01.01.2022

01.01.2022 पॊह (पौष) गटॖ पछॖ (कृष्ण पक्ष) च़्वदह (चतुर्दशी) बटॖवार (शनिवार/शनिश्चरवार) श्री सप्तर्षि सम्वत 5097, नक्षत्र ज्येष्ठ, राश धनु शामचि 7.17 बजि प्यठॖ, ऋतु हेमन्त (चलान)

*********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

*********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

🍇🍇🍇🍇🍇🍇

प्रोन गव पथकुन आश थव तथकुन

युस यी ह्यथ सानि बापथ नॊव बहार

अंग्रीज़ वऺरी गव शुरु ॳज़्यकि प्यठॖ। भगवान कऺरिन ज़ि ह्रॊच़ तॖ फ्रूच़ नीरिन सारिनी यि नॊव वऺरी तॖ अमि ब्रोंहकुन यिनॖवोल समय ति

🍇🍇🍇🍇🍇🍇

अज़ छु 2022 ई सदी हुन्द ग्वडन्युक दॊह। म्योन मुबारक छु त्वहि सारिनी तॖ सऻरी रूज़िव ख्वश तॖ ख्वशहाल। हालांकि सोन याने सप्तर्षि सम्वत या कऻशुर पन्चांग छु 5097 वऺरी प्रोन तॖ सऻन्य सभ्यता छि तीच़ॖय प्रऻन्य बऺल्कि तमि ख्वतॖ ज़्यादॖ प्रऻन्य मगर ॳस्य छि यि ज़ऻनिथ पकान ज़ि असि त्रऻव्य सिरिफ 2021 वऺरी पथकुन तॖ च़ायि 2022 किस वऺरियस मंज। ॳस्य रूद्य मग़रबी तहज़ीबस ज़्यादॖ लऻर्य तॖ पनॖन्य परम्परा गऺयि मऺशरावान। दपान छि ब्यॆयिसॖन्ज़ क्वकॖर छि वॆठ बासान।  यिति छि अख हकीकत ज़ि असि निश ह्यॊछ ज़गतन मगर ॳस्य कत्यन छि पानॖ खडा यि छु अख बॊड सवाल। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - कांगॖर। कांगरि आसॖ आसान कॖसॖमवार। वंदस मंज़ छि यिम कांगरि कऺशीरि मंज़ रोज़नवाल्यन तॗरि निशि बचावान रोज़ान। अज़ द्वयत्रॖह वऺरी ब्रोंठ ॴस्य ॳस्य ति कऺशीरि मंज़ॖय रोज़ान तॖ ॴस्य कांगरि ललॖनावान तॖ यिमन हुन्द फऻयदॖ तुलान। मगर नमतॖ पतॖ यिम ति शुर्य कऺशीरि न्यबर ज़न्मस आयि म्यॆ छुनॖ बासान ज़ि सऻरी शुर्य आसन वऻकॖफ कांगरि सॗत्य। असि पज़ि पनॖन्यन शुर्यन वनुन ज़ि कांगॖर कमन कमन काम्यन ॴस यिवान बकार कऺशीरि मंज़।

**********************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

31.12.2021

31.12.2021, पॊह (पौष) गटॖ पछॖ (कृष्ण पक्ष) बाह (द्वादशी) देवादेव शॊकुरवार (शुक्रवार/जुम्मा/भार्गववार) श्री सप्तर्षि सम्वत 5097, नक्षत्र अनु, राश वृश्चिक (चलान), ऋतु हेमन्त (चलान).. चूंकि पगाह छि त्रुवाह (त्रयोदशी) रावान पगहुक वॊहरवोद यी ॳज़्य

**********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

सान्यन मंदरन मंज़ छु नॖ व्वंय कांह कऻशुर गुरू जी याने पूज़ऻर्य नज़र यिवान। कऺशीरि न्यबर ति यिमन द्वयत्रॖहन वऺरियन मंज़ असि कऻशर्यव यॆत्यन ति कुनि जायि मंदर बनोव जदोजहद कऺरिथ गाह सु प्रताप विहार गाज़ियाबादॖ छॖ, वैशाली छु, शालॖमऻर गार्डन छु, गुडगांव छु, फरीदाबाद छु, वगैरा वगैरा यिमन सारिनी जायन छुनॖ म्यॆ बासान अख ति कऻशुर ब्रह्मुण। यि छि यि दऺप्यज़ि ति सानि ज़ऻच़ बापथ अख शरमिहॖन्ज़ कथ ज़ि सान्यन यिमन मंदरन हॖन्ज़ लगाम छि व्वपर ज़ऻच़क्यन नफ़रन अथि। यि दोष छु असि प्यठॖय यिवान ति क्याज़ि असि ज़ऻन्य नॖ कऻशिर ब्रह्मन ज़ांह ति पननिस समुदायस मंज़ पानस बराबर। यिथुय वरताव कॊर असि तिमन सॗत्य यिम कऻशिर बटॖ ख्यन खॊरदनी हुन्द सामान कॖनान ॴस्य या यिम कऻशिर च़ॊट, कुल्चॖ, कत्लमॖ, टखटचि, बऻगिरखानि, तेलवऺर्य वगैरा ॴस्य बनावान या यिम मिठऻय, द्वद वगैरा कॖनान ॴस्य या यिम सान्यन खान्दरन व्वछ़ॖबन प्यठ सानि बापथ बत्तॖ स्युन रनान ॳस्य। असि द्युत तिहॖन्दिस पेशस नाव ग़ोर, बुहुर, हलवोय, वाज़ॖ तॖ द्युत यिमन पनॖनि ख्वतॖ बऺनिम दरजॖ तॖ ॴस्य यिमन हना ब्यॊन नज़रि वुछान। म्यॆ बासान यि सोन ख़याल छु रूदमुत बिल्कुल ग़लत तॖ सरासर गऻमॖच़ ना-इनसऻफी। बरादरन वॊन तीज़मालि कुन। तीज़माल प्यॆयि सोंचस ज़ि बरादर सुंद वनुन छु कुनि हदस ताम पॊज़। मगर नमतॖ पतॖ यॊदवय सु बेद-बाव गव ख़तम मगर ज़हनियत छि सॊय। असि छि तॆह ज़ि ॳस्य छि पऺर्यमॖत्य लीख्यमॖत्य तॖ ॳस्य छि कारकुन तॖ रूद्य यी खयाल कऺरिथ ज़ि तिम छि बऺनिमि ज़ऻच़ हॖन्द्य तॖ तिम ह्यकन नॖ असि सॗत्य बराबरदी कऺरिथ। यि बदलाव ति आव व्यॊख्तॖय। हालांकि तिहॖन्द्य शुर्य छि असि कारकुन शुर्यव ख्वतॖ व्वंय परनस लेखनस मंज़ असि ति ब्रोंह पकान। सोन ऱॏख वुछिथ गऺयि तिम मजबूर पनुन पेशॖ बदलावनस प्यठ त ॳसि ह्यॆच़ॖन तिहॖन्ज़ व्यछ़य प्यॆन्य।  तीज़मालि वॊन बरादरस

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - ग्वडॖनिकिस पोरस प्यठ किस कुठिस ॴस्य वनान वॊट तॖ मकानकिस प्यॆठिमिस पोरस प्यठॖकिस कुठिस ॳस्य वनान कऻनी। अक्सर ॴस्य कऻशिर्य बटॖ वंदस वॊटिस मंज़ ख्यवान च्यवान तॖ ऱयतकऻलिस ॴस्य कऻनी मंज़ बिहिथ ख्यवान च्यवान। चोकॖ ओस आसान ह्यॆरि ति तॖ ब्वनॖ ति। मन्ज़्यम्यन पोरक्यन कुठ्यन मंज़ ॴस्य शॊंगान वॊंगान। कऺशीरिक्यन मकानन मंज़ ॴस्य नॖ पंखॖ आसान तॖ न ॴस्य फ्रॖज्य आसान तिक्याज़ि मोसुम ओस आसान ख्वशयुवुन। अल्बतॖ ह्यॆर्यम्यन जायन बनऻवमॖत्यन मकानन मंज़ ॴस पंखॖ लागनॖच व्यवस्था करनॖ आमॖच़ हलांकि ज़रूरत ॴस नॖ प्यवान यिमन चीज़न हॖन्ज़। आम तोर ॴस्य कुठिक्यन लबन प्यठ बऺड्य बऺड्य दीवी दीवताहन हॖन्द्य फोटू यिवान लागनॖ। प्रथा ॴस ज़ि लबन प्यठ ॴस्य काग़ज़ॖक कैलैंडर यिवान लागनॖ यिमन कैलैंडरन प्यठॖ ओस अंग्रीज़ पंचान्गस सॗत्य सॗत्य दीवी दीवताहन हॖन्ज़ॖ शक्लॖ ति बोज़नॖ यिवान। मानॖनॖ ओस यिवान ज़ि यिमव फोटुवव दऺस्य ओस भगवानसॖन्ज़ मेहर तॖ कृपा गरन तॖ गरिक्यन बऻच़न प्यठ रोज़ान

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

28.12.2021

28.12.2021, पॊह (पौष) गटॖ पछॖ (कृष्ण पक्ष) नवम (नवमी) बॊम्वार (मंगलवार) श्री सप्तर्षि सम्वत 5097, नक्षत्र चित्र, राश तुला (दुहचि 4.44 बजि प्यठॖ) ऋतु हेमन्त (चलान)

*********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

*********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

 पनॖनिस समुदायस मंज़ यॊदवय बदलाव वुछव तॖ सु गव ज़ि ब्रह्मनन हॖन्ज़ कमी। वुछान वुछान गऺयि असि पनॖनि ज़ऻच़ हॖन्द्य ब्रह्मन असि निशि दूर गछ़ान। तिमव ह्यॊत पनुन पेशॖ बदलावुन ति क्याज़ि असि तॊग नॖ शायद तिमन सु मान तॖ यज़्जथ द्युन यॆमिक तिम हक़दार ॴस्य। क्वलॖ ब्रह्मनन हॖन्ज़ व्यछ़य गऺयि बडान ख़ास तोर पऻठ्य यनॖ ॳस्य बालॖ यपोर आयि। सऻन्य कऻशिर्य गुरु जी छिनॖ व्वंय खुलॖ पऻठ्य  नज़रि गछ़ान। कांह कांह यॊदवय वुनि छु सु गव यॊहऻय तॊमुलस मंज़ कन्नस बराबर तॖ तिम ति छि दक्षणा मंगान रोज़ान मनस बराबर। यॊत्ताम म्यॆ खबर छि सानि ज़ऻच़ बगऻर छि बकाया सारिनी ज़ऻच़न मंज़ तिमन पनॖन्य पनॖन्य ब्रह्मन पनॖनि ज़ऻच़ हॖन्द्य। सऻन्य यि कऻम रऺट व्वपरवॖय याने तिमव यिम उत्तराखंड, उत्तरांचल, बिहार, उडिया वगैरा रोज़नवऻल्य छि। असि ज़ोन अथ मंज़ ति हऺज़ीमतस गऺ़नीमत तॖ रूद्य वुछान अथ बदलावस हयबुंगॖ हि। तिम छिनॖ व्यच़ान कुनि ति क्याज़ि तिमन बन्याव रोज़गार तॖ लॊगुख पताह ज़ि ॳस्य कऻत्याह हाजतमंद छि। ॳस्य ति छिनॖ संजीदगी सान अथ समस्यायि कांह हल छ़ान्डनॖच कूशिश करान। सऻन्य ज़ड छि यिथॖ तिथॖ तॖ पज़ि अपुज़ि नेरान। हवनन प्यठ या व्वत्सवस प्यठ यिम ब्रह्मन क्याह छि परान, किथॖ पऻठ्य छि परान,कमि आयि छि परान असि छुनॖ फिकिरी तरान कॆंह तॖ ॳछ वऺटिथ छि ती करान यि तिम वनान रोज़ान छि। तॆलि ॴस्य कऺशीरि मंज़ सऻन्य कॆंह ज़िठ्य यिमन ज्ञान ओस तॖ तिम कऻशिर्य ब्रह्मन यिम स्यठाह पठित ॴस्य तॖ असि ति ओस विश्वा ज़ि कऻशिर्य विधि हिसाबॖ छु सान्यन कारन अंद वातान। मगर तिम ज़िठ्य रूद्य नॖ व्वंय तॖ न रूद्य तिम पठित कऻशिर्य ब्रह्मन यिम असि अमि धर्मॖ संकटॖ मंज़ॖ म्वकलावहऻन। व्वंय छि तऺथ्य प्यठ गुज़र करॖन्य यि ब्रोंहकनि हऻज़िर छु। दक्षणा रूज़ नॖ व्वंय दक्षणा रूपस मंज़ बऺल्कि रूज़ अख बडवॖन्य मंग। च़ॖ कूत ह्यकख दिथ तॖ बॖ कूत ह्यकॖ मऺन्गिथ। यि छु बन्योमुत अख बॊड कारोबार तॖ यि बार ति छु असी च़ालुन। बरादरन वॊन तीज़मालि कुन। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव।

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - तॊमलकिस सिरिस ॴस्य ग्रटस मंज़ पिहान तॖ तथ ॴटिस ॴस्य ॳस्य बनान तॊमलॖ च़ॊट या छ़िरॖ च़ॊट। वारियाह कालॖ ब्रोंह ॴस्य यि स्युर ॳस्य दिवान फेरि वाल्यन तॖ तमि बदलॖ ॴस्य तिम दिवान क्यनॖबऺब्य, लऻर, गऻर्य, च़्वकॖल्यडर, वयलडर, वगैरा वगैरा। कुनि कुनि सातन ॴस्य अथ सिरिस बत्तॖ बनावान तॖ ॴस्य वनान तथ सिर्य-बत्तॖ। ओट ओस यिवान छानॖनॖ परिनिस मंज़ तॖ तमि मंज़ॖ ओस नेरान ओट अलग तॖ कॊश अलग। यि कॊश ओस यिवान दिनॖ गऻवन। ग्रटॖ आसॖ ज़्यादॖतर ज़नाना चलावान तॖ मऺन्ज़्य  मऺन्ज़्य ॴस्य मर्द ति अथरोट करान। कॆंह ज़नानॖ आसॖ दानि मुनान कंज़न मंज़ मुहलि सॗत्य। ह्वख्य व्वज़ॖल्य मर्च़ॖवांगन ति ॴस्य दगान यिमन कंज़न मंज़। प्रथ गरकिस आंगनस मंज़ ओस कंज़ अक्सर आसानॖय तॖ यथ गरस मंज़ आसिहे नॖ तिम ॴस्य हमसायन हॖन्दिस कंज़स मंज़ दानि मुनान या मर्च़ॖवांगन दगान रोज़ान। ग्रटॖ रूद नॖ, कंज़ रूद नॖ, शुप गव गऻब, व्वंय छु बासान ॴब यॆलि यिमन चीज़न हुन्द नाव छु यिवान ज़्यॆवि प्यठ ह्यनॖ।

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति छि)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

27.12.2021

27.12.2021, पॊह (पौष) गटॖ पछॖ (कृष्ण पक्ष) ॴठम (अष्टमी) च़ऺन्दॖरवार (सोमवार), श्री सप्तर्षि सम्वत 5097, नक्षत्र हस्त, राश कन्या (चलान) ऋतु हेमन्त)(चलान)

**********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

वयकुन्ठ मंडली फ़रीदाबाद छि करान रोज़ान भजन कीर्तन अज़कल ब्यॊन ब्यॊन जायन तॖ छि कूशिश करान छि पनॖनि कऻशिर्य समुदायस मंज़ गऺछ़ यि धर्मॖच आस्था ज़िन्दॖ रोज़ॖन्य तॖ यि मनशा मनस मंज़ छि पकान ब्रोंह ब्रोंह। राथ ओस अमि मनडली हुन्द हऺतिम प्रोग्राम युस फ़रीदाबादस मंज़ ओस आमुत आयोजित करनॖ श्री मनोज पंडिता सऻबनि गरि। अथ मंडली मंज़ छि प्रमुख कलाकार मनोज पंडिता, संजय पंडिता, एम के भट्ट, शादी लाल, अंकुर मॊटू, कुमारी दिविया, महावीर ठुसू, आर्यमन, तॖ ब्यैयि ति कॆंह युहुन्द नाव छुनॖ म्यॆ ज़्यॆवि प्यठ याद यिवान। खुशी तॖ गर्वॖच कथ छि यि ज़ि अथ मंडली मंज़ छि शुर्यन ति मोकॖ मेलान समाज सैवा करनॖच तॖ धर्मुक ज्ञान कुनि हदस ताम हऻसिल करनुक। अमि मंडलीहॖन्द्य सदस्य छि वख्तॖ वख्तॖ केंच़न नामावार कदावार हऺस्तियन ति आलव दिथ पनॖनि कीर्तनि मंज़ शमूहलियत करनॖच प्रथा थऺविथ। रातकिस कार्यक्रमस मंज़ ओस श्री रविन्दर पंडिता जी आमंत्रित करनॖ यिम शारदा मातायि अस्थापनस सॗत्य जुडिथ छि। कीर्तन करनॖ ब्रोंह कऺड मंडली वाल्यव जांकी पनॖनि गरि फरीदाबादॖ प्यठॖ ततिकिसॖय मन्दरस ताम तॖ अथ जांकी मंज़ आयि शारदा माता हॖन्ज़ मूर्ती ललॖनावनॖ बडॖ लोलॖ सान तॖ लीलायि परान परान। यि मंडली वुछिथ छि याद प्यवान कऺशीरि मंज़ हारी पर्वतॖच (च़क्रीश्वरॖच) मंडली य्वस प्रथ ॴठम दोह ॴस ग्रज़ान रोज़ान। राथकिस वयकुन्ठ मंडली हॖन्दिस कार्यक्रमस मंज़ ओसुस बॖति शऻमिल तॖ सॗती ओस रोहित दास ति। कीर्तन कऺरिथ कॊर सारिवी नऺवीद। अथ प्रोग्रामस मंज़ आस्य आमॖत्य होरॖक्य योरॖक्य मर्द ज़नानॖ तॖ कॆंह कोरि लऺडकॖ यिम पूरॖ मनॖ सान तॖ श्रद्वायि सान कीर्तन करान ॴस्य। बजाह रूज़िन यि कला तॖ कलाकार।  

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - दां कुठ, यथ ॴस्य वनान कुछ्य ति। अथ कुछि मंज़ ॴस्य थवान दानि। यि दानि ओस यिवान दां-मिशीनि प्यठ निनॖ। तमि मिशीनि प्यठॖ ओस यिवान दान्यस त्वमुल कडनॖ। अथ मिशीनि प्यठॖ ओस नेरान त्वमुल अलग तॖ तोह अलग। त्वमुल गरॖ ॳनिथ ओस यिवान छ़टॖनॖ शुपि सॗत्य। तमि छ़टनॖ सॗत्य ओस नेरान त्वमुल अलग तॖ स्युर अलग। पतॖ ओस यिवान त्वमुल थालस मंज़ च़ारनॖ तॖ ॴस्य कन्नॖ कडान अलग।

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

26.12.2021

26.12.2021, पॊह (पौष) गटॖ पछॖ (कृष्ण पक्ष) सतम (सप्तमी) आथवार (रविवार/ऐतवार) श्री सप्तर्षि सम्वत 5097, नक्षत्र उ.फा, राश कन्या, (दुहचि 11.14 बजि प्यठॖ) ऋतु हेमन्त (चलान)...अज़ छि शारदा दीवी जयन्ति

**********************

नमस्कार माहरा त्वहि सारिनी। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

हालांकि वनॖनॖ छु यिवान ज़ि कऺशीरि मंज़ रूज़िथॖय ओस असि कऻश्यर्यव ग्वडय पनॖनि माजि ज़्यवि मंज़ कथ करनॖस परिहेज़ कॊरमुत तॖ पनॖन्यन शुर्यन सॗत्य कऻशिर्य पऻठ्य कथ करनस ॴस्य मंदछान। स्व प्रथा थऺव असि बरकरार टनलि यपोर तरनॖ पतॖ ति। बऺल्कि तथ द्युत हुर्यर असि यि वऺनिथ ज़ि सऻन्य शुर्य ज़ायि ना कऺशीरि न्यबर तवय छिनॖ माजि ज़्यॆवि मंज़ कथ करान। यि तरक छु सरासर ग़लत तॖ बे-बुनियाद। अथ तरकस छु न कुनि होट तॖ न कुनि लॊट। बरादरन वॊन तीज़मालि। नबा यि छि तऻज्यबॖच कथ। म्यॆ छुनॖ पानस फिकिरी तरान ज़ि असि क्याज़ि छि गाल गछ़ान कऻशिर्य पऻठ्य कथ करनस मंज़। बॖति वऻच़ॖस यूत वऻन्सि, यि बदलाव वुछ म्यॆ यिमनॖय त्रॖहन चतजीहन वऺरियन मंज़। तीज़मालि वॊन बरादरस। प्यठॖ छि हऻरऻनगी यि वुछिथ गछ़ान ज़ि गरन मंज़ छिनॖ मोल मऻजी यछ़ान ज़ि त्युहुन्द शुर गछि नॖ पनॖनि माजि ज़्यॆवि मंज़ कथ करुन। तिम छि टॖरकावान यि वऺनिथ ज़ि व्वंय कथ लग्यख यि कऻशॖर ज़बान यपऻर्यम्यन अलाकन मंज़ लऺगिथ। त्युहुन्द यि वनुन ति छुनॖ वऻजिब। बरादरन वॊन वापस तीज़मालि। तिमन छॆनॖ शायद खबर ज़ि पनॖनि माज ज़्यॆवि मंज़ पानवॖन्य कथ न करनॖ सॗत्य कॊताह न्वकसान छु वातान सऻनिस समुदायस, पनॖनिस पानस, पनॖनिस अदबस, पनॖनि प्रज़नऺथि, पनॖनिस मूल-रूपस वगैरा वगैरा। कऻशुर क्याज़ि छुनॖ व्वतॖलान सबब छि वारियाह मगर तिम छि पनॖनि जायि तॖ कऻशिर ज़बान रऺछ़रावॖन्य छि पनॖनि जायि। यि बदलाव ति आव असि मंज़ व्यॊख्तुय। बरादरन वॊन तीज़मालि। कथ छि जऻरी   

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - बानॖ कुं, यथ जायि ॴस्य थवान चोकॖक्य सऻरी बानॖ मस्लन दीगचि, पऺहरात, चिलमची, टब, डुल, बऺड क्रऺछ़, ल्वकॖट क्रॖछ़, चोंचि, ल्यॆजि, देगॖ, टऻक्य, बऺड्य बॊहगन, ल्वकॖट बॊहगन, थाल (लॊयिव/सरतलिव), कलाय-दार बॊहगन, मंज़ोल बॊहगन, खऻस्य (लॊयिव), कॆंज़ि खऻस्य, तुम्बॖ, गऺडवॖ, गिलासॖ, कटोरि, कवलि, काशवॖ, चुम्टॖ, क्रॊछ़, रऺम्ब्य, समावार, छऻन्य, पर्युन, टीन, ड्रम, क्रॆंजुल, फ्वतॖर, ज़ऻन, टूकॖर, बतॖ- डबॖ, मसालॖ-डबॖ, आंचार डबॖ, अथॖतॖच़, डक्नॖ, ठानॖ। 

**********************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak blogspot.com ति)

25.12.2021

25.12.2021, पॊह (पौष) गटॖ पछॖ (कृष्ण पक्ष) शॆयम (षष्ठी) बटॖवार (शनिवार/शनिश्चरवार), श्री सप्तर्षि सम्वत 5097, नक्षत्र पू.फा, राश सिंह (चलान) ऋतु हेमन्त (चलान)

*********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

बदलावॖच कथ यॊदवय करव तॖ तथ मुतलक ह्यकन तिमय वऺनिथ यिम  अज़ द्वयत्रॖह वऺरी ब्रोंठ कऺशीरि मंज़ रूज़िथ ॴस्य तॖ टनलि यपोर तऺरिथ प्योख नऺविस माहोलस मंज़ पनुन पान ॴडरावुन तॖ मंडरावुन। नमतॖ प्यठॖ यिम शुर्य ज़न्मस आयि तिम ह्यकन नॖ कयास ति कऺरिथ ज़ि सऻनिस समुदायस मंज़ कयाह क्याह बदलाव आव। तिम पलेयि बडेयि यॆतिकिसॖय माहोलस मंज़ तिमन यॊदवय प्रॖछ़व ति त्युहुन्द जवाब आसि ज़ि ॳस्य छि कॆंह फतारथ वनान। युस अज़ कुनुय शुर छु पनॖनिस मऻलिस माजि तऺमिस किथॖ पऻठ्य तरि फिकिरी ज़ि तति ॴस्य पांछ़ पांछ़ शॆ शॆ शुर्य ॳक्यसॖय माजि मऻलिस आसान तॖ पलान ति। तिम ॴस्य परान ति लेखान ति। तिम ॴस्य नच़ान फेरान ति, यारन दोस्तन निश यिवान गछ़ान ति, अंगन ॴश्यनावन खबर अतर ह्यवान रोज़ान ति, हकस हमसायस सॗत्य व्वथान बिहान ति। सरकऻर्य स्कूलन मंज़ पऺरिथ ति जान जान नम्बर अनान ति, अख ॳकिस वुछिथ पनुन पान तमी हिसाबॖ सांचस मंज़ त्रावान ति। मंदरस गऺछ़िथ या गरि ठोकर कुठिस मंज़ ज़िठ्यन सॗत्य बिहिथ कॆंह धरमॖच कथ ह्यॆछान ति मगर यिमव सीरिवॖय चीज़व निशि रूद सोन शुर महरूम योर वऻतिथ। यि छु अख बॊड बदलाव म्यॆ बासान युस असि मंज़ आव यीत्यन वऺरियन मंज़। बरादरन वॊन तीज़मालि कुन। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - केंच़न मकानन मंज़ ओस आसान बडि कुठि मंज़्य अख ल्वकुट कुठ यथ वनान ॴस्य शांश्यन्य। यिमन द्वन कुठ्यन मंज़ॖ ओस आसान वुर्सी। यि वुर्सी ॴस आसान पचिव लब  यथ मंज़ वुर्सी पऺट्य यिवान ॳस्य लागनॖ तॖ यिम वुर्सी पऺट्य यिवान ह्यॊर ब्वन खारनॖ वालनॖ। यॆलि कांह बॊड दॊह लूक दॊह ओस आसान यिम सऻरी वुर्सी पऺट्य ॴस्य यिवान ह्यॊर थावनॖ तॖ द्वन कुठ्यन ओस बनान कुनुय अख बॊड रहि रास कुठाह ह्यु। कऻम म्वकलिथ ॴस्य वुर्सी पऺट्य ब्वन वालान तॖ यिम ॴस्य अथ ॳकिस कुठिस ब्यॊन कऺरिथ ज़ॖ कुठ्य बनावान। शांश्यन्य मंज़ ओस यिवान थावनॖ गर्युक सोरुय बिस्तरॖ, लेफॖ, गब्बॖ, कमलॖ, शांदगऺन्ड्य, तऺकियि, सतरंजि, कऻलीन, नमदॖ, मसनन्दॖ, ट्रंक, अटैची, सॊंन्दूक, बैग यि दऺप्यज़ि ति गरिच गरॖवेठ। ब्यॆयि ॴस्य अथ शांश्यनि मंज़ शुर्य परान लेखान। तॆलि ॴस्य आसान शुर्य पंगथ। ॳज़िक्य पऻठ्य नॖ अख शुर सु ति कुठिकिस कुनि ॳकिस कूनस मंज़ मोबाईलस या लैपटॏपस प्यठ छ़ॊपॖ दम कऺरिथ कऻम करान।

**********************

नऺविव तॖ फॊलिव

भूषण कौल "दीप"  

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

24.12.2021

24.12.2021, पॊह (पौष) गटॖ पछॖ (कृष्ण पक्ष) पऻन्च़म (पंचमी) शॊकुरवार (शुक्रवार/जुम्मा/भार्गववार) श्री सप्तर्षि सम्वत 5097, नक्षत्र मघा, राश सिंह (चलान) ऋतु हेमन्त (चलान)

**********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

म्यॆ बासान क्याहताम पाफ ॴस्य असि बटव कऺर्यमॖत्य तॖ केंच़व राक्षस्यव नी ॳस्य पनॖन्यव आल्यव मंज़ॖ कऺड्य कऺड्य तॖ लोगुख सोन तक्दीर दावस। मगर यिम ॴस्य जान सऻन्य संस्कारॖय, सोन सबॖर, सऻन्य ह्यमथ तॖ सोन परुन लेखुन युस असि बकार आव पनॖन्य ख्वर ठींकरावनॖ बापथ, पनुन पान ब्यॆयि अकि फिरि इस्तादॖ थावनॖ बापथ। मगर अथ अंतरालस मंज़ रोव असि वारियाह कॆंह यॆमिच बरपऻयी गछ़ॖन्य छॆनॖ मुम्किन। मगर यि प्यॆयि असि मानुन ज़ि केंच़व महाप्वरुषव यिम भगवान सॖन्दिस रूपस मंज़ यिथ सान्यन शुर्यन हुन्द मुक्कदर बॆहतर बनावनि आयि तॖ सऻन्य शुर्य लऺग्य बाल बछि तॖ गऺयि बजाह। नावॊमेदी मंज़ बन्येयि व्वमेद। यॊदवय ॳस्य छि वुनि ति कऺशीर त्रावनॖच दग़ ललनऻविथ अकि अंदॖ तऺती छि ब्यॆयि अंदॖ अख सांतवना, अख खुशी ज़ि सऻन्य शुर्य गऺयि बजाह यिहॖन्ज़ नॖ असि कांह ति आश ॴस्य तॖ नॖ सप्दिहे यि मुम्किन यॊदवय ॳस्य कऺशीरि मंज़ॖय आसॖहऻव रूज़िथ। दफ यि सपॖज़ सान्यन शुर्यन अप्रत्यक्ष कृपा दय सॖन्ज़ तॖ तिमन आव गटि मंज़ गाश। भगवद् गीतायि मंज़ वॊनॖमुत, म्यॆ बासान,  सपुद साकार ज़ि यि पथकुन गव जानॖय गव, यि वर्तमानस मंज़ चलान छु जानॖय छु तॖ यि बुथि यी सुति आसि जानॖय। बरादरन वॊन तीज़मालि कुन। मगर यि बाकय बदलाव क्युथ ह्यु छु? तीज़मालि प्रुछ़ बरादरस। अथ बदलावस छि मऻजी ॳस्य पानॖ ज़िम्मवार कुनि हदस ताम। जवाब द्युतनस बरादरन। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - यि वनुन ति छु म्यॆ बासान ज़रूरी ज़ि कऺशीरि मंज़ शहरक्यन केंच़न मकानन मंज़ ॴस्यनॖ गान आसान। तिमन मकानन मंज़ ओस यि ज़्युन, बॊठ, च़ॖनि वगैरा यिवान थवनॖ ब्रऻर्यकऻनी मंज़। अथ ब्रऻर्यकऻनी मंज़ ॴस यिवान थवनॖ गरॖच बाकी ॳड्यन्य गऺड्यन्य तॖ फ़ुट फ्राठ सामानॖ ति। पतॖ गयो बॊड कुठ - अथ कुठिस मंज़ ओस अक्सर गर्युक ज्युठ बॆहान। बऺकाया कूठ्यन मंज़ ॴस्य गरिक बाकय  बऻच़ व्वथान बिहान। बऺनिम अलाकन मंज़ बन्येमॖत्य मकान हॖन्ज़न सेरि लबन ओस आसान म्यॆच़ुव प्लास्टर कऺरिथ।  अलबतॖ कॆंह कॆंह मकानॖ ॴस्य यिवाव ग्वडॖ प्राटनॖ तॖ पतॖ सीम्येन्ट प्लासटर करनॖ। नव्यन मकानॖक्यन लबन ओस   व्वंय सीमेंट प्लास्टरॖय यिवान करनॖ। कथ छि जऻरी।

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

23.12.2021

23.12.2021, पॊह (पौष) गटॖ पछॖ (कृष्ण पक्ष) च़ोरम (चतुर्थी) ब्रसवार (गरूवार/वीरवार/ब्रहस्पतवार), श्री सप्तर्षि सम्वत 5097 नक्षत्र अश्ले, राश सिंह (रऻच़ हॖन्ज़ॖ 2.41 बजि प्यठॖ) ऋतु हेमन्त (चलान) 

**********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

भगवद् गीतायि मंज़ छु लीखित ज़ि यि पथकुन गव जान गव, यि वुन्यक्यनस सप्दान छु, जानॖय छु सप्दान तॖ यि बुथि यी सुति आसि जानॖय। बरादरन वॊन तीज़मालि कुन। आहनबा वख छु बदलान रोज़ान तॖ वख्तस सॗत्य सॗत्य छु यि इन्सान ति बदलान आमुत। तीज़मालि द्युत बरादर सॖन्ज़ि कथि जवाब। नतॖ कऺमिस ओस ख्वाबो खयालस मंज़ ति ज़ि असि प्यॆयि यिमन दकन तॖ डुलन लगुन। जन्नत त्रऻविथ यिमन तापॖ क्रायन मंज़ सिवनॖ युन। दफ यि ओस बऻवी तॖ आयि वुन्युखताम ती बूगान।वुनिति छा पताह बुथि क्याह छु वुछुन अल्बतॖ व्वमेद छि थवॖन्य ज़ि यि बुथि यी रुतुय रुत आसि। तीज़मालि कऺर कलस ज़ीर तॖ वॊनॖनस तथास्तु। बरादरन थऺव कथ जऻरी तॖ वॊनुन तीज़मालि ज़ि बॖ छुस पानस ॳन्द्य पऺख्य वुछान तॖ सोंचाह छुस करान ज़ि तिम लूख यिम कऺशीरि मंज़ अनन्तनागॖ, वरमुलि, सोपोरॖ, कॊपॖवारिर, हन्दॖवारि, कॊलॖगामि, त्रालॗ, शुप्ययनॖ वगैरा जायन मंज़ लऺसिथ तॖ बऺसिथ ॴस्य। टनलि यपोर तऺरिथ छु गोमुत असि कुनुय म्युल तॖ कुनुय रंग। केंच़व लूकव वुछ अख नॊवुय आलमाह तॖ नन्योख ज़ि दुनिया छु स्यठाह बॊड तॖ रंगीन। यॆतिचि बीड्य बाडि मंज़ रोव यि कऻशुर बटॖ। कऺशीरि हॖन्ज़ स्व त्रऻवमॖच़ जाय छि व्वंय सिरिफ ॳमिस बटॖ सॖन्दिस ज़ॆहनस मंज़ॖय यऻच़। हकीकतस मंज़ यॊदवय वुछोन यि बटॖ, सु छुनॖ कुनीय। माजि ज़्यव छस नॖ, शुर्य तंदल छिस नॖ, व्वथॖ बेठ छस नॖ, ख्यन च्यन छुस नॖ, माय मॊहब्बत छुस नॖ, मेल जोल छुस नॖ, यकुत छुस नॖ, हक़ हमसायि छुस नॖ, परम्परा छस नॖ यि दपिज़ि ति व्वंय छिनॖ ॳस्य यि फऻस्लॖ कऺरिथ ह्ययकान ज़ि ॳस्य छा टनलि अपऻरिम किनॖ यपऻरिम। यिति छु फऻस्लॖ करुन ज़ि पऺतिम्यन पान्च़ॖत्रॖहन वऺरियन हॖन्द्य सऻन्य शुर्य छान्ड्ना वुनि कऺशीर किनॖ गव रलॖ मिलॖ परज़ऻच़ मंज़ तॖ व्यलऻयती हवहऻस मंज़। बरादर तॖ तीज़माल प्यॆयि सोंचस। कथ छि जऻरी।   

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - यिथय पऻठ्य आसॖ गानन मंज़ च़ॖनि यिवान थवनॖ। वंदॖ आसनॖ मूजब आसॖ च़ॖनि ति यिवान अनॖनॖ बॊहरि वादॖ। पन्नॖ च़ॖनि, सादॖ च़ॖनि, कोलॖ वगैरा आसॖ आसान च़ॖन्यन मंज़ कॖसॖम। यिम च़ॖनि आसॖ लगान कांगर्यन बरनॖ बापथ। कांगरि ति आसॖ आसान ब्यॊन ब्यॊन कॖसमव तॖ ब्यॊन ब्यॊन जायव प्यठॖ। मस्लन च़्रारॖ कांगॖर, अनन्तनऻग्य कांगॖर, रंगदार कांगॖर, मनन वगैरा। वंदस मंज़ आसॖ सानि मज़ि, ब्यॆनि बाबी न्यॆंदरि वऺथित दानस प्यवनॖ ब्रोंह सार्ये कांगरि जमाह कऺरिथ यिमन मंज़ च़ॖनि बरान तॖ पतॖ दानुक नार त्रावान यिमन कांगर्यन मंज़। यिम कांगरि आसॖ दुह्यकिस दॊहस नार बऺरिथ रोज़ान। कांगर्यन हॖन्ज़ कथ करव अलग पऻठ्य। गानन मंज़ आसॖ यिवान बऺठ्य बॊहरि ति थवनॖ यि बॊठ ओस वंदस मंज़ बकार यिवान

**********************

नऺविव तॖ फॊलिव

भूषण कौल "दीप" ं

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

22.12.2021

22.12.2021, पॊह (पौष) गटॖ पछॖ (कृष्ण पक्ष) त्रय (तृतीया) देवादेव ब्वदॖवार (बुधवार) श्री सप्तर्षि सम्वत 5097, नक्षत्र तिश्या, राश कर्कट (चलान) ऋतु हेमन्त (चलान), अज़ छि संकट च़ोरम (संकट निवारण चतुर्थी) 

**********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

*********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

********************* 

यॊत ताम म्यॆ ज़्वन छु कऺशीरि मंज़ यिम ति लूख बऺसिथ ॴस्य, बटॖ या मुस्लमान, बऺन्यम्यन अलाकन याने ॳमराकऺदलॖ ब्वन ब्वन मत्लब हब्बॖकऺदल, ज़ऻनॖकऺदल वगैरा, तिहन्द्यन गरन ताम ओस नॖ साईकल ताम वातान सहल सहल ति क्याज़ि कोचि ॴस्य आसान तंग, गंदॖ, ह्यॊर ब्वन, हऺल्य कऺल्य, सडकॖ ति आसॖ आसान तंग तंग, टांगॖ ॴस्य पकान तॖ पैदल पकनवऻल्य ॴस्य लबन खसान तॖ स्कूटर या मोटर-साईकल वाल्यन ॴस नॖ गरन मंज़ थवनस सॊम्ब जाय मेलान। यॆमिस कऻन्सि पनॖन्य कार याने गऻड्य ॴस आसान सु ओस छ़्रटॖ छ़्रठ करान तॖ दूर कुनि गराजस मंज़ ओस थवान। अल्बतॖ यिम लूख ह्यॊरकुन रोज़नि खऺत्यमॖत्य ॴस्य बसनि याने राजबाग, संतनगर, नऺट्यपूर या छानॖपूर वगैरा तिमन ॴस साईकल, स्कूटर या कार वगैरा थवनॖच सहूलियत ति क्याज़ि मकानॖ ॴस्य नऺवि चालि तॖ खुलॖ जायि आमॖत्य बनावनॖ।  हालांकि बऺन्यम्यन अलाक़न मंज़ छि यि तंगी वुनि ति बासनस तल यिवान ताहम सुधार छु आमुत करनॖ कुनि कुनि जायन तॖ खजर छु आमुत दिनॖ सडकन मगर कोचि छि तिथय पऻठ्य। बॖ छुस सोंचान ज़ि यॊदवय ॳस्य आसहऻव कऺशीरि मंज़ अज़कल रोज़ान, ॳस्य कत्यन सना आसॖहऻव थवान पनॖनि गाडि, यिम यॆति ॳस्य थवान छि पनॖन्यन फ्लैटन मंज़ या मकानन मंज़। यि बदलाव ति आव वुछनस तल यिमन द्वयत्रॖहन वऺर्यन असि पानस मंज़। अमि बदलावॖ सॗत्य ति बदल्यव सोन स्वबाव, सोंच, नज़र, खयाल वगैरा कुनि हदस ताम। बरादरन वॊन तीज़मालि कुन। यिमव तंग कोचव तॖ सडकव म्वखॖ ति हबा प्यव वारिहान लूकन नमतस मंज़ पनुन सामान तॖ गरॖव्येठ तती त्रावॖन्य ति क्याज़ि न बन्योख मॊज़ूर सामानॖ तुलनॖ बापथ, न वोत टांगॖ या रेडॖ तिमन कोचन तॖ सडकन मंज़ सामान बस अड्डस ताम वातनावनॖ बापथ तॖ न ॴस पानस सूरथ, ह्यमथ तॖ ह्यकथ सामानॖ पनॖन्यन नखन प्यठ तुलनॖ बापथ। वॊन तीज़मालि बरादरस। कथ छि जऻरी 

*********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - नमतॖ पतॖ ज़ामॖत्य कऺशीरि न्यबर शुर्यव ख़बर आस्या वुछमुत कऺशीरि मंज़ शीन प्यवान या प्योमुत। चुंकि ज़्यादतर ॴस्य कऻशिर्य बटॖ तति, गैस बारसस यिनॖ ब्रोंठ, दानस प्यठॖय ख्यन च्यन बनावान रोज़ान तॖ तमि बापथ ओस प्यवान ज़िन्युक हाजत तॖ शीन प्यनॖ ब्रोंठुय ॴस्य थवान सऻरी लूख मनॖवादॖ विरि ज़्युन ॳनिथ तॖ ॴस्य फालनऻविथ थवान गानन मंज़ ताकि रूदस शीनस निशि बचि। गानस मंज़ वातॖनावनॖ ब्रोंठ ओस यिवान फालनऻव्यमॖतिस ज़िनिस बन्नॖ करनॖ आंगनन मंज़ ताकि ज़्युन यी तापस मंज़ ह्वखॖनावनॖ। बन्नॖ मत्लब गव ज़्यिन्य हचि आसॖ यिवान थावनॖ अख ॳकिस प्यठ तरतीबवार तॖ ताहवार पऻठ्य। यि ज़्युन ओस पोशान वंदॖकिस वंदस तॖ वंदॖ ओस रोज़ान ऱयतॖ वादन.

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

21.12.2021

21.12.2021, पॊह (पौष) गटॖ पछॖ (कृष्ण पक्ष) द्वय (द्वितीय) देवादेव, बॊम्वार (मंगलवार) श्री सप्तर्षि सम्वत 5097, नक्षत्र पुन, राश कर्कट (दुहचि 3.47 बजि प्यठॖ) ऋतु हेमन्त (चलान)

**********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

यॊदवय पथ कुन नज़र त्रावव यॆलि ॳस्य कऻशिर्य बटॖ कऺशीरि मंज़ पनॖन्यन पनॖन्यन मकानन मंज़ रोज़ान ॴस्य, प्रथ कांह गरॖ ओस बॊरुत गरॖ आसान बऻच़व सॗत्य। शुर्य कऺट्य ॴस्य आसान पानस ॳछन ब्रोंहकनि या पानस दऺछिन्य खोवॖर्य गिन्दान द्रॊकान रोज़ान। कांह लऺठ्यकिंज लऺठिस, कांह पनॖनिस आंगनस मंज़ सज़्ज़ॖ लंगिस, कोरि आसॖ खानॖ पकऻय करान रोज़ान या माहर्यॆन्य माहराज़स गिन्दान, रज़ॖ-व्वटि, ॳन्य क़त्रि, टींकन, रटि रटि या च़ूरि च़ूरि रोज़नस गिन्दान रोज़ान, छुटी दॊह या आथवारि दॊह बऺड्य ॴस्य तासस गिन्दान, तुरुन, रऺमी, फ्लाश, दऺह वर्की, म्वंगॖपति वगैरा। शुर्य ॴस्य ख्वश, मोल मऻज्य ॴस्य ख्वश, शुर्य ॴस्य ज़्यादॖतर सरकऻर्य स्कूलन मंज़ॖ परान। प्राइवेट स्कूल ॴस्य हना कमॖय पाहन। कोरि आसॖ ज़्यादॖतर मास्टर बाययि आसान या डाक-खानन मंज़, बैंक्न मंज़, ऐ जी ॵफिसस मंज़ नोकरी करान। ज़िन्दगी हॖन्ज़ नाव ॴस हम्वार पकान। हक़ हमसायि ओस नखि डखि। बरादरन वॊन तीज़मालि कुन। अंगव  ॳश्यनावव ब्रोंठॖ ओस हक़ हमसायय अकार बकार यिवान। बटॖ या मुस्लमान। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - गान ओस शहरस मंज़ आसान ज़्यादॖतर मकान किस च़ऺकिस तल याने आंगनॖकि ताह प्यठॖ ब्रांदकिस थज़रस ताम दफ ज़ि यिथ्यन गानन मंज़ ओस प्यवान कॊब कऺडिथ अंदर अच़ुन। कुनि कुनि गरस ॴस आसान मकानस न्यबर  यि गान। अथ गानस। मंज़ ॴस्य यिवान थवनॖ मुख्तिलिफ चीज़ मस्लन ज़्युन, यि ज़्युन यॊदवय कायुर या वीरि ज़्युन या ज़ांगुल ओस आसान यि ओस यिवान ग्वडॖ फालनावनॖ तबरदार सॖन्दि दऺस्य। तबरदार ॴस्य मुस्लमानॖय आसान यिम पनॖनि तबरि या मक्ज़ि सॗत्य ज़िनिस फलॖ ॴस्य करान। फलॖ करुन मत्लब फॖटॖरावुन। हत्बॖ ज़्युन ओस नॖ यिवान फॖटॖरावनॖ।...

**********************

नऺविव तॖ फॊलिव

भूषण कौल "दीप"   

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

20.12.2021

20.12.2021, पॊह (पौष) गटॖ पछॖ (कृष्ण पक्ष) ऒक्दॊह (प्रथमा/प्रतिपदा) देवादेव, च़ऺन्दॖरवार (सोमवार) श्री सप्तर्षि सम्वत 5097, नक्षत्र आर्द्रा, राश मिथुन (चलान),ऋतु हेमन्त (चलान)

**********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

यि बदलाव आव कॊहनॖ पऻठ्य मऻजी। वॊन बरादरन तीज़मालि कुन। कोरि यनॖ परनि द्रायि, पऺरिथ नोकरियन मंज़ च़ायि, पतॖ खान्दर कऺरिथ ज़्यादॖ शुर्य नॖ आसनुक प्रस्ताव ह्यथ आयि, वंश ब्रोंहकुन न बऺडरावनुक व्यच़ार करुन। यिमव सारिवॖय चीज़व सॗत्य प्यव सऻनिस कऻशिर बटॖ समुदायस अख स्यठाह सॊन असर।  अमि अलावॖ यि वुछनस तल व्वंय यिवान छु सु गव ज़ि टनलि यपोर तरनॖ पतॖ छॆ सान्यन गरन मंज़ सानि ज़नानॖ गरॖच साफ़ सफऻयी, चोकॖक्य बानॖ नावॖन्य सावॖन्य कामि नोकरानियन दऺस्य करनावनस मंज़ पनुन फखॖर ज़ानान। केंच़न हॖन्द्य शुर्य ताम छि आसान दायन हॖन्ज़न क्वछन मंज़ गूरॖ गूरॖ करान नज़र यिवान। यि बदलाव आव नॖ असि कऻशिर्यन मंज़ॖय योत बऺल्कि यि छु व्वंय नज़र यिवान च़्ववापऻर्य। इस्लिये कऻशुर बटॖ ति छुनॖ अथ बदलावस निशि ब्यॊन कॆंह। अल्बतॖ अख चीज़ छु साफ़ नज़र यिवान ज़ि माय मॊहबतस मंज़ आव स्यठाह नकलीपन, अंग ॴश्यनाव दूरेयिय अख ॳकिस निशॖ, संस्कारन तॖ संस्कृति मंज़ आयि बऺड दरार, ब्वथनुक बॊहनुक रंग-डंग बदल्यव, शुर कोट गव छ़्यनॖ नानि बुड्यबबस निशि तिन्हज़न परी कथन निशि, त्युहुन्द शुरिस कऺटिस प्यठ या तिहॖन्दिस शुरिस कऺटिस प्यठ सु यख्तियार गव गऻब, सु लॊलॖमतॖ लाय रूद नॖ, देखा दीखी रॊट ज़ोर, इन्सानस यॊदवय पौंसॖ आव वफूर मगर प्रथ कांह छु बासान छु गोमुत परछ़्यॊन, कमज़ोर तॖ मजबूर। असि यथ नॖ हऻल ॴस अज़ द्वयत्रॖह वऺरी ब्रोंठ ती आव बुथि तॖ बंद रूद चोंठ। तीज़माल ति परेशान तॖ बरादर ति ज़न हालि हऻरान। दफ ॳस्य गऺयि यिमन त्रॖहन पान्च़ॖत्रॖहन वऺरियन मंज़ ज़न बखऻलन वऻरान। कथ छि जऻरी    

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - गान (स्व जाय यॆति गऻवॖ/दा़ंद/वॊछ़/वछ़ॖर याने गुपन यिवान छि थवनॖ) यिम गान ॴस्य आसान कऺशीरि गामन मंज़ तॖ रख रखाव ॴस्य करान कऻशिर्य बटॖ तॖ मुसहलमान ति। मगर शहरस मंज़ छि यिमन गुपनन हॖन्द्य गान सिरिफ मुस्लमानन हॖन्दिस रख रखावस मंज़ यिमन वनॖनॖ छु यिवान गूर्य। यिमय गूर्य छि कऺशीरि शहरस मंज़ ओम द्वद, ज़ामुत द्वद, च़ामन वगैरा लूकन कॖनान रोज़ान। कऻशिर्य ह्यॆन्द्य हलवऻय ति ॴस्य गोर्यन निशि द्वद रऺटिथ मिठऻय, च़ामन वगैरा कॖनान रोज़ान। शहरॖक्यन गानन मंज़ ॴस्य कऻशिर्य बटॖ ज़्युन, बॊठ, च़ॖनि, कॊश वगैरा थवान। 

**********************

नऺविव तॖ फॊलिव

भूषण कौल "दीप"   

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

19.12.2021

19.12.2021, मॊंजहोर (मार्ग/मगर) ज़ूनॖ पछॖ (शुक्ल पक्ष) पुनिम (पूर्णिमाशी) (देवादेव) आथवार (रविवार/ऐतवार) श्री सप्तर्षि सम्वत 5097, नक्षत्र मृग, राश मिथुन (चलान) ऋतु हेमन्त (चलान)

**********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

यिथय पऻठ्य यॆलि कऻशिर बटॖ कूर पर-ज़ऻच़ मंज़ न्वश बऺनिथ गछ़ान छि स्व छॆनॖ तति कऻशिर्य पऻठ्य कथ ह्यकान कऺरिथ बऺल्कि हॆन्दी, अंग्रीज़स मंज़ॖय रोज़ान कथ करान। तमि पतॖ यॆलि तऺमिस शुर ज़्यवान छु सु छुनॖ ह्यकान माजि ज़्यव याने कऻशिर पऻठ्य कथ कऺरिथ तिक्याज़ि तथ गरस मंज़ छुनॖ कांह कऻशिर्य ज़बऻन्य मंज़ कथ करानॖय तॖ न छि सऻन्य कऻशिर कूर तस कऻशुर बोलुन ह्यॆछॖनावान। इस्लये छि तऺमिस शुरिस ति पनॖन्य प्रज़नथ तथ गरस मंज़ रावान। बरादरन वॊन तीज़मालि। आहनबा यि कथ ति प्यॆयम पलि वापस वॊन तीज़मालि बरादरस। दफ अथ वनान मऻल्य ति गछ़ुन जऻन्य ति गछ़ुन। सानि कऻशिर कोरि रावान पर-ज़ऻच़ मंज़ पनॖन्य कऻशिर पहचान तॖ युस पर-ज़ऻच़ हुन्द शुर कऻशिर्य गरस मंज़ ज़न्म ह्यवान छु तऺमिस ति रावान कऻशुर आसनॖच पहचान। यिथॖ पऻठ्य छि सऻन्य माजि ज़्यव ह्यवान रावॖन्य वारॖ वारॖ। अथ रावनस छि हुर्यर दिवान सानि पनॖनि कऻशिर्य माजि कोरि पर-ज़बऻन्य मंज़ वार्तालाप करनॖ सॗत्य तॖ पनॖन्यन शुर्यन पनॖनि माजि ज़्यॆवि निशॖ दूर थऺव्य थऺव्य। नबा तॖ यि गव व्यॊख्तॖय। तीज़मालि वॊन बरादरस। ॴखॖर यिमन छॆना सना ज़न यि अकॖल पिलान ज़ि ॳस्य हय रावव मुक्कमऺल पऻठ्य कॆंच़ॖकऻल्य पतॖ। कऺमिस छि फरॖख प्यवान व्वंय। बरादरन द्युतनस जवाब। सोन साहित्य ह्यॊतुन छ़ॊकुन, वंश ह्यॊतुन छ़ॊकुन, प्रज़नथ ह्यॆच़ॖन्य रावॖन्य, सऻन्य क्वल-ब्रह्मन छिनॖ नज़रि गछ़ान, कऻशिर्य संस्कार ह्यॆतिन्य म्वकलॖन्य। बरादरन वॊन तीज़मालि ज़ि नमन छु म्योन तिमन यिम वुनि थफ कऺरिथ छि पनॖन्यन रीच़न रिवाजन, यिम वुनि रऺछ़रऻविथ छि पनॖन्य माजि ज़्यव। नमन छु तिमन यिम पर-ज़ऻच़ मंज़ पनॖन्य रिश्तदऻरी करनस परिहेज़ करान छि। मगर छि कऻत्याह व्वंय तिम। तीज़मालि प्रुछ़। त्वमलस मंज़ कन्नॖ। जवाब द्युत बरादरन। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - म्यॆच़ि डबॖ। अथ डबस मंज़ ॴस रोज़ान बिल्कुल साफ़ गुरिट्य म्यॆच़ यॆमि सॗत्य गरिक्य सऻरी बऻच़ छ़्यॆट अथॖ ॴस्य छलान रोज़ान। छ़्यॊट गऺयो मस्लन बत्तॖ ख्यथ थाल, चाय च्यथ खोस, बूट्स अथॖ लागुन, बूटस फीतॖ गन्डुन, ज़ल मल कऺरिथ अथॖ, हूनिस अथॖ लागुन,दालविस कमर-बंदस याने ब्यल्टस अथॖ लागुन वगैरा वगैरा। छ़्यॊट अथॖ ॴस्य म्यॆच़ि सॗत्य छलान। लॊयिव छ़्यॆट बानॖ मस्लन थाल खऻस्य ॴस्य सूरॖ सॗत्य मांजान तॖ बकाया छ़्यॆट बानॖ ॴस्य म्यॆच़ि सऺत्य छलान रोज़ान।

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठ ति)

18.12.2021

18.12.2021, मॊंजहोर (मार्ग/मगर) ज़ूनॖ पछॖ (शुक्ल पक्ष) पुनिम (पूर्णिमाशी) बटॖवार (शनिवार/शनिश्चरवार) श्री सप्तर्षि सम्वत 5097, नक्षत्र रोहि, राश मिथुन (रऻच़ हॖन्ज़ॖ 3.21 बजि प्यठॖ), ऋतु हेमन्त (चलान)...चूंकि पुनिम छि ज़ॖ गछ़ान, ॳज़्युक वॊहरवोद यी पगाह

**********************

नमस्कार माहरा त्वहि सारिनी। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

मऻजी म्यॆ क्याबी आव ज़न वुछनस मंज़ ज़ि यनॖ सऻन्य रिश्तॖ ह्यॆतिन बनॖन्य पर-ज़ऻच़ मंज़ तॖ यि रफ्तार ह्यॆच़ॖन वख्तस सॗत्य सॗत्य तेज़ॖन्य , सानि ज़बऻन्य वोत म्यॆ बासान सख ज़ख। बरादरन वॊन तीज़मालि। किथॖपऻठ्य सना। तीज़मालि प्रुछ़नस अनज़ऻन्य मंज़ॖय। वुछी मऻजी यॊदवय बॖ अनान छुसन पर-ज़ऻच़ हॖन्ज़ कूर पनॖनिस न्यॆचवि सॖन्दि बापथ याने स्व छि बनान न्वश मगर स्व छॆनॖ ह्यकान कऻशिर्य ज़बऻन्य मंज़ कथ कऺरिथ म्यऻनिस गरस मंज़ या दफज़ि पनॖनिस वऻरिव गरस मंज़ यिथ। नऺतीजि छु नेरान यि ज़ि ॳसी छि मजबूरन पनॖन्य ज़बान बदलावान तऺमिस सॗत्य कथ बाथ करनॖ बापथ। स्व छॆनॖ कऻशुर ह्यॆछनॖच कूशिश ति करान तिक्याज़ि तऺम्यसॖन्ज़ कऻम छि नेरान तॖ तऺम्यसुन्द मुद्द छु पूरॖ सप्दान सऻन्य फॖट-फ्राट  हॆन्दी अंग्रीज़ पऻठ्य कथ करनॖ सॗत्य। गव म्यऻनिस गरस मंज़ या तऺम्यसॖन्दिस वऻरिव गरस मंज़ च़ायि पर-ज़्यव तॖ माजि ज़्यॆवि मंज़ आव खखुर ह्यु। हुपऻर्य छु आसान शुर न ज़्यॆवरावनुक मनसूबॖ ग्वडय तय आमुत करनॖ तॖ वंश ब्रोंहकुन बऺडरावनस रोक लगावनॖ तॖ यॊदवय ख़्वदा नखास्ता ग़ल्ती सान शुर पऻदॖ ति गव तऺमिस शुर्य सॖन्ज़ माजि ज़्यव बनि नॖ कऻशिर कुनि वति बऺल्कि वनि सु बच्चॖ स्वय ज़बान य्वस तऺम्यसॖन्ज़ि माजि आसि गुजरऻत्य, मरऻठ्य या ह्यॆन्दी अंग्रीज़ याने कऻशिर ज़बऻन नॖ बऺल्कि पऻरिम ज़बान। गव रऻव ॳमिस शुर्यसॖन्ज़ प्रज़नथ पनॖनिसॖय कऻशिर गरस मंज़। आहनबा प्योम पलि व्वंय वॊन तीज़मालि बरादरस। कथ छि जऻरी। 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - ठोकुर कुठिस मंज़ अख ल्वकॖट अल्मऻर्य यथ मंज़ थवनॖ ॴस्य यिवान दीवी दीवताहॖन्ज़ॖ मूर्च़ॖ, शिव  लिंग, सालेग्राम, त्रामुव गऺडवॖ यिमन मूर्तियन पोन्य बावनॖ बापथ, ट्यॆक कच़ुल, च़न्दन ट्यॊक, अख पऻतॖर च़न्दन गॖहिथ ट्यॊक बनावनॖ बापथ, स्यॆन्द्रि ट्यॊक, नऻर्यवन, पोश, अर्ग, गन्टा, शंख, पाठ-पुस्तकॖ तॖ लबन प्यठ फोटू वगैरा

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठ ति)

17.12.2021

17.12.2021, मॊंजहोर (मार्ग/मगर) ज़ूनॖ पछॖ (शुक्ल पक्ष) च़्वदह (चतुर्दशी) शॊकुरवार (शुक्रवार/जुम्मा/भार्गववार) श्री सप्तर्षि सम्वत 5097, नक्षत्र कृति, राश वृष (चलान) ऋतु हेमन्त (चलान)

**********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

बदलावॖच कथ यॊदवय करव तॖ यिमन त्रॖहन द्वयत्रॖहन वऺरियन मंज़ युस बदलाव नज़र यिवान छु असि पनॖनि ज़ऻच़ मंज़ सु गव यि ज़ि खालॖय कांंह छु व्वंय पनॖन्यन शुर्यन पॖन्च़ॖह वुहरिस कम खान्दर करान। त्रॖह द्वयत्रॖह वऺरी ह्यॊर ह्यॊरॖय छि अनहॖहॖर्य लऺडकॖ नज़र यिवान। कोरि ति छ्यनॖ कम वऻन्सि अज़कल अनहऺर्यशय नज़र यिवावन। दॊयिम बदलाव युस बॖ वुछान छुस सु गव ज़ि खान्दरॖ पतॖ अख ॳकिस निसि छ़्यन गछ़निक वऻर्यदात छि ग्रन्दि रॊस तॖ छि अदालन हॖन्द्यिस चॊंगलस मंज़ फऺसिथ वारियाह तॖ परेशान तिम पानॖ तॖ त्युहुन्द मोल मऻज्य या हश ह्युहुर। शुर्य न ज़्यॆवरावनुक मनसूबॖ छु अख ज़बर्दस्त बदलाव सानि ज़ऻच़ मंज़ ख़ास कर। जायि छ़ॊचर आसनॖ म्वखॖ टनलि यपोर यिनॖ पतॖ गऺयि असि छलॖ छांगॖर हना ज़्यादय पाहन। बोय छुनॖ बऻयिस सॗत्य रूज़िथ,मोल मऻज्य ॳकिस अंदस, शुर कॊट ब्यॆयिस अंदस, मकान कति ताम रोज़ान कति ताम, शुर्य यिम व्यलायतॖ तिहॖन्द्य वालदेन छ़र्यन मकानन रऻछ कऺरिथ प्रारान अंत समयस तॖ सोंचान ज़ि कुस यि ग्वडॖ शुर कॊट किनॖ होरॖक्य योरॖक्य यॆलि ॳछ वटन।यी त्या कांह किनॖ कंहॗनॖ। वंश बऺडरावुन छु बासान बॊड वॊहव सान्यन शुर्यन। बरादर गव वनान तॖ तीज़माल गऺयि बोज़ान। शुर्यन ह्यॆच़ॖन्य माजि ज़्यव रावॖन्य। खबर क्याज़ि। तीज़मालि प्रुछ़ बरादरस। तथ ति छि कॆंह वजूहात। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - वंगुन, पतॖज्य, च़ऻन्गिज्य, सतरऺन्ड, मसनन्दॖ, नमदॖ, कऻलीन, शान्दॖगॊन्ड, तऺकियि, ज्यॆजीर, नय, चिलिम, तमोक, तमऻक्य डबॖ, चिल्यमि-चुम्टॖ, कांगॖर, च़ालन, क्वन्डुल, डुल, डुलिज, टब, जग, आंचारॖ च़ॊड, माछ, म्वरबॖ, मकाय च़ॊट, त्वमलॖ च़ॊट, कॖनॖकॖ च़ॊट, फुल्कॖ, बऺदरऻविथ त्वमलॖ च़ॊट, छ़िरॖ च़ॊट, सॊत, च़ुर्मॖ, किज, वॊब, वुरसी,डब, डबि कुठ, ठोकुर कुठ, बानॖ कुठ, दां-कुठ, बॊड कुठ, ल्वकुट कुठ, शांश्यॆन्य, खॊत, म्यॆच़ि खॊत, हेर, पचि-हेर, कऻनी, ब्रऻर्यकऻनी, बैठक, गान

**********************

नऺविव तॖ फॊलिव

भूषण कौल "दीप"  

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blospot.com प्यठॖ ति)

16.12.2021

16.12.2021, मॊंजहोर (मार्ग/मगर/ ज़ूनॖ पछॖ (शुक्ल पक्ष) त्रुवाह (त्रयोदशी), ब्रसवार (वीरवार/गुरुवार/ब्रहस्पतवार) श्री सप्तर्षि सम्वत 5097, नक्षत्र भरण (चलान), राश वृष (दुहचि 2.20 बजि प्यठॖ) ऋतु हेमन्त (चलान)

*********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

सऻन्य शुर्य याने कऻशिर लऺडकॖ ॴस्य परानॖय परान। बी.ऐ. कऺरिथ ह्यॊतुख ब्रोंहकुन ति परुन तॖ खुलेयि वतॖ ट्रेनिंगचि तॖ ह्यॆतिन सऻन्य शुर्य दवॖन्य यिमन ट्रेनिंगन पतॖ। कोरि यिम नॖ मिडल, मैट्रिक ह्यॊर पकान आसॖ तिम ति गऺयि पनॖन्य तऻलीम ब्रोंहकुन हऻसिल करान तॖ ह्यच़न वारॖ वारॖ तिम ति यिमन ट्रेनिंगन मंज़ ख्वर ठींकरावनि। बरादरन वॊन तीज़मालि।तीज़मालि द्युत ज़ोर पनॖनिस ज़ॆहनस तॖ वॊनुन बरादरस ज़ि म्यॆ हाबा बासान ज़ि यि बदलाव आव व्यॊख्तुय। ति क्याह सना गव मतलब। बरादरन प्रुछ़ तीज़मालि वापस। मतलब छु म्योन वनॖनुक ज़ि यूत कोरि गऺयि ज़्यादॖ ज़्यादॖ परान, लऺडकन हॖन्दि बापथ गऺयि मुश्किल बडान। ति ज़न गव ज़ि कोर्यन ह्यॆतिन नॖ सॊम्बिस सॊम्ब्य लऺडकॖ टारि खसॖन्य। तिम रोज़ॖ यछ़ान ज़ि लऺडकॖ गछ़न तिहॖन्दि खॊतॖ ज़्यादॖ पऺर्यमॖत्य आसॖन्य, तनखाह ति गछ़्यख कोर्यन न्यस्बतॖ ज़्यादॖ आसुन तॖ सऺती ह्यॊत सान्यव कोर्यव नोकरियन मंज़ लगनॖ पतॖ शुर्य ज़्यवरावनॖक खयाल बदलावॖन तिक्याज़ि मस्लॖ गव पऻदॖ ज़ि तिमन शुर्यन रछि कुस, बऺडरावि कुस वगैरा। च्यऻन्य कथ छि पॊज़ मऻजी। बदलाव आव समाजस मंज़ वाकय ग़ज़बुक यि दऺप्यज़ि ति इन्कलाब ह्यु आव सिरिफ सान्यन कोर्यन हॖन्दि दऺस्य। यनॖ ॳस्य टनलि यपोर लऺग्य, यि बदलाव गव पनॖन्य रफ़तार तेज़ रटान तॖ सानि संस्कृति प्यठॖ पनुन ज़बर्दस्त असर त्रावान। तीजमालि ति दिच़ ज़ीर पनॖनि कथि ब्रोंहकुन यि वऺनिथ ज़ि फऻशनन ति द्युत वॊलग्वतुन तॖ सऻन्य शुर्य बनेयि तमिक ति शिकार अख ॳकिस वुछिथ। कत्यबा स्व खानॖपकऻय करॖन्य, सलयि कऻम करॖन्य, करोशी कऻम करॖन्य। प्रथ गरस मंज़ छि वुछान अमि बदलावुक तऻसीर युथ ज़ि इन्सान छु आसमानॖ प्यवान ज़न। ख़ारव हय तॖ कस खारव तख्सीर।कथ छि जऻरी।

*********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - नॊट, च़ॊड, मठ, च़ऺडवऻर, लॊयिव थाल, लॊयिव खऻस्य, कॆंज़ि खऻस्य, समावार, सरतलिव चिलमची, सरतलिव पऺहरात, सरतलिव गागॖर, सरतलिव तुम्बॖ, सरतलिव बॊहगन, सरतलिव दीगचि, मंजोलॖ बॊहगुन, बॊड बॊहगुन, तऻव, क़ाय, गऺडवॖ, कवलि, काशवॖ, सरतलिव क्रऺछ़, कलायिदार बॊहगुन, ल्यॆज, देग, शॆशतॖरुव बाल्टीन, चोंचि, च़्रऺट, अथॖ तॖच़, लोटॖ, न्यऻम्य, छ़ोटॖ, व्वखुल, काजॖवठ, ॴलॖ व्वखुल, ल्वकुट काजॖवठ, मसालॖ डबॖ, तीलॖवऻर, क्रोंड, छऻन्य , तगऻर्य, ड्म

**********************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

15.12.2021

15.12.2021, मॊंजहोर (मार्ग/मगर) ज़ूनॖ पछॖ (शुक्ल पक्ष) बाह (द्वादशी) ब्वदॖवार (बुधवार) श्री सप्तर्षि सम्वत 5097 नक्षत्र भरण राश मेष (चलान) ऋतु हेमन्त (चलान)

**********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

*********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

बॖ ओसुस पनॖनि जायि यि अनुमान लगावान ज़ि यॊदवय वुह वुहुर लऺडकॖ अरदाह वऺरिशि कोरि सॗत्य खान्दर करान ओस, तऺमिस आसॖहऻन त्रॖह वुहुर वऻन्सि ताम वातान वातान च़ोर पान्छ़ शुर्य ज़्यवानॖय ज़्यवान। शुर्य ज़्यॆवरावनॖच यछ़ा तॖ खऺन्दर करनुक तमाह आसनॖ म्वखॖ आसहऻन ॳमिस वनान त्रॖह गव सॖह। यि माहर्यॆन तॖ माहराज़ॖ आसहऻन म्यॆ बासान परिपूर्ण जूर्य आसान शुर्य पऻदॖ करनॖ बापथ। त्रॖहि वुहरि प्यठॖ चतजी वुहरिस ताम आसिहे यि मोल मऻज्य शुर्यन रछनस मंज़, तिमन फऻंफ्लावनस मंज़, संस्कार दिनस मंज़ पनॖन्य अरमान, पनॖन्य स्वपॖन सॊम्बरावनस मंज़ वऻन्स कडान।अथ कालस आसहऻन वनान चतजी गव पतजी तिक्याज़ि अथ वऻन्सि ताम आसह्यॆ मोल मऻज्य पनॖन्य कमऻय शुर्यन हॖन्ज़ि बॆहबूदी खऻतरॖ लागान। शुर्य आसहऻन बडान सऺत्य सॗत्य तॖ यॊत ताम मोल आसिहे वातान शेठॖ वुहुर, शुर्य ति आसहऻन आसान वुह तॖ त्रॖह वुहरिकिस दायरस मंज़ तॖ आसहऻन आसान यिम ति कमावनि द्रामॖत्य। माने त्रॖह वुहुर शुर आसिहे वनान शेठॖ वुहॖर्य मऻलिस ज़ि च़्यॆ कऺरॖथ कऻफी मॆहनत वुन्युखताम, व्वंय बॆह च़ॖ ज्यॆजीर ह्यथ कुनि कूनस मंज़ तॖ ॳस्य दिमव पानय पाख पनॖनिस हाकस। सॗती आसहऻनस वनान ज़ि च़ॖ छुख हना ब्रेठेमुत च़्यॆ छुय नॖ तगान गरॖ करुन तिक्याज़ि ॳमिस शुरिस आसिहे आसान लॊगमुत जवऻनी हुन्द हवा, सम्युक बदलवुनुक असर तॖ मुहावरॖ आसि आमुत बारसस। बरादरन वॊन तीज़मालि पनुन यि व्यच़ार। च्यानि कथि मंज़ छु कऻफी वज़न बासान म्यॆ। आहनबा तॆली ॴस्य आसान श्यॆ श्यॆ ॴठ ॴठ शुर्य सुति त्रॖह पान्च़ॖत्रॖह वुहरिस तामॖय। कऻन्सि कऻन्सि शुरिस ॴस आसान श्यन सतन वऺरियन हॖन्ज़ फरख ति ब्यॆनि बऻयिस मंज़ या बऻयिस बऻयिस मंज़ या ब्यॆनि ब्यॆनि मंज़। अरवनज़ाह वुहुर मर्द ओस दफ्तऺर्य कामि निशि रिटायर गछ़ान मतलब यि ज़ि शायद आसिहे सरकारस ति फिकिरी तरान ज़ि ॳमिस मुलऻज़मस छॆनॖ ब्रोंहकुन नोकरी करनॖच सूरथ तॖ आसॖहऻनहस पैनशन दिथ गरि बॆहनावान। तवय आसॖहऻन वनान ॳमिस शेठ गव ब्रेठ। तीज़मालि तॖ बरादरन त्रऻव असन खंगाला तॖ थऺवॖख ऒंगॖज दंदन तल तॖ लऺग्य सोंचनि ज़ि समय हय बदल्यव तॖ किथॖ पऻठ्य बदल्यव तॖ कति प्यठॖ बदल्याव तॖ क्याह क्याह बदल्यव यीत्यन वऺरियन मंज़।कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - गरवन्जॖ, ताखुच, विलिन्ज, दान, त्रु-च़ोर दान, दु-च़ोर दान, ऒक-च़ोर दान, हाकोल, वूर, दां-गॊल, ज़्युन, वीरि ज़्युन, हत्बॖ ज़्युन, कायुर ज़्युन, ज़ांगुल ज़्युन, हचॖफऺल्य, बॊठ, च़ॖनि, त्यॊंगुल, नार, क्रॊछ़, चुम्टॖ, कॊश, दमचूलॖ, कऺश्य-दमचूलॖ, सूर, ज़िन्यहऺट, मॊंडॖर, कोलॖ

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

14.12.2021

14.12.2021, मॊंजहोर (मार्ग/मगर) ज़ूनॖ पछॖ (शुक्ल पक्ष) काह (एकादशी) बॊम्वार (मंगलवार) श्री सप्तर्षि सम्वत 5097, नक्षत्र अश्वि, राश मेष (चलान) ऋतु हेमन्त (चलान)

**********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

त्रॖह गव सॖह, चतजी गव पतजी तॖ शेठ गव ब्रेठ। यि छि अख कहावत खबर कॗति कालॖ प्यठॖ आमॖच़ वनॖनॖ। बरादरन वॊन तीज़मालि कुन। आहनबा म्यॆति वऻच़ यि कहावत म्यॆ बासान ल्वकॖचारॖ प्यठॖ बोज़ान। तीज़मालि वॊनॖनस मगर च़्यॆ क्याज़ि प्यॆयी यि कहावत याद अज़। बरादरन द्युतनस जवाब ज़ि मऻजी बॖ ओसुस सोंचान ज़ि अथ कहावऺच़ पतॖ क्याह सना मुद्दा आसिहे यॆलि यि वनॖनॖ आमॖच़ छि। आदबा व्वंय ब्यूठकॖ च़ॖति यिथ्यन बानन ठानॖ तुलनि। वॊन तीज़मालि। वख्तुक तकाज़ॖ मऻजी। राथ ताम ॴस्य यिमन कहावच़न फ्रेमन मंज़ जरान रोज़ान मगर अज़ यॆलि वुछान छुस तॖ बासान छुम ज़ि यिछ़ॖ कहावच़ॖ पज़न असि मऺशरावनि। त्युथ क्याबा वुछुथ च़्यॆ अथ कथि मंज़। प्रुछ़ तीज़मालि। म्यॆति तार फिकिरी। यॊत ताम म्यॆ आव समॖज अमि कथि हुन्द मतलब, बॖ छुस यछ़ान च़्यॆ ब्रोंहकनि थावुन। सु गव यि ज़ि अज़ त्रॖह या पान्च़ॖत्रॖह वऺरी ब्रोंठ ॴस्य ॳस्य पनॖन्यन शुर्यन खान्दर करान वुहन वऺरियन अंदर अंदर याने कूर ॴस तरान शुराहि अपोर दपान ॴस्य ज़ि कूर गऺयि नेथरस लायख तॖ लऺडकॖ ओस अरदाह पूर गछ़ान तॖ वनान ॴस्य ज़ि लऺडकॖ गव बालेग। मऻलिस माजि ॴस फिकिर ह्यवान लगॖन्य तॖ मंज़िमयोर ओस बारसस यिवान तॖ ट्यॆकिनि ह्यॆ ह्यॆ यॆति होर तॖ हुति योर करान। वऺरी ज़ॖ वऺरी ॴस्य नेरान छ़ान्डनस वान्डनस मंज़ तॖ ओस यिथॖ तिथॖ खान्दर गछान। आहनबा च्यऻन्य कथ छि पॊज़। म्यॆ छु यिति याद ज़ि कॆंह वख ब्रोंह ॴस यि वऻन्स ति ज़्यादय यिवान मानॖनॖ। त्यॆलि दपान स्यठाह ल्वकट्यनॖय ॴस्य खान्दर करान मगर स्व प्रथा ह्यॆच़ॖन वारॖ वारॖ ख़तम सपज़ॖन्य। तीज़मालि पोव अमि ब्रूंठिम वख याद बरादरस। आहनी च़ॖ यॆमि ज़मानॖच कथ छख करान तमि सातन आसॖ नॖ कोरि ज़्यादॖ परान लैखान, लऺडकॖ ति ॴस्य बी.ऐ. पास करान तॖ नोकरियन मंज़ लगान तॖ खान्दर करान। वॊन वापस बरादरन। मगर वख गव बदलान तॖ खयाल ति गऺयि बदलान।  बॖ ओसुस कहावऺच़ मतलब कडनॖच कूशिश करान। बरादरन थऺव कथ जऻरी। नबा यि प्योम ल्वकचार याद मंज़य। आदबा कर पनॖन्य कथ च़ॖ पूरॖ। तीज़मालि वॊन बरादरस। कथ छि जऻरी    

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरिक्यन मकानन मंज़ क्याह क्याह ओस आसान - बॊड बर, ल्वकुट बर, द्वस, होज़, आंगुन, गान, ब्रान्द, ब्रान्दॖ पोव, ब्रान्दॖ कऺन्य, ब्रान्दॖ द्वार, वॖज़, सॊलहार या वॊट, चॊक, दऻर, दारिपॊट, पंजरॖपॊट, दमदऻर, दरवाज़ॖ, दास...

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

13.12.2021

13.12.2021, मॊंजहोर (मार्ग/मगर) ज़ूनॖ पछॖ (शुक्ल पक्ष) दऺहम (दशमी) च़ऺन्दॖरवार (सोमवार) श्री सप्तर्षि सम्वत 5097 नक्षत्र रेव, राश मेष (रऻच़ हॖन्ज़ि 2.05 बजि प्यठॖ) ऋतु हेमन्त (चलान) द्रठॖपऻन्च़ुक (पंचक) गछ़ि अज़ समाप्त

*********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

*********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

पताह छुनॖ लगान ज़ि ॴखॖर क्याह वजह छु सान्यन शुर्यन ज़ि तिम छि वऻन्सि वऻत्यमॖत्य त्रॖह द्वयत्रॖह तॖ पान्च़ॖत्रॖह वुहॖर्य मगर छि वुनि अनहॗरी। तीज़मालि छीड कथ। बरादरन द्युत जवाब। दॊपुन तीज़मालि ज़ि मऻजी यिति छि असि मंज़ अकि बदलावॖच निशऻनी। म्यॆ छु बासान ज़ि अख खास वजह छु यि ज़ि असि गऺयी यिमय द्वयत्रॖह वऺरी व्वंय कऺशीरि प्यठॖ च़ऺलिथ आमतिस। योर वऻतिथ यिम शुर्य सऻन्य बडेयि तॖ लऺग्य रोज़गार छ़ान्डनि। वुछव यॊदवय तॖ हतस मंज़ छि नमनमथ शुर्य सऻन्य तिम यिम प्राईवेट कम्पनियन मंज़ कऻम करान छि। कॊरि क्यॊह लऺडकॖ। अदॖ तमि सॗत्य क्वस फरॖख प्यॆयि, तीज़मालि प्रुछ़ बरादरस। जवाब द्युतनस बरादरन ज़ि बऺड फरॖख प्यॆयि यि ज़ि यॊदवय लऺडकॖ दिल्लि मंज़ नोकरी करान छु तॖ ॳम्यसॖन्ज़ ट्यॆकिन छि मेलान कऻन्सि तस कोरि सॗत्य य्यॊस बंगलोरस मंज़ कऻम करान छि यिम छि नॖ ह्यकान पानॖवॖन्य खान्दर कऺरिथ तिक्याज़ि न छु लडकस अमि प्राईवेट कम्पनी हॖन्ज़ कांह शाख बंगलोरस मंज़ तॖ न छु बंगलोर कम्पनी यथ मंज़ कूर कऻम करान छि कांह शाख दिल्लि मंज़। न ह्यॆकि लऺंडकॖ दिल्लि हॖन्ज़ नोकरी त्रऻविथ बंगलोर गछ़िथ तॖ न ह्यॆकि कूर बंगलोर त्रऻविथ दिल्लि यिथ। कऺशीरि मंज़ ॴस नॖ यि स्थिति तिक्याज़ि सरकऻरी नोकरियन मंज़ ॴस्य आसान कूर ति तॖ लऺंडकॖ ति। तब्दीली हॖन्ज़ गुन्ज़ऻयिश आसनॖ म्वखॖ ॴस नॖ परेशऻनी कांह आसान। मगर यपऻर्य छॆ नॖ स्व गुन्जऻयिश। आहनबा स्व कथ छि पऺज़। तीज़मालि वॊन बरादरस। पर ज़ऻच़ मंज़ पनॖन्यन शुर्यन खान्दर करनुक छु यिति अख खास वजह सु ज़न गव ज़ि व्वंय छु लऺडकॖ या कूर पनॖन्यन पनॖन्यन कम्पनियन मंज़ॖय छ़ऻन्ड दिवान या तिमन कम्पऺनियन ॳन्द्य पऺख्य छ़ऻन्ड दिवान तॖ पर-ज़ऻच़ मंज़ खान्दर करान रोज़ान। वुछनस तल छु आमुत ज़ि वर छ़ान्डान छ़ान्डान ति छि यिमन शुर्यन च़ोर च़ोर पान्छ़ पान्छ़ वऺरी नेरान यिथय पऻठ्य याने अनहॗर्य रोज़ान। यि बदलाव ति आव गज़बुक असि मंज़ टनलि योर यिथ। कथ छि जऻरी। 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

शरीरक्यन अंगन हॖन्द्य नाव कऻशिर पऻठ्य - कमर, हॊल, यड, तून, निचयड, रोंख, मंदुल, फिस, लंग, कॊठ, ज़ंग, ग्वड, ख्वर, पंजॖ, खूर, तलपॊत, ख्वरॖ न्यॊठ, ख्वर ऒंगजि, 

************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

12.12.2021

12.12.2021, मॊंजहोर (मार्ग/मगर) ज़ूनॖ पछॖ (शुक्ल पक्ष) नवम (नवमी) आथवार (रविवार/ऐतवार), श्री सप्तर्षि सम्वत 5097, नक्षत्र उ.भा, राश मीन (चलान) ऋतु हेमन्त (चलान) द्रठॖपऻन्च़ुक (पंचक) (चलान)

**********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

*********************

तीज़मालि वॊन बरादरस ज़ि च्यऻन्य कथ रूज़िन मूजूद म्यॆ गछ़ि पतॖ मऺशिथ यि वनुन ज़ि असि पज़ि पनॖन्यन शुर्यन कॆंह कथॖ ज़रूर वनॖनि। कमय कथॖ मऻजी, प्रुछ़ बरादरन। ग्वडनिच कथ यि ज़ि युस धर्मॖचि वति पकि तस पज़ि नॖ भगवानस खॊच़ुन तिक्याज़ि सानि धर्मॖ हिसाब छि दपान ज़ि भगवान छु प्रथ इन्सान सॖन्दिस मनस मंज़ वास करान याने आत्मा तॖ परमात्मा छु कुनुय तॖ सॗत्य सॗत्य आसान। यॊदवय कांह नाकारॖ कर्म करि तमिस छु भगवान सज़ा ति त्युथुय दिवान। धर्मस प्यठ पकवुनिस शख्सस छु दय ख्वश रोज़ान, पानॖ रऻछ करान रोज़ान तॖ सतॖच वथ हावान रोज़ान। अंग्रेज़व छि ॳस्य कॆंह कॆंह चीज़ पनॖनि आयि ह्यॆछनऻव्यमॖत्य यिम सानि संस्कृति न्यबर छि मस्लन तिम छि वनान ज़ि "Be God fearing" मगर सोन मानुन छु ज़ि असि पज़ि भगवानस सॗत्य लय थवॖन्य न कि भगवानस खूच़िथ रोज़ुन। यिथय पऻठ्य छि तिम वनान "RIP" मगर सोन वनुन छु ज़ि सद्गति मीलिन्य तस यस देहान्त वोत तिक्याज़ि ॳस्य छि मानान ज़ि आत्मा छु केवल अख शरीर त्रऻविथ ब्यॆयिस शरीरस मंज़ अच़ान। असि पज़ि पनॖन्यन शुर्यन पनॖन्यन धार्मिक किताबन कुन ति ध्यान दिवनावुन ताकि तिम ज़ानन ज़ि असि क्याह छु पनुन धर्म ह्यॆछनावान। सऻन्य शुर्य छि अज़कल बदलॖ बदलॖ कारन मंज़ व्यस्त तॖ मस्त रूज़िथ पौंसस पतॖ दवान तॖ दोरान। यि कथ छि पॊज़ मऻजी। जवाब द्युत बरादरन। आदबा पख ब्रोंहकुन। च़ॖ ओसुख बदलावॖच कथ करान। तीज़मालि पोव ज़्वन बरादरस। दॊयिम बदलाव आव असि कऻशिर बटन यि ज़ि असि त्रऻव पनॖनि माजि ज़्यॆवि याने कऻशिर्य पऻठ्य कथ करॖन्य पानॖवॖन्य, पनॖन्यन गरन मंज़, शुर्यन कट्यन सॗत्य, आज़रस बाज़रस मंज़। ॳम्य चीज़न ह्यॆच़ सऻन्य प्रज़नथ रावरावॖन्य। खबर हाबा क्याज़ि छिनॖ ॳस्य कऻशिर पानॖवॖन्य कऻशिर्य पऻठ्य कथ बाथ करान। प्रुछ़ तीज़मालि। यि कथ ति बनॆयि अख ज़ीठ दास्तान् व्वंय। बरादरन वॊनॖनस वापस। क्याह सना ज़्येठ्यव अथ मंज़। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

शरीरक्यन अंगन हॖन्द्य नाव कऻशिर पऻठ्य - फ्यॊक, फ्यॆक्य, ॳछ लाल, शानॖ, मछ़, नऺर, नरि, हॊच़, हऺच़्य, अथॖ, न्यॊठ, ऒंगॖज, ऒंगजि, किस, ख्वनॖवठ, नम, कछ़, ऒंगजि ज़ऻल्य

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

11.12.2021

11.12.2021, मॊंजहोर (मार्ग/मगर) ज़ूनॖ पछॖ (शुक्ल पक्ष) ॴठम (अष्टमी) बटॖवार (शनिवार/शनिश्चरवार), श्री सप्तर्षि सम्वत 5097, नक्षत्र पू.भा, राश मीन (दुहचि 4.16 बजि प्यठॖ), ऋतु हेमन्त (चलान), द्रठॖपऻन्च़ुक (पंचक) (चलान)

*********************

नमस्कार माहरा। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

*********************

ग्वडॖ करव म्यॆ बासान ॳस्य पनॖनि समुदायिच कथ। वुछव सरसरी तोर पऻठ्य ज़ि यिमन दॊयत्रॖहन वऺरियन मंज़ कोताह बदलाव आव असि मंज़। बरादरन वॊन तीज़मालि कुन। क्याह ह्यु बदलाव, तलबा बॖति बोज़हऻ। तीज़मालि प्रुछ़ बरादरस। ग्वडन्युक बदलाव आव यि ज़ि कऺशीरि मंज़ ॴस्य कऻशिर बटॖ ब्यॊन ब्यॊन जायन रोज़ान, यिमन जायन मंज़ॖ आसॖ कॆंह तिम जायि यिमन गाम ॴस्य वनान, मस्लन अनन्तनाग या तथ ॳन्द्य पऺख्य अलाकॖ, वरमुल या तथ ॳन्द्य पऺख्य अलाकॖ, क्वपॖवोर, सोपोर, हन्दॖवोर, बडगोम, क्वलॖगोम, पुलवोम वगैरा। यिथय पऻठ्य आसॖ कॆंह जायि यिमन शहर ॴस्य वनान, मस्लन श्रीनगर तॖ तथ ॳन्द्य पऺख्य अलाकॖ, मस्लन हब्बॖकऺदल, फतॆह कऺदल, राजॖबाग, नऺट्यपूर, छानॖपूर, शिवपूर, वगैरा। यिमन द्वन जायन याने शहरस तॖ गामन मंज़ रोज़नवाल्यन लूकन मंज़ ॴस वारियाह फरॖख बोज़नॖ यिवान, कथि बाथि मंज़, कथ करनॖकिस लऺहजस मंज़, ख्यनस च्यनस मंज़, व्वथनस बॆहनस मंज़, पलवन दलवन मंज़, फऻशनस मंज़, कुन जायि यिनस गछ़नस मंज़ वगैरा मगर यिमन दॊयत्रॖहन वऺरियन मंज़ गऺयि यि फरॖख वारॖ वारॖ कम गछ़ान तॖ यि दऺप्यज़ि ति यि फरॖख गऺयि गऻबॖय।अल्बतॖ कथि हॖन्दिस लहजस मंज़ छि यि फरख वुनि ति साफ़ नज़र यिवान। मगर गामस तॖ शहरस गव म्युल टनलि यपोर तऺरिथ। यि बदलाव आव कऻशिरिस बटस मंज़। योर यिथ ह्यॆतिन ॳस्य कऻशिर ब्यॊन ब्यॊन जायन बसॖन्य तॖ गामॖक्य शहरॖक्य गऺयि रऺलिथ तॖ मीलिथ। यि बदलाव आव अख जान बदलाव म्यॆ बासान। हालांकि अथ मंज़ कांह शक छुनॖ ज़ि कॆंच़व लूकव गाह सु गामस मंज़ रोज़ान ओस या शहरस मंज़ रोज़ान ओस कऺशीरि प्यठॖ च़लनॖ वख्तॖ छि जवऻहिर टनल ति ग्वडनिचि लटि वुछमॖच़। यिति छि अख हकीकत ज़ि गरॖ रोव असि सारिनी। पूर्वजन हॖन्दि मॆहनत मशक़त सॗत्य सॊम्बरोवमुत या पानॖ बनोवमुत ज़मीन ज़िरात, मकान, दुकान वगैरा प्यव दहशतस मंज़ तॖ मजबूरी मंज़ तऺती त्रऻविथ पनुन पान बचावुन। लॖति छिति गव सोरुय तॖ ॳस्य सऻरी कऻशिर्य बटॖ आयि वॊहकॖ पऻठ्य छऺकॖरावनॖ। याद अगर रूद कॆंह तॖ स्व गऺयि रावन दग़। मुश्किल अगर गव कॆंह तॖ सु गव छ़्यन तॖ दूर्यर पनॖनि माजि कऺशीरि निशि। मगर ग्वडन्युक बदलाव आव ज़ि म्युल गव गामस तॖ शहरस तॖ आव यकुत। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

शऺरीरक्यन अंगन हॖन्द्य नाव कऻशिर पऻठ्य - छ़ोग, मस, कलॖ, गर्दन, हॊट, कन, नस, ॳछ, वुठ, गलॖ, नकवऻर्य, कनॖफ्यॆच़, कनॖग्वगुल, बुमॖ, ॳछरवाल, ॳछटऻर्य, गोंछ़ॖ, दऻर, रेश, म्यंगॖ, ह्वॊंगन्य, प्राच़ॖ, ॴस, बुथ, ड्यकॖ, दंद, ज़्यव, हीरॖ ग्वगुल

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

़

10.12.2021

10.12.2.21, मॊंजहोर (मार्ग/मगर) ज़ूनॖ पछॖ (शुक्ल पक्ष) सतम (सप्तमी) शॊकुरवार (शुक्रवार/जुम्मा/भार्गववार)  श्री सप्तर्षि सम्वत 5097, नक्षत्र शत, राश कुम्भ )(चलान) ऋतु हेमन्त (चलान)

**********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि प्यव याद कुनवुहशत नमतुक कहर। स्व गऺयि बराबर रूज़िथ हिश। दॊपुन बरादरस ज़ि तिमन आतंकवादन सॗत्य ह्यॊक नॖ असि कऻशिर्य बटव कऺशीरि मंज़ मुकाबलॖ कऺरिथ तिक्याज़ि असि तॊग नॖ बॊंदूक चलावुन। बटन छु नॖ ज़ांह श्राकपुच अथस क्यथ तुलमुत बॊंदूकॖच छॆनॖ कथॖय। बरादरन वॊन तीज़मालि ज़ि मऻजी ॳस्य बटॖ रूद्य दॊहय मॊहताज।  यि छु ठीक ज़ि परुन लेखुन छु रूदमुत सऻनिस समुदायस मंज़ ग्वडॖ प्यठय मगर अथ सॗत्य सॗत्य पज़िहे असि पनॖनि बचावॖ बापथ अख अख लुरॖय पनॖन्यन पनॖन्यन गरन मंज़ थवॖन्य। तीज़मालि सूंंच ज़ि शायद छु बरादर पॊज़ वनान। दॊपुन बरादरस दपान हाबा तालवस लोरि काह मगर जंगॖ विज़ि नॖ अख ति। म्यॆ बासान ज़ि यॊदवय सान्यन गरन मंज़ लोरि ति आसहऻन असि तगहऺन नॖ तिम ति चलावनॖ तिक्याज़ि ॳस्य छि रूद्यमॖत्य अमन पसन्द हर हमेशॖ। सानि संस्कृति मंज़ ॴस नॖ हिंसा। तिहय गव पॊज़ जवाब द्युत बरादरन मगर इन्सानस म्यॆ बासान पज़ि हालातन सॗत्य सॗत्य पकुन। बरादर रूद वनान ज़ि यनॖ ॳस्य ति प्रथ्यॆयि असि वोत वुछान पानस ॳन्द्य पऺख्य कोताह बदलाव आव गछ़ान बकाया समुदायन मंंज़ मगर ॳस्य बदलेयि नॖ तमि रऺन्ग्य वं न्युखताम। तीज़मालि त्रऻव बरादरस कुन नज़र तॖ वॊनॖनस नबा क्युथ ह्यु बदलाव गॊछ़ असि मंज़ युन। म्यॆहय छु बासान ॳस्य छि बदलेमॖत्य। च़्यॆ तॊरॖय नॖ शायद फिकिरी ज़ि म्योन मतलब क्याह छु बदलावुक। बरादरन वॊन वापस। कथ छि जऻरी

*******************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

""""""""""""""""""""""""""""""""""

कऺशीरि मंज़ॖक्य कॆंह क्यॆम्य क्रॗल - खर, च़र, पिश, ऱैय, ख्वडॖक्यॊम, बुम्सिन, कनहऻपिन, बॊम्बुर, तुलुर, मऺछ, मॊह, हथज़ृंगुल, ज़लुर, क्रॗल, स्वरुफ, गुनस, केन्कॖलऺट

********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठ ति)

09.12.2021

09.12.2021, मॊंजहोर (मार्ग/मगर) ज़ूनॖ पछॖ (शुक्ल पक्ष) शॆयम (षष्ठी) ब्रसवार (गरूवार/वीरवार/ब्रहस्पतवार) श्री सप्तर्षि सम्वत 5097 नक्षत्र धनिष्ठ, राश कुम्भ (दुहचि 10.09 बजि प्यठॖ), ऋतु हेमन्त (चलान),,,द्रठपऻन्च़ुक (पंचक) आरम्भ

**********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

*********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

*********************

त्राहि त्राहि। तीज़मालि छ़ॖन्य ज़्यव दंदस तल तॖ वॊनुन बरादरस कुन। कनि ख्वतॖ दॊर तॖ पोशॖ ख्वतॖ ॴव्युल छु यि इन्सान। राथ युस हऻदिसॖ सपुद, सख अफसूसनाक हऻदिसॖ सपुद। आहनी मऻजी, दपान छिना मोत छु इन्सानस पनॖन्यन पद्यन तल आसान तॖ ॳमिस इन्सानस छॆनॖ पताह लगान ज़ि कर, किथॖपऻठ्य, कथ जायि, कमि आयि छु ॳमिस मोत ॴस वाहरऻविथ आसान। अथ मंज़ ति वुछतॖ पनुन पनुन कॖस्मथ। विपिन रावत सऻबस सॗत्य तसॖन्ज़ ज़नान तॖ बकाया सऻरी सवार आयि मोतकिस ज़दस मंज़ मगर दपान यिमव च़्वदहऻव नफरव मंज़ॖ छु सिरिफ अख नफ़र बचोमुत युस वुनि मोतस सॗत्य लड कऺरिथ छु। तीज़मालि वॊन मंज़य। आहनबा यस सु दय रछि पानॖ तस कुस मारि। यॆहाबा गऺयि त्रठ। यीत्य फोजिक जवान तॖ पयलाटन हॖन्दि मरनॖ सॗत्य हाबा वोत सख ज़ख सऻर्यसॖय वतनस। त्राहि त्राहि छि सऻरी करान। यिहन्द्यन गरवाल्यन कुस कऺहर आसि प्योमुत यि ज़ानन तिमय। यसॖय त्रुस लगान सु तमिच दग़ च़्यॆनान। दय कऺरिन पनॖन्य पर्दॖपूशी। बरादरन वॊन वापस। आहनी हऻदिसॖ गव हऻदिसॖ। तॗरि कऺन्ड्य छि फटान यिछ़ कथॖ बूज़्य बूज़्य। नारस तॖ मारस निशि गछ़ि भगवान रऻछ करुन। दपान ॴस्य ज़ि यि हेलिकापटर छु दुनिहीक्यव जान जान हेलीकापटरव मंज़ॖ तॖ ब्यॆयि दपान ॴस्य ज़ि सऻरी पयमानॖ ॴस्य ठीख ठाक तॖ पयलाट ति ओसमुत तजरुबॖकार तमि पतॖ ति युथ हऻदिसॖ सपदुन छि हऻरऻनी हॖन्ज़ कथ। मोसुम ति छु ओसमुत ठीख ठाक। अदॖ ज़न द्युत यि हेलिकापटर हतव जिनव दऻरिथ तॖ लॊगुस नार। त्राहि त्राहि।  स्वर्गस ॴस्यनख जाय। यिहन्द्यन परिवारन मीलिन ह्यमथ यि ब्रख च़ालनॖ बापथ। कथ छि जऻरी

*********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

""""""""""""""""""'"""""""""""""""""

कऺशीरि मंज़ॖक्य कॆंह जानवर/ज़ानावार - च़ऺर, हऻर, कऻन्टुर, गऻन्ठ, कुकिल, कोतुर, काव, रातॖमॊंगुल, बिल्बिच़ुर, सत्तुत, ॳन्ज़

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

08.12.2021

08.12.2021, मॊंजहोर (मार्ग/मगर) ज़ूनॖ पछॖ (शुक्ल पक्ष) पऻन्च़म (पंचमी) ब्वदवार (बुधवार) श्री सप्तर्षि सम्वत 5097, नक्षत्र श्रवण, राश मकर (चलान) ऋतु हेमन्त (चलान)

**********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि वॊन बरादरस ज़ि म्यॆहबा बासान ज़ि कऺशीरि प्यठॖ च़लनॖ पतॖ कुनवुहशथ तॖ नमतस मंज़ असि कऻशिर्य बटन रूद गटॖकार कॆंच़स कालस तॖ पतॖ ज़न आव गटि मंज़ गाश ह्यु। बरादरन वुछ हऻरऻन्यगी सान तीज़मालि हॖन्दिस बुथिस कुन तॖ दॊपनस मऻजी यि वऺनिथ ज़न च़्यॆ ब्यालि तलॖच कथ तॖ ज़न कॊरुथ च़्यॆ कुनि बऺडिस राज़स फाश। आहनबा तॖ अदॖक्याह। वॊन तीज़मालि बरादरस कुन। ॳस्य ॴस्य यि  दऺप्यज़ि ति तति ज़न जहनमस मंज़ बिहिथ यि ज़ऻनिथ ज़ि कऺशीर छि जन्नत तॖ सऻन्य मऻज्य कऺशीर मगर तति युस आतंकवाद वॊथ तॖ तमि ब्रोंठ ति ततिक्यन मुस्लमानन हुन्द बटस सॗत्य बदलेमति वरतावॖ सॗत्य ॴस कऺशीर सानि बापथ ज़न व्वपर जाय बन्येमॖच़। हालांकि न्वकसान गव कऻफी प्रथ रऺन्ग्य, माजि कऺशीरि निशि गऺयि ॳस्य दूर स्यठाह, दग़ रूज़ ललवॖन्य वुन्युखताम मगर कऺशीरि न्यबर नीरिथ हाबा आयि असि बटन ॳछ मुच़ॖरावनॖ, नरि ज़ंगॖ वाहरावनॖ बॆफ्रूक पऻठ्य तॖ दहशथ रॊस। बरादरन कॊर जुमलॖ पूरॖ यि वऺनिथ ज़ि दयसॖन्दि धर्मॖ गऺयि सऻन्य शुर्य कऺट्य बजाह यॆमिच नॖ ज़ांह व्वमेद ॴस तति बिहिथ। कॆंह लबनॖ बापथ छु कॆंह रावरावुन ति प्यवान। तीज़मालि कॊर ॳछव सॗत्य आंकार। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""

कऺशीरि मंज़ॖक्य कॆंह जानवर/ज़ानावार -

गाव, दांद, गुर, गुरिन्य, खर, खऺरिन्य, कातुर, कठ, छ़ावॖज, हून, ब्रोर, हुन्य, ब्रऻर, क्वकुर, क्वकॖर, बतुख, बतॖछ, गगुर, गगॖर, वछ़ॖर,छ़ावुल

**********************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

07.12.2021

07.12.2021, मॊंजहोर (मार्ग/मगर) ज़ूनॖ पछॖ (शुक्ल पक्ष) च़ोरम (चतुर्थी) बॊम्वार (मंगलवार) श्री सप्तर्षि सम्वत 5097 नक्षत्र उ.षा, राश मकर (सुबहॖचि 7.44 बजि प्यठॖ), ऋतु हेमन्त (चलान)

*************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

*************************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

************************

बहच़ॖ या खऺच सामानॖ बऺर्य बऺर्य यॆलि अथ व्यॆथि मंज़ आसॖ खसान रोज़ान तॖ तिमन लमनवऻल्य मॊहनिव या हऻन्ज़ ॴस्य रज़न लमनस सॗत्य सॗत्य परान रोज़ान क्याहताम क्याहताम, मस्लन पकुन छुय थकुन छुय नॖ, खऺज़ॖरॖन्य नाव पकॖनावॖन्य छि, मंज़्यलस ताम वातनावॖन्य छि, मटि हॆच़मॖच़ कऻम म्वकॖलावॖन्य छि, यीरॖवॖन्य नाव बॊठ लागॖन्य छि, या ख्वदाया मदद करं, वगैरा वगैरा। यि नज़ारॖ वुछनॖ बापथ ॳस्य लूख कऺदलॖ बीनि प्यठ जमाह गछ़ान रोज़ान। पोस ओस वसान हऻन्ज़न अथ कामि करनस मंज़। यिमन बहच़न या खचन ॳस्य हऻन्ज़ हमतुल्यव सॗत्य डख रऺट्य रऺट्य ब्रोंह ब्रोंह नाव पकनावान। यिछ़न काम्यन गऺछ़ आसॖन्य वारियाह नफर तवॖ म्वखॖ छु म्यॆ बासान ज़ि यिमन हऻन्ज़न ॴस्य आसान शुर्य तंदल। ॴंठ ॴठ नव नव शुर्य  शॆ शॆ सथ सथ शुर्य ॴस्य कऻशिर्य बटन ति आसान मगर तिम ॴस्य परनस लेखन मंज़ लगान। व्वंय छि कऻशिर्य बटन मंज़ अख या ज़ॖ शुर्यहऻन थवनॖच प्रथा मगर मुस्लमानन छि रफ्तार बराबर चलान। तिम ह्यॆतिन आबऻदी मंज़ बडान रोज़ान तॖ ॳस्य ह्यॆतिन आबऻदी मंज़ छ़्वकॖन्य वारॖ वारॖ। खऻर। तीज़मालि वॊन बरादरस। तमि पतॖ हाबा गऺयि ह्वॊसबोट। यिम छि ज़्यादॖतर दऺर्यावन मंज़ ॳक्सॖय जायि यिवान ठीकॖरावनॖ तिक्याज़ि यिम छि बकाया शिकार्यव ख्वत आकारस मंज़ बऺड्य आसान। ह्वसबोट बनावनस मंज़ छु पौंसॖ ति कऻफी लगान। यिमन मंज़ छि त्रॆ खानॖ आसान तॖ प्रथ अख खानॖ छु जान पऻठ्य पऻरऻविथ आसान कऻलीनव सॗत्य, सज्जावटी सामानॖ सॗत्य, ख्यनॖ बापथ मेज़ कुर्सी टी-स्यट, डिन्नर-स्यट वगैरा वगैरा। देश विदेश प्यठॖ आमॖत्य लूख छि बिहान यिमन ह्वसबोटन मंज़। कॆंह छि होटलन मंज़ रोज़ान तॖ कॆंह ह्वसबोटन मंज़। कऺशीरि मंज़ छि यिम ह्वसबोट ज़्यादॖतर डल जीलस मंज़ नज़र यिवान। यिमन सॗत्य छि आसान ल्वकचि शिकारि ति यिमव दऺस्य आमॖत्य सऻलऻन्य छि यिवान निनॖ डलुक सऻर करनावनॖ बापथ, निशात, हऻरवन  शालॖमऻर वगैरा। ब्यॊन ब्यॊन नावॖ पचि छि नज़र यिवान ब्यॊन ब्यॊन ह्वसबोटन। ज़रूरतुक सोरुय सामान छु आसान म्ययसर यिमन ह्वस बोटन मंज़। मकानन हॗन्द्य पऻठ्य छि यिमन मंज़् ति आसान ब्यड रूम, डाईनिंग रूम, ड्राईंगरूम, बाथ रूम वगैरा। कथ छि जऻरी 

************************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""""""

कऻशिर म्यवॖ (फल) - च़ूंंठ (अमबॖर्य, बम्ब, डॆलिशस, गोल्डॖन, वगैरा) टंग, बबॖगोश टंग, त्रेल, ॴर, गिलासॖ (चॆरी) डबल गिलासॖ, ॴल्यचि, च़ॖनॖन्य, डून्य, बादाम, खरबूज़, ह्यन्दॖव्यन्द, खऺज़ॗर, ग्वरदऻल्य, तुल्य,शाह तुल्य, दछ

*************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

06.12.2021

06.12.2021, मॊंजहोर (मार्ग/मगर) ज़ूनॖ पछॖ त्रय (तृतीया) च़ऺन्दॖरवार (सोमवार) श्री सप्तर्षि सम्वत 5097, नक्षत्र पू.षा, राश धनु (चलान) ऋतु हेमन्त (चलान)

***********************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

************************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

************************

कॆंच़न बहच़न मंज़ ॴस्य कऺशीरि मंज़ हऻन्ज़ दानि, त्वमुल, ओट तॖ मऺदर्रैर सारान रोज़ान। लूकन ॴस्य दिवान चॆन्दि प्यठ यिम चीज़ यथ दपान ॴस्य ज़ि राशन छ़ु मेलान चॆन्दि प्यठ। ज़्युन ति ओस यिवान सारनॖ तिमन बहच़न मंज़ तॖ ओस सु ज़्युन ति यिवान दिनॖ चॆन्दि फ्यठॖय। खचन मंज़ ॴस्य हऻन्ज़ सारान रोज़ान स्यख, कनि, रुड्य, सुरुख्य, चूनॖ, वीरि ज़्युन, हतबॖ ज़्युन, कायुर ज़्युन, ज़ांगुल ज़्युन, फराह, कॊश, सेरि, सीमठ,कनि पऻतरि, म्यॆच़ वगैराह। यि कारोबार ओस सोरुय तथ दऺर्यावॖ जेहलॖमस या व्यॆथि मंज़ चलान रोज़ान यिमवॖय नावव याने खचव तॖ बहच़ दऺस्य। तीज़मालि वॊन बरादरस कुन। आहनी मऻजी म्यॆ छु वारिहायि लटि यिहुन्द सु नज़ारॖ वुछमुत। क्युथ बा ह्यु नज़ारॖ। तीज़मालि प्रुछ़ बरादरस। यॆलि यिमन बहच़न या खचन मंज़ सामानॖ ओस आसान बऺरिथ तॖ यिमन बहच़न या खचन ओस आसान खसुन अथ व्यॆथि मंज़ बॊनॖ प्यठॖ ह्यॊर कुन याने मानव फतॆह कऺदलॖ प्यठॖ हब्बॖकऺदल कुन। अथ दशायि मंज़ ॴस्य दऺह दऺह काह काह मॊहनिव लमान रोज़ान यिमन बहच़न या खचन रज़व सॗत्य यिम दऺर्यावॖ बठि पानॖ ॴस्य पकान तॖ रज़न लमान ॴस्य तॖ अदॖ आसॖ यिम बहच़ॖ या खचॖ जायि मुकामस ताम वातान तिक्याज़ पोन्य ओस हॆरि प्यठॖ ब्वन वसान मतलब हब्बॖ कऺदलॖ प्यठॖ फतॆह कऺदल कुन पकान तॖ नाव ॴस दोलॖ दिशायि किन्य खसान। बरादरन वॊन तीज़मालि। कथ छि जऻरी 

************************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""""""

कऻशिर सिन्य - (न्यॆनि) कऺल्यि, रोगनजोश, मछ़, यखॖन्य, कबरगाह, च़ॊक  च़रवनॖ, रिस्तॖ, ग्वशताबॖ, डऺम्यनि, शूशनोर, पाचॖ चिकन (क्वकुर), गाडॖ (कऻशिर्य गाडॖ/पंज्येब गाडॖ/ट्रॊवुट गाडॖ), ह्वगाडॖ, रज़ॖ ह्वगाडॖ, गुरन, पऺछिन

*************************

नऺविव तॖ फॊलिव

(भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव 

koshursabak.blogspot.com प्यठॖ ति)

05.12.2021

05.12.2021 मॊंजहोर (मार्ग/मगर) ज़ूनॖ पछॖ (शुक्ल पक्ष) ऒक्दॊह (प्रथमा) देवादेव आथवार (रविवार/ऐतवार) श्री सप्तर्षि सम्वत 5097, नक्षत्र ज्येष्ठा, राश धनु (सुबहचि 7.47 बजि प्यठॖ), ऋतु हेमन्त (चलान)...,चूंकि पगाह छि द्वय (द्वितिय) रावान,पगहुक वॊहरवोद यी ॳज़्य

*************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

*************************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

*************************

बहच़ छि स्व अख बऺड नाव यथ मंज़ कऺशीरी हॖन्द्य मुस्लमान छि पनॖन्य शुर्य बऻच़ ह्यथ रोज़ान आमॖत्य दपान सऺदियव प्यठॖ। तीज़मालि तुज रातॖच कथ ब्यॆयि तॖ वॊनुन बरादरस। आहनी मऻजी यिति छि अख तऻजबॖच़ कथ ज़ि यिमन लूकन किथॖ पऻठ्य छु यिवान वार यिमन बहच़न मंज़ बॆहनस। बरादरन वॊन तीज़मालि कुन। कऺशीरि मंज़ छि यिम बहच़ॖ व्यथिक्यन दॊश्यवऺन्य बठ्यन सॗत्य सॗत्य गन्डिथ नज़र यिवान। तीज़मालि वॊन ब्रोहकुन। हतबा बॖ छस पानॖ हऻरान ज़ि यिम किथॖ पऻठ्य छि ज़िन्दगी ज़ुवान। वुछुन गछ़ि तमि सातन यॆलि अथ व्यथि मंज़ सऺहलाब छु यिवान। यिहुन्द ज़ुव छु तमि वख्तॖ दावस आसान लॊगमुत। मरि कुस तॖ लसि कुस। हालथ छख नोज़ुक गछ़ान। बहच़न हॖन्ज़ रज़ गन्डनस छे नॖ यिमन हऻन्ज़न अथ वथॖय यिवान। बठ्यन प्यठ बन्यॆमॖच़ॖ बटॖ लर्यन या मुस्लमान लर्यन मंज़ गऺछ़्य गऺछ़्य छि तति रज़ॖ गऺन्ठिथ पनॖन्यन बहच़न तॖ बऻहच़न मंज़ रोज़वॖन्य गरिक्यन बऻच़न बचावान रोज़ान। यिहॖन्ज़ ति छि अलगॖय कथा। बरादरन वॊन वापस। बोज़ान ॴसॖस नमतस मंज़ ॳस्य कऻशिर्य बटॖ यीत्य ति कऺशीरि प्यठॖ च़ऺलिथ आयि तिहॖन्ज़न लर्यन प्यठ छु यिमव हऻन्ज़व ति कब्ज़ॖ कॊरमुत। म्यॆहय छु बासान च्यानि कथि मंज़ स्यठाह वज़न। बॖति ओसुस गोमुत कऺशीरि केंह वऺरी ब्रोंठ तति वॖछ्य म्यॆ वारियाह बहच़ॖ बिल्कुल खऻली। तिम छि बटॖ गरन मंज़ बिहिथ ॴशाह करान। आहनबा सऻनिस जादादस गव यीय। सोरुय गव तिहॖन्दी बूज़्य। तिमन द्युत गॖसॖ नऺल्य बऻथ। ॳस्य वुछतॖ कति ॴस्य तॖ कॊत वऻत्य। तिमन सान्यन लर्यन मंज़ छि च़ामॖत्य खऺज़रॖ  तॖ खऻत्य। बहच़ॖव अलावॖ छि आसान खऺच, हावुस बोट वगैरा। तिम वुछव ब्रोंहकुन। कथ छि जऻरी

************************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""""""

कऻशिर सिन्य - (दाल) म्वंग (सोबूत/दुखऻन्ट/छेज्यमॖच़), चन्नॖ (छेज्यमॖच़/क्रहॖन्य/सोबूत/काबुली), माहा, हॊछि राज़मा, वारिमुठ, करॖ, रोंगी.....

*************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

04.12.2021

04.12.2021 मॊंजहोर (मार्ग/मगर) गटॖ पछॖ (कृष्ण पक्ष) मावस (अमावस) देवादेव बटॖवार (शनिवार/शनिश्चरवार) श्री सप्तर्षि सम्वत 5097, नक्षत्र अनु, राश वृश्चिक (चलान) ऋतु हेमन्त (चलान)

*************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

*************************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

*************************

तीज़मालि थऺव कथ जऻरी। शिकारि याने नावॖ ति आसॖ आसान कॖसॖमवार। स्यॊद नाव य्यॊस आम इन्सानन हॖन्दि बापथ आसॖ आसान, ब्याख गऺयि पऻरऻवमॖच़ नाव यथ रंग वाह वाह ओस आसान आमुत करनॖ। यिमन नावन मंज़ ॴस्य फरऺन्ग्य  याने होरिक्य योरॖक्य लूख, व्यलायतव प्यठॖ आमॖत्य देश विदेशॖ फ्यठॖ सऻलऻनी लुख सऻराह करान। यॊत ताम म्ये ज़्वन छु कऻशुर बटॖ ओस नॖ यिमन नावन खसान अल्बतॖ बुलवार्ड रोड गाठॖ प्यठॖ नेहरू पार्क ताम तार दिनॖ वख्तॖ ओस यिमन नावन खसान। ब्याख कॖसॖम नाव ॴस यथ मंज़ हक् ॴस्य सारान रोज़ान हऻन्ज़। बरादरन प्रुछ़ तीज़मालि। मऻजी यि हक् किहे ओस आसान। तीज़मालि कऺर नज़राह बरादरस कुन तॖ वॊनॖनस क्याबा ज़न छुख च़ॖति टनलि यपारि प्यठुक। नाय बॖति छुस कऻशुरुय दफ अमापॊज़ यिमन दॊयत्रॖहन वऺरियन मंज़ ज़न गऺयि पऻर्यज़ानॖय खतम। तीज़मालि डऻज्य कथ तॖ वॊनॖनस ज़ि यिम हऻन्ज़ हाबा छि डलस अंदर खऺच़मॖच़ हिल, गासॖ , ख्यलॖवऺथॖर वगैरा च़टान रोज़ान तॖ सॊम्बरावान यिमन पशॖ रॊस नावन मंज़। यिछ़नॖय हिश्यन नावन मंज़ छि हऻन्ज़ सब्ज़ी, म्यवॖ, शाल, डुप्टॖ वगैरा कॖनान रोज़ान तिमन लूकन यिम हाऊस बोटन मंज़ छि रोज़ान। यिति छु अख बॊड कारॖबार ततिक्यन लूकन बापथ। अमि पतॖ गऺयि डूंगॖ। यिमन डूंगन मंज़ ॴस्य वख अकि कऻशिर बटॖ तुलमुल गछ़ान, निशात, शालॖमऻर गछ़ान मगर यि प्रथा ॴसॖन कम ह्यॆच़मॖच़ गछ़ॖन्य। नमतॖ ब्रोंहठॖ ति ॴस्य कऻशिर बटॖ कमॖय पाहन डूंगन मंज़ यिमन जायन गछ़ान। खास तोर पऻठ्य यनॖ लूकन आयि पनॖनि गाडि डूंगन हुन्द चलन ह्यॊतुन म्वकलुन वारॖ वारॖ मगर मुस्लमान छि वुनि यिमन डूंगन हुन्द इस्तिमाल करान रोज़ान यॆलि तिमन पनॖन्यन शुर्यन खुतनॖ आसान छु करुन। डूंगॖ पतॖ गऺयि बहच़। अथ प्यठ करव ब्रोंहकुन कथ बाथ। कथ छि जऻरी

*************************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""""""

कऻशिर सब्ज़ी - बोगलॖ, नुनर, लीसॖ, लऻर, बागॖ लऻर, ग्वरदऻल्य, बम्बच़ून्ठ, च़ॊक्य च़ून्ठ, स्वचल, नदॖर्य (डलॖक्य/वॊलरॖक्य) ओलव, गन्डॖ, टमाटर, करेलॖ, त्वरेलॖ, कनॖगॖछ्य, ह्यडर, सिमला मिरिच, नील्य मर्च़ॖवांगन, फूलगोबी, बंदगोबी, पालक, ऒबुज्य, ठूलॖ राज़मा

*************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव poddast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)

03.12.2021

03.12.2021, मॊजॖहोर   (मार्ग/मगर) गट पछ (कृष्ण पक्ष) च़्वदह (चतुर्दशी) देवादेव शॊकुरवार (शुक्रवार/जुम्मा/भार्गववार), श्री सप्तर्षि सम्वत 5097, नक्षत्र विशा, राश वृश्चिक (सुबहॖचि 8.27 बजि प्यठॖ), ऋतु हेमन्त (चलान)

************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

************************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

*************************

कथ कथ करान गव म्यॆ मऺशथॖय वनुन ज़ि अथ व्यथि प्यठ ओस अख ब्याख कऺदॖल ति आमुत बनावनॖ यथ दपान नाव ओसुख थोवमुत अबू कऺदॖल याने अब्दुलाह कऺदॖल। तीज़मालि वॊन बरादरस। ब्यॆयि ॴसॖस बोज़ान ज़ि ज़ीरो ब्रॖज छुख नवि सरॖ नवि आयि बनोवमुत। कमि आयि सना। प्रुछ़ बरादरन तीज़मालि। दपान हाबा यि कऺदॖल छु सिरिफ लऺकरिव याने हच्युव कऺदॖल बन्योमुत। अरॖ वरॖ हच्यन हुन्दुय। अथ  कऺदलस छॆनॖ गाडि, टांगॖ या सयकलॖ पकान बऺल्कि अथ कऺदलस छि लुख पऻदल पकान अपारि यपोर। अथ कऺदलस प्यठ छि हचन हॖन्दी बैंच बनऻवमॖत्य यिमन प्यठ बिहिथ छि लुख व्यथ वुछान पकवॖन्य तॖ ॳन्द्य पऺख्य नज़ारुक लुत्फा तुलान। आहनी लुतुफ तुलन ना। कऻशिर्य बटन हुन्द ओसुख खॊख। तिम च़ऺलॖरऻविख तॖ व्वंय छि नरि ज़ंगॖ वाहरऻविथ मौज च़टान बॆवाय पऻठ्य। कथ कऺर पूरॖ बरादरन। च़्यॆ तुजेयेथ राथ कथ शिकार्यन हॖन्ज़। नऺव कथ तुज तीज़मालि। बरादरन द्युतुस जवाब। म्यॆ ह्यॆच़ेयोमय वनुन ज़ि ॳस्य ॴस्य यिमन शिकार्यन यानि नावन मंज़ हेरच़ॖक्यन दॊहन सवऻर्याह करान यॆलि हऻन्ज़न ॴस्य डुन्य ख्यावान तॖ तिम ॴस असि बॆहनावान नावि मंज़ तॖ ॴस्य सवऻर्य दिवान। कति यिन फीरिथ तिम दॊह। नावि मंज़ बिहिथ व्यथि हॖन्ज़ि यपऻर्य बठि प्यठॖ अपऻर्यमिस बऺठिस ताम गछ़नस ॴस्य वनान नावि तार द्युन। आहनबा ख़बर छम। वॊन तीज़मालि। डलस मंज़ नावन ओस आसान गऺज्यगाह तॖ मोरॖछलॖ कऺरिथ। सऻलऻनियन बापथ ॴस्य थवान हऻन्ज़ पनॖनि पनॖनि नावॖ सज्जऺविथ अख ॳक्यसॖन्दि ख्वतॖ। नावन प्यठॖ ॴस्य कम कम नावॖ पचि आसान लीखिथ तॖ कम कम स्पिरिंगॖदार तॖ पलंगदार सीटॖ नावन अंदर सज्जऻविथ। कऻशिर बटॖ ॴस्य अमापॊज़ कुनि कुनि सातनॖय तिछ़न नावन मंज़ बिहिथ सऻर करान। तिमन बिचार्यन कति ओस वखुवमुत। कथ छि जऻरी    

*************************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

""""""""""""""""""""""""""""""""""""""""

कऻशिर सब्ज़ी - कान्युल हाक, बऺद्य हाक, वारि हाक, तोलॖ हाक, वॊपल हाक, वॊस्तॖ हाक, मॊंजि हाक, ज़ीठ अलग, गोल अल, मॊंजि, गॊगजि,  मुजि, गोल मुजि, हन्द, बुम, अलॖ हचि, वांगन, फूलॖ वांगन, वांगन हचि, राज़मा ह्यम्बॖ....

*************************

नऺविव तॖ फॊलिव

भूषण कौल "दीप""  

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव

koshursabak.blogspot.com प्यठॖ ति)

02.12.2021

02.12.2021, मॊंजहोर (मार्ग/मगर) गटॖ पछॖ (कृष्ण पक्ष) त्रुवाह (त्रयोदशी) ब्रसवार (गरूवार/वीरवार/ब्रहस्पतवार) श्री सप्तर्षि सम्वत 5097, नक्षत्र स्वाति, राश तुला (चलान) ऋतु हेमन्त (चलान)

*************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

*************************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

*************************

कऺशीरि मंज़ युस दऺर्याव छु तथ छि वनान जेहलिम, वितस्ता या व्यतस्ता, तॖ व्यथ ति। अथ व्यथि प्यठ छि आमॖत्य ग्रन्दि रॊस कऺदॖल बनावनॖ यिहॖन्द्य ब्यॊन ब्यॊन नाव छि आमॖत्य थावनॖ तिक्याज़ि यि क्वल याने दऺर्याव छु वारियाह ज़्यूठ सफ़र कऺरिथ ॴखरस समन्दरस सॗत्य मेलान। सिरीनगरक्यन प्रमुख कऺदलन हॖन्द्य नाव छि यिथकऺन्य - ज़ीरो ब्रॖज, ओम्राकऺदल, बडशाह ब्रॖज, हब्बॖ कऺदल, फ़तेह कऻदल, ज़ऻनॖ कऺदल, नॊव कऺदल, ॴल्यि कऺदल, सफा कऺदल। बरादरन च़ऺट कथ मंज़य तॖ वॊनुन तीज़मालि कुन। म्यॆहय छु बू़ज़मुत ज़ि यिमव कऺदलव मंज़ छि ज़ॖ कऺदॖल याने ज़ीरो ब्रॖज तॖ बडशाह ब्रॖज पतॖ आमॖत्य बनावनॖ। ति छा पॊज़। आहनबा ति छु पॊज़ यिम ज़ॖ कऺदॖल छि आमॖत्य पतॖ बनावनॖ। ग्वडॖ ॴस्य दपान व्यथि प्यठ छि सथ कऺदॖल तॖ व्वंय छि वनान व्यथि हॖन्द्य नव कऺदॖल। अमि अलावॖ ति छि वारियाह कऺदल मस्लन कन्या कऺदल, ड्यॆड्य कऺदल, रामबाग कऺदल, छच़ॖबल कऺदल, वूंटॖ कऺदल वगैरा वगैरा। दफ यिम कऺदल ति गऺयि असि निशि दूर। ज़ानि दय तस क्याह छु मंज़ूर। तीज़माल गऺयि ब्यॆयि कथताम ख्यूबस मंज़। बरादरन दिच़नस ज़ीर तॖ दॊपनस मऻजी यिमन कऺदलन सॗत्य सॗत्य  प्यॆयि म्यॆ शिकारि याद। किथॖ पऻठ्य ॴस्य नावि सऻल करान। नबातॖ शिकार्यॆय याच़ॖ क्याज़ि दफ डूंगॖ सऻल। दिलस छि दुबरारय गछ़ान यॆलि यिमॖ कथॖ तॖ तिम दॊह छि  च़्यतस प्यवान। कथ छि जऻरी 

*************************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

""""""""""""""""""""""""""""""""""""""""

ऱयतन हॖन्द्य नाव कऻशिर पऻठ्य - च़िथॖर (चैत्र/चेत) वह्यक (वेशाख/बैसाख) ज़्येठ (ज्येष्ठ) हार (आषाढ)  श्रावुण (श्रावण/सावन) बऻदॖर्यप्यथ (भाद्र/भादून्)

ॴशिद (आश्विन/असूज) कार्तिक (कतक) मॊंजहोर (मार्ग/मगर) पॊह (पौष) माग (माघ) फागुन (फाल्गुन)

************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव pod cast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)