01.03.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

**********************

🙏🙏 नमस्कार माहरा

01.03.2022, फागुन (फाल्गुन) गटॖ पछॖ (कृष्ण पक्ष) च़्वदह (चतुर्दशी) बॊम्वार (मंगलवार), श्री सप्तर्षि सम्वत 5097, नक्षत्र धनिष्ट, राश कुम्भ (दु्हचि 04.31 बजि प्यठॖ), ऋतु शिशर (चलान)...द्रठॖपऻन्च़ुक (पंचक) शुरु 

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

सऻर्यसॖय मऺहलस लऺज्य ख़बर ज़ि माधव जुवनिस गरस मंज़ छु टेलीफोन। ॶमि म्वखॖ ति लॊग लूकन हुन्द युनगछ़ून। यपऻर्य ऒन ॳक्य बऻय नॊव बऻस्कलॖ तॖ सु ति ओस गऺर्य गरॖ बापथ अख नॊव चीज़। लॊक्चि कोरि ज़ॖ आसॖ बडॆमच़ॖ रछ़ा तॖ आसॖ सवऻर्य करान बऻस्कलस प्यठ बोबूजियस सॗत्य या बऻयसऻबस सॗत्य। टेलीफोन यथ मेज़स प्यठ ओस आमुत थवनॖ तथ मेज़स प्यठ ओस आमुत कऻम कऺरिथ मेज़पोश त्रावनॖ तॖ टेलीफोनस प्यठॖ ओस त्रऻविथ करोशी सॗत्य वूनमुत मेज़पोश। यिथय पऻठ्य आव बऻस्कलस ति रख रखाव करनॖ दपान केंच़स कालस। तीज़मालि वॊन बरादरस। आहनी मऻजी दपान छि नॊव चीज़ छु रोज़ान नवन दॊहन। बरादरन वॊन तीज़मालि। गरॖ नाव गऺयि पकान। बऺड हिश न्वश याने बाबी ॴस ब्यॆयि ज़ुवॖ। खान्दरॖच कथ वऺछ़ ब्यॆयि च़ूर्यमिस तॖ पॗन्च़िमिस न्यॆच्यवि सॖन्दि बापथ। मऺन्ज़िमयऻर्यसुन्द तॖ वार्यनिहुन्द युन गछ़ुन लॊग ब्यॆयि। लॊक्चि कोरि ज़ॖ आसॖ शॊंगान व्वथान बॖड्यबबस सॗत्य। सु ओस अनान रोज़ान केंछ़ा-मेछ़ा यिमन शुर्यन हॖन्दि बापथ। केंछ़ा-मेछ़ा किहे ओस आसान मऻजी। बरादरन प्रुछ़ तीज़मालि। त्यॆलि हाबा ओस आसान करॖ, मुठ, नदॖर्यम्वन्जि, बर्फी, फम्बॖ मिठऻय वगैरा वगैरा। यि नॖ ॳज़िच बलाय मस्लन मैगी, पास्ता, चौवमिन, मूमोज, कुरकुरे, चिप्स, नूडॖल्ज़ तॖ ब्यॆयि ति क्याहताम क्याहताम। आहनी मऻजी ॳज़्यक्यन शुर्यन आव यी बुथि तॖ तिम ति छि ॳथ्य मंज़ ख्वश। द्वश्यवॖय कॊर असुनाह। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - हेरथ कऺरिथ ॴस्य दॊयिमि दॊह बटॖ कऺशीरि मंज़ सलाम मनावान। अमि दॊह ॴस्य ज़िठ्य ज़िठ्य पनॖन्यन लॊक्ट्यन हेरथ खरॖच दिवान। ब्यॊन ब्यॊन व्यंजन ॴस्य यिवान बनावनॖ। कऺशीरि मंज़ ॴस्य हतन लुकन मंज़ॖ नमनमथ मांसाहऻरी याने न्यॆनि ख्यनॖवऻल्य। अवॖ म्वखॖ ओस ॳज़्यकि दॊह पुज्यन निशि स्यठाह बीरॖ लगान। रोगनजोश, कऺल्यि, मछ़, यखन्य, कबरगाह वगैरा वगैरा ओस यिवान बनावनॖ। बटॖ ॴस्य नॖ कऺशीरि मंज़ ज़्यादॖ चिकन याने क्वकर ख्यवान। मुस्लमान ॴस्य ज़्यादॖ क्वकरॖय ख्यवान रोज़ान। न्यॆनि ति ॴस्य ख्यवानॖय ख्यवान। हालांकि तिम ॴस्य सानि खॊतॖ अख ज़ॖ ज़ियाफतॖ ज़्यादय बनावान सु गव रिस्तॖ, ग्वशताबॖ। मुस्लमान ॴस्य यिवान मुबारक करनि। तिमन ति ॴस्य ॳस्य ख्यावान च्यावान। कॆंह नक़ॖद ति दिवान रोज़ान। शुर ॴस्य कऺशीरि मंज़ सिनिमा हालन मंज़ गऺछ़िथ फिल्मा विल्मा वुछान। यिथॖ पऻठ्य ओस कऺशीरि मंज़ हेरच़ हुन्द खुमार आसान। गरन मंज़ ॴस्य तासा-वासा ति गिन्दान रोज़ान। 

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak blogspot.com प्यठ ति)

28.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

28.02.2022, फागुन (फाल्गुन) गटॖ पछॖ (कृष्ण पक्ष) त्रुवाह (त्रयोदशी) च़ऺन्दॖरवार (सोमवार), श्री सप्तर्षि सम्वत 5097, नक्षत्र उ.षा, राश मकर (चलान) ऋतु शिशर (चलान)..अज़ छि हेरच़ॖ त्रुवाह

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

   महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

********************** 

त्र्यॆयमि न्वशि हुन्द कुस ताम ॴश्यनाव दपान ओसमुत ओस टेलीफोन मऺहकमस मंज़ नोकरी करान तॖ तऺम्यसॖन्दि मदॖद्तॖ सॗत्य लागनोव अमि त्र्यॆमि न्वशि वऻरिव गरस मंज़ टेलीफोन। यि टेलीफोन थवनोवुख माधव जुवनिस कुठिस मंज़। चूंकि टेलीफोन ओस स्यठाह कमन गरन मंज़ आसान कऺशीरि मंज़ तिमन दॊहन अवॖ म्वखॖ ॴस्य गरॖक्य सऻरी बऻच़ हिरासॖ सान टेलीफोनुक इस्तिमाल करान रोज़ान। तीज़मालि वॊन बरादरस। त्यॆलुक टेलीफोन तॖ ॳज़्युक मोबाईल। बरादरन वॊन असान असान तीज़मालि। ज़मीन आसमानॖच फरॖख। त्यॆलि ॴस्य अथॖ नटान टेलीफोन यान्य अथस मंज़ रटान ॴस्य। बरादरन पकनऻव कथ ब्रोंहकुन। म्यॆ छु याद प्यवान मऻजी ज़ि याम टेलीईफोनॖच गऺन्टी ॴस वज़ान सारिनी बऻच़न ॴस ज़न दॖनन हिश लगान। टेलीफोन तुलन वऻलिस ओस हडबऺडी मंज़ कुनि कुनि सातन कनुक पास ॴसस गछ़ान तॖ ॴसुक पास कनन। अथ वथ ॴसॖस नॖ यिवान। तीज़मालि वॊन बरादरस। आहनबा च्योन वनुन छु पॊज़। दफ तॗर ॴस फटान यॆलि टेलीफोनॖच गऺन्टी वज़ान ॴस। सऻरी गरॖक्य बऻच़ ॴस्य अख ॳकिस कुन वुछान रोज़ान तीतिस कालस यीतिस कालस कथ ॴस चलान रोज़ान। सोंचान ॴस्य पनॖनि पनॖनि जायि ज़ि रॖच़ शॆछ गऺछ़ आसॖन्य। कथ करन वऻल्यसॖन्दिस बुथिस कुन ॴस्य वुछान रोज़ान याने बुथिच आय त्राय। बुमॖ त्रकरऻविथ छा कथ करान किनॖ ड्यकॖ मुच़रिथ छु। तऺम्यसॖन्दि बुथ्यचि त्रायि सॗत्य ॴस बऻच़न हॖन्ज़ बुथिच त्राय ति बदलान रोज़ान। यि वऺनिथ च़्यॆ शुराह आनॖ कथ। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

""""""""""""""""""""""""""""""""""

कऺशीर - अज़ छु व्वंय पूज़ायि हुन्द दॊह। सुबॖ प्यठय ॴस व्वसॖ द्रॏसॖ रोज़ान कऺशीरि मंज़ वख अकि। छलुन छॊकुन, लिवुन डुवुन, नावुन सावुन, पोश पुच़ॖन्य, पोशॖ मालॖ तयार करनि,आरि बनावनि, वुसॖर्य तयार करॖन्य, सब्ज़ी च़ारॖन्य, ब्यॊन ब्यॊन ज़ियाफतॖ तयार करनि, दमोलु, च़ामन, मॊन्जि, हाक्, च़ॊक्य वांगन, नदॖर्य यखन्य। फाकॖ वाल्यन हॖन्दि बापथ गारि पूर्य, तऺलिथ ओलव, म्यवॖ, वगैरा वगैरा। रऻत्य रातस ओस ॳज़्यकि दॊह शॊरॖगुल आसान शेंकॖ शबुद, गन्टायि हॖन्ज़ आवाज़  कऺशीरि मंज़ अज़ द्वयत्रॖह वऺरी ब्रोंठ मगर अज़कल छु नर्म माहोल प्रथ रंगॖ। शुर्यव रऺन्ग्य ज़्यादय पाहन। ख़ास कर यॆमि वऺरियि। ईम्तिहानन छि दपान थऻव्यमॖत्य सऻरी शुर्य आवॖर्य तॖ महामऻरी छि कऺर्यमॖत्य ॳस्य सऻरी अख ॳकिस निशॖ दूर स्यठाह दूर तॖ छि मजबूर। रसॖम छु मगर निबावुन। पूज़ा छि अंद वातॖनावॖन्य। शिव जियस छि पार्वती हवालॖ करॖन्य तॖ त्युहुन्द ॴशिर्वाद छु रटुन त्वहि ति तॖ म्यॆति। त्वहि सारिनी ॳज़्यकि दुहुक मुबारक।

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

27.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

26.02.2022 फागुन (फाल्गुन) गटॖ पछॖ (कृष्ण पक्ष) दऺहम (दशमी) देवादेव बटॖवार (शनिवार/शनिश्चरवार) श्री सप्तर्षि सम्वत 5097, नक्षत्र मूल राश धनु (चलान) ऋतु शिशर (चलान)...अज़ छि हुर्य दऺहम याने द्यारॖ दऺहम या बुनिल दऺहम

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

त्रॆयिम न्वश ति आयि माधव जुवनिस गरस मंज़। ल्वक्ट्यन द्वन शुर्यन ति ओसुन कॊठ ह्यॊतमुत युन। गरॖच ज़िम्वऻरी ति ॴस रऺटमॖच़ बड्यव दॊयव न्यॆचव्यव। न्यॆचव्यन हुन्द तनख्वाह ऱयतॖ पतॖ युस माधव जुव   आमुत ओस रटान, सु तनख्वाह ह्यॊत माधव जुवन न्यॊचव्यन हॖन्द्यन अथन मंज़ हवालॖ करुन यि वऺनिथ ज़ि फॊज़ूल खर्चॖ निशि परहेज़ करुन, ख़राब आदत नॖ नऻल्य छ़ॖनॖन्य। तिमव ति रऺट मऻल्यसॖन्ज़ नसीहथ सद्बावॖ सान तॖ ह्यॆच़ॖख गरॖच नाव ब्रोंह कुन रऺलिथ मीलिथ पकनावॖन्य। तीज़मालि वॊन बरादरस। मऻजी म्यॆ छु बूज़मुत तॖ वुछमुत। क्याह सना। प्रुछ़ यक दम तीज़मालि। यिहऻय ज़ि कऺशीरि मंज़ ॴस्य कऻशिर्य बटॖ वख अकि स्यठाह स्यॆद्य, संस्कऻर्य, आज्ञाकऻर्य तॖ अध्यात्मिक याने पाठ पूज़ा करान रोज़ान। आहनबा ति छु पॊज़। मऻज्य सरस्वती ति ॴसॖख तवय टोठेमॖच़, लक्ष्मी ति ॴसॖख सॗत्य सॗत्य रूज़िथ। दफ अमा पॊज़ मुसलमानन हॖन्ज़ सॊहबत ति ॴसॖख ह्यॆच़मॖच़ लारॖन्य कम ज़्यादॖ। तीज़मालि कऺर कथ पूरॖ। आदबी तॖ मऻजी स्व त्रॆयिम न्वश ॴसॖखा सना प्येमॖच़ मनस मुवऻफिकॖय। बरादरन यॊछ़ ज़ानुन। तीज़मालि वुछ बरादरस  कुन तॖ त्रऻवॖन लॊत पऻठ्य असुनाह। कथ छि जऻरी  

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - वातान वातान वऻत्य ॳस्य ॳज़्यकिस दॊहस ताम यथ वनान छि द्यारॖ दऺहम। राथ ॴस नवम तॖ दपान हुर्य नवम ॴस्य वनान टठिल नवम ति। यि नाव क्याज़ि ओस प्योमुत तॖ करॖ प्यठॖ ओस प्योमुत ख़बर छॆ नॖ। ॳज़्यकिस दॊहस छु यि नाव प्योमुत दपान चूंकि यिम ज़नानॖ माल्युन आसॖ गछ़ान सातॖ बापथ सतम या ॴठम दॊह तिम आसॖ वापस पनुन गरॖ याने वऻरिव गरॖ यिवान नकॖद तॖ जिनॖस यथ याने शऺगुन ह्यथ मस्लन अतगथ, नून, च़ॊचि, हेरऺच़ बोग, मिठऻय, वगैरा वगैरा तवॖ म्वखॖ दपान ॴस्य ॳज़्यकिस दॊहस वनान  द्यारॖ दऺहम। द्यारन सॖत्य सॗत्य दपान नवि न्वशि आसॖ गिन्दन हारॖ ति अनान रोज़ान। यथ दॊहस दपान ॴस्य वनान बुनिल दऺहम ति युस अख रोमऻनी नाव ओस यिवान मानॖनॖ। हिसऻबी यॊदवय वुछव तॖ हेरथ छि ॳज़्यकि प्यठॖ गछ़ान शुरू ति ज़न गव ज़ि ठोकुर कुठिक्य बानॖ बठॖ छलॖन्य छॊकॖन्य। हवन सामग्री साफ़ करॖन्य, पूज़ायि सामान सॊम्बरावुन। वुसुर्य बनावॖन्य, आरि बनावनि वगैरा वगैरा हालांकि अज़कल छि यिम सऻरी चीज़ व्वंय बऺनी बनऻयी मेलान बाज़रस मंज़। असि पज़न पनॖन्यन शुर्यन ताम यिम कथॖ वातॖनऻवनि।   

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

26.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

26.02.2022 फागुन (फाल्गुन) गटॖ पछॖ (कृष्ण पक्ष) दऺहम (दशमी) देवादेव बटॖवार (शनिवार/शनिश्चरवार) श्री सप्तर्षि सम्वत 5097, नक्षत्र मूल राश धनु (चलान) ऋतु शिशर (चलान)...अज़ छि हुर्य दऺहम याने द्यारॖ दऺहम या बुनिल दऺहम

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

त्रॆयिम न्वश ति आयि माधव जुवनिस गरस मंज़। ल्वक्ट्यन द्वन शुर्यन ति ओसुन कॊठ ह्यॊतमुत युन। गरॖच ज़िम्वऻरी ति ॴस रऺटमॖच़ बड्यव दॊयव न्यॆचव्यव। न्यॆचव्यन हुन्द तनख्वाह ऱयतॖ पतॖ युस माधव जुव   आमुत ओस रटान, सु तनख्वाह ह्यॊत माधव जुवन न्यॊचव्यन हॖन्द्यन अथन मंज़ हवालॖ करुन यि वऺनिथ ज़ि फॊज़ूल खर्चॖ निशि परहेज़ करुन, ख़राब आदत नॖ नऻल्य छ़ॖनॖन्य। तिमव ति रऺट मऻल्यसॖन्ज़ नसीहथ सद्बावॖ सान तॖ ह्यॆच़ॖख गरॖच नाव ब्रोंह कुन रऺलिथ मीलिथ पकनावॖन्य। तीज़मालि वॊन बरादरस। मऻजी म्यॆ छु बूज़मुत तॖ वुछमुत। क्याह सना। प्रुछ़ यक दम तीज़मालि। यिहऻय ज़ि कऺशीरि मंज़ ॴस्य कऻशिर्य बटॖ वख अकि स्यठाह स्यॆद्य, संस्कऻर्य, आज्ञाकऻर्य तॖ अध्यात्मिक याने पाठ पूज़ा करान रोज़ान। आहनबा ति छु पॊज़। मऻज्य सरस्वती ति ॴसॖख तवय टोठेमॖच़, लक्ष्मी ति ॴसॖख सॗत्य सॗत्य रूज़िथ। दफ अमा पॊज़ मुसलमानन हॖन्ज़ सॊहबत ति ॴसॖख ह्यॆच़मॖच़ लारॖन्य कम ज़्यादॖ। तीज़मालि कऺर कथ पूरॖ। आदबी तॖ मऻजी स्व त्रॆयिम न्वश ॴसॖखा सना प्येमॖच़ मनस मुवऻफिकॖय। बरादरन यॊछ़ ज़ानुन। तीज़मालि वुछ बरादरस  कुन तॖ त्रऻवॖन लॊत पऻठ्य असुनाह। कथ छि जऻरी  

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - वातान वातान वऻत्य ॳस्य ॳज़्यकिस दॊहस ताम यथ वनान छि द्यारॖ दऺहम। राथ ॴस नवम तॖ दपान हुर्य नवम ॴस्य वनान टठिल नवम ति। यि नाव क्याज़ि ओस प्योमुत तॖ करॖ प्यठॖ ओस प्योमुत ख़बर छॆ नॖ। ॳज़्यकिस दॊहस छु यि नाव प्योमुत दपान चूंकि यिम ज़नानॖ माल्युन आसॖ गछ़ान सातॖ बापथ सतम या ॴठम दॊह तिम आसॖ वापस पनुन गरॖ याने वऻरिव गरॖ यिवान नकॖद तॖ जिनॖस यथ याने शऺगुन ह्यथ मस्लन अतगथ, नून, च़ॊचि, हेरऺच़ बोग, मिठऻय, वगैरा वगैरा तवॖ म्वखॖ दपान ॴस्य ॳज़्यकिस दॊहस वनान  द्यारॖ दऺहम। द्यारन सॖत्य सॗत्य दपान नवि न्वशि आसॖ गिन्दन हारॖ ति अनान रोज़ान। यथ दॊहस दपान ॴस्य वनान बुनिल दऺहम ति युस अख रोमऻनी नाव ओस यिवान मानॖनॖ। हिसऻबी यॊदवय वुछव तॖ हेरथ छि ॳज़्यकि प्यठॖ गछ़ान शुरू ति ज़न गव ज़ि ठोकुर कुठिक्य बानॖ बठॖ छलॖन्य छॊकॖन्य। हवन सामग्री साफ़ करॖन्य, पूज़ायि सामान सॊम्बरावुन। वुसुर्य बनावॖन्य, आरि बनावनि वगैरा वगैरा हालांकि अज़कल छि यिम सऻरी चीज़ व्वंय बऺनी बनऻयी मेलान बाज़रस मंज़। असि पज़न पनॖन्यन शुर्यन ताम यिम कथॖ वातॖनऻवनि।   

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

25.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

25.02.2022, फागुन (फाल्गुन) गटॖ पछॖ (कृष्ण पक्ष) नवम (नवमी) देवादेव शॊकुरवार (शुक्रवार/जुम्मा/भार्गववार), श्री सप्तर्षि सम्वत 5097, नक्षत्र ज्येष्ठ,राश धनु (दुहचि 12.07 बजि प्यठॖ), ऋतु शिशर (चलान)...अज़ छि हुर्य नवम

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

ब्यॆयि द्राव समय कॆंह ज़ि माधव जुवनिस गरस मंज़ ह्यॆच़ॖन बदलावॖच लहर हिश यिन्य। तीज़मालि वॊन बरादरस। किछ़ हिश लऺहर तॖ क्युथ ह्यु बदलाव मऻजी। बरादरन प्रुछ़ तीज़मालि। तीज़मालि कऺर वखनय पनॖनिस वनॖनस। गरस मंज़ बदलाव युन हाबा छु नॖ नॊव चीज़ कॆंह। वख्तस सॗत्य सॗत्य गरन मंज़ बदलाव युन छु रूदमुत पुशतव प्यठॖ चलान आमुत। तिथय पऻठ्य आव माधव जुवनिस गरस मंज़ ति यि बदलाव। तीज़मालि थऻव कथ जऻरी। ग्वडॖ ओस माधव जुव युस नोकरी हॖन्दिस सिल्सिलस मंज़ आमुत ओस वऺड्यपोरि गामॖ प्यठॖ श्रीनगर शहर कुन पनॖन्य आश्यन ह्यथ। पथकुन ओसुन त्रोवमुत अख बॊड परिवार याने पनुन मोल मऻज्य, बऻय ब्यॆनि, तिहॖन्द्य शुर्यकऺट्य।  शहर यिथ ह्यॊतुन पनुन अयाल बऺडरावुन तॖ ज़ायस सथ शुर्य। गरस मंज़ आस बदलाव। शुर्य गऺयि बडान तॖ बडान गऺयि पानॖ ति शुर्यन सॗत्य सॗत्य। ग्वडॖ ॴस्य बऻच़ ज़ॖ पतॖ गऺयि बडान बडान तॖ ॳथ्य गरस मंज़ ॴस्य वख अकि नव बऻच़। बदलाव आव यॆलि द्वन कोर्यॆन खान्दर कॊरुन तॖ कॊर्यॆन हॖन्ज़ कमी खलेयख ति क्याज़ि दपान कॊरि छि गरन मंज़ रोनक आसान। यिम कामि कोरि गरन मंज़ करान रोज़ान छि न्यॆचिव छि नॖ ह्यकान कऺरिथ। ति छु पॊज़। बरादरन वॊन तीज़मालि। दपान न्यॆचिव छि लटर मस्त आसान तॖ कूर छि गरस मंज़ सज्जावठ आसान। बरादरन बऺडरऻव कथ ब्रोंहकुन। तॖ बदलाव रूद यिवान वख्तस सॗत्य सॗत्य। द्वन  कॊर्यन हॖन्दि वऻरिव नेरनॖ सॗत्य ॴस्य माधव जुवनिस गरस मंज़ सतय बऻच़ यॊताम गरस मंज़ दॊयव न्वश्यव क़दम त्रोव। ब्यॆयि बन्यॆयि नव बऻच़ बऺल्कि हुर्यर सपद्योख दॊयव नवजात शुर्यव सॗत्य। गरॖ बास्यव ब्यॆयि बॊड बॊड। असवुन तॖ गिन्दवुन। कथ छि जऻरी।  

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

""""""""""""""""""""""""""""""""""

कऺशीर -  द्वयत्रॖह वऺरी गऺयि अख वऻन्सा अख। सोन शुर कूर या न्यॆचुव युस ज़न्मस आमुत छु कुनवुहशथ तॖ नमतॖ पतॖ कऺशीरि न्यबर या सु शुर युस कुवुहशथ तॖ नमतस मंज़ च़ुवुहुर या पऻन्च़ॖवुहुर ओस तऺमिस आसि नॖ खबरॖय ज़ि ॳस्य कऻशिर्य बटॖ क्याह क्याह ॴस्य करान रोज़ान कऺशीरि मंज़ हेरच़ॖक्यन दोहन या कावॖ पुनिम प्यठॖ तीलॖ ॴठम ताम। म्यॆ छु बासान ज़ि मऻलिस माजि पज़ि पनॖनिस शुरिस खुलॖ पऻठ्य या व्यस्तऻरिथ वनुन ज़ि वंदॖक्यन यिमन दॊहन मंज़ कऻच़ाह कठिन कऻम ॴस असि, सान्यन गरिक्यन बऻच़न, ल्वक्ट्यन बड्यन खासकर ज़नानन तॖ तिम कामि कऺर्य कऺर्य ॴस्य हेरऺच़ हॖन्ज़ पूज़ा करान तॖ बासान ओस ज़ि असि मनोव अख बॊड त्योहार यथ वनान छि महा शिव रात्रि या हेरथ। सोन वऺरियुक बॊड दॊह। यॊत ताम नॖ ॳस्य पनॖन्यन शुर्यन वनव अथ मुतलक म्यॆ बासान तॊत ताम छि नॖ ॳस्य पनॖन्यन शुर्यन तिहॖन्द्यन संस्कारन सॗत्य ज़ऻन्यकऻरी करनावनॖच कूशिश करान।

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

24.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

24.02.2022, फागुन (फाल्गुन) गटॖ पछॖ (कृष्ण पक्ष) ॴठम (अष्टमी) देवादेव, ब्रसवार (गरूवार/वीरवार/ब्रहस्पतवार) श्री सप्तर्षि सम्वत 5097, नक्षत्र अनुं, राश वृश्चिक (चलान) ऋतु शिशर (चलान)...अज़ छि हुर्य ॴठम

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

शुर्य ज़ॖ गऺयि फऻन्फलान, हशि प्यव मंज़ॖ मंज़ॖ कामि हुन्द बार च़ालुन तॖ न्वश्यव ह्यॆच़ गरॖच लाकम रटॖन्य वतीरॖ वऺतीरय। वख गव नेरान तॖ त्र्यॆमिस न्यॆचविस ति गव खान्दर सऺही। तीज़मालि वॊन बरादरस। च़ूरिम तॖ पॗन्च़िम न्यॆचुव ति बन्याव स्कूल मास्टर कथ ताम स्कूलस मंज़ दपान सु स्कूल मा ओसमुत ओस गरस नऺज़्यदीखॖय। बरादरन वॊन तीज़मालि ज़ि तिमन दॊहन ओस स्कूलुक वखत ति आसान दहि प्यठॖ च़्वन बज्यन ताम। अवॖ म्वखॖ दपान सऻरी नोकरी पेशॖवऻल्य ॴस्य सुबहन नवि बजि बतॖ ख्यथ दफ्तर गछ़ान रोज़ान तॖ मास्टर ति ॴस्य सुबहन नवि बजि प्यठॖ शामन च़्वन बज्यन ताम न्यबरॖय आसान। बरादरन वॊन तीज़मालि ज़ि मऻजी म्यॆ बासान यि तरीकॖ ओस स्यठाह जान। आहनबा म्यॆति बासान ज़न सु वख ओस जान ति क्याज़ि ज़नानन ओस मेलान स्यठाह समय गर काम्यन अंद वातनावनॖ बापथ। मस्लन लिवुन डुवुन, त्वमुल छ़टुन शेरुन, त्वमुल च़ारुन, ओट छानुन, ग्रटस मंज़ कॖनॖख प्युहुन, कऺज़स मंज़ मर्च़ॖवांगन दगॖन्य, पलव छलॖन्य, पलवन, कुन्द्य करॖन्य वगैरा वगैरा। बरादरन च़ऺट कथ मंज़य ज़ि मऻजी कम कऻम नय ॴस आसान मटि गरि बिहिथ ज़नानन। हतबा सास कामि ओस आसान। पतॖ गऺयो सलयि कऻम, करोशी कऻम, सॖच़नि कऻम, सिलायि कऻम। तीज़मालि वॊन बरादरस। ख़बर यिम सारेयि कामि ज़न गऺयि व्वंय गऻबॖय। गऻबॖय नाबग़ा गऺयि नॖ दफ अमापॊज़ यिम कामि आयि व्वंय बापारस मंज़ तॖ नव्यव मिशीनव थऻव्य प्रऻन्य प्रऻन्य चीज़ लबि ताकस। तीज़मालि कऺर कथ पूरॖ। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - हुर्य ॴठम दॊह ओस वख अकि कऺशीरि मंज़ हारी पर्बत याने च़क्रीश्वरॖ रऻत्य रातस बजन कीर्तन चलान रोज़ान, पॊखरीबलॖ ति ॴस बजन मंडली बजन कीर्तन रोज़ान करान। दूर दूर ताम ॴस आवाज़ ग्रज़ान रोज़ान। बखॖत्य ॴस्य दूर दूर अलाकव प्यठॖ यिवान रोज़ान तॖ मातायि हॖन्दिस दऱबारस मंज़ पनॖनि बख्ति बावॖ सॗत्य महफिल रऺन्गीन बनावान। मॊगॖल्य चाय तॖ कुल्चिवऺर्य ॴस यिवान दिनॖ बऺख्त्यन। यूत शोरोगुल तमि वख्तॖ ओस आसान हुर्य ॴठम दॊह हारी पर्बतॖक्यन वतन गणिष्यबलॖ प्यठय त्यूतुय सुनसान म्यॆ बासान आसि अज़कल तिमन वतन ति क्याज़ि कऺशिर्य बटॖ छि आमॖत्य सऻरी च़ऺलिथ कऺशीरि प्यठॖ अज़ द्वयत्रॖह वऺरी ब्रोंठ तॖ यॊदवय वुनि कांह रोज़ान ति आसि कऺशीरि मंज़ अज़कल सु आसि नॖ बऺहरान कुन ज़ोन तिमन वतन पकनस। ख़ोफ़ तॖ दऺहशतन थऻव्य ॳस्य च़क्रीश्वरस निशि दूर मगर सऻनिस हृदयस मंज़ छु माजि शारिकायि हुन्द नूर बरपूर। ब्यॆयि वातव माजि हॖन्द्यन च़रणन तल जल्दॖय ओसय तस मन्ज़ूर।

**********************

नऺविव तॖ फॊलिव

भूषण कौल "दीप"  

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

23.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

23.02.2022, फागुन (फाल्गुन) गटॖ पछॖ (कृष्ण पक्ष) सतम (सप्तमी) देवादेव ब्वदॖवार (बुधवार),श्री सप्तर्षि सम्वत 5097, नक्षत्र विशा, राश वृश्चिक (सुबहॖचि 08.56 बजि प्यठॖ), ऋतु शिशर (चलान)....अज़ छि हुर्य सतम

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

माधव जुवनि गरि रूदमुत ओस दपान चुर्यग्यॊश सुब प्यठॖ शाम ताम। सु गव ज़ि सऻम्पॖकुज याने माधव जुवॖन्य ज़नान ॴस न्यॆन्दरि व्वथान प्रबातन पान्च़ि बजि तॖ ॴस बुथ अथॖ छऺलिथ ब्रांदॖ फश दिवान। चूंकि हशि मऻज ॴस सुलि हुश्यार सप्दान न्वश्यन प्यव पनुन न्यॆन्दरि व्वथनुक समय हशि हॖन्दिस समयस सॗत्य मिलावुन तॖ ह्यच़न दपान तिम ति प्रबातनॖय न्यॆन्दरि व्वथनि। तमि वख्तॖ दपान ओस हय्या, बय बीम ति ओस तॖ यि हश ह्युहॖर करिहे या वनिहे ति ओस बनान न्वशि न्यॆचवॖ सॖन्दि बापथ ह्वकुमस बराबर। शुर्य ज़ॖ ॴस्य न्यदरि वऺथित थवान सारिनी आवॖर्य पनॖनि शुर्य बाश्यन सॗत्य। गरस मंज़ रूद केंच़न नफ़रन हुन्द युन गछ़ुन लगातार। तीज़मालि वॊन बरादरस कुन। कमनॖय नफ़रन हुन्द युन गछ़ुन। बरादरन प्रुछ़ तीज़मालि। तीज़मालि द्युतनस जवाब ज़ि बोज़ान ॴसॖस ज़ि क्वलॖ ब्रहमुण, वार्यॆन्य, मन्ज़िमयोर, ज़ामतॖर्य द्वन कोर्यन हॖन्द्य, न्वश्यन हॖन्दि माल्यन्यव प्यठॖ ख़बर अतर ह्यनॖ वऻल्य, माधव जुवस निश अर्ज़ी वर्ज़ी लेखनावन वऻल्य वगैरा वगैरा। दफ माधव  जुवनि गर्युक दरवाज़ॖ ओस मुच़रऻविथॖय आसान। बरादरन कऺर कथ पूरॖ। तीज़मालि वॊन बरादरस। आहनबा दपान यथ गरस बर आसि ॴठ पऺहर यलय   तथ गरस मंज़ छि दीवी दीवता वास करान रोज़ान। तॖ यथ गरस पॊछ़ लॊछ़ यिवान छु दपान भगवान छु दर्शुन दिवान ज़न। बरादरन वॊनॖनस वापस। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - वख अकि ओस कऺशीरि मंज़ सारिनी शुर्यन हेरच़ ब्रोंठुय सालाना इम्तिहान आसान तॖ सऻरी शुर्य ॴस्य बॆ-फ्रूक पऻठ्य हेरऺच़ व्वत्सवुक परिपूर्ण लुतुफ तुलान रोज़ान याने गरचि काम्यन सॗत्य सॗत्य हारन गिन्दुन, असुन द्रॊकुन वगैरा। मगर पतॖ कॊर सरकारन फऻस्लॖ ज़ि सालाना इम्तिहान यिन ह्यनॖ हेरच़ पतॖ याने नवम्बर बजाय मार्च अप्रैलस मंज़। ॳम्य फऻस्लन थऺव्य सऻरी शुर्य कऺशीरि मंज़ आवॖर्य पनॖनिस परनस सॗत्य तॖ इम्तिहानॖच तयऻरी करनस मंज़। यि बन्यऻव अख ख़ास वजह ज़ि शुर्यन हॖन्ज़ शमूहलियथ ह्यॆच़ॖन छ़ॊकॖन्य वारॖ वारॖ। चूंकि कुनि ति महफिलि छि शुर्यी रंग खारान तॖ शुर्यव रॊस स्व महफिल छि मऺदरेरॖ रॊस चाय या नूनॖ रॊस स्युन बासान तॖ छि बंगॖज़ऺर गछ़ान। दॊयिमि तरफॖ ह्यच़न ज़ानि दय क्याज़ि कऺशीरि मंज़ हारॖ बाज़रॖ मंज़ॖ गऻब गछ़नि तिथय पऻठ्य यिथ पऻठ्य कऺशीरि मंज़ॖ क्रॖहिन्य कनॖगॖछ ह्यॆतिन नायाब सपदॖन्य। यिथॖ पऻठ्य गव हेरऺच़ हुन्द सु वलॖवलॖ कम गछ़ान तॖ पऺत्यम्यव द्वयत्रॖहव वऺरियव प्यठॖ रूद नॖ हेरथ मनावनुक सु आनन्द तॖ न सु अन्दाज़। न रूज़ स्व फुर्सथ न सु स्कून्। हालांकि हेरथ छि मनावान मगर तथ हेरऺच़ तॖ यथ हेरऺच़ मंज़ छि ज़मीन आसमानॖच फरॖख

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

22.02.2022

21.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

21.02.2022, फागुन (फाल्गुन) गटॖ पछॖ (कृष्ण पक्ष) पऻन्च़म (पंचमी) च़ऺन्दॖरवार (सोमवार), श्री सप्तर्षि सम्वत 5097, नक्षत्र चित्रा, राश तुला (चलान), ऋतु शिशर (चलान)...अज़ छि हुर्य पऻन्च़म

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

हय तिमन वारिन्यन क्याह मेहनॖतानॖ ॴस्य दिवान। यॊदवय कूर ॴस ज़्यवान तॖ सऻरी गरिक्य बऻच़ ॴस्य ख्वश गछ़ान मगर व्वश त्रऻविथ तॖ वारिनि ॴस्य दिल मलूलॖ सान दिवान त्वमलॖ लॊंगुन तॖ काह रॊपियि तॖ यॊदवय न्यॆचुव ज़्यॆविहे सऻरी बऻच़ गरिक्य ॴस्य ख्वश गऺछ़िथ व्वटॖ तुलान। वारिनि ति ॴस्य असान असान त्वमलॖ लॊंगॖन्य जोराहं दिवान तॖ नकॖद ति ॴसिस बऺडरऻविथ अक्वुह या अक्वनज़ाह रॊपियि दिवान। ती छुम बुज़मुत। तीज़मालि वॊन बरादरस। बरादरन प्रुछ़ हऻरऻन्यगी सान तीज़मालि। मऻजी च़ॖ छखा यि पॊज़ वनान। काहन या अक्वनज़ाहन रॊपियन मंज़ ॴसा यि वार्यॆन यीच़ संजीदॖ कऻम करान। हे भगवानॖ। अज़कल छि अख शुर ज्यवनस सासॖ बऺद्य लगान। तवय छि नॖ म्यॆ बासान अज़कल शुर्य ज़्यादॖ थवान। बरादरन वॊन तीज़मालि। तमि अलावॖ हाबा छु ब्याख वजह ति शुर्य न थावनुक रूदमुत। तीज़मालि वॊन बरादरस। सु क्याह सना। बरादरन प्रुछ़नस। कोर्यन हुन्द ज़्यादॖ परुन, नोकरी करॖन्य, लॊत रोज़ुन वगेरा वगेरा। सोंचस मंज़ आव बदलाव। शुर रछुन गव द्रॊग, परनावुन गव द्रॊग, रंछनवऻल्यसॖन्ज़ व्यछ़य। तीज़माल गऺयि वनान तॖ बरादर गव बोज़ान। कथ च़ऺटॖन मंज़य। मऻजी अथ लॊंगनस मंज़ कोताह त्वमुल ओस वातान। लॊंगुन हाबा ओस आसान द्वयव कॖस्मव याने ल्वकुट तॖ बॊड। ल्वकटिस ओस वातान त्वमुल मनुट याने ड्वड सेर तॖ बऺडिस ओस वातान पान्ज़ुव त्वमुल याने डाय-सेर। आदबी मऻजि च़ॖ ॴसॖख वनान अज़कल शुर्य न थावनॖक्य वजूहाथ। ति छु पज़र मऻजी। कुस छु ह्यवान यीच़ ह्वदॖहऺर व्वंय। सऻरी छि पनुन पान लॊच़ॖरऻविथ पकान। कथ छि जऻरी   

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - यिमन हारन शकॖल ॴस आसान डऺज्यमॖच़ तिमन ॴस्य पनॖनि पनॖनि आकारॖ मुतऻबिक नाव थवान। मस्लन क्रऺन्ड, म्वन्जॖटॖ, म्वजान्टॖ, ॳछुल, दु-ॳछुल, खॊर, कालॖ, खरान्टॖ, व्यठॖ, ज़ुहाकॖ, नूल वगैरा वगैरा। गिन्दनॖ ब्रोंह ॴस सऻरी पनुन पनुन बॊतुल कडान तॖ तिमव बॊतुलव मंज़ यथ बोतुलस बुथ ह्यॊर कुन रोज़िहे तऺम्यसॖन्दि प्यठ ओस गिन्दुन गछ़ान शुरु।गिन्दनस ति ॴस्य ब्यॊन ब्यॊन वतीरॖ। आरॖ क्वन्डुल कऺरिथ ॴस्य सऻरी बिहान तॖ तथ आरॖक्वन्डलस मंज़ ॴस्य ॴठ दऺह गिन्दनवऻल्य आसान तॖ च़ेर च़ेर ताम ॴस्य गिन्दान रोज़ान। सु समा ओस नेरान असान गिन्दान। ख्वश तॖ ख्वशहाल पऻठ्य। कांह ओस ज़ेनान तॖ कांह ओस हारान। 

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

20.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

20.02.2022, फागुन (फाल्गुन) गटॖ पछॖ (कृष्ण पक्ष) च़ोरम (चतुर्थी) आथवार (रविवार/ऐतवार), श्री सप्तर्षि सम्वत 5097, नक्षत्र हस्त, राश तुला (रऻच़ हॖन्ज़ि 10.31 बजि प्यठॖ), ऋतु शिशर (चलान)...अज़ छि हुर्य च़ोरम, अज़ छि संकट च़ोरम (संकट निवारण चतुर्थी) ति...ज़ून खसि 10.02 बजि

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

माधव जुवनि गरि दॊद ज़ूरि च़ोंग। तीज़मालि वॊन बरादरस। ज़िछ्यन द्वश्यवॖन्य न्वश्यन ज़ायि अख ॶख शूर्यहेन। बरादर गव ख्वश यि बूज़िथ तॖ प्रॖछ़ुन तीज़मालि। अछा। न्यॆचवॖय ॴस्या। बरादरन यॊछ़ ज़ानुन। नबा दपान द्वश्यवय आसॖ कोरि आमॖच़ ज़न्मस। जवाब द्युत तीज़मालि। आहनी कूर या न्यॆचुव। शुर गव शुरुय। शुर छु गरस मंज़   रोनक आसान मऻजी। तिहाबा छु पॊज़ मगर तमि वख्तॖ दपान यिमन चीज़न मंज़ ॳस्य लूख हना ज़्यादय पाहन सनान रोज़ान। ख़बर क्याज़ि। बरादरन प्रुछ़ यि सवाल तीज़मालि। वारियाह कारण हाबा छि रूद्यमॖत्य दपान तमि वख्तॖ। तीज़मालि वॊन बरादरस। म्यॆ बासान यिम शुर्य आसन वार्यनिहॖन्दि अथय ज़ामॖत्य। बरादरन कॊर दॊयिम सवाल। आहनबा   डाक्टर ॴस्य कमॖय पाहन। मऻजी यिमन वार्यन्यन क्याह सना ॴस्य मॆहनतानॖ दिवान तमि वख्तॖ। च़्यॆ छुये कॆंह ज़्वन। आहनबा पूरॖ पऻठ्य। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - वख अकि ॴस्य कऺशीरि मंज़ हेरच़क्यन दॊहन ल्वकॖट्य बऺड्य हारन गिन्दान रोज़ान। हुर्य ऒक्दॊह प्यठॖ डून्य मावसि ताम ओस यि गिन्दुन रोज़ान। तिमन दॊहन आसॖ कऺशीरि मंज़ हारॖ सौलबव सौलबव मेलान तॖ कऻशिर्य बटॖ ॴस्य ह्यवान रोज़ान मऺल्य हारॖ तॖ ॴस्य थवान ग्वच़रि मंज़। ॳड्य ॴस्य थवान मोज़ॖ-ख्वरन मंज़, फ्यरनॖ चन्दन मंज़ या ल्कट्यन ठेलन मंज़ यथ कऻशिर्य पऻठ्य वनान छि ग्वच़ॖर। च़ोर हारॖ गऺयो अख च़ाख। च़ाख माने च़ोर। पांछ़, दऺह, पन्दह, वुह, त्रॖह, च़तजिह च़ाख ताम हारॖ आसॖ आसान ॳकिस ॳकिस गिन्दनवऻलिस निश। यिमन हारन मंज़ यथ हारि शकॖल आसिहे आसान डऺज्यमॖच़ हिश तथ हारि ॴस्य वनान बॊतुल तॖ ओस तिमन हारन ब्यॊन ब्यॊन नाव दिनॖ।

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

19.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

19.02.2022, फागुन (फाल्गुन) गटॖ पछॖ (कृष्ण पक्ष) त्रय (तृतीया) बटॖवार (शनिवार/शनिश्चरवार), श्री सप्तर्षि सम्वत 5097, नक्षत्र उ.फा, राश कन्या (चलान) ऋतु शिशर (चलान)...अज़ छि हुर्य त्रय

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

कति ताम छु म्यॆ कनन गोमुत ज़ि अख वार्यॆन्य छि ॴसमॖच़ यॆमिस नाव छु ओसमुत विद्या तॖ वनान ॴसिस विद्या नऺरॖस। यॊदवय विद्या नऺरॖस कऻशिर ज़बान ज़ानान ॴस मगर मुलताह छि स्व ॴसमॖच़ न्यॆबरिम। तथ वखतस मंज़ चूंकि शूर्यन हॖन्दि ज़्यनॖच रफ़तार दपान छि ॴसमॖच़ युथ तेज़ ज़ि  ॳकिस ॳकिस माजि ॴस्य आसान शॆ शॆ सथ सथ शुर्य अवॖ म्वखॖ ॴस वारिनि हॖन्ज़ पीनॖनावनॖच कऻम ति तमी रफ़तारॖ सान ज़ोर रऺटिथ। बरादरन वॊन तीज़मालि।आहनबा सोंचस मंज़ आव बदलाव, ज़्यादॖ शुर्य न थावनुक रिवाज आव लूकन मंज़ तॖ वारिनि हॖन्ज़ पीनॖनावनॖच कऻम ति गऺयि श्रॊकान। तीज़मालि वॊन बरादरस। गरन मंज़ प्रसनुक रिवाज ति ह्यॊतुन म्वकल्यव वारॖ वारॖ। बरादरन पकनऻव कथ ब्रोंहकुन। वारिन्यव कऺर्य पनुन्य वान बंद तॖ हस्पतालव मॖच़रऻव्य दरवाज़ॖ यिमन काम्यन बापथ तॖ डाक्टरव बऺडरऻव्य पनॖन्य चन्दॖ तॖ लूकन ति आव ज़न गटि मंज़ गाश। तीज़मालि द्युत कथि थख। कथ छि जऻरी  

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""""

कऺशीर - यॆलि स्कूलॖ तरफॖ एक्सकऻर्यशनस ॴस्य गछ़ान ॳस्य ॴस्य ल्वकॖट्य ल्वकॖट्य ग्रुप बनावान त्र्यन त्र्यन च़्वन च़्वन लऺडकन हॖन्द्य तॖ ॴस्य अलग अलग फिरिस्त बनावान ज़ि कुस लऺडकॖ क्याह अनि पनॖनि गरि बनऻविथ। पनुन पनुन टिफ़िन डबॖ ह्यथ ॴस्य गछ़ान तॖ ब्यॆयि ॴस्य मऻलिस माजि निश कॆंह पौंसॖ ति निवान रोज़ान। बसन मंज़ ॴस्य निवान  तॖ तथ जायि वऻतिथ ॴस्य बनॆमॖत्य ग्रुपन मंज़ॖय ॴस्य ख्यवान च्यवान तॖ मऺस्ती करान रोज़ान। कॆंह लऺडकॖ ॴस्य नॖ रलवॖवन्य मेलवॖन्य आसान तिम ॴस्य अलगॖय आसान, अलगॖय व्वथान बिहान। ग्रुपस मंज़ आसनॖ सॗत्य ओस अख ॳक्यसुन्द स्वभाव ज़ानॖनस मंज़ यिवान, पानॖवुन्य मौज मऺस्ती हॖन्ज़ॖ कथॖ करान रोज़ान। दोस्ती हुन्द मत्लब ज़ानान। मगर यिछ़ मऺस्ती ॴस नॖ मेलान यॆलि गरॖक्यन बऻच़न सॗत्य चकरस गछ़ान ॴस्य। कति कोर फरॖख ॴस नज़र यिवान हालांकि जाय ॴस कुनी आसान मंगर संगत ॴस आसान ब्यॊन ब्यॊन।

**********************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

18.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

18.02.2022, फागुन (फाल्गुन) गटॖ पछॖ (कृष्ण पक्ष) द्वय (द्वितिय) शॊकुरवार (शुक्रवार/जुम्मा/भार्गववार), श्री सप्तर्षि सम्वत 5097, नक्षत्र पू.फा, राश कन्या (रऻच़ हॖन्ज़ि 10.46 बजि प्यठॖ), ऋतु शिशर (चलान)...अज़ छि हुर्य द्वय

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

***********************

बरादरस आव ज़्यूठ असुन तॖ तीज़मालि प्रुछ़ बरादरस क्याहबा कथ तऺजिम ना करॖन्य। बरादरन द्युतनस असान असान जवाब ज़ि नाय मऻजी स्व कथ छॆनॖ। अदॖ कथ प्यठ ओय च़्यॆ असुन सुति ज़्यूठ ज़्यूठ। तीज़मालि प्रुछ़नस। म्यॆ ओस नॖ याद प्यवान ज़ि ॳमिस दायि क्याह ॴस्य ॳस्य वनान कऻशिर्य ज़बऻन्य मंज़। हय क्याहबा रोवुय च़्यॆ। च़्यॆ छु ना बिल्कुलुय याद। नाय प्योम व्वंय याद। ॳमिस ॴस्य वनान कऺशीरि मंज़ वार्यॆन्य। बरादरन वॊन तीज़मालि। यिहाबा छु स्यठाह प्रोन नाव यिहॊय गऺयोयि च़्यॆ मऺशिथ। तीज़मालि पोवनस याद।  दरअसॖल गव ना सम्याह अख वारिनि हुन्द नाव बोज़नस। बरादरन वॊन। यि नाव ति पोवनम राथ ॳक्य म्यॆथरन याद तॖ म्यॆ प्यव याद ज़ि वार्यॆन्य कऻच़ाह क़रीब ॴस आसान सऻनिस समुदायस। अंग्रीज़स मंज़ यॊदवय वुछव तॖ ॳमिस छि यिवान वनॖनॖ मिड-वोयिफ (midwife) याने कऻश्युर तर्जमॖ यॊदवय करव अथ शब्दस तॖ यि छु बनान मऺन्ज़िम-ज़नान। द्वश्यवऺन्य आव ब्यॆयि असुन। तीज़मालि वॊन बरादरस ज़ि बऺरॖच़ ज़नानि ॴस पीनॖनावान यि वार्यॆन्य तॖ ॳमिस ज़नानि हुन्दिस राज़स ॴस वऻकॖफ आसान या तऺम्यसुन्द रून नतॖ यि वार्यॆन्य। तवॖ म्वखॖ मा आसहऻन वनान अंग्रेज़ लूख ॳमिस मिड-वोयिफ। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

""""""""""""""""""""""""""""""""""""

कऺशीर - कऺशीरि मंज़ छि नच़नॖ फेरनॖ बापथ स्यठाह जान जान जायि मस्लन गुलमर्ग, ख्यलनमर्ग, स्वनॖमर्ग, यूसमर्ग, पऺहलगाम, डकसुम, अछॖबल, क्वकरनाग, ॳहरबल, मानसबल, वेरनाग, वगैरा वगैरा। अमि अलावॖ छि निशात बाग़, शालमऻर बाग़, हऻरवन, चॆश्यमऻशऻही, चॆश्यमऻसाहब, पऺरीमहल,  नेहरू पार्क वगैरा वगैरा। यॆलि ॳस्य वख अकि ल्वकचारस मंज़ गछ़ान ॴस्य स्कूलॖ तरफॖ यिमन जायन तॖ दपान ॴस्य एक्सकऻर्यशनस छु गछ़ुन। यि अंग्रीज़ नाव बूज़िथ ओस अंसि बासान ज़न छु कुन व्यलायथ गछ़ुन। अगर यिमनॖय जायन गरिक्यन सॗत्य आसिहे प्यवान गछ़ुन दपान ॴस्य ज़ि चक्करस छु गछ़ुन। ल्वकॖचारस मंज़ ओस नॖ फिकरी तरान ज़ि द्वन मंज़ फरॖख क्याह छि मगर यूत यूत समय गव नेरान तॖ ॳस्य गऺयि बऺड्य गछ़ान द्वन मंज़ फरॖख तऺर फिकरी ज़ि क्याह ॴस आसान।

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

17.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

17.02.2022, फागुन (फाल्गुन) गटॖ पछॖ (कृष्ण पक्ष) ऒक्दॊह (प्रथमा/प्रतिपदा) ब्रसवार (गरूवार/वीरवार/ब्रहस्पतवार) श्री सप्तर्षि सम्वत 5097, नक्षत्र मघा, राश सिंहं (चलान), ऋतु शिशर (चलान)..अज़ छु हुर्य ऒक्दॊह (हेरच़ हॖन्द्य दॊह गऺयि शुरु)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

यॊत ताम म्यॊन ज़्वन सऺही छु, दायि कार आसॖ कऺशीरि मंज़ मुस्लमान ज़नानय करान रोज़ान। बरादरन वॊन तीज़मालि।  तिमन ब्रोंह कमि सना ज़ऻच़ हॖन्द्य लूख ॴस यि कऻम करान कऺशीरि मंज़, प्रुछ़ तीज़मालि बरादरस, म्यॆ छुनॖ ज़्वन मऻजी बरादरन द्युतनस जवाब मगर कऺशीरि मंज़ छि म्यॆ बासान कॆंच़व शतव वऺरियव प्यठॖ मुस्लमान ज़नानय यि कार करान आमच़ॖ। तीज़मालि ति द्युत ज़ोर पनॖनिस ज़ॆहनस प्यठ तॖ वॊनुन बरादर ज़ि सानि ज़ऻच़ मंज़ छुनॖ म्यॆ बासान कांह छु रूदमुत दायि कऻम करान। हस्पतालन मंज़ मा आसॖहऻन कॆंह कऻशिर्य बटनि करान। बरादरन वॊन ॴन्कवऺन्य किन्य। ख़बर हबा दय ज़ानि मगर गरन मंज़ आसॖ मुस्लमान ज़नाना यिवान रोज़ान तॖ कारस अंद वातॖनावान। तीज़मालि कऺर कथ पूरॖ। सोंचन वाज्यन कथ छि यि ज़ि अकि वख्तॖ आसॖ यिम दायि व्वफादऻरी सान ईमानदऻरी सान तॖ च़ुकि सान दायिकार करान रोज़ान। बरादरन छीड ब्यॆयि कथ। आहनबा ति छुय पॊज़ दफ यि दाय ॴस बनान गरॖच बऻच़ा हिश। कालॖ पगाह ओस ॳमिस दायि हुन्द युन गछ़ुन रोज़ान तॖ ॳम्यसुन्द हाजथ प्यवान तॖ यि दाय ॴस वारिहान राज़न वऻकॖफ आसान। तीज़मालि वॊन याद पावान पावान। कति कॊर बदल्यव वखॖत। बरादरन द्युत कथि थख। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""""

कऺशीर -  सऻन्य शुर्य यिम सानि कऺशीरि प्यठॖ च़लनॖ पतॖ कुनवुहशथ तॖ नमतॖ प्यठ ज़न्मस आयि टनलि योर यिथ,तिमन शुर्यन कोताह वनव ज़ि कऺशीरि मंज़ कम कम मन्दर छि तॖ तिमन मन्दरन मंज़ कऻच़ाह प्रकुठता छि ॴसमॖच़। व्वंय छुनॖ सान्यन शुर्यन वखॖत मेलान या हालात छिनॖ साज़गार ज़ि तिम गछ़न कऺशीरि तॖ यिन तिमन मन्दरन फीरिथ। असि ति कति छि तीच़ फुरसथ ज़ि पनॖन्यन शुर्यन बोज़नावव पनुन ल्वकचार। मगर म्यॆ छु बासान ज़ि असि पज़ि कॆंह वखॖत कडुन तॖ शुर्यन पनुन पॊतकाल वनुन

********************** 

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

16.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

16.02.2022, माघ (माघ) ज़ूनॖ पछु (शुक्ल पक्ष) पुनिम (पूर्णिमाशी) ब्वदॖवार (बुधवार) श्री सप्तर्षि सम्वत 5097, नक्षत्र अश्ले, राश सिंह (दुहचि 03.14 बजि प्यठॖ), ऋतु शिशर (चलान)... अज़ छि काव पुनिम ति

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

यिमन दायन हॖन्ज़ कऻम ति छि रूज़मॖच़ मशहूर पनॖनि वख्तॖ। बरादरन वॊन तीज़मालि। हय आहनबा तथ कयाह छु वनुन। तीज़मालि द्युत जवाब बरादरस। यॊदवय वुछव दाय छि ॴसमॖच़ भगवती हॖन्दिस रूपस मंज़ पनॖनि वख्तॖ। डाक्टर कति ॴस्य आसान। सासॖबद्यव तॖ लछॖबद्यव वऺरियव प्यठॖ छि दायि हॖन्दी अथॖ शुर्य ज़्यवान आमॖत्य। यिमव दायव ति छि वख्तॖ वख्तॖ कम कम करामऻच़ करिमच़ॖ यमि हिसाबॖ ॳस्य बोज़ान आयि। बरादरन च़ऺट कथ मंज़य तॖ वॊनुन तीज़मालि ज़ि नवि पुयि आसि शायदॖय खबर ज़ि दाय हॖन्द्य अथॖ छि पलज़्येमॖत्य करोरबऺद्य शुर्यन। नबा तॖ तिमन कति आसि पताह अमिन चीज़ॖच। वॊन तीज़मलि ति क्याज़ि दायन हॖन्ज़ कऻम रऺट पूरॖ पऻठ्य व्वंय डाक्टरव तॖ लुकन ति रोव ताब तॖ सबॖर।  प्यठॖ पऻन्सुक दगॖ दगॖ, वख्तॖच नज़ाकत तॖ मान मानि थऺव दाय लबि ताकस तॖ वऻच़ॖ सार्यय ज़नानॖ डाक्टर वानस। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - तुलमुल, वख अकि ॴस्य लूख डूंगन मंज़ ति तुलमुल गछ़ान रोज़ान। ॴंठम, काह या पुनिम दॊह ॴस्य हवन ति करान रोज़ान। डूंगन मंज़ गछ़ुन गव वारियाह कालॖ प्यठॖ बंदॖय। अथ तुलमुलि नागस छि लूख  पऻनिस सॗत्य सॗत्य द्वद तॖ कन्द बावान रोज़ान। व्यनॖ, जाफॖर्य पोष, गुलाब वगैरा वगैरा छि लूख छावान रोज़ान माजि रऻज्ञन्यायि हॖन्दि नावॖ। कॆंह लूख ॴस्य पनॖन्यन शुर्यन मेखल करान तुलमुलिस मंज़। कॆंच़न लूकन हॖन्ज़ इष्ट दीवी छि यि रऻज्ञन्या भगवती। लूचॖ तॖ नदॖर्यमॊन्जि तुलमुलचि छि स्यठाह मशहूर रोज़मच़ॖ। मामस याने नॆन्यॖ ख्यथ तुलमुलिस मंज़ अच़ुन छु सख मन्ना। दपान मामस ख्यथ युस अन्दर अच़ान छु तऺमिस छु ॳछ गाश रावान तॖ ऒन प्यवान। दय ज़ानि पॊज़ क्याह छु मगर खॊख छु वुन्युखताम। सोंचान छुस बॖ ज़ि यिम मुस्लमान अ़ज़कल बॆफ्रूक पऻठ्य नच़ान फेरान छि रोज़ान सान्यन मन्दरन मंज़ तिमन क्याज़ि छिनॖ सऻन्य दीवी देवता दण्ड  दिवान। 

**********************

नऺविव तॖ फॊलिव

भूषण कौल "दीप'  

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm//bldeep

(यि सबक़ वुछिव koshursabak.bligspot.com प्यठॖ ति)

15.02.2022

14.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

14.02.2022, माघ (माघ) ज़ूनॖ पछु (शुक्ल पक्ष) त्रुवाह (त्रयोदशी) च़ऺन्दॖरवार (सोमवार) श्री सप्तर्षि सम्वत 5097, नक्षत्र पुनर्वस, राश कर्कट (चलान), ऋतु शिशर (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

समय गव पकान तॖ माधव जुव सपुद नोकरी निशि किनारॖ कश याने   रिटायर न्यॆचव्यन हॖन्दि खान्दरॖ पतॖ कॆंह कऻल्य।  मगर माधव जुवन द्युत नॖ थख पनॖनि कामि कॊचि।  तीज़मालि वॊन बरादरस। थख कॊडुन नॖ मत्लब। बरादरन प्रुछ़ सवालॖ तीज़मालि। मत्लब म्योन वनुन छु ज़ि चूंकि अदालऺच़ मंज़ ॴस्य प्रऻवमॖच़ महारत माधव जुवन लूकन हॖन्ज़ॖ अर्ज़ी वर्ज़ी लेखनॖच तम्युक फऻयदॖ तुलुन रिटायर गछ़नॖ पतॖ तॖ ओस लूकन हॖन्द्य इश्टाम वगैरा लेखान रोज़ान तॖ पनॖन्य पऻन्सॖ च़ोर कमावान रोज़ान। न्वशि ति आसॖ ख्वश पऻठ्य पनुन गरॖ करान। हश माजि ॴस राहत हिश मीजमॖच़ न्वश्यन हॖन्दि यिनॖ सॗत्य। चोकॖ ओसुन कॊरमुत हवालॖ बजि हिशि न्वशि तॖ न्यॆबरिम बकाया कऻम ॴस करान रोज़ान दॊयिम न्वश। हश ॴस मंज़ॖ मंज़ॖ प्यठौवली करान रोज़ान तॖ अथ वथ ति हावान न्वश्यन सॗत्य सॗत्य। माधव जियुन गरॖ ओस पकान रऺथ्य ह्यु। कथ छि जऻरी  

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - तुलॖमुलि युस म्यॆ नज़ारॖ वुछनस तल आव सनॖ 2014-हस तॖ 2016-हस मंज़ सु गव यि ज़ि यिम मुस्लमान प्रांगनस न्यबर बिहिथ रत्न-दॗफ कॖनान ॴस्य वख अकि तिम वुछिम तुलमुल प्रांगनस मंज़ बिला रोक टोक नच़ान फेरान तॖ पूज़ा स्थलस ताम गऺछ़िथ इस्तिमाल कऺर्यमॖत्य रत्न-दॗफ सॊम्बरावान तॖ ज़ऻनि ॳकिस मंज़ थऺविथ निवान रोज़ान। मुस्लमानन हुन्द तुलमुलि प्रांगनस मंज़ युन गछ़ुन नच़ुन फेरुन आव म्यॆ नज़र ज़यॆठॖ ॴठम दॊह   सनॖ 2014-हस मंज़ ति। मत्लब म्यानि वनॖनुक छु यि ज़ि सान्यन धार्मिक स्थलन प्यठ छि मुस्लमान बॆफ्रूक पऻठ्य नच़ान फेरान रोज़ान अज़कल याने यि बदलाव छु आमुत कऺशीरि मंज़ म्यॆ बासान बटन हॖन्दि कऺशीरि प्यठॖ च़लनॖ पतॖ कुनवुह शथ तॖ नमतॖ प्यठॖ। पऺहलगामॖ तॖ गुलमर्गि मन्दरन मंज़ ति वुछ म्यॆ ॳकिस जायि मुस्लमान न्यमाज़ परान तॖ ब्यॆयिस जायि मुस्लमान मन्दरस मंज़ पूज़ऻर्य बऺनिथ यिनॖ वाल्यन  लूकन ट्यॊक व्यॊक ति करान रोज़ान तॖ दक्षना ति रटान रोज़ान। 

**********************

नविव तॖ फ्वॊलिव 

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.bligspot.com प्यठॖ ति)

13.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

13.02.2022, माघ (माघ) ज़ूनॖ पछु (शुक्ल पक्ष) बाह (द्वादशी) आथवार (रविवार/ऐतवार) श्री सप्तर्षि सम्वत 5097, नक्षत्र आर्द्रा (चलान), राश कर्कट (रऻच़ हॖन्ज़ि 05.19 बजि प्यठॗ), ऋतु शिशर (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

न्वशि क्याज़ि ॴस्य वनान शान्दॖगऺन्ड्य तोतॖ। बरादरन प्रुछ़ तीज़मालि। ख़बर कर, कऺम्य तॖ क्याज़ि ओस ॳमिस न्वशि यि नाव ति प्योमुत, ख़बर छम नॖ कॆंह। बूज़मुत छुम ज़ि दपान वऻरिव गरस मंज़ दुहुक कऻम कार कऺरिथ यॆलि न्वश शॊंगनॖ बापथ कुठिस मंज़ अच़ान ॴस  बरथा ओस प्रॖछ़ान ख़बर अतर याने वऻरिव बऻच़न सॗत्य क्युथ रूद व्वथुन बिहुन तॖ यि दपान ॴस शान्दस प्यठ कलॖ त्रऻविथ  रॗनिस सोरुय वनान रोज़ान ज़ि कुस क्याह कथ ओस करान तॖ कुस कऺम्यसॖन्ज़ ॴबथ गऻबथ ओस करान रोज़ान। दफ मऻजी रॗनिस ॴस कन बरान रोज़ान। बरादरन वॊन तीज़मालि। ज़ानि दय। ख़बर स्व मा आसिहे पनॖनि स्यज़रॖ पज़रॖ बावॖ किन्य वनान तॖ ॳमिस रॗनिस पनुन हमराज़ ज़ऻनिथ वनान रोज़ान। तीज़मालि वॊन बरादरस। नाय मऻजी यॊदवय स्व कथ आसिहे   त्यॆलि आसिहेस नॖ यि नाव प्योमुत। बरादरन कऺर कथि वज़ाहत। च्योन वनुन ति हाबा छु पॊज़। ब्रोंहकुन बऺडरऻव कथ तीज़मालि ज़ि मुम्किन छु ज़ि न्वश मा आसिहे यिमन कथन सॗत्य पनॖनि ति ज़ॖ कथॖ  मिलनावान पनुन कचुल बाह त्रख करनॖ बापथ। यि ति छु मुम्किन ज़ि रून मा आसिहे कथन मंज़ॖ क्वथ कडनस मंज़ मऻहिर तॖ ज़नि हॖन्ज़न ल्वकच्यन ल्वकच्यन कथन प्यठ आसिहे गछ़ान वऺथ्य वऺथ्य।  दोयिमि दॊह न्यॆन्दरि वऺथितॖय आसिहे कालॖच्यन कथन फ्युर दिवान तॖ मसलॖ ॳन्ज़रावानॖ बजाय बऺडरावान। यि रॏख वुछिथ मा आसॖहऻन वऻरिव बऻच़ सोंचान ज़ि  न्वशि छु रॗनिस कनन मॖथॖर कॊरमुत। शान्दस प्यठ कलॖ थऻविथ तोतॖ सॖन्द्य पऻठ्य कालॖ दुहुक रामायण फरकोवमुत। तवय आसि कऻन्सि गाटॖल्य यि नाव द्युतमुत न्वश्यन शान्दॖगऺन्ड्य तोतॖ। कथ छि जऻरी  

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - तुलॖमुलि प्रा़गनस न्यबर ॴस्य मुकऻमी मुस्लमान व्यनॖ पोश तॖ ओम द्वद कॖनान रोज़ान। मुस्लमान ओस नॖ गैटॖ अन्दर अच़ान। यॊत ताम म्यॆ ज़्वन छु प्रांगनस न्यबर ॴस हलवऻय लऻन आसान तॖ रत्नदॖफ, कन्द, नवीद याने नारजील, नाबद, किशमिश वगैरा वगैरा ॴस्य यिमनॖय वानन प्यठ मेलान रोज़ान। यिम हलवऻय ॴस्य बनावान रोज़ान लुचि तॖ नदॖर्यमॊन्जि तॖ यात्री ॴस्य टास कऺड्य कऺड्य मॊगॖल्य चायि सॗत्य ख्यवान रोज़ान। वानन प्यठॖकनि ॴस्य कूठ्य बऺनिथ आसान यॆति  ज़ऻन्यकार यात्री बिहान करान ॴस्य। यात्री ॴस्य पनुन सामान    यिमनॖय हलवायन निश थवान तॖ दॊहस ॴस्य बनावनावान रोज़ान यिमनॖय अथि हऺल्वॖ, खिर, वगैरा। समयस सॗत्य सॗत्य आयि ॶथ तुलॖमुलिस मंज़ ति तब्दीली कति कोर। वारॖ वारॖ ह्यॆत्य मुसलमानव रत्नदॗफ ति कॖनॖन्य। हलवायव ह्यॊत पनॖन्यन वानन वुसत दिन्य तॖ ह्यॊतुख ब्यॆयि ब्यॆयि सामानॖ थावुन यात्रियन हॖन्दि बापथ। केंच़व हलवायव बदलोव पनुन पेशॖ तॖ कॖनुख पनुन वान गऻर समुदायक्यन लुकन। यिमन द्वयत्रॖहन वऺरियन मंज़ छि आमॖच़ पज़नॖ पॆठ्य तब्दीली तुलमुलिस मंज़। बॖ गोस हऻरान यि व्यॊखुत तब्दीलि वुछिथ यॆलि सनॖ 2014-हस तॖ सनॖ 2016-हस मंज़ म्यूल म्यॆ मोकॖ पनॖनिस अयालस सॗत्य कऺशीरि मंज़ तुलमुल गछ़नुक।

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

12.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

12.02.2022, माघ (माघ) ज़ूनॖ पछु (शुक्ल पक्ष) काह (एकादशी) देवादेव, बटॖवार (शनिवार/शनिश्चरवार), श्री सप्तर्षि सम्वत 5097, नक्षत्र आर्द्रा, राश मिथुन (चलान) ऋतु शिशर (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

बरादरस प्यव क्याहताम याद तॖ वॊनुन तीज़मालि ज़ि मऻजी म्यॆ हय छु बूज़मुत ज़ि न्वश्यन छि ब्यॆयि ति केंच़व नावव सॗत्य याद करान रोज़ान। कम बा नाव प्यॆयी च़्यॆ याद। तीज़मालि प्रुछ़ बरादरस। दपान छि न्वश गऺयी शान्दॖगऺन्ड्य तॊतॖ। वरादरन द्युत जवाब। तीज़मालि आव असुन तॖ वॊनुन बरादरस ज़ि च़्यॆ हाबा पोवुथ म्यॆ पनॖनि खान्दरुक वख याद। आहनबा न्वश्यन ॴस्य वनान शान्दॖगऺन्ड्य तोतॖ ति। त्यॆलि आसी च़्यॆ पूरॖ पताह ज़ि यि नाव क्याज़ि ॴस्य वनान न्वश्यन। बरादरन वॊन तीज़मालि। तमि वख्तॖ हबा ॴस्य न्वश्यन कमव कमव नावव सॗत्य वऻरिव गरन मंज़ वनान रोज़ान तॖ न्वश ॴस बिचऻर छ़ॊपॖ दम कऺरिथ बोज़ान रोज़ान। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - तुलमुलि नागस मंज़ दपान पान्युक रंग छु कुनि कुनि सातन बदलान रोज़ान। कमि सातन क्युथ रंग आसनॖ मूजूब छि लूख पनॖनि पनॖनि हिसाबॖ क़यास करान रोज़ान तॖ पनॖन्य व्यच़ार व्यक्त करान रोज़ान। प्रांगनस मंज़ छि अख बऺड बून्य य्वस पुज़ा स्थलस नखय छि ख़बर कॗत्यि कालॖ प्यठॖच। अमि बोनि हॖन्ज़क्यन लंजन प्यठ पनॖवऺथॖरन हुन्द आकार छु वुछुन लायक़। सु ज़न गव ज़ि याम ॳस्य बोनि हॖन्द्यन ह्यॆरम्यन तॆहर्यन कुन नज़र त्रावान छि अख आकार छु नज़र यिवान तॖ यि आकार छु भारतवर्षुक नक्श्चॖ बनऻविथ बासान। ज़ानि दय कऻत्यहाव छु यि च़्यूनमुत। यि दृश्य छु म्यॆ सनॖ 2014-हस मंज़, सनॖ 2016-हस मंज़ वुछमुत तॖ अज़ द्वयत्रॖह वऺरी ब्रोंठ ति वारिहायि लटि वुछमुत तॖ छु म्यॆ यि आकार ज़न सऺनिथ ह्यु गोमुत। अमि तलॖ छु म्यॆ बासान ज़ि मऻज्य रऻज्ञन्या छि असि सारिनी तति प्यठॖ रऻछ करान रोज़ान। दशि गऺन्ठिथ मन्नत मंगनुक रिवाज छु ज़ानि दय ख़बर कॗति कालॖ प्यठ चलान आमुत। तुलमुलिस मंज़ ति छि लूख ब्यॊन ब्यॊन जायन दशि गन्डान रोज़ान मुराद पूरॖ गछनॖ बापथ। नागस ॳन्द्य ॳन्द्य प्रक्रमॖ दिनस ति छि प्रथ कऻन्सि पनॖन्य पनॖन्य राय। कांह छु काह प्रक्रमॖ दिवान तॖ कांह छु अखहथ तॖ काह प्रक्रम दिनस मंज़ विश्वास थऺविथ माजि रऻज्ञन्यायि वर मंगान रोज़ान। तुलमुल मन्दरस मंज़ मामस याने न्यॆनि ख्यथ अन्दर अच़ुन छु मन्ना। 

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऻस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

11.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

11.02.2022, माघ (माघ) ज़ूनॖ पछॖ (शुक्ल पक्ष) दऺहम (दशमी) देवादेव शॊकुरवार (शुक्रवार/जुम्मा/भार्गववार), श्री सप्तर्षि सम्वत 5097, नक्षत्र मृग, राश मिथुन (शामचि 05.06 बजि प्यठॖ), ऋतु शिशर (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

दपान म्वश गऺयि ब्रांदॖ कऺन्य। तीज़मालि वॊन बरादरस। आहनी म्यॆति छु बूज़मुत। बरादरन द्युत जवाब तीज़मालि। दपान हाबा यॊदवय यि ब्रांदॖकऺन्य बखऻलन हऺज्य आसि आमॖच़ लागनॖ, गरॖच अमारत छि हऺज्य खसान। तिथय पऻठ्य यॊदवय न्वश वुटुकॖर आसि, गरस छि छलॖछांगॖर गछ़ान। अगर सिफऺच़ दार न्वश आसि, गरॖ छु लगान बालबछि। गरॖ छु बनान स्वर्ग। वैसे छि यि अज़मऻवमॖच़ कथ। बरादरन वॊन तीज़मालि।  तवय हाबा ॴस्य करान सऻन्य ज़िठ्य स्यठाह प्रॖछ़गऻर कोर्यन मुतलक। दपान ॴस्य कोरि गछ़न आसॖन्य हथ सिफच़। तॖ लऺडकन। बरादरन कॊरनस सवालॖ। लऺडकन मुतलक ति ॴस्य करानॖय करान। तिज़न गव शराब मा छु च्यवान, सिग्रेट मा छु च्यवान, ज़ार मा छु गिन्दान। वगैरा वगैरा। दफ अमापॊज़ कूर गऺछ़ आसॖन्य संस्कऻरी, अथ कथि प्यठ ॴस्य ज़्यादॖ ज़ोर दिवान रोज़ान। वॊन तीज़मालि बरादरस। यिहोय वजह छु ओसमुत मऻजी म्यॆ बासान ज़ि सऻनिस समुदायस मंज़ छुनॖ ओसमुत तलाक़ुक नामोनिशान। यॊदवय व्वनॖ ज़ांह तिनॖ ज़ांह कांह रून ओस पनॖनि ज़नि त्रावान कुनि कथि प्यठ,सऻर्यसॖय समाजस ॴस पारय लगान ज़न। अज़कलॖच यि तपऻल्य नाबा ॴस नॖ त्यॆलि। तीज़मालि कऺर पनॖन्यन कनन थफ। कथ छि जऻरी  

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - कऺशीरि मंज़ ओस ज़येठॖ ॴठम दॊह मऻलॖ लगान तुलॖमुलि याने क्षीर भवानी मन्दर। अति छु अख नाग तॖ अथ नागस मंज़ छि रऻज्ञन्या भगवती हॖन्ज़ स्थापना। कऻशिर्य बटन छि स्यठाह यछ़ पछ़ रऻज्ञन्या भगवती मंज़ ति। वैसे ॴस्य कॆंह बऺखॖत्य प्रथ ॴठम तुलमुल गछ़ान रोज़ान, कॆंह ॴस लगातार गछ़ान रोज़ान मगर ज़्येठॖ ऱयतनि ज़ूनॖ पछॖ ॴठम दॊह ओस रऻज्ञन्या माजि हुन्द वॊहरवोद मनावनॖ यिवान बडॖ श्रद्धायि सान। अमि दॊह ओस बॊड बारॖ मऻलॖ लगान अति अज़ द्वयत्रॖह वऺरी ब्रोंठ। मगर यनॖ कऺशिर्य बटॖ च़ऺलिथ आयि कऺशीरि प्यठॖ याने कुनवुहशथ तॖ नमतस मंज़, मऻलॖ छुनॖ तुलमुलि तमि चमॖ खमॖ सान व्वंय लगान। हालांकि कॆंह लूख छि ब्यॊन ब्यॊन जायव प्यठॖ यिवान तॖ ज़येठॖ ॴठम दॊह माजि रऻज्ञन्यायि शरण गछ़ान रोज़ान मगर स्व बीरॖ छॆ नॖ व्वंय वुछनस तल यिवान। नागस ॳन्द्य ॳन्द्य छु काठगरॖ गंडिथ।  नागस न्यबर छु स्यठाह बॊंड इहातॖ यथ ॳस्य वनान छि आंगुन या प्रांगन। अथ प्रांगनस ॳन्द्य ॳन्द्य ति छु शॆशतॖरुव काठगर लऺगिथ। अथ प्रांगनस न्यॆबॖर्य छि अकि तरफॖ ल्वकॖट क्वल यथ मंज् यात्री छि तुलमुत इहातस मंज़ अच़नॖ ब्रोंठ श्रान करान। अथ क्वलिचि अकि अंदॖ छु ज़नानन हॖन्दि बापथ श्रानॖकुठ ति बऺनिथ। दॊयिमि तरफॖ छि हलवऻय वान। पऺतिमि तरफॖ छि ज़ल-मॖथॖर करनॖ बापथ टचि-वचि कॆंह बऺनिथ। त्रेयिमि अंदॖ छि केंह मकानॖ आमॖत्य बनावॖनॖ यिमन मंज़ बखॖत्य छि ह्यकान केंच़न दॊहन रुज़िथ कऺरिथ

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

10.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

10.02.2022, माघ (माघ) ज़ूनॖ पछु (शुक्ल पक्ष) नवम (नवमी) देवादेव ब्रसवार (गरूवार/वीरवार/ब्रहस्पतवार) श्री सप्तर्षि सम्वत 5097, नक्षत्र रोहिणी, राश वृष (चलान) ऋतु शिशर (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

माधव जुवन अनि ज़ॖ न्वशि अख गामॖच याने व्यच़ारनागॖच तॖ ब्याख शहरॖच याने रॗन्यवारिच। हालांकि तमि वख्तॖ ओस रॗन्यवोर ति गामॖय यिवान मानॖनॖ मगर शहरॖक्य बसकीन ॴस्य नॖ रॗन्यवारिस गाम वनान।  रॗन्यवारिक्य ॴस्य वनान ज़ि शहर छु तरुन याने तिम ॴस्य पानस शहरॖक्यन निशि ब्यॊन ज़ऻनिथ। हालांकि व्वंय छु गोमुत सऻर्यसॖय कुनुय ततॖग्रॊद। सुति यनॖ प्यठॖ ॳस्य कऺशीरि प्यठॖ च़ऺलिथ आयि। तीज़मालि वॊन बरादरस ज़ि दपान हाबा यि माधव जुव छु रूदमुत कॖस्यतवोल तिक्याज़ि यिम दॊश्यवय न्वशि दपान आसॖ ग्वनव सॗत्य बऺरिथ। शराफ़त ॴसॖख दपान फॊत्यव बऺर्य बऺर्य। पानवॖन्य दॖरॖकाक्यन्यन समुत तॖ विश्वास ओसुख अख ॳकिस प्यठ। दॊश्यवय ज़ऻम यॆलि ति पनॖन्यन खान्दारन सॗत्य माल्युन यिवान आसॖ, यिम दॊश्यवय न्वशि आसॖ तिमन मॆहमान नवऻज़ी तॖ माय महोब्बतॖ करान रोज़ान। हशि हॆहरस सीवा तॖ द्रॖयन पनॖन्यन बायन हॗन्द्य पऻठ्य मान तॖ यज़थ करान रोज़ान। बरादर गव बोज़ान तीज़मालि हॖन्दि ॴसॖ तऻरीफ यिमन न्वश्यन हॖन्ज़ तॖ वोनुन तीज़मालि ज़ि मऻजी यॊत ताम म्यॆ ज़्वन छु सान्यन गरन मंज़ ॳस्य संस्कार दॊछ़्यव दॊछ़्यव बऺरिथ तॖ ब्यॆयि ॴस मीठ तॖ मॊदुर ज़्यव। आहनबा ति छु पॊज़। दफ वुन्युख ताम छि सऻन्य सॊय संस्कृति सॗत्य रूज़िथ तॖ तिमय संस्कार यिमव मूजूब ॳस्य दॊह दॊह कडान आयि। तीज़मालि कऺर कथ पूरॖ। बस दयस मंगव सान्यन शुर्यन ति प्यॆयिन यिछ़ॖय सॊहबथ तॖ हऻव्यनख मऻज्य दीवी रॖच़ वथ यॆति ब्रोंहकुन ति। कथ छि जऻरी    

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - कऺशीरि मंज़ ॴस्य कऻशिर्य बटॖ कोरि तॖ लऺडकॖ अमूमन पनॖनि इम्तिहानॖ पतॖ रिज़ल्टुक बोर पुशरावान भगवानस या भगवती तॖ ॴस्य न्यॆति गछ़ान रोज़ान पर्बत या गणपतयार या पनॖन्यन पनॖन्यन मऺहलक्यन मन्दरन मंज़ तॖ मंगान रोज़ान पास गछ़नॖ बापथ मन्नत। मगर कऺशीरि न्यबर नीरिथ रूद्य नॖ असि तिम मन्दर। मन्नत ओस बहानॖ मगर अमी बहानॖ ॴस्य सऻन्य शुर्य शिवॖ लिंगस पोन्य हावान तॖ ॴशिर्वाद प्रावान। म्यॆ छु वारॖ पऻठ्य याद ज़ि वख अकि ॴस्य ॳस्य कऻशिर्य बटॖ पनॖन्यन हमसायन शीर्य चाय तॖ कान्दॖर्य वानॖच च़ॊट, कत्लमॖ, टखॖटऺच या बऺगिरखऻन्य ख्यावान रोज़ान यि वऺनिथ ज़ि सोन शुर द्राव फलऻन्य इम्तिहानस  पास। अवलॖ प्यठॖ ॷठ्यमि जमऻच़ ताम युस पास गछ़िहे चाय ॴस यिवान चावनॖ। अख सम्बंद ओस बनान पानॖवुन्य मगर अज़ छु नॖ सु सम्बंद ता न स्व प्रथा व्वंय। व्वंय छि नॖ पयी थवान अख ॳकिस यॊताम सु शुर व्यलायत ताम छु वातनावं। सम्युक बदलाव। 

**********************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

09.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

09.02.2022, माघ (माघ) ज़ूनॖ पछु (शुक्ल पक्ष) ॴठम (अष्टमी) देवादेव, ब्वदॖवार (बुधवार) श्री सप्तर्षि सम्वत 5097, नक्षत्र कृति, राश वृष (चलान) ऋतु शिशर (चलान)...चूंकि अज़ छि दॊयिम ॴठम (अष्टमी), अज़ छु ॴठम फाक़ॖ (अष्टमी व्रत) तॖ वॊहरवोद ति

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि वॊन बरादरस ज़ि गुपॖ बचॖ हाबा ओस पानॖ नच़ान तॖ मर्दन किहो ज़नानन, कोर्यन किहो लऺडकन पानस सॗत्य सॗत्य नच़नावान तॖ रास गिन्दान यि दऺप्यज़ि ति कुठ नखस तुलान। आहनी मऻजी यिमन खान्दरन प्यठ दपान ओस अख जिया लाला ति ग्यवान रोज़ान। मगर दपान सु ओस नॖ नच़ान। सु दपान ओस अथॖबाजि वायान तॖ कुनुय ज़ॊन मऻन्ज़्यरऻच़ मंज़ महफिल सज्जावान। तीज़मालि प्यव क्याहताम याद तॖ च़ॊलुस असुन नीरिथ। बरादरन यॆलि असनुक वजह प्रुछ़नस तॖ तीज़मालि वॊन बरादरस ज़ि आहनबा म्यॆ छु बूज़मुत तऺमिस मुतलक़ ति। क्याह छुय च़्यॆ बूज़मुत। बरादरन प्रुछ़नस। दपान हाबा यॆलि सु ग्यवुन ओस ह्यवान तऺमिस ब्रोंह कनि आसॖ ज़नानॖ बिहान अजि थाल वायान, अजि तुम्बकनारि वायान, कांह ॴस गागॖर वायान, कांह ॴस खऻस्य वायान तॖ जिया लाल ओस लीलायि या रोमऻनी बऻथ ग्यवान रोज़ान मगर तऺमिस दपान ओस अख ॴब। क्युथ ह्यु ॴब। बरादरन प्रुछ़नस। दपान जिया लालस ओस तकिया कलाम प्रथ खान्दरस मंज़। क्याह सना। बरादरस बडेयि आकांक्षा बोज़नॖच। दपान हाबा सु ओस वनान साज़ शुरु करनॖ ब्रोंह ज़ि यिम बजिमाजि छवॖ तिम पऺकिव पथ पथ तॖ यिम ल्वकचि ल्वकचि ज़नानॖ छवॖ तिम पऺकिव ब्रोंह ब्रोंह कुन। दॊशवऺन्य आव बड ज़्यूठ असुनाह। सु कोताह सना बॊड ओस पानॖ तॖ यि कथ ख़बर क्याज़ि ओस वनान। बरादरन कॊर सवालॖ। हय दपान हाबा जिया लाला ओस मनॖ किन्य बडॖ साफ़ दफ अमा पॊज़ सु ओस दपान ज़ि साज़स सॗत्य गछ़ि मॊदुर आवाज़ ति आसॖन्य तॖ ल्वकच्यन ल्वकच्यन ज़नानन छि आसान मॊदुर तॖ मीठ आवाज़ बज्यन ज़नानन न्यस्बतॖ। ओओ। मगर केंंह ज़नानॖ दपान आसॖ तऺमिस प्यठ शक़ करान।  मगर ति ओस नॖ केंह तऺमिस बिचऻरिस मंज़। अथ वनान ननॖवऻर्य नाव प्यॊन। बरादरन वॊन तीज़मालि। असुनाह कॊरुख खुलॖ डुलॖ। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - कऻठ्य दरवाज़स ताम वातान वातान ओस मंज़ॖ यिवान रामॖ कौलुन मन्दर। अथ मन्दरस ॴस्य कॆंह लूख गछ़ान तॖ कॆंह ॴस्य स्यॊदुय नेरान। तमि पतॖ ओस यिवान प्वखरीबल। तोर ति ॴस्य नॖ सऻरी लूख गछ़ान रोज़ान। अल्बतॖ प्वखरीबलॖ ति ॴस अख बजन मंडली यिम हर ॴठम प्यठ ॴस्य रऻत्य रातस बजन कीर्तन करान रोज़ान। कऻठ्य दरवाज़ॖ ग्वडय आसॖ नज़र यिवान कॆंह दारि यिमन शॆशतॖरिव सीख ॴस्य आसान लऺगिथ। अथ मकानस ॴस्य वनान पागल खानॖ। यॊदवय पुलिस पऺहरॖ ओस अथ जायि तॊति ॴस्य छ़्यॆपि च़ूरि वति पकवॖन्यय लूख यिमव दार्यव किन्य पागलन हॖन्ज़ॖ हर्कतॖ वुछनॖ खऻतरॖ गछ़ान रोज़ान। कऻठ्य दरवाज़स निश ॴस्य सब्ज़ीवऻल्य ति फ्वतर्यन क्यथ हाक, मॊन्जि, गॊग्जि, मुजि, वांगन, लऻर, सॊच़ल, पालक, वॊस्तॖहाक ह्यथ यिवान तॖ बटॖ ॴस्य गरॖ बापथ सब्ज़ी निवान रोज़ान ति क्याज़ि यि सब्ज़ी ॴस आसान ताज़ॖ तॖ श्रॊज्य। पर्बत गछ़नॖ सॗत्य ओस सुबहुक सऻर गछ़ान, ताज़ॖ हवा आसान तॖ धर्म ति ज़्येनान। मन ओस श्वद रोज़ान। ड्यकॖ ओस फ्वलवुन बासान तॖ सत् यॊदवय बूज़िव तॖ बुथिस प्यठ ओस नूर ज़न पशपान

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

08.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

**********************

🙏🙏 नमस्कार माहरा

08.02.2022, माघ (माघ) ज़ूनॖ पछु ?(शुक्ल पक्ष) ॴठम (अष्टमी) बॊम्वार (मंगलवार) श्री सप्तर्षि सम्वत 5097, नक्षत्र भरण, राश वृष (रऻच़ हॖन्ज़ि 04.09 बजि प्यठॖ), ऋतु शिशर (चलान)...अज़ छि भीष्मॖ ॴठम ति

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीजमालि वॊन बरादरस ज़ि माधव जुवन हाबा कॊर ज़िठ्यन द्वन न्यॆचव्यन खान्दर बडॖ दूम दामॖ सान। दपान मऻन्ज़रऻच़ प्यठ ओसुख गिन्दनगॊर ति। बरादरन च़ऺट कथ मंज़य यि वऺनिथ ज़ि मऻजी म्यॆहय छु बूज़मुत ज़ि तिमन दॊहन ओस कऻशुर बटॖ गिन्दनगॊर आसान। तीज़मालि दॊपनस आहनबा ओसहय आसान। खबरहय तस क्याह ओस नाव मऻजी। च़्यॆ मय छुय याद। प्रुछ़ बरादरन तीज़मालि। तऺमिस हाबा ओस नाव गूपी नाथ तॖ दपान ॴसिस गुपॖ बचि। च़्यॆ छुतनय वुछमुत सु। बरादरन कॊर दॊयिम सवालॖ तीज़मालि। हय आहनबा म्यॆ छु वुछमुत तऺम्यसुन्द नच़ुन केंच़न खान्दरन मंज़। सु ओसा ग्यवानॖय योत किनॖ नच़ान ति। ब्याख सवालॖ प्रुछ़ बरादरन तीज़मालि। हय सु हाबा ओस त्रठ ह्यु नच़ान यि दऺप्यज़ि ति अज़कलॖक्य नच़नवऻल्य लवन नॖ तऺम्यसुन्द पऻज़ारॖ मल ति। त्युथ किहे ओस करान सु मऻजी। तीज़मालि प्यव गुपॖ बचुन नच़ुन याद तॖ वॊनुन बरादरस ज़ि हतबा क्याह वनय। तऺमिस हाबा ओस हॊट स्यठाह जान। सु ओस लल-द्यॆदि हॖन्द्य वाक् वनान तमि आयि ज़न ॴस्य तीर सीनस तऺरिथ गछ़ान। म्यॆ छु तॖम्यसॖन्दि हटि बूज़मुत ज़िन्य मॊज़ूर सुन्द बऻथ, अकॖनंदुन ब्यॆयि ति कम कम लीलायि। नच़ान नच़ान ओस सु जामॖ बदलावान, कृष्ण बऺनिथ यिवान तॖ रास गिन्दान। कुनॖय ज़ॊन ओसा गिन्दान। बरादरन प्रुछ़नस। हय नबा। कथ छि जऻरी      

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

""""""""""""""""""""""""""""""""""

कऺशीर - कऺशीरि मंज़ ॴस्य वारियाह बटॖ कोरि, लऺडकॖ इम्तिहानॖ पतॖ रिज़ल्ट नेरनस ताम पर्बत गछ़ान रोज़ान तॖ माजि शारिकायि पनॖनि सफलतायि बापथ ॴशिर्वाद मंगान रोज़ान। गऺणशिबलॖ या च़ऺक्रीश्वरॖ ॴस्य दशि गन्डान पनॖन्य मुराद पूरॖ गछ़नॖ बापथ। दशि याने मन्दरस मंज़ कुनि जायि पनॖ-दाव गंडान यि ज़ऻनिथ तॖ मऻनिथ ज़ि स्व पनॖ-दाव पावि भगवती या भगवानस याद ज़ि ॳमिस सवऻली सॖन्ज़ मनोकामना छि पूरॖ करॖन्य। कोरि लऺडकॖ ॴस्य अक्सर ब्यॊन ब्यॊन ड्येम्फिर्यन मंज़ गछ़ान रोज़ान। अडॖरातन ॴस्य पनॖन्यव गरव प्यठॖ नेरान तॖ प्रभातन पर्बत वातान। न ओस कऻन्सिहुन्द खोच़ुन न खोरुन तमि वख्तॖ हालांकि यॊदवय वुछव फतेह कऺदलॖ प्यठॖ पूरॖ पर्बत ताम ओस मुस्तमान अलाक़य या रॗन्यवोरॖ त्रऻविथ पर्बत ताम अलाकॖ ति ओस मुस्लमान अलाकय मगर महफूज़। च़ऺक्रीश्वरॖ हेरन खसनस ॴस लगान मान मान ल्वकट्यन या बड्यन। कॆंह लूख ॴस्य च़ऺक्रीश्वरॖ वऻतिथ पहाडॖकि दॊयिमि तरफॖ वऺसिथ छ़ॊट वथ मऻनिथ कऻठ्य दरवाज़स ताम वातान। तॊत वऻतिथ ॴस्य सऻरी थख कडान तॖ अख ॳकिस प्रारान रोज़ान। असि कऻशर्यन छि पर्बतकि गण्शिबलॖ प्यठॖ माजि शारिकायि हॖन्दिस दरबारस ताम स्यठाह सऺन्य यछ़ तॖ पछ़। माजि गछ़ शरण माजि प्यॆ परण माजि शारिकाये कर सऻ नमन

**********************

नऺविव तॖ फॊलिव

भूषण कौल "दीप"  

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

07.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

07.02.2022, माघ (माघ) ज़ूनॖ पछु (शुक्ल पक्ष) सतम (सप्तमी) च़ऺन्दॖरवार (सोमवार) श्री सप्तर्षि सम्वत 5097, नक्षत्र अश्विन, राश मेष (चलान) ऋतु शिशर (चलान)...अज़ छि सिर्यि सतम (सूर्य सप्तमी) ति

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

चूंकि माधव जियुन परिवार ओस सादगी मंज़ॖय बड्योमुत यिमव ओस नॖ डायनिंग टेबॖल, सोफॖ, ब्यड या फ्रॖज वगैरा नऺविस मकानस मंज़ ऒनमुत अल्बतॖ कॆंह कुर्सी दपान आसख अनिमच़ॖ पऺछ़िस लऺछ़िस बापथ। ख्यन च्यन या शॊंगुन व्वथुन ओस ब्वनॖ कनि पऺथरिस प्यठॖय। म्यॆच़ि सॗत्य अथॖ स्वरशावुन, यकजाह बिहित ख्यॊन च्यॊन यि प्रथा रूज़ बरकरार नऺविस मकानस मंज़ ति। तीज़मालि वॊन बरादरस। बरादरन वॊन तीज़मालि ज़ि मऻजी कऺशीरि मंज़ हय ओस पऺथरिस प्यठ बिहिथॖय यिवान मज़ॖ ख्यनस च्यनस। आहनबा ल्वकॖचारॖ प्यठॖ ॴस तऺथ्य हऻल असि कऻशर्यन। कऺशीरि मंज़ मा ॳस्य यॆतिक्य पऻठ्य बिच तॖ स्वरफ आसान। तीज़मालि वॊन बरादरस ज़ि माधव जुवन ह्यॆच़ खान्दरॖच तयऻरी करॖन्य ति क्याज़ि दॊह गऺयख नऺज़दीक यिवान। न्वश्यन बापथ वरदनॖ, पानस तॖ शुर्यन बापथ प्वषाक, वाज़स सय, टैंटॖवऻलिस सय, सालरन हुन्द फिरिस्त, सालॖ कार्ड छापॖन्य, बानॖ बिस्तरॖ सॊम्बरावॖन्य वगैरा वगैरा। कऻच़ाह व्वलॖहऺरिश ॴस यिवान तमि वख्तॖ यिमन खान्दरन प्यठ। बरादरन वॊन ज़ि माधव जुवस ॴस्य सऻरी न्यॆचिव कऻम करनस। तीज़मालि दॊपनस आहनबा अदॖ क्याह दफ अख तॖ अख गव काह। कुन ज़ॊन छुनॖ कुन वातान। माधव जुवन बऻगरऻव सारिनी न्यॆचव्यन ॳड ॳड कऻम तॖ दपान बडॖ जान पऻठ्य वातनोव तिमव अंद काम्यन। गरॖ यॊदवय आसि बऻच़व बऺरिथ, कामि हुन्द बोर ति छु लॊतान। शुर्य कऺट्य छि नरि ज़ंगॖ मऻलिस माजि आसान तॖ गरॖ छु स्वर्गा ह्यु बासान। बरादरन द्युतनस जवाब।कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - कऺशीरि मंज़ ओस कऻशिर्य बटन हारी पर्वतस सॗत्य स्यठाह गॊन सम्बन्द वख अकि। माता शारिका छि रूज़मॖच़ इष्ट-दीवी वारिहान बटन, तिमन बटन ॴस्य वनान ज़ि यिम छि पर्बत कुन। ॳड्य ॴस्य आसान तुलमुत कुन। यॆलि ति तिहॖन्ज़ कांह ति मुराद पूरॖ ॴस सप्दान, तिम ॴस्य च़ऺक्रीश्वर च़ॊट खारान। च़ॊट याने तऺहर च़रवन तॖ शूशॖनोर। च़ऺक्रीश्वरॖ ॴस्य ताहरि प्रेप्युन हावान तॖ शुशनोर च़ऺटिथ गऻन्टन त्रावान रोज़ान। नवरेहस प्यठ नवॖरात्रॖक्यन दॊहन मंज़ ॴस्य सऻरी कऻशिर्य बटॖ ऒक्दॊह प्यठॖ च़ोरम ताम मामस याने न्यॆनि ख्यवान रोज़ान तॖ पऻन्च़म प्यठॖ ॴठम ताम ॴस्य नॆन्यन थख करिथ पतॖ रामॖ-नवम दॊह ब्यॆयि च़ऺक्रीश्वर च़ॊट खारान। कऺशीरि याने टनलि यपोर  तऺरिथ बदल्यव असि कऻशिर्य मन तॖ मिज़ाज़ तॖ त्रोव मामस ख्यॊन नवरात्रन मंज़ तॖ च़ॊट खारनॖच प्रथा ति गऺयि बंद। दपान बटॖ छु वांगुन। यथ सब्ज़ी सॗत्य रलावोन तथ सॗत्य रलि।   बटॖ छु नक़लॖची। पनुन सबक़ याद थविनॖ मगर नकॖल करनस मंज़ पथ रोज़ि नॖ। मस्लन माजि ज़्यव, रस्म, रिवाज, संस्कार या संस्कृति पनॖन्य मऺशरऻवॖन तॖ पऻरिम ज़्यव, पर-ज़ऻच़ मंज़ खान्दर करुन, शुर्य नॖ ज़्यवरान्य, कुनी कथ न थावॖन्य यिम चीज़ प्रऻवॖन्य। 

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

06.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

06.02.2022, माघ (माघ) ज़ूनॖ पछु (शुक्ल पक्ष) शॆयम (षष्ठी) आथवार (रविवार/ऐतवार),श्री सप्तर्षि सम्वत 5097, नक्षत्र रेव, राश मेष (शामचि 05.10 बजि प्यठॖ), ऋतु शिशर (चलान), द्रठॖपऻन्च़ुक (पंचक) समाप्त...अज़ छि कुमार शॆयम  (कुमार षष्ठी) ति

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी।

दुर्गा क्षमा शिवा धात्री स्वहा स्वधा नमोस्तुते

**********************

मकानॖ बनोव माधव जुवन तॖ मकान सज्जोव माधव जुवन्यव न्यॆचव्यव  अख ॳकिस सॗत्य मीलिथ, अख ॳक्यसॖन्ज़ कथ मऻनिथ, अख ॳक्यसुन्द दर्द ज़ऻनिथ, मऻलिस माजि हुन्द आराम ज़्यहनस मंज़ थऻविथ तॖ बजरुक तॖ थज़रुक खयाल कऺरिथ। मकानकिस न्यॆबरिमि ड्यॆडिचि न्यबरॖमि लबि प्यठ ॴस आमॖच़ नाव-पऺट लेखनॖ यथ प्यठ माधव जियुन नाव तॖ पान्च़वऺन्य न्यॆचव्यन हुन्द नाव ओस आमुत ल्येखनॖ। तीज़मालि वॊन बरादरस। बरादरस आव मनस मंज़ अख सवाल युस तऺम्य तीज़मालि प्रॖछ़ुन वऻजिब ज़ोन। मऻजी म्यॆ छुनॖ अज़ताम फिकिरी तॊरमुत ज़ि यिम पनॖन्यन दरवाज़न प्यठ गरॖक्यन बऻच़न हॖन्द्य नाव ल्येखान रोज़ान छि तिमन नावन मंज़ क्याज़ि छिनॖ कोर्यन हॖन्द्य नाव लीखित आसान। तीज़माल गऺयि निशब्द हिश। क्याह जवाब ओस बनान बरादरनिस सवालस प्योस नॖ पलि कॆंह। दॊपनस ख़बर हबा क्याज़ि। यि प्यॊय च़्यॆय ज़्वन। च़्यॆति वुछ कपऻर्य कपऻर्य छिय खयाल व्वथान। कथ छि जऻरी।

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - रॗन्यवऻर्य वाल्यन छु प्यवान हारी पर्बत स्यठाह नऺज़दीक। ॳस्य ॴस्य गछ़ान हब्बॖकऺदलॖ प्यठॖ तॖ लूख ॴस्य यिवान रोज़ान दूर दूर जायव प्यठॖ बडॖ श्रद्धायि सान तॖ भावॖ सान। दपान माजि शारिकायि छि हाव्यमच़ॖ वारियाह करामऻच़ वारियाहन बख्तन वारियाहि लटि वारिहान रूपन मंज़। रॊपॖ भवऻन्य ति छि यिमनॖय करामऻच़व मंज़ॖ अख करामात। प्रथ ॴठम ओस लगान च़ऺक्रीश्वरॖ बजन कीर्तन रऻत्य रातस वख अकि। ब्रह्मॖ मुहूरतॖ प्यठय ओस बख्तन हुन्द युन गछ़ुन लगान तॖ गणिशबलॖ प्यठ कऻठ्य दरवाज़स ताम वति ॴस दुह्यकिस दोहस दीवी बख्त्य पकान रोज़ान। सतॖ ऋश्य कनि निश वऻतिथ ॴस्य लूख कन्यफल्यन अथन मंज़ तुलिथ वुछान रोज़ान ताक छा या जुफ़। पनॖन्यन मनॖक्यन प्रशनन हुन्द फल ॴस्य वछान सतॖ ऋश्य क्यन कनिफल्यव सॗत्य। 

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

05.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏नमस्कार माहरा

05.02.2022, माघ (माघ) ज़ूनॖ पछु (शुक्ल पक्ष) पऻन्च़म (पंचमी) बटॖवार (शनिवार/शनिश्चरवार) श्री सप्तर्षि सम्वत 5097, नक्षत्र उ.भा, राश मीन (चलान) ऋतु शिशर (चलान) द्रठॖपऻन्च़ुक (पंचक) (चलान)...अज़ छि बसंत  पऻन्च़म (बसंत पंचमी) ति

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

त्रुपूर मकानॖ, थॊद ब्रांद, वॖज़, बैठक, वॊट, चोकॖ, पचवि हेर, रवख ह्यि कुठ्य, ठोकुर कुठ, डब, बजि बजि दारि, कऻनी अरॖ वरॖ, ब्रऻर्यकऻनी, बानॖकुठ तॖ टीनुव पश।वॊब, यि दऺप्यज़ि ति ल्वकुट म्वकुट मऺहल ह्यु ओस बासान माधव जियुन मकानॖ। बॊड आंगुन। आंगनस मंज़ अकि अंदॖ श्रानॖकुठ, ब्यॆयि अंदॖ अख बॊड कंज़, ॳकिस कूनस कुन अख ल्वकुट ख्वत ह्यु यथ मंज़ म्यॆच़ ॴस आसान, ब्यॆयिस कूनस मंज़ ॴस टऺच। तिमन दोहन दपान ॴस नॖ अज़कलॖच हिश टऺच आसान। प्रथ गरस ॴस मकानस न्यबर टऺच आसान तॖ वातुल ओस दॊहय यिवान तॖ टऺच साफ़़ करान रोज़ान। तमि वख्तॖ ओस वातुल टचन या कोचन हुन्द मल-वल डगस मंज़ निवान रोज़ान या ज़ेछि फॊतरि  मंज़ निवान रोज़ान तॖ दपान यि ज़ल-मल ओस यिवान त्रावनॖ दूर दराज़ खाहन तॖ डूर्यन मंज़ यिमन खाहन मंज़ सब्ज़ी वगैरा व्वपदान ॴस। तीज़मालि वॊन बरादरस तॖ बरादरस प्यव ज़्वन तॖ वॊनुन तीज़मालि ज़ि मऻजी म्यॆ छु बूज़मुत ज़ि ज़ल-मल तुलनुक ठेकॖ ओस यिवान दिनॖ केंच़न ठेकॖदरन। आहनबा ति छु पॊज़। म्यॆति छु बूज़मुत। तीज़मालि वॊन बरादरस। मगर व्वंय छि  स्व प्रथा ख़तम गऻमॖच़ यनॖ प्यठॖ यूर्या तॖ ब्यॆयि ब्यॆयि कॖस्मॖच खाद आयि बारसस। व्वंय छि यि मल वगैरा कूडॖ-डेरन प्यठ त्रावान रोज़ान तॖ कॆंह गछ़ान स्यॊदुय व्यतस्तायि मंज़।  बरादरन द्युत जवाब। आहनबा पथ कालि ओस दऺर्यावस मंज़ कूडॖ त्रावुन मन्ना आसान मगर अज़कल दपान तऺम्य वख्तन ति छु ख्योमुत वॊलॖग्वतुन। वॊन तीज़मालि बरादरस। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - हारी पर्बत ॴस्य कऻशिर्य बटॖ न्यॆत्य याने दॊहय गछ़ान रोज़ान सुति प्रभातन तॖ पऻदल। हारी पर्बत छु श्रीनगरॖकिस ॳकिस अंदस कुन वाका मगर सासॖ बऺद्य लूख ॴस्य पनॖन्यव गरव प्यठॖ अथ हारी पर्बतस अकि अंदॖ प्यठॖ ब्यॆयिस अंदस ताम परिक्रम दिवान रोज़ान तॖ वापस पनुन गरॖ वातान। अमि हारी पर्बतुक अख अंद ओस गणिश्यबलॖ प्यठॖ शुरु गछ़ान तॖ दॊयिम अंद ओस वातान कऻठ्य दरवाज़स निश। गणिशिबलॖ पतॖ ओस यिवान दीवी-आंगन, सतॖ ऋश्य, च़ऺक्रीश्वर, राम मन्दर, प्वखरीबल। च़क्रीश्वरस ताम वातनस ॴस्य प्यवान ढायन हतन हेरॖ पाव्यन खसुन। मऻज्य शारिकायि हुन्द अस्थापन छु थज़्ज़रस प्यठ यथ दपान छि किल्स प्यठ छु मन्दर तॖ शारिका माता छि ज़गतस रऻछ करान।

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep 

(यि सबक़ वुछिव koshursabak.blogspot.com प्यठॖ ति)

04..02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

04.02.2022, माघ (माघ) ज़ूनॖ पछु (शुक्ल पक्ष) च़ोरम (चतुर्थी), शॊकुरवार (शुक्रवार/जुम्मा/भार्गववार), श्री सप्तर्षि सम्वत 5097, नक्षत्र पू.भा, राश मीन (दुहचि 10.02 बजि प्यठॖ), ऋतु शिशर (चलान), द्रठॖपऻन्च़ुक (पंचक) (चलान)...अज़ छि त्रिपुरा च़ोरम (त्रिपुरा च्वतर्थी) याने तिक्य च़ोरम ति

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

माधव जुवन्यन ज़िठ्यन द्वन न्यॆचिव्यन गव सऺही खान्दर तॖ माधव जियस दपान लऺज्य फिकिर जायि छ़ॊचॖरॖच। ॳथ्य मऺहलस मंज़ म्यूल जायि च़कुलाह युस माधव जुवन मऺल्य ह्यॊत तॖ ह्यॆच़ॖन तयऻरी करॖन्य अथ ज़मीन च़कुलस प्यठ नॊव मकानॖ बनावनॖच। चूंकि माधव जुवस ज़ानहऻन सऻरी अंद्य पऺख्य तॖ अथ जायि इर्द गिर्द ॴस्य मुस्लमान गरॖ ज़्यादॖ तॖ तिमनॖय गरव मंज़ॖ द्रायि कम अज़ कम सऻरी तिम कऻर्यगर याने छान दऺसिल मॊज़ूर यिहन्दि मदॖतॖ सॗत्य तॖ यिहन्दि तजवीज़ॖ़व सॗत्य बन्यव केंच़ॖसकालस मंज़ अख शानदार, हवादार त्रुपूर मकानॖ तॖ माधव जुवन त्रोव किराय मकानॖ तॖ च़ाव नऺविस मकानस मंज़ नॊव गरॖ बसावनि यिमन द्वन न्यॆचव्यन खान्दर करनॖ ब्रोंठ ब्रोंठॖय। तीज़मालि वॊन बरादरस ज़ि यकजाह रोज़नस मंज़ हबा छि बरकत आसान। अंहनी मऻजी तथ मंज़ छुनॖ कांह शक। अदॖ ॴस्या सऻन्य ज़िठ्य बेकॖल। बरादरन द्युत जवाब तीज़मालि। यॊदवय वुछव मऻजी तमि वख्तॖ ओस आसान सान्यन ज़िठ्यन कम तनख्वाह, शुर्य पंगथ,  मगर यकजाह रूज़िथ ॴसिख बऺड्य बऺड्य मकानॖ बनऻवमॖत्य पनॖनि तथ कम आमदनी मंज़ॖय। दूर दृष्टि ॴसॖख, मॆहमान नवऻज़ी ॴसॖख, ॳक्यसॖय गरस मंज़ ॴस्य बिहिथ ख्यवान च्यवान रोज़ान, ख्वश तॖ ख्वशहाल रोज़ान, बाह त्रख शॊंगान तॖ खार व्वथान, वऺलिथ तॖ मऺलिथ तॖ पानॖवॖन्य समुत ओसुख। धर्मॖच ज़ऻन्यकऻरी, संस्कार तॖ संस्कृति हॖन्ज़ ज़िम्वऻरी, शर्म हय्या, रॊबदाब, लोल, माय महोब्बत, आदर सत्कार  यिम सऻरी चीज़ ॴस्य मेलान तिमन तथ ॳकिस गरस मंज़ यथ मंज़ गरॖक्य सऻरी बऻच़ ॴस्य ॳक्यसॖय रज़ि लमान रोज़ान। तीज़मालि ॴस ज़न फ्यॆकि फ्यॆकि दवा प्यवान बरादरसॖन्ज़ अख अख कथ। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - यिमव धार्मिक स्थापनायव अलाव छि कऺशीरि मंज़ श्रीनगर शहरक्यन हर मऺहलस मंज़ अख अख ज़ॗज़ मन्दर ति ॴस्यमॖत्य यिमन मंज़ मऺहलस मंज़ रोज़न वऻल्य कऺशिर्य बटॖ ल्वकॖट्य बऺड्य ॴस्य वख अकि पूज़ा पाठ करान रोज़ान। सुबहन शामन सऻरी बख्त ॴस्य मीलिथ आरती करान रोज़ान। यिमन मन्दरन मंज़ ॴस्य आसान गणेश जियिन्य मूर्ती, शिव लिंग या माजि शारिकायि हॖन्ज़ मूर्ती। गणपतयार, सोमयार, प्वरुषयार, रॊघनाथ मंन्दर, हनुमान मंदर, गधाधर मन्दर, दुर्गा नाग, व्यच़ार नाग वगैरा वगैरा ॴस्य प्रमुख मन्दर। गामन मंज़ ति ॴस्य जायि जायि मंदर बऺनिथ तॖ ततिक्य लूख ति ॴस्य दपान पूजा पाठ करान रोज़ान। मगर व्वंय गऺयि असि निशि यिम मन्दर स्यठाह दूर यनॖ ॳस्य गऺयि कऺशीरि प्यठॖ च़लनॖ बापथ मजबूर कुनवुह शथ तॖ नमतस मंज़ 

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

03.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

03.02.2022,माघ (माघ) ज़ूनॖ पछॖ (शुक्ल पक्ष) त्रय (तृतीया) ब्रसवार (वीरवार/गुरुवार/ब्रहस्पतवार), श्री सप्तर्षि सम्वत 5097, नक्षत्र शत, राश कुम्भ (चलान), ऋतु शिशर (चलान), द्रठॖपऻन्च़ुक (पंचक) (चलान)... अज़ छि गोरॖ त्रय (गौरी तृतिया) ति

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

बरादरन वॊन तीज़मालि ज़ि मऻजी म्यॆहय छि याद प्यवान तिम दॊह यॆलि यिम मन्ज़िमयऻर्य ॴस्य गरॖ गरॖ गछ़ान रोज़ान ट्यॆकिनि ह्यॆ ह्यॆ। यिम मऺन्ज़िमयऻर ॴस्य ज़्यादॖतर मुस्लमानॖय आसान। पनॖनि ज़ऻच़ हॖन्द्य ब्रह्मण ति ॴस्य ट्यॆकिनि ह्यॆय ह्यॆय आसान तॖ सॗत्य सॗत्य मिलनावान रोज़ान। सानि माजि ति छु म्यॆ वुछमुत आसॖ ज़ातकन नच़ॖनावान रोज़ान ॳकिस गॊरु जीनि प्यठॖ ब्यॆयिस गॊरु जियस ताम। मुस्लमान नऻविद ति आस्य मऺन्ज़िमयारज़ करान रोज़ान। यऺनॖ मोबाइल, इन्टरन्यटॖ, कम्प्यूटर वगैरा बारसस आव मऺन्ज़िमयार्यन हुन्द ओरॖ योर करुन ति गव बंद ह्यु। पर-ज़ऻच़ मंज़ खान्दरन ति द्युत स्यठाह दूर ताम थख ट्यॆकिनि मिलनावनस्। काकन थवि व्वंय ट्यॆकिन्यय ताकस सूंचुन क्याह नेरि वुछतॖय ज़ातॖकस। कर्मॖ लीखाये कर नमस्कार। तीज़माल ति प्यॆयि सोंचस मंज़ ज़ि ॴखॖर यि क्युथ बदलावा ह्यु आव। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

""""""""""""""""""""""""""""""""""

कशीर - कऻशिर्य बटॖ यॊदवय ब्यॊन ब्यॊन दीवि दीवताहन पुज़ान आयि, शिवस तॖ शक्ती छु रूदमुत अख ख़ास  मुकाम। अकि तरफॖ छि कऻशिर्य बटॖ अमरनाथ, महादेव, सऺर्यश्वर, हर्यश्वर, द्यऻन्यश्वर, शेंकराचार पूज़ान रोज़ान, दॊयिमि तरफॖ छि यिम कऻशिय बटॖ परबतॖ च़ऺक्रीश्वरॖ शारिकायि, तुलॖमुलि रऻज्ञ्यन्यायि, ज़ीठयऻरॖ ज़िष्टायि, ज्वाला देवी, भद्रकऻली ति पूज़ान आयि, अकि तरफॖ छि ज़र्मॖ सतम प्यठ भगवान कृष्णस पूज़ान रोज़ान दॊयिमि तरफॖ छि दीवऻली दॊह राम जीयस ति पूज़ान रोज़ान। ॳस्य बटॖ छि नारायणस ति पूज़ान तॖ लक्ष्मी तॖ सरस्वती ति पूज़ान। शारदा दीवी छि सऻन्य प्रज़नथ तॖ कश्यपमऻर याने कऺशीरि मंज़ छि असि बटन हुन्द मूल बऺनिथ।   

**********************

नविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.bloogspot.com प्यठॖ ति)

02.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

---------------------------------

🙏🙏 नमस्कार माहरा

02.02.2022, माघ (माघ) ज़ूनॖ पछॖ (शुक्ल पक्ष) ऒक्दॊह (प्रथमा/प्रतिपदा) देवादेव, ब्वदॖवारं (बुधवार) श्री सप्तर्षि सम्वत 5097,नक्षत्र धनिष्ठा, राश कुम्भ (सुबहॖचि 06.45 बजि प्यठॖ),ऋतु शिशर (चलान), द्रठॖपऻन्च़ुक (पंचक) शुरु...चूंकि पगाह छि द्वय (द्वितिय) रावान पगहुक वॊहरवोद यी ॳज़्य

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

कऺशीरि मंज़ आस्य कऻशिर्य बटॖ तमि वख्तॖ  ट्यॆकिनि मिलनावान रोज़ान संजीदगी सान तॖ यॆलि यि ट्यॆकिन्य मेलिहे तमि पतॖ ॴस्य दॊश्यवय दऺर्य याने न्यॆचिव वऻल्य तॖ कोरि वऻल्य प्रॖछ़ॖगऻर ह्यवान करॖन्य तॖ ॴस्य अख ॳक्यसॖन्जं क्वलावली मंगॖनावान तॖ अथ मंज़ ॴस्य तिमन दॊहन ज़ीठ वरासथ लीखिथ आसान मस्लन  लऺडकॖ सुन्द या कोरि हुन्द नाव, तऻलीम, ज़ा-दॊह, नोकरी, नोकरी किछ़, कति, मुस्तकॖल छा किनॖ आरज़ी, मऻलिसुन्द नाव, मोल कयाह छु करान, मऻज्य कयाह छि करान,   पतॖ गऺयो बॖड्यबबॖ सुन्द नाव तॖ मऻल्यसॖन्ज़ तफ़सील,प्यॆतॖरॖ कऺत्याह, कयाह छि करान, यकजाह छा किनॖ ब्यॊन ब्यॊन छि, माजि हॖन्द्य मालिन्य कम, कतिक्य, माम, मासॖ, प्वफॖ, कति कॗत्याह, लऺडकसॖन्द्य या कोरि हॖन्द्य बऻय, ब्यॆनि वगैरा वगैरा, पतॖ गऺयो मकानॖ, पनुनुय छुखा, कऺच़ पोर, कऺच़ ताक, पतॖ गऺयो कोरि वाल्यन हॖन्ज़ हऺसीयत, आसॖन्य बसॖन्य वऻल्य छा, ह्यॊत द्यॊत क्युथ छुख, दाज दहेज दिनॖ वऻल्य छा। यि सऻरॖय प्रॖछ़ॖगऻर कऺरिथ ओस यिवान फऻस्लॖ करनॖ आंकार या नकार। सॗती ॴस्य पताह करनावान ज़ि कारकुन छा किनॖ कुनि बदलॖ ज़ऻच़ हॖन्द्य मा छि, मस्लन ग़ोर, बुहुर, कान्दुर, हलवोय, बिसोत, वगैरा वगैरा। तीज़मालि वॊन बरादरस। बरादर गव बोज़ान तॖ प्यव सोंचस ज़ि कऺछ़ाह प्रॖछ़ॖगऻर ॴस्य करान ॳस्य तॖ अज़कल ति छि ॳसीय मगर क्याह छि करान।  कति कोर बदलाव छु आमुत। कर्मॖलीखाये कर नमस्कार। कथ छि जऻरी। 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - जीलॖ व्वलरॖ स्यमऺन्ज़्यस दपान नावॖ या डूंगॖ पकनावनस छि ममऻनियथ ति क्याज़ि वनॖनॖ छु यिवान ज़ि अथ व्वलॖरस अंदर छु कमिताम वख्तॖ अख बॊड बारॖ मन्दर ओसमुत तॖ करताम मा छु बुन्युल आमुत तॖ ज़मीन छि तल गऻमॖच़ तॖ पोन्य छु ह्यॊर आमुत खऺसिथ। युस मन्दर ओसमुत ओस सु छु तल पातालस वोतमुत मगर मन्दरुक प्रकोप छु वुनि ति च़ेनॖनॖ यिवान। तवय छि अथ वनान व्वलर राज़ॖ। वारियाहि लटि दपान स्यमंज़स नाव या डूंगॖ पकनावनॖ विज़ि छि स्व नाव या डूंगॖ  रुकिथ गोमुत। कॆंह बऺली व्वलरस मंज़ त्रावनॖ पतय छि नाव या डूंगॖ दऺछ्युन खोवुर पॊकॗमुत। यि दपान व्वलरॖक्यन हऻन्ज़न छि ख़बर तॖ तवय छि नॖ व्वलरॖ मऺन्ज़्य पकान बऺल्कि छि बठि बठि पकान रोज़ान। दय ज़ानि पॊज़ क्याह तॖ अपुज़ क्याह

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)