01.06.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

01.06.2022 ज़्येठ (ज्येष्ठ) ज़ूनॖ पछॖ (शुक्ल पक्ष) द्वय (द्वितिय) ब्वदवार (बुधवार), श्री सप्तर्षि सम्वत 5098, नक्षत्र मृग, राश मिथुन (चलान), ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

रऻज्ञन्या दी ॴज्ञन्या वातय बॖ तुलमुल, व्यनॖ पोश छावय बावय द्वदॖ डुल। तीज़मालि ह्यॆच़ेयो माजि रऻज्ञन्यायि हुन्द बजन ग्यवुन ज़ि बरादरन वॊननस मऻजी यॆमि लटि दपान कऻशिर्य बटव छु ज़्येठॖ ॴठम दॊह तुलमुल गछ़नस ठाख कॊरमुत। हय आहनबा ती ॴसॖस बॖति बोज़ान। तीज़मालि द्युतनस जवाब। राथ मऻरॖख बिचऻर ह्यॆन्द्य मास्टरबाय कऺशीरि क्वलॖगाम अलाकस मंज़ आतंकवाद्यव। यिम हय ज़न आयि वु़ठनॗ। बरादरन वॊन तीज़मालि। म्यॆ छु बासान ज़ि सरकारस पज़ि कऺशीर व्वंय फोजस हवालॖ करॖन्य। अदॖ यिन यिम दहशथगर्द होशॖ। मगर सरकार करि नॖ ति, ति क्याज़ि सरकार छु शायद यछ़ान ज़ि कऺशीरि मंज़ गछ़ि तनाव बरक़रार रोज़ुन। चुनाव ति छु यिनॖवोल, कुर्सी ति छख बचावॖन्य। द्वखॖ ज़द छि विलाप करान, अख अख छु मरान मगर कारखानॖ छु चलान तॖ सरकार छु पनॖन्य कऻम मोन दऻरिथ करान रोज़ान। सऻन्य नामनिहाद लीडर ति हारेयि। चन्नलन प्यठ बारव दी दी तॖ बयानबऻज़ी कऺर्य कऺर्य थऺक्य, इन्साफ मंगन वऻल्य मुलऻज़िम ति थऺक्य पनॖन्य दऻद्य बावान बावान रिपोर्टरन। व्वंय छि तिम ति दपान ज़ि हद छु सऻर्यसॖय। असि त्रऻव्यतव ज़ंंगि तऺल्य। ॳस्य ह्यॆतिन गछ़ॖन्य कऺल्य। सऻन्य च़ुक्यदार ति द्रायि बऺल्य, यिमन प्यठ विश्वास कऺर्य कऺर्य बासान ॳस्य पननिहेनॖ निशि ति डऺल्य। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

31.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

---------------------------------

🙏🙏 नमस्कार माहरा

31.05.2022 ज़्येठ (ज्येष्ठ) ज़ूनॖ पछॖ (शुक्लॖ पक्ष) ऒक्दॊह (प्रथमा/प्रतिपदा), देवादेव, बॊम्वार (मंगलवार), श्री सप्तर्षि सम्वत 5098, नक्षत्र रोहिनी, राश मिथुन (रऻच़ हॖन्ज़ि 11.30 बजि प्यठॖ), ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

********************** 

बरादरन वॊन तीज़मालि ज़ि मऻजी बॖ छुस सोंचान ज़ि ॴखॖर सऻनिस कऻशिर्य बटॖ समाजस बनि क्याह ब्रोंहकुन। यि वुन्युखताम आव बनान यिमन च़दजिह्यन वऺर्यन तऺथ्य गछ़ि रछ़ रछ़ हुर्यर सपदान ब्रोंहकुन कम गछ़नॖच आश रूज़ नॖ कॆंह। तीज़मालि वॊन बरादरस। आहनी मऻजी म्यॆति छु ती ह्यु बासान ज़ि पॊत फेरुन सोन छु व्वंय मुश्किल। बरादरन कऺर पनॖनि मनॖच कथ। नबा तॖ पॊत फेरनस कति रूद असि वार। फेरव ते तॖ कॊत कुन तॖ क्याह ह्यथ। तीज़मालि बऺडरऻव कथ ब्रोंहकुन। हतबा कऺशीर त्रऻव, माजि ज़्यव वनॖन्य त्रऻव, शुर्य ज़्यॆवरावॖन्य याने वंश बऺडरावुन त्रऻव्य, नवि पुयि मंज़ छ्यनॖ मास  प्वफ या मामन्य नज़र यिवान, पर-ज़ऻच़ सॗत्य सम्बन्द बनावुन छि फखॖर ज़ानान। नॊव शुर छु पनॖन्य माजि ज़्यव छ़ान्डान छ़ान्डान पानॖ द्वन तॖ च़्वन मंज़ यीरान, देवनागरी (कऻशुर) ज़बऻन्य मंज़ नॖ कांह अदबॖच कथ करान, सोन अदब छुनॖ व्वतलान, ॳस्य ह्यॆतिन पनॖनि संस्कृति तॖ संस्कारव निशि दूर गछ़ान, सान्यन शुर्यन छि व्यलायतस कुन क़दम। व्वंय हय पॊत फेरन तॖ फेरन कमि बापथ। अथ हाबा छि वनान ज़ि हून्य ख्येमॖच़ बस्तॖ खलर। न छु सऻनिस नसीबस व्वन्य कऺशीरि हुन्द डल तॖ न वॊल्लर। तीज़मालि वॊन बरादरस। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

नऺविव तॖ फॊलिव

भूषण कौल"दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

30.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

30.05.2022, ज़्येठ (ज्येष्ठ) गटॖ पछॖ (कृष्ण पक्ष) मावस (अमावस्या) देवादेव, च़ऺन्दॖरवार सोमवार श्री सप्तर्षि सम्वत 5098, नक्षत्र कृति (चलान), राश वृष (चलान), ऋतु ग्रीष्म (चलान)...अज़ छि सुमरी मावस (सोम अमावस्या)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

सुमावती हॖन्द्य पान्छ़ शुर्य बडेयि तॖ अख बन्यऻव डाकटर, दॊयिम इन्जीनियर, त्रॊयिम मेडिकॖल रिप्रज़न्टेट्यु, च़ूरिम फोजस मंज़ करनऻल तॖ सुमावती हॖन्ज़ कूर आयि भागॖन्य ॳकिस प्रोफेसरस। शुर्यन हुन्द मोल ओस तमि वख्तुक ओवरसेर। दय सॖन्दि धर्मॖ ॴस नॖ अथ गरस कुनिच कमी मगर कमी हुन्द एहसास ह्यॊतुन तमि विज़ि सपदुन यॆलि अख अख शुर गव गरि न्यबर नेरान तॖ वापस गरॖ कुन नॖ फेरान। मोल मऺज्य ह्यॆतिन बूडॖन्य मगर व्यछ़य रूज़ॖख शुर्यन हॖन्ज़। सुमावती ॴस सुबहऻय वॊथित मन्दरस मंज़ गऺछ़िथ शूर्यन बापथ त्युहुन्द बजर कान्छान। बजाह गऺयि सऻरीय शुर्य मगर बॊरुत गरॖ गव छ़ॊर गछ़ान तॖ सुमावती आसॖ गरचि लबॖ ख्यॆनि ज़न यिवान। बॊड च़ुपूर मकान ओस अज़ हेरि प्यठॖ ब्वन ताम खऻली बस अकि कुठ्युक अख कून ओस रॊटमुत सुमावती तॖ अमि कुठ्यचि दारि प्यठ बिहिथ ओस शुर्यन हुन्द मोल शायद शुर्यन हॖन्दिस गरॖ यिनॖच आश थऻविथ य्वस नॖ तऺमिस पूरॖ गऺयि तऺम्यसॖन्दिस ॳछ वटनस ताम। बरादरन प्रुछ़ तीज़मालि ज़ि मऻजी सुमावती कति छि अज़कल छा ति किनॖ न। बोज़ान हाबा ॴसॖस स्व ॴस कोरि निश बिहिथ केंच़स कालस तॖ तमि दपान त्रऻव्य प्राण कोरि निशी। शुर्य अख लार तॖ अख दार। बिहिथ पानस पानस। तीज़मालि वॊन बरादरस। कांह नाबा छुय कऻन्सि हुन्द व्वंय। सऻरी छि माय महोब्बतॖ निशि छऺलिथ तॖ छॊकिथ। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

29.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

29.05.2022, ज़्येठ (ज्येष्ठ) गटॖ पछॖ (कृष्ण पक्ष) च़्वदह (चतुर्दशी), देवादेव, आथवार (रविवार/ऐतवार), श्री सप्तर्षि सम्वत 5098, नक्षत्र कृति, राश वृष (दुहचि 11.15 बजि प्यठॖ), ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

बरादरन वॊन तीज़मालि ज़ि तलय बोज़नाव रातॖच कथ। कथ क्याह वनय दफ अफ़सानॖ छु यि। तीज़मालि द्युतनस जवाब। यिमन पान्च़न शुर्यन हन्द्यन माजि हाबा ओस नाव सुमावती। भगवान बऺखॖत्य। ब्रह्म मुहूर्तस मंज़ ॴस व्वथान, ब्रान्दॖ फश दिवान तॖ रोज़ान ॴस दय नाव स्वरान। बरादरन वॊन तीज़मालि ज़ि मऻजी अगर बॖ सऺही छुस कऺशीरि मंज़ आसॖ सानि ज़नानॖ मऻज्य, नान्य, बऺयकाक्यन प्रबातन वऺथित ग्वडॖ ब्रांदॖ फश दिवान रोज़ान तॖ अदॖ ॴस्य बकाया काम्यन कुन लगान। श्रान करहऻन या न करहऻन, अथॖ बुथ छऺलिथ ॴस्य चोकस मंज़ क़दम थवान। यिमन ज़नानन चोकॖच त्रफॖ त्रफॖ ॴस नॖ आसान तिम ज़नानॖ आसॖ मन्दर गछ़ान रोज़ान तॖ पूजा पाठ कऺरिथ गरॖ यिथ चोकॖच कऻम सम्बालान। कऺशीरि मंज़ हाबा ओस अख अलगॖय माहोल, वातावरन, अख अलगॖय मनॖच शऻन्ती, दय-नाव ज़्यॆवि प्यठ, माय महोब्बत दिलन मंज़, स्कून दिलुक। दपान ॴस्य कम गछ़ि ख्यॊन ग़म गछ़ि नॖ ह्यॊन। बरादरन वॊन तीज़मालि ज़ि मऻजी च्यानि सारेय कथॖ छि फिरिथ पकान अज़कल। तीज़मालि वॊन बरादरस ज़ि आहनबा वुछान छस। सऻर्यसॖय छु लॊगमुत फ्युर तवम छु आमुत असि गुर। सुमावती हाबा ॴस दय नाव स्वरान रोज़ान सुब प्यठॖ शाम ताम। वलॖ ग्वडॖ च्यमव चाय पतॖ बोजबनावथ सुमावऺती हॖन्ज़ दास्तान। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

28.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

28.05.2022,  ज़्येठ (ज्येष्ठ) गटॖ पछॖ (कृष्ण पक्ष) त्रुवाह (त्रयोदशी), देवादेव, बटॖवार (शनिवार/शनिश्चरवार), श्री सप्तर्षि सम्वत 5098, नक्षत्र भरण, राश मेष (चलान) ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

रातॖक्य एल्बमन कऺर्य वारियाह सवालॖ खड़ा तीज़मालि हॖन्दिस ज़ॆहनस मंज़ तॖ प्योस दीप जियुन अख शार याद। शार छु "कति तिम पान्छ़ शॆ ॴठ नव शुर्य, अज़ यिमन अख ज़ॖय तिमन ति खुर्य, फ़ीस वीस बऺर्य बऺर्य पेरैन्ट बरहम, दम करुं दम,,दमॖ काका दम, टैं टैं छुख करान रोज़ान हरदम"। यि शार बूज़िथ प्रुछ़ बरादरन तीज़मालि ज़ि मऻजी च़्यॆ क्याज़ि प्यॊय यि क़लामॖ वनुन। तीज़मालि वॊन बरादरस ज़ि बॖ हाबा ॴसॖस ॳकिस फोटुवस मंज़ वुछान म्यानि ॳकिस ॴश्यनावबायि ॴस्य पान्छ़ शुर्य पानस सॖत्य। अख खॊनि मंज़, ज़ॖ पानस दऺछिन्य तॖ खोवॖर्य तॖ ज़ॖ पानस ब्रोंहकनि पथर बिहिथ तॖ ॳम्यसुन्द खान्दार पतॖकनि खडा असवुनि मुद्रायि मंज़। त्युहुन्द अता पताह छुयॆ याद कॆंह मऻजी। बरादरन  कॊर सवालॖ तीज़मालि। हय आहनबा। म्यानि मालिनि तरफॖक्य नऺज़दीकी रिश्तॖदार हाबा छिम। व्वंय आसन तिम बडेमॖत्य तॖ आसन छऺकरिथ ओरॖ योर। बरादरन थऻव कथ जऻरी। आहनबा सु मोल मऻज्य गछ़ि ज़ानुन पानस ख्वश नऺसीब यॆमिस शुर्य कऺट्य रोज़न पानस सॗत्य तॖ पलज़न अख ॳकिस द्वखस स्वखस मंज़। मगर युथ ह्ययु कऺस्मत छु कमॖय पाहन रूदमुत असि कऻश्र्यन। बरादरन वॊन तीज़मालि। ति हाबा छुय पॊज़। असि रूद्य नॖ पनॖन्य शुर्य पानस सॖत्य। आहनी मऻजी सान्यन शुर्यन मा आसॖ सारेय सहूलियतॖ दस्तियाब कऺशीरि मंज़। तवॖ म्वखॖ प्यॆयि तिमन कऺशीर त्रावॖन्य तॖ पनुन भविष्य बनावुन ब्यॊन ब्यॊन शहरन गऺछ़िथ। गऺन्ज़रावनॖ बापथ ॴस्य पान्छ़ पान्छ़ शुर्य आसान मगर गरिक्य न्याय ॳन्ज़रावनॖ बापथ ओस नॖ अख ति नॊन आसान वख्तॖ विज़ि। अथ वनान तालवस लोरि काह जंगॖ विज़ि नॖ अख ति। तलय तिहॖन्ज़ कथ बोज़नाव मऻजी अगर च़्यॆ ज़्वन छुय। बरादरन वॊन तीज़मालि। हतबा सोरुय छुम याद तॖ वुछान छस सासॖ बऺद्य तिथ्य गरॖ पनॖनिस समुदायस मंज़ अज़कल तॖ तिहिन्ज़ हालथ वुछिथ छि तॗर फटान।कथ छि जऻरी।

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

27.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

27.05.2022 ज़्येठ (ज्येष्ठ) गटॖ पछॖ (कृष्ण पक्ष) बाह (द्वादशी) देवादेव, शॊकुरवार (शुक्रवार/जुम्मा/भार्गववार), श्री सप्तर्षि सम्वत 5098, नक्षत्र आश्विन, राश मेष (चलान), ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि ओस अख एल्बम म्यूलमुत अकि अलमारि मंज़ॖ तॖ ॴस अथ एल्बमस मंज़ प्रान्यन प्रान्यन फोटुवन मंज़ पनॖन्यन ॴश्यनावन परज़ॖनावनॖच कूशिश करान ज़ि बरादरन प्रुछ़नस ज़ि मऻजी यि एल्बम कोताह प्रोन छु। तीज़मालि तुज नज़र थॊद तॖ वॊनुन बरादरस ज़ि यिहाबा छु पन्च़ाह पान्च़वनज़ाह वऺरी प्रोन एल्बम। परज़ॖनऻव्यथकॖ कॆंह कॆंह। हय आहनबा दफ अमापॊज़ वुछान छस ज़ि यिमव मंज़ॖ छि कॆंह विष्णुबवनस वऻत्यमॖत्य तॖ कॆंह छि व्यलायतस मंज़ बिहिथ। बरादरन प्रुछ़नस ज़ि मऻजी यिमव मंज़ॖ गॊय ना त्युथ कांह नज़रि युस  हालय हयात छु पनॖनिसॖय वतन मंज़। आहनबा लऺसॖन्य कॆंह छि दफ तिमन सॗत्य छु मेलुन कमॖय पाहन रूदमुत। ख़बर क्याज़ि। सवाल कॊर बरादरन। कऺशीरि मंज़ हाबा ॴस्य ॳन्द्य पऺख्य सऻरी। अख वॊठ ॴस्य त्रावान तॖ मातामाल ॴस्य वातनावं, अख वॊठ ॴस्य त्रावान तॖ मासिहुन्द ॴस्य वातान। द्वन क़दमन प्यठॖ ॴस्य म्यॆ पॊफिहिन्द्य। मगर टनलि योर लऺगिथ छि सऻरीय तिम नऺज़्यदीख अंग ॳश्यनाव दूरेमॖत्य। अख ॳकिस निश वातुन ति गव मुहाल। प्यठॖ यनॖ यि मोबाइल लॊग अथस मंज़ व्वंय छि फोनस प्यठॖय ख़बर अतर प्रॖछ़ान रोज़ान तॖ युन गछ़ून गव स्यठाह कम। बरादरन वॊन तीज़मालि ज़ि मऻजी म्यॆ छु बासान ज़ि सान्यन शुर्यन तगन नॖ पनॖन्यन ॴश्यनावन हॖन्द्य शूर्य परज़ॖनावॖन्य ति। अल्बतॖ फेसबुकस प्यठ हय वुछन तॖ परज़ॖनावन सुति अख ॳकिस प्रॖछ़िथ नतॖ नॖ कॆंह। सोंचान छस ज़ि कोताह बदलाव आव असि यिमन चतजिह्यन वऺर्यन मंज़। व्वंय छि यिम ॴश्यनाव रॖशनाव बस कनन मंज़ दिलस मंज़ नॖ कांह। एल्बम ति कति रूद्य व्वंय। फोटॖ तुलान तॖ थवान मोबाइलस मंज़ पतॖ तारान  लैपटॏपस मंज़। ॳड्य वातान फेसबुकस प्यठ, अड्यन वीडियो बनान, ॳड्य छि व्हाटसऻपस प्यठ। व्वंय छु युथुय दौर यथ मंज़ ॳस्य ति करान छि दौरॖ दौर। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.bligspot.com प्यठॖ ति)

26.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

26.05.2022 ज़्येठ (ज्येष्ठ) गटॖ पछॖ (कृष्ण पक्ष) काह (एकादशी), देवादेव, ब्रसवार (गरूवार/वीरवार/ब्रहस्पतवार), श्री सप्तर्षि सम्वत 5098, नक्षत्र रेव, राश मेष (रऻच़ हॖन्ज़ि 12.38 बजि प्यठॖ), द्रठॖपऻन्च़ुक (पंचक) (समाप्त), ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ।  वुद्यूग  करव मुकाम प्रावव

**********************

  महामऻरी नाश - मंंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि वॊन बरादरस ज़ि राथ हाबा दपान कऺशीरि मंज़ छु कऺमिस ताम ग्वनाहगारस सरकारन सज़्ज़ा दिनुक ॴलान कॊरमुत। हालव छि गलान मगर दान्यस दाह कऺरिथ। जवाब द्युत बरादरन तीज़मालि। आहनबा इन्सान युथ ववान छु त्युथ छु लोनान ति। तीज़मालि वॊन बरादरस। तऻजिब छु मऻजी ज़ि सज़्ज़ा बोज़नावनस लॊग सरकारस द्वयत्रॖह वऺरी प्यॆठ्य सुति ॳकिस मुजरिमस वुनि छि तऺम्यसॖन्द्य ब्यॆयि ख़बर कऻत्याह सऻथी तॖ सलाहकार यलय आज़ाद नच़ान। ज़ानि दय तिमन कर मी वऻर्य  तॖ कोताह काल छु ब्यॆयि प्रारून पनॖन्यन करतूतन हुन्द अन्जाम वुछनॖ बापथ। बरादरन वॊन तीज़मालि। यॆमि हिसाबॖ  यिमव मारॖवातलव निर्मम हत्यायि छि करिमच़ॖ कऺशीरि मंज़ तमि हिसाबॖ गऺछ़ यिमन कऻतिलन करताम फऻन्स्य आमॖच़ दिनॖ मगर ति ह्योक नॖ सपदिथ। व्वमेद छि ज़ि यॆमि योर तुलि सरकार तेज़ तॖ सऺही क़दम कऺशीरी मंज़ आतंकवाद, दहशतगर्दी नेस्तनाबूद करन बापथ ताकि दऺद्यमॖत्यन दिलन प्यॆयि शॆहजार तॖ असि ति यी वार कऺशीरि वापस तरनस तॖ बहार छावनस। तीज़मालि वॊन बरादरस। तथास्तु। जवाब द्युत बरादरन।कथ छि जऻरी।

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

25.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

25.05.2022 ज़्येठ (ज्येष्ठ) गटॖ पछॖ (कृष्ण पक्ष) दऺहम (दशमी) देवादेव, ब्वदवार (बुधवार), श्री सप्तर्षि सम्वत 5098, नक्षत्र उ.भा, राश मीन (चलान) ऋतु ग्रीष्म (चलान) द्रठपऻन्च़ुक (पंचक) (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऺरी मंज़ - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि छीड कथ ब्रोंहकुन यि वऺनिथ ज़ि यि दॊह, वार, साथ वगैरा हाबा छु सऻनिस समुदायस मंज़ सासॖ बद्यव वऺर्यव प्यठॖ आमुत ज़ानॖनॖ तॖ मानॖनॖ। बरादरन वॊन वापस तीज़मालि ज़ि आहनी मऻजी अथ मंज़ क्याह शक़ छु अल्बतॖ म्यॆ छु बासान ज़ि ॳस्य कऻशिर्य बटॖ छि आमॖत्य यिमन कथन प्यठॖ वुन्युखताम अमल करान तॖ ब्रोंहकुन ति रोज़व करान। ऋश्यव मुनियव साधु संतव ज्योतिष्यव ज्ञऻनियव व्यदवानव विज्ञाम ज़ानन वऻल्य छि यिमन नक्षत्रन राश्यन प्यठ वारियाह छानबीन कऺरमॖच़ तॖ वुनि ति छि करान रोज़ान तॖ मोनमुत छुख ज़ि यिमन चीज़न हुन्द असर छु इन्सानस प्यठ प्यवान रोज़ान। म्यॆ छु बासान यि छु सुय वजह ज़ि ॳस्य छि ज़्यनॖ प्यठॖ मरनस ताम यिमनॖय नक्षत्रन, राश्यन, ग्रहन, मुहूर्तस दॊसन तॖ वारन मंज़ तब्दील कऺरिथ पनॖन्य दैनिक कार्य करान रोज़ान। सान्यव ज़िठ्यव छु वख्तॖ वख्तॖ मुहूर्तुक असर च़्यूनमुत तॖ तमी हिसाबॖ रूद्यमॖत्य सऻन्य वतॖहावक बऺनिथ। नवि पुयि आसि नॖ यिमन रहस्यन हॖन्ज़ वऻकफियत ति क्याज़ि सऺही ह्यॆछनावन वऻल्य छिनॖ नऺन्य अज़कल। तवय छि नऺव पुय डांवाडोल। ॳस्य ह्यॆतिन पनॖनि संस्कृति निशि वारॖ वारॖ दूरॖन्य तवय छि संकट ति तमी आयि बूगान। यॊदवय यि ब्रह्मान्ड पॊज़ छु, सिरी, च़न्द्रमॖ, तारख पऺज़्य छि, नक्षत्र, राश वगैरा ति छि पऺज़्य तॖ यिमन हुन्द असर ति असि प्यठ कुनि हदस ताम छु पॊज़। दफ अमा पॊज़ च़्येनुन छि बऺड कथ। च़ीनिथ पतॖ विश्वास करुन छि तमि ख्वतॖ बऺड कथ। बरादरन वॊन तीज़मालि ज़ि मऻजी सऻन्य ज़िठ्य ॴस्य वनान रोज़ान ज़ि कलस तील कमि दॊह गछ़ि मथुन, पलव कमि दॊह गछ़न छलॖन्य, नॊव बानॖ या नॊव चीज़ गरॖ बापथ कर गछ़ि अनुन, शॆशतॖर गछ़ि नॖ बटॖवारि दॊह गरॖ च़ानुन, तील गछ़ि बटॖवारि दॊह दान करुन वगैरा वगैरा। फिरिस्त छु बॊड ॳस्य छिनॖ करान अम्युक ऒड ति। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

24.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

24.05.2022 ज़्येठ (ज्येष्ठ) गटॖ पछॖ (कृष्ण पक्ष) नवम (नवमी) देवादेव बॊम्वार (मंगलवार), श्री सप्तर्षि सम्वत 5098, नक्षत्र पू.भा, राश मीन (दुहचि 04.27 बजि प्यठॖ), ऋतु ग्रीष्म (चलान), द्रठॖपऻन्च़ुक  (पंचक) (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि वॊन बरादरस ज़ि अथ हाबा छि वनान ज़ि यथ नॖ पूष तथ छुनॖ दूष। च्योन इशारॖ कॊत कुन छु मऻजी अज़। बरादरन प्रुछ़ तीज़मालि। यिमय हाबा सातन हॖन्ज़ ॴस्य ना राथ कथ करान। असि हाबा ॴस्य कऺशीरि मंज़ सऻन्य ज़िठ्य यिमन सातन प्यठ स्यठाह विश्वास करान। यॊदवय असि ज़नानन पॊन्य ओस आसान लदुन याने कलॖ ओस आसान छलुन तमि बापथ ति ॴस्य वुछान कुस दॊह छु जान तॖ कुस दॊह छुनॗ जान। आहनी मऻजी म्यॆ छु याद प्यवान ज़ि म्यॆ ओस मोल वनान ज़ि मस गछ़ि कासनावुन ब्वदॖवारि या आथवारि दॊह। बॊम्वारि, ब्रसवारि या बटॖवारि दॊह गछ़ि नॖ मस कासॖनावुन। ओंगजन या ख्वरन हॖन्द्य नम ॴस्य नॖ गरिक्य ज़िठ्य दिवान कासनॖ बॊम्वारि या बटॖवारि तॖ न ॴस्य शेव करान यिमन दॊहन। मगर यिमन नियमन प्यठ कुस छु पकान व्वंय। तीज़मालि वॊन बरादरस। नाय मऻजी कॆंह कॆंह वुछ म्यॆ ज़ि वुनि ति छि हिरासॖ करान। हतबा नऺव पुय छा मानान यिम कथॖ। तीज़मालि वॊन बरादरस। मानॖहऻन ति सऺही दफ वनन वाल्यन हॖन्ज़ व्यछ़य छि। यि करबा शुखुर ज़ि वुनि छि ज़रॖकासय, काहन्यैथरस, मेखलायि या खान्दरस व्वछ़बस ख़बर किथॖ पऻठ्य साथ वाथ वुछान रोज़ान। बरादरन वॊन तीज़मालि ज़ि पर-ज़ऻच़ मंज़ खान्दर करनस मंज़ कुस मुहूर्त तॖ कुस साथ छु यिवान वुछनॖ योरूक किनॖ तोरूक। कॆंच़न ज़ऻच़न मंज़ छुनॖ लऺडकन योनि ति आसान ति क्याज़ि तिमन छुनॖ योनि छ़ॖनॖनुक रसॖमॖय। यिथय पऻठ्य छि सानि ज़ऻच़ मंज़ ति कॆंह नाहवार शुर्य योनि ॳसिथ ति योनि किलिस प्यठ अलॊंद थवान, गायत्री मंत्र परून छु स्यठाह दूर। नॊव पलव यॊदवय लागुन ओस आसान ज़नानन क्यहो मर्दन जान दॊह ओस यिवान वुछनॖ या कुनि बऺडिस लूकिस दॊहस प्यठ ओस यिवान लागनॖ तॖ दपान ॳस्य छेख छुय या छावुन यॆछ़नय। अज़कल छि पलव लागान रोज़ान कुनि ति दॊह कुनि ति सातॖ तॗ निव-पिंच वऺनिथ छि पकान ब्रोंहकुन। कृति याने क्रछ़ तॖ भरण नक्षत्रन मंज़ ॴस्य नॖ कांह ति जान कऻम करनॖ यिवान ति क्याज़ि यिम द्वशवय दॊह छि नाकारॖ नक्षत्र यिवान मानॖनॖ। दऺपिथ कथ छि ज़ि यि गऺयि क्रछ़ तय भरण, अमि दॊह कॆंह नय तॖ पानसॖय फरन। तीज़मालि वॊन बरादरस। आहनी मऻजी सानि शास्त्रॖ मूजूब छु मुहूर्तस, दॊहस या वारि स्यठाह महत्व। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

23.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

23.05.2022 ज़्येठ  (ज्येष्ठ) गटॖ पछॖ (कृष्ण पक्ष)ॴठम (अष्टमी) देवादेव, च़ऺन्दॖरवार (सोमवार), श्री सप्तर्षि सम्वत 5098, नक्षत्र शत, राश कुम्भ (चलान), ऋतु ग्रीष्म (चलान), द्रठपऻन्च़ुक (पंचक) (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

बरादरन वॊन तीज़मालि ज़ि मऻजी राथ थऺवॖथ च़्यॆ कथ ॳडॖय। तीज़मालि वॊन बरादरस ज़ि कथॖ हाबा छि हतॖबज़ॖ दफ अमापॊज़ तिमन कथन रूद नॖ व्वंय कांह म्वल।   कम कथॖ छि तिम मऻजी ज़ॖ च़ोर बोज़नावतॖ म्यॆति। बरादरन प्रुछ़नस। हतबा कऺशीरि मंज़ यॆलि ति असि कुनि सफरस ओस आसान गछ़ुन  ग्वडॖ ॴस्य वुछान मुहूर्त याने साथ, दॊह या वार। क्वल ब्रह्मनस। या कऻन्सि गुरु जियस ॴस्य प्रॖछ़ान तॖ सु ओस न्यॆचॖपऺतॖर वुछिथ वनान ज़ि फलऻन्य मुहू्र्त तॖ फलऺन्य दॊह छु श्वब सफरॖ बापथ। चाहे स्व सफर कऺशीरि प्यठॖ ज्यॊम तामॖय आसिहे आसान। साथ ॴस्य वुछान रो़आन। अगर साथ ठीख आसिहेनॖ आसान मगर न्येरुन ॴसिहे ज़रूरी आसान तमि विज़ि क्याह सना ॴस्य करान मऻजी। बरादरन कॊर सवाल तीज़मालि। तमि विज़ि हाबा ओस प्रस्थान यिवान कडानॖ। प्रस्थान। यि क्याह ओस आसान मऻजी। यॆमिस सफ़र ओस आसान करुन तऺम्यसुन्द कांह चीज़ ॴस्य कालय थवान कऺडिथ गरि न्यबर तॖ थवान ॴस्य कऻन्सि हमसायसॖन्दि गरि तॖ सफ़रस गछ़नवऻलिस ॴस्य नॖ ख़बर थवान। सिरिफ नेरनॖ विज़ि ॴस्य तऺमिस दपान ज़ि फलऻन्य चीज़ छुय फलऻन्निस निश तॖ सु तुल्यज़ि सॗत्य। ख़बर यि क्याज़ि ॴस्य करान मऻजी। सफर करन वऻल्यसॖन्दि बापथ रुत कांछान तॖ यथ सफ़रस सु गछ़ान ओस सु सफ़र सफ़ल तॖ स्वखमय रोज़नॖ बापथ। अवय ओस यिवान साथ तॖ वार वुछनॖ। कांह ति कऻम करनॖ ब्रोंह ओस यिवान साथ वुछनॖ। शुरिस आसिहे च़ाटॖहाल गछ़ुन, कोरि आसिहे वऻरिव गछ़ुन, कऻन्सि आसिहे नवि नोकरी गछ़ुन, नॊव पलव लागुन वगैरा वगैरा। मगर अज़कल हाबा छि यिमन चीज़न नज़र-अन्दाज़ कऺरिथ पकान रोज़ान। मुहूर्तस पतॖ ति आसिहे कॆंह नतॖ कॆंह वजह आसान मऻजी म्यॆ बासान।  आहनबा अदॖ ॴस्य सऻन्य ज़िठ्य बिला वजह कॆंह कऻम करान रोज़ान। दफ ॳस्य छि पकान ॳछ वऺटिथ तॖ बासान छु ज़ि तिम ॴस्य ग़लत तॖ ॳसीय छि ठीख। यि छि म्यॆ बासान सऻन्य ग़लतफैहमी ति क्याज़ि शास्त्रात ति छु कॆंह नतॖ कॆंह। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति))

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

22.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

22.05.2022, ज़्येठ (ज्येष्ठ) गटॖ पछॖ (कृष्ण पक्ष) सतम (सप्तमी) देवादेव, आथवार (रविवार/ऐतवार), श्री सप्तर्षि सम्वत 5098, नक्षत्र धनिष्ठ, राश कुम्भ (दुहॖचि 11.12 बजि प्यठॖ), द्रठपऻन्च़ुक (पंचक) शॊरु, ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़माल ॴस ओंगजि ट्यॆंड्यन प्यठ क्याहताम गन्ज़रान ज़ि बरादरन प्रुछ़नस मऻजी च़ॖ कमन करोडन छख हिसाब करान। हतबा करोडन हुन्द जायदाद त्रोव पथकुन कऺशीरि मंज़ व्वंय छि यॊत यिथ रिलीफ पौंसस प्यठ दॊह दॊह कडान। गन्ज़रावनॖच गुन्जऻयिश कति रूज़। तीज़मालि द्युतनस जवाब। मऻजी च्यॆ मा ज़्वन ज़ि यि द्रठॖपऻन्च़ुक क्याह छु आसान। हय आहनबा ज़्वन क्याज़ि गॊछ़ुम नॖ आसुन। सानि शास्त्र मुतऻबिक हाबा छु द्रठॖपऻन्च़ुक केंच़व चीज़व बापथ अशुभ यिवान मानॖनॖ तॖ केंच़व चीज़व बापथ शुभ। द्रठॖपऻन्च़ुक हाबा छु रोज़ान पान्च़न दॊहन प्रथ ऱयतॖ। कऺशीरि मंज़ ॴस्य नॖ पान्छ़ चीज़ द्रठॖपऻन्च़कस मंज़ गरॖ अनान। कम शना चीज़ मऻजी। बरादरन प्रुछ़नस। दपान हाबा तील, लऺकॖर, म्यॆच़्युव बानॖ, कपुर तॖ कांह धात द्रठॖपऻन्च़कस मंज़ गरॖ अननॖ सॗत्य छि लक्ष्मी तॖ सरस्वती गरि प्यठॖ दूर गछ़ान। ख़बर हय मऻजी अज़कल छा कांह यिमन चीज़न प्यठ विश्वास करान ति। प्रुछ़नस बरादरन। दय ज़ानान। वापस वॊन तीज़मालि। द्रठॖपऻन्च़कस मंज़ गछिनॖ दक्षण दिशायि कुन यत्रा करॖन्य ति क्याज़ि दपान छि तथ दिशायि मंज़ छु यम सुन्द वास आसान तॖ यिमन दॊहन यात्रा तथ दिशायि  करॖन्य छि आसान नाकारॖ।। मकानस गछ़ि नॖ पश बनावुन द्रठपऻन्च़कस मंज़। दाह संस्कार गछ़ि नॖ करुन। द्रठॖपऻन्च़कस मंज़ यॊदवय कऻन्सि मृत्य छि सप्दान, सु छु अपशॊगुन यिवान मानॖनॖ। अल्बतॖ मजबूरी मंज़ छु यिम चीज़ प्यवान करॖन्य मगर तथ सूरतस मंज़ छि कॆंह विधि तॖ कॆंह नियम प्यवान वर्तावॖन्य ताकि अशुभ असर निशि मैलि राहत। तीज़मालि वॊन बरादरस ज़ि सऻनिस समुदायस मंज़ हाबा छि वारियाह कॆंह संस्कार यिम दॊह हिसाबॖ ॴस्य यिवान करनॖ मगर तिम संस्कार रुद्य लबिताकस।   तिम नियम छि वर्तावान स्यठाह कम लूख या यि दच्यज़ि ति वर्तावानॖय छिनॖ। कम सना संस्कार छि तिम मॏजी। बरादरन प्रुछ़ तीज़मालि। पगाह वनय। तीज़मालि कॊड थख ह्यु। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.cim प्यठॖ ति)

21.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

21.05.2022 ज़्येठ (ज्येष्ठ) गटॖ पछॖ (कृष्ण पक्ष) शॆयम (षष्ठी) देवादेव बटॖवार (शनिवार/शनिश्चरवार), श्री सप्तर्षि सम्वत 5098, नक्षत्र श्रवण, राश मकर (चलान), ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

बरादरन प्रुछ़ तीज़मालि ज़ि मऻजी च़्यॆ छुये ज़्वन कऺशीरि मंज़ कम कम  जानावार ॴस्य आसान। हय आहनबा क्याज़ि गॊछ़ुम नॖ ज़्वन आसुन। तीज़मालि द्युतनस जवाब। तलय केंच़न हॖन्द्य नाव वन ताकि सान्यन शुर्यन ति तरि फिकिरी ज़ि सऻन्य कऺशीर कऻच़ाह रन्गदार ॴस अमि रऺन्ग्य ति। तीज़मालि ह्यॆत्य नाव याद पावॖन्य तॖ वॊनुन बरादरस - च़ऺर, हऻर, कऻन्टुर, कुकिल, कोतुर, काव, गऻन्ठ, सत्तुत, रातॖमॊंगुल, शीनॖ पिपिन्य, रन्गॖ च़ऺर, फम्बॖसीर, तोंतॖ कोन, कऺतिज, वन्दॖ-कॊस्तूर, दिदॖर, पोशिनूल, हारॖ-वातॖज्य, लऺट्य राज़ॖ, बिल्बिचुर - बस बस मऻजी च़्यॆ वऺनिथ तिम तिम नाव यिम नॖ म्यॆ ति वुछ्यमॖती कऺशीरि मंज़। नबा यिमन मंज़ॖ ॴस्य कॆंह श्रीनगर शहरस मंज़ तॖ कॆंह ॴस्य ओरॖ योरॖ गामन गुटन मंज़ आसान। बॖ हाबा ॴसॖस चकस प्यठ गछ़ान ल्वकचारस पनॖनि माजि सॗत्य तॖ तति ॴस्य वुडरन प्यठ कॆंह जानावार नज़रि गछ़ान। बरादरन प्रुछ़ तीज़मालि ज़ि चक कथ छि वनान मऻजी। असि हाबा ओस ज़ऺमीन पटनॖ ॴबी तॖ ख्वशॖक ति। ॴबी ज़ऺमीनि मंज़ ओस दानि आसान यथ दॊयिम नाव ओस चक। चक क्याज़ि ॴस्य वनान यि छॆनॖ म्यॆ ति ख़बर।  यि नाव मा आसिहे अवॖ म्वखॖ ति शायद म्यॆ बासान ज़ि दानि गामॖ प्यठॖ शहर अनॖनॖ विज़ि ओस प्यवान गुज़र द्युन छच़ॖबलॖ। तिम छु म्यॆ बूज़मुत वनान ॴस्य चकुक दानि। ख्वशॖक ज़मीन गऺयो बाग़ात याने म्यवॖ बाग़, बादाम बाग़, डून्य बाग़ वगैरा। तॖ वुडर कथ छि वनान। बरादरन प्रुछ़ तीज़मालि। वुडर हाबा गव ल्वकुट-म्वकुट पहाड़। हतबा क्याह वनय। ॳस्य ॴस्य नॖ ठऺठ्य यिवान यॆलि त्यॆलि चकस प्यठ गछ़ान ॴस्य। त तीलवऻन्य वानस मंज़ ॴस्य दांदस पऺत्यकिन्य ज़ेरि पचि प्यठ बिहिथ सवऻर्य ख्यवान रोज़ान तॖ गुर्यन प्यठ बिहिथ ॴस्य वुडॖर्य वुडॖर्य सवऻर्य करान रोज़ान। वाय। कॊत गऺयि तिम दॊह। तीज़मालि त्रोव व्वश। बरादरन डऻज्य कथ। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठ ति)

20.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

20.05.2022, ज़्येठ (ज्येष्ठ) गटॖ पछॖ (कृष्ण पक्ष) पऻन्च़म (पंचमी) देवादेव, शॊकुरवार (शुक्रवार/जुम्मा/ भार्गववार), श्री सप्तर्षि सम्वत 5098, नक्षत्र उ.षा, राश मकर (सुबहॖचि 08.45 बजि प्यठॖ), ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़माल ॴस बालकऻनी मंज़ मुद्दय गन्डिथ आकाशस कुन वुछान ज़ि बरादरन प्रुछ़नस मऻजी च़ॖ कथ सना ख्यूबस मंज़ छख गऻमॖच़ अज़। कॆंहनॖबा। जवाब द्युत तीज़मालि बरादरस। याद हाबा आयम कऺशीरि मंज़ वऺट्य दारि हॖन्द्य पंजरॖ-पऺट्य। पंजरॖ-पऺट्य क्याज़ि ॴयी अज़ याद मऻजी। प्रुछ़नस बरादरन। तथ पंजरॖ-पऺटिस प्यठ ओस अमूमन बिल्बिचुर जिहान तॖ मन ओस तऺमिस वुछिथ ख्वश गछ़ान। क्याज़ि। सवालॖ कॊर बरादरन तीज़मालि। दपान हाबा ॴस्य ज़ि बिल्बिचुर छु प्रथ विज़ि रॖच़ शॆछ ह्यथ यिवान रोज़ान। यॆति छु यपऻर्य न ज़न तॖ न ज़ऻन्पुन। वऺरीवादॖ गयि यिम जानावार वुछनस। आहनी मऻजी भगवानन छि यिमन ति पनॖन्य अख ज़िम्वऻरी थऻवमॖच़ तॖ तिमव दऺस्य छु इन्सान यिमन सॗत्य जुडिथ कुनि नतॖ कुनि रऺन्ग्य। क्वकरॖ सॖन्ज़ बांग छि अलारमॖच कऻम करान तॖ मच़ि न्यॆन्दरि शॊन्गिथ इन्सानस छु वुज़ॖनावान।  हून यॆलि व्वफान ओस रोज़ान दपान ॴस्य ज़ि कुसताम च़ूर च़टुल छु या छु कांह व्वपर मॊहन्युव आमुत मऺहलस मंज़। हून यॆलि ओस वून्गान रोज़ान दपान ॴस्य ज़ि क्याहताम अपशॊगुन छु सप्दवुन। तीज़मालि वॊन बरादरस ज़ि यॆलि यॆलि हून ओस वून्गान रोज़ान म्यॆहाबा छु याद ज़ि सऻन्य ज़िठ्य ॴस्य  तऺमिस हूनिस च़ऺलरावान तमि ज़ारि प्यठॖ तॖ सॗती ॴस्य परान रोज़ान  यॆतिक्यो यॆतिक्याह, यॆति छिय दीवी तॖ दीवता, राम तय सीता, दूर च़ल कुत्ता। ख़बर यि क्याज़ि ॴस्य परान। बरादरन यॊछ़ ज़ानुन। दपान हाबा ॴस्य ज़ि यि परनॖ सॗत्य छि भूत प्रॗथ च़लान तॖ अपशॊगुन टलान। तीज़मालि द्युत जवाब। यिथय पऻठ्य यॆलि काव बिहान ओस दारि प्यठ तॖ टाव टाव करान रोज़ान दपान ॴस्य ज़ि अज़ छु कांह पॊछ यिनॖवोल। मऻजी म्यॆ छु बूज़मुत ज़ि यॆलि आकाशस मंज़ आसॖ गऻन्टॖ गतॖग्यूर करान दपान ॴस्य ज़ि यिम छि रूद मंगान।आहनबा म्यॆति छु बूज़मुत तॖ अज़मोवमुत ति वार्याहि लटि। कथ क्याह ॴस तॖ कथ कॊत वऻच़। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

19.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

19.05.2022, ज़्येठ (ज्येष्ठ) गटॖ पछॖ (कृष्ण पक्ष) च़ोरम (चतुर्थी) ब्रसवार (वीरवार/गुरुवार/ब्रहस्पतवार), श्री सप्तर्षि सम्वत 5098,  नक्षत्र मूल, राश धनु (चलान), ऋतु ग्रीष्म (चलान)....अज़ छि संकट च़ोरम (संकट निवारण चतुर्थी) ति, ज़ूव खसि रऻच़ हॖन्ज़ि 11.19 बजि

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़माल ॴस अज़ सुलि न्यॆंन्द्रि वऺछ़मॖच़। बरादरन प्रुछ़नस ज़ि मऻजी अज़ क्याह दऺलील छि च़्यॆ ज़न छय डुल्य ब्रऻर्य गऻमॖच़। तीज़मालि त्रोव ज़्यूठ व्वश तॖ वॊनुन बरादरस ज़ि म्यॆ हाबा द्रायि राथ यिथय पऻठ्य ॳछन मंज़ॖय। ख़बर क्याज़ि। बरादरन प्रुछ़नस। हतबा कऺशीरि दपान छु कॊहराम वॊथमुत ब्यॆयि अकि लटि। लूख छि बिचऻर्य आमॖत्य सडकन प्यठ। मारा मऻरी छि ब्यॆयि तिथय पऻठ्य यिथॖ पऻठ्य नमतस मंज़ ॴस। आहनी मऻजी ॳस्य कऻशिर्य बटॖ आयि नाहकॖ पाकॖ वलनॖ आतंकवादस मंज़। सऻन्य शुर्य गऺयेये लज़ि पज़ि कऺशीरि पनॖन्यकिन्य नोकरी करनि मगर तति गॊल दहशथगरदन ज़ऺमीर तॖ ह्यच़ख ब्यॆयि गोलि लायनि ब्यॆकसूरन प्यठ तॖ कऺरिख बिचार्यन तिहॖन्द्य गर ख्वठज़द। हतबा सरकार ति गव नाकाम तॖ ब्यॆयि दपान कॊरुख लाठी चार्ज, चलोवुख टियर-गैस तिमनॖय प्यठ यिम बिचऻर्य विलज़ार करनि द्रायि पनॖन्यव गरव मंज़ॖ। म्यॆहाबा आयि नॖ रऻत्य रातस न्यॆन्दॖर। म्यॆहाबा प्यव कुनवुहशथ तॖ सतहऻठ याद। आहनी यॆलि परमेश्वरी कान्ड गऺयो कऺशीरि मंज़। तमि विज़ि ॴस्य सऻरीय बटॖ कऺशीरि मंज़ॖय तॖ मुस्लमानन फचेये तॗर सोन संगरॖश वुछिथ मगर यॆमि लटि यॊथवय यकुत छु असि पानवॖन्य मगर छि सऻरीय छऺकरिथ अख अकि अंदॖ तॖ ब्याख ब्यॆयि अंदॖ मगर सरकारस ज़न छु कनन फम्ब बऺरिथ तॖ ॳछन पऺट गऺन्डिथ। यॆमि हिसाबॖ ॳस्य छि कमर कऺसिथ द्रामॖत्य यॆमि लटि म्यॆ बासान छुम कॆंह नतॖ कॆंह नऺतीजि नेरि ज़रूर। बरादरन वॊन तीज़मालि। आहनबा नेरुन गछ़ी। वॊन तीज़मालि। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

18.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

18.05.2022 ज़्येठ (ज्येष्ठ) गटॖ पछॖ (कृष्ण पक्ष) त्रय (तृतीया) ब्वदवार (बुधवार), श्री सप्तर्षि सम्वत 5098, नक्षत्र ज्येष्ठ, राश धनु (सुबहॖचि 08.09 बजि प्यठॖ), ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

बरादरन वॊन तीज़मालि ज़ि मऻजी राथ गव म्यॆ यॆच़कल्य ॶख काव नज़रि युस बास्योम ओस ज़न त्रेशिहॊत। हतबा गरमी ॳन्य पसरॖ  जानावारन त्ये बिचार्यन ज़ुव छु। तीज़मालि वॊन बरादरस। म्यॆ प्यॆयि तऺमिस कावस वुछिथ स्व कथ याद। बरादरन वॊन तीज़मालि। क्वस बा कथ। तीज़मालि प्रुछ़नस। ल्वकचारॖच कथ मऻजी। अख त्रेशिहॊत काव ओस छ़ान्डान पोन्य च्यनॖ बापथ। वुडान वुडान थॊक तॖ ब्यूठ ॳकिस कुलिस प्यठ थख कडनि। अमि कुलि प्यठॖ आस नज़र दूर अख च़ॊड ॳकिस दारि प्यठ। यि सूंचिथ ज़ि अथ मंज़ मा आसि पोन्य ॳम्य कावन तुज्य वुफ़ तॖ वोत अथ च़ऺडिस ताम। तथ च़ऺडिस मंज़ ओसॖसा पोन्य। प्रुछ़ तीज़मालि बरादरस। ओसुस ति सऺही मगर। बरादर रुक्यव। मगर क्याह। तीज़मालि प्रुछ़नस। मगर पोन्य ओस च़ऺडिस मंज़ स्यठाह ब्वन यि दप्यज़ि ति च़ऺकिस तल यॊत नॖ कावस तोंथ ॴस वातानॖय। त्राहि त्राहि। पतॖ क्याह कॊरुन। पतॖ क्याह। काव ओस गाटुल। बरादरन वॊन ब्रोंहकुन ज़ि कावन सॊम्बॖरऻव्य तोंति सॗत्यन ल्वकॖट्य ल्वकॖट्य रेंटॖफऺल्य तॖ गव त्रावान च़ऺडिस मंज़। ख़बर क्याज़ि। तीज़मालि प्रुछ़ बरादरस। तऺम्यसॖन्दि ति करनॖ सॗत्य गव पोन्य ह्यॊर ह्यॊर खसान तॖ पोन्य वोत तॊत ताम यॊत ताम कावॖ सॖन्ज़ तोंथ वऻच़। बरादरन द्युतनस जवाब। दय सॖन्ज् दयगथ। मॆहनतस हाबा छु मॊदुर फल आसान। तीज़मालि वॊन बरादरस ज़ि जानावारन हाबा छि म्यॆ बासान ज़न इन्सानव ख्वतॖ ज़्यादॖ अकॖल। बेशक़। बरादरन वॊन तीज़मालि ज़ि इन्सानन  छि कॆंह कॆंह चीज़ ह्यॆछमॖत जानवरन तॖ जानावारन निशीय। अथ कथि ॴस्य वनान अंग्रीज़स मंज़ थऺरॖस्टी क्रो। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

17.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

17.05.2022 ज़्येठ (ज्येष्ठ) गटॖ पछॖ (कृष्ण पक्ष) ऒक्दॊह (प्रथमा/प्रतिपदा) देवादेव, बॊम्वार (मंगलवार), श्री सप्तर्षि सम्वत 5098, नक्षत्र अनु, राश वृश्चिक (चलान), ऋतु ग्रीष्म (चलान)... चूंकि पगाह छि द्वय (द्वितिय) रावान पगहुक वॊहरवोद यी ॳज़्य

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़माल ॴस पनॖनि फ्लैटचि बालकोनी किन्य न्यॆबरिम नज़ारॖ वुछनस मंज़ लीन। बरादरन प्रुछ़नस मऻजी अज़ क्याह छु सुबहऻय सुबहऻय बालकोनी मंज़ यिनुक मन बन्योमुत। हतबा क्याह वनय अंदर रूज़िथ छु ज़न इन्सान दमफुट्य गछ़ान। बासान ज़न छु कऻदखाना ह्यु। न छि शुर्यन-कट्यन सॗत्य खुलॖ कथ बाथ ति क्याज़ि तिम छि या पनॖनिस परनस मंज़ मसरूफ नतॖ पनॖनिस मोबाइलस मंज़ आवॖर्य। यिमन फ्लैटन मंज़ न छि डंगॖ दऻर तॖ न छु कांह हक-हमसायि यॆमिस सॗत्य दिलुक हुबाबा कडहऻव। न्वशि कोरि ति छुनॖ समय गरिक्यन बऻच़न सऺत्य कथ बाथ करहऻन। खोर्यन प्यठॖय छि खडा आसान। दफ्तर गछ़नॖच त्रफ-त्रफ। अंगन ॴश्यनावन हुन्द युन गछ़ुन ति रूद नॖ व्वंय। बालकऻनी न्यबर ति याम वुछान छि न कांह जानवर नज़र यिवान तॖ न कांह जानावार। बरादर गव बोज़ान तीज़मालिहॖन्ज़ मनॖच कथ। सोंचनि लॊग बरादर ज़ि कति कोर आव बदलाव कऺशीरि नीरिथ असि कऻशिर्य बटन। व्वंय छुनॖ यादॖय  मटन या पटन। व्वंय छुनॖ नज़र यिवान शुर्यन हुन्द शोरोगुल तॖ न च़र्यन हार्यन हुन्द च्युर्यग्यॊश। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

16.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

16.05.2022 वह्यक (वैशाख/बैसाख) ज़ूनॖ पछॖ (शुक्ल पक्ष) पुनिम (पूर्णिमाशी) देवादेव, च़ऺन्दॖरवार (सोमवार), श्री सप्तर्षि सम्वत 5098, नक्षत्र विशा, राश वृश्चिक (सुबहॖचि 07.54 बजि प्यठॖ) ऋतु ग्रीष्म (चलान)...अज़ छि बुद्ध पूर्णिमा ति

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मऺलि वॊन बरादरस ज़ि सऻन्य कॆंह शुर्य छि पनॖनि माजि ज़्यॆवि मंज बऻथ ग्यवान रोज़ान तॖ मन छु ख्वश गछ़ान मगर। मगर क्याह मऻजी। प्रुछ़नस बरादरन। मगर हाबा मन छु दुखी गछ़ान यि वुछिथ ज़ि सऻन्य शुर्य छिनॖ ह्यकान यिम बऻथ देवनागरी (कऻशिर्य) ज़बऻन्य मंज़ लीखिथ। पनॖन्यन पनॖन्यन गरन मंज़ ति छिनॖ सऻन्य शुर्य पनॖन्यन गरक्यन बऻच़न सॖत्य पनॖनि माजि ज़्यॆवि मंज़ कथ करान। आहनी यि छि वाकऺय परेशऻनी हॖन्ज़ कथ। बरादरन वॊन तीज़मालि। मऻजी यॊत यिथ गव असि यिमन त्रॖहन पान्च़ॖत्रॖहन वऺरियन मंज़ सऻर्यसॖय ततॖग्रॊद। बोल चालि मंज़, ख्यनस च्यनस मंज़, व्वथनस बॆहनस मंज़, सोंचनस समॖजनस मंज़ वगैरा वगैरा। तीज़मालि वॊन ब्रोंहकुन बरादरस ज़ि आहनबा यि कथ च्ययऻन्य छि पऺज़। ॳस्य कऻशिर्य बटॖ छिनॖ पानवॖन्य ति परज़ॖनावनॖ यिवान। कऻशिर्य बटन्यव छि ड्यॆजहऻर्य या कऻडिथॖय थॏव्यमॖत्य या तम्यूक स्वरूप बदलोवमुत। यॆमिस शुरिस मोल कऻशुर आसि तॖ मऻज्य पऻरिम आसि तऺमिस शुर्यसॖन्ज़ मनाज़ि ज़्यव क्वस रोज़ि। बरादरन वॊन तीज़मालि ज़ि मऻजी हालाथ छि दॊह पतॖ दॊह ख़राब गछ़ान। ॳस्य छि म्यॆ बासान बऺल्य थ्यकान ज़ि ॳस्य छि कऻशिर्य। कऻशिर्य लक्षण ह्यॆतिन्य वारॖ वारॖ गऻब गछ़ॖन्य। व्वंय हय रऺछ़रावव तॖ क्याह रऺछ़रावव। तिमनॖय प्रान्यन लीलायन, रोमऻनी बऻतन छि ॳस्य तॖ सऻन्य शुर्य ग्यवान रोज़ान। कन थऺडक्य यिम चीज़ बूज़्य बूज़्य। नॊव यॊदवय कांह कॆंह लेखि ति परनवाल्यन हॖन्ज़ व्यछ़य छि। ज़मानॖ वोत कति कोर ॳस्य छि न योर तॖ न तोर। यि दाव ति बासान असि होर। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak blogspot.com प्यठॖ ति)

15.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

15.05.2022 वह्यक (वैशाख/बैसाख) ज़ूनॖ पछॖ (शुक्ल पक्ष) च़्वदह (चतुर्दशी) देवादेव, आथवार (रविवार/ऐतवार), श्री सप्तर्षि सम्वत 5098, नक्षत्र स्वात, राश तुला (चलान), ऋतु ग्रीष्म (चलान(...अज़ छि गणॖ च़्वदह (गणेश चतुर्दशी) तॖ सऻन्क्रांत ति

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

त्राहि त्राहि। वुछतॖबा असि कम कम विक्षीप आयि अज़ताम। तीज़मालि वॊन बरादरस। स्यॆदि श्यॆहलि ॴस्य बिहिथ कऺशीरि मंज़ अदॖ आतंकवाद्यव तुल क़हर तॖ वुनि छिनॖ गलान। द्वयत्रॖह वऺरी वोत असि यी बूगान। बरादरन वॊन तीज़मालि ज़ि मऻजी हद गऺयि यि ज़ि बिचऻर्य बटॖ थऺविख कॏलोनियन मंज़ बंद तॖ गेटस दपान बिजली करन्ट थऺवहऻख युथ नॖ तिम गेटॖ न्यबर क़दम थवन। यिहाबा गव स्यठाह ज़ुलुम। वॊन तीज़मालि। लाठी चार्ज ओस बूज़मुत, टियर-गैस ति ओस वुछमुत तॖ बूगमुत मगर बिजली करंट शॆशतॖर्यविस गेटस लागॖन्य हाबा बूज़ अज़ ग्वडनिचि लटि। म्यॆ हाबा वुछ्य ल्वकॖट्य शुर्य बिचऻर्य प्रारान वर्दी लऻग्य लऻग्य च़ाटॖहाल गछ़ॖनॖ बापथ बेताब मगर बेबस बेसहाय। मोल मॏज्य द्रामुत सड़कन प्यठ पनुन द्वख बावनि, न गरस मंज़ महफूज़ न दफ्तरस मंज़ सुरक्षित। गछ़न हय तॖ गछ़न कॊत। बरादरन वॊन तीज़मालि ज़ि सरकार गव मुक्कमल पऻठ्य नाकाम असि कऻशिर्य बटन हॖन्द्य मस्लॖ हल करनस मंज़। नरसंहार छु जऻरी। वरादरन वॊन तीज़मालि ज़ि बटस सॗत्य सॗत्य छु यिवान मुस्लमान ति कुनि कुनि विज़ि गोलि हॖन्ज़ि ज़दस मंज़ मगर मारनवोल छु मुस्लमानॖय। बटन मोरनॖ अज़ताम कांह मुसहलमान। ॴखॖर वजह छु क्याह। कुस प्रॖछ़ि कऺमिस। युसुय कथ करि ह्वट निन चीरिथ तऺमिस। विरोध छु चलान। ज़खम छुनॖ बलान। आतंकवाद छुनॖ कऺशीरि मंज़ गलान। बटॖ रूद बस रायि डलान। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

14.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

14.05.2022 वह्यक (वैशाख/बैसाख) ज़ूनॖ पछॖ (शुक्ल पक्ष) त्रुवाह (त्रयोदशी) देवादेव, बटॖवार (शनिवार/शनिश्चरवार), श्री सप्तर्षि सम्वत 5098, नक्षत्र चित्र, राश तुला (सुबहॖचि 06.12 बजि प्यठॖ), ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़माल ॴस कुठिस मंज़ बिहिथ दरवाज़ॖ बंद कऺरिथ। बरादरन कॊर ठुख ठुख तॖ दरवाज़ॖ मुच़ॖरावनॖ ब्रोंह प्रुछ़ तीज़मालि कुस बा छुख। बॖहऻय छुस। तीज़मालि मुच़रोव बर तॖ बरादरन प्रुछ़नस ज़ि मऻजी च़ॖ क्याज़ि छख बर बंद कऺरिथ बिहिथ। हतबा छुख ना वुछान कऺशीरि मंज़ च़ायि दफतरस मंज़ आतंकवऺद्य रहि-रास दपान तॖ छ़ॖनुख बिचोर अख बटॖ कॊट मऻरिथ दॊहलि। व्वंय हाबा रूद नॖ विश्वास कऻन्सि प्यठ ति। फ्रठ छु रोज़ान याम बरस ठुख छु गछ़ान। तिमव मोर अख मुस्लमान ति दपान। बरादरन वॊन तीज़मालि। आहनबा कुस ताम  एसपीओ दपान। तीज़मालि वॊन वापस। दफ उतनि बलायि लॊग तुत। ख़बर हाबा यिमव मारॖवातलव क्याज़ि कॊड ब्यॆयि कलॖ तॖ ह्यॆच़ॖख कऺशीर ज़बेखानॖ बनावॖन्य। द्वयत्रॖह वऺरी छुनॖ कम वखॖत। लगातार वोत यिमन दहशथगर्दन ज़िख ज़िख दिवान गरा अकि अंदॖ तॖ गरा ब्यॆयि अंदॖ। गरा ह्यॆन्दिस तॖ गरा ब्यॆयि कुनि ज़ऻच़ हॖन्दिस। ज़ानि दय यिमन मुद्दा क्याह छु। तीज़माल रूज़ वनान। हऻरऻन्यगी छि मॏजी ज़ि यिमन यि अस्लाह कुस छु दिवान तॖ कति प्यठॖ छु यिवान। नबा तऻज्यबॖच कथ छि यिति ज़ि यिम थवान कति छि यिम बॊंदूख तॖ गोलि। कमन गरन मंज़ छु यिमन शरण मेलान। तिमन गरन ति गछ़ि बंदिश यिन्य करनॖ। कम गरॖ गऺयि वुजारॖ यिहॖन्ज़व बेहूद हरकतव सॗत्य। सरकऻर्य निज़ाम छा यूत बेबस ज़ि तिम छिनॖ ह्यकान यिथ्यन मुजरिमन लाकम चऻरिथ। बासान छु ज़ि सरकार छु यि तमाशि वुछान ज़ऻनिथ मऻनिथ तॖ निवान पनॖन्य च़ॊट गरमऻविथ। बरादरन वॊन तीज़मालि। सोंचस प्यॆयि दॏश्यवय। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

13.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

13.05.2022 वह्यक (वैशाख/बैसाख) ज़ूनॖ पछॖ (शुक्ल पक्ष) बाह (द्वादशी) देवादेव, शॊकुरवार (शुक्रवार/जुम्मा/भार्गववार), श्री सप्तर्षि सम्वत 5098, नक्षत्र हस्त, राश कन्या (चलान), ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़माल रूज़ जन्त्री मंज़ सफ़ॖ फिरान तॖ बरादरन प्रुछ़नस ज़ि मऻजी वुनि छुय च़्यॆ ब्यॆयि कॆंह संंशय कुनि मुतलक। हय आहनबा संशयी संशय। तीज़मालि वॊन बरादरस ज़ि ग्वडॖ रऻव्य असि क्वलॖ ब्रह्मण यिम सऻनि धर्मॖक वतॖहावक ॴस्य, पतॖ गऺयि ॳस्य माजि ज़्यॆवि तॖ संस्कृत ज़बऻन्य निशि दूर, मंत्र, पूज़ा पाठ छि संस्कृत ज़बऻन्य मंज़ॖय, परनवऻल्य छि परान व्वंय ह्यॆजि कऺड्य कऺड्य। अदॖ सु प्रॆप्युन आसि, वॊहरवादिच पूज़ा आसि या नित्य पूज़ा विधि आसि। मगर संशय छु बडान रोज़ान यॆलि अकुय शब्द या अकूय श्वलूक छु ब्यॊन ब्यॊन किताबन मंज़ ब्यॊन ब्यॊन तरीक आसान लेखनॖ आमुत या कुनुय मंत्र यिवान परनॖ अड्यन जायन ऒड तॖ अड्यन जायन ऒड। परेशान छु परनवोल गछ़ान ज़ि यि परवा किनॖ हु परव। बरादरन प्रुछ़ तीज़मालि ज़ि राथ वुछ ग़लत शब्द ओस आमुत छापनॖ जन्त्री मंज़ ॳकिस श्वलूकस मंज़, अज़ क्याह वुछुथ व्वंय। तीज़मालि वॊनॖनस ज़ि च़्यॆ छुयबा पॊरमुत जन्त्री मंज़ "इन्द्राक्षी स्तोत्र"। आहनी बॖ छुस परान रोज़ान दॊहय। बरादरन द्युतनस जवाब। अथ मंज़ हाबा छु अख श्वलूकस यिथॖ पऻठ्य लीखित। *आनंदा विजया पूर्णा मानस्तोकाs पराजिता*। यिहऻय श्वलूक छु ब्यॆयिस ॳकिस किताबि मंज़ यिथॖ पऻठ्य - *अनंता विजया पूर्णा मनस्ताषाs पराजिता*

पताह छुनॖ लगान ज़ि जन्त्री मंज़ुक श्वलूक छा सऺही किनॖ ब्यॆयिस किताबि हुन्द। परनवऻल्य छि पनॖनि पनॖनि अन्दाज़ॖ परान हालांकि द्वयव मंज़ॖ गछ़ि आसुन अकुय सऺही म्यानि हिसाबॖ मगर वनि कुस। बरादरन कऺर पनॖन्य कथ पूरॖ यि वऺनिथ ज़ि मऻजी म्यॆ छु वुछमुत ज़ि जन्त्री मंज़ लीखिथ इन्द्राक्षी स्तोत्र मंत्रुक अन्तिम श्वलूक *एतै-नार्म-पदै....ज्वर निवारणम*  ताम छुनॖ कांह परानॖय यॆलि सऺमिथ सऻरी आसान छि। दय ज़ानि क्याज़ि। तीज़मालि वॊन बरादरस ज़ि असि हाबा छॆनॖ यिथ्यन कारन मंज़ ति कुन्य-वनन। अदॖ कऻन्सि छा गछ़ान कनन। बरादरन छ़ॊटरऻव कथ यि वऺनिथ। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

12.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

12.05.2022 वह्यक (वैशाख/बैसाख) ज़ूनॖ पछॖ (शुक्ल पक्ष) काह (एकादशी) देवादेव, ब्रसवार (गरूवार/वीरवार/ब्रहस्पतवार), श्री सप्तर्षि सम्वत 5098, नक्षत्र उ.फा, राश कन्या चलान ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि ॴस जन्त्री अथस मंज़ तॖ ॴस वर्कन फ्युर दिवान तॖ बरादरन प्रुछ़नस मऻजी च़ॖ क्याह छख छ़ारान जन्त्री मंज़। कॆंहनॖबा वुछान ॴसॖस ज़ि प्रेमनाथ शास्त्री सॖन्ज़ि  जन्त्री मंज़ छु श्री रुद्राष्टकम् मंत्र आमुत छापनॖ तॖ अमि मंत्रकिस ग्वडनिकिस श्वलूकस मंज़ छु अख शब्द ग़लत छप्योमुत। मंत्र कुस छु तॖ शब्द कुस छु मऻजी। बरादरन प्रूछ़ तीज़मालि। मंत्र हाबा छु -

 *"नमामि-ईश-ईशान-निर्वाण-रूपं*

*विभुं-व्यापकं-ब्रह्म-वेद-स्वरूपम्*

*निजम्-निर्गुणं-निर्विकल्पं-निरीहं*

*चिदा-काश्म-आकाशवासं-भजेsहम्*

ग़लत क्याह छु यथ मंज़ मऻजी बरादरन यॊछ़ ज़ानुन। शब्द *"निजम्"* बजायि छु आमुत *"अजं"* छापनॖ। तीज़मालि वॊन बरादरस। सॗती वॊनॖनस ज़ि त्रास्दी छि यि ज़ि सऻरी छि *"अजं"* परान रोज़ान तॖ *"निजम्"* छुनॖ कांह ति परान। ख़बर क्याज़ि छिनॖ परान। सवाल कॊर बरादरन तीज़मालि। परनवऻल्य हाबा छि परान दफ सऺही पऻठ्य छु सुय परान यॆमिस यॆमि मंत्रुक आगुर पताह छु मगर म्यऻन्य पऻठ्य युस जन्त्री प्यठय परान छु सु छु *"अजं"* याने ग़लत पऻठ्य परान रोज़ान। च़्यॆ कति छय पताह मऻजी ज़ि *"निजम्"* शब्द छु सऺही तॖ *"अजं"* शब्द छु ग़लत। प्रुछ़ बरादरन तीज़मालि। हय यि मंत्र हाबा छु रामचरित मानसॖ प्यठॖ आमुत तुलनॖ तॖ छोपॖमुत जन्त्री मंज़। मगर यि ग़लती छि ज़ऺहरा रूज़मॖच़ छापनॖ विज़ि य्वस नॖ अज़ ताम ठीख छि करनॖ आमॖच़। च़्यॆ किथपऻठ्य प्यॆयी नज़र अथ शब्दस कुन मऻजी। दॊयिम सवालॖ कॊर बरादरन तीज़मालि। म्यॆ हाबा छु प्यॆठ्य प्यॆठ्य रामचरित मानस पॊरमुत। ब्यॆयि छु यि ॴठन श्वॊलूकन हुन्द मंत्र अक्सर परान रोज़ान सोरुय ह्यॊन्दु समाज। म्यॆ हाबा गव नज़रि ॳकिस हवनस प्यठ यि ज़ि यॆमि किताबि प्यठॖ मंत्र ॴस्य तति परान तथ मंज़ ति ओस यि शब्द ग़लत आमुत लेखनॖ। मुम्किन छु ज़ि तिमव आसि यि मंत्र जन्त्री प्यठॖ तोरमुत  हवनॖ-किताबि मंज़। तीज़मालि वॊन बरादरस। अथ छि वनान ऒन दांद रावरावान सासस दांदस वथ। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

11.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

11.05.2022 वह्यक (वैशाख/बैसाख) ज़ूनॖ पछॖ )(शुक्ल पक्ष) दऺहम (दशमी), ब्वदवार (बुधवार), श्री सप्तर्षि सम्वत 5098, नक्षत्र पू.फा, राश कन्या (रऻच़ हॖन्ज़ि 01.32 बजि प्यठॖ), ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

******************* 

अज़ करव कथ कऺशीरि मंज़क्यन गाडन हॖन्ज़। बरादरन वॊन तीज़मालि।म्यॆ हाबा छि तिम दॊह याद यिवान यॆलि गाडॖवाजिनि आसॖ गरॖ गरॖ तॖ कोचि कोचि फेरान रोज़ान कलस प्यठ गाडॖ टब ह्यथ तॖ वनान रोज़ान गाडा छ्यवो, ताज़ॖ गाडॖ छ्यवो। तीज़मालि वॊन बरादरस। आहनी मऻजी जायि जायि आसॖ आसान सडकन प्यठ फ्वतर्यन मंज़ या टबन मंज़ ताज़ॖ गाडॖ कॖनॖनि तॖ सऻरी कऻशिर्य बटॖ मुस्लमान ॴस्य यस्लॖ ह्यवान रोज़ान तॖ ख्यवान रोज़ान। गाडॖ ॴस्य अनान तॖ पऺठरावान तॖ गनि करान तॖ तलान। तऺलिथ आसॖ यिवान रनॖनॖ ल्यॆजि मंज़। छ़र्यय गाडॖ, मॊन्जि त्रऻविथ, नदॖर त्रऻविथ या मूजि त्रऻविथ आसॖ यिवान रनॖनॖ। कऺशीरि मंज़ ओस बटन गाड ख्यनुक स्यठाह शोख। गाडॖ रनॖनॖ पतॖ यॆलि बऻच़न मंज़ बऻगरावान ॴस्य ख़याल ओस यिवान थावनॖ गाडि हुन्द कुस हिसॖ कऺमिस छु वातॖनावुन। दपान ॴस्य कलॖ सरदार, गऺन्य गलदारस तॖ लऺट ग्वनाहगारस। गाडॖ बतॖ ति ओस अख दॊह यिवान मनावनॖ। बजि गाडॖ, ल्वकचि गाडॖ, गुरन, रामॖ गुरन वगैरा आसॖ यिमन हॖन्द्य कॖसॖम आसान। बरादरन वॊन तीज़मालि ज़ि ख़बर च़्यॆ छया मऻजी ट्रौवॖट गाडॖ ख्यॆमच़ॖ। हतबा क्याह वनय तॖ ख़बर करखा पछ़, प्रंगॖ प्यठॖ हाबा ओस म्योन मोल मंगनावान ट्रौवॖट गाडॖ। तीज़मालि त्रोव ज़्यूठ व्वश तॖ वॊनुन बरादरस ज़ि कऺशीरि मंज़ हाबा ओस गाडन अलगॖय स्वाद। मऻजी कऺशीरि मंज़ छि अख जाय येति दपान गाड ख्यॆन्य छि पाफ़। च़्यॆ छुये ज़्वन बरादरन प्रूछ़ तीज़मालि। मटन छि जाय कऺशीरि मंज़। तीज़मालि वॊन। तति छु बॊड मन्दर। मन्दरस मंज़ छु नाग। नागस मंज़ छि गाडॖ। तिमन गाडन छि वनान नागॖ-गाडॖ यिम छि वुछनि हलाल तॖ ख्यॆनि छि हराम। यिमन गाडन छु न बटॖ ख्यवान तॖ न मुस्लमान। कऺशीरि मंज़ आयि मंज़ॖ अख नऺवॖय ज़ाथ गाडन मंज़। तिमन ॴस्य वनान पंज्येब गाडॖ। स्यठाह सस्तॖ मगर कऻशिर्य गाडि वारि हे नॖ। युस मज़ॖ कऻशिर्य गाडि ओस आसान सु ओस नॖ पंज्येब गाडन आसान। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप*

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

10.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

10.05.2022 वह्यक (वैशाख/बैसाख) ज़ूनॖ पछॖ (शुक्ल पक्ष) नवम (नवमी) बॊम्वार (मंगलवार), श्री सप्तर्षि सम्वत 5098, नक्षत्र मघा, राश सिंहं (चलान), ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

असान असान वॊन बरादरन तीज़मालि ज़ि मऻजी च़्यॆ आसी म्यॆ बासान यिति ज़्वन ज़ि कऺशीरि मंज़ ॴस्य वख अकि ॳन्ज़ आसान बाज़रस मंज़ कॖनॖन्य। तीज़माल गऺयि रॊबूद हिश बरादरॖन्य कथ बूज़िथ तॖ वॊनुनस हय च़्यॆ कति प्यॊय याद ॳन्ज़। खबर हाबा कऻशिर्य बटन छा याद ति किनॖ न। कथ थऻव तीज़मालि जऻरी यि वऺनिथ ज़ि अथ प्यठ हाबा छि दऺपिथ कथ ति। क्याह सना। बरादरन प्रुछ़ तीज़मालि। यॆलि कऻन्सि कुनि विज़ि कांह द्वर्लब चीज़ मेलिहे दपान ॴस्य ज़ि ॳम्य छु अज़ क्याहताम ॳन्ज़ लॊबमुत  च्यऻनिस यादाशतस म्योन नमस्कार। बरादरन वॊन तीज़मालि। म्यॆ हाबा छि ल्वकचारस स्यठाहि लटि ॳन्ज़ ख्योमुत। मऻज्य म्यऻन्य ॴस ॳन्ज़ दानस मंज़ बुज़ान, ॳन्ज़ ॴस्य कॖन्ज़ान तॖ पतॖ ॴस्य तथ निक्य निक्य टुकरॖ करान तॖ ॴस्य रनान। कॖन्ज़ुन मतलब क्या। प्रुछ़ बरादरन। कॖन्ज़ुन हाबा गव जथ तुलॖन्य। तीज़मालि तोरनस फिकिरी। आहनी प्योम याद। बरादरन वॊन। यिथय पऻठ्य ॴस्य कटॖ सॖन्ज़ॖ पाचॖ यिवान त्यॆंगलन प्यठ बुज़नॖ, पतॖ कन्ज़नॖ तॖ तमि पतॖ पाकवनॖ तॖ ॴस्य पाचॖ रस च्यवान रोज़ान। ॳन्ज़ हाबा ओस यिवान गामव प्यठॖ। ग्रॗस्य ॴस्य युहुन्द शिकार करान रोज़ान। बरादरन वॊन तीज़मालि ज़ि मऻजी कॆंह ॴस्य अथ वनानॖय शिकार। ॳन्ज़ ॴस्य स्यठाह कम लूख वनान। आहनबा च्योन वनुन छु पॊज़। शिकारस सॗत्य ॴस्य नदॖर्य मिलनावान तॖ मज़दार ज़ियाफत ॴस बनान। ॳन्ज़ ॴस्य नॖ आमतोर पऻठ्य नज़रि यिवान। कनॖगॖछन सॗत्य सॗत्य गऺयि ॳन्ज़ ति नायाब कऺशीरि मंज़ तॖ यिमन हुन्द नाव ति ह्यॊतुन ज़न मऺशिथ गछ़ुन। तीज़मालि वॊन बरादरस। च़्यॆ पोवुथ याद तॖ बॖ ज़न वऻच़ॖस ब्यॆयि माजि कऺशीरि। ॴसस ति आव पोन्य। गाडन हॖन्ज़ कथ करव पगाह। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

09.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

09.05.2022 वह्यक (वैशाख/बैसाख) ज़ूनॖ पछॖ (शुक्ल पक्ष) ॴठम (अष्टमी) देवादेव, च़ऺन्दॖरवार (सोमवार), श्री सप्तर्षि सम्वत 5098, नक्षत्र अश्लेश, राश सिंह (शामचि 05.08 बजि प्यठॖ), ऋतु ग्रीष्म (चलान)...अज़ छु ॴठम (अष्टमी) फ़ाक़ॖ ति

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

ख़बर च़्यॆ ज़्वन छुयि मऻजी ज़ि कऺशीरि मंज़ आसि मेलान ह्वछि गाडॖ ति। तिमन हाबा ॴस्य वनानॖ पचॖ ह्वगाडॖ। तीज़मालि वॊन बरादरस। बिल्कुल। बरादरन द्युतनस जवाब। सॗती वॊनॖनस ज़ि च़्यॆ छुय यादाश्त जान। आहनबा तॖ कऻशिर छस ना। कऺशीरि मंज़ॖय ॴसॖस रोज़ान। तीज़मालि वॊन  ब्रॊंहकुन बरादरस ज़ि पचॖ ह्वगाडव अलावॖ हाबा ॴस्य आसान बऺड्य ह्वख्य गुरन यिमन वनान ॴस्य रज़ॖ-गुरन। ब्यॆयि हाबा ॴस्य आसान ल्वकॖट्य ह्वख्य गुरन तॖ वनान ॴस्य तिमन रामॖ-गुरन। तीज़माल रूज़ वनान बरादरस ज़ि हतबा कोताह मंज़ॖ ओस यिवान ह्वगाडॖ तॖ बतॖ, गुरन तॖ बतॖ, रामॖ गुरन तॖ बतॖस। वाय कॊत गऺयि तिम दॊह। यि ज़ियाफत ॴस ज़्यादॖ लज़ीज़ बनान यॆलि यिमन गाडन या गुरनन सॗत्य कऻन्ज़ ओस आसान। बरादरन वॊन तीज़मालि ज़ि मऻजी वख अकि ॴस्य नॖ सऻन्य ज़िठ्य गन्डॖ या रोहनॖ ॳसस लदान। कॆंह कॆंह सऻन्य ज़िठ्य ॴस्य नॖ टमाटर ति ख्यवान। दपान ॴस्य ज़ि गन्डॖ, रॊहनॖ तॖ टमाटर छि छ़्यट्य आसान तॖ यिम चीज़ ॴस्य सिरिफ मुस्लमान ख्यवान रोज़ान। बरादरन वॊन तीज़मालि ज़ि ॳस्य ॴस्य मुस्लमानस वनान ज़ि रोहनॖ फ़ख छुय यिवान तॖ युस्लमान ओस कऻशिर्य बटस वनान रोज़ान दालि बटॖ या दालि गऺडवॖ। आहनबा कऺशीरि मंज़ ॴस्य बोज़ान रोज़ान यिम ऱयच़ॖ। कऻशिर्य बटॖन्यन ॴस्य वनान दालि बट्यन मगर कऻशिर्य बटॖ ॴस्य नॖ मुस्लमान ज़नानन ऱयच़ॖ कडान। बरादरन वॊन तीज़मालि ज़ि हालांकि मऻजी कऻशिर्य बटॖ ॴस्य नॖ ज़्यादॖ दाल ख्यवान कऺशीरि मंज़ मगर ऱयछ़ ॴ्स्य तुलान तति। सऻन्य सऻरी सिन्य हाबा ॴस्य बनान गन्डॖ टमाटर तॖ रॊहनॖ बगऻरॖय मगर व्वंय छॆनॖ कांह ति सब्ज़ी बनान यिमव चीज़व रॊस। तीजबमालि तॖ बरादरन ऒस यि बदलाव वुछिथ पनॖनिस समुदायस मंज़। कथ छि जऻरी  

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

08.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

08.05.2022 वह्यक (वैशाख/बैसाख) ज़ूनॖ पछॖ (शुक्ल पक्ष) सतम (सप्तमी) देवादेव आथवार (रविवार/ऐतवार), श्री सप्तर्षि सम्वत 5098, नक्षत्र तिष्या, राश कर्कट (चलान), ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

कऺशीरि मंज़ ॴस अख आसऻयिश ज़ि सब्ज़ी ॴस आसान ऱयतॖकऻलिस बिसियार। बरादरन वॊन तीज़मालि। आहनबा तीच़हऻन छुय पॊज़। वंदस ॴस गछ़ान  सख्ती। तवकिन्य ॴस प्यवान कॆंह सब्ज़ी ऱयतॖकऻलिस मंज़ ह्वखनावॖन्य तॖ स्व ॴस यिवान रनॖनॖ वंदस मंज़। कम कम सब्ज़ी आसॖ यिवान ह्वखनावनॖ याद छुयय च़्यॆ मऻजी। बरादरन प्रुछ़ तीज़मालि। हय ति क्याबा म्यॆ क्याह ब्रऻर्य छ़्यॊट छुमॖ ख्योमुत ज़ि मऺशिथ गछ़नम। ऒंगजि ट्यॆन्ड्यन प्यठ छिम याद। तीज़मालि वॊन बरादरस। तलय वन तिहॖन्द्य नाव ताकि सान्यन शुर्यन ति लगि पताह ज़ि क्याह क्याह ॴस्य ॳस्य कऺशीरि करान। ॳस्य हाबा ॴस्य अनान ऱतॖकऻलिस ज़ीठ अल, वान्गन, करेलॖ, फूल गोबी, टमाटर, ग्वगजि, मुजि मुलॖव्यॆन्य, व्वज़ॖल्य मरच़ॖवान्गन, नील्य मरच़ॖवान्गन तॖ यिमन सारिनी सब्ज़ियन ॴस्य आरॖ यानै पन तऻरिथ मालॖ बनावान तॖ ॴस्य ह्वखनावान रोज़ान तॖ यिमन सब्ज़ियन हॖन्द्य नाव ॴस्य बदलान। मस्लन अलॖ हचि, वान्गन हचि, वगैरा वगैरा। मऻजी यिम सब्ज़ी आसॖ वंदस मंज़ यिवान रनॖनॖ तॖ आसॖ गछ़ान मज़दार। बरादरन वॊन तीज़मालि। आहनबा यिम ह्वछि सब्ज़ी छि अज़कल बऺनी बनऻयी मेलान रोज़ान तॖ ॳस्य छि यॊत वऻतिथ कुनि ति मोसमस ऱयतकऻलिस या वंदस मंज़ रनान रोज़ान। तीज़मालि वॊन बरादरस मगर मऻजी सान्यन शुर्यन छय नॖ यिछ़ॖ सब्ज़ी हटि वसान। हतबा तिमन बिचार्यन क्याह दोष छु। तिमव वुछि यपऻर्य नऺव्य नऺव्य चीज़ तॖ तिम छि तिमनॖय मंज़ मज़ॖ छ़ान्डान रोज़ान। तीज़मालि वॊन बरादरस। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिवpodcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

06.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

06.05.2022 वह्यक (वैशाख/बैसाख) ज़ूनॖ पछॖ (शुक्ल पक्ष) पऻन्च़म (पंचमी) देवादेव, शॊकुरवार (शुक्रवार/जुम्मा/भार्गववार), श्री सप्तर्षि सम्वत 5098, नक्षत्र आर्द्रा, राश मिथुन (चलान) ऋतु ग्रीष्म (चलान)...अज़ छि कुमार शॆयम (कुमार षष्ठी) ति

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

बरादरन प्रुछ़ तीज़मालि ज़ि मऻजी सान्यव शुर्यव आसन नॖ तिम सब्ज़ी ति सारेयि ख्येमच़ॖ यिम असि छि तति रूज़िथ ख्यॆमच़ॖ। आहनबा कति आसनख ख्यॆमच़ॖ। तीज़मालि द्युत जवाब बरादरस। तलय तिमन सब्ज़ीयन हॖन्द्य नाव पाव याद मऻजी। बरादरन वॊन तीज़मालि। अदबा तॖ बोज़। हाख कॖसॖमवार कान्युल, बऺद्य, वारि, म्वन्जि, स्वच़ल, क्रछ़, व्वस्तॖहाख, हन्द, व्वपलहाख, बुम, लीसॖ, नुनर, नदॖर्य, ग्वगजि, मुजि (ज़ेछि, गोल), गाज़रि, अल (ज़ीठ) गोल अल (काशी फल/सीता फल), पालख, बरादरन द्युत थख तीज़मालि यि वऺनिथ ज़ि बस यीच़ॖ सब्ज़ी छि अज़ कऻफी। बकाया गऺयि पगाह। आहनबा याद ति गछ़नख रोज़नि। हालांकि कऺशीरि हॖन्ज़व सब्ज़ीयव मंज़ॖ छि कॆंह कॆंह सब्ज़ी यपऻर्यम्यन अलाकन मंज़ ति मेलान रोज़ान दफ अमापॊज़ सान्यन शुर्यन छॆ नॖ यिमव मंज़ॖ कॆंह बिल्कुल रोच़ान। आहनी तिमन शुर्यन प्यॆयि बुथि बदलय बदलय सब्ज़ी तॖ छि तिमनॖय लऻर्य। बरादरन द्युत विराम पननि कथि। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

05.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

05.05.2022 वह्यक (वैशाख/बैसाख) ज़ूनॖ पछॖ (शुक्ल पक्ष) च़ोरम (चतुर्थी) देवादेव, ब्रसवार (गरूवार/वीरवार/ब्रहस्पतवार), श्री सप्तर्षि सम्वत 5098, नक्षत्र मृग (चलान), राश मिथुन (चलान) ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

आदबी मऻजी वन ब्रोंहकुन अज़। बरादरन वॊन तीज़मालि। ॴर, सब्ज़ तॖ व्वज़िल ॴर, ग्वरदऻल्य, बादाम, कच्चॖ सब्ज़ बादामन ॴस्य सब्ज़ी बनावान, डून्य, बरादरन च़ऺट कथ यि वऺनिथ ज़ि मऻजी य्मॆ छुयि ज़्वन ज़ि कच्चॖ डुन्य द्यलॖ सऺत्य आसॖ कोरि दंदास करान रोज़ान। हय आहनबा याद छुम ब्यॆयि ॴस्य डुन्य-कुल्युक मॖस्लॖ याने कुल्युक द्यल ति ह्वखॖनावान तॖ लगान ओस दंदास करनस। तीज़मालि पोव याद बरादरस। यिथय पऻठ्य ॴस्य वीर्यकुल्य तॆहरि सॗत्य दऻन्तुन करान रोज़ान। तीज़माल रूज़ वनान। आहनी मऻजी बाज़रस मंज़ टुथ-पेस्ट यिनॖ ब्रोंह ओस यिमवॖय चीज़व सॗत्य लूख कऻम चलावान। बरादरन वॊन तीज़मालि। च़्यॆ छुयबा च़ून्ठ्य म्वरबॖ ख्योमुत ज़ांह। तीज़मालि प्रुछ़ बरादरस। असनऻना कऺर बरादरन तॖ वॊनुन तीज़मालि ज़ि ल्वकॖचारस ॴस म्यऻन्य मऻज्य आन्चारॖक्य पऻठ्य गरस मंज़ च़ून्ठ्य म्वरबॖ बनावान रोज़ान तॖ ॳस्य ॴस्य टास कऺड्य कऺड्य ख्यवान रोज़ान। ब्यॆयि हाबा ॴस्य क्रॖहॖन्य गऻर्य ख्यवान, कऺशीरि मंज़ ॴस्य पंज्येब गऻर्य ति आसान तिम ॴस्य बुज़िथ ख्यवान रोज़ान। दऻन ॴस्य ख्यवान, दछ ति ॴस्य आसान कऺशीरि मंज़ कुनि कुनि जायि। क्यनॖबऺब्य, च़कॖलडर, वायि-गन्डॖर ति ॴस्य ख्यवान रोज़ान। बस अज़ गव यूतुय। पगाह पकव ब्रोंहकुन। बरादरन वॊन तीज़मालि। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिवkoshursabak.blogspot.com प्यठॖ ति)

04.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

---------------------------------

🙏🙏 नमस्कार माहरा

04.05.2022 वह्यक (वैशाख/बैसाख) ज़ूनॖ पछॖ (शुक्ल पक्ष) त्रय (तृतीया) देवादेव ब्वदवार (बुधवार), श्री सप्तर्षि सम्वत 5098,  नक्षत्र मृग, राश मिथुन (दुहचि 04.45 बजि प्यठॖ), ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

सऻन्य शुर्य यिम कऺशीरि  कुनवुहशथ तॖ नमतॖस मंज़ खॊखॖज्य ॴस्य करान या मंज़क्यन मंज़ॖय ॴस्य तॖ तिम शुर्य यिम नमतॖ प्यठॖ टनलि यपऻर्य ज़्यवान गऺयि, बडान गऺयि तॖ अज़ वारॖकार छि वऻत्यमॖत्य पान्च़त्रॖह चतजी वुहिर्य मगर ज़्वन छुख नॖ ज़ि कऺशीरि मंज़ क्याह क्याह त्रऻविथ प्यव असि च़लुन। तिहॖन्दि बापथ छु म्यॆ बासान केंच़न चीज़न हुन्द ज़िक्र करुन ज़रूरी। तीज़मालि वॊन बरादरस। आहनी मऻजी कम अज़ कम तिम चीज़ यिम असि ख्येमॖत्य छि, छऻव्यमॖत्य छि म्यॆ छुनॖ बासान सान्यव शुर्यव आसन तिम ख्यॆमॖत्य या छऻव्यमॖत्य। बरादरन वॊन तीज़मालि तलय पाव याद कम कम म्यवॖ छिय च़्यॆ ख्यॆमॖत्य तति। मगर वऺन्यज़ि तिमय यिम कऺशीरी व्वपदान ॴस्य या व्वपदान छि। म्यॆ ह्यॊतुन ॴसस पोन्य युन। तीज़मालि कॊर शॊरु वनुन। गिलासॖ यथ च्यॆरी ति छि वनान, डबल गिलास, ॴल्यचि, यथ च़्यॆटिन्य ति ॴस्य बनावान, त्रेलॖ, च़ॖनॖन्य, च़ेरॖ, टंग, ल्वकॖट्य रसदार, सामानि टंग, बबॖगोश, च़ूंठ्य कॖसॖमवार याने अम्बॖर्य, गोल्डॖन, च़ॊक्य, अमिरीकन, डेलिशस, बम-च़ून्ठ्य, ह्यन्दॖव्यन्द, खरबूज़, तुल्य, शाह तुल्य वगैरा। बस कर मऻजी अज़ गव यूतुय। हालांकि यिमव मंज़ॖ छि कॆंह कॆंह म्यवॖ यॆति ति मेलान मगर तिम छिनॖ सऻरी कऺशीरि मंज़ॖक्य आसान। कथ छि जऻरी    

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

03.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

03.05.2022 वह्यक (वैशाख/बैसाख) ज़ूनॖ पछॖ (शुक्ल पक्ष) त्रय (तृतीया) बॊम्वार (मंगलवार), श्री सप्तर्षि सम्वत 5098, नक्षत्र रोहि, राश वृष (चलान) ऋतु ग्रीष्म (चलान)...चूंकि त्रय (तृतीया) छि ज़ॖ गछ़ान, ॳज़्युक वॊहरवोद यी पगाह

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

याम ॳस्य टनलि यपोर वऻत्य, त्राहि त्राहि रूद्य सऻरी करान, गाह सु गामुक ओस या शहरुक ओस। कुनवुहशथ तॖ नमतस मंज़ गव गश कुनुय। गश याने गाम तॖ शहर। बरादरन वॊन तीज़मालि। तीज़मालि थऺव कथ जऻरी यि वऺनिथ ज़ि नमतॖ प्यठॖ युस ति ज़न्मस आव तऺमिस हाबा छॆनॖ ब्वयी ज़ि कऺशीरि मंजं गाम कथ ॴस्य वनान तॖ शहर कथ ॴस्य वनान। तऺमिस आव नॖ वनॖनय ज़ऻनिथ मऻनिथ ज़ि तऺम्यसॖन्ज़ माजि ज़्यव छि कऻशिर। असि वॊन नॖ पनॖन्यन शुर्यन कऺशीरि मंज़ क़दमॖ पतॖ क़दमॖ मन्दरन मुतलक न वॊन तिमन हुन्द महत्व पनॖन्यन शुर्यन। चूंकि असि लॊग कॆंह समय पनुन पान संदरावनस मंज़, इस्तादॖ करनस मंज़ कऺशीरि हॖन्दि क़ॊहरामॖ मंज़ नेरनॖ पतॖ, सऻन्य शुर्य ति गऺयि बडान मगर असि ज़ोन नॖ शायद मुनऻसिब पनॖन्यन शुर्यन ह्यॆछनावुन ज़ि माजि ज़्यव ज़ानॖन्य कऻच़ाह ज़रूरी छि, तॖ न ज़ोन शायद मुनऻसिब शुर्यन परनस सॗत्य सॗत्य धर्मॖच तऻलीम दिन्य ति ॴस ज़रूरी। हालांकि असि नी यॊत वऺताथ यसलॖ आश्रम बनऻविथ तॖ कॆंह मन्दर ति बनऻविथ मगर सऻन्य शुर्य रूद्य महरूम अध्यात्मिकतायि निश। यॊत वऻतिथ लऺग्य ॳस्य पनॖन्यन शुर्यन हुन्द भविष्य छ़ान्डनस मंज़ मगर असि ह्यॆच नॖ तिमन सरकऻर्य नोकरी दिवॖनऻविथ, प्राइवेट नोकरी छ़ान्डान छ़ान्डान फऺल्य सान्यन शुर्यन पाद तॖ वऻत्य दूर दूर जायन, प्योख मजबूरन पंनुन मोल मऻज्य पानस निशि ब्यॊन थवुन। खान्दर करुन ति गोख दुशवार, खान्दर कऺरिथ ति आव नॖ वारिहान पानॖवुन्य गरॖ करनस वार। तलाकन रऺट रफ्तार। पर-ज़ऻच़ मंज़ रिश्तॖ बनावनॖच प्रथा आयि बारसस। गीर गऺयि गछ़ान सऻन्य शुर्य, परेशान गऺयि त्युहुन्द मोल मऻज्य। सऻन्य दऻद्य छु नॖ बोज़ान सोन सरकार। छ़ॊपॖ कऺरिथ बॆहनस छुनॖ असि वार। दयसं ख़बर कर लगि सऻन्य यीरवॖन्य नाव ति बॊठ। वॊन बरादरन तीज़मालि। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

02.05.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

02.05.2022 वह्यक (वैशाख/बैसाख) ज़ूनॖ पछॖ (शुक्ल पक्ष) द्वय (द्वितिय) च़ऺन्दॖरवार (सोमवार), श्री सप्तर्षि सम्वत 5098, नक्षत्र कृति, राश वृष (चलान), ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

बरादरन वॊन तीज़मालि ज़ि मऻजी कऺशीरि मंज़ ओस अख बदलय माहोल कुनवुहशथ तॖ नमतॖ ब्रोंह यॆमि माहोलॖच़ सान्यन ॳज़्यक्यन शुर्यन छॆ नॖ ब्वयी। च़ॖ क्याहबा छुख यछ़ान वनुन। तीज़मालि प्रुछ़ बरादरस। मऻजी च़्यॆ यॊदवय ज़्वन आसी कऺशीरि मंज़ युस शहरस मंज़ रोज़ान ओस गामस सॗत्य ओस नॖ तस ज़्यादॖतर कांह लेन-देनॖय आसान तॖ गामॖकिस ओस शहरस मंज़ नॊवुय आलम बासान। कऺशीरि मंज़ ॴस्य सऻनिस समुदायस मंज़ वारियाह तिम लूख ति शहरस या गामस मंज़ यिमव नॖ जवाहर टनल सारि वऻन्सि वुछमॖच़ॖय ॴस नमतस ताम। यूतुय योत नॖ बऺल्कि कऺशीरि मंज़ कऻशिर्य बटॖ गामन मंज़ कऻत्याह नऺविथ तॖ फ्वलिथ ॴस्य शहरकिस ओस नॖ अम्युक अन्दाज़ॖय। शहरकिस ॴस नॖ पतहॗय ज़ि कुस गाम कमि तरफॖ प्यवान छु। यि ज़ऻन्यकऻरी ॴस आसान खासकर तिमन यिम सरकऻर्य अदारन मंज़ नोकरी वख्तस मंज़ ॴस्य यिवान अकि जायि प्यठॖ ब्यॆयिस जायि तब्दील करनॖ। अथ सिल्सिलस मंज़ ॴस्य स्कूल मास्टर, कॏल्यॆज प्रौफेसर, बैंक मुलऻज़िम, वगैरा ज़्यादतर मुतऻसिर आसान। नबा तॖ च़्यॆ क्याज़ि तुजिथ यि कथ अज़। तीज़मालि प्रुछ़ बरादरस। बॖ ओसुस पनॖनि जायि सोंचान मऻजी ज़ि कोताह बदलाव आव असि पनॖनिस समुदायस मंज़ वुछान वुछान तॖ कथ फिज़ाहस मंज़ ॴस्य ज़ुवान कऺशीरि गामस या शहरस मंज़ तॖ कथ अज़ाबस मंज़ आयि ह्यनॖ नाहकॖ तॖ किथॖ पऻठ्य बदल्यॆयि कऻशिर्य बटॖसॖन्ज़ तस्वीर तॖ दावस लॊगुस पनुन तक्दीर। मगर सान्यन शुर्यन छॆनॖ पताह ज़ि तिहॖन्द्य ज़िठ्य कमि ॴश्य आरामॖ मंज़ आयि नीरिथ तॖ कमन तापॖ क्रायन मंज़ आयि तवनॖ तॖ सॗत्य सॗत्य रोव असि तत्युक हक़ हमसायि, माय महोब्बत,  मिलच़ार, मन्दर,  यारबल, आबशार, ब्ववली, पां-आरॖ, ततिक्य जानवर तॖ जानावार। ततिच पऺछ़्य-लऻज़्य। रोव असि सु गाम तॖ सु शहर। सोरुय छु याद यिवान तॖ ॳछ नम गछ़ान मगर बऻविथ नॖ ह्यकान। तति आयि च़ऺलिथ तॖ यॆति गऺयि रऺलिथ तॖ पकान छि ब्रोंह कुन पनुन बुथ प्रॊन कऺरिथ तॖ पनॖन्य माजि ज़्यव मऺशरिथ। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)