01.02.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

01.02.2022, माघ (माघ) गटॖ पछॖ (कृष्ण पक्ष) मावस (अमावस्या) देवादेव बॊम्वार (मंगलवार), श्री सप्तर्षि सम्वत 5097, नक्षत्र श्रवण, राश मकर (चलान) ऋतु शिशर (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि वॊन बरादरस ज़ि यि म्यऻन्य ज़ाम ॴस्य कम कम कथॖ बोज़ॖनावान तॖ कुनि नतॖ कुनि कथि मंज़ ॴस माधव जुवनि गरिच कथ ति व्वथानॖय रोज़ान। बरादरन  वॊन तीज़मालि ज़ि मऻजी यिथॖपऻठ्य फ्वल्यमॖत्य पोशि बागॖच मुश्कॖन अम्बार छि दूर दुर ताम वातान तॖ लूख छि यिमन बागन अलनॖ तॖ वलनॖ यिवान तिथय पऻठ्य यॆलि कांह गरॖ संस्कारव ब्वरुत आसान छु ॳहलॖ तॖ मऺहलॖ छु यिथ्यन गरन मिसाल बनऻविथ पनॖन्यन शुर्यन कट्यन ताम वातनावनॖच कूशिश करान रोज़ान। तिहाबा छुय पॊज़। तीज़मालि द्युत जवाब बरादरस। दपान यिम ज़िठ्य त्रॆ न्यॆचिव नोकरीयन मंज़ लऺग्यमॖत्य ॴस्य, यिहॖन्ज़ॖ ट्यॆकनि आयि कडनॖ खान्दरॖ बापथ। तिमन दॊहन दपान युस ग्रॆज्यवेट याने बी ए पास ओस आसान सु ओस यिवान मानॖनॖ जान पॊरमॖत तॖ यॊदवय सु सरकऻर्य नोकरी मंज़ ति आसिहे तऺमिस ॴस्य कोरि वऻल्य थफॖ-थफ करान रोज़ान। न्यॆचिव वऻल्य ति ॴस्य यछ़ान ज़ि कूर गछ़ि कार कसॖब ज़ानन वाज्यन आसॖन्य याने रनुन प्यवुन छुसा तगान, सिलऻया विलऻया छसॖ तगान, शक्लि अक्लि किछ़ छि। यॊदवय कूर ति आसिहे पंरमॖच़, कोताह छुन सना पॊरमुत, नोकरी ति छा करान। यि प्रॖछ़ॖगऻर ति ॴस यिवान करनॖ तॖ कोरि हुन्द बाव ति ओस बडान रोज़ान तऺम्यसॖन्ज़ि  हुन्नरॖ मुतऻबिक तॖ क्वलावऺली मुतऻबिक। माधव जुवुनिस गरस मंज़ रूद मंज़िमयार्यन हुन्द युन गछ़ुन केंच़स कालस। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - कऺशीरि मंज़ छि रूज़मॖच़ जीलन हॖन्ज़ बरमार दफ अमापॊज़ सारिवॖय जीलव मंज़ॖ बॊड जील दपान छु व्वलर जील। अमि ल्वकुट छु जीलि डल। व्वलरस मुतलक़ यॊत ताम म्यॆ ज़्वन छु दपान व्वलरुक सन्यर छु नॖ अथि आमुत कॆंह। यि जील छु खजरस तॖ ज़्येछॖरस मंज़ ति स्यठाह बॊड जील बकाया जीलव न्यस्बतॖ। अथ जीलस छि कऻशिर बटॖ वनान व्वलर राज़ॖ ति। यॆलि ति हवा तेज़ आसान छु याने वावॖ छ़ठ तेज़ आसान छि दपान यि व्वलर राज़ॖ छु खुंखार ऱवख हावान यि दऺप्यज़ि ति कॆंह नावॖ यिम पकान छि अथ व्वलरस मंज़ तिम छि व्वलरकि बठि बठि पकनॖच कूशिश करान रोज़ान। अथ व्वलॖरस मुतलक छि कॆंह प्रानि कथॖ मॊहशूर। अमि व्वलरॖ मंज़ ति छि नदॖर्य मेलान रोज़ान। अमि अलावॖ दपान व्वलर जीलस मंज़ छि क्रॖहॖन्य गऻर्य ति मेलान रोज़ान। 

**********************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

31.01.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

31.01.2022, माघ (माघ) गटॖ पछॖ (कृष्ण पक्ष) च़्वदह (चतुर्दशी) देवादेव, च़ऺन्दॖरवार (सोमवार) श्री सप्तर्षि सम्वत 5097, नक्षत्र उ.षा, राश मकर (चलान) ऋतु शिशर (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि द्युत बरादरस जवाब यि वऺनिथ ज़ि यथ मकानस मंज़ माधव जुवॖन्य किरायि प्यठ रोज़ान ॴस्य तिमन नखॖ मकानस मंज़ ॴस्य म्यऻन्य ज़ाम रोज़ान। यिमन ओस अख ॳक्यसुन्द गरॖ युन गछ़ुन जान पऻठ्य। कऺशीरि मंज़ हाबा ओस तमि वख्तॖ दपान समुत स्यठाह पानॖवुन्य। हमसायि ओस बरोसॖमंद आसान, नखि डखि ॴस्य रोज़ान अख ॳकिस, द्वखस स्वखस मंज़ अकार बकार यिवान। ॳकिस आसिहे व्वत्सव आसान, महलॖ ओस खडा आसान। खान्दरस प्यठ ओस अकि गर्युक बिस्तरॖ, ब्यॆयि गरॖक्य बानॖ, त्रॆयमिस गरस मंज़ वऺरॖ तॖ च़ूर्यमिस गरस मंज़ शामियानॖ। बरादरन बऺडरऻव कथ यि वऺनिथ ज़ि म्यॆहय छु याद प्यवान पनुन ल्वकॖचार मऻजी। खान्दरस प्यठ ॴस्य पथर बिहिथ बतॖ ख्यवान तॖ बतॖ सिन्य बऻगरावनॖ बापथ ॳस्य मऺहलिक्य सऻरी शुर्य मीलिथ कामि अंद वातनावान। अख ओस कोचस कोश त्रावान, ब्याख ओस कोचस डेडि बनावान रोज़ान। बासान ॴस व्वसॖ द्रॏसॖ। तीज़मालि वॊन बरादरस। दपान ॳस्य त्यॆलि खाति हॖन्द्यन खान्दर तॖ फाति हॖन्द्यन व्वसॖ द्रॏस। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - अथ जीलि डलस मंज़ छि लूख श्रान करान रोज़ान, छ़ान्ठ वायान। वख अकि ॴस्य कॆंह छ़ान्ठ ज़ानन वऻल्य डलस क्रॏस करान। क्रॏस मत्लब डलस अकि अंदॖ प्यठॖ ब्यॆयिस अंदस ताम छ़ान्ठ वायान वायान गछ़ुन। हालांकि डलुक खजर छु स्यठाह बॊड, अवॖ म्वखॖ ओस यिवान तय करनॖ ज़ि फलऻन्य जायि प्यठॖ फलऻन्य जायि ताम छ़ान्ठ वायिन्य तॖ वापस पनॖनि जायि वातुन गव डल क्रॏस करनस बराबर। दपान कोतरखानॖ प्यठॖ चार चिनऻरी ताम युस अपारि यपोर छ़ान्ठ वायिहे, तऺमिस ओस यिवान यनामॖ दिनॖ, सऺर्टिफिकेट दिनॖ तॖ शायद नक़द यनामॖ ति। अख समस्या ॴस गछ़ान खडा छ़ान्ठ वाल्यन हॖन्दि बापथ स्व गऺयि यि ज़ि दपान डलस मंज़ छ़ान्ठ वायान वायान मा ॴस्य यि डलॖच हिल सऻर्यसॖय पानस अंदॖ वंदॖ यिवान वलनॖ तॖ अमि मूजूब छि अथ डलस मंज़ वारियाह हऻदिसॖ सपद्येमॖत्य तॖ कॆंह लूख डलस मंज़ फऺट्यमॖत्य तॖ अथि नॖ आमॖत्य। अख ख़ास वजह छु शायद यि रूदमुत तॖ डल क्रॏस करुन छु आमुत बंद करनॖ। हालांकि श्रान छि अज़कल ति करान रोज़ान मगर तीतिस हिसस दपान छि यिवान हिल विल च़टनॖ तॖ जाय छि महफूज़ यिवान बनावनॖ।

**********************

नऺविव तॖ फॊलिव

भूषण कौल दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिवkoshursabak.blogspot.com प्यठॖ ति)

30.01.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

30.01.2022, माघ (माघ) गटॖ पछॖ (कृष्ण पक्ष) त्रुवाह (त्रयोदशी) देवादेव, आथवार (रविवार/ऐतवार) श्री सप्तर्षि सम्वत 5097, नक्षत्र पू.षा, राश मकर (रऻच़ हॖन्ज़ॖ 05.46 बजि प्यठॖ), ऋतु शिशर (चलान)...अज़ छि शिव चॊतुर्दशी

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

दपान यथ गरस मंज़ पाठ पूज़ा आसि चलान, बजन कीर्तन आसि चलान, गन्टा तॖ शेंकॖ शब्द आसि वज़ान तथ गरस मंज़ दपान छि लक्ष्मी वास करान, सरस्वती टोठान तॖ शारका स्वख तॖ सम्पति बऻगरान रोज़ान। माधव जुवुन गरॖ दपान ओस अमि रऺन्ग्य शूबॖवुन गरॖ। सऻन्पकुज्य ॴस दपान दानस प्यठ वायि याने बतॖ बनावनॖ ब्रोंह दानस मंज़ त्वमलॖच आहुती दिवान, बतॖ बऺनिथ ग्वडॖ काव-पचि प्यठ बतॖ जानावारन बापथ त्रावान, माधव जुव तॖ ॳम्यसुन्द सोरुय परिवार ख्यनॖ ब्रोंह हवनॖ-म्यॆट यथ ॳस्य वनान छि हून्य-म्यॆट त्रावान, छ़्यॆटुक श्रोच़रूक पूर ख़याल थवान तॖ यिम सऻरी संस्कार आसनॖ म्वखॖ दपान माधव जुवुन गरॖ ओस बन्योमुत असवुन तॖ गिन्दवुन गरॖ। माधव जुवॖन्य शुर्य गऺयि परान रोज़ान तॖ गरॖ-नाव रूज़ पकान स्यठाह जान पऻठ्य। वारॖ वारॖ कॊर माधव जुवॖ सॖन्द्यव न्यॆचव्यव बी ए पास। दपान ज़िठ्यन त्र्यन बायन बनेयि सरकऻर्य नोकरी हॊदॖ हरि रॊस्तॖय तॖ बकाया ज़ॖ बऻय गऺयि ब्रोंह कुन परान। गरॖच मऻली हालत ति ह्यॆच़नख सुदॖरॖन्य। दपान यिम ज़िठ्य त्रॆ बऻय ॴस्य ऱयतुक तनख्वाह मऻलिस हवालॖ करान तॖ सु दपान ओस यिमन क्याहताम चन्दॖ खर्च दिवान रोज़ान तॖ ग्रहस्तॖच नाव रूज़ वावस सॗत्य सॗत्य पकान। तीज़मालि बोज़नोव बरादर माधव जुवनि गर्युक ॳन्दरिम सीर। बरादर रूद बोज़ान तॖ सोंचाह कॊरुन ज़ि सु वख क्याह ओस तॖ अज़कलुक वख क्याह छु। कति कॊर छु बदलाव  आमुत। बरादरन प्रुछ़ तीज़मालि ज़ि मऻजी च़्यॆ किथॖ पऻठ्य छय यीच़ ख़बर अमि गरॖच। कथ छि जऻरी।   

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - वनॖ च्यन यार्यन ख्वदायि सुन्द सग। क्वदर्यतुक निज़ाम ति छु रहस्यमय। नदॖर्य छि व्वपदान यिमन जीलन मंज़, दलदलन मंज़ या रबि द्वबन मंज़ दपान ब्यालि रॊस्तुय पऻन्य पानय तिथय पऻठ्य यिथॖ पऻठ्य कुल्य कऺट्य वनन मंज़ खसान रोज़ान छि। यिथय पऻठ्य दपान ह्यडर  ति छि पऻन्य पानय नेरान पहाड़ दामनवॖ तलॖ यॆलि यॆलि वॖज़ॖमलॖ तॖ गगरायि छि गछ़ान रोज़ान। कऻशीरि मंज़ ॴस्य वख्तॗ अकि कनॖगॖछ ति मेलान रोज़ान मगर गऺयि गऻबॖय पतॖ। ज़ानॖन्य वाज्यन कथ छि यि ज़ि सान्यव ज़िठ्यव या ऋश्यव मुनियव छु सोन सम्बंध थोवमुत फलन फूलन या सब्ज़ियन सॗत्य या कुल्यन कट्यन सॗत्य ग्वड प्यठय। मस्लन डून, मुज्य, व्वपलहाक, हन्द, तुलसी कुल, केलॖ वऺथॖर, ख्यलॖ वऺथॖर, पम्बछ, ज़ाफल वगैरा। बिन्डी मंज़ दपान छि आसान पांछ़ ज़ऺद्य यिम सान्यन पांच़न तत्वन सॗत्य जुडिथ थवान छि। वनॖनुक मत्लब म्योन छु ज़ि ॳस्य छि इस्तिमाल करान रोज़ान यिमन चीज़न हुन्द मगर कथ क्याह, कोताह महत्व छु आमुत दिनॖ तॖ क्याज़ि ॳस्य छि अमि निशि स्यठाह दूर तॖ छि अज्ञऻन्य। सवाल छि वारियाह जवाब छि छ़ान्डान ति क्याज़ि यि ज्ञान ज़ानुन ति छु स्यठाह ज़रूरी म्यॆ बासान।

**********************

नऺविव तॖ फॊलिव

भूषण कौल "दीप"  

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

29.01.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

29.01.2022, माघ (माघ) गटॖ पछॖ (कृष्ण पक्ष) बाह (द्वादशी) बटॖवार (शनिवार/शनिश्चरवार), श्री सप्तर्षि सम्वत 5097, नक्षत्र मूल, राश धनु (चलान) ऋतु शिशर (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि थऻव कथ जऻरी। माधव जुवुनि गर्युक नाव दपान ओस पनॖनिस ॳहलस मऺहलस मंज़ ज़्यॆवि प्यठ ह्यॊन लायकॖ। ख़बर क्याज़ि। बरादरन कॊर सवालॖ तीज़मालि कुन। दपान हाबा यिहॖन्दिस गरस मंज़ ओस नित्य पूज़ा पाठ प्रभातॖ प्यठय चलान आसान। गरिक्य सऻरी बऻच़ ॴस्य शिवालॖ मंन्दरस गछ़ान। शिवलिंगस अभिषेक याने पोन्य बावान, ट्यॊक करान, माधव जुव तॖ ॳम्यसॖन्द्यन पान्च़वॖन्य न्यॆचव्यन ओस कलस प्यठ छ़ोग तॖ ड्यकस प्यठ ट्यॊक आसान। गरस मंज़ दपान माधव जुव ओस ठोकुर कुठिस मंज़ पूज़ा पाठ करान रोज़ान। घन्टा तॖ शंख वायान रोज़ान। संद्या च़ोंग ओस यिवान ज़ालनॖ दॊहय तॖ शामन शामन दपान ॴस्य सऻरी बऻच़ यक्जाह बिहिथ समा गया करान, लीलायि परान, बजन करान रोज़ान। सुबहऻय न्यॆन्दरि वऺथित ॴस माधव जुवॖन्य ज़नान ब्रान्दॖ छलान रोज़ान। तऺमिस क्याह सना ओस नाव। बरादरन प्रुछ़ तीज़मालि। तऺमिस हाबा ओस नाव सऻम्पॖकुज्य। ती छुम बूज़मुत। मऻजी त्यॆलि ॴस्य ना वऻरिव गरस मंज़ नाव बदलावान रोज़ान, म्यॆ छु बूज़मुत। आहनबा म्यॆति छु यि नाव खान्दरॖ पतय प्योमुत। दपान खान्दरॖ पतॖ छु गुत्थुर बदलान तवय छि नाव बदलावनॖच प्रथा शायद रूज़मॖच़ ज़ानि दय कॗत्य कालॖ प्यठॖ। गुत्थुर छय ना पताह क्याह गव। तीज़मालि प्रुछ़ बरादरस।कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - जीलि डलॖ तॖ व्वलरॖ जीलॖ अलावॖ दपान कऺशीरि मंज़ ॴस्य नदॖर्य आंचार तॖ मानसबलॖ जीलॖ तरफॖ ति मेलान रोज़ान। यॊत ताम म्यॆ ज़्वन छु कऻशीरि मंज़ ॴस्य नदॖर्य ग्यॆज्यव हिसाबॖ कॖनॖनॖ यिवान। ग्यॆज याने दऺह बाह नदॖर्य कूचॖ ॳकिस द्यॆलिस मंज़ गऺन्डिथ। मगर कऺशीरि न्यबर छि यिम नदॖर्य यलय तोलॖ हिसाबॖ मेलान। यिमन नदॖर्यन छि ब्यॊन ब्यॊन जायन ब्यॊन ब्यॊन नावॖ सॗत्य लूख ज़ानान। कऺशीरि मंज़ छि नदरिस प्यठ कॆंह मुहावरॖ   ति बन्येमॖत्य मस्लन च़ॖ छुख डलॖक्य नदॖर्य वनान किनॖ आंचारॖक्य। मत्लब च़ॖ छुखा अपुज़ वनान किनॖ पॊज़। दॊयिम मुहावरॖ छु तला यिम नदॖर्य मतॖ वनतॖ माने  तला अपुज़ मतॖ वनतॖ। ब्यॆयि छु नदरिस अध्यात्मिक रूप ति आमुत दिनॖ। दपान नदरिस छि आसान नव ज़ऺद्य तॖ सॏनिस शरीरस मंज़ ति छि नव द्वार तॖ यिथॖपऻठ्य छु क्याहताम सम्बंध यिमन पानवुन्य।   

**********************

नऺविव तॖ फॊलिव

भूषण कौल "दीप"  

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठ ति)

28.01.2022

27.01.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏नमस्कार माहरा

27.01.2022, माघ (माघ) गटॖ पछॖ (कृष्ण पक्ष) दऺहम (दशमी) ब्रसवार (गरूवार/वीरवार/ब्रहस्पतवार) श्री सप्तर्षि सम्वत 5097, नक्षत्र विशा, राश वृश्चिक (चलान) ऋतु शिशर (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि थऻव कथ जऻरी। माधव जुवस ओस दपान तनखा कमॖय पाहन मगर सतवऺन्य शुर्यन ओस रछान लोलॖ सान। चूंकि कोरि दपान आसॖ पथकालि कमॖय पाहन परान मगर तिमन ॴस यिवान तरबियत दिनॖ गरच्यन बकाया काम्यन कुन मस्लन खानॖ फकायि कुन, सलयि तॖ करोशी कामि कुन तॖ अवॖ म्वखॖ आसॖ नॖ माधव जुवनि ज़ॖ कोरि ज़्यादॖ परिमच़ॖ  तॖ यिहुन्द खान्दर ति दपान आमुत ओस करनॖ ल्वकचि वऻन्सि मंज़ॖय। दपान यिम दॊश्यवय कोरि आसॖ शक्लि अक्लि स्यठाह जान। माधव जुव ति दपान ओसमुत ओस पानॖ सफ़ेद पूशी, स्यठाह शरीफ तॖ अध्यात्मिक स्वभावुक तॖ अवॖ म्वखॖ दपान यिम दॊश्यव कोरि  आस भागॖन्य आमच़ॖ जान तॖ बजाह गरन मंज़। माधव जुवॖन्य बकाया पांच़वय न्यॆचिव  रूद्य परान तॖ गऺयि बडान ति सॗत्य सॗत्य। दपान यिम पान्च़वय बऻय गऺयि बऺड्य गछ़ान तॖ यिमन बासेयि जायि हॖन्ज़ तंगी हिप। हालांकि यॆमि वख्तॖ माधव जुवन मकानॖ किरायस प्यठ रॊटमुत ओस तमि वख्तॖ दपान ओसमॖच़ ओस यि मकान खुलॖ डुलॖ दु पोर मगर शुर्य गऺयि ज़्यवान तॖ जायि हॖन्ज़ व्यछ़य ह्यॆच़ॖन्य बासॖन्य मगर अथॖ तंग आसनॖ म्वखॖ ह्यॊकुख नॖ यि मकानॖ बदलावुन या नॊव बनावुन। यि दऺप्यज़ि ति दपान यिमव सारिवॖय बायन छुनॖ ज़ांह ति मऻलिस माजि पनॖनि जायि व्यछ़युक ज़िकिर ऒरमुत। समय गव नेरान तॖ परान रूद्य यिम पांच़वय बऻय सरकऻर्य स्कूलन मंज़। दपान तिहॖन्दि वख्तॖ यॊदवय प्राईवेट स्कूल छि स्यठाह कम ॴस्यमॖत्य मगर तिमन स्कूलन मंज़ दपान ॴस्य ॳमीर शुर्य परान रोज़ान। सरकऻर्य स्कूलन मंज़ ओस फ़ीस कमॖय यिथ दऺप्यज़ि ति न आसनस बराबर तॖ प्राईवेट स्कूलन हुन्द फ़ीस ओस हना दपान ज़्यादय पाहन आसान। मगर शुर्य तन्दल दपान ॴस तिमन दॊहन प्रथ गरस मंज़ आसान। बोज़नस तल छु यिवान ज़ि शुर्य ज़्यॆवरावनस ॴसमॖच़ ज़न ॴस मान मान। प्रथ गरस मंज़ दपान ॴस्य पान्च़ि शॆयि ह्यॊरॖय शुर्य आसान तॖ ब्वन नॖ। कथ छि जऻरी  

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - अथ जीलि डलस मंज़ छि गासॖव कुल्य व्वपदान रोज़ान यथ कऻशिय ज़बऻन्य मंज़ वनान छि हिल। नावि हऻन्ज़ छि हमतुलि, चपॖ तॖ द्राति सॗत्य च़टान रोज़ान यि हिल तॖ अथ ॳन्द्य पऺख्य ज़ठ कुल्य तॖ रोज़ान सॊम्बरावान डलकिस कुनि अंदस कुन। यि सॊम्बरऻवमॖच़  हिल छि यिवान ह्वखॖनावनॖ तॖ केंच़ॖकऻल्य पतॖ छि यि सऻरॖय सॊम्बरन ज़मीनॖच शकॖल  इख्तियार करान तॖ अथ ज़मीनि च़क्लस प्यठ छि यिवान कुल्य सब्ज़ी पोश वगैरा ववनॖ। अथ ज़मीनॖ च़क्लस छि वनान ज़मीनॖ राद ति। हालांकि ज़मीन छॆनॖ कुनि जायि ति पनॖन्य जाय वदलावान मगर डलॖच यि ज़मीन छि यीरवॖन्य आसान। यि छि वऻहिद अख ज़मीन स्व  य्वस पऻनिस प्यठ जाय पनॖन्य वदलऻविथ ह्यकान छि।  अथ छि वनान यीरवॖन्य ज़मीन ति

**********************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

26.01.2022

25.01.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

25.01.2022, माघ (माघ) गटॖ पछॖ (कृष्ण पक्ष) सतम (सप्तमी) देवादेव, बॊम्वार (मंगलवार) श्री सप्तर्षि सम्वत 5097, नक्षत्र चित्र, राश तुला (चलान), ऋतु शिशर (चलान)...चूंकि पगाह छि ॴठम (अष्टमी) रावान पगहुक वॊहरवोद यी ॳज़्य

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि प्यव क्याहताम याद तॖ प्रुछ़ुन बरादरस ज़ि च़्यॆ मा छुय ज़्वन तति कऺशीरि मंज़ ओस कनिकऺदलॖ माधव जुव भट्ट रोज़ान। बरादरन द्युत पनॖनिस ज़ॆहनस ज़ोर ह्यु तॖ प्योस नॖ पलि कॆंह तॖ प्रॖछ़ुन तीज़मालि। कनिकऺदलॖ कतिनस बराबर ह्यु ओस रोज़ान। तीज़मालि वॊनॖनस याद पावान पावान ज़ि तिम हाबा ॴस्य त्वहीय हमसायि चोटॖ बाज़रॖ बंडस प्यठ रोज़ान। तथ बंडस प्यठ ओस अख ज़ब्यॆहखानॖ ति। स्व वथ ॴस गछ़ान शिवालय मंदरस कुन ति तॖ पतॖ ॴस स्व वथ ब्रोंहकुन नेरान कॊत ताम कुन । ज़ब्यॆहखानॖ छय पताह कथ छि वनान। तीज़मालि प्रुछ़ मंज़्य बरादरस। बरादरन कऺर असनहऻना तॖ वॊनुन तीज़मालि कुन। आहनी मऻजी ल्वकॖचार हय छुम तिमवॖय वतव किन्य मॊन्डॖमुत। सु ज़ब्यॆहखानॖ छुम वुनि ति ॳछन तलॖय। सुबहऻय ॴस्य पुज्य कटन अनान रोज़ान अथ ज़ब्यॆहखानस मंज़ तॖ मारान रोज़ान तॖ ॴस्य मऻरिथ तिमन कटन त्रॊदि छ़ॖनान शॆशतर्य कुन्डन मंज़। म्युन्सिपुल्टी वऻल्य ॴस्य तिमन अलऻन्द्य कटन मॊहर त्रावान तॖ अदॖ ओस पुज निवान यिमन कटन पनॖनिस वानस प्यठ तॖ ओस माज़ कॖनान लूकन। गव ख़बर छय। तीज़मालि प्रुछ़ बरादरस। तऺथ्य ज़ब्यॆहखानस ब्रोंह पाहन ओस ॳमिस माधव जुवुन मकानॖ। नॊव मकानॖ ओस सु। बरादरन दिच़ च़्यफ हिश तॖ वॊनुन तीज़मालि आहनी प्योम याद सु बॊड बॊड मकानॖ। तिम ॴस्य शायद हन्दवारि रोज़ान अमि ब्रोंह। नबा तिम ॴस्यमॖत्य ॴस्य वऺड्यपोरिक्य। सु गरॖ किथॖ पऻठ्य प्यॊय च़्यॆ अज़ याद मऻजी। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - अथ जीलि डलस मंज़ ॴस्य आसान अगन-बोट ति। यिमन छि वनान मोटर-लांच ति। अथ अगनबोटस सॗत्य ॴस आसान ज़ीठ पऺट गऺन्डिथ तॖ तथ प्यठ ॴस आसान ब्याख अख हच्युव तखतॖ इस्तादॖ गन्डिथ यथ सऻलऻन्य ॴस कछॖ लऻगिथ न्यथॖनऺन्य वॊदॖन्य रूज़िथ थफ कऺरिथ डलस मंज़ सवऻर्य करान रोज़ान तॖ सॗती डलस मंज़ श्रान-वान ति करान रोज़ान। यिम अगन-बोट ति छि हऻन्ज़ॖय चलावान रोज़ान। अमि अलावॖ छि अथ जीलि डलस मंज़ नेहरु पार्क, कोतरखान, स्वनॖलऻंक, रॊपॖलऻंक, चार-चिनारी तॖ सऻलऻनी छि यिमन जायन गऺछ़िथ मौज मऺस्ती करान रोज़ान। नेहरु पार्कि मंज़ ओस आसान अख  होटल ति तॖ तथ होटलॖकिस च़ऺकिस तल छि कॆंह ज़ेछि नावॖ तॖ वख अकि ॴस्य यिमव नावव ज़ऺरियि अति प्यठॖ बोट रेस करान रोज़ान यथ मंज़ कॆंह स्कूल मस्लन मिशन स्कूल, रंगॖटेंग स्कूलॖक्य शुर्य ॴस्य शिरकत कऺरिथ यनामॖक्य हक़दार बनान

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

24.01.2022

,🙏🙏 नमस्कार माहरा

24.01.2022 माघ (माघ) गटॖ पछॖ (कृष्ण पक्ष) शॆयम (षष्ठी) देवादेव, च़ऺन्दॖरवार (सोमवार),श्री सप्तर्षि सम्वत 5097, नक्षत्र हस्त, राश तुला (रऻच़ हॖन्ज़ॖ 11.08 बजि प्यठ) ऋतु शिशर (चलान)...अज़ छि साहिबॖ सतम ति

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

********************** 

बरादरन वॊन तीज़मालि ज़ि मऻजी म्यॆ आयि नॖ रऻत्य रातस न्यॆन्दॖर। ति क्याज़ि सना। तीज़मालि प्रुछ़ बरादरस। रातुक च्योन सवालॖ ओसुम ज़ॆहनस मंज़ तॖ वूर्य वूर्य गोस न्यॆन्दरि मंज़ वऺथित यि सूंचिथ ज़ि यॊदवय ॳस्य करव फऻसलॖ ज़ि पऺकिव कऺशीरि तरव तॖ बॖ छुस सोंचान ज़ि तति ॳस्य क्याह सना करव। तति रोज़व च़ॖ तॖ बॖ तॖ लुतॖ बब। अल्बत अख चीज़ छुम नज़र यिवान। क्याह सना। बरादरन दॊपनस बटॖ तरन कऺशीरि, जाया रटन अगर मीज, कुल्फा करन तॖ यिन वापस योर। युथ यॆति दपनख लॊग नय तॖ जॊग आव पॊत फीरिथ नाहकय गोख मुरि नीरिथ तॖ आख ब्यॆयि वापस दज़नि यॆति क्रायि तापस। कथ छि जऻरी  

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

कऺशीर - अथ जीलि डलस मंज़ छि क़रीबन हथशथ हाऊस बोट अकि अंदॖ ॳकिस जायि पऻनिस प्यठ खडा । यिमन हाऊस बोटन छि  प्यठॖकनि ब्यॊन ब्यॊन नावॖचि नावॖ पचि लागनॖ आमच़ॖ। हाऊस बोटन सॗत्य छि अख  शिकऻर्य आसान यॆमि दऺस्य सऻलऻन्य छि डलस ॳन्द्य पऺख्य सऻर करान रोज़ान। जीलि डलस छु अकि तरफॖ अख बॊड दरवाज़ॖ बऺनिथ यथ वनान छि डलगेट। चूंकि डलॖचि पानिच सतह तॖ व्यॆथि हॖन्दि पानिच सतह छि ह्यॊर ब्वन, डलगेट छु यिवान बंद करनॖ तॊताम यॊतताम पानिच सतह छि बराबर सप्दान तॖ यि गेट छु यिवान मुच़रावनॖ तॖ नावॖ छि ह्यकान आराम सान दऺर्यावॖ प्यठॖ डलस अन्दर ॳच़िथ या डलॖ न्यवर नीरिथ। दऺर्यायि जेहलमस छि वनान व्यथ ति तॖ व्यतस्ता ति। यिम हाउस बोट छि व्यॆथि याने दऺर्याव जॆहलमक्यन बठ्यन सॗत्य सॗत्य ति नज़र यिवान मगर दपान छि ज़ि तिमन हाउस बोटन हॖन्ज़ मंग छि डलक्यन हाउस बोटन न्यस्बतॖ कम आसान तॖ आमदनी ति छि डलक्यन हाऊस बोटन न्यस्बतॖ कमॖय रोज़ान। वुछुन लायक़ तॖ सोंचुन लायक़ छु यि ज़ि च़्वन पांच़न करोरन रॊपियन हुन्द हाऊस बोट, मऻलिख याने हऻन्ज़ अमि हाऊस बोटुक छु अक्सर नाखान्दॖ तॖ अनपढ मगर गरस पनॖनिस मंज़ पनॖन्यन बऻच़न याने शुर्यन कट्यन मंज़ बिहितॖय लछ बॊद रॊपियि कमावन वोल छु कऺशीरि मंज़ शहनशाह ह्यु बासान। अथ बजायि छि कऻशिर्य बटॖ पऺर्यमॖत्य लीख्यमॖत्य बॆगरॖ गऺछ़िथ अख लार तॖ अख दार तॖ छि अख ॳकिस मेलनस बेक़रार तॖ छुख बस इन्तिज़ार। 

**********************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

23.01.2022

🙏🙏 नमस्कार माहरा

23.01.2022, माघ (माघ) गटॖ पछॖ (कृष्ण पक्ष) पऻन्च़म (पंचमी) देवादेव आथवार (रविवार/ऐतवार) श्री सप्तर्षि सम्वत 5097, नक्षत्र उ.फा, राश कन्या (चलान) ऋतु शिशर (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि प्रुछ़ बरादरस ज़ि च़्यॆ कयाबा छुय बासान ॳस्य बटॖ गछ़वॖ वापस कऺशीरि। बरादरन त्रऻव असनॖहऻना तॖ वॊनुन तीज़मालि ज़ि च़्यॆ प्रुछ़ुथ त्युथ सवालॖ यथ सऻनिस समुदायस वऻत्य द्वयत्रॖह वऺरी जवाब छ़ान्डान तॖ वुनि ति छॆनॖ पताह ज़ि कूत काल लगि ब्यॆयि। यॊदवय पॊज़ बोज़ख मऻजी म्योन मन छु वनान ज़ि व्वंय छु पॊत फेरुन हना मुश्किल तिक्याज़ि यिमन द्वयत्रॖहन वऺर्यन मंज़ बदलेयि सान्यन शुर्यन हॖन्ज़ तस्वीर तॖ तिमन छुनॖ कांह तदबीर नज़र यिवान कऺशीरि मंज़ युस त्युहुन्द तक्दीर बनावनस मंज़ कारामद सप्दि। न मेल्यख स्व पढऻय, न स्व नोकरी, सरकऻर्य या गैर-सरकऻर्य, न मेल्यख सु स्कून्, न स्व शऻन्ती, न मेल्यख व्वंय कांह च़ुक्यदार हमसायि, न मेल्यख कांह ब्रह्मुण, न कांह रऻछदर तॖ न कांह रहबर। सु यॊदवय कऺशीरि गछ़ि तॖ गछ़ि क्या मुद्दा ह्यथ, कऺमिस ह्यथ, कॊत कुन तॖ कथ कूनस। यिमन सारिनी सवालन हुन्द जवाब छ़ान्डनस नेरन ब्यॆयि त्रॖह चतजी वऺरी। मऻजी दय ज़ानि कुस कति आसि तॊत ताम वोतमुत। बरादरन कऺर छ़्वपॖ तॖ दमफुट्य गऺयि तीज़माल ति। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""

कऺशीरि मंज़ - त्वहि आसि पताह ज़ि कऺशीरि मंज़ छु डल जील तॖ अथ जीलॖ डलस मंज़ छि हाऊस बोट ति।  दुनिहीक्यव ब्यॊन ब्यॊन जायव प्यठॖ छि सऻलऻन्य यिवान रोज़ान तॖ यिमन हाउस बोटन मंज़ बिहिथ लुतुफ ज़िन्दगी हुन्द तुलान रोज़ान। यि हाउस बोट छु यिवान बनावनॖ डून्य लऺकरि तॖ दिवॖदोर लऺकॖरि हुन्द।अथ ॳकिस हाउस बोटस मंज़ छि त्रॆ गालव याने त्रॆ कुठ्य आसान तॖ अख अख गालव छु मकानकिस ॳकिस कुठिस बराबर आसान खजरस मंज़। यिम गालव छि आसान सज्जऻविथ तिथय पऻठ्य यिथॖ पऻठ्य कुनि बऺडि होटलुक कमरॖ छु आसान। दपान छि ज़ि अख हाऊस बोट बनावनस प्यठ छु कम अज़ कम त्रॆयि प्यठॖ चोर करोर रॊपियि खर्चॖ यिवान। अकिस गालवस छु ॳकि रऻच़ बापथ च़ोरि प्यठॖ पऻन्च़न सासन रॊपियन ताम किराय यिवान ह्यनॖ। ज़्यादॖतर छि हऻन्ज़ याने यिमन हाऊस बोटन हॖन्द्य मऻलिख छिनॖ ज़्यादॖ पऺर्यमॖत्य लीख्यमॖत्य आसान मगर यिम हऻन्ज़ छि रोज़ान करान वार्तालाप व्यलायती लूकन सॗत्य खऺन्ड्य-फुट्य हिसाबय तॖ चलावान पनुन कारोबार तॖ कमावान पनॖन्य च़ॊट शाहानॖ पऻठ्य पनॖनिसॖय गरस मंज़ बिहिथ तॖ पनॖन्यन शुर्यन बऻच़न सॗत्य।

**********************

नऺविव तॖ फॊलिव

भूषण कौल 'दीप"  

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

22.01.2022

🙏🙏 नमस्कार माहरा

22.01.2022, माघ (माघ) गटॖ पछॖ (कृष्ण पक्ष) च़ोरम (चतुर्थी) देवादेव, बटॖवार (शनिवार/शनिश्चरवार), श्री सप्तर्षि सम्वत 5097, नक्षत्र पू.फा, राश कन्या (दुहचि 04.48 बजि प्यठॖ), ऋतु शिशर (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

ॳक्य मूस्लमानन छु बऻथ अख ल्यूखमुत "कऻशुर पंडित वुछुम वते, रोटनस नालॖमते, दॊपनम च़ॖ ओसुख कते, बॖ रॊटनस नालॖ मते"..यि बऻथ बूज़िथ बास्यव म्यॆ ज़ि लेखनवऻल्य छुनॖ पनुन लोल बटस कुन होवमुत बल्कि तऺम्य छि हावनॖच कूशिश कऺरमॖच़ ज़ि बटसॖय छु मुस्लमानॖ सुन्द लोल आमुत। तवय ल्यूखमुत छुन रॊटनस नालॖमते न कि रॊटुम नालॖमते। यि बऻथ छु हऻविथ दिवान ज़ि बटॖसॖय छु लोल आमुत मुस्लमान सुन्द। म्योन वनुन छु ज़ि तिमन छॆनॖ सऻन्य कल या सोन लोल बऺल्कि ॳसीय छि वनान रोज़ान वाय वापस गछ़हऻव कऺशीरि। तिमन छि जीत मीजमॖच़ त्यॆली यॆलि तिमव तमि क्रॗठ रऻच़ क्रकॖ दी दी बटॖ च़ऺलरोव न्यथॖनॊन तॖ रतॖदऻय कऺरिथ। ॳस्य छि वुनि ति यि वुछिथ ऒन लागान तॖ बूज़िथ ज़ॊर लागान। वुनि ति छि ॳस्य शॊत्रमुर्गॖसॖन्द्य पऻठ्य कलॖ स्यॆकि मंज़ थऻविथ दपान असि वुछ नॖ किंही। असि छु बासान ज़ि तिम करन शायद असि गऺज्य गाह तॖ मोरॖछलॖ यॆलि ॳस्य तिहन्द्यन इहातन मंज़ ब्यॆयि ख्वर त्रावव। म्यॆ छु बासान ॳस्य छि अख म्यूठ तॖ मॊदुर स्वपना वुछान त्यॆलि। व्यबनारव ति तुल ब्यॆबि नार तॖ ब्यॆयि नॖ कॆंह। सुय प्रोन शराब नव्यन बोतलन मंज़ फिराना रोज़ान तॖ तिमय रिन्द नज़र यिवान यपऻर्य ति तॖ हुपऻर्य ति। सुय राम राम सान्यन तोतन ज़्यॆवि प्यठ। ॳस्य छि तिमन वनि ज़ि यिम छि तिमय बटॖ यिम ब्यॆयि यछ़ान छि योर यिथ सानि आज़ऻदी मंज़ ख़लल करॖन्य। तिमन छि ख़बर ज़ि यि बटॖ छुनॖ कऺशीरि मंज़ ज़ॖरनावुन। असि प्यठ ह्यॆत्य तिमव शार बनावॖन्य, बऻथ ल्येखॖन्य।  यिथॖ पऻठ्य वख अकि ॳस्य ॴस्य हिप्पियन वुछान तॖ तिमन वुछिथ असान रोज़ान, तिम मुस्लमान ति वुछ्यन असि तिथय पऻठ्य यॆलि ॳस्य तिमन बुथि प्यमव तॊत वऻतिथ। बरादरन वॊन तीज़मालि तॖ तीज़माल गऺयि ख्यूबस मंज़ तॖ सूंचुन ज़ि किछ़ ॴस्य स्व क्रॗठ राथ तॖ क्वस ॴस स्व बद-जमाथ यिमव बटॖ बनोव अनाथ  कुनवुहशथ तॖ नमतस मंज़। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - पलव, वंदस मंज़ आसॖ फ्यरन वाजनि कऺमीज़ शिलवार तॖ येरॖव बऺन्ययान लागान तॖ धोति वाजनि आसॖ पूरॖ नऺर्यदार ब्लौज़ तॖ प्यठॖ रफलुव या फलालऻनुक शाल वलान।  कोर्यन ओस आसान फिराक शिलवार तॖ लऺडकन कमीज़ पऻजामॖ। दॊश्यवऺन्यन ओस प्यठॖ बऺन्ययान तॖ तथ प्यठॖ फ्यरन आसान।  कऺशीरि मंज़ ॴस्य वख अकि प्रथ गरस मंज़ सानि कोरि, माजि, ब्यॆनि सलयि कऻम करान रोज़ान याने सलयव सॗत्य आसॖ येरवि बऺन्ययानॖ, स्कार्फ़, अथॖपंजॖ, ज्वराबॖ, पऻशनॖ,  बनावान रोज़ान द्वदॖ शुर्य सॖन्दि प्यठॖ बड्यन बुज़र्गन तान्य। मगर यि प्रथा गऺयि व्वंय गऻबॖय ज़न ख़ास कर यनॖ यिम सऻरी चीज़ बऺनी बनऻय आयि बाज़रस मंज़। व्वंय छु खऻल्य कांह कांह युस यि कऻम करान नज़रि गछ़ान छु। दपान पनॖन्यन खयालन द्यू व्वंय च़ॖ फ्युर, कुस कडान अज़कल त्वमुलस छु स्युर। रडीमेड च़ऻरिथ मेलान, ब्यॆयि कन्नॖ कम। दम करू दम, दमॖकाका दम। 

**********************

नऺविव तॖ फॊलिव

भूषण कौल "दीप"   

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

21.01.2022

🙏🙏 नमस्कार माहरा

21.01.2022, माघ (माघ) गटॖ पछॖ (कृष्ण पक्ष) त्रय (तृतीया) देवादेव शॊकुरवार (शुक्रवार/जुम्मा/भार्गववार) श्री सप्तर्षि सम्वत 5097,  नक्षत्र मघा, राश सिंहं (चलान(, ऋतु शिशर (चलान)...अज़ छि संकट च़ोरम (संकट निवारण चतुर्थी) ज़ूव खसि रऻच़ हॖन्ज़ॖ 09.05 बजि..

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

छ़्वपॖ छय रॊपॖसॖन्ज़ करखय तॖ स्वनॖसॖन्ज़। बरादरस द्रायि यि दऺपिथ कऻशुर याने यि मुहावरॖ यकदम पनॖनि ॴसॖ मंज़ॖ। तीज़मालि प्रुछ बरादरस़। वुनि गव अकुय दॊह रातॖ प्यठॖ तॖ च़्यॆ ह्यॆतिथ क़सीदॖ कसॖन्य। क्याह दलील छि। कींहनय मऻजी स्व नमतुच क्रॗठ राथ रूज़ॖम ज़न ॳछन तल म्यॆ रऻत्य रातस मगर बासान छुम ज़ि यथ सरकारस ति छुनॖ ज़नॖ अलॖगॖज़ार गछ़ान। तिमन छु बासान सोन द्वख इज़हार करुन ज़ि ऊर्य छि वनान हारि तोतस। तीज़मालि वॊनॖनस ज़ि अथ हबा छि वनान ॳथ्य दऻर्य वुछनय तॖ म्यानि ॳछ मॖ वुछनय।बरादरन बऺडरऻव यि कथ यि वऺनिथ ज़ि सानि समुदायक्यव केंच़व कार्य करताहव दिच़ पनॖनि पनॖनि आयि तिमन श्रद्धांजलि तिमन सान्यन टाठ्यन यिम बिचऻर्य नाहकय गोल्यव बुज़्य गऺयि।  सान्यव च़ूक्यदारव कऺरॖ ब्यॆयि अख कूशिश सरकारस याद पावनॖच तमि क्रॗठ रऻच़ हुन्द असि प्यठुक सॖ अज़ाब, सु लूठ, सु दऺहशत, तिम टऻनॖ, तिम नऻरॖ, तिहॖन्ज़ च़्यॆनॖवुन्य ज़ि या रऺलिव, या गऺलिव नतॖ च़ऺलिव। याद पोव सरकारस दस्तावीज़व दऺस्य, नाटकव दऺस्य, व्यबॖनारव दऺस्य, शम्माह ज़ऻलिथ, वगैरा वगैरा, अदॖ यॆमिस यिथॖ पऻठ्य तॊग तऺम्य तिथॖ पऻठ्य वुज़ॖनोव सरकार, मगर सरकार बासान छु स्यठाह संगदिल। ज़ानि दय सरकारुक मन्तव्य क्याह छु, कथ विज़ि छु प्रारान किनॖ असीय छु सबरूक इम्तिहान ह्यवान। बरादरन जतऻव आशा ज़ि कांह नतॖ कांह रंग हावि यि सरकार तॖ ॳस्य गछव या आर नतॖ पार। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - पलव, कऺशीरि मंज़ वंदॖ कडुन गव यि दऺप्य ज़ि ति मौसमस सॗत्य लड करॖन्य। अकि तरफॖ तॗरि बौहरान तॖ ब्यॆयि तरफॖ शीन तॖ रूद छावनस सॗत्य सॗत्य दफ्तरन मंज़ हऻज़िरी दिन्य तॖ गरॖ ति पकनावुन। लूकन हॖन्द्य पॊशाक ति छि मौसॖमॖ हिसाबय आसान। गरस मंज़ अलग वर्दन दफ्तरॖ बापथ अलग, बाज़र वाज़र बापथ अलग। मर्दन हुन्द पौशाक गरस मंज़ छु आसान ऒमूमन  ज़ंगन दराज़ॖ तॖ तथ प्यठॖ पऻजामॖ, प्यठॖ छि आसान बऺन्ययान सूती तथ प्यठॖ इन्नर, तथ प्यठॖ कऺमीज़, तथ प्यठॖ येरॖव बऺन्ययान, तथ प्यठॖ फ्यरन या कमॖल्य या दुसॖ या च़ादर कलस प्यठ कनटॊपॖ या स्यॆ़ज़ पिंकदार या कराकुली टूप्य। दफ्तरॖ बापथ मर्दन हुन्द पौशाक छु आसान ज्वराबॖ याने मोज़ॖ, दराज़ॖ, पतलून, प्यठॖ गऺयि सूती बऺन्यान,इन्नर, कऺमीज़, येरॖव बऺन्ययान, सदॖर्य, कोठ, ओवर कोठ, ग्लोबंद, टूप्य, कनॖटोपॖ या स्यॆज़ टूप्य, अथॖपंजॖ येरुव या दालुव या दॊश्यवय।  बूठ, दालुव या रबडुव फरदार या लॏंग-बूठ

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

20.01.2022

🙏🙏 नमस्कार माहरा

20.01.2022, माघ (माघ) गटॖ पछॖ (कृष्ण पक्ष) द्वय (द्वितिय) देवादेव, ब्रसवार (गरूवार/वीरवार/ब्रहस्पतवार) श्री सप्तर्षि सम्वत 5097, नक्षत्र अश्ले (चलान) राश सिंह (सुबहॖचि 08.24 बजि प्यठॖ) ऋतु शिशर (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

म्वकॖल्यव ॳज़्युक दॊह ति। बरादरन वॊन तीज़मालि कुन। कॊड समुदायक्यव सारिवी च़ुक्यदारव पनॖनि पनॖनि मनुक गुबार यि ज़ऻनिथ ज़ि शायद मा यी सरकारस आर तॖ दी सानि यीरवॖन्य नाव तार। तीज़मालि द्युत जवाब बरादरस ज़ि आहनबा सरकार ति क्याह करि। कथ कथ दी वाठ तॖ कॊत कॊत वाति। सरकार छु सन्जि दिवान रोज़ान ज़ऻल्य तॖ छिस ह्यन्दॖव्यन्दॖ च़लान नीर्य नीर्य। द्वयत्रॖह वऺरी गऺयि  अख वऻन्साह। ख़बर ग़लत मा वॊनुम। बरादरन दॊपनस नाय मऻजी चोन वनुन हय छु पॊज़। यिमन द्वयत्रॖहन वऺरियन मंज़ आयि द्वयत्रॖह बदलाव तॖ महामऻरी ह्यथ आव। यिम ज़िठ्य ॴस्य तिम गऺयि कम अज़ कम सऻरी भगवानस हवालॖ तॖ ॳस्य कॗन्स्य बनेयि ज़िठ्य तॖ छि व्वंय पनॖन्य वथ असि पानय छ़ान्डॖन्य। सऺही वतॖहावुक ति छुनॖ कांह। यिमव द्वयत्रॖहव वऺरियव पतॖ ति छुनॖ असि पलि प्यवान ज़ि असि छा ब्रोंह पकुन किनॖ पथ फेरुन। सऻन्य शुर्य यिम सोन पगाह छि, छि पनॖन्य क़दम ब्रोंहकुन कऺडिथॖय तॖ पथ कुन फेरनवऻल्य रूद्य कम व्वंय। फेरन ति यॊदवय फेरन कॊरकुन। तति करन क्याह, कऺमिस हवालॖ रोज़न। सरकार छु पनॖन्य ख्वर ठींकरावनस मंज़ लऺगिथ तति। दपान पीरॖ तति कर्यज़्यम यऻरी यॆति पानॖ आसख यीरॖ। बरादरस ति आव वदनॖ मंज़ॖ असुनाह तॖ तीज़मालि ति त्रोव ज़्यूठ व्वशाह।कथ छि जऻरी   

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - बुखऻर्य, कऺशीरि मंज़ छि बुखऻर्य यिवान इस्तिमाल करनॖ सरकऻर्य, प्राइवेट  दफ्तरन मंज़, तऻलीमी अदारन मंज़, बड्यन दुकानन मंज़, होटलन मंज़, हाऊस बोटन मंज़ तॖ केंच़न बड्यन गरन मंज़। बुखऻर्य छि टीनुव अख गॊल ड्रम ह्यु आसान यथ प्यठ टीनुव डक्नॖ छु आसान तॖ अथ डकनस सॗत्य छु अख टीनुव नोर यिवान लागनॖ  यॆमुक गॊल छु कुनि दारि कीन्य या कुनि व्वबि किन्य यिवान न्यबर थावनॖ। अथ बुखारि मंज़ छु यिवान ज़्युन ज़ालनॖ। तमि नारॖ सॗत्य छि बुखऻर्य ततान तॖ तमि तच़रॖ सॗत्य छु बऺड्यन बऺड्यन कमरन या कुठ्यन वुश्यनेर फ़ेरान तॖ कमरन मंज़ कऻम करन वऻल्य मुलऻज़िम या च़ाटहालन मंज़ मास्टर तॖ शुर्य या होटलन मंज़ आमॖत्य विज़िटर या हाऊस बोटन मंज़ बिहिथ सऻलऻन्य छि वऺन्द्य वंदस अमि बुखारि हुन्दि वुश्यनेरुक लुतुफ तुलान रोज़ान। यिमन बुखार्यन हुन्द साइज़ छ़ु जाय मुतऻबिक यिवान बनावनॖ। मन्नॖ वादॖ ज़्युन छु यिमन बुखार्यन मंज़ यिवान दॊहदिश ज़ालनॖ तॖ बुखार्यन हुन्द दॖह छु नेरान रोज़ान न्यबर टीनॖक्यव नार्यव मंज़्य। यिमन जायन छुनॖ कांगरि हुन्द प्यवान हाजथ। यिमन बुखार्यन प्यठ छि कॆंह लूख चाय वाय ति बनावान रोज़ान। कऺशीरि मंज़ छि वंदस तॗरि म्वखॖ लऺकरि हॖन्ज़ खपथ रोज़ान कऻफी। वंदॖ ब्रोंठुय छु यिवान मन्नॖ वादॖ ज़्युन मंगनावनॖ गरन मंज़ दानस लागनॖ बापथ तॖ यिमन बुखार्यन मंज़ ज़ालनघ बापथ। 

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

19.01.2022

🙏🙏 नमस्कार माहरा

19.01.2022, माघ (माघ) गटॖ पछॖ (कृष्ण पक्ष) द्वय (द्वितिय) ब्वदॖवार (बुधवार), श्री सप्तर्षि सम्वत 5097, नक्षत्र अश्ले, राश कर्कट (चलान) ऋतु शिशर (चलान)...चूंकि द्वय छि ज़ॖ गछ़ान ॳज़्युक वॊहरवोद यी पगाह

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

अज़ गऺयि द्वयत्रॖह पथकुन तॖ त्यॆयित्रॖहॖम्य वऺरी प्यव असि कऺशीरि प्यठॖ च़ऺल्यमॖतिस। तीज़मालि वॊन बरादरस। आहनी मऻजी द्राव ब्याख वऺरी ति यी सोंचान सोंचान ज़ि अज़ नय तॖ पगाह मा यी कुनि तरफॖ कांह ख़बर ज़ि बटन छु वापस कऺशीरि गछ़नुक संज़ आमुत करनॖ सरकारॖ दऺस। मगर असि होवुख दॊहय च़ोंग तॖ थॊवुख नाबद फॊल ॴसस मंज़।। स़राफ़ गऺन्ज़रावान द्यार अतॖराफ़ रावरावान दॊह।  सऻरीय छि पनॖनि पनॖनि कामि लऺगिथ तॖ असि करान गांगल दॊहय गरा यपऻरिम तॖ गरा हुपऻरिम। सऻरी करान रोज़ान असि डुल्य ब्रऻर कुनि नतॖ कुनि बहानॖ। ॳस्य ति छि बांगा बांगा दिवान रोज़ान। बरादरन वॊन तीज़मालि। हतबा सु दॊह मॖ यॆछ़िन्य वुछुन सान्यन दुशमनन ति। कुनवुह जनवऺरी कुनवुहशथ तॖ नमथ। स्व राथ ॴस क़यामतॖच राथ। त्राहि त्राहि। क्याह क्याह प्यव वुछुन तॖ बोज़ुन असि, तॗरि कऺन्ड्य छि फटान वुन्यक्यनस ति याम स्व विज़ छि ॳछन ब्रोंहकनि यिवान। दय कऺरिन पर्दॖ। बरादरन वॊन तीज़मालि ज़ि मऻजी वैसे ॴस्य कुनवुह जनवऺरी ब्रोंठॖ प्यठय कऻशिर बटॖ ह्यॆतिमॖत्य कऺशीरि प्यठॖ च़लॖन्य दफ अमा पॊज़ कुनवुह्यमि रातस तुल तिमव क़हर तॖ तलातुम। यि केंछ़ा बोज़ुन प्यव सु ओस हदॖ ति अपोरॖय। बरादरन दिच़ तीज़मालि राय यि वऺनिथ ज़ि यथ ॳज़्यकिस दॊहस पज़ि आसि म्यानि हिसाबॖ नाव द्युन "त्रटॖबुज़ुन" या "च़लॖ लार" या "क्रॗठ राथ"। ॳस्य छि कऻशिर्य तॖ कऻशुर नावॖ सॗती गछव यिन्य परज़ॖनावनॖ। यिम अंग्रीज़ नाव एग्ज़ॏडस डॆ, ऐक्ज़ायल डे या निर्वासन दिवस वगैरा छिनॖ दिवान सु सन्यर सऻनिस तथ कॊहरामस। नवि पुयि गछ़ि प्यॊन ज़ानुन ज़ि यि दॊह कोताह गटॖकारुक दॊह छु ओसमुत सऻनिस इतिहासस मंज़। तीज़मालि सूंच ज़ि बरादर छु शायद पज़र वनान। कथ छि जऻरी  

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - शीन, शीन यॆलि व्यॊठ व्यॊठ छु प्यवान कऺशीरि मंज़ दपान छि ज़ि शीनॖ थॊस्य छि प्यवान तॖ यॆलि यि शीन ज़ऻव्युल या न्युक न्युक छु प्यवान रोज़ान तथ छि वनान ज़ि ज़न छु कठॖकॊश यीरान। कॆंह लूख ॴस्य मलाय-कुल्फी बनावान रोज़ान याने कुनि बानस मंज़ ॳस्य कऻरिथ ओम द्वद थवान तॖ तथ मंज़ ॴस्य त्रावान मऺदर्येर, किशमिश, बादाम तॗ प्यठॖ द्वदॖच मलऻय तॖ ब्यॆयि ॴस्य मिलनावान शीन तॖ थवान ॴस्य यि बानॖ ठानॖ दिथ शीनस तल ॳकिस या द्वन दॊहन तॖ ॴस्य पतॖ शीनॖ तलॖ कडान। अथ ॴस आसान मज़ॖदार मलाय-कुल्फी बन्यॆमॖच़ तॖ गरिक्य सऻरी बऻच़ ॴस्य प्युंता प्युंता ख्यवान तॖ लुतुफ तुलान।  यथ बटॖ गरस नऺव न्वश ॴस आसान आमॖच़ तऺमिस ॴस्य नव-शीन खारान याने यॆलि वंवदुक ग्वडन्युक शीन प्यॆयिहे न्वशि हॖन्ज़ हश तॖ ह्युहुर ॴस्य कुनि कटोरि मंज़ शीन न्वशि हवालॖ करान तॖ ॴसिस वनान ज़ि च़्यॆ यॆछ़नय नॊव शीन छावुन। न्वश ॴस अनान मिठऻय या बादाम या च़ॊचि तॖ दिवान हशि हेहरस तॖ ब्यॆयि कॆंह पौंसॖ शॊगून वऺनिथ। शिशर गऻन्टॖ तॖ शीन ॴस्य कऺशीरि मंज़ लूख शौकॖ सान ख्यवान रोज़ान यूत ज़ि कुनि कुनि सातन ओस तिमन माज़बेरव मंज़ॖ रथ ताम यिवान। यि  शीन ओस कुनि कुनि सातन सीनॖ या नस रटान याने च़ास या ज़ुकाम ति करान रोज़ान

**********************

नविव तॖ फॊलिव 

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

18.01.2022

🙏🙏नमस्कार माहरा

18.01.2022, माघ (माघ), गटॖ पछॖ (कृष्ण पक्ष) ऒक्दॊह प्रथमा/प्रतिपदा) बॊम्वार (मंगलवार), श्री सप्तर्षि सम्वत 5097, नक्षत्र तिष्या, राश कर्कट (चलान) ऋतु शिशर (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************""""******

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

मऻजी पॊज़ अगर बोज़ख म्यॆ ज़न आव वुछन तल ज़ि बख्शी सऻबस बगऻर यिमव ति कऺशीरि मंज़ सनॖ कुनवुहशथ तॖ च़ूहऻठ प्यठॖ ह्वकुमरऻनी कऺर तिमव कऺर ॳन्दॖर्य ॳन्दॖर्य च़्वय तिथॖ पऻठ्य ज़ि बटस या डूगरस तोरुख लोरि प्यॆठ्य स्वरुफ तॖ कऺडहऻख च़क्जि तलॖ च़ऻन्गिज तमि आयि ज़ि बटन प्यव ॴखरस नमतस मंज़ कलॖ कापि   सान कऺशीरि प्यठॖ च़लुन। बटॖ आव वलनॖ विज़ि विज़ि प्रथ रंगॖ। असि थॊव झन्डॖ अथस मंज़, तिमव थॊव डन्डॖ अथस मंज़, ॳस्य रूद्य वनान जय हिन्द तॖ तिम आयि मंगान आज़ऻदी। ॳस्य रूद्य मंदरन रऻछ करान तिम आयि सऻन्य मंदर लुहरावान तॖ रूद्य मऺशीदॖ तॖ मच़ार बनावान यॆतिनस ख्वश कॊरुख तॖ ततिनस। ॳस्य गऺयि धर्मॖ निशि दूर गछ़ान तिम आयि मदरस बनावान तॖ मंज़ वतन प्यठ सऺज्जदि दिवान। तिम द्रायि अकॖलमंद, ॳसी द्रायि बॆकॖल तॖ चऻर्य तॖ तिमव ॴखरस ॳस्य मऻर्य। ज़ानि दय कर यी असि वऻर्य तॖ कर मुच़रावव कऺशीरि वऻतिथ पनॖन्यन मुर्यन तऻर्य। तीज़माल रूज़ बोज़ान तॖ बरादर रूद बोज़नावान। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - शीन, कऺशीरि मंज़ ॴस्य पश त्रॆयव कॖस्मॖक्य आसान याने टीनुव, सिंग्लिहुन्द तॖ म्यॆच़्युव पश। गामन वामन मंज़ ॴस्य आसान छ़्यॆयि पश ति। यिमन टीनॖ पस ओस आसान तिमन पशन प्यठ ओस नॖ शीन ज्यादॖ कालस दरान। शीना ओस प्यवान, समान तॖ सॗत्य सॗत्य गलान तॖ खॖरि खॖरि ओस पानय म्वकलान। वख अकि ॴस्य केंच़न पशन सिंगल लगावान। यि सिंगल ॴस आसान लऺकरि हॖन्द्य ल्वकचि ल्वकचि पचि खन्जि गऺरिथ तॖ नोख कऺरिथ। तिथ्यन पशन प्यठ ति ओस नॖ शीन दरान तॖ ओस पानय रसॖ रसॖ पिगलान तॖ म्वकॖलान।  हालांकि केंच़ॖ कालॖ प्यठॖ ॴस अमि कॖस्मुक्य पश बनावनॖच प्रथा स्यठाह कम गऻमॖच यि दऺप्यज़ि ति न-हऻस बराबर। म्यॆच़ि पशन प्यठ ओस शीन समान तॖ रोज़ान तती। यिथ्यव पशव प्यठॖ ओस प्यवान मॊहन्युव लागुन युस पशॖ प्यठ शीन ओस वालान रोज़ान चप्पॖ सॗत्य। यि नज़ारॖ ति ओस आसान वुछुन लायक़। वख्तस सॗत्य सॗत्य ओस मकानन म्यॆच़िव पश बनावनुक रिवाज बंद गोमुत मगर प्रऻन्य मकानॖ ॴस्य नज़र यिवान। खऻर व्वंय गऺयि कऻशिर बटन ति दॊयत्रॖह वऺरी कऺशीरि प्यठॖ च़ऺलमॖतिस तॖ यिमन दॊयत्रॖहन वऺरियन कुस डुबॖ डास छु गोमुत तति बटॖ मकानन  यि ह्यकन तिमय वऺनिथ यिम तति रूज़िथ छि तॖ यिमव तति बटॖ मकानॖ आतॖश्यबुज़्य कऺर्य, लूठ कॊरुख ज़बर्दस्ती क़ब्ज़ॖ कॊरुख, मकानॖ लूहरऻविख तॖ नविसरॖ बनऻविख पनॖनि आयि तॖ त्रायि। अज़कल किथ्य छि व्वंय बनान यि ह्यकन तिमय वऺनिथ।

********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blospot.com प्यठॖ ति)

17.01.2022

🙏🙏 नमस्कार माहरा

17.01.2022 पॊह (पौष) ज़ूनॖ पछॖ (शुक्ल पक्ष) पुनिम (पूर्णिमाशी) च़ऺन्दॖरवार (सोमवार) श्री सप्तर्षि सम्वत 5097, नक्षत्र पुनर्वस, राश कर्कट (रऻच़ हॖन्ज़ॖ 10.02 बजि प्यठॖ), ऋतु शिशर (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि वॊन बरादरस ज़ि सान्यन शुर्यन छुनॖ तक़सीर बिचार्यन। तिमव पॊर ल्यूख तमी आयि यॆमि आयि तिहॖन्द्यव वालदेनव यॊछ़ ज़ि तिम गऺछ़्य परॖन दफ अमा पॊज़ तिहॖन्दि बापथ ॴस्य नॖ तीत्य कॏल्यॆज मॊय्यसर कऺशीरि या ज्यॆमिस मंज़ यॆति तिम पनॖन्य थऺज़ तऻलीम याने ट्रेनिंग बेतरी  पूरॖ ह्यकहऻन कऺरिथ। तवॖ म्वखॖ प्यव तिमन पनॖन्यव मुर्यव मंज़ॖ नीरिथ पनॖन्य अरमान थवॖन्य कूरिथ। दिल आसिहे तिमन ति यछ़ान ज़ि मऻलिस माजि हॖन्दिस सायस तलॖय गॊछ़ परुन तॖ ल्येखुन मगर पनॖनिस शहरस मंज़ कॏलिज्यन हॖन्ज़ व्यछ़य आसनॖ म्वखॖ गऺयि तिम ति मजबूर नऺगरॖ नीरिथ पांद्रठन लगनॖ बापथ। बरादरन दिच़ पनॖनिस ज़ॆहनस दॖनन हिश तॖ प्योस मानुन ज़ि तीज़मालि कऺर अज़ शायद ब्यालि तलॖच कथ। वॊनुन तीज़मालि ज़ि म्यॆ बासान मऻजी अथ मंज़ ति मा आसिहे  सरकारॖच चाल। नबा तॖ च़्यॆ क्वस चाल ॴयी अथ मंज़ बोज़नॖ। प्रुछ़ तीज़मालि बरादरस। बटन च़ऺलरावनॖच तॖ ब्यॆयि क्याह। चूंकि  सरकार ओस ज़ानान ज़ि बटॖ लऺडकॖ या बटॖ कोरि छि बकाया ज़ऻच़ हॖन्द्यन शुर्यन न्यस्बतॖ ज़यादॖ परवॖन ल्येखवॖन्य रूद्मॖत्य तॖ सरकारस ओस नॖ ख्वश यिवान बटॖन हॖन्द परुन लेखुन तॖ ज़ऻनिथ मऻनिथ आसि नॖ तमि वख्तॖक्य सरकारन यॊछ़मुत ज़्यादॖ ट्रेनिंग अदारॖ ज्यॆमिस या कऺशीरि मंज़ खुलावॖन्य तॖ आस्यख सूंचमुत ज़ि तमी बहानॖ गछ़न यिम बटॖ शुर्य पनॖनि जायि प्यठॖ  न्यबर तॖ कऺशीरि मंज़ गछ़ि अमीय बहानॖ बटन हॖन्ज़ ग्रन्द ति कम। न तॖ क्याह वजह गछ़ि आसुन ज़ि जॊम्मू कश्मीरस मंज़ ओस य च़ि आबऻदी बापथ सिर  सिरिफ अख इन्जीनियरिंग तॖ अख मॆडिकॖल कॏल्येज तॖ बस। कथ छि जऻरी  

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - शीन, लगातार शीन प्यनॖ सॗत्य छु यि शीन जमाह गछ़ान रोज़ान तॖ बडॖ मॆहनत छि प्यवान करॖन्य यि शीन हटावनॖ बापथ। मकानॖक्यन पशन प्यठ शीन समनॖ म्वखॖ छु पशॖ दंदर्यव किन्य पानिच दार वसान रोज़ान तॖ सॗत्य सॗत्य छि यि दार शिठिथ याने लऺगिथ गछ़ान तॖ अख नोखॖदार पां लूरा हिश बनान यथ ॳस्य वनान छि शिशर-गऻन्ठ। यि शिशरगऻन्ठ छि लूख फुटरावान रोज़ान तॖ मलाई कुल्फी हॖन्द्य पऻठ्य च़ॖहान रोज़ान। शीन युस शिठिथ गछ़ान छु तथ छि वनान तुलॖकतुर या कऺठ्युश। अमि तुलॖकतरॖ प्यॆठ पकान पकान छि अक्सर रिकिन्य गछ़ान तॖ दबॖत्रॊन गछ़ान। वंदस छु यिछ़न वतन प्यठ पकुन गछ़ान मुहाल। लूख छि शीनॖ थॊस्य पानॖवुन्य लायान रोज़ान। शीनॖ मानि बनावान तॖ कुनि कुनि जायि यिमन शीनॖ मान्यन च़ॖनिफऺल्य ॳछव कनि लागान तॖ व्वज़ुल रंग ज़्यॆवि तॖ वुठव कनि लागान,पलव लगऻविथ ब्यॊन ब्यॊन इन्सानन हुन्द आकार दिवान रोज़ान। शीना प्यतो प्यतो मामा यितो यितो बऻथ ग्यवान रोज़ान।

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

16.01.2022

🙏🙏 नमस्कार माहरा

16.01.2022 पॊह (पौष) ज़ूनॖ पछॖ (शुक्ल पक्ष) च़्वदह (चतुर्दशी) आथवार (रविवार/ऐतवार) श्री सप्तर्षि सम्वत 5097, नक्षत्र आर्द्रा, राश मिथुन (चलान) ऋतु शिशर (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

बरादरन कऺर कथ शुरु यि वऺनिथ ज़ि मऻजी म्यॆ बासान सऻनिस समुदायस मंज़ सोन शुर यूत यूत ज़्यादॖ परान गव त्यूत त्यूत गव सु दूरान पनॖन्यन निशि याने पनॖनिस मऻलिस माजि निशि, बऻयिस ब्यॆनि निशि, यारन दोस्तन निशि, अंगन ॴश्यनावन निशि, पनॖनि मूल जायि निशि, पनॖन्यन संस्कारन निशि तॖ पनॖनि संस्कृति निशि। सोन शुर युस राथ ताम ओस पानस सॗत्य ख्यवान च्यवान, व्वथान बॆहान, असान गिन्दान, रोशान तोशान तऺम्यसॖय शुरिस वुछनस छि व्वंय ॳछ तरसान, तऺम्यसॖय शुरिस ताम वातनस छि ज़ंगॖ नटान, तऺम्यसॖय शुरिस छिनॖ पनॖन्य दऻद्य ह्यकान बऻविथ। यि छु नॖ यकतरफुक तनाव बऺल्कि दु-तरफानुक मगर फरॖख छि यि ज़ि सु छॖ सोन पगाह तॖ तऺमिस सॖन्दि बापथ छि ॳस्य गऻमॖच़ राथ। मऺन्ज़्य मऺन्ज़्य छु मूर्खॖ मनस व्यच़ार यिवान ज़ि क्याह ज़ऻनिथ सना द्युत असि पनॖनिस शुरिस ज़न्म। कमि लोलॖ सान ॳस्य शुर्य पालान, अख वोत चीन तॖ ब्याख जापान, ॳड्य च़्रंगान तॖ ॳड्य लाचार, कर्मॖ लीखाये कर नमस्कार। तीज़मालि गऺन्ड मुद्दय बरादरस तॖ गऺयि कमन ताम ग्वतन तॖ जवाब फूरुस नॖ पऺहरस खन्डस। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - शीन, वंदस मंज़ युस शीन प्यवान छु कऺशीरि मंज़ तम्युक नज़ारॖ छु आसान वुछुन लायक़ याने अदभुत। कॊहन तॖ बालन, खाहन तॖ खऺल्यानन, कुल्यन कट्यन प्यठ, दर्यावॖक्यन बठ्यन प्यठ, बाग़न मंज़, बाहच़न, शिकार्यन, हाउस बोटक्यन छतन प्यठ, सडकन प्यठ, गल्यन तॖ कोचन मंज़ तॖ मकानॖक्यन पशन प्यठ  छु शीनॖय शीन आसान तॖ ज़न छि सफ़ेद च़ादरि तल सऻरॖय कऺशीर बासान स्व कऺशीर यॆति कऻशिर्य बटन हुन्द वख अकि पुशतऻनी वॊजूद ओस। स्व कऺशीर यथ नाव छु ओसमुत सतीसर, कश्यपमऻर, ऋश्यवऻर तॖ वनान आयि ॳस्य तथ कऺशीरि मऻज्य कऺशीर मगर व्वंय गऺयि द्वयत्रॖह वऺरी पथकुन यॆलि पर-गगरव तति आतंकवाद तॖ कत्लॖगारथ कऺरिथ च़ऺलॖरऻविख गर-गगर याने ॳस्य तॖ रूद्य पानॖ तिम शीन छावान तॖ तन-बदन शीनॖ सॗत्य नावान। थॊवुख असि सिरिफ पनुन पॊतकाल याद पावान। पंलि छु नॖ प्यवान असि ज़ि कऻशीरि हुन्द यि दृश्य, यि मन्ज़र वंदुक किथॖपऻठ्य हावव ॳस्य तिमन शुर्यन यिमव ज़न्म ह्यॊत कऺशीरि न्यबर नमतॖ प्यठ वुन्युखताम।

**********************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

15.01.2022

🙏🙏नमस्कार माहरा

15.01.2022, पॊह (पौष) ज़ूनॖ पछॖ (शुक्ल पक्ष) त्रुवाह (त्रयोदशी) बटॖवार (शनिवार/शनिश्चरवार), श्री सप्तर्षि सम्वत 5097, नक्षत्र मृग, राश मिथुन (सूबहॖचि 09.51 बजि प्यठॖ) ऋतु शिशर (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तिहाबा छुय पॊज़, तीज़मालि वॊन बरादरस कुन, वुन्युखताम यि सपुद ति सपुद। खा सु जान ओस या नाकारॖ। वुन्यक्यनस नेरि नॖ कॆंह तिमन प्रान्यन ज़ख्मन क्रऻल्य तुलनॖ सॗत्य। असि पज़ि ब्रोंहकुन वुछुन ज़ि क्या असि पज़्या सुय सोच ह्यथ पकुन किनॖ बदल्येमॖतिस नऺविस माहोलस सॗत्य पकुन। असि पज़ि मानुन ज़ि ज़ऻन्य अनज़ऻन्य मंज़ तॊग नॖ असि कॆंच़न पेशन तॖ क़सबन सऺही न्याय करुन, मस्लन पनुन क्वल ब्रह्मुण या मंदरुक पूज़ऻर्य पानस सॗत्य सॗत्य शानॖ-बॖ-शानॖ पकनावुन, असि तॊग नॖ नऻव्यदस, वाज़स, कान्दरस, बुहरिस, बिसऻतिस, हलवऻयिस, मोसीकारस, फनकारस, रंग मंचकिस कलाकारस या कऻन्सि ल्वकटिस म्वकटिस दुकानदारस वऻजिब मान तॖ यज़थ  द्युन यॆम्युक सु हकदार ओस। असि थऻव्य तिम दॊयिमिस खानस मंज़ तॖ पानॖ रूद्य कारकुन किस खानस मंज़ तिक्याज़ि शायद ॴस्य असि ज़ॖ च़ोर हरफ तिहॖन्दि न्यस्बतॖ ज़्यादॖ पाहन पऺर्यमॖत्य तॖ ॴस्य सरकऻर्य नोकरीयन मंज़ सज्जावनॖ आमॖ्त्य। असि प्यॆयि यि मानुन, म्यॆ बासान, ज़ि तिमन ॴस्य नॖ शायद तिम ज़ऺरियि मॊय्यसर यिमव दऺस्य तिम ति ह्यकॖहऻन कलॖ थॊद थऺविथ असि हऻविथ ज़ि ॳस्य ति छिनॖ कारकुन ख्वतॖ कम कॆंह। मगर वख छुनॖ ह्यु रोज़ान। दफ अमा पॊज़ असीय तॊग नॖ वख्तॖ विज़ि सु इन्सान, तऺम्यसुन्द मुद्दा, तऺम्यसुन्द पेशॖ, तऺम्यसुन्द क़सॖब सऺही पऻठ्य परज़ॖनावुन। मजबूरन प्यव तिमन पनुन पेश बदलावुन या पनुन कसॖब ब्यॆयि कुनि तथ जायि हावुन यॆतिनस तस क़दर करनवोल म्यूल तॖ ॳस्य छि व्वंय च़ेनान ज़ि असि क्याह लॊब तॖ असि क्याह रोव।  कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - बिजली, वंदस मंज़ ॴस आसान बिजली हॖन्ज़ व्यछ़य तिक्याज़ि शीनॖ सॗत्य आसॖ बिजली तारॖ यिवान छ़्यॆन्य छ़्यॆन्य जायि जायि या बिजली कूट्य ॴस्य यिवान वऺस्य वऺस्य तॖ अवॖ म्वखॖ ॴस बिजली बंद गछ़ान तॖ दॊह वादॖ ॴस्य लगान बिजली बहाल करनस मंज़। बिजली हॖन्ज़ खपथ ति ॴस कऺशीरि मंज़ ज़रूरतॖ ख्वतॖ ज़्यादय आसान। ख़ास वजह ओस आसान यि ज़ि व्यथि मंज़ यीच़ॖ बाहच़ॖ या डूंगॖ ॴस्य आसान यिमन ॴस बिजली मुफुत मेलान ति क्याज़ि यिमन ओस नॖ बिजली मीटर आसान लऺगिथ तॖ यिम हऻन्ज़ ॴस्यं बिजली तारॖ सरकऻर्य तारन सॗत्य मिलनऻविथ मुफुत बिजली इस्तिमाल करान रोज़ान तॖ अम्युक खऺम्याज़ ॴस्य तुलान बठ्यन प्यठ रोज़न वऻल्य लूख तॖ बिजली हॖन्ज़ खपथ ॴस बडान रोज़ान। सरकार ति ओस यि न्वकसान नज़र अंदाज़ करान रोज़ान। बिजली गरन मंज़ च़ॊवुह गन्टॖ न आसनॖ म्वखॖ ओस लूकन कऻफी तक्लीफ प्यवान बर्दाश्त करुन

**********************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

14.01.2022

🙏🙏नमस्कार माहरा

14.01.2022, पॊह (पौष) ज़ूनॖ पछॖ (शुक्ल पक्ष) बाह (द्वादशी) शॊकुरवार (शुक्रवार/जुम्मा/भार्गववार) श्री सप्तर्षि सम्वत 5097, नक्षत्र रोहिण, राश वृष (चलान) ऋतु शिशर...अज़ छि शिशर सऻन्क्रात 

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

अज़ दपान छि शिशर सऻन्क्रात। तीज़मालि वॊन बरादरस कुन। बॖ गोस ज़न यथ कऻशिर्य पंचान्गस वुछिथ हना परेशान ह्यु। बरादरन वॊन वापस तीज़मालि। क्याज़ि सना। प्रूछ़ तीज़मालि बरादरस। वुछी मऻजी ॳस्य छि पकान सप्तर्षि सम्वत मुतऻबिक। आहनबा तॖ अदॖ। तीज़मालि प्रुछ़नस। सानि पऺचान्गॖ  मूजूब छि अज़ वुनि बाहय तॖ यि सऻन्क्रात छि विक्रमी सम्वत हिसाबॖ यिवान अज़ तिक्याज़ि तमि सम्वतॖ मूजूब छु अज़ माघ मासुक ग्वडन्युक दॊह तॖ सऻन्क्रात मगर सानि पंचान्गॖ हिसाबॖ अच़ि माघ मास वुनि च़ोरि दॊह पतॖ मगर सान्यव ज्योतिष्याचार्यव छु बटॖ दुच़्यॆतिस त्रोवमुत याने दॊशवऺनी तिथियन ततॖ् ग्रॊद कॊरमुत म्यॆ बासान। दफ ओंख्रिस मंज़ जोंखुर। तीज़मालि वॊनुनस। म्यॆ बासान असि छु द्वन ख्रावन मंज़ ख्वर गोमुत। ऒडा हुत्युक तॖ ऒडा यॆत्युक। मगर अस्लियत वनि कुस। तिम ब्रह्मण छ़ान्डोख कति। असि छि तिहॖन्ज़ सख व्यछ़य बासान। ब्यॆयि छुम ब्याख संशय मनस मंज़ सु गव यि ज़ि शिशर कांगॖर मनसावव किथॖ पऻठ्य तिक्याज़ि ॳस्य छिनॖ व्वंय कऺशीरि मंज़ रोज़ानॖय। येति छॆ नॖ स्व तॗर तॖ न छि यॆतिक्यन पताह ज़ि कांगॖर गऺयि क्याह। कांगॖर अनव कति दिमव दान क्याह तॖ कऺमिस तॖ सु तथ करि क्याह। यि प्रथा गछ़ि व्वंय तामथ बंद गछ़ॖन्य तिथय पऻठ्य यिथॖ पऻठ्य न्वश्यन दऺस्य वऻरिव अतॖगथ अनॖनॖच प्रथा गऺयि बंद। तिम न्वशि द्रायि म्यॆ बासान अकॖलमन्द। कथ छि जऻरी।

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - पोन्य, चूंकि गरन मंज़ ॴस्य वंदस अक्सर नलकॖ शिठान तॖ पोन्य तिमव नलकव मंज़ युन ओस बंद गछ़ान। लूख ॴस्य पनॖन्यन ॳन्दरिम्यन नलकन कपुर वलान ताकि शिशर अच़ि नॖ नलकन तॖ पोन्य रोज़ि पकवुन। कुनि कुनि जायि ॴस्य नलकन ॳन्द्य ॳन्द्य ह्वख गासॖ गन्डान तॖ तथ गासस च़ॖख दिवान ताकि नलकस रोज़ि हरारत बरकरार तॖ पोन्य रोज़ि पकवुन। यिम क़दम ॴस्य यिवान तुलनॖ यॆलि तॗर आसिहे शिदतॖच याने नफी च़्वदह पंदह डिग्री। वुछनस तल छु आमुत ज़ि डल जीलुक पोन्य ति ओस अथ हदस ताम लऺगिथ गोमुत अकि वऺरियि तॖ तथ तुलॖकतरस प्यठ छि जीप आमॖच़ चलावनॖ। खऻर अज़कल दपान कऺशीरि मंज़ छॆ नॖ तीच़ कॊहनॖ तॖर व्वंय आसान। 

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

13.01.2022

🙏🙏 नमस्कार माहरा

13.01.2022 पॊह (पौष) ज़ूनॖ पछॖ (शुक्ल पक्ष) काह (एकादशी) ब्रसवार (गरूवार/वीरवार/ब्रहस्पतवार) श्री सप्तर्षि सम्वत 5097, नक्षत्र कृति, राश वृष (चलान) ऋतु हेमन्त (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

बरादरन पकनऻव कथ ब्रोंहकुन यि वऺनिथ ज़ि ब्याख शख्स दपान ओसमुत ओस कुस ताम शॊम्भूनाथ यॆम्य बिसऻत्य वान खोज्येयो तॖ ओसुन थॊवमुत मिन्यारि सामान याने श्रॖंगारूक सामानॖ मस्लन बॖन्गरि, फ्यरनॖच डोरि, ट्यॆक्य पूच़ॖ, नऺर्यवार, ॴनॖ, कंगॖव्य, टॏरॖच, स्यलॖ, बिन्दरि, अटॖहऻर्य, वगैरा तॖ सॗतीय दपान ह्यॆच़्येयन थवॖन्य खऻस्य, थाल, पऺट्य, तौलियायि, गिलास वगैरा यिम खान्दर वाल्यन ओस किरायस प्यठ दिवान रोज़ान। मगर पनॖनि बरादऺरी मंज़ दपान रूद नॖ तऺमिस ति यज़थ तॖ थॊवुख नॖ सुति कऻन्सि बुथ हावुन लायक। तऺम्य कॊर नॖ पनुन सु दुकान बंद मगर तऺम्य यॆमि यछ़ायि सान पनुन यि बदलाव ह्यॆच़्यॆयो अनुन स्व यछ़ा गऺयि नॖ तस पूरॖ।  तीज़मालि प्यव नॖ कॆंह पलि ज़ि ॴखॖर बरादर सॖन्ज़न कथन क्याह जवाब दी स्व। पनुन ल्वकॖचार प्योस याद तॖ दॊपुन बरादरस ज़ि याहबा यि छुय पॊज़ ज़ि असि द्रायि पनॖनी यार दोस्त दुशमन। बस परनॖ ल्येखनॖ रॊस ओस नॖ सान्यन ज़िठ्यन ब्यॆयि कुनि कुन ज़्वन प्यवान। हालांकि ब्यॆयि ज़ऻच़ हॖन्द्य लूख गऺयि बनावान म्यॆच़ि स्वन तॖ कऻशिर्यन बटन रूद पानस सॗत्य सिरिफ परनुक ल्यॆखुनुक अख बॊड ग्वन। बरादरन वॊनॖनस आहनी मऻजी यि ग्वन छु वाकयी स्वनॖ ख्वतॖ स्यठाह थॊद मगर यिति छु अख पज़र ज़ि पर-ज़ऻच़क्यव केंच़व लूकव कऺर्य परान परान ति कॆंह अदभुत कार अदॖ यॆमिस यिथॖपऻठ्य आव व्यस्तार।   

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - वंदस छि कऺशीरि मंज़ त्रॆ हिसॖ आमॖत्य करनॖ याने चिल्लय कलान्, चिल्लॖ ख्वरुद तॖ चिल्लॖ बच्चॖ। ग्वडन्युक छु रोज़ान च़तजीहन दॊहन, दॊयिम छु रोज़ान वुहन दॊहन तॖ त्रॆयिम छु रोज़ान दऺहन दॊहन मत्लब कुल तॗर छि रोज़ान सत्थन दोहन मगर यिम सतथ दॊह छि आसान क़यामतॖक्य दॊह तिक्याज़ि अथ कालस मंज़ छि गरन मंज़ नलकॖ गछ़ान शिठिथ यथ वनान छि नलकॖ लऺगिथ गछ़ुन याने नलकव मंज़ॖ पोन्य युन गछ़ान बंद। सरकारन छि जायि जायि मऺहलन मंज़ बडि आकारॖक्य नलकॖ लागनऻव्यमॖत्य तॖ यिमव नलकव मंज़ॖ छु रोज़ान पोन्य लगातार पकवुन। मऺहलॖक्य लूख छि सारान रोज़ान यिमव नलकव प्यठॖ पनॖन्यन पनॖन्यन गरन बापथ पोन्य। यि कऻम छि स्यठाह मुश्किल आसान ख़ास तोर पऻठ्य यॆलि शीन या रूद छु प्यवान या यिम लूख मकानक्यन ह्यॆरम्यन पोरन प्यठ छि रोज़ान तिमन ताम पोन्य वातॖनावुन छु सखॖ अज़ाबॖच कऻम आसान

**********************

नऺविव तॖ फॊलिव

भूषण कौल "दीप"  

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

12.01.2022

🙏🙏 नमस्कार माहरा

12.01.2022, पॊह (पौष) ज़ूनॖ पछॖ (शुक्ल पक्ष) दऺहम (दशमी) देवादेव (ब्वदॖवार) बुधवार, श्री सप्तर्षि सम्वत 5097, नक्षत्र भरण, राश वृष (रऻच़ हॖन्ज़ॖ 08.45 बजि प्यठॖ) ऋतु हेमन्त (चलान)

**********************

 त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

********************** 

बरादरन वॊन तीज़मालि कुन ज़ि म्यॆहय छु बूज़मुत ज़ि ॳक्य कऻशिर्य बटन मा कंरेयो  नऻविद कार शुरू ॳथ्य रिफॏरमिकिस सिलसिलस मंज़ तॖ खुलाव्योन वान। नाव ओस तस दपान सिरीकऻन्ठ। बडॖ चमॖ खमॖ सान सज्जाव्योन यि दुकान द्रऻब्यारॖ मऺहलस मंज़ हब्बॖकऺदलॖ,श्रीमगरॖ   मगर दपान तथ दुकानस प्यठ खॊत नॖ कांह बटॖ मस कासनावनि या दऻर कासनावनि यॆमि खोफॖ किन्य ज़ि युथ नॖ सिरीकऻन्ठ नऻविद ख्वदानखास्ता म्यंग व्यंग अनि च़टिथ तिक्याज़ि बटॖ छु तॖ यि कार मा तग्यस करुन। दपान स्यठाह कम लूख ॴस्य गछ़ान अथ वानस प्यठ ज़ुव म्वछि मंज़ थऺविथ। सिरीकऻन्ठ दपान रूद गाटस मंज़ यि कऻम करनस मंज़। यपऻर्य त्रोव पनॖनि समाजिक्यव लूकव ॳमिस सॗत्य व्वथुन बिहुन तॖ यि सिरीकऻन्ठ दपान ज़न ओस बिचोर आमुत च़ूरि प्यठ रटनॖ सिरिफ अमि म्वखॖ ज़ि ॳम्य ह्यॆच़ेयो नॊव तॖ अलग कॖस्मुक कार शुरू करुन तॖ पानस मंज़ बदलाव याने रिफॏरम अनुन। दपान तऺम्य कॊर यि वान कॆंच़ॖकऻल्य पतॖय बंदॖ तॖ बन्यव ग्वसऻन्य याने बाबा जी तॖ वोत तुलमुल यॆति तऺम्य पनॖन्य बकाया वऻन्स कऺड सादॖलय मंज़ॖय। तथ बजायि यिम मुस्लमान नऻविद कार करान रूद्य तिमव बनऻव्य ॳकिस वानस च़ोर च़ोर वान तॖ ब्यॆयि थऻवख च़ाटॖबऻज्य ति तॖ कॊरुख कारोबार ठाठ बाठॖ सान, शानॖ तॖ फखरॖ सान। बटस पूर्यव नॖ अथ कारस मंज़ कॆंह तिक्याज़ि पनॖन्यव अंगव ॴश्यनावव वोल सिरीकऻन्ठ हति पावि प्यठॖ ब्वन तॖ ब्यॆयि वुछॖहोस नीच नज़रि तॖ हकारत सान। मगर अज़ छु बासान ज़ि यि नज़र छि बदलेमॖच़ कुनि हदस ताम। तीज़माल रूज़ बोज़ान बरादरसॖन्ज़ कथ तॖ त्रोवुन ज़्यूठ व्वशाह। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - म्यॆच़ॖ खॊत, गुरॖट्य म्यॆच़ ॴस यिवान सारनॖ कऺशीरि मंज़ बाहच़न मंज़ तॖ हऻन्ज़ ॴस्य यि म्यॆच़ फ्वत्यन मंज़ बऺरिथ लूकन कॖनान रोज़ान। कऻशिर्य बटॖ ॴस्य आसान खास खऺरीदार। चूंकि सूर ओस नेरान गरि दानॖ मंज़ॖ तॖ कांगर्यव मंज़ॖ तॖ ओस नॖ प्यवान मऺल्य ह्यॊन। कॊश    ओस प्यवान मऺल्य ह्यॊन तॖ ओस यिवान दमचूलस मंज़ ज़ालनॖ। अथ कऺश्य दमचूलस प्यठ ओस यिवान अक्सर वंदस मंज़ पोन्य गरमावनॖ पलव दलव छलनॖ बापथ, श्रान वान करनॖ बापथ या गरच्यन हेरन, वुज़स, ब्रांदस,

द्वारस, कुठ्यन वगैरा लिवनॖ बापथ। म्यॆच़ ॴस आसान साफ सुथरॖ  तॖ ॴस यिवान थावनॖ ल्वकटिस खऺतिस मंज़ या कुनि कतरिविस च़ऺडिस वऺडिस मंज़ तॖ गैरिक्य सऻरी बऻच़ ॴस्य अम्युक सही इस्तिमाल करान रोज़ान सुबॖ प्यठॖ शाम ताम। मगर व्वंय छि म्यॆच़ मथनॖच प्रथा स्यठाह कम गऻमॖच़ तिक्याज़ि देखा दीखी मंज़ छि म्यॆच़ि हॖन्ज़ जाय रऺटमॖच़ साबनि। व्वंय छि बानन बापथ अलग साबन, पलव छलनॖच अलग साबन, श्रानॖ वानॖ बापथ अलग साबन। व्वंय छि आमॖत्य नऺव्य नऺव्य चीज़ बाज़रस मंज़ तॖ म्यॆच़ गऺयि मीलिथ म्यॆच़ि मंज़ॖय।

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

11.01.2022

🙏🙏 नमस्कार माहरा

11.01.2022 पॊह (पौष) ज़ूनॖ पछॖ (शुक्ल पक्ष) नवम (नवमी) देवादेव बॊम्वार (मंगलवार), श्री सप्तर्षि सम्वत 5097, नक्षत्र अश्विन, राश मेष (चलान) ऋतु हेमन्त (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

*********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

बरादरन वॊन तीज़मालि कुन ज़ि मऻजी म्यॆ छु बासान ज़ि यॊत यिथ छि सऻनिस समुदायस मंज़ केंच़व लूकव पनुन सोंच बदलोवमुत तॖ ह्यॊतमुत छुख करुन ती यि कश्यप बन्धु यछ़ान ओस अज़ क़रीबन शीथ नमथ वऺरी ब्रोंह। आहनबा करन ना व्वंय। तीज़मालि वॊनॖनस वापस। दपान छानस यॆलि पानस प्यठ प्यवान  ईकलॖ कनि छु स्वच़्लि तुल लागान। कशीरि प्यठॖ च़लनॖ पतॖ गऺयि सरकऻर्य नोकरी गऻबॖय सान्यन शुर्यन हॖन्दि बापथ। सऻरी छि दवान व्वंय प्राईवेट नोकरीयन पतॖ। अमि मूजूब ति लऺग्य ॳड्य लार तॖ ॳड्य दार। छऺक्कॖरनॖ आमॖत्य छि ॳस्य तॖ सऻन्य शुर्य। न्यॆबॖर्य छि असान मगर ॳन्दॖर्य ॳन्दॖर्य छि वऻत्यमॖत्य च़न्द्रॖहोम। सोंच बदलावन नॖ तॖ अदॖ क्याह करन। करुनुय प्यॆयख कॆंह न तॖ कॆंह। हालांकि थज़ि तऻलीमि मंज़ॖ ति आव व्यस्तार वारियाह पऺत्यम्यव च़तजिह्यव पंच़ाहव वऺरियन मंज़ तॖ टनलि योर तरनॖ पतॖ आयि सान्यन शुर्यन ति ॳछ मुच़ॖरावनॖ तॖ ह्यच़ख नरि ज़ंगॖ दऺछिन्य खोवॖर्य वाहरावनि। आहनी मऻजी म्यॆ छु बासान यि ति छि अप्रत्यक्ष कृपा भगवान सॖन्ज़। बरादरन वॊन तीज़मालि कुन ज़ि दिलस छु मगर ज़न तीर ह्यु लगान यॆलि वुछान छुस प्रथ गरस मंज़ छि शुर्य कम गछ़ान दॊह पतॖ दॊह। केंच़न गरन मंज़ छि बुडॖ तॖ बुडिन अख ॳकिस थलि थलि वुछान रोज़ान ति क्याज़ि तिम छिनॖ शुर्यन कट्यन हॖन्ज़ क्रख चिख दूर दूर ताम बोज़ान। बस मॊबाइलॖ दऺस्य पनॖनि मनॖक्य भाव सोज़ान रोज़ान तॖ ख्वश रोज़नुक अख बहानॖ बनऻविथ पनॖन्य बचेमॖत्य च़िन्ह कडान रोज़ान। यिम ति मजबूर तिम ति मजबूर। वख्तन कऺर्य ॳस्य सऻरी दूर दूर। ज़ानि दय कयाह छु तस मन्ज़ूर। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - म्यॆच़ि खॊत, कऺशीरि मंज़ ॴस्य वख अकि साबनि बदलॖ म्यॆच़ि सॗत्यन छ़्यॆट्य अथॖ छलान, ठोकुर कुठिस मंज़ दीवी दीवताहन हॖन्ज़ॖ मूर्ती, फाकॖक्य बानॖ, हवनॖक्य बानॖ वगैरा  ति ॴस्य म्यॆच़ि सॗत्यन छलान रोज़ान तॖ मानॖनॖ ओस यिवान ज़ि म्यॆच़ि सॗत्य छॊलमुत बानॖ गव श्रूच़। हालांकि चोकॖक्य छ़्यॆट थाल, खऻस्य, गिलासॖ, कवलि, काशवॖ, गऺडवॖ वगैरा ॴस्य यिवान सूरॖ सॗत्य सुरनावनॖ तॖ चोकॖच बकाया ॳडिन्य गऺडिन्य  ॴस्य म्यॆच़ि सॗत्य यिवान छलनॖ। कॆंह बानॖ ॴस्य यिवान गासॖहुरि तॖ सेरि फल्यव सॗत्य मांजनॖ मस्लन दीग्चि, बॊहगन, पऺहरात, चिलम्ची वगैरा। ल्यॆजन तॖ केंच़न बॊहगनन ओस यिवान च़ऺकिस म्यॆच़ि कॊन्ड यिवान करनॖ। खान्दरन तॖ बड्यन दॊहन प्यठ ॴस्य थाल वाल कशि सॗत्य साफ करान तॖ  छलान रोज़ान। साबनि हुन्द इस्तिमाल ओस यिवान करनॖ सिरिफ श्रान वानॖ विज़ि तॖ पलव दलव छलनॖ विज़ि।

**********************

नऺविव तॖ फॊलिव

भूषण कौल "दीप"  

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

10.01.2022

🙏🙏 नमस्कार माहरा

10.01.2022, पॊह (पौष) ज़ूनॖ पछॖ (शुक्ल पक्ष) ॴठम (अष्टमी) देवादेव, च़ऺन्दॖरवार (सोमवार), श्री सप्तर्षि सम्वत 5097, नक्षत्र रेव (चलान), राश मेष (सुबहॖचि 8.49 बजि प्यठॖ) तॖ द्रठॖपऻन्च़ुक (पंचक) समाप्त, ऋतु हेमन्त (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

दपान कश्यप बन्धु जी यॆलि लाहोरॖ प्यठॖ कऺशीरि  आव तऺम्य दपान वुछ कऻशिर्य बटन्यन फ्यरना लऻगिथ तॖ बटन ति प्यरनन ज़ीठ्य ज़ीठ्य नऺर्य बनऻविथ तॖ दपान तऺमिस बास्यव ज़ि यि प्वशाक छु बटन आलुच़ अनान तॖ तिम छिनॖ ह्यकान हॖकॖ कांह ति कऻम कऺरिथ या हॖकॖ व्वथित बिहिथ। यि ख़याल ज़ॆहनस मंज़ थऺविथ दपान कश्यप बन्धुहन सूंच ज़ि यॊदवय बटनि फ्यरनॖचि जायि साडि लागन तिमन च़लि आलुच़ तॖ तिम ह्यकन कऻम कॊट तीज़ी सान कऺरिथ। दपान अथ व्यच़ारस सॗत्य गऺयि वारियाह बटॖ सहमत तॖ वारॖ वारॖ आव यि रिफॏरम बारसस। हालांकि सारिवी बटन्यन आव नॖ वार व्यस्तार मगर रिफॏरमन दपान रॊट ज़ोर तॖ लूकन बास्येयि कश्यप बन्धु सॖन्ज़ यि राय तॖ तजवीज़ जान मगर बकाया कथन सॗत्य दपान आयि नॖ लूकन बराबऺदी। ख़बर तिम कम हिशॖ कथॖ आसॖ। बरादरन प्रुछ़ तीज़मालि। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - कांगॖर, कऻशिर्य बटॖ ॴस नॖ तॊताम कांगरि थफ तुलान यॊत ताम नॖ यि कांगॖर ॴस नारस हवालॖ यिवान करनॖ याने यॆलि अथ कांगरि ओस सिरिफ क्रंज़ॖय योत म्वच़ान, तथ ॴस्य वनान कांगरि ख्वर तॖ तथ मंज़ ॴस्य कऻशिर्य बटॖ ह्वख गासॖ बऺरिथ तॖ गासॖव ज़ीठ रज़ कऺरिथ हेरच़ पतॖ तीलॖ ॴठम दॊह यारॖबल-चांदस प्यठ नारस हवालॖ कऺरिथ परान रोज़ान जतॗं तॗंं, जतॗं तॗं तॖ अदॖ ओस तस्लाह गछ़ान ज़िछ कांगरि ह्यॆच़ अंदस ताम कऻम तॖ वंदस रूद वुशनेर। हालांकि कऺशीरि मंज़ छि ब्यॆयि ति सादनछ़ व्वंय कुठ्यन मंज़ गर्मी वातॖनावनॖक्य याने ब्लोवर, रूम हीटर, सिगरी, बुखारि, रबड बोतलॖ, वगैरा वगैरा मगर युस मज़ॖ कांगॖर दिवान छि कऺशीरि मंज़ वंवदॖ रऻच़न तॖ यिमन यिमन काम्यन यि कांगॖर बकार  यिवान रोज़ान छि तथ मुकाबलस छु नॖ ब्यॆयि कांह ति चीज़ कऺशीरि मंज़ ततिक्यन लूकन नज़र यिवान। नावि हऻन्ज़ॖ सॖन्दि प्यठॖ बज्यन मंदोर्यन मंज़ रोजंन वऻल्य छि कांगरि ल्वलॖमतॖ लाय करान रोज़ान।  यॊत वऻतिथ रऻव यि कांगॖर ति असि तॖ रोव सु शॆहजार ति। कॊत गऺयि कऺम्य नी म्यऻन्य टऻठ कांगॖर। यिमव च़ऺलॖरऻव्य ॳस्य तिमन प्यॆन्य तऺच़ कांगॖर

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

09.01.2022

🙏🙏 नमस्कार माहरा

09.01.2022, पॊह (पौष) ज़ूनॖ पछॖ (शुक्ल पक्ष) सतम (सप्तमी) देवादेव आथवार (रविवार/ऐतवार) श्री सप्तर्षि सम्वत 5097, नक्षत्र रेव, राश मीन (चलान) ऋतु हेमन्त (चलान) द्रठॖपऻन्च़ुक (पंचक) (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

असि युस बदलाव युन गॊछ़ सु आव नॖ तॖ युस नॖ युन गॊछ़ सु छि वुछान। बरादरन वॊन तीज़मालि कुन। आहनबा ती छस बॖति सोंंचान ज़ि ॴखॖर अथ बदलावस कुस छु ज़िम्मवार। कऺमिस खारव तक्सीर। तीज़मालि कॊर यि सवाल बरादरस। मऻजी बॖ छुस पानॖ हऻरान ज़ि कऻशुर बटॖ कति ओस तॖ कॊत वोत, क्याह ओस तॖ क्याह छु। कश्यप बन्धु सुन्द ख्वाब रूद अडॖल्यॊक तॖ अंसि ति शायद ज़ोन नॖ मुनऻसिब तऺम्यसुन्द सु रिफॏरम पानॖनावुन। ज़ानि दय सु यछ़ान क्याह ओस। बरादरन प्रुछ़ तीज़मालि। मऻजी च़्यॆ छुया कॆंह ज़वन अथ मुतलक। तीज़मालि वॊनॖनस वापस ज़ि म्यॆहाबा छु बूज़मुत ज़ि कश्यप बन्धु ओस यछ़ान ज़ि कऻशुर बटॖ गॊछ़ कॆंह कॆंह कामि पानॖ करुन ताकि तऺमिस प्यॆयिहेनॖ तिमन काम्यन बापथ ब्यॆयिस तबकॖक्यन लूकन पतॖ पतॖ दवुन। खबर कम कामि आसॖ तिम। बरादरन प्रुछ़ वापस सवालॖ तीज़मालि। अख कऻम य्वस म्यॆ बोज़नस तल आमॖच़ छि स्व गऺयैयि सिलऻय कऻम। तऺम्यसुन्द वनुन ओस दपान ज़ि यिम सानि माजि कोरि न्वशि छि तिमन पज़ि सिलऻय ह्यॆछिन्य तॖ पनॖन्य तॖ पनॖन्यन शुर्यन कट्यन हॖन्द्य पलव पानॖ सिवॖन्य।    यानि दफ सॖच़ कऻम। बरादरन प्रुछ़नस। आहनबा अथ वनहऻव तमि सातन सॖच़ कऻमॖय यथ अज़कल नाव छु आमुत दिनॖ ब्वटीक या टेलरिंग हाउस या फऻशन डिज़ायिनिंग वगैरा तॖ लछबॊद छि ज़्येनानयि कऻम करनवऻल्य गरि याने पनॖन्यन शुर्यन बऻच़न मंज़ बिहतॖय। तिम छिनॖ मुलऻज़िम बऺल्कि तिमन छि मुलऻज़िम।कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - कांगॖर, कांगरि हॖन्द्य सिफत आयि वनॖनॖ वारियाह वुन्युखताम, जान ति तॖ नाकारॖ ति। शीन यॆलि प्यवान ओस कऺशीरि मंज़ तॖ यि शीन ओस समान गछ़ान। नवजवान तॖ शुर्य ॴस्य शीनॖ प्वतुल बनावान रोज़ान।अथ शीनस ॴस्य ब्यॊन ब्यॊन आकार दिवान, मस्लन इन्सान बनावान, जानवर बनावान, नाव बनावान याने यॆमिस यि द्यमागस मंज़ यीहे। चुंकि यिम चीज़ बनावान बनावान ॴस्य अथॖ तॗरि सॗत्य शिठान रोज़ान तॖ ओस अथन टॊंगुर गछ़ान। नारॖ कांगॖर ॴस वुहान आसान तॖ ॴस्य अथन वुश्यनेर करान रोज़ान। कांगर्यन ॴस्य क्वन्डल फुटान या कान्युल फ्रेम नीरिथ यिवान तॖ यिमन कांगर्यन ओस यिवान मरम्मत ति करनॖ। कान्युल ओस कांगर्यन शेरान रोज़ान तॖ पनॖन्य पौंसॖ च़ोर ज़ेनान। कॆंह कानिल्य ॴस्य गरॖ गरॖ फीरिथ फुचिमच़न कांगर्यन नव्यर दिवान रोजान। 

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

07.01.2022

🙏🙏नमस्कार माहरा

07.01.2022, पॊह (पौष) ज़ूनॖ पछॖ (शुक्ल पक्ष) पऻन्च़म (पंचमी) देवादेव शॊकुरवार (शुक्रवार/जुम्मा/भार्गववार) श्री सप्तर्षि सम्वत 5097, नक्षत्र पु.भा, राश मीन (रऻच़ हॖन्ज़ॖ 12.15 बजि प्यठॖ), ऋतु हेमन्त (चलान)...अज़ छि कुमार शॆयम (कुमार षष्ठी) ति 

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

त़ीज़मालि वॊन बरादरस ज़ि म्यॆ हाबा छु बूज़मुत दपान कश्यप बन्धु छु ओसमुत सानि कऻशिर्य बटॖ समुदायुक रुत कांछन वोल। आहनी मऻजी म्यॆति छि यि कथ कनन गऻमॖच़ दफ अमापॊज़ म्यॆ छुनॖ ज़्वन ज़ि सु क्याह सना ओस यछ़ान पनॖनि समाजि बापथ करुन। हतबा च़्यॆ छय ना ख़बर यि असि कऻशिर्य बटन्यन हुन्द फ्यरन छु तऺमी त्रावनऻव्यमॖत्य तॖ साडि याने दोति करनाविमच़ॖ। तऺम्य दपान ज़बर्दस्त रिफॏरम यछ़ेयो अनुन मगर दपान तऺम्यसॖन्द्यन मनसूबन द्युत नॖ व्वतलनॖ पनॖनि समाजक्यवॖय केंच़व बटव यि ज़ऻनिथ ज़ि सु छु शायद वथ डालान तॖ बटॖ समाजस ग़ल्त दिशायि कुन पकनावनॖच कूशिश करान हालांकि दपान तऺम्यसुन्द मनशा ओस ज़ि बटॖ गॊछ़ नॖ कुनि कामि खऻतरॖ बंद गछ़ुन तॖ कऻन्सि ब्रोंहकनि अथॖ दारनॖ बापथ मजबूर गछ़ुन मगर चूंकि ॳस्य बटॖ ॴस्य यछ़ान सिरिफ परनस ल्येखनस मंज़ॖय योत महऻरियत हऻसिल करॗन्य तॖ बकाया सीवा दॊयमि तबकिक्यन लूकन दऺस्य करनावॖन्य तवॖ मूजूब द्युतुक नॖ तिमव कश्यप बन्धु सॖन्दिस वनॖनस कुन पनुन कन। मगर केंच़व दपान ओस तऺमिस सहयोग कॊरमुत तॖ तऺम्यसॖन्द्यन ख़यालन हॖन्ज़ सराहना कऺरमॖच़ बरादरन वॊन तीज़मालि। आहनबा ति छु म्यॆति बूज़मुत मगर दपान तिम बिच़ऻर्य आयि पतॖ लॊच़रि नज़रन तल पनॖन्यनॖय अंगन ॳश्यनावन मंज़ तॖ गऺयि मजबूर सु कारॖबार त्रावनस प्यठ। व्वंय गव तथ ति समयाह अख। वख्तन ख्यव व्वलगॊतुन। वुन्यक्यनस छु बासान ज़ि तऺम्यसुन्द सु रिफॏरम मा बनिहे सानि बापथ कारामद वुन्यक्यनकिस वख्तस मंज़ तॖ द्यवॖ लॊच़राविहे सऻन्य मॊहतऻजी कुनि हदस ताम। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - कांगॖर, कुनि कुनि सातन ॴस्य कऺशीरि मंज़ नारॖ कांगरि मंज़ ठुल या सोबूत ओलुव बुज़ान रोज़ान। ल्वकॖट्यन बच्चन हॖन्द्य ॳदॖर्य पलव ह्वखनावान रोज़ान। द्वदॖ-शूर्यन हॖन्द्य लंगोटॖ वगैरा ति ह्वखनावान रोज़ान। वारिहायि लटि छु आमुत वुछनस मंज़ ज़ि सानन्य माज्यन ॴस्य ज़ंगन या लंगन नारॖतऺत्य आसान  लऺग्यमॖत्य कांगॖर तपनॖ सॗत्य ति क्याज़ि कॆंह ज़नानॖ आसॖ नॖ फ्यरनसया या पेटीकोटस तल शिलवार लागान। कुनि कुनि सातन ॴस्य कान्दरन निशि लूख च़ॊट, रवाजस, गिर्दॖ, कुल्चि, तेलवऺर्य, टखटऺच, कत्लमॖ, ग्यवॖ च़्वचि, बऻगिरखानि, रोट वगैरा अनॖनॖ विज़ि पनॖन्यन पनॖन्यन कांगर्यन तॊन्दूरॖ मंज़ॖ नारॖ क्रॊछ़ा त्रावनावान तॖ यिथॖ पऻठ्य ओस कऺशीरि मंज़ कांगर्यन हुन्द इ्तिमाल यिवान करनॖ। यूतुय योत नॖ बऺल्कि ...

*********************

नऺविव तॖ फॊलिव

भूषण कौल "दीप"

(बूज़िव ॳज़्युक यि सबक म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep 

(यि सबक़ वुछिव koshursabak.blogspot.com प्यठॖ ति)

06.01.2022

🙏🙏 नमस्कार

06.01.2022, पॊह (पौष) ज़ूनॖ पछॖ (शुक्ल पक्ष) च़ोरम (चतुर्थी) देवादेव, ब्रसवार (गरूवार/वीरवार/ब्रहस्पतवार) श्री सप्तर्षि सम्वत 5097, नक्षत्र शत, राश कुम्भ (चलान) ऋतु हेमन्त (चलान) द्रठॖपऻन्च़ुक (पंचक) (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

कुनवुहशत तॖ नमतॖ ब्रोंह ॳस्य ज्यॆमिस मंज़ ज़ॖ या त्रॆ जंजगर कुल यिमव मंज़ॖ अख जंजगर ओस कऺमिस्ताम कऻशिर बटॖ सुन्द। मगर नमतॖ प्यठॖ अज़ताम छि बन्यॆमॖत्य यस्लॖ जंजगर अथ ज्यॆमिस मंज़ मगर म्यॆ छुनॖ बासान कऻन्सि कऻशिर्य बटन छु बनोवमुत कांह जंजगर पनुन। तीज़मालि वॊन बरादरस। बरादरन बऺडरऻव तीज़मालि हॖन्ज़ कथ यि वऺनिथ ज़ि ॳथ्य ज्यॆमिस मंज़ छि हतॖबऺद्य मैटाडोरॖ पकान दॊहय मगर कऻशिर्य बटॖसॖन्ज़ नॖ अख ति म्यॆ बासान। वनुनुक मत्लब छु ज़ि ॳस्य बटॖ ह्यकवना यिछ़न काम्यन मंज़ शिरकत कऺरिथ मगर म्यॆ छु बासान ज़ि असि छुनॖ पनुन समुदाय इजाज़त दिवान यिमन कथन प्यठ सोंचनुक। ॳस्य लऺग्य परनस ल्येखनस कुनुय तॖ बकाया कामि करनावि पर-ज़ऻच़क्यन लूकन दऺस्य। वजह द्राव यि ज़ि ॳस्य छि वुनि ति ब्यॆयन प्यठॖय दऺरिथ तॖ पनॖनि ज़ंगॖ छि नटान यिछ़ॖ कामि करनस। बरादरन वॊन तीज़मालि। आहनबा ति छु पॊज़। म्यॆ बासान असि पज़ि पनॖन सोच बदलावुन वख्तस सॗत्य सॗत्य। व्वंय छि वख्तॖच मांग यी। हालांकि नमतॖ पतॖ ह्यॊत योर वऻतिथ केंच़व सान्यव शुर्यव ख्वर वाहरावुन सु ज़न गव ज़ि तिमव कऺर ल्वकॖट्य म्वकॖट्य कारखानॖ शुरु तॖ छि पनुन हाक-बतॖ ख्यवान। मगर ज़रूरत छि यिथ्यन खयालन हुर्यर द्युन। यिमव यॆति यिम नरि ज़ंगॖ ह्च़ॖ वाहरावनि, कऺशीरि मंज़ रूज़िथ ह्यकहऻन नॖ तमि आयि वाहरऻविथ। यि ति छि अख बदलावॖच निशऻनी। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - कांगॖर, अज़ पांच़त्रॖह शॆयत्रॖह वऺरी ब्रोंठ यॊदवय वुछव कऺशीरि मंज़ ॴस्य नॖ बटॖ या मुस्लमान बॊन्दुक ह्यथ आसान। यिम आतंकवऻद्य ज़ानि दय किथॖ पऻठ्य तॖ कति प्यठॖ आयि तॖ तुलुख बॊन्दूक तॖ कॊरुख कत्लि आम शुरु। यिम औज़ार कमव वातनऻव्य यिमन दहशतगर्दन अथ पऺत्यकिन्य छि वारियाह ज़ीठ दास्तान् म्यॆ बासान। बटॖ ज़ानिहे नॖ श्राकॖपुच ति अथस क्यथ रटुन तॖ न छु बटॖ वुनि ति श्राकि अथॖ लागान तॖ बॊन्दूकॖच छॆनॖ कथॖय।  यॊदवय कुनि सातन ति कऺशीरि मंज़ कऻन्सि ति ॴस हर याने लडऻय व्वथान कऻन्सि सॗत्यन सुति वंंदॖस मंज़। लडायगऺर्य ॴस्य पानॖवुन्य कांगरि छावान अख ॳकिस। ऱयतॖकऻलिस मंज़ ॴस्य ज़्यादॖतर कनि जंग करान रोज़ान। कांगरि आसॖ यिवान ठासनॖ ओरॖ योर। बॊन्दूकुक नाव ओस नॖ बूज़मुत कऺशीरि मंज़ मगर अज़कल छु तिमन बॊन्दूकॖ चलावनॖ बापथ तॖ कांगॖर सिरिफ तपनॖ बापथ

****************"*****

नऺविव तॖ फॊलिव

भूषण कौल"दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

05.01.2022

05.01.2022, पॊह ,(पौष) ज़ूनॖ पछॖ (शुक्ल पक्ष) त्रय (तृतीया) देवादेव ब्वदॖवार (बुधवार) श्री सप्तर्षि सम्वत 5097, नक्षत्र श्रवण, राश कुम्भ (शामचि 07.53 बजि प्यठॖ) ऋतु हेमन्त (चलान)..द्रठॖपऻन्च़ुक (पंचक) शुरु शामॖ प्यठॖ

**********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि वॊन बरादरस कुन ज़ि म्यॆ हाबा बासान ज़ि व्वंय पज़न असि पनॖन्य तिम प्रऻन्य बंद्यशि मऺशरावनि तॖ पनॖन्य मॊहतऻजी ख़तम करनॖच कूशिश करॖन्य। बरादर गव ख्यूबस मंज़ ह्यु तॖ ब्यूठ अंदॖर्य अंदॖर्य सोंचनि ज़ि अमा तीज़माल कोरकुन सना छि इशारॖ करान। पलि प्योस नॖ कॆंह तॖ प्रॖछ़नस लॊगुस नॖ चारय। मऻजी चानि वनॖनुक मत्लब क्याह छु। म्यॆ ज़न तॊर नॖ फिकिरी ॴखॖर च़ॖ वनुन क्याह छख यछ़ान।  तीज़मालि ह्यॊत पनुन व्यच़ार व्यक्तॖ करुन मगर सोंचाह कॊरुन ज़ि कति प्यठॖ करॖ शुरु। ॴखॖर मुच़रऻवॖन ज़्यव तॖ वॊनुन बरादरस ज़ि असि छु सिरिफ यि मनस मंज़ सऺनिथ गोमुत ज़ि सोन शुर गछ़ि सिरिफ परुन तॖ ल्येखुन। आहनी पतॖ वथ प्यठॖ आयि ॳस्य यी करान तॖ अथ मंज़ ख़रऻबी क्याह बासेयि च़्यॆ मऻजी। सवाल कॊर बरादरन तीज़मालि। नबा खरऻबी छॆनॖ कांह। म्यॆ कति वॊन ति मगर असि पज़ि सॗत्य सॗत्य बकाया काम्यन कुन ति पनुन शुर लागुन। म्यॆ यॊत ताम ज़्वन छु बॖ छस बोज़ान ज़ि असि बगऻर छि बकाया सारेयि ज़ऻच़ हॖन्द्य शुर्य परनस ल्यॆखनस सॗत्य सॗत्य दऺह कामि करान रोज़ान। सोन शुर छुनॖ तिछ़न काम्यन मंज़ पनॖन्य ज़ंग यछ़ान छ़ॖनुन ति क्याज़ि तऺमिस छि पताह ज़ि तऺमिस छु सिरिफ परनस ल्येखनस कुनुय यॊत ध्यान द्युन ब्यॆयि छुनॖ तस कुनि ब्यॆयि कामि कुन सोंचनुक वार व्यस्तार। बरादरन सूंच ज़ि तीज़माल छि शायद संजीदगी सान क्याहतान्य यछ़ान वनुन। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - कांगॖर, अथ कांगरि पऺत्यकिन्य छु आसान कान्युव कॊर बनऻविथ यथ मंज़ पनस सॗत्य छि अख  च़ालन यिवान गन्डनॖ। अमि च़ालनि सॗत्य छि रोज़ान अथ कांगरि मंज़ बऺरिथ नारस वॊखुर करान रोज़ान ताकि नारुक तच़र तॖ वुशनेर रोज़ि बराबर चलवुन। यि च़ालन ति ॴस आसान कॖसॖमवार याने हचिव, शॆशतॖरॖव, मिसिव। कुनि कुनि कांगरि ओस आसान शूहारन ति च़ालनि बदलॖ गऺन्डिथ। शूहारन सॗत्य ॴस्य बूठ यिवान छ़ॖनॖनॖ। अज़कल छि तिम शूहारन ज़्यादॖतर बूटॖ-वानन प्यठ यिवान नज़रि, गरन मंज़ कमॖय पाहन ति क्याज़ि बूटन मंज़ ति आव कति कोर बदलाव। कुनि कुनि रंगदार तॖ डिजायिनदार कांगरि ॴस आसान रॊपसॖन्ज़ च़ालन ति लऻगिथ ख़ास तोर पऻठ्य नव्यन न्वश्यन हॖन्ज़न कांगर्यन। कांगरि आसॖ यिवान जहालतस मंज़ अख ॳकिस छावनॖ ति

**********************

नऺविव तॖ फॊलिव

भूषण कौल "दीप"   

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

04.01.2022

04.01.2022, पॊह (पौष) ज़ूनॖ पछॖ (शुक्ल पक्ष) द्वय (द्वितिय) देवादेव बॊम्वार (मंगलवार) श्री सप्तर्षि सम्वत 5097, नक्षत्र उ.षा, राश मकर (चलान) ऋतु हेमन्त (चलान)

**********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

मऻजी यि कथ छ़ि मज़ॖदार। बरादरन वॊन तीज़मालि कुन। आहनबा सानि प्रानि कथॖ छि सार्यॆय मज़दार मगर फुरसथ कऺमिस छि अज़कल व्वंय। न वनन वऻलिस तॖ न बोज़न वऻलिस तीज़मालि द्युतनस जवाब। दपान छि ॳमिस यक्ष्यसॖन्ज़ टूप्य यॆमिस मेलि सु छु सपदान मालामाल। बरादरन बऺडरऻव कथ। तीज़मालि त्रऻव असनॖहऻना तॖ दॊपुन बरादरस ज़ि बूज़मुत छु म्यॆति यी मगर अज़ ताम छ्यनॖ कऻन्सि स्व टूप्य मीजमॖच़। ज़ानि दय पॊज़ क्याह तॖ अपुज़ क्याह। वनॖनॖ छु यिवान ज़ि केंच़न छि रऻच़ गऻमच़ॖ डऻख्य प्रारान प्रारान ज़ि यक्ष्य यी क्ष्यच़ॖर ख्यॆयि तॖ टोपि छ़ुनोस थफ। मगर न आव यक्ष्य तॖ न मीज्य टूपी अल्बतॖ अख चीज़ छु आमुत वुछनस तल। क्याह सना। बरादरन प्रुछ़ यकदम। दपान सुबहॖकि वख्तॖ यॆलि यि क्ष्यच़रि टोक ओस यिवान तुलनॖ अमि टाकि मंज़ॖ ओस आसान ज़न कऻन्सि क्ष्यच़रि म्यॆन्ड अख ज़ॖ ख्येमॖत्य तॖ त्रॆशि गऺल्य अख ज़ॖ ति च्येमॖत्य। यि छु म्यॆति वुछमुत तॖ ब्यॆयि ति मा आसि वुछमुत कऻन्सि कऻन्सि। तीज़मालि वॊन बरादरस। तमि किन छु बासान ज़ि कॆंह नतॖ कॆंह राज़ छु खऺटिथ अथ कथि पतॖ युस नॖ असि ख़बर छु। बरादरन वॊन तीज़मालि ज़ि मऻजी यथ क्ष्यच़ि मावसि मुतलक छि ब्यॆयि ति कॆंह कथॖ यिवान वनॖनॖ। आहनबा आसन। यॆम्य यिथॖ पऻठ्य बूज़मॖच़ आसि सु वनि तमी त्रायि तॖ ब्यॆयि यिथ पऻठ्य किताबन मंज़ छापनॖ आसि आमुत। म्यॆ छु बूज़मुत अख लूकॖ बऻथ। कयाह सना। तीज़मालि प्रुछ़नस। दपान ॴस्य "म्यॆच़िर्यो अज़ हा छय क्ष्यच़रे मावस। गरॖ म्योन यू छय क्ष्यच़रॖ छावस"। बरादरन वॊन तीज़मालि कुन। कथ छि जऻरी  

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - कांगॖर, कऺशीरि मंज़ ॴस प्रथा ज़ि नवि न्वशि आसॖ शिशुरस प्यठ नऺव रंगॖदार तॖ डिज़ायिनदार कांगॖर वऻरिव अनान तॖ वऻर्यविक्य अंग ॴश्यनाव ॴस्य शॊगुन रूपस मंज़ यथाशक्ती रोपियि त्रावान अथ नवि तॖ खऻल्य कांगरि मंज़। कऻशिर बटॖ ॴस्य कांगॖर मकर सऻंकरऻच़ दॊह मनसावान पॆतरन हॖन्दि नावॖ। खान्दरस प्यठ ॴस यि कांगॖर बकार यिवान इस्बंद ज़ालनॖ बापथ ति। शुर्य ॴस्य नॖ कांगॖर अमूमन तपान मगर तिमन बगऻर ॴस यि कांगॖर प्रथ ॳकिस सॗत्य आसान। पनॖन्य पनॖन्य कांगॖर ॴस सारिनी आसान वनि। फ्यरनस अंदर ॳकिस अथस मंज़ कांगॖर रऺटिथ ॴस्य लूख बाज़र नेरान। धोति वाजनि ज़नानॖ आसॖ कांगरि पनॖन्यन शालन तल रऺटिथ आसान। 

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

03.01.2022

03.01.2022 पॊह (पौष) ज़ूनॖ पछॖ (शुक्ल पक्ष) ऒक्दॊह (प्रथमा/प्रतिपदा) च़ऺन्दॖरवार (सोमवार) श्री सप्तर्षि सम्वत 5097, नक्षत्र पू.षा, राश मकर (शामचि 6.22 बजि प्यठॖ), ऋतु हेमन्त (चलान)

**********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि ह्यॆच़ कथ बोज़नावॖन्य बरादरस। दपान हाबा कऺशीर यथ सतीसर ति छि वनान तति आसॖ त्रॆ ज़ऻच़ सानि कऺशीरि मंज़ अच़नॖ ब्रोंठॖय रोज़ान। यिम त्रॆ ज़ऻच़ आसॖ नाग, पिशाच तॖ यक्ष्य। नाग ज़ऻच़ मंज़ दपान ॴस्यमॖत्य ॴस कॆंह इच्छादऻरी नाग ति। पिशाच ज़ऻच़ वऻल्य दपान ॴस्यमॖत्य ॴस्य लडायिगऺर्य, तोस्फी तॖ नाकारॖ स्वभाव वऻल्य तॖ त्रॆयिम ज़ाथ ॴस यक्ष्य। चूंकि कऺशीरि मंज़ ओसमुत ओस पोनी पोन्य युस कश्यप ऋश्यन पनॖनि तपोबलॖ सॗत्य न्यबर कॊड, यिम त्रॆश्यवय ज़ऻच़ दपान रोज़ान ॴस्य कऺशीरिक्यन पहाडन प्यठ। यक्ष्य दपान ॴस्य सऻन्य पऻठ्य शिव उपासक। वंदॖ यॆलि यॆलि यिवान ओस यिम यक्ष्य ॴस्य पहाडव प्यठॖ ब्वन वऺसिथ वंदॖ गुज़ारान। कथ छि स्यठाह ज़ीठ मगर छ़ॊटरऻविथ वनॖ बॖ ज़ि यक्ष्यव मंज़ॖ ओस अख यॆमिस नाव ओस कुबेर तॖ यि ओसमुत छु वक्ष्यपति। चूंकि यि कुबेर ओसमुत छु दपान भगवान शिवस सॖत्य भख्तिभावॖ सॗत्य मीलिथ दपान यि कुबेर ओस आमुत बनावनॖ धन दौलतुक, स्वन, रॏफ, हीरॖ जवऻह्यरातन हुन्द स्वामी। नाग ज़ऻच़ हॖन्द्य लूख दपान ॴस्यमॖत्य ॴस्य क्ष्यच़र ख्यनॖक्य शोकीन तिम ॴस्य ख्वश थावनॖ बापथ कुबेरस यि क्ष्यच़र ख्यावान यॆलि यॆलि सु पहाडॖ प्यठॖ ब्वन वसान ओस। तनॖ प्यठॖ छि यि प्रथा आमॖच़ चलान तॖ पॊह गटॖ पछॖ मावसि दॊह छि कुबेरस थवान श्रूच़ पऻठ्य प्लेटस प्यठ या टऻकिस मंज़ क्ष्यच़ॖर तॖ प्यठकनि स्यिन्यफॊल तॖ आंचार। ॳथ्य सॗत्य छु यिवान थवान ट्यॊक लऻगिथ काजवठ तॖ ब्यॆयि त्रॆशॖ गिलासॖ गासॖव आर्यन प्यठ। काजवठ दपान छु शिव सुन्द, या हिमालय पर्वतुक या पनुन दृड विश्वासुक प्रऺतीक यिवान मानॖनॖ। बरादरन बूज़ कथ तॖ वऺथिस कॆंह सवाल मनस मंज़। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - यॊदवय यि कांगॖर ॴस आसान फ्यॆकि फ्यॆकि दवा तॗरि मंज़ मगर कुनि कुनि वख्तॖ ॴस यि कांगॖर ज़ख ति वातनावान। बिस्तरस मंज़ ॴस यि कांगॖर दुबॖ फ़ेरान यॆलि नफ़रस न्यॆन्दॖर ॴस गऺन्य ॴसान। दुबॖ फेरनॖ म्वखॖ ओस गब्बॖ, करॖच़, लेफ दज़ान यि दऺप्यज़ि ति नारॖ सॗत्य ओस इन्सानस ति आमताव लगान तॖ ओस मच़ि न्यॆंदरि थॊद गछ़ान वॊथिथ। ब्यॆबिस मंज़ कांगॖर थवॖन्य ॴस ख्वश करान। च़ालनि सॗत्य ॴस्य दुह्यकिस दॊहस व्वखुरा व्वखुरा रोज़ान करान।

**********************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

02.01.2022

02.01.2022, पॊह (पौष) गटॖ पछॖ (कृष्ण पक्ष) मावस (अमावस्या) आथवार (रविवार/एतवार) श्री सप्तर्षि सम्वत 5097, नक्षत्र मूल, राश धनु (चलान) ऋतु हेमन्त (चलान)...अज़ छि क्ष्यॆच़िमावस (यक्ष अमावस्या)

**********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

*********************

बरादरन कॊर तीज़मालि नवि वऺरियुक मुबारक तॖ तीज़मालि कऺरनस ॴही तॖ द्युतनस ॴशिर्वाद। मऻजी यि क्ष्यॆच़िमावसि हॖन्ज़ कथ क्याह सना छि ॴसमॖच़ च़्यॆ मा खबरा कॆंह। बरादरन प्रुछ़ तीज़मालि। हतबा यिमन प्रान्यन कथन छा अंद कुनि। तीज़मालि द्युत जवाब बरादरस। अल्बतॖ कांह कांह कथ छि आसान दऺरिथ गऻमॖच़ तॖ लूख ति छि तऺथ्य कथि थफ कऺरिथ पनॖन्य शुर्यन बोज़नावान तॖ व्वत्सव मनावान रोज़ान। मस्लन पन्नॖच कथ, गाडॖ बतॖच कथ, काव पुनिम कथ, क्ष्यच़िमावस कथ, हेरच़ हॖन्ज़ कथ, कऻश्य हॖन्ज़ कथ, ॴठम हॖन्ज़ कथ, गनच़्वदॖश्य हॖन्ज़ कथ, संकट च़ोरम कथ, च़न्दन षॆष्ठी कथ, मॊन्जहोर तऺहर कथ, हारॖ सतम कथ, नाग पन्चमी कथ वगैरा वगैरा। हालांकि यिमन दॊहन पतॖ छि कांह नतॖ कांह कथ बऺनिथ मगर कऺमिस कॊस कथ कऻच़ाह याद छि यि वनुन छु हना मुश्किल। सानि माजि या नानि आसॖ बोज़नावान रोज़ान कऺशीरि मंज़ यिम कथॖ पनॖन्यन शुर्यन ज़ुर्यन वख अकि पनॖनिस फ्यरनॖकिस दऺलिस तल बॆहनऻविथ। मगर न रूद सु दॊल कुनि, न छि तिछ़ नान्य नऺन्य व्वंय, न छि तिम शुर्य या ज़ुर्य नऺन्य तॖ न रूज़ स्व कऺशीरॖय व्वंय। कथ हय वनन ति कऻन्सि शुरिस तऺमिस तरि नॖ फिकिरी तिक्याज़ि सु छुनॖ पनॖनि माजि ज़्यॆवि मंज़ कथ करानॖय तॖ यिमन कथन छुनॖ कुनि ब्यॆयिस ज़बऻन्य मंज़ तरजमॖ करनॖ सॗत्य सु कथि हुन्द मॆछर रोज़ान। व्वंय क्याह वनय बॖ तॖ च़ॖ क्याह बोज़ख। तीज़मालि त्रॊव व्वश तॖ त्रोवुन बरादर सोंचस। क्ष्यॆच़िमावसि हॖन्ज़ कथ हाबा छि म्यॆ बूज़मॖच़ यिथॖ पऻठ्य। बरादरन दोर कन कथ बोज़नॖ बापथ। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान। कांगॖर - च़्रारॖ कांगॖर या अनन्तनऻग्य कांगॖर ॴस जान तॖ पायदार कांगॖर यिवान माननॖ। गामन मंज़ ॴस कांगरि अलावॖ मनन ति आसान। कांगॖर माने अख कतर्युव क्वन्डुल यथ अरॖ वरॖ कानिल्य कऻम ॴस आसान कऺरिथ तॖ अकि अंदॖ ज़ॖ थपॖ बनऻविथ यिमव दऺस्य यि कांगॖर ॴस्य ह्यकान द्वश्यवॖय अथव सॗत्य या अकि अथॖ सॗत्य रऺटिथ तॖ ओस यिवान पनॖनिस पानस वुशनेर करनॖ। अथ क्वन्डलस मंज़ आसॖ च़ॖनि यिवान बरनॖ तॖ तथ प्यठॖ दानुक नार त्रावनॖ तॖ ॴस यि कांगॖर फ्यरनस तल या कमलि तल या पेटीकोटस तल यिवान थवनॖ तॖ ॴस्य वंदस मंज़ वुशनेर करान। अथ कांगरि मंज़ ॴस्य खान्दरस या कुनि बऺडिस व्वछ़बस प्यठ इस्बन्दॖ ति ज़ालानॖ। मनन ॴस आसान म्यॆच़िव कांगॖर थपिदार यॆमि सॗत्य वुशनेर ओस यिवान करनॖ

*********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)