺडवॖ या गडॖ, डोल, चिलमची (ल्वकॖट/बऺड), पऺहरात, तगऻर्य, बॊहगुन, मंज़ोलॖ बॊहगुन, बॊड बॊहगुन, दीगचि, ल्यॆज, क्राय, तऻव, देग, चोंचॖ, रऺम्ब्य, च़ालन (च़्वच्यन फ्युर दिनॖ बापथ), डुल, डुलॖज्य, टब, बाल्टीन (ल्वकुट/बॊड), डकनॖ, समावार, कलाय-कऺरिथ बॊहगुन, क्रॊंड कऺरिथ बोहगुन, तीलॖ-वऻर, तीलॖ-क्रॊंड, मसालॖ-डबॖ, चायि-डबॖ, शीशुव जार, कतर्युव गडॖ, टोक, तबॖच, छऻन्य, मुजि-कॊंड, छोंफ, पर्युन, व्वखुल-काजवठ, ॴलॖ-व्वखुल, न्यऻम्य, छ़ोटॖ, ब्ववुल, टॊबुर, अन्युट, गागॖर (सरतल्य/स्टील), नॊट, मलॖर, मऺट,च़ॊड, वऻर,चुमटॖ, सनिवऻर, च़ऻन्गिज, पुलहोर, अथॖ-तॖच़, फ्वतॖर (बानॖ थवनॖ बापथ), ॷलमऻर्य या ताखुच, नूनॖ डबॖ, मऺदर्यॆर डबॖ, थाल (स्टील/लॊयिव), प्लेटॖ (ल्वकॖट्य/बऺड्य) यिम ॴस्य आसान चीज़ चोकस मंज़। पतॖ आव गैस-स्लैंडर, तॖ बिजली प्यठ पकवॖन्य चीज़ तिम वुछव पगाह। अज़ दपान दिल्लि मंज़ पकन बसॖ। ब्यॆयि ति आयि रोक तुलनॖ कॆंच़न चीज़न याने आटो, टैक्सी वगैरा। यि सहूलियत आयि दिनॖ कॆंच़न जायनॖय वुनि। मरनवाल्यन हॖन्ज़ संख्या छि बडान रोज़ान। ॳस्य ति छि कमर कऺसिथ मुकाबलॖ करान। दयस छु पान पुशरावुन। तऺम्यसॖय मंज़ छि थवॖन् यछ़ पछ़ ब्यॆयि कॆंह द्वह। माता करि श्वब सारिनी तॖ रछि पनॖन्यन पादन तल। ************************** कऻशुर ह्यॆछव कऻशुर परव कऻशिर्य पऻठ्य पानॖवुन्य कथ बाथ करव ************************** नऺविव तॖ फॊलिव भूषण कौल "दीप" (बूज़िव ॳज़्युक सबक़ म्यानि ज़्यॆवि ति) (koshursabak.blogspot.com ति वुछिव)

18.05.2020

18.05.2020 ज़्येठॖ (ज्येष्ठ) गटॖ पछॖ (कृष्ण पक्ष) काह (देवादेव) (एकादशी) च़ऺन्दॖरवार (सोमवार) श्री सप्तर्षि सम्वत 5096, राश मीन (चलान) ऋतु ग्रीष्म (चलान), द्रठपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
            सप्तश्वलोकी दुर्गा
दुर्गे स्मृता हरसि भीतिमशेष जन्तो: स्वस्थै स्मृता मतिम् अतीव शुभां ददासि।
दारिद्र्य दु:ख भयहारिणी का त्वदन्या सर्वोपकारकरणाय सदार्द्रिचित्ता।।
**************************
       महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
         नुंदॖ ऱेशिन्य श्रुक्य
यिरॖवुन वछ़ास चिरवॖनि नावे
आवलुन वलि मॖ किनॖ लगे बठे
नाबद छ़न्याम सऺदरॖकऻन्ज़ पावे
म्यॆठ्या कऻन्ज़ किनॖ नाबद ट्यॆठे
          ************
माने:- पनॖनि मर्ज़ी कऺरिम क्वकर्म। याने पां बऺरॖच़ यीरॖवॖन्य नावि मंज़ वऺसिथ रूदुस व्यच़ारान ज़ि यि नाव लग्या बठि या यियि आवलॖनिस मंज़ ह्यनॖ। क्वबदि किन्य छ़ॖन्यॊम सऺदरॖकऻन्ज़ पावि मंज़ नाबद तॖ रूदुस स्वरान, नाबदॖ सॗत्य म्यॆठ्या कऻन्ज़ किनॖ नाबद खटि पनॖनुय स्वबाव याने कर्म कऺरिथ रूदुस ख़यालव सॗत्य दिल परेशान करान।
**************************
पंचान्ग:- राथ च़ाये ॳस्य चोकस मंज़ यि वुछनि ज़ि कुस चीज़ कथ जायि ओस आसान असि कऺशीरि मंज़। अमि ब्रौंंठ ज़ि बॖ पकॖ ब्रोंह कुन, ज़ॖ त्रॆ कथॖ रोज़ॖ म्यॆ वनॖनय। सु गव यि ज़ि म्यॆ वऺन्य राथ ज़िनिक्य त्रॆ कॖसॖम, याने वीरि ज़्युन, कायुर तॖ हतबॖ। मगर च़ूरिम कॖसॖम ति ओस आसान स गऺयो ज़ांगुल। हालांकि यि ज़ान्गुल ज़्युन ओस यिवान कमॖय पाहन वरतावनॖ मगर मेलान ओस यि ज़्युन ति मंज़्य मंज़्य। यि ज़्युन ति ओस यिवान फालनावनॖ। सोरुय ज़्युन ओस मेलान च्यॆन्दि प्यठॖय  तिथय पऻठ्य यिथ पऻठ्य दानि, त्वमुल तॖओट ओस मेलान च्यॆन्दि  प्यठ। सानि ज़नानॖ, याने मऻज्य, बाबी, न्वश कूर आसॖ दानस प्यवनॖ ब्रोंठ बुथ अथॖ छऺलिथ यिवान। दानस प्यठ वय (याने त्वमुल) बॊहगुनस मंज बऺरिथ यॆलि च़ऻरिस प्यठ थवान आसॖ, अमि बॊहगॖनॖ मंज़ॖ आसॖ ज़ॖ च़ोर वय दानॖ कऺडिथ  मंत्र परान परान दानस मंज़ आहूति दिवान। मंत्र ओस आसान अग्निये सूर्याये प्रज़ापतिये स्वाहा। यि ॴस अख नित्य क्रिया  आसान य्यॊस कऻशिर्य ज़नानॖ करान आसॖ। दपान अथॖ बुथ छऺलिथ चोकस अच़नॖ सॗत्य, दानस प्यठ बत्तॖ बनावनॖ विज़ि यि मंत्र परन सॗत्य छु सूर्य दीवता, प्रज़ापति तॖ अन्नॖपूर्णा गरस मंज़ बरकथ करान तॖ गरॖ ऒरुत तॖ ब्वरुत थवान। गरॖ नॊवरावान तॖ फ्वलॖरावान। अज़कल कऻत्याह छि यिमन नियमन हुन्द पालन करान, दय ज़ानि। गरिक्यन बऻच़न बत्तॖ शेरनॖ ब्रोंह, सनिवार्यन बत्तॖ त्रावनॖ पतॖ ॴस्य काव-पचि प्यठ जानावारन खऻतरॖ बत्तॖ फॊल थवान तॖ अदॖ ॴस्य पानस ख्यवान। चोकस मंज़ ॴस्य नॖ कुनि कॖस्मुक ख्वरबानॖ अन्दर च़ानान। हालांकि पुलहोर ओस आसान। अख चीज़ छु नॖ म्यॆ पलि प्यवान सु गव यि ज़ि केंच़न गरन ओस पान्युर पोन्य ब्वनॖ प्यठॖ ह्यॊर त्र्यॆमिस या च़ूर्यमिस पोरस ताम सारान रोज़ान तॖ यि पान्युर ओस मुसलमान आसान। ह्यॆरमिस पोरस प्यठ वऻतिथ ॴस्य चोकॖ किस दासस न्यॆबरॖय यि मलॖर या नॊट मऻल्यक्यन रटान तॖ थवान चोकॖकिस गरवंजस प्यठ। यॆलि मुसलमानस सॗ्य अथॖ लागनॖ सॗत्य ओस अथॖ छ़्यटान, यि पां मलॖर क्याज़ि ॴस नॖ छ़्यटान मुसलमान सॖन्दि अथॖ लागनॖ सॗत्य। अम्युक जवाब म्यूल नॖ म्यॆ वुन्यखताम। द्वद, ज़ामुत या ओम, यॆलि गूरिस निशि अनान ॴस्य,सु  गऺडवॖ या सु बानॖ यथ मंज़ सु गूर ओस द्वद दिवान, सु बानॖ ति ओस नॖ छ़्यॊट यिवान मानॖनॖ। मगर मुसलमान यान्य कुनि चीज़स अथॖ लागिहे, सु ओस यिवान मानॖनॖ छ़्यॊट। खबरक्याज़ि दय ज़ानि। खान्दरन प्यठ ॴस्य अमूमन मुसलमान ज़नानॖ या मर्द  छ़्यॆट बानॖ सुरनावान या छलान छ्वकान तिम बानॖ ॴस्य नॖ छ़्यॆट्य यिवान मानॖनॖ। ब्यॆयि ति छि कॆंह चीज़ यिमन प्यठ छ़्यॊट श्रूच़्युक मत-भेद छु बनिथ। कथ छि जऻरी। महामऻरी छि निवान गिलविथ कऻन्सि कऻन्सि वुनिति, मरनवाल्यन हॖन्ज़ ग्रन्द छि हुर्रानॖय तॖ कम छॆ नॖ गछ़ान। महामऻरी छॆ नॖ वुनि ति थफ तुलान। कऺरफ्युक  म्य्याद आव ब्यॆयि बऺडरावनॖ हालांकि कॆंच़न जायन दपान राहत छि आमॖच़ दिनॖ कम ज़्यादॖ मगर नज़र छि बरकरार महामऻरी प्यठ। असि छु पनुन ताब थवुन बराबर। दूर्यॆर थवुन बराबर। मास्क लगऻविथ अच़ुन न्यॆरुन। अथॖ ख्वर साफ थवॖन्य। कऻन्सि निश नॖ गछ़ुन, कांह नॖ गरॖ च़ानुन। माजि शर्ण गछ़ुन। तस सॖन्ज़ मॆहर मंगॖन्य।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

17.05.2020

17.05.2020 ज़्येठॖ (ज्येष्ठ) गटॖ पछॖ (कृष्ण पक्ष) दऺहम (देवादेव) (दशमी) आथवार (रविवार/एतवार) श्री सप्तर्षि सम्वत 5096, राश मीन (सुबहॖचि 7.13 बजि प्यठॖ) ऋतु ग्रीष्म (चलान) द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
         सप्तश्वलोकी दुर्गा
ओ३म ज्ञानिनामपि चेतांसि देवी भगवती हि सा।
बलादाकृष्य मोहाय महामाया प्रयच्छति।।
**************************
         महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
         नुंदॖ ऱेशिन्य श्रुक्य
परपयन कंद्यव करख नालॖमऺती
कंद्यव करख मऺसिथ खाल
बाज़रॖ नव मॊल्य मेलान हऺती
कंद्यव काच़स कॖनख लाल
         **********
माने:- हे इन्सानॖ, स्वंदर जवान कोर्यन तॖ व्वपर ज़न्यन नालॖमऺत्य कऺरिथ तुलख पनॖनिसॖय मुसलस लुतुफ, ति क्याज़ि पत्यथ गछ़िथ मेलिय नॖ ब्यॆयि सु यज़थ वापस कॆंह। पनॖन्यव कारव कॖनख पानय यज़तॖ रूप लाल काच़ म्वलॖ। युस नॖ ऱवपयि ख़रचिथ ति छु बाज़रॖ मऺल्य मेलान
**************************
प़चान्ग:- अज़ वुछव ॳस्य कऺशीरि मंज़ क्या क्या ओस चोकस मंज़ आसान  बिजली या गैसस प्यठ चलन वोल सामान यिनॖ ब्रौंठ। दान (म्यॆच़्युव), त्रु-च़ोर, दु-च़ोर, ऒकच़ोर, हाकोल, दानस मंज़ ज़ालनॖ बापथ ज़्युन (यि ज़्युन ओस आसान फालविथ) - ज़िनिस ॴस्य कॆंह ब्यॊन ब्यॊन कॖसॖम आसान, मसलन, वीरि ज़्युन, कायर ज्युन, हतबॖ ज़्युन। कायुर तॖ वीरि ज़्युन ओस यिवान
दानस  लागनॖ ब्रौंह फालनावॖनॖ ल्वकच्यन ल्वकच्यन टुकरन मंज़ मगर हतबॖ ज़्युन ओस नॖ यिवान फालनावनॖ। बॊठ ति ओस यिवान वरतावनॖ। चूंकि हाकोल ओस आसान ल्वकुट म्वकुट चूल्लॖ। अथ ॴस नॖ यिवान ज़िन्य हऺट लागनॖ। बऺल्कि हाकऻलिस मंज़स ॴस्य ल्वकुट गोल शॆशत्रुव पंजरि थवान तॖ तऺथ्य प्यठ त्योंगल बनावान तॖ चाय वगैरा ॳस्य बनावान अथ्य हाकऻलिस प्यठ। बत्तॖ स्युन ॴस रनान दानस प्यठॖय यथ त्रॆ च़ऻर्य ॴस्य आसान बऺनिथ। ल्वकॖट्य ल्वकॖट्य चीज़ ॴस्य तयार करान दु-च़ऻरिस या ऒकच़ऻरिस प्यठ ज़रूरत मुतऻबिक। ब्यॆयि ओस अमि अलावॖ आसान कऺश्य-दमचूल्लॖ। अथ कऺश्य-दमचूलस प्यठ ओस यिवान ऒमूमन पोन्य ग्रकॖनावनॖ। यि ग्रकॖनोवमुत पोन्य ओस यिवान बकार पलव-दलव छलनॖ बापथ, ज़नानन श्रान-वान करनॖ बापथ या लिवनस-डुवनस बापथ। अमि चूलुक इस्तिमाल ओस यिवान मंज़्य मंज़्य करनॖ। चोकस मंज़ ओस आसान हच्युव गरवंजि यथ प्यठ पां-मऺट्य, पां बऺरिथ नॊट या पां बऺरिथ च़ॊड ॴस्य थवान। अख होज़ ओस आसान यथ मंज़ बानॖ-बठॖ छलनॖ ॴस्य यिवान। प्वत कालि ॴस्य कऻशिर्य बटॖ सूरॖ सॗत्यन बानॖ ख्वन साफ़ करान रोज़ान कऺशीरि मंज़। दानस प्यठॖकनि आसॖ ज़ॖ ल्वकॖचि सनिवारि यिवान थवनॖ  यिमन मंज़ बत्त तयार गछ़ॖनॖ पतॖ यिवान ओस ग्वडॖ बत्तॖ त्रावनॖ अदॖ ॴस्य बऻच़न ख़्यावान च्यावान। बोज़नस तलॖ आव ज़ि पगहॗक्य प्यठॖ यियि कॆंच़न जायन कर्फ्यूहस डील दिनॖ मगर कॆंच़न शर्तन प्यठ।बासान छु ज़ि वारॖ वारॖ ह्यॊतुन गाश फ्वलुन। मऻज्य दीवी करि असि रऻछ
**************************
कऻशुर ह्यॆछव कऻशुर परव
कऻशिर पऻठ्य पानवुन्य कथ बात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

16.05.2020

16.05.2020 ज़्येठॖ (ज्येष्ठ) गटॖ पछॖ (कृष्ण पक्ष) नवम(देवादेव) (नवमी) बटॖवार (शनिवार/शनिश्चरवार) श्री सप्तर्षि सम्वत 5096 राश कुम्भ(चलान) ऋतु ग्रीष्म (चलान)...द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
           सप्तश्वलूकी दुर्गा
             देव्युवाच
श्रृणु देव प्रवक्ष्यामि कलौ सर्वेष्ट साधनम्।
मया तवैव स्नेहेनप्याम्बास्तुति: प्रकाश्यते।।
**************************
      महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
          नुंदॖ ऱेशिन्य श्रुक्य
लूर किथॖ वुठुक सॆके
आबॖवानि रॖखे पकी नॖ नाव
ति कुस कऻसिथ हमालि ह्यके
यि लानि ड्यके लेखनॖ आव
         ************
माने:- यिथॖ स्यख यियि नॖ लोरि वुठनॖ, तिथॖ पकि नॖ पां रॖखि प्यॆठ्य नाव। यि टाठि ड्यकॖलानि लीखित आव, सु ह्यॆकि नॖ कांह ति नाहनऻविथ
**************************
पंचान्ग:- अज़ छुस बॖ यछ़ान पनॖन्यन शुर्यन ज़ऻन्यकऻरी करनावॖन्य पनॖनिस पानॖ किस अंगन सॗत्य यिमन नाव छु यिथकऺन्य। ब्वनॖ प्यठॖ: ख्वर(ज़ॖ ख्वर), तलॖपॊत (ज़ॖ तलॖपऺत्य), ख्वरॖ-न्यॊठ (ज़ॖ न्यॊठ), ख्वरॖ-पंजि  (ज़ॖ ख्वरॖ पंज्य) ख्वरॖ-ऒंगजि (द्वन ख्वरन हॖन्ज़ॖ ऒंगजि), ख्वरॖ- किस (द्वन ख्वरन हॖन्ज़ॖ ज़ॖ किसॖ) ख्वरॖ-ऒंगज्यन मंज़ॖ ज़ऻल्य, ख्वरॖच खूर (द्वन ख्वरन हॖन्ज़ॖ ज़ॖ खोरि), ग्वड (ज़ॖ ग्वड), ज़ंग (ज़ॖ ज़ंगॖ), कॊठ (ज़ॖ कॊठ्य), लंग (ज़ॖ लंग),ज़ल-जाय(फिस), पोश, कछ़ (लंगन हॖन्द्य कछ़), रोंख, मंदुल, कमर, कऻन्य या हॊल,निच-यड, तून, यड, सीनॖ, फ्यॊक (ज़ॖ फ्यॆक्य), नऺर (ज़ॖ नरि), ख्वनॖवठ (ज़ॖ ख्वनॖवठ), कछ़ (नर्यन हॗन्द्य कछ़), हॊच़ (ज़ॖ हऺच़्य), अथॖ (ज़ॖ अथॖ), न्यॊठ (द्वन अथन ज़ॖ न्यॊठ), अथॖच ऒंगॖज (अथचि ऒंगजि) अथॖच किस (द्वन अथन ज़ॖ किसॖ), मंज़ अथॖ, नम (ख्वरॖन हॖन्द्य नम)(ऒंगज्यन हॖन्द्य नम), अथच्यन ऒंगज्यन हॖन्द्य नाव - ऒंगुल (तर्जनी)(यानि ग्वडॖनिच ऒंगॖज्य), ज़ॊंगुल (मद्यमा) (यानि दॊयिम या मंज़िम ऒंगॖज्य), काठ (अनामिका) (यानि त्रॆयिम ऒंगॖज्य) किस (कनिष्ठ) तॖ न्यॊठ।
बंद अथॖ गव म्वठ, हॊट, गर्दन, हॊंग्यन्य, वुठ (ज़ॖ वुठ), गलॖ (ज़ॖ गल), नस, नकॖवोर (ज़ॖ नकॖवऻर्य), कन (ज़ॖ कन), ॳछ (ज़ॖ ॳछ), ॳछ-टोर (ज़ॖ ॳछ्य टऻर्य), ॳछर वाल, बुम्मॖ (ज़ॖ बुम्मॖ), ड्यकॖ, म्यंगॖ (ज़ॖ म्यंगॖ), कनॖ-फ्यॆच़, गोंछ़ॖ, दऻर, मस, कलॖ, छ़ोग, दंद,ज़्यव। कोरोनावयरसस सॗत्य छु जंग जऻरी, मनोबल दॊर थऺविथ छि सऻरी, प्रारान कर म्वकलि यि महामऻरी। ॳस्य रोज़व पनुन परहेज़ कऺरिथ। मऻज्य दीवी करि असि सारिनी पनुन अथॖरॊट।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

15.05.2020

15.05.2020 ज़्येठॖ (ज्येष्ठ) गटॖ पछॖ (कृष्ण पक्ष) ॴठम(देवादेव) (अष्टमी) शॊकुरवार (शुक्रवार/ जुम्मा) श्री सप्तर्षि सम्वत 5096, राश कुम्भ (चलान) ऋतु ग्रीष्म(चलान) द्रठपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
           सप्तश्लोकी दुर्गा
             शिव उवाच
देवी त्वं भक्तसुलभे सर्वकार्यविधायनी
कलौ हि कार्यं सिद्धयर्थमुपायं ब्रूहि यत्नत:
**************************
       महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
         नुंदॖ ऱेशिन्य श्रुक्य
बॖ कंदि वटॖक्य सगय
अवॖ रॖखे पकी नॖ नाव
ति कुस कऻसिथ ह्यके
यि लानि ड्यके लीखिथ आव
        ***********
माने:- हे इन्सानॖ, यॊद वटॖ कनि च़ॖ सगनावख, तमि पां रॖखि कति ह्यॆकि नाव पऺकिथ। ड्यकस ल्यूखमुत यि दयन आसि, ति ह्यॆक नॖ कांह कऻसिथ।
**************************
पऺचाग:- पुनीत शास्त्री जियस सॗत्य कऺर म्यॆ राथ कथ फोनस प्यठ तॖ नन्योम ज़ि तऺमिस तॖ ओंकारनाथ जियस छे नॖ पानवॖन्य बनान कॆंह तॖ दॊश्यवॖन्यी छि पंचान्गॖच कऻम ब्यॊन ब्यॊन पकान। कुस कत्यन कऻच़ाह ग़लती करान छु पंचान्ग बनावान अथ सॗत्य छु नॖ यिमन पानवॖन्य कॆंह लेन-देन। म्यॆ नन्यव यि ति ज़ि ओंकारनाथ जियस निश छु नॖ कांह विश्वसनीय शख़स त्युथ कांह युस गणितस मंज़ महऻरियत छु थवान। बस कार्यालयकिस प्रऻनिस नावस यानि विज्येश्वर कार्यालय किस नावस प्यठ छु आमुत ओंकारनाथ जी पनॖन्य कऻम पकनावान। बोज़नस तल आम ज़ि ओंकारनाथ जी या ॳम्यसॖन्द्य बरादर ति छि नॖ ज़्यादॖ संजीदगी सान यि पंचान्गॖच कऻम वरतावान तॖ अमि मूजूब छि यिहॖन्ज़ि जंत्री मंज़ वारियाह ग़लती नज़रि यिवान तॖ यॆमिकि वजह सॗत्य छु बटॖ समाज प्रथ वऺरियि गुमराह गछ़ान, परेशान गछ़ान, दुच़्यॆतिस मंज़ रोज़ान तॖ पनुन अध्यात्मिक कर्म कान्ड कुनि कुनि सातॖ ग़लत करनस प्यठ मजबूर गछ़ान। यॆमि ऱयतॖ यानि ज़्यॆठॖ गटॖ पछॖस मंज़ॖय योदवय वुछव तॖ ननान छु ज़ि पऻन्च़म ॴस नॖ रावान तॖ सॗती सतम आसॖ नॖ ज़ॖ गछ़ान। ओंकारनाथ जियस ताम पऻन्च़म हॖन्ज़ ज़ऻन्यकऻरी दिच़ पंडित के के खोसा सऻबन, प्रेज़िडैंट कशमीरी पंडित सभा, ज्यॆमि, तॖ यकदम आव ओंकारनाथ जी ह्यसस ह्यु तॖ मऻनिन पनॖन्य ग़लती तॖ ल्यूखुन अख़बारस मंज़ ज़ि पऻन्च़म छॆ नॖ रावान। हऻरऻनी छि यि ज़ि पऻन्च़म हॖन्ज़ गलती मऻनिन मगर सतम ज़ॖ गछ़नॖच कथ छीडॖन नॖ। मतलब यि कि अगर सतम मानव ज़ॖ छि गछ़ान तॖ पऻन्च़म रावान छे नॖ कॆंह, तथ सूरतस मंज़ छु यि गटॖ पछ पन्दहऻव बजाय शुराहऻन दॊहुन हुन्द बनान। ओंकार नाथ जियस पज़िहे तमी द्वह सतम हॖन्ज़ ति कथ करॖन्य। कयाज़ि कऺरॖन नॖ दय ज़ानि  मगर तऺम्यसॖन्ज़ि छ़ॊपि सॗत्य गऺयि सानि समाजिक्य लूख ब्यॆयि ब्रमस मंज़ ज़ि सतम ॴसा अख किनॖ ज़ॖ तॊरुख नॖ फिकिरी।कुस करि फऻसलॖ? कऺमिस पज़िहे फूठ कडॖन्य। परेशान  गऺव बटॖ नाहक। खऻर, म्यॊन सुझाव छु पनॖनि समाजिक्यन बायन ब्यॆन्यन यी ज़ि असि पज़ि नॖ वुनि ब्रोंहकुन विज्येश्वर पंचान्ग वरतावॖन्य। अथ बजाय पज़ि असि पुनीत जियिन्य  विज्येश्वर जंत्री वरतावॖन्य तॖ तऺथ्य वुछिथ पनुन नित्य कर्मकान्ड करान रोज़ुन। म्योन फ़र्ज़ छु त्वहि च़्येनॖवॖन्य दिन्य, बुथि क्याह पज़ि करुन छवॖ त्वहि पनॖन्य मर्ज़ी। कोरोनावयरस छु दहशथ फऻलऻविथ, महामऻरी छि पनुन कमर कऺसिथ, मगर यिति छि अख हकीकत ज़ि ज़िन्दगी छि सारिनी हॖन्ज़ दावस लऺगिथ। पनॖन्यन पनॖन्यन गरन मंज़ छि ॳस्य सऻरी फऺसिथ। वति प्यठॖक्य जानवर छि ब्वछि हति प्यॆमॖत्य वऺसिथ। प्रकृच़ छु सोन नमन। सॊय प्रकृच़ॖय करि दफन सान्यन ग़मन, सान्यन संकटन तॖ सान्यन परेशऻनियन। ताब थवव लाभ मेलि। दय सुन्द नाव सुरव सुय छुय असली ग्वर
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

14.05.2020

14.05.2020 ज़्येठॖ (ज्येष्ठ) गटॖ पछॖ (कृष्ण पक्ष) सतम (देवादेव) (सप्तमी) ब्रसवार (वीरवार/ बृहस्पतिवार) श्री सप्तर्षि सम्वत 5096, राश कुम्भ (शामन 7.21 बजि प्यठॖ) ऋत ग्रीष्म....ॳज़्यकि प्यठॖ छु द्रठॖपऻन्च़ुक (पंचक) शुरु
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
           देवी-सूक्तम
या साम्प्रतं चोद्धतदैत्यतापितै रस्माभिरीशा च सुरैर्नमस्यते
या च स्मृता तत्क्षणमेव हन्ति न:
सर्वापदो भक्तिविम्रमूर्तिभि:
**************************
      महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
         नुंदॖ ऱेशिन्य श्रुक्य
क्रॆय मानतन चिलॖ दरुन
कमस नॖ दरन नफ़स द्वन्दय
ज़हर ख्यथ यिम आदरन
यिम अवहर करन हाकस तॖ हन्दे
सोंतॖ यिम जखन लागनय करन
तिम स्वख बरन पपि वंदय
यिम नॖ ख्वदाय तॖ रसूल सरन
तिम सम्सारस ज़्यन तॖ कन्दे
            **********
माने:- क्रय करॖन्य गऺयि ज़िन्दगी हुन्द कॖन द्युन। कम ख्यथ छु नफ़स वाद करान। यिम ज़हर ख्यथ ति टास करन तॖ हाकस हन्दि हऻल कऺरिथ रोज़न सन्त्वष्ट, तिमय छि सरस। जवऻनी मंज़ यॆलि मनुश कर्मबूमि हमवार कऺरिथ श्रेष्ठ (थद्यव) कर्मव रूपॖ ब्यॊल ववि सु प्रावि स्वख यथ द्वख सम्सारस मंज़। यिम नॖ दय तॖ त्युहुन्द रसूल स्वरन तिम छि फज़ूल यॆमि सम्सऻर्य ब्यॆयि ज़न्मस यिवान।
**************************
पंचान्ग:- राथ द्वह ति द्राव केंच़न म्यान्यन बायन तॖ ब्यॆन्यन दुच़्यॆतिस मंज़ॖय। समज आख नॖ ज़ि शॆयम ॴसा किनॖ सतम। ॳक्य बऻय प्रुछ़ म्यॆ फोनस प्यठ कयाह माहरा डुल्य-ब्रऻर मा छि गऻमिच़ ति क्याज़ि सतम बदलॖ छवॖ शॆयम लीछमॖच़। म्यॆ सूज़ तऺमिस बऻयिस अख़बारॖच कटिंग तॖ अदॖ गव सु तृप्त तॖ गोस त्रसलाह। खऻर अज़ छि व्वंय सतम। मसलॖ सुलज्यव कुनि हदस ताम। व्वमेद थ्येटर छु अज़कल जान प्रोग्राम चलावान तॖ फेसबुकस प्यठ मुलाकात करनावान कलाकारन तॖ तिहॖन्ज़ ज़ऻन्यकऻरी वातनावान आम लूकन ताम। म्यॆति ओसुख नाद द्युतमुत राथ तॖ आव म्यॆति मोकॖ पनॖन्य दऻद्य कांगॖर वनॖनॖच। गन्टस डोडस गन्टस कॊड ॳन्द्रिम गुबार न्यबर तॖ ल्वकचारॖ प्यठॖ बुजरस ताम यिमव यिमव व्वलाबव तारॖ तऺर्य वुन्युखताम, प्यून्ताह प्यून्ताह न्यूम वऺनिथ। बोज़न वाल्यन क्युथ लॊग म्योन सार ज़िन्दगी हुन्द, यि ह्यकन तिमय वऺनिथ। ज़े के विचार मंच ति छु पनुन प्रोग्राम कथबात चलावान तॖ नामावार हऺस्तियन आम लूकन ताम वातनावनॖच कूशिश करान। ब्यॆयि तरफॖ ह्यॊतुन अथॖरोट थ्येटर ति पनॖन्यन प्रोग्रामन अमली जाम छ़ॖनान। यथ महामऻरी मंज़ गरि बिहतॖय यिम प्रोग्राम चलावॖन्य रूद्य स्यठाह फऻयदॖमंद। अनज़ान लूकन ताम वऻच़ ज़ऻन्यकऻरी गरन मंज़ बिहतॖय तॖ ग़म दफऻयी गऺयि कॆंच़स कालस। वारॖ वारॖ ह्यॆतिन ॳस्य पकॖन्य ब्रोंह ब्रोंह मगर सफ़र छु ज़्यूठ। प्रारुन छु ज़रूरी। ताब थवुन छु लऻज़्यमी। हमहऺस्ती हावॖनॖ सॗत्य नेरनॖ कॆंह। प्रकृती छि पनॖन्य कऻम करान। ॳस्य ति थवव क़दम पनॖन्य ॳथ्य सॗत्य सॗत्य तॖ वुछव गाश पगाह। मऻज्य दीवी करि पनुन अनुग्रह
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

13.05.2020

13.05.2020 ज़्येठॖ (ज्येष्ठ) गटॖ पछॖ (कृष्ण पक्ष) शॆयम (देवादेव) (षष्ठी) ब्वदवार (बुधवार), श्री सप्तर्षि सम्वत 5096, राश मकर (चलान) ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
          देवी-सूक्तम्
स्तुता सुरै: पूर्वमभीष्टसंश्रयात्तथा सुरेन्द्रेण दिनेषु सेविता:
करोतु सा न: शुभहेतुरीश्वरी शुभानि भद्राण्यभिहन्तु चापद:
**************************
          महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
           नुंदॖ ऱेशिन्य श्रुक्य
यख़ तुलकतुर , शिशर गऻन्ट शीन
तिम ब्यॊन ब्यॊन पऻदॖ कऺर्य आशीन
यामथ खॊतुख पूरि कनि रव
तामथ तिमन च़्वन अकुय गव
          ***********
माने:- यख़ तुलकतुर शिशर गऻन्ट तॖ शीन छि ब्यॊन ब्यॊन रंगव क्वदरतन पऻदॖ कऺर्यमॖत्य मगर यॆलि पूरि किन्य सिर्यि खऺसिथ प्रवॖ तिमन प्यठ प्यवान छि, तिमन च़्वशवऺनी छु कुन सपदान।
**************************
पंचान्ग:- ओंकारनाथ जीयिनि जंत्री मंज़ ग़लत तिथि, ज़्यॆठॖ गटॖ पछॖ पऻन्च़म रावान हावनॖ म्वखॖ लॊग सानि समाज्यक्यन वारिहान  लूकन दोखॖ तॖ तिमव वरतऻव्य पनॖन्य द्वह तमी जंत्री मुतऻबिक तिक्याज़ि ज्यॆमिकिस अख़बारस मंज़ ग़लती हुन्द इज़हार ओंकारनाथ जीयिनि दऺस्य कऺरमॖच़ खबर वऻच़ तिमन स्यठाह च़ीर्य या अड्यन ताम वऻच़ॖय न। तिम रूद्य शाम ताम ॳथ्य दुच़्यॆतिस मंज़ ज़ि पऻन्च़म छि रावान। यॆमिस राथ यानि पऻन्च़म द्वह वॊहरवोद ओस तऺम्य मनोव ऊतरय तिक्याज़ि तम्य पॊर जंत्री प्यठॖ च़ोरम तॖ पऻन्च़म छि कुनी गछ़ान तॖ यिथय पऻठ्य यॆमिस राथ श्राद्ध ओस तऺम्य ति कॊर ऊतरय दान-वान। म्वखसरॖ गऺयि लूख परेशान हंगॖ तॖ मंगॖ राथ दॊहस।  सुबॖ प्यठॖ शाम ताम वऻत्य म्यॆ फोनन प्यठॖ फ़ोन तॖ म्यॆति खऺच़ हॊदॖहऺर तिमन जवाब दिवान दिवान।  बॖ छुस धन्यवाद करान पंडित के के खोसा सऻबस यिम प्रेज़िडैंट छि ज्यॆमि कऺशमीरी पंडित सभायि हॖन्द्य, यिहन्दि सहायतायि सॗत्य सपुद मसलॖ हल तॖ तिमव सूज़ म्यॆ अखबारुक सु हिसॖ यथ मंज़ ओंकारनाथ जियन ॴस पनॖन्य ग़लती मऻन्यमॖच़। मगर यीतिस कालस स्व ख़बर म्यॆ निश वऻच़ तॖ म्यॆ ब्रोंह कुन पकॖनऻव तीतिस कालस ॴस्य वारिहाव लूकव गलत तिथियस मंज़ॖय पनॖन्य  कऻम निबऻवमॖच़, यानि पितरन त्रेश दिच़मॖच़, वॊहरवाद्युक प्रेप्युन होवमुत वगैरा वगैरा। ओंकारनाथ जी छु ओसमुत सोंन्दर हॖन्दि शान्दॖ बिहिथ गन्ज़रावान द्यार। हद गऺयि यीच़ कि त्रॆयव शखसव मंज़ॖ तुल नॖ ॳक्य ति फ़ोन ऊतरॖ यॆलि म्यॆ तिमन सॗत्य संपर्क यॆछ़ेयो करुन। यिथॖ पऻठ्य छु सोन पंचान्ग दुवतिस प्यठ लूकन वथ डालनस प्यठ। खऻर, व्वंय छि पगाह सतम। ओंकारनाथनि जंत्री हिसाबॖ छि सतम ज़ॖ गछ़ान युस ग़लत छु।  दॊयमि जंत्री यानि पुनीत शास्त्री जीयिनि जंत्री मंज़ छि सतम कुनि गछ़ान। सान्यन बायन छु तम्युक   ह्यस थवुन। म्यऻन्य व्यन्ती छि असि पज़ि नॖ ओंकारनाथॖ जियिन जंत्री मऺल्य ह्यॆन्य तिक्याज़ि ॳम्यसॖन्ज़ि जंत्री मंज़ छि वारियाह ग़लती आसान अज़कल तॖ यि छु नॖ मटि ति ह्यवान सऺहल सऺहल। ऒन दा़ंद रावॖरावान सासस दांदस वथ।दॊयव जंत्रीयव बजायि अगर अकॖय जंत्री मेलिहे सऻनिस समाजस ॳस्य बचहऻव यिमव दुच़्यॆत्यव निशॖ। कोरोनावयरस छु पनॖनि रफतारि मंज़ पकान तॖ बनावान ॳकिस ॳकिस पनुन शिकार। राथ छि दपान प्रधान मंत्री सऻबन छु भाषण द्युतमुत मगर तथ भाषनस मंज़ छि अर्थॖ व्यवस्थायि प्यठ ज़ोर आमुत दिनॖ मगर दारि बर मुच़रावनुक ज़िकिर छु नॖ आमुत करनॖ वुनि कॆंह। मतलब असि छु वुनि ब्यॆयि कॆंच़न दोहन ताब थवुन, ह्यमथ ह्यॆन्य, हार नॖ मानॖन्य। दयस पान पुशरावुन तॖ तऺम्यसॖय प्यठ यछ़ तॖ पछ़ थवॖन्य। प्रकृच़ि करव प्रणाम।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

12.05.2020

12.05.2020 ज़्येठॖ (ज्येष्ठ) गटॖ पछॖ (कृष्ण पक्ष) पऻन्च़म (देवादेव) (पन्चमी) बॊम्वार (मंगलवार) श्री सप्तर्षि सम्वत 5096, राश मकर (दुहचि 10.15 बजि प्यठॖ) ऋतु बसंत (चलान)...अज़ छि ज़िष्टा देवी जयन्ती ति
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
             देवी-सूक्तम्
चितिरूपेण या कृत्स्रमेतद व्याप्य स्थिता जगत्
नमस्तस्यै नमस्तस्यै नमस्तस्यै नमो नम:
**************************
      महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
         नुंदॖ ऱेशिन्य श्रुक्य
सु छुम नज़ि सौदा कर
बाज़र लॊबुन नॖ कॖनुन
वऻन्लिजि कॊरनम ज़ऻल्य पंजरॖ
ख़ंजर दिथ गोम मारनन
ब्यब बऺरनम बुसरि नारॖ
कस नॖ पोशुम वनुन
हन हन गऺजिम सॖसरि नारॖ
दिलस कॊरनम पर्युन
        **********
माने:- अशक हकीकी छु पोशवुन तॖ रोज़वुन ॳन्द्रिम सोदा। यि सोदा छु नॖ बाज़रॖ कॖनुन कॆंह। तसॖन्द्य दूरिरन कॊरनम वऻन्लिजि ज़ऻल्य पंजरॖ। ख़ंजर दिथ गोम ज़न मऻरिथ। बॆबि बॊरनम लोलॖ नारॖ बुसर बॖ कस ह्यकहऻ बऻविथ, ज़ि तमि सॖसरि सॗत्य गऺजिम हन हन। मगर यिहय दगि रॊस दोद ह्यॊतुन म्यऻनिस दिलस ख्वश युन। तिक्याज़ि ॳशकॖ दॊदुय छु दवा ति पानय आसान
**************************
पंचान्ग:- अज़ छि ज़िष्टा दीवी जयन्ति। ज़िष्टा दीवी यानि ज़्यीठ्यऻरॖ मेलॖ। नम गछ़ान ॳछ यॆलि फ्युर लगान ख़यालस। ज़्येठॖ ब्रसवारॖ आसॖ कऻशीरि मंज़ मशहूर वख्तॖ अकि। प्रोन ज़्यीठ्यऻर ति छु बन्योमुत अख यादगार म्यऻनिस दिलस मंज़। हब्बॖकऺदलॖ प्यठॖ ज़्यीठ्यऻर पैदल गछ़ुन सतन ब्रसवारन लगातार। क्याह जवऻनी ॴस, क्याह वलॖवलॖ ओस, क्याह समां ओस यॆतिनस तम्युक बखान करुन छु नॖ मुम्किन। म्यॆ छु पनुन लडकपन याद यिवान, यॆलि ब्वदॖवारि शामन ॴस्य गरि नेरान, अमराकदलॖ प्लेडियम सिनिमा हालस मंज़ अंग्रीज़ फिल्म वुछिथ ॳकिस द्वन दोस्तन सॗत्य पतॖ गछ़ान बुल्वार्ड रोडॖ डल किनारॖ किनारॖ पैदल ज़ीठ्यऻर ताम तॖ वातान ज़्यीठ्यऻर रऻच़ हॖन्ज़ॖ काह बाह बजि। बजन कीर्तन ओस आसान चलान रऻत्य रातस। सुबहऻय ॴस्य नागस प्यठ श्रान कऺरिथ माजि हुन्द ध्यानाह करान। लूख ॴस्य ज़्यीठ्यऻर च़ॊट ति खारान यानि तऺहर च़रवनॖ या तऺहर शूशनोर, तॖ ॴस्य तति त्रावान जानावारन। तति ओस आसान अख सॊन ख्वड ति तॖ गिन्दान गिन्दान ॴस गछ़ान अथ मंज़ वाटर-बाल यथ सॗत्य ल्वकॖट्य शुर्य गिन्दान ॴस्य रोज़ान। कुल्यन हॖन्ज़ॖ तॆहरि च़ऺटिथ ॴस्य सॊ बाल ख्वडॖ मंज़ खारान। म्यॆ छु ॳछन तल सु नज़ारॖ वुनि ति। ख़बर त्वहि कऻत्यहान आसि याद। दॊहस ॴस्य शुर्य गिन्दान द्रॊकान रोज़ान। खुलॖ-डुलॖ जाया ॴस आसान।सिरिफ ओस अख मकानॖ बऺनिथ तिमन दॊहन यॆति ब्रह्माजी, शायद नाव ओसुस अर्ज़नबोय। तथ लरि मंज़, म्यॆ छु याद, तऺम्यसॖन्द्य मज़मन ॴस्य ख्यन-च्यन बनावान तति। मगर अज़कल छु सोरुय नक्शॖ बदल्योमुत ज़्यीठ्यऻरुक यॆलि म्यॆ वुछ ज़ॖ त्रॆ वऺरी ब्रोंठ अकि द्वयि लटि।अज़कल छि तति रोज़नॖ बापथ कमरॖ बनऻवमॖत्य, पोशॖ बाग़ छि बनेमॖत्य। ज़ॖ च़ोर वान ति छि खुलेमॖत्य। ज़्यीठ्यऻर दामनॖ प्यठॖ ह्यॊर मन्दरस ताम छि हेर तॖ सड़क बनेमॖच़। गऻड्य छि व्वंय ह्यॊर ताम वातान। व्वंय छु ज़्यीठ्यऻर वातुन स्यठाह सऺहल बन्योमुत मगर कऺशीरि वातुन तॖ पतॖ ज़यीठ्यऻर गछ़ुन छु हना मूश्किल। म्यॆ छु याद यिवान ज़ि मर्दव न्यसबतॖ आसॖ ज़नानॖ ज़्यादॖ गछ़ान ज़्यीठ्यऻर। के एम डी गाडि आसॖ त्रावान सवार्यन दामनस तल होटल ओबेरोयस नऺज़दीक तॖ तति प्यठॖ ओस प्यवान पैदल पकुन। मगर अज़ छु तत्युक हुलियय बदल्योमुत। मऻज्य जिष्टा रूज़िन सहायतस सारिनी। कति यिन फीरिथ तिम असवॖन्य तॖ गिन्दॖवॖन्य द्वह। शुर्यन क्याह वनव तॖ कोताह वनव। अज़ दपान कॆंच़न जायन बापथ यी रेल सीवा बहाल करनॖ कॆंच़न नियमन अन्दर अन्दर। हालांकि मरनस छु नॖ थख गछ़ान वुनि मगर एहतियात ति छु सॗत्य सॗत्य यिवान वर्तावनॖ। जंग छु महामऻरी सॗत्य जऻरी। महावीर करि पनॖन्य यऻरी तॖ दूर करि यि महामऻरी। ताब तॖ सबॖर थवनॖ रॊस छु नॖ  ब्यॆयि कांह चारॖ।  तिक्याज़ि यि महामऻरी छि प्रकृच़ हॖन्ज़ देन तॖ यि रूग शूग कासि प्रकृच़ॖ पानय  तॖ कुल्य ज़गतस अनि शुब मऻज्य दीवी पऻन्य पानय। मऻज्य बॖ नय कॆंह ब्यॆयि ज़ानय।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

11.05.2020

11.05.2020 ज़्येठॖ (ज्येष्ठ) गटॖ पछॖ (कृष्ण पक्ष) च़ोरम (देवादेव) (चतुर्थी) च़ऺन्दॖरवार (सोमवार) श्री सप्तर्षि सम्वत 5096 राश धनु (चलान) ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
            देवी-सूक्तम्
इन्द्रियाणामधिष्ठात्री भूतानां चाखलेषु या
भूतेषु सततं तस्यै व्याप्तिदेव्यै नमो नम:
**************************
        महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
           नुंदॖ ऱेशिन्य श्रुक्य
दमी दियि तॖ मंज़ॖलॖ वुज़े
सगॖ कनि दिज़्यस हटिकुय रथ
यार नय डॆंशन कऺह कऺर्यज़े
यार कति त्रावि यारॖ सॖन्ज़ कथ
       ***********
माने:- दमी यॆलि दिनस प्यठ यियि मनॖबल गछ़ि इज़हार। मन लगि वतन छ़ान्डनि। हे इन्सानॖ हटिकि रतॖ दीज़्यस सग। ध्यानस मंज़ यॊद नॖ दय डॆंशहन, अभ्यासॖ सॗत्य वातख मंज़िलस तऺमि पतॖ कति रोज़ि सुति च़्यॆ निशॖ दूर
**************************
पंचान्ग:- मसलॖ गव हल। द्वन ज्योतिशाचार्यन मंज़ कुनी कथ नऺ आसॖनॖ म्वखॖ तॖ द्वनवऺनी हॖन्दिस  गणितस मंज़ फरॖख आसॖनॖ म्वखॖ छि आम जनता बिचऻर्य द्वन तॖ च़्वन मंज़ गछ़ान। फऻसलॖ छिनॖ ह्यकान कऺरिथ ज़ि कऺम्यसॖन्ज़ कथ मानव तॖ कऺम्यसॖन्ज़ न मानव। ऊतरॖ वॊन म्यॆ कऻन्सि ॳक्य बरादरन ज़ि ज़्येठॖ गटॖ पछॖ पऻन्च़म माहरा छि ओंकारनाथ जीयनि जंत्री हिसाबॖ रावान मगर पुनीत जीयनि जंत्री हिसाबॖ छॆ नॖ रावान। सु ओस यछ़ान ज़ानुन ज़ि सऺही कुस छु। द्वन जंत्री मंज़ फरॖख वुछिथ गोस बॖति शिश्यपंजस मंज़। म्यॆ वातॖनऻव यि समस्या कॆंच़न ज़िठ्यन हॖन्द्यन कनन ताम तॖ प्रार्योस तिहॖन्दिस जवाबस। राथ दॊहलि म्यूल जवाब ज़ि ओंकारनाथ जियिन जंत्री मंज़ छि ग़लत गणॖना आमॖच़ करनॖ तॖ तऺम्य छि पनॖन्य ग़लती मऻन्यमॖच़। यि कथ छि वाज़ेह आमॖच़ करनॖ ज्यॆमिकिस कॆंच़न अख़बारन मंज़। व्वंय यिम ओंकारनाथॖनि जंत्री हिसाबॖ पनुन द्वह तिथि वगैरा मानान छि तिमन छु म्योन वनुन ज़ि पऻन्च़म छॆ नॖ रावान तॖ बुथि पतॖ सतम ति छॆ नॖ ज़ॖ गछ़ान। जिष्टाय हुन्द द्वह यी पगाह यानि पऻन्च़म द्वह मनावनॖ  अज़ नॖ। पऺत्यम्यव कॆंच़व वऺरियव प्यठॖ यीच़ॖ गलतीयि ज़ानि अनज़ानि मंज़ ओंकारनाथ जीयनि जंत्री मंज़ वुछनॖ पतॖ छुस बॖ सलाह दिवान पनॖन्यन बायन ज़ि असि पज़ि नॖ यॆमि ब्रोंहकुन यिहॖन्ज़ जंत्री मऺल्य ह्यॆन्य। पुनीत जियिन जंत्री छि हालस सऺही गणित हावान तॖ असि पज़ि तऺथ्य प्यठ योत यछ़ पछ़ थावॖन्य। अज़ छि खुशी हॖन्ज़ कथ ज़ि कॆंह रेलॖ पकन दपान पगहॖकि प्यठॖ तॖ टिकॖटन हॖन्ज़ बुकिंग गछ़ि शुरु अज़ शामन च़ोरि बजि प्यठय। तनाव छु बरक़रार। बंद छु वुनि कारॖबार सोरुय। ॳस्य ति छिनॖ करान वुनि कॆंह ज़ोरुय। मगर दिवान छि दक्कॖ महामऻरी वारॖ वारॖ न्यबरकुन तॖ ज़्यॆनव यि जंग अज़ नय तॖ पगाह। बस शर्ण रोज़ुव माजि शारिकायि। सॊय वातॖनावि प्रथ ॳकिस सऺही सलामत पनॖनि पनॖनि जायि।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप" 
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

10.05.2020

10.05.2020 ज़्येठॖ (ज्येष्ठ) गटॖ पछॖ (कृष्ण पक्ष) त्रय (देवादेव) (तृतीय) आथवार (रविवार/ एतवार) श्री सप्तर्षि सम्वत 5096 राश धनु (सुबहॖचि 5.1 बजि प्यठॖ), ऋतु बसंत (चलान)...अज़ छि संकट च़ॊरम (संकट चतुर्थी निवार्ण) ति
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
          देवी-सूक्तम्
या देवी सर्वॖभूतेषु भ्रांति रूपेण संस्थिता
नमस्तस्यै नमस्तस्यै नमस्तस्यै नमो नम:
**************************
         महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
          नुंदॖ ऱेशिन्य श्रुक्य
गमबरॖ प्रकथ करान छिय ग्राव
अम्बरॖ पॗरॖ छ़ॊनुम बाव कस
सऺर्य गोम गुर तॖ वॊखॖल्य गऺयम नाव
बार गॊब्यॊम तॖ त्रावॖ कस
        ***********
माने:-  गऺम्बीर या अहंकऻरी स्वबाव म्योन छु वुनि ति म्यॆ मांगय करान। बॖ कस वनॖ अम्बरुक गुर आम छ़ॆनिथ तॖ रटन बानॖ रॊस किथॖ ह्यकन व्वंय प्यतॖरऻविथ, तिक्याज़ि मन डलनॖ किन्य छि पापॖन्य बऻर्य तीत्य म्यऻनिस अटस खऺत्यमॖत्य, यिमन मंज़ बॊडिथ वारॖ वारॖ गोस नावि वऺसिथ। सु बार छुम त्यूताह गॊब्योमुत युस बॖ त्रऻविथ ति ह्यकॖ नॖ कऻन्सि प्यठ।
**************************
पंचान्ग:-  दपान यथ नॖ पूश तथ छु नॖ दूष। कोरोनोवयरस महामऻरी कऺर्य ॳस्य सऻरी सख़ गीर, ग़रीब किहो ॳमीर, राज़ॖ किहो फकीर। खौफ़ज़दॖ बनऻविन ॳस्य। गरन मंज़ श्रपॖरऻविन। दारि बर थऻव्य त्रॊपॖरऻविथ। यि दऺप्यज़ि ति मन्दरन हॖन्द्य द्वार ताम आयि बंद करनावनॖ। यातायात रुक्यव, आवन जावन गव बंद। तऻलीमी अदारॖ, दफ़तर, कारखान तॖ मिल ताम आयि बंद करनावनॖ। मनुश प्यव सोंचस ज़ि करे तॖ करि क्याह। पुशरोवुन पान भगवानस यि ज़ऻनिथ ज़ि यॆमि शक्ति यि महामऻरी पऻदॖ कऺर, सोय शक्ति करि यि पऻन्य पानय दूर। यि ज़ऻनिथ ज़ि प्रथ अख चीज़ छु नाशवान। रोज़वुन छु कीवल अख ईश्वर सुन्द नाव ब्यॆयि नॖ कॆंह। मगर वुछनस तल आव यिति ज़ि अकि अंदॖ छु इन्सान परेशान ब्यॆयि अंदॖ छु नऺव्य नऺव्य तजरुब करान रोज़ान। कॆंच़व लीख्य बऻथ ब्यॊन ब्यॊन आयि, मच़रॖक तॖ मसखऺरी हॖन्द्य बऻथ, केंच़न गरन मंज़ आयि यथ बंद-किस दोरान शुर्यन डुवॖनॖच, शेरनॖच तरबियत दिनॖ, कॆंच़न बड्यन मर्दन चोकॖ सम्बालनॖच तरबियत दिनॖ। नऺव्य नऺव्य पकवान आयि बनावनॖ किताबन हॖन्द्य वरख पऺर्य पऺर्य। ब्यॊन ब्यॊन कऺसॖमुक असर प्यव ब्यॊन ब्यॊन गरन। मोबायलुक या लैपटापुक फऻयदॖ ति आवॖ तुलनॖ अथ असनाहस मंज़। यिमव चीज़व सॗत्य मिलनोव इन्सानन इन्सान ज़गतॖक्यन बाकय इन्सानन सॗत्य फेसबुकॖ दऺस्य तॖ च़ऺलॖरोवुन पनुन कुन्यर तॖ होवुन नॊव नॊव हुनर। संयम छु थवुन जऻरी, वुनि छॆनॖ ख़बर यि क्रूठ सफ़र कोताह ज़्यूठ छु। यि संकटॖच गऺर ति छि कडॖन्य असि असान असान। दागॖ छु रोज़ान द्राग छु नॖ रोज़ान। दय छु सोन सोरुय बोज़ान
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

09.05.2020

09.05.2020, ज़्येठॖ (ज्येष्ठ) गटॖ पछॖ (कृष्ण पक्ष) द्वय (देवादेव) (द्वितिय) बटॖवार (शनिवार/ शनिश्चरवार), श्री सप्तर्षि सम्वत 5096, राश वृश्चिक (चलान) ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
            देवी-सूक्तम्
या देवी सर्वॖभूतेषु मातृ रूपेण संस्थिता
नमस्तस्यै नमस्तस्यै नमस्तस्यै नमो नम:
**************************
       महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
        नुंदॖ ऱेशिन्य श्रुक्य
सॖह ॴस्यज़ि तॖ शाल ज़न पऺक्यज़े
शरहुक सॊथ च़ऺट्य ज़ि नॖ ज़ात
छ़ान्ठ नय ज़ऻन्यज़ि बठि तलॖ फऺट्यज़े
वेदस ति रोज़ि खऺट्यज़िनॖ ज़ात
         ***************
माने:- हे इन्सानॖ, शरहुक सॊथ बरकरार थवनॖ बापथ यॊद सॖह ॴसिथ शालॖ सॖन्द्य पऻठ्य क़दम पॆयी त्रावुन तीय छुय बॆहतर। छ़ान्टि हॖन्दि हुनरि रॊस यॊद बठि तलय फटुन पॆयिय तॆलि ज़ऻन्यज़ि आसुन च्यॊन यियि नॖ ज़ांह मंदॖछावनॖ।
**************************
पंचान्ग:-  राथ ओस प्योमुत कसताम मऻल ग्वरॖदाल्यन। सॗती ओस यछ़ान ग्वरदऻल्य आंचार बनावुन। यि बूज़िथ आव म्यॆति ॴसस पोन्य तॖ प्योम पॊतकाल याद। ॳम्य यादाशतन वातनोवनस बॖ कऺशीरि हॖन्दिस कथ ताम म्यवॖ बाग़स मंज़ यॆति च़्ववापऻर्य ॴस म्यवॖ कुली यऻत्य तॖ ब्यॆयि नॖ कॆंह। च़ुन्ठ्य, च़ेरॖ, च़ॖनॖन्य, ॴर, गिलासॖ, डब्ल गिलासॖ, डब्ल-गिलासॖ, व्वज़ॖल्य गिलासॖ, क्रॖहॖन्य चेरी यानि गिलासॖ, ॴल्यचि, बम्च़ून्ठ्य, अम्बॖर्य-च़ून्ठ्य, टंग, बबॖगोश, माहरऻजी च़ून्ठ्य, च़ॊक्य च़ून्ठय,दछ, क्रॖहॖन्य दछ, ह्यन्दॖव्यन्दॖ, खरबूज़, तुल्य, शाह तुल्य, डून्य, नील्य डून्य, बादाम, सब्ज़ बादाम। यिम सऻरी म्यवॖ वुछिम अन्द्य पऺख्य, पनॖन्यन ख़यालन मंज़। यिमव खयालव करनोवहोस बॖ कऺशीरि हुन्द सऻर ब्यॆयन सब्ज़ी डूर्यॆन ताम। नज़रि गऺयम लऻर, बागॖ लऻर, अलॖ-पोश, कऻशर्य वांगन, फूलॖ वांगन, क्यनबऺब्य, पतॖ वुछिम पोशॖ डूर्य यिमन मंज़ ॴस्य ब्यॊन ब्यॊन रंगॖक्य पोश, ब्यॊन ब्यॊन नावॖक्य पोश, ब्यॊन ब्यॊन ज़ऻच़ हॖन्द्य पोश सॗती वुछिम पम्बछ, ख्यलवऺथ्थॖर, डलॖक नदॖर्य ब्यॆयि ति क्याहताम क्याहताम तॖ सऻर कॊरुम कॊंगॖ डूर्यॆन हुन्द यि दऺप्यज़ि ति मन ओस यछ़ान ज़ि ख़यालन मंज़ॖय यॊद यि ज़ुव यि नीरिथ ति, सुति छु ग़नीमथ। बस ॳक्य बर ठसन ओनॖनस कऺडिथ अमि खयालॖ न्यबर तॖ वुछुम पनुन पान ब्यॆयि तऺथ्य तनावस मंज़, तऺथ्य हलचलस मंज़ वलनॖ आमुत कोरोनावयरसचि महामऻरी मंज़ ब्यॆयि तऺथ्य बंद कमरस मंज़ प्रारान सरकऻर्य ह्वकॖमस यॆमि द्वह दपन बर मुच़रऻविव,न्यबर नीरिव आज़र-बाज़र गछ़िव, नऺच़िव तॖ फीरिव, ख्यॆयिव-च्यॆयिव बे-खोफ पऻठ्य, बॆफ्रूक पऻठ्य। प्रारान तथ दॊहस यॆलि नरि-ज़ंगॖ वाहरावव खुलॖ डुलॖ पऻठ्य। तॊत ताम रोज़न शर्ण शारिकायि माजि, शर्ण रोज़व महावीरस, शर्ण रोज़व महेश्वरस। राधा-कृष्णस प्यमव पर्ण तॖ मंगोस अथॖ दऻर्य दऻर्य, यॆति योर पर्दॖ।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

08.05.2020

08.05.2020 ज़्येठॖ (ज्येष्ठ) गटॖ पछॖ (कृष्ण पक्ष) ऒक्दॊ(देवादेव) (प्रथम) शॊकुरवार (शुक्रवार/ जुम्मा),श्री सप्तर्षि सम्वत 5096, राश वृश्चिक (चलान) ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
            देवी-सूक्तम्
या देवी सर्वॖभूतेषु वृत्ति रूपेण संस्थिता
नमस्तस्यै नमस्तस्यै नमस्तस्यै नमो नम:
**************************
         महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
          नुंदॖ ऱेशिन्य श्रुक्य
वॊद इबलीसन टॊख लॊगुम दोरस
स्यठा करेयमस इबादथ
कऺम्य पोव दूर्यॆर म्यॆ तॖ मंसूरस
तस तय म्यॆ ॴस कुनी कथ
तस च़ॊल नीरिथ अन मंसूरस
शाबाश करनस छय रऺहमत
म्यॆ छुम दयावान छ़्यॆपॖ ज़न च़ूरस
मरदूद म्यान्यो छय रहमत
बॖ ओसुस वऻकॖफ तिहन्दिस सीरस
म्यॆ ॴस मोलूम हक़ीक़थ
तऺम्य यॆलि लॊदनस बॖ क्थो लूरस
अथ मानि ज़ानन अहलिमऻरफत
           ***********
माने:- इबलीसन वॊद स्यठाह तॖ वॊनुन म्यानि इबादॖच़ रूप यॆनि लॊग टॊख तॖ गव यलॖ। म्यॆ तॖ मंसूरस ॴस कुनी कथ। मगर वाय यि कुस आव असि द्वन मंज़स, यॆम्य असि पानॖवॖन्य दूर्यॆर द्युत कऺरिथ। मंसूरन वॊन 'बॖय छुस मऻलिख'। तस कॊरुन शाबाश, बॖ आस च़ूरन मंज़ गंज़ॖरनॖ। म्यऻनिस दुशमनस कऺरॖन कृपा। बॖ ओसुस तसॖन्द्यन सारिनी सीरन वऻकॖफ। म्यॆ ओस पय हक़ीक़थ क्याह छॆ।ख्वदऻय यॆलि द्युतनस तॖ बॖ कथ ह्यकस नऺहनऻविथ। अमि राज़ुक माने ज़ानन तिमय ग्यानवान यिमव असलुक अमऱयथ आसि च्योमुत।
**************************
पंचान्ग:- हऻरान गऺछ़्यज़्यवॖनॖ पनॖन जंत्री मंज़ ज़्यॆठॖ गटॖ पछुख पंचान्ग वुछिथ। असि सारिनी छि पताह ज़ि कऻशिर्य बटन छि ज़ॖ ब्यॊन जंत्री। द्वनवय जंत्री छि विजयेश्वर पंचान्ग मगर द्वनवऺनी जंत्रीयन मंज़ छि फ़रॖख। कवरस प्यठ ॳकिस छु विष्णु सुन्द फोटु तॖ दॊयमिस छु कमलस प्यठ कृष्ण जीयुन फॊटू। अख छि ओंकार नाथ जियिन, तॖ दॊयिम छि पुनीत जीयिन। दॊनवॖनी हुन्द गणित छुनॖ मेलान अख ॳकिस सॗत्य। ओंकारनाथ जीयिन जंत्री मंज़ छि  यिन वाज्यन पऻन्च़म रावान तॖ सतम छि ज़ॖ गछ़ान। मगर पुनीत जियिनि जंत्री मंज़ छॆ नॖ पऻन्च़म रावान तॖ न छि सतम ज़ॖ गछ़ान। दॊयव मंज़ॖ कस सुन्द गणित छु सऺही दय ज़ानि। म्यानि ज़ऻन्यकऻरी हिसाबॖ छि ओंकार नाथुन गणित ग़लत मगर अथ कथि प्यठ आयि नॖ वुनि मोहर लगावनॖ। म्यॆ थॊव यि मसलॖ कॆंच़न व्यदवानन ब्रोंहकनि आशा छि ज़ि ॳकिस द्वन दोहन मंज़ ननि अस्लियथ। असि मंज़ छि कॆंह लूख ओंकार नाथॖन्य जंत्री हिसाबॖ पकान तॖ कॆंह छि पुनीत जियिनि जंत्री हिसाबॖ पकान। विडम्बना छि ज़ि द्वन छॆ नॖ कुन्य कथ। दु-च़्यॆतिस मंज़ गछ़ि बटॖ हॖटॖ मॖटस मंज़। कोरोनावयरस छु पनॖन्य रफ़तार बरकरार रटिथ तॖ यि महामऻरी छि वलनॖ आमॖच़ कॊहनॖ पऻठ्य। अल्बतॖ कुनि कुनि जायि छि कॆंह कॆंह वतॖ यलॖ त्रावनॖच कूशिश यिवान करनॖ। मगर तनाव छु बरक़रार। बंदिश छि जऻरी। गरि न्यबर नेरुन छु मन्नाह। च़ाटॖहाल छि बंद। लूख ह्यॆतिन गरि बिहिथ यिन्य तंग मगर लडुन छु मीलिथ असि यि महामऻरी हुन्द जंग तॖ ज़ेनुन छु कुनि ति सूरतस मंज़। मऻज्य दीवी छि असि सहायतस बस सबॖर छु करुन तॖ ताब छु थवुन ब्यॆयि कॆंह कालस ताबस छु लाब तॖ रुत फल मेलि सऻनिस यथ बद-हालस जलदॖय, आशा छि।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

07.05.2020

07.05.2020 वह्यक (वैशाख) ज़ूनॖ पछॖ (शुक्ल पक्ष) पुनिम (देवादेव) (पूर्णिमा) ब्रसवार (वीरवार/बृहस्पतिवार) श्री सप्तर्षि सम्वत 5096, राश वृश्चिक (रऻच़ हॖन्ज़ॖ 3.12 बजि प्यठॖ) ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
         देवी-सूक्तम्
या देवी सर्वॖभूतेषु तुष्टि रूपेण संस्थिता
नमस्तस्यै नमस्तस्यै नमस्तस्यै नमो नम:
**************************
      महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
       नुंदॖ ऱेशिन्य श्रुक्य
सुबहकि वख्तॖ फरशतॖ वसन
ग्रशन क्वस छवॖ आसन शय
ज़ल यिम च्यावन तॖ मल यिम कासन
तिमन यॆति ख्वतॖ तऺत्य आसन शय
         ************
माने:- प्रबातस न्यॆन्दरि वऺथित यॊद दय ध्यान करनॖ यियि, फिरशतॖ मेनन तिमन इन्सानन हुन्द बाव,ब्यॆयि वुछन यि ज़ीव कमि त्राय छु संसऻर्य पकान। त्रेश रूप अमृत दिथ करन सोन प्यपास दूर। सानि मनुक संशय दूर सपदिथ गछ़ि मन श्वद। यिथिस ज्ञानवानस छि यॆतिकि ख्वतॖ पतॖ तति थऺज़ जाय शीरिथ
**************************
पंचान्ग:- ज्ञानॖच कमी आसॖन्य छि वखतस खलान सख़, इन्सान छु दपान ज़चि च़टहऻ। त्रासदी छि यि ज़ि या छॆ नॖ असि फुर्सत ह्यॆछनॖ बापथ या छे नॖ फुर्सत ह्यॆछनावन वऻलिस। इन्सान छु म्यॆ बूज़मुत द्वन तॖ च़्वन गछ़ान, मगर राथ वुछ म्यॆ ज़ि कॆंह ॴस्य च़्वन तॖ च़्वदाहन किस फेरस मंज़ वलनॖ आमॖत्य। कॆंच़व ओस ल्यूखमुत गणेश चतुर्थी, कॆंच़व ओस ल्यूखमुत गणेश चतुर्दऺशी व्हाटसापस प्यठ। कॆंह ॴस्य प्रछ़ान ज़ि रातुख द्वह ओस क्याह। गणेश जियिन जयन्ती ॴसा किनॖ ब्यॆयि कॆंह। कॆंच़व ओस ल्यूखमुत ज़ि गणेश जयन्ती छि च़ोरम द्वह आसान। तॆलि च़्वदाह कयाज़ि छि मनावान। अगर च़ोरम द्वह छि गणेश जयन्ती, यि क्वस हिश च़ोरम। विनायक च़ोरम किनॖ संकट च़ोरम। युथुय अख सवालॖ प्रुछ़ ॳक्य बख्तन ज़ि भगवान शिव सुन्द ज़ा द्वह कर छि ॳस्य मनावान तॖ कर छु आसान। राथ दॊहस ओस व्हाटसापस प्यठ यिथी यिथी सवाल तॖ जवाबन हुन्द सिल्सिलॖ जऻरी। यॆमिस यि हटि खॊत तऺम्य द्युत सु जवाब तमि आयि मगर इन्सान बास्योम छु वुनि ति असलियतस निशि स्यठाह दूर। यि ब्रम कुस छु च़ऺलॖरावि। क्याह छि ह़क़ीक़त कुस वनि। असि शास्त्रुक ज़्यादॖ ज्ञान छु नॖ, मगर बऺखॖत्य छि जवाब छ़ान्डान। बख्त्यन हॖन्द्य शुर्य छि पज़र यछ़ान ज़ानुन। यॊदवय कऻन्सि पठित इन्सानस ताम यि म्यऻन कथ वाति, व्यनथ छुस बॖ तस करान ज़ि सु दीन यिमन द्वन च़्वन सवालन हुन्द जवाब ताकि च़्वन तॖ च़्वदाहन हुन्द ब्रम गछ़ि दूर। शंकर जियस कर छु आसान ज़ा द्वह यिति छु नऺनरावुन ज़रूर। कोरोनावयरस छु वुनि ज़िन्दय मगर हऻरऻनी छि गछ़ान यि वुछिथ ज़ि यि महामऻरी ज़न गऺयि तिमन बिल्कुल मऺशिथ यिम हथ कामि त्रऻविथ सुबहॖचि च़ोरि बजि प्यठय ॴस्य लऻनि मंज़ खड़ा प्रारान शराबॖ वानस कर यी मुच़ॖरावनॖ बर तॖ शराब बोतलि हुन्द कर करन दर्शुन। महामऻरी रूज़ ॳती, मारामऻरी गऺयि शुरु तॖ डंडा मऻरी ताम वऻच़ नोबत। यि छु च्यनॖवाल्यन शराबस सॗत्य माय तॖ महोब्बत। दय सुन्दिस ध्यानस मंज़ लीन गछ़न या नऺ गछ़न मगर शराबॖ च्यथ ज़लील गछ़न ज़रूर। अथ छि वनान दय सॖन्ज़ दयगथ। अगर असि जल्द यॆमि महामऻरी मंज़ॖ म्वकलनॖपाय छ़ान्डुन छु, तॆलि पज़ि असि पूरॖ पऻठ्य नियम तॖ संयम वरतावुन तॖ पनुन पान बचावुन तॖ ब्यॆयन हुन्द ज़ुव जान रऺछ़रावुन। भगवानस पनुन पान पुशॖरावुन।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

06.05.2020

06.05.2020 वह्यक (वैशाख) ज़ूनॖ पछॖ (शुक्ल पक्ष) च़्वदह (चतुर्दशी) ब्वदवार (बुधवार) श्री सप्तर्षि सम्वत 5096, राश तुला (चलान) ऋतु बसंत (चलान).... अज़ छि गणॖ च़्वदह (गणेश चॊतुर्दशी) ति ************************** नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव ************************** देवी-सूक्तम् या देवी सर्वॖभूतेषु दया रूपेण संस्थिता नमस्तस्यै नमस्तस्यै नमस्तस्यै नमो नम: ************************** महामारी नाश - मंत्र जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते ************************** नुंदॖ ऱेशिन्य श्रुक्य नर ब्यॊछुय नारान ब्यॊछुय इश्वर ब्यॊछुय ह्यथ कपाल डंडक वनुक राज़ॖ राम ब्यॊछुय ॳस्य ग़रीब तॖ ब्वछि क्या छय गाल *********** माने:- श्रीमद् भगवत गीतायि मंज़ त्रॆयिम अध्यायि हुन्द कऺहिम श्वलूक छु यिथॖ पऻठ्य वनान ज़ि बावॖ सान हवन कऺरिथ छि दीव ख्वश रोज़ान तिम तमि बदलॖ कि लूकन ख्वश करान। पानॖवॖन्य छि अख ॳकिस लोल बरान, तमि सॗत्य छु मनुश परम कल्याण प्रावान। अम्युक मतलब छु ज़ि मनुश छु दयस निश बॆछिथ यछ़ायि पूर्ती बापथ व्यनथ करान आसान तॖ ईश्वर ति छु अथस क्यथ आशायि रूप कमंडल ह्यथ मनुशस लोल तॖ बाव मंगान। यॆलि डंडक वनकिस राजॖ रामस ति छि लूकन निश आश तॆलि क्या छि असि आम ग़रीब लूकन गाल ब्यॆछनस तस कुनिस परमात्माहस निश ************************** पंचान्ग:- अज़ छि गणॖ च़्वदह। यॆलि यॆलि यि द्वह छु यिवान, म्योन सोरुय ध्यान छु गछ़ान कऺशीरि गणपथयार कुन यॆति सुबहस पांच़ि बजि प्यठय ओस मेल लगान। लऺड्य तॖ पूर्य ॴस्य मेलान ख्यनॖ बापथ, प्रसाद रूपस मंज़। गणपथयारस ओस अलगॖय अख मुकाम हऻसिल वखतॖ अकि कऺशीरि मंज़। सुबहॖच आरती "शुक्लाम्बरधरं विष्णुं शशिवर्णं चतुर्भुजम्, प्रसन्न वदनं ध्याये, सर्वविघ्नोप शान्तये" पतॖ "हेमज़ा सुतं भजे गणेशं ईश नन्दनम, एकदन्त वक्र तुण्ड नाग यज्ञ सूत्रकम, रक्त गात्र धूम्र नेत्र शुक्ल वस्त्र मण्डितम्, कल्पवृक्ष भक्त रक्ष नमोस्तुते गजाननम" परान परान ॴस्य वातान अन्तिम भजन "ओम् जय जगदीश हरे.." ताम तॖ बासान ओस ज़ि द्वह नेरि सफल। मन ओस ख्वश गछ़ान।अध्यात्म भाव ओस रगन रगन मंज़ छ़ालॖ मारान। बटॖकॊट यॆलि गणपथयारॖ मन्दरॖ न्यबर ट्यॊक कऺरिथ नेरान ओस, बासान ओस ज़ि कमि ताम आश्रमॖ मंज़ॖ छु आमुत फीरिथ। ल्वकॖट्य लऺडकॖ, कोरि, मर्द ज़नानॖ आसॖ दुह्यकिस दॊहस मशगूल रोज़ान नवीद बऻगरावनस मंज़, नवीदस प्रेप्युन हावनावनस मंज़, भजन किर्तन करनस मंज़। गणपथयार ओस स्यठाह मशहूर मन्दर श्रीनगर मंज़। म्यॆ छु बूज़मुत ज़ि युस पज़ि भख्ति-बावॖ सान गणपथयार च़दॖजिहन दॊहन नित्य गछ़िहे प्रभातन, तऺमिस ॴस मनोकामना स्यद गछ़ान। इम्तिहानॖ पतॖ रिज़ल्ट नेरनस ताम ॴस्य लडकॖ लड़की दॊहय गणपथयार गछ़ान सुबहन तॖ शामन तॖ मंगान महागणेशस स्यॆदी। मगर व्वंय वुछ म्यॆ गणपथयारुक हाल नमतॖ पतॖ, अमि मन्दरॖच शक्लॖय छि बदल्येमॖच़ तॖ स्व चहल पहल गऻबॖय गऻमॖच़। गणपथयार छु व्वंय बासान ज़न अख रोवमुत यार दपान वुनि कॆंह काल ब्यॆयि प्रार। आदि दीव कऺरिन असि सारिनी बजाह तॖ रूज़िन असि नखि तॖ डखि हर हमेशॖ। लूख छि बूगान सज़ा ख़बर काम्यॆन पापन हुन्द। माजि गछ़व शर्ण, माजि प्यमव परन तॖ मंगोस ॳस्य पनुन अथॖ रॊट। ************************** कऻशुर ह्यॆछव कऻशुर परव कऻशिर्य पऻठ्य पानॖवुन्य कथ बाथ करव ************************** नऺविव तॖ फॊलिव भूषण कौल "दीप" (बूज़िव ॳज़्युक सबक़ म्यानि ज़्यॆवि ति) (koshursabak.blogspot.com ति वुछिव)

05.05.2020

05.05.2020, वह्यक (वैशाख)ज़ूनॖ पछॖ (शुक्ल पक्ष)त्रुवाह(त्रॆयोदशी) बॊम्वार (मंगलवार) श्री सप्तर्षि सम्वत 5096, राश तुला (रऻच़ हॖन्ज़ॖ 3.14 बजि प्यठॖ), ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
         देवी-सूक्तम्
या देवी सर्वॖभूतेषु स्मृतिरूपेण संस्थिता
नमस्तस्यै नमस्तस्यै नमस्यतस्यै नमो नम:
**************************
        महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
        नुंदॖ ऱेशिन्य श्रुक्य
रॆश्य ॴस्य पऺतिम रॆशी
तिमन प्यठ जन्दॖ बंगि पन
मंगिथ खारहन वुशकय कॊशी
तप चरॖहन पथ वनन
ॳज़ॖक्य रॆशी केलक रॆशी
यिमन माज़ ख्यनस कम
खऻस्य ज़ॖ थवन निशम निशी
ॳकिस ग्वगल ब्यॆयिस करम
न ख्यथ यॆलि ख्वदाय मशी
रॆशी हय तोह्य तॖ च़ूर कम
         ***********
माने:- पॊत कालॖक्य रॆश्य ॴस पज़िकिन्य रॆश्य यिम पान ॴस्य जन्दॖ तॖ बंगि पनॖ सॗत्य वलान। ब्यॆख्या कऺरिथ ॴस्य वॖशकॖ कशि सॗत्य यड बऺरिथ पथ वनन मंज़ तप सादान। ॳज़िक्य रॆश्य छि कलाकार यिमन माज़ ख्यथ ति छु कम प्यवान। यिम छि पानस ब्रोंहकनि ज़ॖ खऻस्य थवान, ॳकिस मंज़ माज़ गॊगल ब्यॆयिस मंज़ कर्म सोंबॖरान। माज़ नॖ ख्यनॖ छि दपान दय छु मशान। यॆलि यिथ्य इन्सान मानॖहोख तॆलि कम मानॖहोख ॳस्य च़ूर।
**************************
पंचान्ग:- खऻली म्यादस मा सऻ छुय तेलान, मेलान क्याह छुय मॊय च्यनॖ सॗत्य। च्यथ क्याज़ि छिय नॖ होश डन्जि रोज़ान, बोज़ान क्याज़ि छुख नॖ बड्यनॖय हुन्द। हऻक्यमन क्याह  द्युत राथ अख इशारॖ ज़ि शराब वान ह्यकन खुलिथ कॆंच़न जायन, शराबुक नाव बूज़िथॖय दपान लूख गऺयि ख्वश तॖ ज़न ज़्यूनुख कांह ज़्युत, सऻरी द्वख मऺशरिथ वऻत्य तिम शराब वानन ताम पनॖन्य प्यपास च़ऺलरावनॖ बापथ। ख्यनस सोंब नॖ ख्यन कुनि, व्वथरनस सोंम्ब नॖ वुरुन कुनि, लऻनि गऺयि लऺगिथ शराब वानन ब्रोंह कनि। अख ॳकिस निश दूर्यर थवुन गोख मशिथ, महामऻरी मा अनि यिमन मत्यन पनॖनिस ज़दस मंज़ ब्यॆयि, यि ख़याल थॊवुख ताकस तॖ वऻत्य सुलिगरि शॊराबॖ वानन निश पनुन बडास कडनॖ बापथ यानि शराबॖच लत पूरॖ करनॖ बापथ। सरकारस ति ज़ानि दय क्याह आव ज़ॆहनस मंज़ ज़ि ग्वडॖ मुच़रावनऻव्य तिमव शराबॖ वानॖय राथ। दपान कॆंच़न शहरन मंज़ आयि पुलीस कर्मॖचार्य बुलावनॖ शराब्यन कऻबूहस मंज़ अनॖनॖ बापथ। लाठी चार्ज ति आव करनॖ कॆंच़न जायन। कॆंच़न जायन दपान शराबॖ च्यथ ह्यॆतिन च्यनॖवऻल्य नाल्यन मंज़ ति प्यॆन्य। दपान यिम हालाथ वुछिथ आयि शराब वान दुबारॖ बंद करनॖ तॖ लूख आयि सोज़नॖ पनॖन्यन पनॖन्यन जायन यॆति प्यठॖ तिम आमॖत्य ॴस्य। हिरासॖ छु वुनि करुन कॆंच़न चीज़न, यॊदवय पनुन ज़ुव टोठ छु तॖ कोरोनावयरस महामऻरी छु मुकाबलॖ करुन थॊद वऺथ्य वऺथ्य। पनुन नियम छु नॖ ॳसि फॖटॖरावुन बऺल्कि फुटॖरावुन छु कमर महामऻरी कोरोनावयरसस। महावीर हनुमान जी करि पनॖन्य यऻरी।  गछ़व तस महावीरस ॳस्य ति शरण तॖ प्यमोस परन।
**************************
कऻशुर ह्यॆछव कऻशुर परव
कऻशिर पऻठ्य पानवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़ि ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

04.05.2020

04.05.2020 वह्यक (वैशाख) ज़ूनॖ पछॖ (शुक्ल पक्ष) काह (देवादेव) (एकादशी) च़ऺन्दॖरवार (सोमवार) श्री सप्तर्षि सम्वत 5096, राश कन्या (चलान) ऋतु बसंत (चलान)..चूंकि पगाह छि बाह रावान, बऻश्य हुन्द वॊहरवोद यी ॳज़्य यानि कऻश्य द्वहॖय।
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
            देवी-सूक्तम्
या देवी सर्वॖभूतेषु लक्ष्मी रूपेण संस्थिता
नमस्तस्यै नमस्तस्यै नमस्तस्यै नमो नम:
**************************
          महामारी नाश - मंत्र
जयन्ती मन्गला काली भद्रकाली  कपालिनी दुर्गा क्षमा शिवा धात्री स्वहा स्वधा नमोस्तुते
**************************
         नुंदॖ ऱेशिन्य श्रुक्य
युस ओस म्यॆच़ि तल आव सो
स्वखॖ म्वखॖ ओस प्यठॖ बवॖसरॖ
यॆति बूज़्य बूज़्य आसि नवासो
यस नॖ आसि रोज़ान डर
दुनिया छु लज़ गेलुन तॖ हासो
ओसुख नॖ ओस सुल्तान सिकन्दर
            **********
माने:- यि दुनिया छु यिनॖ गछ़नुक च़ऺक्रॖ, यथ मंज़ ह्यनॖ यिथ छु इन्सान तोर गऺछ़िथ ब्यॆयि यिवान। यस म्यॆच़ि तल लूख सऻविथ गऺयि तऺमिय ह्यॊत स्वखॖ म्वखॖ यॆमि दुनिया ब्यॆयि ज़न्म बेखौफ पऻठ्य तॖ ह्यॊतुन यॆती ब्यॆयि रोज़ुन। दुनिया छु अख ॳकिस प्यठ ह्यडुन गेलुन तॖ असनुक ठिकानॖ।यॆलि च़ॖ ओसुख नॖ, त्यॆलि ओस सुल्तान सिकन्दर, युस यॆति राज कऺरिथ ब्यॆयि गव तूर्य।
**************************
पंचान्ग:- कोरोनावयरसॖ मूजूब बडॆयि जनता कऺरफ्युच मियाद ब्यॆयि ज़ॖ हफ्तॖ ॳज़्यकि प्यठॖ यानि सदऻह्यमिस मई-यस ताम। हालांकि कुनि कुनि अलाक़स मीज्य राहत कॆंच़न वानॖवाल्यन कॆंच़ॖ कालॖ बापथ। कुनि जायि दपान रेल ति यी चलावनॖ ताकि कॆंह फस्येमॖत्य कऻर्यगर यिन वातनावनॖ तिहॖन्द्यन पनॖन्यन पनॖन्यन गरन मगर शर्त थऺवॖहऻख ज़ि कि रेल यात्रायि हुन्द इजाज़त म्येल्यख तॆली यॆलि पनुन पान रजिस्टर करन। अवॖ म्वखॖ दपान ज़ि लूख गऺयि हजूमस मंज़ रजस्ट्री करनि तॖ हजूम दपान ओस युथ ज़ि बासान ओस ज़न क्वकर मुरिस आव बर मुच़रावनॖ या कटॖ ख्यॆलिस आव छग दिनॖ च़लनॖ बापथ। कॆंच़स कालस दपान व्यवस्था गऺयि अस्तॖ-व्यस्तॖ, बे-काबू तॖ तिमन ज़न आव गाश ॳछन तॖ मऺशिथ गोख कोरोनावयरस महामऻरी य्वस वुनि नच़ान छि नरि वाहरऻविथ। दपान पुलीसॖच मदॖदतॖ सॗत्य आयि यलॖ गऻमॖच़ बे-कऻबू बीरॖ ब्यॊयि कऻबू करनॖ। न छु मरनस थख तॖ न छि महामऻरी रोक वुनि पूरॖ पऻठ्य। मगर यि ति छि दपान अख हकीकथ ज़ि आसमान गव साफ़, पहाड़ छि यिवान नज़रि दूरि प्यठॖ, गंगायि हुन्द पोन्य छु गोमुत साफ़ सुथरॖ कुनि कुनि जायि, प्रदूशन गव दुर वारिहान जायन। तऻलीमी अदारॖ छि वुनि बंदॖय। आन लाईन पडऻय छि चलान, गरि प्यठय चलान छि कॆंच़न दफ्तरन हॖन्ज़ कऻम। हालातन छि बराबर साम यिवान ह्यनॖ तॖ मुनऻसिब क़दम ति छि यिवान तुलनॖ। रऻछ करनवोल छु अख भगवान। तऺमिस मनॖनावनॖच कऻम छि जऻरी। मंगान छि माजि दीवी हॖन्ज़ यऻरी। लगोस ॳस्य पऻर्य पऻरी आशा छि तॖ पूरॖ विश्वास छु ज़ि दूर गछ़ि यि महामऻरी सानि गरॖ बरॖ दूर, वतनॖ दूर,ज़गतस निशि दूर तॖ फऻलि स्वख सम्पति हुन्द नूर अज़ नय तॖ पगाह ज़रूर। प्रण करव ज़ि ॳस्य डलव नॖ पनॖन्यव नियमव निशॖ।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

03.05.2020

03.05.2020 वह्यक (वैशाख) ज़ूनॖ पछॖ (शुक्ल पक्ष) दऺहम (देवादेव) (दशमी) आथवार (रविवार/एतवार) श्री सप्तर्षि सम्वत 5096, राश कन्या (रऻच़ हॖन्ज़ॖ 3.8 बजि प्यठॖ), ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
          देवी-सूक्तम्
या देवी सर्वॖभूतेषु कान्ति रूपेण संस्थिता
नमस्तस्यै नमस्तस्यै नमस्तस्यै नमो नम:
**************************
          महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
         नुंदॖ ऱेशिन्य श्रुक्य
नफ़स द्युतुख ओरय मीनिथ
गछ़कय च़ीनिथ करख नॖ फॊत
दम द्यू हक़स लाल ज़न ज़ीनिथ
नतॖ छुय कल नफ़स ज़ायकतुलमोत
        ************
माने:- यस यूत रीज़ॖक यॆति छु सु छु तोरय मीनिथ आमुत, यॊद यिहऻय कथ हे इन्सानॖ, फिकिरी तरी च़ॖ मरख नॖ तॆलि, च़ॖ रोज़ख अमर। यॊद मन दमॖरऻविथ सु दय छ़ारुन हयिहान च़्यॆ ज़न ज़ीनिथ लाल तिक्याज़ि च़्यॆ आसी पतॖ नूर पशपान। दय सुमरनि बदलॖ गनिय नतॖ नफसॖच कल यॊस मोतस बराबर छय
**************************
पंचान्ग:- प्यॆठ्य प्यॆठ्य आयि ख़बर ज़ि जनता कऺरफ्यु मियाद बडोवख ब्यॆयि ज़ॖ हफ्तॖ यानि सदहऻयमिस मई-यस ताम। खबरिहुन्द पुष्टिकरन करुन छु वुनि बाक़ी हऻकिमि सॖन्दि तरफॖ।वुछान छि ॳस्य ति कपऻर्य व्वथि तॖ कपऻर्य ब्यॆहि। हालाथ छि द्वह पतॖ द्वह संजीद गछ़ान रंगॖ रंगॖ। अर्थॖ व्यवस्था ह्यॆच़ॖन्य ख़राब गछ़ॖन्य। परवुन्य शूर्यन हॖन्ज़ि तऻलीमि प्यठ ह्यॊतुन बुरॖ प्रभाव प्यॊन। गरन मंज़ॖय बिहिथ ॳर्य-दऺर्य लूख ति ह्यॆतिन नाहकच्यन ब्यमार्यन वलनॖ यिन्य। ब्यॊन ब्यॊन गरन मंज़ ह्यॊतुन बऻच़न पानॖवुन्य गरेलु तनाव व्वपदॖन्य। यिमन लऺडकन, लऺडकियन यथ कोरोनावयरिसकिस कालस मंज़ पानॖवुन्य खान्दॖरॖक्य सम्बंध जोडनुक व्यच़ार ओस, सु व्यच़ार प्यव रद्द करुन द्वनवऺन्य दर्यन तॖ तथ सम्बंधकिस सिल्सिलस मंज़ यॆम्य दऺर्य यि कॆंछ़ा व्यवस्था करनॖ म्वखॖ पऻन्सॖ-टूंक ग्वडय जमा ओस कॊरमुत, दपान सु रक़म गव पऻनिस सॗत्य महामऻरी हॗन्द्य बुज़्य। सूंचिथ छु नॖ ह्यकान इन्सान ज़ि किथॖपऻठ्य नेरि सु अमि कऺन्ड्यज़ालॖ मंज़ॖ, अमि दलदलॖ मंज़ॖ। दयस इबादत करॖन्य ति ज़न ह्यॆच़ॖन्य बे-नतीजि बनॖन्य। बासान ज़न छु भगवान ति असि रूशिथ बिहिथ। करव हय तॖ करव क्याह। खऻर, व्वमेद छि थवॖन्य, यछ़ तॖ पछ़ छि थवॖन्य भगवानस प्यठॖय। अमि तारॖ तारनवोल छु सुय। ख्वश तॖ ख्वशहाल बनावनवोल छु सुय। ॳस्य करव पनॖनिस ज़ुवस रऻछ ब्यॆयि तिथय पऻठ्य यिथपऻठ्य करान आयि वुन्युखताम।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.ति वुछिव)

02.05.2020

02.05.2020 वह्यक (वैशाख) ज़ूनॖ पछॖ (शुक्ल पक्ष) नवम (देवादेव) (नवमी) बटॖवार (शनिवार/शनिश्चरवार) श्री सप्तर्षि सम्वत 5096, राश सिंह (चलान) ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
            देवी-सुक्तम्
या देवी सर्वॖभूतेषु श्रद्धा रूपेण संस्थिता
नमस्तस्यै नमस्तस्यै नमस्यतस्यै नमो नम:
**************************
       महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
           नुंदॖ ऱेशिन्य श्रुक्य
व्वपल हाकस तर गोम दऺज़िथ
सिवलि कनि ति खॆयाव बुज़िथ कथ
जन्गॖल्य सॖह्य ज़न वॊनॖनम ग्रऺज़िथ
फीरिथ ति ह्यॊकमस नॖ ॳच़िथ कथ
ऒडुय हर्फा गछ़िह्यॆम सऺज़िथ
दऺज़्य दऺज़्य द्रमुन ज़न कछ दऺज़िथ कथ
          **************
माने:- व्वपल हाकस यॆलि तर नीरिथ ति दऺज़िथ गव, बगारॖ रॊस ख्ययाम सिविथॖय। जंगली सॖह सॖन्ज़ हिश दहाड मऻरिथ गोम ज़मीर पनुन क्याहतान्य बऺनिथ मगर म्यॆ ह्यॊतमस नॖ वापस किंहीं ति वऺनिथ। अगर ऒडुय हर्फ तमि मंज़ॖ लारिह्यम, बॖ कथ दज़हऻ कछॖक्य पऻठ्य यॆलि बॖ द्रमनॖक्य पऻठ्य दज़ुन गॊछ़ुस। यानि म्यॆ मंज़ आसिहे बागिबऺरच़र आमुत
**************************
पंचान्ग:- लबि ताकस रूद सोन संंस्कार, रीथ तॖ रिवाज। सोन धर्म कर्म। सोन व्वपकार। बस अगर वुछान छि कॆंह अज़कल, सु गऺयि लाचऻरी, मजबूरी, बेबऺसी तॖ बॆतसलऻयी। यथ महामऻरी मंज़ आव यी असि ब्रूंठ्य। ऊतरॖ शामन यस कऻशिर्य बरादरस देहान्त सपुद क्रोसिंग रिपब्लक्किस ॳकिस सोसाइटी मंज़ तस आव राथ दाह संस्कार करनॖ अंतिम निवासॖ, स्यक्टर 94, नोईडा शुमशानघाठॖ। मर्ग़टस प्यठ बिहिथ व्यवस्था करनवाल्यन सॗत्य गव ग्वडॖ फोनस प्यठ कथ करान करान बहस मुबहस तॖ हऻव तिमव ति तेवर।  ॴखरस मोनुख  कॆंच़न शर्तन प्यठ गऻड्य सोज़ॖन्य राथ मर्ग़टस ताम शव वातनावनॖ बापथ। पनॖनि ज़ऻच़ हुन्द ब्रह्मा जी हनुद नॖ मुम्किन अंतिम संसकार पूज़ा करनॖ बापथ। व्यवस्था आयि कऺरनॖ ब्यॆयिस ज़ऻच़ हुन्द ब्रह्मा जी अनॖनॖ बापथ। अन्तिम संस्कार पूज़ा कऻशिर्य आयि तस तगान ॴसा किनॖ न, तम्युक ध्यान थवनॖ रॊसतुय आव सु बुलावनॖ। शव सुन्द वस्त्र यानि कफन वगैरा ति ओस ॳमी ब्रह्मनन पानस सॗती ऒनॖमुत। अंग ॴश्यनाव ह्यॆक नॖ वऻतिथ, नख दिनॖ बापथ दपान प्यव सोसाइटी मंज़ॖय कार्यरत कॆंच़न स्युक्यर्टी गार्ड वाल्यन हुन्द मदद मंगुन, अंतिम संस्कारॖच पूज़ा दपान कऺरॖख यिथॖ तिथॖ तॖ दाह संस्कार ति आव करनॖ ॳथ्य व्वसि द्रॊसि मंज़। लॊतिस गॊबिस करि महाकाल पानय क्षमा। ऊतरॖ शामॖ प्यठॖ ॴस्य ट्यॆंड्यन प्यठॖ तॖ फोनन प्यठॖय यॊत ताम यि रातुक कार्यक्रम ॳंद वोत। हालात मध्यनज़र थऻविथ दपान आव यि  फऻसलॖ करनॖ ज़ि दऺहव दॊहव बजायि करन सिरिफ च़ोर द्वह तॖ   पतॖ वुछन दऺहिम कऻहिम तॖ बऻहिम द्वह कति करन।  वुन्यक्यनस  दपान द्वह गछ़न नेरॖन्य कुनि ति तरीकॖ। नज़र बंद छि सऻरी। ख़बर पगाह यानि त्र्यॆमि मई पतॖ क्याह ह्वकुम आसि हऻकिमॖ सुन्द। दय ज़ानि। पनॖनि ज़ुवॖक छु ख़याल थवुन। पनॖनिस आस-पडोस सुन्द ख़याल छु थवुन यूत पिलि ज़ि त्यूत। महामऻरी छि अकि जायि च़लान तॖ ब्यॆयिस जायि वलनॖ यिवान। मरन वाल्यन हॖन्ज़ि ग्रन्द ति छि बडान थकॖ रॊस। पुशरावुन छु पान माजि दीवी। सॊय करि रूगन तॖ शूगन शफा तॖ महामऻरी दफा सानि गरॖ-बरॖ दूर।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)