09.08.2020

09.08.2020, भऻद्रप्यथ (भाद्र) गटॖ पछॖ (कृष्ण पक्ष) शॆयम (षष्ठी) आथवार (रविवार/ऐतवार), श्री सप्तर्षि सम्वत 5096, राश मेष (शाम 7.5 बजि प्यठॖ), तॖ द्रठॖपऻन्च़ुक (पंचक) समाप्त, ऋतु वऺहरात (वर्षा/बरसात) (चलान)...अज़ छि चन्द्र षष्ठी ति

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव

**************************

      महामारी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

            लल वाक्

लोलॖकि व्वखलॖ वऻन्लिज पिशिम

क्वकल च़ऺज़िम तॖ रूज़ॖस रसय

बूज़ॖम तॖ ज़ऻजिम पानस च़ॖशिम

कव ज़ानॖ तव सॗत्य मरॖ किनॖ लसॖ

          ************

अर्थात:- प्रभु प्रेम की ओखली में अपने हृदय को पीसा। ऐसा करके मन से बुरे विचार समाप्त हुए और मुझे शान्ति मिली। इसे भुनकर स्वयं ही इसे चूस लिया, अब मुझे ज्ञात नहीं कि इससे मरूंगी या जियूंगी।

भावार्थ:- (वासनाओं का त्याग करके अपने आराध्य के साथ प्रेम रखना तथा इसी प्रभु प्रेम में व्यस्त  रहना आत्मज्ञान प्राप्ति के लिए श्रेयस्कर है। जिज्ञासु साधक के लिए अनिवार्य है कि वह उठते बैठते खाते पीते चलते सोते जागते व संसारी काम करते समय भी अपने आराध्य का ही ध्यान करें। यह क्रिया सरल नहीं इसके लिए जिज्ञासु मन चाहिए।

**************************

        मुहावरॖ (दऺपिथ कऻशुर)

1. मु: हाकॖ च़ूरस गलि चपाथ

    अ: युथ जुरुम त्युथ सज़ा, या

         लॊक्चि च़ूरि ल्वकटुय सज़ा

2. मु: हिरि खसान खिरॖ टऻक्य

    अ: पानय कथ करॖन्य तॖ वनॖन्य

          या अफ़वा फऻलावॖन्य

3. मु: ह्यॊत कऺम्य तॖ द्युत कऺम्य

    अ: नखॖ वालनस नॖ खहऻयिश

         आसॖन्य, या यॆति नॖ प्रॖछ़गऻर

         आसि

**************************

पंचान्ग:- ग़रीबव दरेयि रोज़ॖ द्वह गऺयख बऺड्य। कऻशिर बटव छु अख मंदर बनोवमुत कश्यप विहारस मंज़। कश्यप विहार छु प्यवान नोयडाहस मंज़ गौड सिटी प्यठॖ ज़ॖ-ढाई किलोमीटर अंदर ॳकिस ल्वकॖट म्वकॖट बऺस्ती मंज़। मंदर छु आमुत बनावनावनॖ दपान कऻशिर बटव यिम अथ अलाक़स मंज़ बसनि गऺयि 1990-तस मंज़ यॆलि तिमन कऺशीरि प्यठॖ च़लुन प्यव ततिकि आतंकवादॖ तॖ क़त्लिआम मूजूब। चूंकि मंदरस ताम वातनस छॆ नॖ वथ ठीख, अथ ॳन्द्य पऺक्य लूख छि शायद पस पायिक, कऻशिर बटव यॊदवय मकान बनऻव्य ग्वडॖ ग्वडॖ मजबूरी मंज़ मगर मुस्तकॖल तोर पऻठ्य यिमन मकानन मंज़ रोज़ुन सपुद नॖ मुम्किन तॖ तिम गऺयि मकानॖ ॳती त्रऻविथ ब्यॆयन ब्यॆयन जायन रोज़नि। मंदर छु बन्योमुत, मंदरस मंज़ लूकन हुन्द आव गव छु स्यठाह कम, याने दपान न आसनस बराबर। मंदरॖकि रख-रखावॖ बापथ दपान छि यिवान माहानॖ क्याहताम काह-बाह शत रॊपियि ह्यनॖ तिमनॖय बटॖ गरन निशि, यिमव अथ बऺस्ती मंज़ मकानॖ छि बनऻव्यमॖत्य तॖ यिहिन्ज़ ग्रन्द छि प्यॆठ्य प्यॆठ्य शीथ-पांच़शीथ। मंदरस मंज़ छु अख गुरु जी ति आमुत थावनॖ, युस दपान छु शायद गोरखपुरुक रोज़नवोल। तऺमिस कऻशुर कर्म काण्डुक कोताह ज्ञान छु, दय ज़ानि। ॳमिस गुरु जियस छख ॳथ्य मंदरस मंज़ रोज़नॖच ति व्यवस्था कऺरमॖच़। अमि मंदरॖच हालथ छि दयनीय दपान। युस ट्रस्ट कऻशिर्य बटन हुन्द बनावनॖ आमुत छु, तिम किथॖ पऻठ्य छि अमि मंदरुक हिसाब-किताब चलावान, यि आसि तिमनॖय खबर। म्यऻन व्यनती छि पनॖनिस कऻशिर समाजस कुन ज़ि चूंकि यि मंदर छु निर्माण सपदुमुत तॖ अम्युक रख रखाव करुन छु व्वंय सोन फ़र्ज़ बनान, अत्यक्यन बटन कॆंच़न प्यठॖय गोछ़ नॖ ब्रख चन्दन प्यठ प्यॊन, कॆंह तिछ़ व्यवस्था गऺछ़ यिन्य करनॖ युथ मंदरुक कार्यक्रम ति रोज़िहे चलवुन तॖ लूकन हुन्द आव-गव ति बडिहे। महामऻरी हुन्द प्रकोप छु वुनि कलस प्यठ मंडरावान। भगवान शंकर गछ़ि पनुन अनुग्रह करुन।

**************************

कऻशुर ह्यॆछव कऻशुर परव

कऻशिर्य पऻंठ्य पानॖवुन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)

08.08.2020

08.08.2020 भऻद्रप्यथ (भाद्र) गटॖ पछॖ (कृष्ण पक्ष) पऻन्च़म (पऺचमी) बटॖवार (शनिवार/शनिश्चरवार) श्री सप्तर्षि सम्वत 5096, राश मीन (चलान),ऋतु वऺहरात (वर्षा/बरसात) (चलान), द्रठॖपऻन्च़ुक (पंचक) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव

**************************

      महामारी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

          दल वाक्

लल बॖ द्रायस लोलरे

छ़ान्डान लूसॖतुम द्यन क्योह रात

वुछुम पंडित पनॖने घरे

सुय म्यॆ रॊटमस न्यछतुर तॖ साथ

        ************

अर्थात:- प्रेम में लीन कई दिन रात मैं उसे (परब्रह्म को) जगह जगह ढूंढने निकली। जिस घडी अपने ही घर में उसे पाया तो वही समय मेरे लिए शुभ महूर्त होकर मैं उसी (उपलब्धि) कां अनुसरन करने लगी।

**************************

        मुहावरॖ (दऺपिथ कऻशुर)

1. मु: बऻच़न यिज़ा तॖ प्वतल्यन

         पूज़ा

    अ: पनॖन्यन तक्लीफ तॖ व्वपरन

          फऻयदॖ

2. मु: बऻज़्य ति कऺरिव तॖ ज़ुव ति

         बचऻविव

    अ: कांह सख़ कऻम करनॖ 

          विज़ि गछ़ि ज़ुवुक ति 

          ख़याल रोज़ुन

3. मु:  बांग्यन छि बांग दिन्य

    अ: गाटॖल्य छि वथ हावान न 

         कि मजबूर करान

**************************

पंचान्ग:- पुलवामिच नादिया बेग,अकि मुसलमान कोरि कॊर आई ए एस पास, हालांकि 350-हऻमस नम्बरस प्यठ छि मगर पास गऺयि। जे एण्ड के-हस मंज़ छि दपान शुराह लडकॖ क्योह लड़की छि युहस्किस यूपीएससी किस  इम्तिहानस तारॖ तऺर्यमॖत्य यिमव मंज़ दऺह शुर्य छि कऺशीरि प्यठॖ तॖ च़ोर छि ज्यॆमि प्यठ तॖ ज़ॖ छि लद्दाख प्यठॖक्य। ख़बर बॖ छुस ठीख किनॖ ग़लत मगर कनन गोम ती। कऻशुर बटॖ लऺडकॖ या लऺडकी हुन्द नाव बूज़ुम नॖ कॆंह तॖ छुम ति नॖ बासान कांह छु यिमव मंज़ॖ। ज़ानि दय सानि समाजक्यन शुर्यन क्याज़ि छि दॖय आई ए एस इम्तिहानॖच। क्याज़ि छि नॖ सऻन्य शुर्य यूपीएससी किस इम्तिहानस मंज़ शिरकत करनुक मन बनावान। करेलाहस मंज़ तुल रूदन व्वथवार तॖ छि कॆंह अलाकॖ लगातार रूद प्यनॖ सॗत्य आमॖत्य ह्यनॖ सऺहलाबस मंज़ तॖ गरॖ, खेत खऺलियान गऺयि तबाह। ब्यॆयि तरफॖ सपुद तती कोज़ीकोडा हवऻई अड्डस प्यठ राथ अख ज़बर्दस्त जहाज़ुक हऻदिसॖ यि जहाज़ ओस दुबाई प्यठॖ दपान आमुत तॖ हवऻयी अड्डस मंज़ वसान वसान प्यव यि जहाज़ तॖ गऺयस दपान ज़ॖ हिसॖ। बाह यात्री मूद्य तॖ बाकाया यात्रीयन छु यलाज चलान ब्यॊन ब्यॊन अस्पतालन मंज़। कऺहर क्वदऱयतुक। क्वदऱयतचॖ करामऻच़ छि व्यॊखतुय येमि लटि नज़र यिवान। सऻनी पाफ तॖ ब्यॆयि नॖ कॆंह। कोरोनावयरस महामऻरी हॖन्ज़ मार छॆयी छि। यि तलवार छि सऻनिस वतनकिस कलस प्यठ अलऻन्ज़ तॖ ॳथ्य तलवारि रॖखि प्यठ पकान पकान छि लूख अज़कल द्वह द्वह कड़ान। ब्याख ख़बर बूज़ प्यॆठ्य प्यॆठ्य ज़ि सानि समाजक्यन कॆंच़न लीडरन दपान छि व्वमॆद वुज़ेमॖच़ यि बूज़िथ ज़ि जम्मू कशमीर युस नॊव एल जी आव सोज़नॖ, सु मा करि कॆंह ऐतिहासिक कऻम। ति ज़न गव ज़ि कथि कथि मंज़ॖय दपान ज़ि बटन हुन्द कऺशीरि वापस गछ़नुक संज़ यी जलदॖय व्वं करनॖ ति क्याज़ि मोदी जियन कऺर्य बऺड्य ज़ॖ मसलॖ वुछान वुछान हल तॖ व्वं छु दल द्युन त्रॆयमिस मसलस। मोदी जी मा दी व्वं ध्यान कऻशिर्य बटस कुन  तॖ ॳन्ज़रावि यि न्याय ति। जान गव यॊदवय कॆंह हल नेरि तॖ कऻशुर बटॖ कऺशीरि वापस फेरि।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)

07.08.2020

07.08.2020,भऻद्रप्यथ (भाद्र) गटॖ पछॖ (कृष्ण पक्ष) च़ोरम(चतुर्थी) शॊकुरवार(शुक्रवार/जुम्मा), श्री सप्तर्षि सम्वत 5096, राश मीन (सुबहॖचि 6.56 बजि पठि) ऋतु वऺहरात (वर्षा/बरसात)(चलान), द्रठॖपऻन्च़ुक (पंचक)(चलान) .अज़ छि संकट च़ोरम (संकट निवार्न चतुर्थी) ति।

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव

**************************

     महामारी नाश - मंत्र

जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते

**************************

          दल वाक्

ललि म्यॆ दॊपुख लूख हांड करनय

तवय च़ऺजिम मनॖच शेंख

माघ नोवुम नार च़ोलुम

क्रयि हॖन्ज़ कऻसॖम मनस शेंख

           **********

अर्थात:- मुझ लल से कहा गया कि लोग तेरी निंदा करेंगे। मगर मेरे मन की शंका तो इसी निंदा से दूर हुई। मैं ने ठंड और गर्मी अर्थात बुरा भला सब सहन किया तथा कर्म के साथ लिप्त होने की शंंका भी मन से समाप्त हुई अर्थात मेरे में अकर्तापन कां भाव स्थापित हो गया

**************************

         मुहावरॖ (दऺपिथ कऻशुर)

1. मु: यि छि हून्य वुश्कॖ तॖ मऻश

         गुह न लगान लिवनस न 

         लगान ज़ालनस

    अ: सु चीज़ युस नॖ कुनि लगि

2. मु: यि छु ब्युच यूत रछहऻन

         त्यूत दी ट्वफ

    अ: गन्दॖ ख़ऺसलथ छॆ नॖ गछ़ान

3. मु: यॆन्यवऻल्य ग्राख

    अ: पनॖन्य ज़ड कऺडिथ 

          च़लनवऻल्य, या बऺल्य यार

**************************

पंचान्ग:- ज़ुव ऒर तॖ जहान् ऒर। फ्रटॖ फ्रट छु यूत ज़ि यिथय अज़कल पॊंद ति यिवान छि मामलॖ छु शकावर बासान। तफ तॗर खसान यॊदवय छु न्यसॖफ ज़ुव छु नेरान ज़ि हय रऺट्य मा कोरोनावयरसन। नानिहॖन्द्य नॊस्खॖ गऺयि सऻरी फऺक्य। डाक्टर ति छु नॖ पानस प्यठ ह्यवान, दपान ग्वडॖ कऺरिव फलऻन्य फलऻन्य टैस्ट अदॖ करॖ बॖ यलाज तॖ दिमॖ दवा। यॆमि महामऻरी च़ोन कऻन्फ सख। छु क्याह यि इन्सान कनि ख्वतॖ दॊर तॖ पोशॖ ख्वतॖ ॴव्युल। यि ज़ऻनिथ ति छु ॳमिस इन्सानस मंज़ बऺरिथ रॖश, हसद, वऻर, क्रूध, अहम्, लूब, मॊह, काम वासना, तक्कबुर, किमाम, अभिमान बेतरी। ॳम्यसॖय इन्सानस मंज़ छु बऺरिथ माय, महोब्बत, लोल, भाव, सबॖर,  बेतरी। मुनहसर छु ॳमिस इन्सानस ताम सु वरतावान कमि सातॖ कऺमिस सॗत्य क्याह छु तॖ किथ पऻठ्य छु। वुनि गऺयि नॖ ज़ॖ द्वह ति रक्षा बंधन त्योहारस ज़ि ख़बर आयि ज़ि दिल्लि मंज़ आव राथ किनॖ ऊतरॖ ॳकिस त्रुवाह वर्यशि लड़की सॗत्य बलात्कार करनॖ तॖ आयि तमि पतॖ मारनॖ ति। कांह बोय ह्यॊक नॖ ॳमिस नाबाल्यग कोरि रक्षा कऺरिथ। जान जान खबरॖ बोज़नस गव यच़काल। यपऻर्य वुछान छुस छि तपऻर्य क्रॖहॖन्य काव, क्रुहुन यि ऒबरा कपऻर्य सना आव। हाव व्वं बहार मऻज्य बऺनिथ च़ॖ बुलबुल, रऻज्ञन्या दी ॴज्ञन्या वातय बॖ तुलमुल। अकि तरफॖ ओस राम मंदरुक खुमार लूकन मंज़, दॊयिमि तरफॖ ओस मुम्बई मंज़ तेज़ तॖ लगातार रूदन लूकन हॖन्ज़ हालथ अस्त व्यस्त कऺरमॖच़।अड्यन गऺयि गाडि पऻनिस मंज़ फऺसिथ तॖ अड्यन आयि गरॖक्य गरय वऺसिथ रूदॖ सॗत्य। अयोध्याय मंज़ बनि अख विषाल मंदर,स्यठाह जान गव। कऺशीरि मंज़ छि तति मुसलमानव पत्यम्यव त्रॖहन वऺरियन मंज़ कदमॖस कदमस प्यठ ल्वकचि बजि मऺशीदॖ बन्यावमच़ॖ तॖ उफ ताम ति नॖ कॊरमुत। ॳथ्य छि शायद वनान अकि अंदॖ गाश तॖ ब्यॆयि अंदॖ अन्यगॊट। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भुषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)

04.08.2020

04.08.2020 भऻद्रप्यथ (भाद्र) गटॖ पछॖ (कृष्ण पक्ष) ऒक्दॊह (प्रथम) बॊम्वार (मंगलवार) श्री सप्तर्षि सम्वत 5096, राश कुम्भ (रऻच़ हॖन्ज़ि 8.46 बजि प्यठॖ तॖ द्रठॖपऻन्च़ुक (पंचक) शुरु), ऋतु वऺहरात (वर्षा बरसात) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव

**************************

     महामारी नाश - मंत्र

जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते

**************************

         लल वाक्

युसहो मालि ह्यॆड्यम गेल्यम मसखरी कर्यम

सुय हो मालि मनस खर्यम नॖ ज़ांह

शिव पनुन यॆलि अनुग्रह कर्यम

लूकॖ ह्यडुन म्यॆ कर्यम क्याह

         **********

अर्थात:- लोग भले ही मेरी निंद्या या व्यंग करके हंसेंगे, मेरे मन में उस के लिए कोई दुर्भावना नहीं होगी। यदि शिव मुझ पर अनुग्रह करेंगे तो यह बातें अर्थात निंदा, व्यंग आदि मेरा कुछ भी बिगाड नहीं सकती या मेरे मन में कोई विकार नहीं ला सकती हैं

**************************

        मुहावरॖ (दऺपिथ कऻशुर)

1. मु: अबॖन्य द्रॖय बबन्य द्रॖय

    अ: नाहकैय क़समॖ क़सम,या

         हीलॖ बहानॖ, या पछ़ 

         अनॖनावनॖ बापथ हु क्याह

         यि क्याह वऺनिथ टाल

         मटोल करुन

2. मु: अपुज़ छु तुलॖकतुर तॖ पॊज़

         छु आफ़ताब

    अ: अपुज़ छु नॖ दऺरिथ ह्यकान

         पऺज़िस निशि

3. मु: आबुक आबस तॖ द्वदुक 

         द्वदस

    अ: हलालुक छु वति लगान तॖ

         हरामुक छु ज़ायि गछ़ान

**************************

पंचान्ग:- रंगॖ रंगॖ रंगदार वुछमय म्यॆ इन्सान। च़ूर तय पऺहरदार वुछमय म्यॆ इन्सान। ॶकि बरॖ द्रायि तॖ ब्यॆयि बरॖ च़ायि। राथ ताम ओस शिव शिव शॊम्बो, ॳज़्यकि प्यठॖ गव राम राम। श्रावुण ऱयथ म्वकल्यव तॖ त्रोव असि क़दम भऻद्रप्यथ ऱयतस मंज़। पऺत्यमिस ऱयतस मंज़ आव वुछनस मंज़ ज़ि कॆंच़व मांसाहारी लूकव ख्यॆयि नॖ न्यॆनि ऱयतॖकिस ऱयतस यि वऺनिथ ज़ि यि छु श्रावणुन ऱयथ, अख पवित्र ऱयथ। श्रावणॖ सोमवार द्वह थॊवुख फाकॖ यि ज़ऻनिथ ज़ि यिम द्वह छि शिवनाथॖन्य ख़ास द्वह। पनुन पनुन तर्क द्युत सारिवॖय तॖ द्राव यि ऱयथ ॴखरस। कऺम्यसुन्द तर्क कॊताह पोज़ ओस तॖ कॆंच़व क्याज़ि त्रोव माज़ याने न्यॆनि ख्यॆन्य अथ ऱयतस मंज़ यि वनुन छु मुश्किल, कॆंह छिनॖ न्यॆनि ख्यवान बॊम्वारि द्वह, कॆंह छिनॖ ख्यवान ब्रसवारि द्वह, कॆंह छि नॖ ख्यवान नवरात्रक्यन दॊहन तॖ कऻशिर्य बटॖ ॴस्य कऺशीरि मंज़ नवरात्रक्यन ग्वडनिक्य च़्वन दोहन न्यॆनि ख्यवानॖय ख्यवान तॖ पतॖ नवम द्वह ॴस च़ॊट याने तऺहर तॖ च़रवन खारान च़ऺक्रीश्वर याने पर्बत मगर बालॖ यपोर तऺरिथ बदल्यॆयि यि प्रथा, कॆंह छिनॖ शॊकॖरवारि द्वह नून ख्यवान तॖ कॆंह छिनॖ बॊम्वारि द्वह नून ख्यवान, कॆह छि ब्यॊन ब्यॊन दॊहन फाकॖ थवान वगैरा वगैरा क्याज़ि छु यि ब्यॊन ब्यॊन हिसाब वरतावनॖ यिवान कऻशिर्य बटन मंज़ वनुन छु हना मुश्किल पाहन ति क्याज़ि म्यॆ बासान असि मंज़ छि पूरॖ ज्ञानॖच व्यछ़य। व्वं च़ाव नॊव ऱयथ। पगाह याने पॗन्च़िमि अगस्त दपान यी अयोध्यायि मंज़ भूमि पूजन करनॖ राम मंदर बनावनॖ बापथ। अमि द्वह ति छु क्याहताम फर्मान आमुत करनॖ ज़ि च़ऻन्ग्य ज़ालॖन्य पनॖन्यन पनॖन्यन गरन मंज़ ब्यॆयि ति क्याहताम क्याहताम। इस्लिए रोज़ि व्वं त्रफ त्रफ रामॖ नावॖच कॆंच़न दॊहन। इन्सान कऻत्या रूप छु रोज़ान दारान यि वुछिथ छु यि इन्सान पानॖ हऻरान। यिहऻय इन्सान छु च़ूर ति तॖ यिहऻय इन्सान छु पऺहरदार ति। रऺगॖ रंगॖ रंगॖदार वुछमय म्यॆ इन्सान। महामऻरी छि जऻरी क्वदर्यथ कऺरिन्य पनॖन्य यऻरी। पऻर्य लगय मऻज्य शारिकऻयी। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवुन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)

03.08.2020

03.08.2020, श्रावणॖ (श्रावण) ज़ूनॖ पछॖ (शुक्ल पक्ष) पुनिम (पूर्णिमा) च़ऺन्दॖरवार (सोमवार),श्री सप्तर्षि सम्वत 5096, राश मकर (चलान) ऋतु वऺहरात (वर्षा/ बरसात) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव

**************************

     महामारी नाश - मंत्र

जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते

**************************

            लल वाक्

मनसॖय मान भवसरस

छ्युर कूपा नेर्यस नारॖ छुव्ख

ल्यकॖ ल्यख य्वद तुलि कूट्य

तुलि तुल तय तुल ना कॆंह

      ***********

अर्थात:- जिस प्रकार धर्ती के अंदर छिपी ज्वाला भडकने पर विनाश का कारण बनती है। इसी प्रकार मनुष्य के मन के अंदर क्रोध रूपी ज्वाला छिपी रहती है।संसार में मन रूपी सागर अपने अंदर मान अर्थात अहंकार रूपी आग छिपाए हुए है। (तिरस्कृत होने पर) क्रोध आने से उबाल आता है और अपशब्दों के कारण झगडा होता है एवं लाठियां उठती हैं, जिन से तबाही होती है। किंतु इन अपशब्दों को जब समझदारी से तोला जाए तो इनका कोई तोल अर्थात कोई वज़न या महत्व नहीं होता है।

**************************

        मुहावरॖ (दपिथ कऻशुर)

1. मु: ज़्युठ ॴसिथ कूंछ़ गछ़ुन

    अ: ज़िठिस यज़थ रावुन

2. मु: ज़्यवॖय छि तारान ज़्यवॖय

         छि मारान

    अ: ज़्यॆवि सॗत्य छु जान ति 

         यिवान वनॖनॖ तॖ ख़राब ति

3. मु: ज़्येनुन गछ़ि खरॖ सॖन्द्य 

         पऻठ्य तॖ ख्यॊन गछ़ि शाह

         सॖन्द्य पऻठ्य

    अ: मेहनत गछ़ि मॊज़ूरसॖन्द्य

         पऻठ्य करॖन्य तॖ ख्यन च्यन

         गछ़ि बादशाह सॖन्द्य आसुन

**************************

पऺचान्ग:- अज़ छि श्रावणॖ पुनिम। त्वहि सारिनी छु ॳज़्यकि दुहुक मुबारक। ॳज़्यकिस दॊहस छु स्यठाह थॊद महत्व ति क्याज़ि अज़ छु कऺशीरि मंज़ शिव जियुन दीदार यिवान करनॖ अमरनाथ ग्वफायि मंज़, शिवॖ जियुन दर्शुन छु सपदान शंकराचार्य मंदरस मंज़  तॖ पूज़ा यिवान करनॖ प्रथ शिवाला मंदरस मंज़। अज़ छु रक्षा बंधन द्वह ति। ब्यॆनि पावान याद बऻयिस तऺम्यसुन्द फ़र्ज़ ज़ि किथ पऻठ्य पज़ि हिफाज़त करॖन्य तऺमिस पनॖनि ब्यॆनि या कऻन्सि हॖन्ज़ि ब्यॆनि हॖन्दिस इज़्ज़त आबरुअस तॖ किथॖ पऻठ्य पज़ि तऺमिस नारी हुन्द मान सम्मान करुन। अख पन दाव याने राखी छि यिवान गन्डनॖ बऻयसॖन्दिस हऺच़िस तॖ रटान छि यि ब्यॆनि ॴशिर्वाद या प्रावान बऻयिसुन्द लोल तॖ माय। हालांकि रक्षा बंधन छुन व्वं ह्यॊतमुत अच़ुन फऻशनिस किस आलमस मंज़ ज़्यादॖ तॖ रसमॖकिस आलमस मंज़ कमॖय पाहन ताहम रिवायत छि यिवान निभावनॖ यिथॖ तिथॖ। कऺशीरि मंज़ ओस ॳज़्यकि द्वह जटॖ जोश आसान मत्योमुत। मगर  बालॖ यपारि छु नॖ ॳज़्यकि दुहुक सॖर गॖरॖ ख़ास नज़र यिवान कॆंह। महामऻरी च़ॊमरऻव्य वैसे ही ॳस्य। अज़ कुस कऺमिस निश वाति राखी गन्डनि। मंदरन ति छि किवाड बंद। अमरनाथ यात्रा गऺयि रद्द। रद्द गऺयी वारियाह प्रोग्राम। बस ह्यमव ॳस्य दय नाव।

**************************

कऻशुर ह्यॆछव कऻशुर परव

कऻशिर्य पऻठ्य पानॖवुन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)

02.08.2020

02.08.2020,श्रावणॖ (श्रावण) ज़ूनॖ पछॖ (शुक्ल पक्ष) च़्वदह (चतुर्दशी) आथवार (रविवार/ एतवार),श्री सप्तर्षि सम्वत 5096, राश मकर (दुहचि 12.56 बजि प्यठॖ),ऋतु वऺहरात (वर्षा/ बरसात)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव

**************************

      महामारी नाश - मंत्र

जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते

**************************

         लल वाक्

प्रथॖय तिर्थन गछ़न सन्यास

ग्वारनि स्वदर्शन म्युल

चित्ता पऺरिथ मव न्यशपथ आस

डेंशख दूरे द्रमुन न्यूल

      **********

अर्थात:- सन्यासी लोग हर तीर्थ पर जाकर प्रभु मिलन की आशा करते हैं। अरे मेरे चित्त! पढ सुन कर भी निशपथ (बे-राह) मत हो। जैसे सब्ज़ घास दूर से अधिक हरी दिखाई देती है, वैसे ही तुम तीर्थ पर जाकर भगवान से मिलने की आशा करते हो जो वहां जाकर भी पूरी नहीं होती है। ललेश्वरी कहती है कि दूर जाकर प्रभु को ढूंढना वृथा परिश्रम है वह तो अपने पास ही है।

**************************

         मुहावरॖ (दऺपिथ कऻशुर)

1. मु: छ़ॊटि बरॖ व्वटॖ बोर

    अ: आसान वथ छ़ान्डॖन्य

2. मु: च़्वन पऺहरन कस दॊद च़ोंग

    अ: दौलथ छे नॖ पोशॖवॖन्य

3. मु: च़्यॆ द्युतथम म्यॆ ख्यव बॖ 

         छुस दपान यि क्वत गव

    अ: अपुज़ दासदारथ, या

         न ह्यॊन न द्युन

**************************

पंचान्ग:- पगाह छि श्रावणॖ पुनिम। याद आव म्यॆ पनुन ल्वकचार यॆलि कऺशीरि मंज़ ॳस्य ख्वश गछ़ान ॴस्य ज़ि पगाह छु सुबहऻय न्यॆन्दरि व्वथुन तॖ गछ़ुन छु शंकराचार यारन दोस्तन सॗत्य। कुनि कुनि सातॖ ॴस्य ॳस्य कालय सखरान तॖ राथ ॴस्य दिवान दुर्गानागॖ यॆति मथुरा दीवी ॴस आसान तति आश्रमस मंज़ तॖ ॴस्य शऻमिल गछ़ान ततिचि बजन कीर्तनस मंज़ रऻत्य रातस तॖ प्रभात फ्वलवुनॖय ॴस्य तति प्यठॖ शंकराचार कुन नेरान। खूब मेलॖ ओस लगान लूकन हुन्द। ज़ीठ लऻन ॴस लगान तॖ अकि अकि ॴस्य त्रावान मंदरस मंज़ वातनॖ बापथ। ॳन्दरॖ शिव जियुन दर्शुन कऺरिथ ॴस्य वापस गरॖ कुन फ़ेरान मगर पहाडस वसान वसान ॴस्य मंज़ॖ कुनि जायि म्यॆच़ अनान कुनि बैगस मंज़ पार्थीश्वर बनावनॖ बापथ। गर्युक ज़्युठ युस गरि ठोकुर कुठि पूज़ा ओस नित्य करान रोज़ान, ओस सुय अमि म्यॆच़ि सॗत्य पार्थीश्वर बनावान तॖ तथ पूज़ा करान। सऻन्य कऻम ॴस आसान सिरिफ म्यॆच़ अनॖन्य शंकराचारॖ पहाडॖ प्यठॖ। गऺयि तिम द्वह ल्वकचारॖक्य। श्रावणॖ पुनिम द्वह ॴस छॆड्य शीनॖ सॗत्य बन्यॆमॖतिस शिव लिंग सुन्द दर्शुन करान कऺशीरि मंज़ अमरनाथ ग्वफायि मंज़। ग्वडॖ ॴस छॆड्य अच़ान तथ ग्वफाय मंज़ तमि पतॖ ॴस्य लूख करान शिव लिंगस दर्शुन। मानॖनॖ छु यिवान ज़ि यि शिव लिंग छु शीनॖ सॗत्य पानय बनान तॖ बॊड लिंग यिवान नज़रि श्रावणॖ पुनिम द्वह। पतॖ छु यि लिंग वारॖ वारॖ ल्वकटान तॖ मावसि प्यठ छि सिरिफ अख प्रणऻली यऻच़ नज़र यिवान। अमरनाथ छि पऺहलगाम तरफॖ गछ़ान तॖ ब्याख वथ छि बालतल स्वनमर्गि तरफॖ। कथ छि जऻरी। यऻरी त्वहि सारिनी करुन महादेव। पनॖनि सेहतुक ख़याल थवुन तॖ पनॖनिस अयालस  चलवॖनि महामऻरी निशॖ दूर थवुन। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवुन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)