09.05.2021

09.05.2021, वह्यक (वैशाख/ बैसाख) गटॖ पछॖ (कृष्ण पक्ष) त्रुवाह (त्रयोदशी) आथवार (रविवार/ ऐतवार) श्री सप्तर्षि सम्वत 5097,नक्षत्र रेव, राश मेष (शामन 5.28 बजि प्यठॖ), द्रठॖपऻन्च़ुक (पंचक) समाप्त,ऋतु बसंत (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामीरी नाश- मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             नुंदॖ रॆशॖन्य श्रुक्य

मीशस खश ना करनस पज़ि

ज़ान तॖ वुछ सुय कपटान

यॊद म्योन ग्वरॖ पद सज़ी

अकुय ज़ुव बडि बुह गिन्दान

             अर्थात

मवेशन पज़ि नॖ खश करुन, ज़ानुन गछ़ि यि ज़न छु सुय म्यॆ कपटान। यॊद म्योन वनुन फिक्री खसिय तॆलि छु यि पॊज़ ज़ि बडि गरिच मीजमॖच़ सारिनॖय मंज़ कुनिस ज़ितिन्य रूप आत्मा छु तऺस्य सॗत्य ब्यॆयि लय सपदान

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              *********

1. हऻल (Custom/Practice)

2. हऻन्ज़ (Boat man/Sailor/Sea man)

3. हऻबथ (Fear/Terror/Dread/Scare/Danger)

4. हऻबथ गछ़ुन (To be frightened/To be terrified)

5. हतख (Dishonour/Disrespect)

                   मुहावरॖ

1. मु: च़ूरॖ क्वकॖर

    अ: य्वस कऻम बॆ-वखतॖ खऺजॖल

         करि

2. मु: च़ूर छु बे-नूर

    अ: च़ूर छु ॴबदार आसान

3. मु: च़्वदऻहिम ज़ून

    अ: फलॖ-च़ऺन्दॖर हिश ज़ून, या,

         स्यठाह हऺसीन ज़नान

     (पनॖन्य शुर्य ह्यॆछॖनऻव्यूख)

**************************

पंचान्ग :-  इन्सानस छु नॖ पानस ताम किंहीं। कोरोनावयरसन द्युत यि हऻविथ तॖ मनुष्य छुनुन वुछान वुछान पथर पऻविथ। सऻरी दाय तदबीर कऺरिथ ति आयि नॖ यि महामऻरी कोबूहस मंज़ वुन्युखताम। कूशिश छि हालांकि जऻरी मगर यॊत ताम अथ महामॏरी लाकम यी चारनॖ तॊताम आसन दय ज़ानि कऻत्याह गरॖ वुजारॖ गऻमॖत्य। अख व्वमेद छि, अख विश्वास छु, अख प्रयास छु यथ प्यठ ॳ़ज़्युक यि इन्सान पनुन पगाह सफल बनावनस मंज़ लऺगिथ छु। मगर यिति प्यॆयि मानुन असि ज़ि दय सॖन्ज़ि यछ़ाय रॊस ह्यॆकि नॖ इन्सान अख क़दम ति कऺडिथ। तस ॳकिस निराकारस प्यठ छुस पनुन अहम् गऻलथ यॆकीन करुन। तऺम्यसुन्द नाव मनस मंज़ थवुन। पताह छॆ नॖ इन्सानस कर, कति, किथॖपऻठ्य, कऺम्यसॖन्दि दऺस्य, क्याह चीज़ ब्रूंठ्य यि। न छु ज़्यॊन पानस ताम तॖ न छु मरुन पानस ताम। येमि महामऻर्य खोच़ॖनोव इन्सान पज़नॖ प्यॆठ, ह्यॆछनोव इन्सान हदॖ ख्वतॖ ज़्यादॖ। इन्सान छु अज़ ज़ॖ रूप दऻरथ पकान यानि स्वकर्म करन वोल तॖ क्व-कर्म करन वोल। अख छु निष्काम बावॖ सॗत्य ज़ुव जान लूकन हुन्द बचावनस मंज़ व्यस्त ब्याख छु क्व-कर्म क्व-वासनायि वॊलॖमुत तॖ ॵक्सीजन, इन्ज्यक्शन, ब्यड, ऐम्बुलैन्स, दवाह, प्लाज्मा बेतरी च़ूरि छ़्यॆपि थद्यन गुर्यन खऺसिथ अगनस द्वगन कॗमथ चऻरिथ आम इन्सानस ज़ख वातनावनस मंज़ मस्त। रंगॖ रंगॖ रंगदार वुछुम यि इन्सान। च़ूर तॖ पऺहरदार वुछुम यि इन्सान। ज़ॖ मास्कॖ लऻगिथ न्येरुन न्यबर सुति यॆलि मजबूरी न्येरनॖच आसि, अथॖ साबनि सॗत्य छलान रोज़ुन, सैनिटयज़रुक इस्तिमाल करान रोज़ुन, अख ॳकिस सॗत्य नॖ लऻरिथ गछ़ुन, खान्दरन व्वछ़ॖबन मंज़ न गछ़नुक मन बनावुन, पनुन पान त्रॊपॖरिथ थवुन, शुर्यन कट्यन हुन्द ख़याल थवुन, बुज़र्गन हुन्द ह्यस थावुन, माजि शारिकायि शर्ण गछ़ुन तॖ तऺमिस अनुग्रह मंगान रोज़ुन।दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी। 

**************************

चूंकि म्यॆ छु पनॖन्यन ॳछन हुन्द यलाज करनावुन, बॖ ह्यकॖ नॖ यि सबक़ कॆंच़स कालस त्वहि ताम वातॖनऻविथ। ज़ानि दय ब्यॆयि कर मेलव। नमस्कार

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

08.05.2021

08.05.2021,वह्यक (वैशाख/ बैसाख) गटॖ पछॖ (कृष्ण पक्ष) बाह (देवादेव) (द्वादशी) (देवादेव) बटॖवार (शनिश्चरवार/शनिवार),श्री सप्तर्षि सम्वत 5097, नक्षत्र उ.भा, राश मीन (चलान) ऋतु बसंत (चलान) द्रठॖपऻन्च़ुक (पंचक) (चलान)

*************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

    महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

          नुंदॖ रॆशॖन्य श्रुक्य

पांच़न वक्तन सऺजदा दिज़े

म्यूठ तॖ मॊदुर खेज़ि नॖ ज़ाथ

मातम ह्यथ द्वह द्वह रुज़े

दुनियहिच लादन हॆज़ि नॖ ज़ाथ

             अर्थात

ही ज़ीवॖ पांच़न वखतन गछ़ि न्यमाज़ि सऺजदॖ करुन। मीठिस तॖ मॊदरिस गछ़ि नॖ छ़ान्डव ज़ांह द्युन। तसॖन्दि दूरिरॖच दग गछ़ि विज़ि विज़ि महसूस करॖन्य। यॆमिकिन्य संसऻर्य वॆश्यव निशि रोज़ख दूर

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             *********

1. हाय करुन (Very black)

2. हाय (Sorrow)

3. हऻथी (Satisfied/Wealthy)

4. हऻर (Mains/Staring/Black bird)

5. हऻज़िम (Digestive)

               मुहावरॖ

1. मु: च़ूरस तॖ रऻछिस बऻज्य वठ

    अ: यॆति प्रथ कांह बे-ईमान 

         आसि

2. मु: च़ूरस फुट ख्वर तॖ पीरस

         मोरुख मुरीद

    अ: बे-ग्वनाहन सज़ा प्यॊन,या,

         बे-बोज हालाथ

3. मु: च़ूरस छय ब्वखछस कुनुय

         कल

    अ: यॆमिस योरकुन रुहजान 

         आसि तस छु नॖ तमि 

         वरऻय ब्यॆयि किंहीं बोज़नॖ

         यिवान

      (पनॖन्य शुर्य ह्यॆछॖनऻव्यूख)

**************************

पंचान्ग :- यि महामऻरी छॆ नॖ कुनि ॳकिस खास ज़ऻच़ मंज़ बऺल्कि प्रथ ज़ऻच़ हॖन्द्य लूख छि आमॖत्य ह्यनॖ। कांह वऻन्स ति छॆ नॖ कांह माने थवान यथ महामऻरी ब्रोंहकनि। द्वदॖ शुर्यव प्यठॖ हतॖ वुहरिस बुडस ताम छि यि महामीरी ज़ाल वाहरऻविथ। ॳकिस सॗत्य छि बऺकिस निवान पनॖनिस ज़दस मंज़। ॳक्य निक्य मऻच़क्रॗलन ॴडरोव सोरुय ब्रह्मांड तॖ सोरुय ज्ञान विज्ञान लॊग खोज करनि ज़ि ॴखॖर यि क्वस बलाय टऺकरेयि ज़ीवस तॖ बीम थोवनस तॖ यादि पदन रूदुस। इन्सानस तॊर फिकिरी ज़ि ॳम्यसॖन्दिस अथस मंज़ छु न किंहीं।  कूशिश छु तोति करान ॳकिस बरोसस प्यठ ज़ि स्यॆदि दाता महा गणेश, मऻज्य शारिका, महावीर, नारायण, शिव शंकर तॖ ब्रह्मा, ईसा मूसा, गुरु ग्रन्थ साहब,यिमन सारिनी यी आर तॖ सऻन्य नावि दी तार तॖ दी असि यॆमि महामऻरी निशि म्वकजार। ज़ॖ मास्कॖ लऻगिथ न्येरुन न्यबर सुति यॆलि मजबूरी न्येरनॖच आसि, अथॖ साबनि सॗत्य छलान रोज़ुन, सैनिटयज़रुक इस्तिमाल करान रोज़ुन, अख ॳकिस सॗत्य नॖ लऻरिथ गछ़ुन, खान्दरन व्वछ़ॖबन मंज़ न गछ़नुक मन बनावुन, पनुन पान त्रॊपॖरिथ थवुन, शुर्यन कट्यन हुन्द ख़याल थवुन, बुज़र्गन हुन्द ह्यस थवुन, माजि शारिकायि शर्ण गछ़ुन तॖ तऺमिस अनुग्रह मंगान रोज़ुन। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

07.05.2021

07.05.2021, वह्यक (वैशाख/ बैसाख) गटॖ पछॖ (कृष्ण पक्ष) काह (देवादेव) (एकादशी) (देवादेव) शॊकुरवार (शुक्रवार/ जुम्मा/भार्गवार) श्री सप्तर्षि सम्वत 5097, नक्षत्र पू.भा., राश मीन (सुबहॖचि 5.55 बजि प्यठॖ) ऋतु बसंत (चलान) द्रठॖपऻन्च़ुक (पंचक) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

           नुंदॖ रॆशॖन्य श्रुक्य

पानय पुज तॖ पानय कसाब

पानय पानस यिवान ग्राख

पानय पानस ह्यवान हिसाब

बॖ पानय माज़ तॖ पानय श्राख

               अर्थात

सु दय छु पुज ति पानय तॖ क्वलाब ति। पानय पानस छिस ग्राख ति यिवान। गाहे छु पऻन्य पानस हिसाब ह्यवान, गाहे छु माज़ ति श्राख पानय।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             **********

1. हांकल (Iron chain)

2. हांगुल (Stag)

3. हांगुल ह्यंग (Horn of stag)

4. हावुन (To show)

5. हाहाकार (Consternation/Sound of distress)

                 मुहावरॖ

1. मु: च़ॊट छि द्वयव अथव बनान

    अ: इतिफ़ाकस छु ताक़त, या,

         अख तॖ अख गव काह

2. मु: च़ॊट गऺयि क्वलि तॖ राहि 

         ख्वदा

    अ: रोवमुत चीज़ खऻराथ करुन

3. मु: च़ून्ठ छु च़ून्ठस वुछिथ रंग

         रटान

    अ: इन्सानस छु ब्यॆयिसुन्द 

         असर प्यवान,या,सॊहबतस

         छु असर

      (पनॖन्य शुर्य ह्यॆछॖनऻव्यूख)

**************************

पंचान्ग :- यॆलि क्वकर्म कऺरिथ तम्युक फल असि नऺसीबॖ रूप छु ब्रोंठकुन यिवान, ॳस्य छि पायस प्यथ पानस साम ह्यवान। साम ह्यवान ह्यवान हीनॖ बावॖ पऻदॖ सपदिथ छि दयस कुन रजू सपदान। अमि विज़ि छिनॖ ॳस्य पनुन पान पुजि रूप अथस क्यथ श्राख ह्यथ क्वलाबस कुन पनॖनुय पान अवेज़ान त्रऻविथ तिकॖ तिकॖ करान। तानॖ तानॖ कऺरिथ छि पतॖ तिमनॖय कॖनान यिमव वथ आसि डऻज्यमॖच़। याने ॳन्द्रिम्यन च़ूरन छु वनि कडान। क्व-कर्म क्व-वासनायि ॳस्य छि वऺल्यमॖत्य, पापव शापव छि कऺल्य कऺर्यमत्य, स्यॆदि दाता स्यॊद पकनावे, थव च़ॖ बखत्यन प्यठ पनुन साये, महागणेशा ॳस्य बिहिथ छि च्यानि शाये। महामऻरी वुछिथ ति छिनॖ कॆंह पायस प्यवान। बदकऻरी हॖन्दिस नशस मंज़ छुनॖ तिमन किंहीं दऺछिनय खॊवॖर्य नज़र यिवान। सिरिफ रॊपियि। अगनस द्वगन, द्वगनस च़्वगन, च़्वगनस ॴठॖगनॖ पनॖनिस चीज़स म्वल खारान रोज़ान तॖ इन्सान सॖन्ज़ि मजबूरी हुन्द नाजऻयिज़ फऻयदॖ तुलान रोज़ान यि मऺशरिथ ज़ि तिमन ति  छु पगाह मरुन। ज़ॖ मास्कॖ लऻगिथ न्यबर नेरुन सुति यॆलि मजबूरी मंज़ नेरुन आसि, अथॖ साबनि सॗत्य छलान रोज़ुन, सैनिटयज़रुक इस्तिमाल करान रोज़ुन, अख ॳकिस सॗत्य नॖ लऻरिथ गछ़ुन, खान्दरन व्वछ़ॖबन मंज़ न गछ़नुक मन बनावुन, पनुन पान त्रॊपॖरिथ थवुन, शुर्यन कट्यन हुन्द ख़याल थवुन, बुज़र्गन हुन्द ह्यस थावुन, माजि शारिकायि शर्ण गछ़ुन तॖ तऺमिस अनुग्रह मंगान रोज़ुन। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

06.05.2021

06.05.2021 वह्यक (वैशाख/ बैसाख) गटॖ पछॖ (कृष्ण पक्ष) दऺहम (देवादेव) (दशमी) (देवादेव) ब्रसवार (ब्रहस्पतिवार/गुरुवार/ वीरवार) श्री सप्तर्षि सम्वत 5097, नक्षत्र शत, राश कुम्भ, (चलान) ऋतु बसंत (चलान) द्रठॖपऻन्च़ुक (पंचक) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

    महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

            नुंदॖ रॆशॖन्य श्रुक्य

बॖ छुस अकुय सॗत्य गॊछ़ुम यार

यारस सॗत्य दमॖ दमॖ पकॖ

यार नय डेंशन गुल गछ़्यम ख़ार

यॆति म्योन यार तति म्योन मकॖ

              अर्थात

ही ज़ीवॖ च़ॖ छुख कुन, यि छ़रॆर च़लिहे तेलि यॊद च़ॖ मेलॖहऻख पनॖनिस यारस युथ तस सॗत्य लरि-लोर पऺकिथ करहऻख पनॖन्य ज़ान। यॊद नॖ च़ॖ पनुन पान प्रज़ॖनावख पोशॖ रूप मन गछ़ि ख़ार। डेंशहऻन सुय छुय च्योन मकॖ।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             ***********

1. हामॖ (A kind of weeds)

2. हान (Accuse/Charge/Impeachment/Imputation)

3. हानुन (To become cold/To shrink with cold/To freeze/To be chilled)

4. हऻन्ठ (Barren/Unproductive/Unfruitful)

5. हांछ़ (Allegation/Blemish/Taint/To Censure/Blame)

                मुहावरॖ

1. मु: छ़ॊटिस फे़ल वॊटिस सॊम्ब

    अ: छ़ॊटिस इन्सानस छि 

         ख्वडॖफॆचि ज़्यादॖ आसान

2. मु: च़ॊर गव ज़ि खॊर गव

    अ: ज़्यादॖ आसनस छॆ नॖ शूब

         कॆंह

3. मु: च़ॊर अयाल गव बॊड 

         जंजाल

    अ: बऺडिस अयालस छि बऺड्य

         खर्चॖ आसान

      (पनॖन्य शुर्य ह्यॆछॖनऻव्यूख)

**************************

पंचान्ग :- पनुन पान छु बचावुन। महामऻरी, य्वस नच़ान छि पखॖ वऺहरिथ, छुनॖ पनुन पान हावुन। पनॖन्यन गरन मंज़ बिहुन तॖ यॊदवय मजबूरी मंज़ गरॖ न्यबर प्यव न्येरुन ति, ज़ॖ मास्कॖ लऻगिथ न्येरुन। कुनि चीज़स सॗत्य नॖ छिकुन। गरॖ वापस वऻतिथ अथॖ साबनि सॗत्य छलान रोज़ुन। सैनिटयज़रुक इस्तिमाल करान रोज़ुन। अख ॳकिस सॗत्य नॖ लऻरिथ गछ़ुन। खान्दरन व्वछ़ॖबन मंज़ न गछ़नुक मन बनावुन। साल ह्यकव पतॖ ति ख्यथ मगर महामऻरी हॖन्दिस ज़ालस मंज़ नॖ ह्यनॖ युन। शुर्यन कट्यन हुन्द ख़याल थवुन। बुज़र्गन हुन्द ह्यस थवुन। व्हाटसापन प्यठ छि वुछान ज़ि प्रथ कांह इन्सान छु पनुन कांह न्वसखॖ हावान। सऻरी छि पनॖनि पनॖनि आयि वनान रोज़ान ज़ि क्याह ख्यॊन तॖ क्याह नॖ ख्यॊन। म्यॊन मशवरॖ छु ज़ि डाक्टरस सॗत्य कथ कऺरिथ यी सु वनि ती करुन। ग्रॆन्दि रॊस छि लूख मरान वुन्यक्यनस। व्यछ़य छि वुनि, ब्यडन हॖन्ज़, आक्सीजनॖच, प्लाज़माहॖच, इन्जकशनन हॖन्ज़, दवाहन हॖन्ज़। अस्पतालन हॖन्ज़। तीमारदारन हॖन्ज़। कॆंह नवजात शुर्य गऺयि यॆतीम। तिमन छुनॖ वुछनवोल कांह, तुलनवोल कांह। ज़ानि दय कॊत ताम छु असि यि व्वबाह बूगुन। मगर ह्यमथ छि थवॖन्य। युपिस छु शुप बुथि थवुन। माजि शारिकायि छु शर्ण गछ़ुन। तसुन्द अनुग्रह तॖ अथरॊट मंगान रोज़ुन। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

05.05.2021

05.05.2021,वह्यक (वैशाख/ बैसाख) गटॖ पछॖ (कृष्ण पक्ष) नवम (देवादेव) (नवमी) (देवादेव) ब्वदॖवार (बुद्धवार), श्री सप्तर्षि सम्वत 5097,नक्षत्र धनि, राश कुम्भ (चलान) ऋतु बसंत (चलान) द्रठॖपऻन्च़ुक (पंचक) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

            नुंदॖ रॆशॖन्य श्रुक्य

मनस ख़य कास ज़न आईनस

तवॖ ज़नस गछ़ी ज़ऻनी ज़ान

थलि थलि क्या छुय शुर्य म्वखॖ पानस

मरनस ब्रोंठ मर सुय छुय ज्ञान 

               अर्थात

हे ज़ीवॖ पनॖनिस मनस कर मल तिथय पऻठ्य दूर यिथॖ ॳस्य ॴनॖ छिन साफ़ करान। श्वद मनॖ ह्यॆकि मनुष्य तस दयस सॗत्य ज़ान कऺरिथ। दय गछ़ि हर हमेशॖ पानस सॗत्य थवुन यॆमि सॗत्य दय लोल ललविथ तॖ रगन सनिरऻविथ बासि  मनुष्यस हर च़िह्य पनुन पान मरान तसॖंदिस लोलस मंज़। असली ज्ञान छुय सुय। 

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            **********

1. हाख (Green sweeds)

2. हाख बतॖ पोशुन (To maintain livelihood)

3. हाख बतॖ ख्यॊन (To eat for

survival/To have minimum requirements)

4. हाल (Hall/Condition)

5. हालव (Locust)

                 मुहावरॖ

1. मु: छ़ॊह मारुन दॊह वुछिथ

    अ: मॊकॖ वुछिथ फऻयदॖ तुलुन,

         या, वख वुछिथ यान्यम 

         करुन

2. मु: छ़ॏकस छु फॏख वसान

    अ: दज़ॖ बुज़़ लदस छि

         ॴखरस रुसवऻई गछ़ान

3. मु: छ़ॊपॖ छय रॊपॖसॖन्ज़ करखय

         तॖ स्वनॖसॖन्ज़

    अ: छ़ॊपि छु वारियाह फऻयदॖ तॖ

         ज़्यव गिलवनस छु लान्ज,

         या, ज़्यादॖ कथॖ करनॖ सॗत्य

         ह्यकन ग़लती ति गऺछ़िथ

       (पनॖन्य शुर्य ह्यॆछॖनऻव्यूख)

**************************

पंचान्ग:- धर सऻबन बूज़ तसुन्द न्यॆचुव तॖ न्वश छि अस्पतालस मंज़ दऻखॖल कोविड ब्यमारि मूजूब। तस गव नॖ बर्दाश्त। ह्यॆह गोस तॖ त्रऻविन्य प्राण। शव तुलनवोल ओस नॖ कांह। गरस मंज़ ॴसॖस ज़नान तॖ न्यॆचिवॖ सॖन्ज़ॖ ज़ॖ ल्वकचि तॖ मोसूम कोरि। यिम सऻरी दपान आयि कोविडस मंज़ वलनॖ। दुर्गा प्रसाद धर तॖ ॳम्यसुन्द अयाल ॴस्य रोज़ान क्रॏसिंग रिपब्लिकॖ, गाज़ियाबादॖ पंचशील अपार्टमॆंटस मंज़। धर सऻबस गऺयि वुनि त्रॆ च़ोरय द्वह मूद्यमॖतिस ज़ि ऊतरॖ शामस दपान गुज़र्योस न्यॆचुव। धर सऻबॖन्य कूर ॴस आमॖच़ बरेली प्यठॖ मऻल्यसॖन्ज़ ख़बर बूज़िथ तॖ बऻयसॖन्दि मरनॖच थऺवहऻस नॖ ख़बर। महामऻरी नी राथ धर सऻबॖन्य ज़नान ति यॆमि संसऻर्य। कॆंह द्वह ब्रोंह धर सऻब, ऊतरॖ धर सऻबुन साहबज़ादॖ तॖ राथ धर सऻबॖन्य ज़नान। गरस मंज़ वॊथ कोहराम। यि कॊ्हराम हॖन्यव तमि सातन ज़्यादॖ यॆलि कोरि बूज़ ज़ि तऺम्यसुन्द बोय ति छु स्वर्गस गोमुत अस्पतालस मंज़। वुजारॖ गव गरॖ वुछान वुछान। त्रै मोतॖ अख ॳकिस पथ। यि गव पऺज्य पऻठ्य प्रलय। न्वश छि वुनि अस्पतालस मंज़ॖय तॖ तऺमिस निश युन गछ़ुन छु मन्नाह। गरस मंज़ ओस नॖ कांह मर्द युस धरबायि शुमशान गाठस ताम वातॖनाविहे। ओरॖ योर फ़ोन कऺय् कऺर्य आयि कॆंह नवजवान तॖ वातॖनऻवॖख धरबाय शुमशान गाठस ताम तॖ दपान ऐम्बुलॆंसस सॗत्य ओस ल़्वकुट लऺडकॖ यानि कोरि हुन्द न्यॆचुवॖय योत। ल्वकचॖ ज़ॖ कोरि न्वशि हॖन्ज़ॖ दपान आसॖ रॊबूद गऻमच़ॖ तॖ वुछान रोज़ॖ मोसूम चॆश्यमव क्वदर्यतुक क़हर। अस्पताल वाल्यव करनोव धर सऻबनिस न्यॆचविस ॳन्दीय दाह संस्कार। ब्यॆयि ति बोज़ॖ भयानक तॖ त्रहरवुनि खबरॖ यिछ़य यिछ़य तॖ चाख छु सीनस गछ़ान यि बूज़्य बूज़्य। नरि च़ऺट्य छि गऻमॖत्य कऺरिथ छिनॖ ह्यकान कॆंह। बदकॖसमथ छि मरनवऻल्य यिम अपमृत्यु मरान छि। ख्वशकॖसमथ  छि तिम कार्यकर्ता यिम वऺसीलॖ बऺनिथ यिवान छि बेवऺसीलन। पनॖनि पानुक ख़याल थवुन, पनुन पान त्रॊपॖरिथ थवुन, शुर्यन कट्यन हुन्द ख़याल थवुन, बुज़र्गन हुन्द ह्यस थावुन, माजि शारिकायि शर्ण गछ़ुन तॖ तऺमिस अनुग्रह मंगान रोज़ुन। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

 नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

04.05.2021

04.05.2021, वह्यक (वैशाख/ बैसाख) गटॖ पछॖ (कृष्ण पक्ष) ॴठम (देवादेव) (अष्टमी) (देवादेव) बॊम्वार (मंगलवार) श्री सप्तर्षि सम्वत 5097, नक्षत्र श्रवण, राश कुम्भ (रऻच़ हॖन्ज़ॖ 8.43 बजि प्यठॖ),ऋतु बसंत (चलान), द्रठॖपऻन्च़ुक (पंचक) छु ॳज़्यकि प्यठॖ शरु

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

        महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             नुंदॖ रॆशॖन्य श्रुक्य

बुगि कंदि छावॖहम हर्यन

वुछख नॖ मनॖ तुलर्यन मांछी

बॊम्बरा तॖ रोज़ि नॖ थर्यन

नाहकॖ छन्यन लर्यन करव रऻछी

            अर्थात

अज्ञऻनियस छावि दय बठॆन कुन यॆलि मन तुलर्यन हॖन्द्य पऻठ्य वुछि वुम्बरि माछ बनऻविथ पानॖ खऻली आमुत। बॊम्बुर (आत्मा) ति दरि नॖ पोशॖ रॊस थर्यन प्यठ। नाहकय छि ॳस्य पतॖ छ़र्यनॖय लर्यन रऻछ करान यॆलि स्वक्रॆय करनॖ रॊस ज़िन्दॖ रोज़ुन छु बेमकसद

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            ********

1. हार मानॖन्य (To accept defeat)

2. हारॖ (Money

3. हारॖवोल (Wealthy)

4. हारुन (Unsuccessful/To lose/To fail/To abandon)

5. हारमोनियम (Harmonium)

                 मुहावरॖ

1. मु: छ़ॊर अथॖ छुनॖ अच़ान 

         ॴसस ति

    अ: लाचऻरी छि इन्सानस

         मारान

2. मु: छ़ॊप गाव गुदऻम्य खाव

    अ: ख़ामोश इन्सान छु वुटुकुर

         आसान

3. मु: छ़्यॊट हय ख्यॆयज़ि मेठि

         कि तमाह

    अ: कऻन्सि पतॖ पतॖ पकनस

         गछ़ि कॆंह फऻयदॖ मेलुन

       (पनॖन्य शुर्य ह्यॆछॖनऻव्यूख)

**************************

पंचान्ग :- रसॖ रसॖ रिशतन छ़्यनान गऺयि तॖर, कति रूद मामतॖर तॖ प्वफतॖर। तॖरि सॗत्य मीज्य तॖर, ज़ानव गऺनीमथ क्याह पताह कल हो न हो। कथ बाथ कऺर्यतवॖ खुलॖ डुलॖ पानवुन्य, क्याह पताह कल हो न हो। कऺशीरि प्यठॖ च़लनॖ पतॖ ॴस्य ॳस्य कऻशिर्य बटॖ वैसे ति छ़ऺकरनॖ आमॖत्य तॖ यिम द्वयत्रॖह वऺरी वऻत्य असि छ़ारान अख ॳकिस। बालॖ यपोर यिनॖ पतॖ गयेयो गाम शहर कुन तॖ सऻरी कऻशिर बटॖ ॴस्य नॖ व्यच़ान कुनि ज़ि गाम म्यूल शहरस सॗत्य। मगर यथ कुन गछ़नस मंज़ ज़न दूरेययि ॳस्य ज़्यादय पाहन। यॆमि महामऻरी नी ॳस्य सऻरी अख ॳकिस निश दूर कऺरिथ। हालाथ गऺयि स्यठहॗय नोज़ुक। कोविड-19 -हन ॳन्य पनॖनिस ज़दस मंज़ सऻरी लूख तमि त्रायि ज़ि न थॊवुन असि कऻन्सि निश गछ़नस वार तॖ न रूद कऻन्सि असि निश यिनस वार। प्यठॖ थॊवुन मार सॗत्य। हालांकि त्राहि त्राहि छि सऻर्यसॖय हिन्दुस्तानस मंज़ करान लूख, सानि हकॖ गव म्यॆ बासान पज़नॖ प्यॆठी। ॳस्य रूद्यमॖती कॗत्याह ॴस्य, तथ मंज़ ति गऺयि छ़ॊकान ॳस्य तेज़ रफतारि मंज़। दीदार छिनॖ ह्यकान कऺरिथ मरन वाल्यन हुन्द। फोनन प्यठ कम कथॖ करव, कऺमिस सऺत्य करव, कमि बुथि करव, समॖज छुनॖ कॆंह ति यिवान। सोंचान छुस ज़ि अगर यि मोबाईल ति आसिहेनॖ, सऻन्य दशा किछ़ आसिहे। खऻर! पानस ताम नॖ कॆंह। रऻछ छि पनॖनिस पानस करॖन्य तॖ पनॖनिस अयालस करॖन्य। ज़ॖ मास्कॖ लऻगिथ न्येरुन न्यबर सुति यॆलि मजबूरी न्येरनॖच आसि, अथॖ साबनि सॗत्य छलान रोज़ुन, सैनिटयज़रुक इस्तिमाल करान रोज़ुन, अख ॳकिस सॗत्य नॖ लऻरिथ गछ़ुन, खान्दरन व्वछ़ॖबन मंज़ न गछ़नुक मन बनावुन, पनुन पान त्रॊपॖरिथ थवुन, शुर्यन कट्यन हुन्द ख़याल थवुन, बुज़र्गन हुन्द ह्यस थावुन, माजि शारिकायि शर्ण गछ़ुन तॖ तऺमिस अनुग्रह मंगुन। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

03.05.2021

03.05.2021, वह्यक (वैशाख/ बैसाख) गटॖ पछॖ (कृष्ण पक्ष) सतम (देवादेव) (सप्तमी) (देवादेव) च़ऺन्दॖरवार (सोमवार) श्री सप्तर्षि सम्वत 5097, नक्षत्र उ.षा., राश मकर (चलान) ऋतु बसंत (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

    महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

          नुंदॖ रॆशॖन्य श्रुक्य

च़ॖय दिवॖ दरथस च़ॖय गरथस पज़ख

च़ॖय दिवॖ क्रंज़न हुन्दुय छांफ

च़ॖय दिवॖ ठॆन्यव रॊस्तुय वज़ख

कुस छुय पॊन्य तॖ कुस छुय पाफ

              अर्थात

ही दयि च़ॖय छुख ज़मीन तॖ आकाशस मंज़ व्यराजमान। क्रंज़न हुन्द आकार दिथ छुख च़ॖ ज़ीवुथ दिनॖवोल। ठस ठिसॖ रॊस वऺज़िथ पाफ तॖ पॊन्य ज़ाननवोल ति छुख च़ॖ पानय।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              *********

1. हापुथ (Bear)

2. हापथ न्यॆन्दॖर (Sound sleep)

3. हापथ यारज़ (Risky friendship)

4. हाट फेल ( Heart failure)

5. हार (Failure/Garland/Necklace)

                मुहावरॖ

1. मु: च़्यथ रछि तॖ वऻन्लिज तछि

    अ: ज़बऻन्य तसला द्युन तॖ 

         ॳन्दॖर्य ज़ख वातॖनावुन

2. मु: च़्वन पऺहरन कस दॊद च़ॊंग

    अ: दौलथ छॆ नॖ पोशवॖन्य

3. मु: छ़ॊटि बरॖ व्वटॖ बोर

    अ: आसान वथ छ़ान्डॖन्य

     (पनॖन्य शुर्य ह्यॆछॖनऻव्यूख)

**************************

पंचान्ग:- महा गणेशा ॳस्य बिहिथ छि च्यानि शाये, थव च़ॖ बखत्यन प्यठ पनुन साये। महामऻरी नी कम कम वीर, बेबस बेकस ॳस्य छि बे-पीर, कर सबीलॖ सोन ॳस्य शर्ण च़्यॆ आये, थव च़ॖ बखत्यन प्यठ पनुन साये। व्वंय छॆ नॖ ब्यॆयि कांह ब्रांथ। म्यॆ छु बासान ज़ि सऻरी दीवी दीवताह छि वुन्यक्यनस डाक्टरन, डाक्टरबायन, नऺर्सन तॖ कम्पौंडरन  मंज़ पानॖ अवतार बऺनिथ आमॖत्य तॖ ब्यमारन थॊद वऺथ्य वऺथ्य यलाज करनस मंज़ लऺग्यमॖत्य। पनॖनि पानुक ख़याल मऺशरऻविथ छि अस्पतालन मंज़ ॴठ पऺहर यानि रातस दॊहस व्यस्त कोविड-19 ब्यमारन बचावनॖच कूशिश करान। हालांकि शर्मंन्दॖ छि तिम ति, ति क्याज़ि व्यछ़य छि ब्यडन हॖन्ज़, आक्सीजन सिलैन्डरन हॖन्ज़, दवहऻन हॖन्ज़, प्लाज्मा न मेलनॖच। सॗ्त्य सॗत्य छि तिम ति भगवान रूपस मंज़ वुन्यक्यनस वुछनस तल यिवान यिम बे-सबीलन सबीलॖ बऺनिथ गरॖ वातनावान छि ख्यन-च्यन, दवा तॖ हवा। दय दीनख ह्यमथ तॖ रुत फल यिछ़न रॖच़न काम्यन बापथ। यि छु अकि तरफुक नज़ारॖ। दॊयिमि तरफॖ छि तिम शेतान तॖ बद-बखॖत ति असि ॳन्द्य पऺख्य नज़र यिवान यिम लालचॖकिस दलदलस मंज़ फऺट्यमॖत्य छि तॖ रॊपियि हुन्द चीज़ हतस रॊपियस कॖनान छि। तिमन छु पनुन ज़मीर गॊलमुत, इन्सऻनियथ रऻवमॖच़, पनुन मरुन मऺशिथ गोमुत तॖ मजबूरी हुन्द नाजऻयिज़ फऻयदॖ तुलनस मंज़ पनुन बजर ज़ानान। तिमन करि नॖ भगवान माफ, न यॆति तॖ न तति। नेको नेक कर बद लबि पानय। महामऻरी छि च़ऺलरावॖन्य। ज़ॖ मास्कॖ लऻगिथ न्यबर नेरुन सुति यॆलि मजबूरी न्येरनॖच आसि, अथॖ साबनि सॗत्य छलान रोज़ुन, सैनिटयज़रुक इस्तिमाल करान रोज़ुन, अख ॳकिस सॗत्य नॖ लऻरिथ गछ़ुन, खान्दरन व्वछ़ॖबन मंज़ न गछ़नुक मन बनावुन, पनुन पान त्रॊपॖरिथ थवुन, शुर्यन कट्यन हुन्द ख़याल थवुन, बुज़र्गन हुन्द ह्यस थावुन, माजि शारिकायि शर्ण गछ़ुन तॖ तऺमिस अनुग्रह मंगुन। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

02.05.2021

02.05.2021, वह्यक (वैशाख/ बैसाख) गटॖ पछॖ (कृष्ण पक्ष) शॆयम (देवादेव) (षष्ठी) (देवादेव) आथवार (रविवार/ऐतवार) श्री सप्तर्षि सम्वत 5097, नक्षत्र पू.षा, राश मकर (दुहचि 2.46 बजि प्यठॖ) ऋतु बसंत (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             नुंदॖ रॆशॖन्य श्रुक्य

नुन्द्यन सॗत्यन संज़ करान रऺस्यज़े

ज़न दिज़े शाह बुलगि मंज़

डॗंठ्यन सॗती संज़ करान च़ऺस्यज़े

ज़ांह ॳच़िज़ि नॖ तमन्यन बानन मंज़

           अर्थात

नुंदॖ ऱयॆष्य सऻबनि त्रायि पऺकिथ दिज़ि शाह नऻरिस दॊंग तॖ नाव रूप मालव गछ़ि ज़ि दय लोलस प्यठ देवानॖ। क्वसंगियन हॖन्ज़ि त्रायि पकनॖ ब्रोंठ गछ़ि शर्मि सॗत्य च़सुन। दऻगी इन्सानन सॗत्य गछ़ि नॖ ज़ांह मॆत्रुथ करुन यॆमि संसऻर्य।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             *********

1. वाकॖ (Incident/Event/Happening/Occurrence)

2. वाक्/वाख (Sayings)

3. वाल (A hair/To bring down)

4. वान (Shop)

5. वानॖवोल (Shop keeper)

                मुहावरॖ

1. मु: स्वनॖ पोश ति तार तॖ व्यनॖ

         पोश ति तार

    अ: प्रथ कांह कऻम छि अंद

         वातान

2. मु: स्वनि हॖन्ज़ प्वन्द

    अ: हंगॖ तॖ मंगॖ कॖठ कडॖन्य

3. मु: सूरस मंज़ सॖच़न

    अ: यि नॖ आसऻनी सान अथि 

         यी

      (पनॖन्य शुर्य ह्यॆछॖनऻव्यूख)

**************************

पंचान्ग:- नेरान अकि फिरि फेरान नॖ वापस, फ़ेरान मगर तम्यकुय कॆंच़स कालस। नम गछ़ान ॳछ फ्युर लगान यॆलि ख़यालस, दमफुट्य गछ़ान लगान ब्यॆयि तऺथ्य जंजालस। मथ छु गछ़ान ज़ि मोबाईलस लागव नॖ अथ ति, ति क्याज़ि यान्य सुबहस न्यॆन्द्रि वऺथित मोबाईलस मंज़ अज़कल वुछान छि, कुनि नतॖ कुनि ग्रुपस मंज़ छि कांह नतॖ कांह मातमी ख़बर बुथि यिवान तॖ मन छु शिठान। मन छु दुखी गछ़ान यि वुछिथ ति ज़ि सऻरी छि कॆंह नतॖ कॆंह छ़ान्डान रोज़ान, ब्यड अस्पतालस मंज़, ॵक्सीजन सिलैंडर, प्लाज्मा, इन्ज्यक्शन रामदेवसवीर, जाय शुमशानस मंज़, कार्यकर्ता शवस अन्तिम संस्कार करनॖ बापथ, अड्यन छॆ नॖ सूरथ अस्पतालॖच बिल बरन बापथ, अड्यन छि वुछान गरस मंज़ सऻरी कोविड-19 महामऻरी रऺट्यमॖत्य, कऻम करनस सॊम्ब नॖ कांह गरस मंज़। अड्यन जायन ॳड्य बऻच़ अस्पतालस मंज़, ॳड्य बऻच़ गरस मंज़, न हुमिस वातनवोल कांह तॖ न यॆमिस वातनवोल कांह। पनॖन्यकिन्य छि दपान सकारात्मक सोंचहऻव मगर महामऻरी नी यि सोंच द्यमाग मंज़ॖ कऺड्यथॖय। बोज़ान ओसुस ज़ि ॳस्थी विसर्जित करनॖ बापथ छॆ नॖ दऺर्यावॖ गाठन प्यठ जायी मेलान। प्रथ कांह गाठ प्रथ ॳकिस जायि यॆति या हुति छि आवॖर्य। शुमशान गाठॖ वऻल्य छिनॖ ॳस्थी दिवान शिठनॖ ति, ति क्याज़ि दाह संस्कार करनावॖनॖ बापथ छि लऻन लऺगिथ। टी वी चन्नलव प्यठॖ पज़ि युन हावनॖ अज़कल ज़ि कथ अस्पतालस मंज़ कऻत्याह ब्यड ह्यकन मीलिथ, कथ जायि ह्यकन ॵक्सीजन सिलैंडर मीलिथ, प्लाज़मा कति ह्यॆकि मीलिथ। बकाया खबरव ख्वतॖ छि यिछ़ॖ खबरॖ लूकन ताम वातॖनावॖन्य स्यठाह ज़रूरी, म्यॆ बासान। पनुन ख़याल थवुन, ज़ॖ मास्कॖ लऻगिथ न्येरुन न्यबर सुति यॆलि मजबूरी न्येरनॖच आसि, अथॖ साबनि सॗत्य छलान रोज़ुन, सैनिटयज़रुक इस्तिमाल करान रोज़ुन, अख ॳकिस सॗत्य नॖ लऻरिथ गछ़ुन, खान्दरन व्वछ़ॖबन मंज़ न गछ़नुक मन बनावुन, पनुन पान त्रॊपॖरिथ थवुन, शुर्यन कट्यन हुन्द ख़याल थवुन, बुज़र्गन हुन्द ह्यस थावुन, माजि शारिकायि शर्ण गछ़ुन तॖ तऺमिस अनुग्रह मंगुन। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

****************"*********

नऺविव तॖ फॊलिव

 भूषण कौल"दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)