01.05.2020

01.05.2020 वह्यक (वैशाख) ज़ूनॖ पछॖ (शुक्ल पक्ष) ॴठम (देवादेव) (अष्टमी) शॊकुरवार (शुक्रवार/जुम्मा),श्री सप्तर्षि सम्वत 5096, राश सिंह (रऻच़ हॖन्ज़ॖ 1.4 बजि प्यठॖ) ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ आय बत्तॖ तॖ दाय मॊह्यनिव
**************************
           देवी-सूक्तम्
या देवी सर्वॖभूतेषु छाया रूपेन संस्थिता
नमस्तस्यै नमस्तस्यै नमस्यतस्यै नमो नम:
**************************
    महामऻरी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
        नुंदॖ ऱेशिन्य श्रुक्य
यथ दुनियाहस मांछ टऻकिस माज़ऻविथ
बुगी कऺन्दि ब्रऻविथ मथॖ
म्यूठ ख्यऻविथ ज़्यूठ कन्दऻविथ
याम सु यार क्रऻविथ अथॖ
पतव निन तॖ मज़ारॖ सऻविथ
यी ख्यऻविथ चऻविथ तॖ दऻविथ अथॖ
             ***********
माने:- माछ टऻक्य रूप यथ दुनियाहस लोल बऺरिथ दिमॖ अज्ञऻनी किन्य अथ मंज़ डुलगऺन्य।म्यूठ तॖ ज़्यूठ ख्यनॖकिस मुहस मंज़ फऺसिथ गछ़्यम यार अथस थफ त्रऻविथ। यि ख्यावुन चावुन तॖ अथव सॊंबरुन कथ लगि बुथि बकार यॆलि ॴखरस अमि रॊस निनम मज़ारबल तॖ यिनम तति कबरि मंज़ हमेशि खऻतरॖ सऻविथ
**************************
पंचान्ग:- मरुन ति गव मुश्किल। यथ क्रासिंग रिपब्लिकस मंज़ सपुद अख बरादरा ॳकिस सोसाईटी मंज़ स्वर्गवास राथ शामन। त्रासदी रूज़ यि ज़ि ॳम्य शखसन त्रऻव्य प्राण पनॖनि ब्यॆनि हॖन्दि गरि तिक्याज़ि बोजनस तल आव ज़ि ॳमिस छु नॖ पनॖनिस गरस मंज़ कांह ति अंद्य पख्य। ब्यॆनि बिचऻर छि कुनी ज़न्य पनॖनिस न्यॆचविस तॖ न्वशि ह्यथ। ॳमिस ति छु पनुन खानॖदार गरि न्यबर रोज़गारॖ मूजूब। अथ सोसाइटी मंज़ छु ब्यॆयि अख बटॖ गरॖ रोज़ान तॖ सु छु पानॖ परेशान बूज़ुम पनॖनि आश्यनि हन्दि दऺस्य। हालथ छि यि ज़ि गुरु जी छु नॖ कांह तयार अन्तिम संस्कार करनॖ बापथ। मृतक सॖन्दिस गरस मंज़ छि नॖ ज्यादॖ नफर यिम क्रियायि सॗत्य सॗत्य बाकय कऻम कऺरिथ ह्यकन। शमशानघाठ कॊर फ़ोन गऻड्य सोज़नॖ बापथ तिमव मोन गऻड्य सोज़ॖन्य तिहॖन्द्यन हॖन्द्यन शर्तन प्यठ। मरन सामग्री छि म्वकल्यॆमॖच़ तिमन जायन यॆति यि थावनॖ छि यिवान। मजबूर छि यि ब्यॆनि सानि समाजिच पनॖन्य रसम रिवाज मऺशरावनॖ बापथ, दॊयिमि ज़ऻच़ हॖन्द्य शर्त पानॖनावनॖ बापथ। ॳस्य ति छि बेबस। वऻन्स छॆ नॖ इजाज़त दिवान ज़ि ॳस्य वातॖहऻव ॳमिस मृतकॖ सॖन्दिस फ्लैट्स प्यठ। फोनस प्यठॖय छि तीर चलावान हवहऻस मंज़। क्याह पताह कुस तीर गछ़ि स्यॊद तॖ ॳमिस महिलायि सपदि कांह तीर मददगार। महामऻरी फसऻव्य वॊकॖह पऻठ्य तॖ सॗत्य ह्यथ आयि ह्यनॖ बेवायि पऻठ्य। न छु कांह बोज़नवोल तॖ न छु कांह करनवोल। न छु कांह यिनॖवोल तॖ न छु कांह गछ़नवोल। ज़ानि दय तस क्याह छु मनज़ूर। ॳज़्युक यि आदम छु सख़ मजबूर यथ महामऻरी मंज़। कर च़लि तॖ गलि यि कोरोनावयरस ब्यमऻर्य तॖ मेलि राहत असि सारिनी।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

30.04.2020

30.04.2020 वह्यक (वैशाख) ज़ूनॖ पछॖ (शुक्ल पक्ष) सतम (देवादेव) (सप्तमी) ब्रसवार (वीरवार/बृहस्पतिवार) श्री सप्तर्षि सम्वत 5096, राश कर्कट (चलान) ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
             देवी-सूक्तम्
या देवी सर्वभूतेषु शक्ति रूपेण संस्थिता
नमस्तस्यै नमस्तस्यै नमस्यतस्यै नमो नम:
**************************
          महामऻरी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
          नुंदॖ ऱेशिन्य श्रुक्य
कऺशीरि फ्यूरुस ॳन्दी ॳन्दी
कऻन्सि नॖ वुच़रम बर ॳन्दी त्राव
जन्दस यॆलि कऺरॖम पयवऺन्दी
अदॖ दॊपहम फन्दॖय हाव
यामथन वातान बार तहन्दी
तामथन गछ़ान बर ॳन्दी वाव
          ************
माने:- सऻरिसॖय कऺशीरि ॳन्द्य ॳन्द्य फीरिथ ति मुच़ुर नॖ कऻन्सि ति म्यॆ पनुन बर। यॆमिकिन्य बॖ हर बरॖ ॳन्दी द्रास। मगर यॆलि म्यॆ पनुन जन्दॖ दय ज़िकरि मंज़ रंगॖनोव, लूकव दॊपहम असि ति हाव व्वंय कऺरिशमॖ। तिहुन्द छॊन्यर ब्रोंहकनि वऺनिथ ओसुस बॖ तिहॖन्ज् शरमन्दगी हुन्द बाइस बनान। अमिकिन्य वॊनहम ज़ि आमस मंज़ वनुन छु राज़स फाश सपदान। मगर युथुय म्यॆ बर दिथ तिहुन्द बार पानस प्यठ ह्यॊत रटुन, दयन द्युतुम ह्यस तूफानॖक्य हवहन मुच़ुर बर तॖ फाटॖनऻवनम तॗर
**************************
पंचान्ग:- मानॖनॖ छु यिवान ज़ि पुराणन मंज़ हऻव्यमॖत्य ऋश्य छि ब्यॊन ब्यॊन कॖसमव हॖन्द्य ऋश्य मसलन ब्रह्मर्षि, देवर्षि, विपर्षि, परमार्षि, महार्षि, राज्यर्षि, श्रुतार्षि, यज्ञ्यर्षि, तपोर्षि, सत्यार्षि तॖ कन्दार्षि वगैरा वगैरा मगर केवल सथ ब्रह्मर्षि  छि तिम यिम ब्रह्मा जियन छि दपान पनॖनि तपोबलॖ सॗत्य पऻदॖ कऺर्यमॖत्य तॖ यिमन सतॖर्षियन ओस ब्रह्मा जियन वंश बऺडरावनॖच ज़िम्मॖवऻरी थऻवमॖच़। यिमन ऋश्यन हुन्द दपान वास करनॖच जाय छि ॴसमॖच़ पृथ्यवी लूक तॖ स्वर्गलूक यानि आकाश। मानॖनॖ छु यिवान ज़ि अज़कल ति छि यिम सप्तर्षि तारामंडलस मंज़ उत्तर-पूर्व दिशायि अन्दॖ ज़ोतवॖन्य नज़र यिवान। समस्त हिन्दु समाजस मंज़ छु यिमन सप्तर्षियन मान्यता प्रदान सपदेमॖच़। कऻशिर्य पंडितन ति छि यिमन सप्तर्षियन प्यठ पूरॖ यछ़ तॖ पछ़। यिमनॖय सप्तर्षियन हॖन्दिस नावस प्यठ दपान छु कऻशुर पंचान्ग ति बन्योमुत युस ॳस्य कऻशिर्य बट्टॖ वर्तावान आयि वुन्युखताम। महामऻरी हुन्द ज़ोर छु बरक़रार तॖ अमि कोरोनावयरसॖ महामऻरी निशि  बचनॖक्य व्वपाय ति छि छ़ारान लगातार कॆंह वैज्ञानिक तॖ डाकटर तॖ सॗती छि कॆंह भगवान भक्त्य ज़पान रोज़ान मंत्र, पूज़ा पाठ सुबॖ शाम करान तॖ भगवानस मंगान शॆहजार तॖ शफा पनॖनि बापथ, पनॖनि वतनॖ बापथ तॖ सऻरिसॖय कुल आलमॖ बापथ।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

29.04.2020

29.04.2020 वह्यकॖ (वैशाख) ज़ूनॖ पछॖ (शुक्ल पक्ष) शॆयम (देवादेव)(षष्ठी) ब्वदवार (बुधवार),श्री सप्तर्षि सम्वत 5096, राश कर्कट (शामन 7.57 बजि प्यठॖ),ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
         देवी-सूक्तम्
या देवी सर्वभूतेषु शान्ति रूपेण संस्थिता
नमस्तस्यै नमस्तस्यै नमस्यतस्यै नमो नम:
**************************
         महामऻरी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
     नुंदॖ ऱेशिन्य श्रुक्य
मुहय तॗरि तॖ मुहय तते
हन्ज़े कर्यस ल्वय तॖ ग्वय
आशक़ छि निसार तिहॖन्ज़ि वते
यॆति बॊम्बरस तॖ पोशस आसी ख्वय
ती यस व्यद सनि सुय अदॖ मते
तस अदॖ गछ़ी द्वयि अकोय
        ************
माने:- स्वख तॖ द्वखुक कारण छु मुह युस नऺ यॆछ़िथ ति छु इन्सानस पानस कुन हऺरिथ निवान। पॊज़ आशक़ छु दय वति प्यठ निसार पनुन पान करान। यिथॖ बॊम्बरस तॖ पोशस पानॖवॖन्य तालमेल छु आसान, तिथॖ यॆलि इन्सानस अम्युक अनुबव गछ़ि पतॖ तऺथ्य सनि, सुय मति तसॖन्दिस लोलस मंज़। तस सॗत्य लय सपदिथ गछ़्यख द्वन कुनुय
**************************
पंचान्ग:- जे के विचार मंच छि अख संस्था सऻनिस कश्मीरी पंडित समाजस मंज़ यॆम्य पऺत्यमम्यव कॆंच़व वऺरियव प्यठॖ पनॖन्य समाजक्यन हुन्नरमंद शुर्यन मॊकॖ द्युत पनुन हुन्नर हावनॖ बापथ। अथ कार्यक्रमस आव नाव दिनॖ गाशॖ तारुख तॖ प्रथ वऺरियि छु यि प्रोग्राम करनॖ यिवान यथ मंज़ शुर्य छि ग्यवान, नच़ान, साज़ वायान, चित्रकऻरी करान, माजि ज़्यॆवि मंज़ कथ बाथ करान रोज़ान वगैरा वगैरा। यि प्रोग्राम मटि ह्यनॖ म्वखॖ छि यि संस्था अनथख मॆहन्नत करान तॖ पनॖन्यन लूकन ताम वातनॖच कूशिश करान रोज़ान। ॳथ्य सिल्सिलस मंज़ कॊर जे के विचार मंचन अख नॊव प्रोग्राम शुरु सतोवुह मार्चॖ ज़ॖ सास वुहॖ प्यठॖ यथ मंज़ कलाकार आयि पनुन ग्यवनुक हुन्नर हावान पनॖनि गरि प्यठय फेसबुकस प्यठ आन लाईन दऺस्य। चूंकि अज़कल छु कोरोनावयरस महामऻरी फऻल्यॆमॖच़ दुन्यहीकिस कॆंच़न मुल्कन मंज़ तॖ सऻनिस वतनस मंज़ ति छु अम्युक असर प्योमुत, अमि महामऻरी निशॖ बचनॖ बापथ आयि कॆंह क़दम तुलनॖ, लूकन आयि ह्यदायात दिनॖ ज़ि तिम न्यॆरन नॖ पनॖन्यव गरव मंज़ न्यबर, दफ्तर आयि गरि प्यठय चलावॖनॖ, वगैरा वगैरा, जे के विचार मंचन चलोव यि कार्यक्रम कलाकारन हॖन्दि बापथ यथ मंज़ शिरकथ कऺर पनॖनि वतनॖक्यव कलाकारव अलावॖ तिमव कऻशिर कलाकारव ति यिम वतनॖ न्यबर ब्यॊन ब्यॊन मुलकन मंज़ रोज़ान छि। यि प्रोग्राम वाच़्येयो अंद ऊतरॖ सतोवुहमि अप्रील मगर प्रोग्रामॖच सफलता वुछिथ तॖ लूकन हॖन्ज़ दिलचस्पी हावनॖ म्वखॖ आव अमि प्रोग्रामुक मियाद बऺडरावनॖ त्र्यॆमिस मई-यस ताम तिक्याज़ि व्वमेद छि ज़ि जनता कऺरफ्यु मा हटि तमि द्वह प्यठॖ तॖ लूकन मा मेलि शायद कॆंह राहत गरि न्यबर न्यॆरनॖच।इस्लिये रोज़ि यि प्रोग्राम  चलवुन ब्यॆयि कॆंच़न दॊहन। ॳस्य थवव पनॖनि पानुक ति खयाल तॖ वर्तावव सऻरी नियम तिम युथ यि महामऻरी च़लि तॖ गलि तॖ त्रावि असि ज़ंगि तऺल्य सऺही सलामत। दूर्यर थवव, साफ़ सफऻयी थवव, कीर्तन करव गरन मंज़ बिहितॖय तॖ माजि दीवी अथरॊट मंगव।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

28.04.2020

28.04.2020, वह्यक (वैशाख) ज़ूनॖ पछॖ (शुक्लॖ पक्ष), पऻन्च़म,(देवादेव) (पन्चमी) बॊम्वार (मंगलवार) श्री सप्तर्षि सम्वत 5096, राश मिथुन (चलान) ऋतु बसंत (चलान)...अज़ छि कुमार शॆयम ति
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
          देवी-सूक्तम्
या देवी सर्वभूतेषु लज्जा रूपेण संस्थिता
नमस्तस्यै नमस्तस्यै नमस्यतस्यै नमो नम:
**************************
       महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
       नुंदॖ ऱेशिन्य श्रुक्य
कॆंच़ तॖ ज़लॖ मंज़य दऺदी
कॆंच़ नॖ फीरिथ आय अग्नॖ स्वरूप
कॆंच़व तॖ आरॖबलॖ लाल लऺबी
कॆंच़ तॖ छ़ऺर्य आय संगल दॗपॖ
        ************
माने:- दय ध्यानस मंज़ बास्योम कॆंच़न पऻनिस नार कॆंह आयि दर्शुन कऺरिथ ॳग्नॖ स्वरूप असि ब्रोंहकनि। कॆंच़व लऺब्य आरबलन मंज़ लाल, कॆंच़न गऺयि वुम्बॖर छ्यॆम्ब ज़न छि दुपॖ गंडरि बऺनिथ असि ब्रोंहकनि
**************************
पंचान्ग:- कऻशुर पंचान्ग दपान शुरु गोमुत पांछ़ सास पांच़ॖनमथ वऺरी ब्रोंठ यॆलि ब्रह्मा जियिन पऻदॖ कऺर्यमॖत्य सथ ऋश्य यि पृथ्वी त्रऻविथ गयि देवलूकस यानि वैकुण्ठस कुन प्रस्थान कऺरिथ गऺयि। दपान यिम सथ ऋश्य या सप्तर्षि छि आकाशस मंज़ तारकन हॖन्दिस स्वरूप मंज़ असि यॆमि पृथ्वी लूकॖ प्यठॖ नज़र यिवान ज़ोतवॖन्य सथ तारख तारामंडलस मंज़। दॊयिम मान्यता छि ज़ि कऻशिर्य बटन हुन्द पंचान्ग छु सपद्योमुत शुरु तमि दोह प्यठॖ यॆलि महाभारत लडायिकि पॖन्च़ॖह वुहॖर्य पतॖ भगवान श्री कृष्णन यि प्रथ्यवी लूक त्रऻविथ देवलूकस कुन गव। वनॖनॖ छु यिवान ज़ि यॆमि सप्तर्षि सम्वतुक नाव छु ग्वडॖ रुदमुत लोक-काल कऺशीरि मंज़ तॖ दपान राजतरंगनी मंज़ छु कल्हनन ति तमी नावॖ यि पंचान्ग प्रयोगस मंज़ ऒनुमुत। तमि पतॖ छु अथ पंचान्ग नाव प्योमुत। यि छि दपान छु अख पज़र ज़ि यि सोन पंचान्ग छु वाकऺय स्यठाह प्रोन पंचान्ग भारतस मंज़ वुन्युखताम। वारियाह कथॖ छि यथ कथि सॗत्य जुडिथ मसलन करॖ प्यठॖ, किथॖ पऻठ्य, कऺम्य कॊर ग्वडॖ शुरु, गणित किथॖ पऻठ्य आव करनॖ, ज्यॊतिष्याचार्य कम ॴस्य, वगैरा वगैरा। यि इतिहास छु अलगॖय। वऻन्सि हिसाब छि वनान ज़ि बाकय पंचान्ग छि आमॖत्य बारसस होरॖ योरॖ सानि सप्तर्षि पंचान्गॖ पतय। ॳस्य छि अज़कल पकान जनता कऺरफ्यु किस कालस मंज़। अख ऱयथ प्यॆठी गव असि यि संकट बूगान। सऻर्यसॖय ज़गतस कुन नज़र त्रऻविथ छु ननान ज़ि लछॖ ह्यॊर लूख बन्येयि शिकार यॆमि महामऻरी हॖन्द्य वुन्युखताम चीन, अम्रीका, स्पेन वगैरा वगैरा जायि मिलऻविथ। पनॖनिस यथ वतनस मंज़ ति गऺयि असि ग्रन्द नवि शति अपोर तऺरिथ, महाराष्ट्र, गुजरात तॖ मध्य प्रदेश अलाकॖ छि ज़्यादय आमॖत्य यॆमि महामऻरी हॖन्दिस ज़दस मंज़। भगवान गछ़ि पनुन पर्दॖ करुन। मऻज्य दुर्गा गछ़ि पनुन अथॖरॊट करॖन्य। असि ति पज़ि पनुन हिरासॖ पानॖ करुन यॊत ताम यि संकट समाप्त सपदि। माजि दीवी पज़ि शर्ण गछ़ुन। यॆति योर कुन रछि असि सॊय मऻज्य। कडि बजि बलायि तॖ आपदायि निशॖ।ॳस्य रोज़ॖन यी मंगान हलम दऻर्य दऻर्य।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

27.04.2020

27.04.2020, वह्यक (वैशाख) ज़ूनॖ पछॖ (शुक्ल पक्ष) च़ोरम (देवादेव) (चतुर्थी) च़ऺन्दॖरवार सोमवार) श्री सप्तर्षि सम्वत 5096, राश मिथुन (दुहचि 11.45 बजि प्यठॖ),ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
           देवी-सूक्तम्
या देवी सर्वभूतेषु जाति रूपेण संस्थिता
नमस्तस्यै नमस्तस्यै नमस्यतस्यै नमो नम:
**************************
        महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमो नम:
**************************
        नुंदॖ ऱेशिन्य श्रुक्य
लूबस तॖ मुहस मद अहंकारस
क्वगंन डारस व्ययॆम नॖ पॊन्य
द्यार सॊरिम सौदागारस
छॊन्य बाज़ारस कऺह्य बॆहि वॊन्य
ॴखॖर च़मव सऻरी मज़ारस
नारस व्वंय कति सारस पॊन्य
        *************
माने:- हे इन्सानॖ, लूब, मुह, मद तॖ अहंकार सॗत्य यिय नॖ आत्मा कॆंह ति सगॖनावनॖ। सु क्याह क़रार प्रावि तथ मालॖ रॊस (कर्म) दुकानस मंज़। ॴखरस छु सारिनॖय मज़ारस मंज़ अच़ुन। तति दोज़खुन नार किथॖ छ़ॆवॖरावि यॆलि नॖ कुनि वख्तॖ विज़ सगनोवनुय नॖ
**************************
पंचान्ग:-  ॳस्य ॴस्य कथ करान गोत्रन हॖन्ज़ राथ। असि नन्यव ज़ि गोत्रुक मूल छु ऋश्यन हॖन्दि वंशस सॗत्य जुडिथ। यिति नन्यव ज़ि कऻशिर बटन छि मूल रूपस मंज़ सिरिफ शॆ ऋश्य रूद्यमॖत्य यिम समयस सॗत्य बडान बडान वऻत्य तक़रीबन अख हथ तॖ नमतस ताम। ऋश्यन हॖन्ज़ गाथा ति छि बडॖ दिलचस्प तॖ स्यठाह ज़ीठ। दपान ब्रह्मा जियन ॴस्य सथ ऋशय पनॖनि माया सॗत्य बनऻवमॖत्य ग्वडॖ यिमन वरदान ओस आमुत दिनॖ ज़ि तिम चलावन पनुन वंश तॖ सॗत्य सॗत्य  बनावन तॖ बोज़नावन वेद, यिम ऋश्य दिन ज़न्म दीवी, देवताहन, दानवस, मानवस यि दऺप्ज़ि ति प्रथ ज़ीवस तॖ दिन यथ ब्रह्मांडस सम्सऻर्य रुप। यिहॖन्ज़ कऻम ॴस आमॖच़ थवनॖ मंत्र बनावॖन्य,मंत्र परॖन्य, यज्ञ करॖन्य, दीवी देवताहन  वथ हावॖन, मनुष्य ज़ऻच़ कर्म करनावॖन्य, धर्मॖच वथ हावॖन्य, इन्सानस तॖ दीवी देवताहस मंज़ कऺदॖल बऺनिथ संपर्क बऺडरावुन, यॆमि सम्सारॖच व्यवस्था सम्बालॖन पनॖन्यव शक्तियव सॗत्य। कॆंच़न ऋश्यन दपान आमुत छु वरदान दिनॖ ज़ि तिम रोज़न चिरजीवी यथ युगस मंज़ हालांकि बाकॖय सारिनॖय ज़ऻच़न,दीवी देवताहन त्रऻविथ, रोज़ि यथ संसारस मंज़ युन तॖ गछ़ुन, मरुन तॖ ज़्यॊन पनॖन्यव पनॖन्यव कर्मव मूजूब। दपान वैदिक समयि आयि ग्वडॖ सथ ऋश्य यिहुन्द नाव छु ओसमुत - विश्वामित्र, जमादग्नि, भारद्वाज, गौतम, अत्री, वशिष्ठा तॖ कश्यप। वैदिक समयि पतॖ दपान आयि नऺव्य ऋश्य बारसस यिहॖन्द्य नाव ॴस्यमॖत्य छि - मारीची, अत्री, अन्गीरस, पलस्तया, पुलाका, कृतु तॖ वशिष्ठा। सऻनिस पंचान्गस मंज़ छि हऻविथ सप्तर्षि स्मरणम, यिहॖन्द्य नाव छि - कश्यप, अत्री, भरद्वाज, विश्वमित्र, गौतम, जमदग्नि तॖ वसिष्ठ। अमि अलावॖ छि सऻनिस पंचान्गस मंज़ सप्तचिर-जीवी ऋश्य, यिहॖन्द्य नाव छि - अश्वत्थामा, बलि, व्यास, हनुमान, विभीषण, कृपाचार्य तॖ परशुराम। यिमन ऋश्यन हुन्द नाव छि ॳस्य स्मरण करान रोज़ान दोहय कुनि नतॖ कुनि रूपस मंज़। पाठ पूज़ायि मंज़, प्रेप्युन करनॖ विज़ि। कथ छि जऻरी। द्वह द्वह छु न्यॆरान मगर महामऻरी छु नॖ वुनि थख लगान। हालांकि कॆंच़न अलाक़न मंज़ दपान यि महामऻरी कोरोनावयरस छि हमॆमॖच़, मगर गऺजमॖच़ छेनॖ मूलॖम्वन्जे। ज़ानि दय वुनि कऻत्याहन नी पानस सॗत्य असि निशि दूर कऺरिथ। मगर असि छु रॊटुमुत पनुन दय युस सान्यन संकटन करि क्षय। बूगुन छु ब्यॆयि कॆंच़स कालस, वुछान छि ॳस्य ति हालस। सोंचान छि क्याह करव पानस तॖ क्याह करव अयालस। इन्सान छु परेशान तॖ पशेमान मगर छि सऻरी बेबस, मजबूर। बस सबॖर छु करुन तॖ ह्यमथ छि थावॖन्य। मऻज्य दीवी करि अथॖरॊट।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

26.04.2020

26.04.2020,वह्यक (वैशाख) ज़ूनॖ पछॖ (शुक्ल पक्ष) त्रय (देवादेव) (तृतीय) आथवार (रविवार/एतवार) श्री सप्तर्षि सम्वत 5096, राश वृष (चलान) ऋतु बसंत (चलान).....अज़ छि अक्षया तृतिया ति
**************************
          देवी-सूक्तम्
या देवी सर्वभूतेषु क्षान्तिरूपेण संस्थिता
नमस्तस्यै नमस्तस्यै नमस्यतस्यै नमो नम:
************************
        महामारी-नाश - मंत्र
जयन्ती मन्गला काली भद्रकाली
कृपालिनी दुर्गा क्षमा शिवा धात्री स्वहा स्वधा नमो नम:
**************************
     नुंदॖ ऱेशिन्य श्रुक्य
ग्वफि बॖ वन्दय हंदि लरे
जन्दव बॖ वन्दय पऻटी काय
गगरन तॖ राज़ॖ शॊंगन कन्दे
वुम्बॖर वॆन्दय गरे डाय
        *******
माने:- मनॖ रूप ग्वफि मंज़ यथ मंज़ सु पानॖ बिहिथ छु दिमॖ हन्दि हॖन्ज़ लरि बलाय। याने पनुन शरीर गछ़ि पालुन हन्दि सॗत्य। जन्दन मंज़ रूज़िथॖय गछ़ि करन्य पऻट्य रूप यि पनॖन्य काया तस प्यठ सर्फ। वुम्बरि गछ़न थवन्य पत्यमि डाय गरि याद। गगरन तॖ राज़ॖ शॊंगन हॖन्ज़ि वेरि गछ़ि सऻरॖय वुम्बॖर दय सॖन्दिस यादस मंज़ गुज़ारॖन्य।
**************************
पंचान्ग:- राथ छीड असि कथ गोत्रन हॖन्ज़। यॊत्ताम म्योन अंदाज़ छु, सऻनिस कऻशिर बटॖ समाजस मंज़ छि सिरिफ शॆ गोत्रॖ यिम असली छि। तिहॖन्द्य नाव छि - दत्तात्रॆय, भारद्वाज, पालदेव, औपमन्यु, मुदगल्य तॖ धौम्याना। यिमन अलावॖ यिम गोत्र असि ब्रूंठ्य यिवान छि तिम छि वखतस सॗत्य सॗत्य बडान गऻमॖत्य तॖ यिहॖन्ज़ कुल संख्या छि वऻच़मॖच़ अख हथ तॖ नमतस ताम। यि स़ख्या बडनुक ख़ास कारण छि दपान रूदमुत अंतर-जातियि व्यवाह ऱयॆश परिवारन मंज़ तॖ ब्यॆयन ब्रह्मन ज़ऻच़न सॗत्य रलुन मेलुन। सोन पंचान्ग छु पांछ़ सास पांच़नमथ वऺरी प्रोन माने कऻशुर बटॖ सुन्द इतिहास छु स्यठाह प्रोन तॖ बदलाव छु आमुत गछ़ान गॊत्रन मंज़ ति विज़ि विज़ि म्यॆ छु बासान। गोत्र माने वंशावली यानि ॳस्य कऺमिस ऱयॆशि सॖन्दि परिवारॖक वंशज छि। हालांकि गोत्र दपान छु पुशतैनी पैतरिक ऋशि परिवारस सॗत्य जुडिथ मगर वुछनस तल छु आमुत ज़ि गोत्र छु ऋश-बायि हॖन्दिस नावस प्यठ ति चलान आमुत। यि छि ज़ीठ कथा अख य्वस परनॖ सॗती तरि फिकिरी। फिलॖहाल वुछव ॳस्य ज़ि ॳस्य कऺमिस कऺमिस ऋशि सॖन्द्य संतान छि। यि ज़ानॖनॖ बापथ छु ॳसि पनॖनिस गरस मंज़ पनॖनिस ज़िठिस बऻच़स निशि मोलूम करुन कऺमिस क्याह गोत्र छु। गोत्र ज़ानुन छु ज़रूरी ति क्याज़ि पितृन त्रेश दिनॖ विज़ि या श्राद्ध हावनॖ विज़ि या कुनि धार्मिक कामि विज़ि छु प्यवान गोत्रुक नाव ह्यॊन। सानि नवि पुयि गछ़ि पताह लगुन ज़ि तिम कथ गोत्रस सॗत्य छि जुडिथ। ब्यॆयि अमि अलावॖ छु त्र्यन पुश्तन हुन्द नाव ज़ानुन ति ज़रूरी माने गरिक्य त्र्यॆ पुशतॖ तॖ मातामालॖक्य त्र्यॆ पुश्तॖ। माने मोल, बॖड्यबब, तॖ जदॖ बुड्यबब यिथय पऻठ्य मऻज्य  नान्य तॖ बडॖ नान्य। यिथय पऻठ्य मातामालुक बुड्यबब, बडॖ-बुड्यबब तॖ जद-बुड्यबब यिथय पऻठ्य मातामालॖच नान्य, बडॖ नान्य तॖ बडॖ-बडॖ नान्य। म्यॆ छु नॖ बासान ज़ि सान्यन शुर्यन आसि अम्युक पूरॖ ज्ञान। अगर कुनि गरस मंज़ कऻन्सि शुरिस यि ज्ञान आसि, तथ गरस तॖ तस शुरिस छु म्योन नमन। कथ छि जऻरी। सारिनी छि पताह ज़ि ॳस्य छि अज़कल महामऻरी निशि म्वकजार मंगान भगवानस हलम दऻर्य दऻर्य, प्रार्थनाय दऺस्य, आराधनाय दऺस्य, पूज़ाय दऺस्य, कीर्तन दऺस्य। व्वमेद छि जल्दॖय मेलि छुटॖकारॖ अमि  कोरोनावयरसॖ निशि तॖ कुल्यालमस मेलि राहत। पनॖन्य नियम छि थवॖन्य जऻरी वुनि ब्यॆयि कॆंच़स कालस यॊत ताम फान गछ़ि अथ महामऻरी हॖन्दिस कऺन्ड्य ज़ालस।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

25.04.2020

25.04.2020, वह्यक (वैशाख) ज़ूनॖ पछॖ (शुक्ल पक्ष) द्वय (देवादेव) (द्विती) बटॖवार (शनिवार/शनिश्चरवार),श्री सप्तर्षि सम्वत 5096, राश वृष (चलान) ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
           देवी-सूक्तम्
या देवी सर्वभूतेषु तृष्णारूपेण संस्थिता
नमस्तस्यै नमस्तस्यै नमस्यतस्यै नमो नम:
**************************
        महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमो नम:
**************************
          नुंदॖ ऱेशिन्य श्रुक्य
ॳल्यमुक बोर लॊदहख खरन
करन ग्वनाह बन्दगी साहिबसॖय
हसदॖ नफाकॖ प्रकथ बरन
तिम हवालॖ कऺरिख शेतानसॖय
         ************
माने:- तिहुन्द ज्ञान छु बऻर खरन ज़न बोर लदनस बराबर यिम अकि अन्दॖ इल्म परन तॖ ब्यॆयि अन्दॖ ग्वनाह कऺरिथ दयस बन्दगी करन। तिहॖन्ज़ प्रकृथ छि हसद तॖ नफरत दारान। यिथ्य हिव्य छि पतॖ शेतान सॖन्ज़ि वति पऺकिथ नर्कॖक्य हकदार बनान।
**************************
पंचान्ग:- राथ वुछ असि ज़ि सऻनिस समाजस मंज़ छि तकरीबन ज़ॖ हथ तॖ शीथ ज़ऻच़ मूजूद यिम छऺकरिथ छि वतनॖक्यन  ब्यॊन ब्यॊन जायन मंज़ तॖ वतनॖ न्यबर ब्यॊन ब्यॊन मुल्कन मंज़। यिम सारेय ज़ऻच़ आसि मूजूद कशीरि मंज़ अज़ त्रॖह वऺरी ब्रोंठ तॖ यिहॖन्द्य कॆंह अंश ॴस ग्वडय द्रामॖत्य कऺशीरि न्यबर कुनि नतॖ कुनि वजह किन्य, मसलन परनॖ म्वखॖ, नोकरी हॖन्दिस सिल्सिलस मंज़ या तिजारत करनॖकि बहानॖ। मगर सारिनॖय ज़ऻच़न हुन्द मूल छु ओसमुत कऺशीरि मंज़ॖय हालांकि वछिनस तलॖ या परनॖ तलॖ छु ननान ज़ि कॆंह कऻशिर बटॖ छि मुस्तकॖल पऻठ्य बसकीन बन्यॆमॖत्य ज़गतॖक्यन च़्वनवऺन्य दिशायन मंज़ तॖ पनॖन्य ज़ाथ, पनॖन्य संस्कृति, पनुन रहन सहन छु तिमव बदलोवमुत तमि जायि हॖन्ज़ि वातावर्णॖ आयि। मगर दपान त्युहुन्द असली मूल ति छु ओसमुत वख अकि कऺशीरि मंज़ॖय। इतिहास छु गवाह ज़ि कऺशीरि मंज़ रूज़िथ वारिहान मुस्लमानन हॖन्द्य पूर्वज छि ॴस्यमॖत्य कऻशिर बटॖ यिहुन्द धर्म-परिवर्तन आमुत छु ज़बर्दस्ती करनावनॖ वखतॖ अकि कॆंच़व ज़ऻलिम ह्वकुमरानव दऺस्य। कऻशिर्य बटस प्यठ छु आमुत वख्तॖ  वख्तॖ ज़ुलुम करनॖ मगर क्वसताम अख शक्ति छि रूज़मॖच़ ॳमिस बटस सॗत्य सॗत्य यॆमिकिन्य ॳमिस बटॖसुन्द वजूद गॊल नॖ वुन्युख ताम। कऻशुर बटॖ छ़ॊक्यव संख्यायि मंज़ तथ मंज़ कांह शक छु नॖ मगर मूल स्यठाह दॊर तॖ पायदार आसॖनॖ म्वखॖ आव यि बटॖ पनुन पान, पनॖन्य जाथ, पनॖन्य सभ्यता, पनॖन्य संस्कृति, पनॖन्य ज़बान, पनॖन्य रसमो रिवाज पनॖन्य प्रज़नथ रऺछ़रावान वुन्यखताम तॖ फखरॖ सान तॖ कलॖ थोद थऺविथ छु अज़ कऻशुर बटॖ ब्यॆयि खडा पनॖन्यन ज़ंगन प्यठ यॆति या हुति। दुनिहीकिस प्रथ कूनस मंज़ छु कऻशुर बटॖ लऺसिथ तॖ बसिथ शानॖ सान तॖ यज़तॖ सान। यि छि क्वदर्यतॖच अख न्यामथ सऻनिस कऻशिर बटॖ समाजस प्यठ। सान्यन ज़ऻच़न छु पनुन पनुन अख गोत्रॖ ति। क़रीबन छि अख हथ तॖ नमथ गोत्र यिहॖन्दि वंशॖक्य ॳस्य सऻरीय कऻशिर्य बटॖ छि जुडिथ। गोत्रस मुतलक करव कथ पगाह। अज़ छि वुनि ॳस्य दारि बर बंद थऻविथ पनॖन्यन पनॖन्यन गरन मंज़ पनुन पान त्रॊपॖरिथ। हिरासॖ कऺरिथ ज़ि अख ॳकिस निश दूर्यॆर थवुन, अथॖ साबनि सॗत्य छलान रोज़ुन, ॴस तॖ नस डकिथ थवॖन्य तॖ सुबॖ शाम माजि दीवी शर्ण गऺछ़िथ आराधना करॖन्य, अनुग्रह मंगुन, गृह पीडायि मंज़ॖ, व्याकुल्तायि मंज़ॖ म्वकजार मंगुन तॖ माजि हुन्द अथॖरॊट मंगुन। ताब थवुन, सबॖर करुन, असान असान यि कठिन समय कडुन। शिव शंकर करि रऻछ असि सारिनी तॖ यथ कुल आलमस ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

24.04.2020

24.04.2020, वह्यक (वैशाख) ज़ूनॖ पछॖ (शुक्ल पक्ष) ऒक्दॊह (देवादेव) (प्रथमा) शॊकुरवार (शुक्रवार/जुम्मा) श्री सप्तर्षि सम्वत 5096, राश वृष (रऻच़ हॖन्ज़ॖ 1.14 बजि प्यठॖ), ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
            देवी-सूक्तम्
या देवी सर्वभूतेषु क्षुधारूपेण संस्थिता
नमस्तस्यै नमस्तस्यै नमस्यतस्यै नमो नम:
**************************
        महामारी नाश -  मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमो नम:
**************************
           नुंदॖ ऱेशिन्य श्रुक्य
गरॖ करुन छुय करतजि सॆज़ॖ
कुह ह्यॆकि वछस नेज़ॖ दिथ
पानय कॊरुम व्वंय कस खॆज़ॖ
ॳम्य दऻम्बॖर्य मॊरुस नेज़ॖ दिथ
          ************
माने:- ॳम्य ग्रहस्त रूप छ़लन कॊरुम तीरव सॗत्य जिगर छ्वकॖलद। गरॖ करुन गव करतजि च़ापॖन्य। कुस ह्यॆकि पज़ि व्यवहार रूप नेज़ॖ सीनस रऺटिथ। व्वंय कस
ह्यॆकि शिकायत कऺरिथ या हान खऻरिथ यॆलि बॖ पानय अम्युक ज़िम्मॖवार छुस।
**************************
पंचान्ग:- पऺतिम्यव द्वन च़्वन दॊहव  प्यठॖ वोत असि दाय तदबीर ह्यवान पनॖनि समाजिक्यन बुद्धिजीवन, मर्दन, ज़नानन, बाल्यॆग शुर्यन यथ महामऻरी च़ऺलरावनॖ बापथ या पनुन पान अमि महामऻरी निशॖ बचावनॖ बापथ। म्यॆ छु बासान यीच़ॖ ति ज़ऻच़ छि असि कऻशिर्य बटन मंज़ सारिवॖय ज़ऻच़व कऺर अथ मसलस हल छ़ान्डनॖच कूशिश तॖ सारिनी आव मॊकॖ दिनॖ पनॖन्य पनॖन्य राय थवनॖ बापथ। वारियाह बऺहस मुबऺहस चल्यव यिमन दॊहन तॖ ॴखरस वऻत्य अथ नतीजस प्यठ ज़ि असि पज़ि सरकार तरफॖ तुल्यमॖत्यन क़दमन प्यठॖय पकुन यॊदवय पनुन ज़ुव बचावुन छु।ज़िमनी प्यॆयि म्यॆ वनुन ज़ि करीबन ज़ॖ हथ तॖ शीथ ज़ऻच़ छि सऻनिस कऻशिर बटॖ समाजस मंज़ तॖ यि छि बडॖ जान ख्वश ख़बर ज़ि फऻसलॖ करनस मंज़ लऺज्य नॖ ठोंसॖ ठोंसय। हालांकि फिरिका परस्ती ह्यॆच़ेयेन गछ़ॖन्य मगर लाकम आयि सॗती चारनॖ तॖ मुच़ुकरी कऺर रसा दफ़ा तती तॖ तमी सातॖ। फऻसलॖ आव निनॖ ज़ि  गरॖ न्यबर नॖ न्येरुन नाहकय। गरन मंज़ साफ़ सफऻयी थवॖन्य। अथॖ विज़ि विज़ि छलनस नॖ कोतऻही करॖन्य। नऺ कऻन्सि हुन्द गरॖ गछ़ुन, नऺ कांह गरॖ च़ानुन। अंगन ॴश्यनावन सॗत्य फोनस प्यठॖय कथ बाथ करॖन्य, ख़बर अतर प्रॖछ़ॖन्य। भगवानस शर्ण गछ़ुन, सुबॖ शाम याद करुन। गरन मंज़ पनॖन्यन बुज़र्गन हुन्द खयाल थवुन। हालांकि फरीदाबादॖ प्यठॖ आयि ख़बर ज़ि अकिस कऻशिर्य बटस सपुद देहान्त मगर अन्तेष्टि करनॖ विज़ि ॴस्य नॖ ज़्यादॖ नफ़र मूजूद। ह्यॆक्य नॖ वऻतिथ होरॖ योरॖ प्यठॖ। बडॖ हॊदॖ हऺर ॴसॖख खऺच़मॖच़ शव शुमशानघाटस ताम वातनावनस मंज़। हालांकि कांह नतॖ कांह वथ छि न्यॆरान, मगर मजबूरी, लाचऻरी तॖ बेबसी छि टाकारॖ बोज़नॖ यिवान मृतकॖ सॖन्दिस गरस मंज़। मगर बर्दाश्त छु करुन। ह्यमतो-समतो छु करुन तॖ यि क्रूठ वख छु कडुन। अज़ निराशा छि आशा पगाह रऻच़ हुन्द सफर बस छु क्रूठ।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

23.04.2020

23.04.2020 वह्यक (वैशाख) गटॖ पछॖ (कृष्ण पक्ष) मावस (देवादेव) (अमावस्या) ब्रसवार (वीरवार/बृहस्पतिवार/गुरुवार) श्री सप्तर्षि सम्वत 5096 राश मेष (चलान) ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
              देवी-सूक्तम्
या देवी सर्वभूतेषु निद्रारूपेण संस्थिता।
नमस्तस्यै नमस्तस्यै नमस्यतस्यै नमो नम:।।
**************************
          महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमो नम:
**************************
         नुंदॖ ऱेशिन्य श्रुक्य
ज़ाडॆय पुश द्यवलॖ अवज़ातो
ख्यॆयस नॖ गुर गपुन तॖ गाव
सु यॆलि शहस शेरि वोतो
सु अव ज़ोतो द्रॖन्ठ्य कति आव
          ***********
माने:- ज़्रंडॖ पोश छु मूर्ती लागनॖ बापथ कमज़ात यिवान माननॖ।कऺन्ड्य आसनॖ सबॖ छुनॖ गुर गुपुन गाव ति ख्यथ ह्यकान। अदॖ यॆलि सु दीवस शेरि यियि लागनॖ, पतॖ कति यियि सु कमज़ात माननॖ।
**************************
पंचान्ग:- (ॳज्यचि कथि मंज़ ह्यॆतिमॖत्य नाव छि फर्ज़ी मगर ज़ऻच़ छि बराबर। यॊदवय कांह नाव तॖ ज़ाथ आसि कऻन्सि सॗत्य मेलान सु छु मऺहज़ संयोगवश) राथ युस प्रस्ताव आव पास करनॖ तमि मूजूब यिमन अज़ नाद लायव, तिहन्द्य नाव छि - विनोद रैना, विमल रंगरु, विनय रावल, वीर रम्बाल, मोती रज़गॊर, संजय राज़दान, सुरेन्दर रऻफिज़, विमल रिगू, प्राण नाथ रीवू, ललित लंगर, कऺन्यालाल लाबरु, लाला जी लालॖ, लंबोदर लंगू, बनसी लोदव तॖ पम्पोश लाहूरी। यिहॖन्ज़ अध्यक्षता करि मनोहर यॆछ। दॊयिम अंद यिम सम्बालन, तिहिन्द्य नाव छि - रवी वांगुन, विरेन्द्र वॊंग, अशोक वान्चू, रमेश वोन्ट, नवीन वॊखुल, सोम नाथ वातल, बन्टी वैष्नवी, ओंकार नाथ वारिकू, नन्दन वागुज़ऻर्य, आशू विष्णु, काका जी वाज़ॖ, प्रद्युमन वुथू, नना जी वऻस्य, माहराज वुंपुर्य, रोशन लाल वुगरॖ, मिन्टू वऺली, रत्न लाल वॊफॖ, पिन्टू वास, चमन लाल शरऻब्य, महेंद्र शिशू, अशोक शॊंगलू, विजय शेर, अरनव शाह, पुष्कर शिवपूरी, प्यारे लाल शऻयिर, अवतार शाहपूर्य, सुरेन्द्र शाली, पवन जी शर्मा, सुमन सुल्तान, शादी लाल सराफ, नील सप्रू, यिहॖन्ज़ सदारत करि चूनी लाल वज़ीर। यिहुन्द फऻसलॖ यी थवनॖ बकाया आमॖत्य फऻसॖलन सॗत्य तॖ यी अख कुनी राय पानॖनावनॖ तॖ वरतावनॖ। पाबन्दी यी थवॖनॖ तिमन चीज़न प्यठ यिमव सॗत्य सऻर्यसॗय समाजस ज़ख वातनुक अन्देशॖ बासि। यिम क़दम छि तुलॖन्य यकदम ताकि कोरोनावयरसस छ़्यनन परि पख तॖ गछ़ि गऻब सान्यव नज़रव निशि। व्वमेद छि ज़ि यीत्य ति ज़ऻच़ समेयि यिकवटॖ युहुन्द निर्नय करि यॆकीनन फान यथ महामऻरी तॖ मेलि राहत कुल आलमस। ख़बर आयि ज़ि जनता कऺरफ्यु मियाद मा बडि ब्यॆयि कॆंच़न दॊहन ब्रोंहकुन मगर असि छॆ नॖ ह्यमथ हारॖन्य, मुकाबलॖ छु करुन डऺटिथ। विजय छि प्रावॖन्य मुक्कमल। सॗती पज़ि असि दय नाव स्वरान रोज़ुन, पनॖनिस धर्मस प्यठ अटल रोज़ुन। पनॖन्यन संस्कारन रऻछ करॖन्य। मॊह अहंकार त्रावुन तॖ माय तॖ मॊहब्बत बऻगरावुन, व्वपकार करान रोज़ुन। हाजतमंदस हाजत कडुन, ब्वछिहऺतिस बतॖ ख्यावुन, त्रेशि हऺतिस त्रेश चावुन। बजन कीर्तन पज़ि असि करान रोज़ुन। दवा ख्वतॖ छि दुआ ज़रूरी। तमी सॗत्य दूर च़लि महामऻरी। मऻज्य करि असि तॖ कुल आलमस पनॖन्य यऻरी।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

22.04.2020

22.04.2020, वह्यक (वैशाख) गटॖ पछॖ (कृष्ण पक्ष) मावस (अमावस्या) ब्वदवार (बुधवार) श्री सप्तर्षी सम्वत 5096 राश मेष (दुहचि 1.17 बजि प्यठॖ), ऋतु बसंत (चलान)...द्रठॖपऻन्च़ुक (पंचक) ति गछ़ि अज़ समाप्त।
चूंकि मावस छि ज़ॖ गछ़ान, ॳज़्युक वॊहरवोद यी पगाह
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
            देवी-सूक्तम्
या देवी सर्वभूतेषु बुद्धिरूपेण संस्थिता।
नमस्तस्यै नमस्तस्यै नमस्तस्यै नमो नम:।।
**************************
         महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
       नुंदॖ ऱेशिन्य श्रुक्य
दऺमी गरि तॖ दऺमी दरे
दऺमी करे स्वखन अवॖलास
दऺमी पऻन्च़न पान्डॖवन मऻज्य गरे
दऺमी लऻजिन क्रऻजी मास
        ***********
माने:- इन्सान छु गाहे व्यवॖहारस मंज़ मस रोज़ान, गाहे दरबॖदऺरी करान। गाहे स्वख बूगान, गाहे छि गरि रूज़िथ पान्च़न पान्डवन हॖन्ज़ मऻज्य बनान। गाहे छि क्रऻज्य मास लऻगिथ यि संसऻर्य व्यवहार पकॖनावान। संसऻर्य व्यवहार स्यद सपदिथ छि दय वतॖ साफ़ सपदान
**************************
पंचान्ग:- (ॳज़्यचि कथि मंज़ ह्यॆतिमॖत्य नाव छि सऻरी फर्ज़ी अल्बतॖ ज़ऻच़न हॖन्द्य नाव छि बरकरार। यॊदवय कांह नाव तॖ ज़ाथ मेलान छु कऻन्सि सॗत्य, सु छु संयोगवश) मन गव ख्वश ज़नानन हॖन्ज़ साफ़ दिली वुछिथ। तिमव थॊव पनुन फऻसलॖ फॊतिस तल यि वऺनिथ ज़ि बाकय ज़ऻच़ हॖन्द्य फऻसलॖ बूज़िथॖय तुलन पनॖन्यन फऻसलन फॊत थोद तॖ मिलावन आमॖतिस नऺविस फऻसलस सॗत्य तॖ वुछन क्याह फरॖख छि द्वन मंज़।अज़ ति छु द्युन आलव कॆंच़न ज़नानन। तिहॖन्द्य नाव छि - रशमी फॊतेदार, डेज़ी बान, डाली बाली, डिम्पॖल बादाम, दुर्गा भण्डऻरी, दुलारी बाम्ज़ऻय, राजॖ बडशाह, कविता बन्गॖर्य, कौशल्या बरबुज़, शीला बिन्दरु, शामा बीरॖ, शान्ता बोनी, रूपा बकाया, सुनीता भट, सुशीला बागऻत्य, स्वीटी बाबू, सोना बख़शी तॖ सीमा बज़ाज़। अथ ग्रुपस युस अध्यक्षता करि तस छु नाव सरला बडगऻम्य। दॊयिमि अंदॖ यिमन नाद यी दिनॖ, तिम छि - निर्मला मीरख्वर, चूनी माम, चंचल मिस्कीन, मीना मऺलिक, वीना मज़ऻर्य, रीता मल्लॖ, रीना मीय, मोहनी म्वटू, मीरा मोट्ट, मंजू महलदार, नीशा मचामॖ, मुनी मिस्री, मोना मुकॖ, मानसी मतू, मुनी मनवऺटी, रजनी मनॖट्य, तनू मुशरान, टिला मुनश्य, बबली मावॖ, डाली मरहटा, ग्वरी मुठू, प्राणा मोज़ा, प्रेमलता  म्वंगॖ। यिहॖन्ज़ सदारत करि मनीशा म्यरज़ॖ। ॳज़्यचि सबायि मंज़ गव ब्याख अख प्रस्ताव पास। सु गव यि ज़ि यिम शूराह वुहॖर्य ह्यॊर ह्यॊर छि वऻन्सि तिहॖन्द दाद तदबीर ति यी ह्मनॖ। पगाह छि व्वमेद ज़ि तिमन ति यी आवाज़ दिनॖ। मसलॖ छु संगीन। महामऻरी छि नरि ज़ंगॖ वाहरऻविथ। असि छि थवॖन्य पनॖन्य मुहिम जऻरी, यानि पनॖन्यन पनॖन्यन गरन मंज़ॖय बिहुन, अथॖ साबिनि सॗत्य बराबर छलान रोज़ॖन्य, ॴसस बुथि मास्क लऻगिथ थवुन, वगैरा वगैरा। तमि अलाव पनॖन्यन गरन मंज़ बिहिथ बजन, कीर्तन रोज़ुन करान। दय सुन्द नाव रोज़ुन स्वरान। मन शान्त थवुन। भगवऺती करि श्वब तॖ सारिनी पनुन अथॖरॊट। तस मंज़ छु थवुन विश्वास। पानस मंज़ सबूर ।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

21.04.2020

21.04.2020, वह्यक (वैशाख) गटॖ पछॖ (कृष्ण पक्ष) च़्वदह (चतुर्दशी) बॊम्वार (मंगलवार) श्री सप्तर्षि सम्वत 5096, राश मीन (चलान) ऋतु बसंत (चलान) द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
             देवी-सुक्तम्
या देवी सर्वभूतेषु चेतनेत्यभिधीयते।
नमस्तस्यै नमस्तस्यै नमस्यतस्यै नमो नम:।।
**************************
         महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
         नुंदॖ ऱेशिन्य श्रुक्य
यिम उन्दॖ श्वद दर्शनॖ गऺली
तिम न्यॆबरॖ ज़ऺर्य तॖ कऺली छी
यिम द्रायि तवॖ नारॖ शिहली
तिम अदॖ लालॖ म्वलली छी
      ***********
माने:- यिम मनॖ श्वद मनुष्य दयि ध्यानस मंज़ डऺटिथ रूज़िथ दर्शनस छि प्रारान, तिम छी न्यॆबरॖय कऺल्य तॖ ज़ऺर्य बासान।वुछिथ ति ज़न छि नॖ कॆंह वुछान, बूज़िथ ति ज़न छिनॖ बोज़ान। तिमय छि सम्सऻर्य नारॖ च़ऻलिथ शमॖ दमॖ व्यवहार करान, यॆम्यकिन्य म्वलॖल्य लालॖ छि गंज़रनॖ यिवान।
**************************
पंचान्ग:- (ॳज़्यचि कथि मंज़ ह्यॆतिमॖत्य नाव छि सऻरी फर्ज़ी मगर ज़ऻच़ छि बरोबर। अल्बतॖ कांह नाव तॖ ज़ाथ यॊदवय मेलान आसि सु छु सिरिफ संयोगवश) राथ ओस प्रस्ताव पास आमुत करनॖ ज़ि अज़ दिमव ज़नानन नाद  ताकि तिहॖन्ज़ शिरकथ रोज़ि बराबर। अज़ यिमन नाद आव दिनॖ, तिम छि जया जिन्स, ज्योति जलऻल्य, सरला जालॖ, सविता जान, सुनीता जेलखऻन्य, जिजि जद, कमला ज़रऻब्य, काकी ज़ितिश, संतोश ज़ालपूर्य, स्वीटी ज़ॖज, सनी ज़ाफरऻन्य, रमा थपल, रानी थालच़ूर। यिमन हॖन्ज़ अध्यक्षता करि बाला जी धर। सॗती आव वनॖन ज़ि ब्यॆयि अंदॖ दिमव ब्यॆयि कॆंच़न ज़नानन नाद युथ मसलस यी हल छ़ान्डनॖ जल जल। ब्यॆयि अंदॖ शिरकत करनवल्यन हुन्द नाव छु आरती द्वदॖ, अर्चना दूदॖ, अम्बिका दॊब्य, मोहनी दास, मंजू द्राबी, मीनू दीवऻन्य, रत्नी ददरु, रीमा द्राल, रेनु दत्त, बसंती पऻरिम, बिमला पऺन्ज़, पम्मी पॆशॖन, प्रोमिला पडरू  मुस्कान प्यालॖ, मीरा पठवऻर्य, मनु परची, सखी पऺटू, लक्ष्मी पूतू, टीना पजन, रीता पंडित तॖ रीमा पंडिता। यिमन हॖन्ज़ अध्यक्षता करि पूर्णिमा पीर। यिहॖन्ज़ राय ति  यी थवनॖ मऺजलिसि मंज़।पगाह छि ब्यॆयि ति कॆंच़न ज़नानन नाद द्युन तॖ पतॖ वुछव ॳस्य कॗतिस पऻनिस मंज़ छि। महामऻरी छि च़ऺलरावॖन्य कुनि ति सूरतस मंज़। दपान यि महामऻरी ह्यॆच़ॖन वातॖन्य कॆंच़न गामन ताम ति यॆति ग़रीब तबकॖक्य लूख छि ब्रोंठुय पसरॖ आमॖत्य ख्यनॖ-च्यनॖ रऺन्ग्य। सरकार छु जदोजहद करान, कॆंह प्राइवेट अदारॖ ति छि लऺगिथ सीवा करनस मंज़। यिछ़ॖय अख कऻशिर्य पंडितन हॖन्ज़ संस्था छि शालॖमऻर  गार्डॖनॖ क्षीर भवानी मंदरस मंज़, यिम हाजतमंदन ख्यन ख्वरदनी छि वातॖनावान। बकाया जायन ति छि दपान छि कॆंह संस्थायि समाज सीवायि लऺगिथ। डाक्टर, नरसॖ, वगैरा छि थॊद वऺथ्य वऺथ्य ब्यमारन हॖन्दिस यलाजस मंज़ व्यस्त। पनॖन्यन पनॖन्यन गरन मंज़ बिहिथ लूख छि हलम दऻर्य दऻर्य माजि मंगान पनुन अनुग्रह तॖ छिस करान ज़ारॖ पारॖ ज़ि कड़ असि अमि पीडायि मंज़ॖ असान तॖ गिन्दान तॖ कर मुश्किलन हल।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

20.04.2020

20.04.2020, वह्यक (वैशाख) गटॖ पछॖ (कृष्ण पक्ष) त्रुवाह (त्रॆयॊदशी) च़ऺन्दॖरवार (सोमवार) श्री सप्तर्षि सम्वत 5096,राश मीन (चलान) ऋतु बसंत (चलान)...द्रठॖपऻन्च़ुक पंचक (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
          देवी-सूक्तम्
या देवी सर्वभूतेषु विष्णुमायेति शब्दिता।
नमस्तस्यै नमस्तस्यै नमस्यतस्यै नमो नम:।।
**************************
         महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
          नुंदॖ ऱेशिन्य श्रुक्य
यिम च़ऺल्य च़ऺलिथ ख्यवान बऺली
तिम स्वखी म्वखॖ व्वज़ली छी
शॆतऻन्य खये कॊरख अकॖ खऺली
तिम सऺहज़ लबन नतॖ बऺली छी
यिम ॳन्दरॖ श्वद दर्शनॖ गऺली
तिम अदॖ लाल म्वलऻली छी
          **********
माने:- यिमव कामि च़ूरव कऻम करॖन्य ह्यॆच़ नॖ मटि, तिम छि सिरिफ यड बरान। तिम बुथि व्वज़ॖल्य छि स्वख तऺथ्य मंज़ महसूस करान मगर यिम शेतान रूप खयि पुरनॖ बदलॖ कॊरन हमवार बनऻयविथ ववॖनस क्रयि रूपी ब्योल। तिमय रटन नफ़स रूप हऺस्यतिस गंडस तल। तिमय प्रावन ज्ञान नतॖ छु तिहुन्द ज़िन्दॖ रोज़ुन बेमकसद। यिमन हुन्द मन ज्ञानॖ बलॖ श्रानव श्वद छु सपदुमुत तॖ दर्शनॖ बापथ छि छ़्रटॖ छ़्रट करान तिमय छि म्वलॖल्य लाल।
**************************
पंचान्ग:- (ॳज़्यचि यथ कथि बाति मंज़ ह्यॆतिमॖत्य नाव छि सऻरी फर्जी मगर ज़ऻच़ छि बरोबर) वुनि दपान सऻरी लूख यिम राथ ताम जमा गऺयि गछ़ान तिम छि नॖ मुतमऻयिन राथ तामकिस फऻसलस सॗत्य। अज़ यिमन ॳस्य दिमव आलव, तिहॖन्द्य नाव छि मृणाल ऋषि, कॆवल नाथ ॴमॖ, जय किशन आगॖ, तारख जु आर्यगऻम्य, विपुन अम्बारदार, सोहन अभय, अशोक ॴखून,
मदन लाल अदालती, शाम लाल शकदर, सूम नाथ हऻली, रोशन लाल हऺकीम, हरॖ काक हरकार।
यिमन सॗत्य सॗत्य दिमव नाद ब्यॆयन बायन युथ तिम ति समन ब्यॆयिस कुनि जायि तॖ दिन पनॖन्य पनॖन्य राय। तिहिन्द्य नाव दपान छि सॊरॖमऺल्यन हुन्द सुरेन्दर, अशोक सुम्बॖल्य, बनसी सील्य, शादी लाल सीरू, मोहन लाल साहिब, सूमनाथ साबुन्य, सोहन लाल सस, सतीश सफाया, प्राण नाथ सज़ऻवुल, रमेश सलमान, अमर नाथ सऻद, महेश्वर सादू, विजय सप्रू,अवतार सुल्तान। यिमन द्वनवनी दर्यन करि सदारत शान्ती लाल दरबऻर्य। ज़िमनी तुज्य कऺम्यतान्य कथ ज़ि यीत्य ति ऊतरॖ प्यठॖ आयि तॖ मशवरॖ द्युतुख  या अज़ कॆंह करन व्यच़ार, यिमव मंज़ छु नॖ वून्युख ताम कऻन्सि ज़नानि हॖन्ज़ शिरकत आमॖच़ करनॖ, बहस गव, कथ ज़्येठेय तॖ ॴखरस गव अख प्रस्ताव पास ज़ि पगाह दिमव नाद कॆंच़न ज़नानन यिम समस्या हल करनस मंज़ सक्षम छि। यिति आव सोंचनॖ ज़ि ज़नानॖ छि अज़कल प्रथ कारस शानॖ-ब-शानॖ पकान मर्दन सॗत्य इस्लिए तिहॖन्ज़ राय तदबीर ह्यॆन ति छि ज़रूरी। बूज़मुत ओस ज़ि अख मॊह छु हऺस्यतिस पावान, मगर अज़ वुछ ज़ि अख क्यॊम युस नॖ वुछनस तल ति यिवान छु, सु छु कुल आलमस पऻविथ ह्यकान। ब्यमार वारियाह दपान गऺयि ठीख ति मगर शिकार बन्यॆयि ॳम्यस क्यमिस दऺस्य अनगिनित। कोबू छु नॖ वुनि यिवान कुनि दुआ सॗत्य या दवा सॗत्य। महामऻरी हुन्द रूप कॊर दारन ॳम्य क्यॆम व्यॊखतुय। युस चीनस मंज़ व्वतलिथ आव, नच़ान नच़ान वोत अम्रीका, इटली, फ्रान्स तॖ रऺटॖन वथ सऻनिस वतनस कुन। दय छु सोन ति। ॳस्य करान रोज़व दुआ कॆंह छि लऺगिथ छ़ान्डनस दवा, ईश्वर बदलावि बद हवा तॖ दी असि सारिनी राहत तॖ न्यॆरव अमि कंड्य ज़ालॖ मंज़ ख्वश तॖ ख्वशहाल।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

19.04.2020

19.04.2020 वह्यक (वैशाख) गटॖ पछॖ (कृष्ण पक्ष) बाह  (द्वादऺशी) आथवार (रविवार/ एतवार) श्री सप्तर्षि सम्वत 5096  राश मीन (दुहचि 12.37 बजि प्यठॖ) ऋतु बसंत  (चलान) ....द्रठॖपऻन्च़ुक (पंचक) (चलान)...अज़ छि स्वामी लक्ष्मण जी जयन्ती ति
**************************
         देवी सूक्तम
अतिसौम्यातिरौद्रायै नतास्तस्यै नमो नम:।
नमो जगत्प्रतिष्ठायै देव्यै कृत्यै नमो नम:।।
**************************
        महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
         नुंदॖ ऱेशिन्य श्रुक्य
कस्ब यिम करन तॖ नॆमाज़ गुज़ारन
नज़ि तिम यथ संसारस ज़ाय
छख लागनय बऺदिथ पालनय करन
पऺपिथ यियख बऺड रहकाय
तारॖ तरन तॖ नारॖ उबरन
तवुक फऻज़ दियख पानॖ ख्वदाय
       **************
माने:- यिम इरादॖ कऺरिथ नॆमाज़ परन, तिम ह्यन नॖ यॆमि सम्सऻर्य ब्यॆयि ज़न्म कॆंह। स्वदिलॖ तस वनि कऺडिथ ववन पननि कर्म बूमि जान कर्मव हुन्द ब्योल तॖ नेमन हॖन्ज़ पालना कऺरिथ करन सम्सऻर्य व्यवहार। तिमनॖय इन्सानन यियि वॊवमुत पऺपिथ तॖ यिनख बंडार बऺरिथ। द्वख तॖ द्वन्द च़ऻलिथ ह्यकन तारॖ तऺरिथ। तिमन स्वकर्मन हुन्द फल ति दियॆख पानय दय
**************************
पंचान्ग:- (ॳज़्यचि कथि मंज़ छि सऻरी नाव फ़र्ज़ी मगर ज़ऻच़ छि बराबर मूजूद) बटॖ छु ॴकॖल। अथ मंज़ छु नॖ कांह शक मगर अज़कलॖक हालात वुछिथ छि सऻरी त्रऺहरेमॖत्य कुल आलमस सान। बटॖ ति छु हिल्यॊमुत तॖ गाबर्यॊमुत। दपान ख़बर छा यि जनता कऺरफ्यु मा रोज़ि ब्यॆयि कॆंह द्वह त्रॆयिमि मई ब्रोंहकुन। यी सूंचिथ दपान बटॖ ह्यॆयि मशवरॖ बचेमॖच़ ब्यॆयि ज़ऻच़ हॖन्द्यन नफ़रन तॖ छ़ान्डन कांह नॊव हल यॊदवय मुम्किन सपद्यख। अज़ यिमन नाद दिनॖ यी, तिहॖन्द्य नाव छि चूनी लाल चोंचि, जानकी नाथ चिकन, मखन लाल च़ॊल, चमन लाल चमन, महेन्द्रॖ चन्नॖ, भूषण लाल च़ॊक, रतन लाल च़ोंग, कऻशी नाथ च़्रौंग, इन्द्र जी चूदॖर्य। ब्याख मन्डली बनावनुक आव तजवीज़ तॖ हामी बऺरॖख तथ तजवीज़स ति। तथ मंडली मंज़ शऻमिल गछ़न वाल्यन हॖन्द्य नाव छि - ब्रिज नाथ टोक, रमेश टेंग, रोशनॖ टप्युल,बल जी ठस, बन्सी लाल ठुस, काका जी ठऻन्ठुर, बाला जी ठॊठ,  बन्सी लाल डुल, पवन जी डऻस्य, महाराज नारायण, मनोहर नोर, किरण जी नहरु, गिरधऻरी नऻज़िर, चुनु जी तऻमीर, मुनु जी त्यॊंगुल, रमेश जी तील्य, प्रथ काक तबरदार, जिया लाल तऻलिब, अजीत तलऻशी, अवतार त्रकुर।यिमन द्वनवॖन्य सम्मेलनन करि अध्यक्षता उत्पल अम्बारदार अज़। पगाह वुछव ज़ि ब्यॆयि कऻच़ाह ज़ऻच़ रोज़ॖ पथकुन सऻनिस समाजस मंज़ तॖ तिमन ति छु न्यमंत्रन द्युन पनॖन्य पनॖन्य बाव बावनॖ बापथ। छ़ॊटि कथि छु असि सु दवाह छ़ान्डुन युस यथ महामऻरी करि कुनी फुटॖज्य तॖ कड्यस कश दूर, स्यठाह दूर।गरॖ बरॖ दूर, सानि वतनॖ दूर, कुल आलमस दूर। राथ च़ायि ॳस्य जनॖ करफ्यू-किस पॖन्च़ॗहमिस दोहस मंज़ म्यॆ बासान। यछ़ तॖ पछ़ छि थवॖन्य तस प्यठ युस ज़गतस प्यठ असि बर्दाशत करनुक इम्तिहान छु ह्यवान मगर ॳस्य छि तऺम्यसॖन्दी ग्वन-गाण ग्यवान तॖ पकान ब्रोंह ब्रोंह अख अख दॊहा। यियस आर ॳज़ नय तॖ पगाह। पुशॖरोवमुत छु ॳसि पनुन पान तऺस्य युस यथ कुल आलमस छु रऻछ कऺरिथ।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
 भूषण कौल "दीप"
बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

18.04.2020

18.04.2020 वह्यक (वैशाख) गटॖ पछॖ (कृष्ण पक्ष) काह (एकादशी) बटॖवार (शनिवार/ शनिश्चरवार) श्री सप्तर्षि सम्वत 5096, राश कुम्भ (चलान) ऋतु बसंत (चलान), द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
            देवी-सूक्त
दुर्गायै दुर्गपारायै सारायै सर्वकारिण्यै।
ख्यात्यै तथैव कृष्णायै धूम्रायै कुर्मो नमो नम:।।
**************************
         महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
          नुंदॖ ऱेशिन्य श्रुक्य
केंच़व छ़लॖ कथ कल ब्वद हऺरिथ
केंच़ दार तॖ तोल आयवॖनी
केंच़न अमृतॖ प्रकथ बऺरिथ
केंच़न वुम्बॖर गऺयि दॖयवॖनी
         **********
माने:- हे दयि, छ़लॖ नियथ केंच़न कल तॖ ब्वद हऺरिथ। कॆंह छि शमशेरि दारि प्यठ पऺकिथ त्रकरि तूलिथ व्यवहार करान यानि तिम छि दय नेमन प्यठ पऺकिथ दयस याद करान। केंच़न बऺरॖथ प्रकृथ अमृत सॗत्य। पनॖन्यव कर्मव अनुसार गुज़ऻर दुयनस मंज़ सऻरॖय वुम्बॖर कॆंच़व।
**************************
पंचान्ग:- मशवरॖ वोत करान वुन्युखताम यिमन सारिनी मगर तसलाह छुनॖ आमुत वुनि। दपान यॊत ताम नॖ सऻरी पनॖन्य पनॖन्य राय तॖ तदबीर दिन तॊत ताम तुलव नॖ कांह ति त्युथ क़दम यॆमि सॗत्य पतॖ पछॖतावुन प्यॆयि असि। वैसे ति वोत बूगान असि कऻशिर्य बटन वारियाह द्वख पऺत्यम्यव त्रॖहव पऻन्त्रॖहऻव वऺरियव प्यठॖ कुनि नतॖ कुनि रऺन्ग्य। सोरुय गछ़ि स्यॆदि बुथि न्यॆरुन तवॖ म्वखॖ दपान ब्याख अख मऺजॖलिस ति बुलावव। तथ मंज़ शिरकथ करन वाल्यन हॖन्द्य नाव छि जवाहर लाल चतॖ, जानकी नाथ छच़बऺल्य, अवतार जलऻल्य, मिन्टू जेलखऻनी, पिन्टू जद, कीशव नाथ ज़रऻब्य, कऻशी नाथ ज़ितिश, नाथ जी ज़ालपूर्य, नारायण ज़जू, न्यरकाक ज़ऻलदार  नानक राम ज़ोर,राम जी ज़ाडू। फऻसलॖ जल्दी करनॖ म्वख सूंचुख ज़ि ब्याख अख मऺजलिस ति बुलावव ब्यॆयि अंदॖ सॗत्य सॗती। तथ मऺजलिसि मंज़ समन वाल्यन हुन्द नाव छि हृदय नाथ टुकर, अमर नाथ डीम्बि, हऺरी नखऻस्य, जयकिशन नकऻब, द्वारिका नाथ नकऻश, प्राण नाथ नऺगरीय, प्रेम नाथ नगऻर्य। हरी प्रसाद तिकू, चमन लाल तुतू, पृथ्वी नाथ तुरॖक्य पूर्णं जी तऻर्यगऻम्य,ॳनिल तुफची  नीलॖकऻन्ठ तोशखऻन्य तॖ तारा चंद त्रिछ़ॖल। ठहराव द्युतॖख यॆतिनस यि सूंचिथ ज़ि युहुन्द फऻसलॖ ति वुछव तॖ पनॖनिस रातकिस फऻसलस सॗत्य मिलऻविथ दपान वुछव क्याह नऺव राय न्यॆरि। अमि पतॖ दपान बुलावोख बकाया ज़ऻच़ हॖन्द्य नफ़र तॖ व्वमेद छि ज़ि दय करि श्वबॖय। यछ़ तॖ पछ़ गछ़ि रोज़ॖन्य ग्वडॖ पानस प्यठ, पतॖ यारस दोस्तस प्यठ। भगवानस छु शर्ण गछ़ुनुय गछ़ुन ति क्याज़ि तऺम्यसॖन्दि इशारॖ रॊस छु नॖ अख पनॖवऺथॖर ति अलान। सुय छु असली रऻछदर तॖ रहबर। पानवॖन्य यकुत थवॖनॖ सॗत्य छु ताक़त बडान तॖ ह्यमत द्वगनॖ गछ़ान। (यथ ॳज़्यचि कथि मंज़ छि सऻरी नाव फ़र्ज़ी मगर ज़ऻच़ छि बराबर)
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

17.04.2020

र17.04.2020, वह्यक (वैशाख) गटॖ पछॖ (कृष्ण पक्ष) दऺहम (दशमी) शॊकुरवार (शुक्रवार/ जुम्मा)श्री सप्तर्षि सम्वत 5096, राश कुम्भ (दुहचि 12.17 बजि प्यठॖ), ऋतु बसंत (चलान)...ॳज़्यकि प्यठॖ छु द्रठॖपऻन्च़ुक (पंचक) ति शूरु
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
           देवी-सूक्तम
कल्याण्यै प्रणतां वृद्धयै सिद्धयै सततं नम:।
नैर्ऋत्यै भूभृतां लक्ष्म्यै शर्वाण्यै ते नमो नम:।।
**************************
          महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
           नुंदॖ ऱेशिन्य श्रुक्य
नफसी लॊगुम नारव क्रॊछ़ो
दमॖ दमॖ मॊंगनम कॊछ़ हो
सरॖहन बुगी दिह गोम ऒछ़ो
बुगी स्वरन गॊछ़ हो
सम्सारस आयास पांछ़ द्वह पॊछ़ो
गऻम यीरॖ गाव तीर वॊछ़ हो
         ***********
माने:- नफसन लऻगिम नारॖव्य क्रॆछ़य, ति क्याज़ि दम दम कऺछ़्य मंगिथ गव हदॖ नीरिथ। न ख्यनॖ गव म्योन दिह कमज़ोर स्यठाह। मनॖ किन्य पज़ि दय सुमरन करॖन्य। संसऻर्य ह्यॆच़्यॊम ज़न्म पऺछ़्य रूप, आयोस पांछ़ द्वह यॆति कडनि, मगर क्वब्वदि किन्य ब्रमरोवुस वॆशयव, यॆमि किन्य सऺदरस मंज़ गोस फऺटिथ शुर्यव तॖ ज़ुर्यव सान।
**************************
पंचान्ग:- (ॳज़चि कथिबाति मंज़ ह्यनॖ आमॖत्य नाव छि सऻरी फर्ज़ी अल्बतॖ ज़ऻच़ छि मूजूद अज़ ति सऻनिस समाजस मंज़) राथ तॖ ऊतरॖ यीत्यन ज़ऻच़न हॖन्द्य म्यऻन्य कॆंह बऻय मील्य पानॖवुन्य मसलस हल छ़ान्डनॖ बापथ, तिमव दपान अख तजवीज़ छु द्युतॖमुत ज़ि कऻशिर्य बटन हॖन्ज़ॖ सारिनॖय ज़ऻच़न हॖन्द्य अख अख सदस्य बुलावोन तॖ वुछव ज़ि त्युहुन्द मन ति क्याह छु वनान। अथ फऻसलस कॊर सारिवॖय तऻकीद तॖ आलव आव दिनॖ मोहन लाल कौलस, मोहन कृष्ण कऻज़िस, मदन लाल क्यलमस, मनोज कॆनिस, रत्न लाल किसरिस, राज नाथ काकस,रविन्द्र करवऻनिस, रवी कऻसिदस, विजय कन्धहऻरिस, वीर जी करनऻलिस, ओंकार नाथ कोठस, व्वमॖ जी किचलिस, पोशकर नाथ काश्तकऻरिस, मखन लाल काकॖपूरिस,कमल जी कऺदलॖबुजिस, चमन लाल कसबस, बिटू जी गनहारस, बे़टॖ गऻसस, बाल जी गुलस, बल जी गऺडिस, बन्टू जी गाडरिस, चूनी लाल गोजस, कन्या लाल गऺर्यऻलिस, कऻन्ठॖ जू गुर्यटिस तॖ गिरधऻरी लाल गिगू-हस। युहुन्द अध्यक्ष रोज़ि चमन लाल चरऻग्य। फऻसलॖ आव करनॖ ज़ि यीत्य बऻच़ बुलावनॖ आयि, यिहॖन्ज़ राय तदबीर ज़ानॖनॖ पतॖ दिमव आलव बकाया ज़ऻच़ हॖन्द्यन नफ़रन ति तॖ त्युहुन्द मशवरॖ ति ह्यमव। मुद्दा छु समुत थावुन तॖ सऺमिथ ॳक्यसॖय रज़ि लमुन। लऺसिन, सऻनिस समाजस मंज़ छे नॖ ज़ऻच़न हॖन्ज़ कमी। अख ॳक्यसॖन्दि ख्वतॖ सोंचन वऻल्य, वतॖहावक। पगाह दपान दिमव आलव ब्यॆयि बकाया रूद्यमॖत्य बायन तॖ वुछव किथॖ पऻठ्य च़लि यि महामऻरी सानि गरॖ बरॖ दूर, सानि अलाकॖ दूर, सानि वतनॖ दूर, कुल आलमॖ निशि दूर। वुछव ॳस्य ति क्याह छु ईश्वरस   मन्ज़ूर। ॳस्य गछ़व शिवॖ नाथस शर्ण, महागणेशस प्यमव पर्ण। माजि करव ज़ारॖपार मंगव माजि हुन्द अनुग्रह तॖ फ्वलव ॳस्य सऻरी गुल- गुलाबॖक्य पऻठ्य। अज़ निराशा छि आशा पगाह, रऻच़ हुन्द सफर बस छु ज़्यूठ, ज़िन्दगी सास रंग छि बदलान, मनॖ मो गछ़ च़ॖ मोयूस।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

16.04.2020

16.04.2020, वह्यक (वेशाख) गटॖ पछॖ (कृष्ण पक्ष) नवम (देवादेव) (नवमी) ब्रसवार (वीरवार/बृहस्पतिवार/गुरुवार) श्री सप्तर्षि सम्वत 5096, राश मकर (चलान) ऋतु बसंत(चलान)
************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
            देवी-सूक्तम
रौद्रायै नमो नित्यायै गौर्यै धात्र्यै नमो नम:।
ज्योत्स्नायै चेन्दुरूपिण्यै सुखायै सततं  नम:।।
**************************
        महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
       नुंदॖ ऱेशिन्य श्रुक्य
सब्रॖ यॊद करख सुय ब्वदि चोनो
यि लानि आसी ती अथि यियी
च़ॖ यॊद करख म्योन तॖ म्योनो
अदॖ द्युतॖमुत अथि च़ॆय ह्यॆयी
       *************
माने:- यॊद ब्वज़ॖवान आसख पनॖनि ब्वदि बलॖ लाग सबरॖक्य जामॖ। यॊद नसीबस आसिय खसिय सोरुय रथि। तम्यपतॖ यॊद दय ध्यानस मंज़ थ्यर रोज़ख यिय रुत कॊरमुत आस्यथ सुय यियी फलॖ रूप प्रालब्द बऺनिथ ब्रोंठकुन
**************************
पंचान्ग:- (यथ मंज़ ह्यतिमॖत्य नाव छि फर्ज़ी अल्बतॖ ज़ऻच़ छि वुनि ति चलान सऻनिस समाजस मंज़) राथ वुछ असि ज़ि "अ" प्यठॖ "ज्ञ" ताम छि सऻरी लूख सोंचस प्यॆमॖत्य ज़ि यि व्वदुरूग यानि यि महामऻरी कर च़लि तॖ जगतॖक्य सऻरी लूख तॖ ॳस्य सऻरी त्रावहऻव फ्रखा ह्यु। बोज़ान ओसुस ज़ि राथ ॴस्य ब्यॆयिस ॳकिस अलाक़स मंज़ मील्यमॖत्य कॆंह ज़ऻच़ मसलन कितॖर्य, कुटॖवाल, कोठदार, कऺब्य, कोनूनगो, किस्य, कऺल्य, कल्लॖ, कुच़ॖर्य, काच़ॖर्य, कल्पुश, क्रऺन्ड्य,कान्दर, कमज़ात, कन्नॖ, कारिहऺल्य तॖ त्रॆयमिस ॳकिस अंदस ॴस्य समेमॖत्य ख्वडॖ, ख्वडॖबऺल्य, खज़ऻन्ची, ख्वदाय, ख्वरॖद्य, खान, खॗबॖर्य, खरदूर्य ।दपान हालाति हाज़िराहस प्यठ कॊर यिमव ति संजीदगी सान आच़ार व्यच़ार तॖ वऻत्य तऺथ्य नऺतीजस प्यठ यथ प्यठ ऊतरॖक्यन ज़ऻच़न हॖन्ज़ राय ॴस बन्यॆमॖच़। रातॖक्यन सारिनी यानि द्वनवुनी सम्मेलनन हॖन्ज़ अध्यक्षिता ॴस्य करान कऻन्ठ जू मंदल। सूंचुख त्र्यॆमिस मई-यस ताम रोज़ुन तिथय पऻठ्य यिथ पऻठ्य वुन्युख ताम आयि रोज़ान तॖ सरकऻर्य ॴलान बोज़ान। ख़बर आयि ज़ि स्यक्टर पाच़ॖत्रॖह नॊयडा-हस मंज़ गव कुस ताम ख्वशू सऻब स्वर्गस तॖ ज़नान ॴसॖस गरस मंज़ कुनी ज़ऺन्य। अन्तिम संस्कार करनॖ बापथ ओस नॖ हऻज़िर कांह, शुर्य पनॖन्य अख होर, ब्याख योर, मातमदऻरी जायि ह्यॆक्य नॖ वऻतिथ अंग ॴश्यनाव वखतस प्यठ। यिथॖ तिथॖ कॊरुख ह्यमतो-समतो दऺछिन्य खोवॖर्य कॆंच़व नफरव तॖ वातॖनोवुख शव शुमशानगाठ। यि छि हालथ असि अज़कल। यिहऻय हालत छि च़्वापऻर्य।मगर ॴसस त्रॊप दिथ छि सऻरी ति कयाज़ि यि छु क्वदॖर्यतुक क़हर चलान वुन्यक्यनस। कांह समादान, कांह हल छु नॖ कऻन्सि हॖन्ज़ि नज़रि तल।  च़ालॖन्य छि पनॖन्य दऻद्य पानय। वखतुक छु यि अख फसानय। महामऻरी छु वॊलॖमुत यि सोरुय आलम। दयस छि ख़बर ज़ि कॊत ताम छु असि यि कष्ट बूगुन। माजि गछ़ शर्ण, तऺस्य प्यॆ पर्ण। सॊय छि तार दिनॖ वाज्यन। बस ॳस्य करव ताब। ताबस छु लाब।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

15.04.2020

15.04.2020 वह्यक (वैशाख) गटॖ पछॖ (कृष्ण पक्ष) ॴठम (देवादेव) (अष्टमी) ब्वदवार (बुधवार) श्री सप्तर्षि सम्वत 5096, राश मकर (चलान) ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
          देवी-सूक्तम्
नमो देव्यै महादेव्यै शिवायै सततं नम:।
नम: प्रकृत्यै भद्रायै नियता: प्रणता: स्म ताम।।
**************************
       महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
      नुंदॖ ऱेशिन्य श्रुक्य
मंगॖ हऻ तॖ छु मंगनस आरा
छय मंगनस तॖ मरॖनस अकॖय बिथ
हातम तय जगॖ दिव दाता
छुख पानय दाता ब्यॆयॆन हुन्द हिथ
             ***********
माने:- यॊद ॳस्य मंगव तस, तमि खऻतरॖ गछ़ि फलॖ रूप चन्दॖ हार आसॖन्य। मंगुन तॖ मरुन छु ह्युवुय मुशकिल तॖ क्रूठ। द्वशवऺनी सूरच़न मंज़ गछ़ि आसॖन्य तोर किछ़ फलॖ रूप ज़ीन्यमॖच़ हार। ही दयि हातम तयुन ह्यु बोग सोज़ ज़गि। पानय छुख दिनॖवोल, नाव छु ब्यॆयिसुन्द लगान या हीतू छु ब्याखॖय बनान।
**************************
पंचान्ग:-(ॳज़चि कथबाति मंज़ ह्यनॖ आमॖत्य नाव तॖ ज़ऻच़ छि सऻरी फ़र्ज़ी। कऻशिर्य बटन हॖन्ज़ ज़ऻच़ हावनॖ म्वखॖ छि ॳज़िच यि कथबात वनॖनॖ आमॖच़)
राथ दपान फऻसलॖ सपुद ज़ि यि जनता करफ्यू बऺडरावव ब्यॆयि कॆंच़न दोहन। ॳकिस ब्यॆयिस सॗत्य आच़ार व्यच़ार कऺरिथ द्राव यि नऺतीजॖ ज़ि त्र्यॆमिस मई ताम गछ़ि रोज़ुन यि कऺरफ्यु चालू। फुट्यमति दिलॖ दपान कॊर आंकार प्रेम नाथ खरन। साथ द्युतमुत छुनस प्राण नाथ पऺन्ज़्य तॖ ब्यॆयि मनकाक खचरन। मूती लाल शेरस दपान आयेयि ह्वंगॖ यि कथ मानॖनस मगर अध्यक्षण दॊपॖनख ज़ि यि फऻसलॖ प्यॆयि मानुन ति कयाज़ि ॳथ्य मंज़ छि लूकन हॖन्ज़ बॆहबूदी। दमॖकाक अध्यक्ष सॖन्ज़ि कथि कॊर सारिवॖय आन्कार। मोहन लाल हान्गुल दपान गोमुत ओस रॊबूद ह्यु तॖ ह्यॊकुन नॖ कलॖ फिरनऻविथ ति क्याज़ि सूंचुन ज़ि न्येरि क्याह तकॖरार कऺरिथ। मदसॗदन ब्रोर याम कॆंह वनुन ओस यछ़ान दमकाक हऺस्यवोल यानि अध्यक्ष ओस अमिस इशारॖ हावान तॖ ब्रोर ओस पनुन ॴस वटान यकदम। सरकार छु वुन्यक्यनस पानॖ द्वन तॖ च़्वन मंज़।सॊरुय ज़गत छु परेशान तिमव मोन ज़ि त्र्यॆमिस मई-यस ताम पज़ि असि पनॖन्यन पनॖन्यन गरन मंज़ॖय रोज़ुन तॖ मुम्किन छु तॊताम यी हालातन कॆंह बदलाव।  महीश्वर नाथ वूंठ बोज़ान ओसुस  ओस सऻर्यसॖय वखतस वूंठ ह्यु बिहिथ तॖ वुछान दऺछिन्य तॖ खोवॖर्य वूंठा ह्यु। अथ जनता करफ्यू-हस प्यठ कऺर कथबाथ दॊयिमि फिर्कन ति यथ मंज़ दपान आमॖत्य ॴस्य
विरेन्द्र गगुर, वीर जी तोतॖ, वासुदेव च़रिबचॖ तॖ मनोज बॊम्बुर। यिमव ति द्युत दपान ज़ोर त्र्यॆमिस मई-यस ताम तॖ दॊपुख यिथय पऻठ्य सबॖर करुन, ह्यमथ ह्यॆन्य तक्लीफ च़ालुन तॖ करोनोवयरसस शिकस्त द्युन, पनुन पान बचावुन तॖ दॊयिम्यन हॖन्दि जानॖच रऻछ करॖन्य। दय सुन्द नाव स्वरुन लगातार। सुय दी तार असि सारिनॖय तॖ कुल्य जहानस। पगाह करव कथ कऻशिर्य बटन हॖन्ज़न ब्यॆयि ब्यॆयि ज़ऻच़न ह्यथ।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

14.04.2020

14.04.2020,वह्यक (वैशाख) गटॖ पछॖ (कृष्ण पक्ष) सतम (देवादेव) (सप्तमी) बॊम्वार (मंगलवार), श्री सप्तर्षि सम्वत 5096, राश मकर (रऻच़ हॖन्ज़ॖ 1.56 बजि प्यठॖ), ऋतु बसंत (चलान)
**************************
 नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
        क्षमा प्रार्थना
अपराधसहस्रानि क्रियन्तेsहर्निशं मया।
दासोsयमिति मां मत्वा क्षमस्व परमेश्वरी।।
**************************
       महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
         नुंदॖ ऱेशिन्य श्रुक्य
यॆम्य ॳस्य बुग्य दुनियाहस सूज़ी
तस ॳस्य तवॖ लूक पुछ़्य लगव
खसॖन्य दितिन्य त्वरगॖ तॖ तऻज़ी
यिमन खऺसिथ गऻज़ करव
तस पथ मरव सोरुय सोज़ी
यस ॳस्य नम तॖ माज़ लगव
         ************
माने:- यॆम्य दयन ॳस्य यथ संसारस मंज़ सूज़्य, ॳस्य छि तिहॖन्दि बापथ प्रज़ा या ख़लक़ मानॖनॖ यिवान। सु छु सोन खऻलिक तॖ मऻलिक तऺमी दित्य असि खसॖन्य गुर्य तॖ तऻज़ बचॖ (अरबी गुर्य) यिमन प्यठ ॳस्य खऺसिथ सवऻर्य छि करान। मगर यॊद ॳस्य शुकुरगुज़ऻरी तॖ नावॖ रूपॖ मालॖ जरव, सु मानि त्यॆलि असि पनुन। ॳस्य छि तिहॖन्दी अंश। सु छु सोन नम तॖ माज़ पालन तॖ प्यतॖरनॖवोल
**************************
पंचान्ग:- संजीदॖ गऺयि सऻरी। पनॖन्यन पनॖन्यन गरन मंज़ छि बिहिथ सोंचान सऻरी। मोबायल रऺटिथ पनॖन्यन पनॖन्यन अथन मंज़ सऻरी। अख ॳकिस प्रॖछ़ान ख़बर अतर सऻरी। दय कऺरिन्य पनॖन्य यऻरी। ॳकिस सुनसान वति प्यठ पकान ॳकिस द्वदॖवऻलिस प्यव बऺरिथ द्वदॖ बानॖ मंज़ सडकि तॖ द्वद आव छऺकरनॖ सऻर्यसॖय सडकि  सडकि प्यठॖक्य ब्वछिहऺत्य होन्यव वुछ यि द्वद, तिमव ज़न लॊब कुसताम ज़्युत ह्यु तॖ मत्यॆयि अथ सडकि प्यठ छऺकॖरावनॖ आमतिस द्वदस तॖ बीठ्य ल्यवनि। ॳथ्य दोरानस आम नज़रि अख नफरा अथस मंज़ अख कटोरॖ ह्यथ तॖ कूशिश करान यि छऺकरिथ द्वद सॊम्बरावानॖच तॖ थॊम्बि थॊम्बि तुलान तॖ बरान अथ कटोरस मंज़। बासान ओस यि नफ़र छु रूदमुत ख़बर करॖ प्यठॖ ब्वछि-हॊत तॖ त्रैशिहॊत । यि नज़ारॖ वुछ म्यॆ टी वी-यस प्यठ। मगर हकीकतन वुछव यॊदवय तॖ यथ महामऻरी मंज़ आसन ख़बर कॗत्य तिम यिम  वाकय त्रेशि क़तरन आसन क्रेशान, बतॖ-फल्यन या च़ॊचि खन्ज्यन आसन तरसान। सरकार छु कूशिश करान लूकन ताम वातनॖच मगर लूख छि नॖ सऻरी हऻक्यमस ताम ह्यकान वऻतिथ ति क्याज़ि कांह छु नॖ यछ़ान पुलसॖ डंडॖन तल युन। बोज़ान ओसुस  ज़ि यथ कोरोनावयरसस मात दिनॖ बापथ आयि द्वन त्र्यन जायन मोबायलॖ दऺस्य कान्फॖरनॖस कालॖ करनॖ यथ मंज़ शऻमिल गऺयि क्वकर, कुकिल, काव, कोतर, ककव ॳकि अंदॖ तॖ ब्यॆयि अंदॖ ॴस्य समेमॖत्य खर, खचर,पन्ज़्य  शेर, ब्रोर, हान्गुल, हऺस्यवोल, वूंठ।  ब्यॆयि अकि अन्दॖ ॴस्य लऺग्यमॖत्य व्यच़ार करनि गगर, तोतॖ,च़रिबचॖ   बॊम्बुर। यिम सऻरी छि नॖ व्वपर या होरॖक्य-योरॖक्य बऺल्कि सानी पनॖनि ज़ऻच़ हॖन्द्य नफ़र। यिम सऻरी छि छ़ान्डान कांह हल यथ महामऻरी। म्यॆ वऺन्य नॖ शिरकत करनवाल्यन हॖन्द्य नाव ज़ऻनिथ मऻनिथ यि सूंचिथ ज़ि परनवऻल्य   वुछन पानय कमि ज़ऻच़ हुन्द कुस ओस या क्वस ॴस्य कान्फरन्सि मंज़। व्वमेद छि ज़ि पगाह या कऻल्यक्यथ करन नवि ज़ऻच़ हॖन्द्य सऻन्य बऻय ब्यॆनि ब्रोंहकुन कथबाथ। ॳज़्यचि कान्फरन्सि हुन्द अध्यक्ष छि दपान ओसमुत छु दमॖकाक हऺस्यवोल। माजि दुर्गायि करव ज़ारॖपार युथ दी महामऻरी निशि जल जल म्वकॖजार,असि त्वहि, सऻनिस वतनस तॖ कुल आलमस।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

13.04.2020

13.04.2020, वह्यक (वैशाख) गटॖ पछॖ (कृष्ण पक्ष) शॆयम (देवादेव) (षष्ठी) च़ऺन्दॖरवार (सोमवार) श्री सप्तर्षि सम्वत 5096, राश धनु (चलान) ऋतु बसंत (चलान)...अज़ छि वऻशऻकी(बैसाखी/वैशाखी)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
         क्षमा-प्रार्थना
आवाहनं न जानामि न जानामि विसर्जनम्।
पूजां चैव न जानामि क्षम्यतां परमेश्वरी
**************************
        महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
          नुंदॖ ऱेशिन्य श्रुक्य
नावि वसख गाह व्वखॖल्य खसख
दुच़्यॊत करनॖ लबख मो दय
यॊदवय अकि वति महकम आसख
दूर पन्थनॖ लोसख मो दय
याम नॖ दुन्ययिहिक्य ज़ंजीरॖ कासख
ताम ज़ोसख तॖ आसख मो दय
        *************
माने:- सम्सऻर्य यॊद गाहे नावि वसख (क्वकर्म), या पैदल पकख(स्वकर्म)। अहम् रॊस कारस तार लगुन छुय मुश्किल। पनॖन्य ख्वर द्वन पायदानन प्यठ थऺविथ गछ़ि दुच़्यॊत। यॊद ॳकसॖय शायि ख्वर टीकॖरावख तॖ सम्सऻर्य बंदनव मुछि रोज़नुक यतन करख, बेशक सपदी हलि मुशकिल। मगर तॊतान्य आसख  च़ॖ ज़ॊसन च़ामुत, च़ॖ कति ह्यकख पतॖ पानसॖय मंज़ दय लऺबिथ।
**************************
पंचान्ग:- अज़ छि बऻसऻखी। वखतॖ अकि यानि कुनवुहशथ तॖ नमतॖ ब्रोंठ ॴस्य कऻशिर्य बटॖ यि द्वह बडॖ चावॖ सान, चमॖ-खमॖ सान मनावान तॖ अमि द्वह ॴस्य गछ़ान निशात बाग़, शालॖमऻर बाग़, चॆशमऻशऻही, नहरू पार्कि, हऻर्वन, बत्तॖ-स्युन ह्यथ, गाड्यन मंज़, बसन मंज़, नावन मंज़, डून्गन मंज़। निशातॖ शालॖमऻरॖक्यन फ्वारन हुन्द लुतुफ तुलुन, यिमन बाग़न मंज़ गछ़िथ नरि ज़ंगॖ वाहरऻविथ मुस कडुन, कुल्य छ़ायन तल सतरऺन्डा या मसनन्दा वाहरऻविथ ख्यनाह च्यनाह करुन छु अज़ अख स्वपना सानि बापथ तॖ इतिहास या तवारीख सानि नवि पुयि खऻतरॖ। बऻसऻखी मेलॖ ओस लगान रामॖच़न्द्रनि स्वथि प्यठॖ ति। सोन व्वत्सव यि बऻसऻखी न ॴसनॖ पतॖ ति ॴस्य ॳस्य कऻशिर बटॖ व्वलसनस यिवान तॖ अंसान गीन्दान तॖ शोकॖ सान यि द्वह मनावान। सुबहऻय सुबहऻय ॴस्य लूख ईशबऺर गछ़ान श्रान करनि।तपऻरी ॴस्य स्वामी लक्ष्मण जीसुन्द आश्रम ति गछ़ान  नहरू पार्कि ॴस्य अगन-बोटन यानि मोटर-लान्चस खसिथ डलुक सऻर करान। सॊनॖ लऻन्कि, रॊपॖलऻन्कि या चार चिनारी गछ़ान तॖ बोनि शेहजारस तल स्वर्गॖदारा छावान। वऻन्सा अख द्रायि। तिम द्वह यिन नॖ फीरिथ। याद छि ज़न ॳंन्दॖर्य ॳन्दॖर्य तछान तॖ ॳछ छि नम गछ़ान। मगर दमफुट्य छि व्वंय। शुर्यन क्याह तॖ कोताह बावव तॖ तिमन दॊहन हुन्द नज़ारॖ किथॖ पऻठ्य हावव। कऺशीरि न्यबर छु नॖ व्वंय असि यि द्वह किहीं बासान। युहुस नॖ बिल्कुलुय। अज़ छि असि पनॖनिस पनॖनिस डेरस प्यठॖय बऻसऻखी मनावॖन्य पऺत्यम्यन यादन पर्दॖ त्रावुन तॖ ख्वखॖमऺतिस यानि कोरोनावयरसस हऻविथ द्युन पनुन सबॖर तॖ लडुन  छु यि जंग तॊताम यॊत ताम नॖ यि महामऻरी पनुन ऱॊख बदलावि। पाठ पूज़ा छु जऻरी थवुन पनॖन्य हिफाज़त छि पानय करॖन्य।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव

12.04.2020

12.04.2020, वह्यक (वैशाख) गटॖ पछॖ (कृष्ण पक्ष) पऻन्च़म (देवादेव) (पन्चमी) आथवार (रविवार/एतवार) श्री सप्तर्षि सम्वत 5096, राश धनु (शामन 7.12 बजि प्यठॖ), ऋतु बसंत (चलान)...अज़ छु ऋषॖपीरस श्राद्ध
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
       क्षमा-प्रार्थना
मंत्रहीनं क्रियाहीनं भक्तिहीनं सुरेश्वरि।
यत्पूजितं मया देवी परिपूर्णं तदस्तु में।।
**************************
         महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
        नुंदॖ ऱेशिन्य श्रुक्य
दोहस गुज़ोरुम नॊफलॖ हथा
रातस रूदुस ज़ागय
यॊद व्वंय करहऻम क्वबूल्यथा
नतॖ हून ज़न फ्यूरुस आगय
        ***********
माने:- दॊहस कऺरॖम इबादथ स्यठाह, रातस रूदुस तस ज़ागि। यॊद व्वंय यिहोय कर्यम क़ॊबूल, त्यॆलि खार्यम बॊठ। न तॖ गछ़्यम हून्यसॖन्द्य पऻठ्य गरॖ गरॖ फेरुन
**************************
पंचान्ग:- पीर छा बॊड किनॖ यकीन। यि सोंचान सोंचान द्रायि असि पनॖन्य वऻन्सा मगर सोंचुन छु  ज़ि सऻन्य नऺव पुय क्याह करि। कथ कथ दी वाठ। महामऻरी कोरोनावयरसन थऺव्य सऻरी आवॖर्य कुनि न तॖ कुनि रन्ग्य। मेड गरस मंज़ न यिनॖ म्वखॖ ह्यॊछ व्वंय सान्यव ल्वकट्यन म्वकट्यव शुर्यॆव बानॖ बठॖ छलॖन्य, कमरन मंज़ डुवन फश द्युन, छलुन छॊकुन। कॆंह लऺग्य त्युथ दवा छ़ान्डनि यॆमि सॗत्य यि महामऻरी गछ़ि मूलय गऻब। दूर गछ़ि असि निशि, सानि परिवारॖ निशि, सानि वतनॖ निशि, कुल्य जहानॖ निशि। कॆंह लऺग्य पीरन फकीरन हुन्द ध्यान करनि तॖ छि यछ़ान ज़ि तिम हावन तिछ़ कांह करामाथा यॆमि सॗत्य यि बलाय गछ़ि दूर मूलॖ म्वन्जे। थाल वऻयिख, शंख नाद द्युतुख, च़ऻन्ग्य ज़ऻलिख। केंह छि करान स्तुति, आराधना, प्रार्थना सुबॖ शाम पनुन पान बचावनॖ बापथ, पनुन परिवार बचावनॖ बापथ, पनुन वतन बचावनॖ बापथ, कुल जहान बचावनॖ बापथ। ॳथ्य सिलसिलस मंज़ फिर्य म्यॆति कॆंच़न धार्मिक किताबन हॖन्द्य वर्क पनॖनि रऻछ बापथ तॖ पनॖनि कल्याण बापथ मगर बॖ गोस हऻरान तॖ परेशान यि वुछिथ ज़ि सानि ज़ऻच़ मंज़ यिम ति धार्मिक किताबॖ छि तिमन मंज़ हऻविथ मंत्र छि नॖ ॳकिस ब्यॆयिस  सॗत्य म्युल ख्यवान।ब्यॊन ब्यॊन किताबन मंज़ छु कूनुय मंत्र ब्यॊन ब्यॊन त्रायि आमुत ल्येखनॖ। कुनि किताबि मंज़ छु कॆंह मंत्र ज़्यादॖ हऻविथ तॖ कूनि मंज़ छि कम। शब्दन मंज़ ति छि कुनि कुनि किताबि मंज़ कुनि कुनि जायि फरॖख ल्येखनस मंज़ ति तॖ परनस मंज़ ति। इन्सान छु दु-च़्यॆतिस गछ़ान ज़ि तऺमिस कमि किताबि हुन्द कुस मंत्र पज़ि परुन तॖ याद करुन। जंत्री मंज़ छि कॆंह मंत्र ॳडी हऻविथ, केंच़न मंत्रन हॖन्द्य शबॖद बासान ग़लत यॆलि मिलॖनावान छि दॊयिम्यन किताबन सॗत्य। खऻर वनुनुक मतलब छु म्यॆ यि ज़ि सानि यिम धार्मिक किताबॖ छि यिम गछ़ॖ कुनि ॳकिस संस्थायि प्यठॖ छापनॖ यिन्य ताकि मंत्रन परनस मंज़ रोज़िहेनॖ कांह फरॖख। चाहे सु शिव महिम्ना स्तोत्रम छु या सु इन्द्राक्षी स्तोत्र छु,चाहे सु रुद्राष्टकम छु या गुरु स्तुति छि।यिमन मंत्रन गऺछ़ नॖ ब्यॊन ब्यॊन किताबन मंज़ कांह फरॖख रोज़ॖन्य। बिहिथ छि पनॖन्यन पनॖन्यन मुर्यॆन मंज़, शुर्यन गव काबॖतऻनॖ छि नॖ ह्यकान गिन्दिथ द्रॊकिथ, काबॖतऻनॖ गव बड्यन तॖ बुडन छि नॖ ह्यकान सुबहुक सऻर कऺरिथ, छि नॖ ह्यकान नऺच़िथ फीरिथ। दय सुन्द नाव छि स्वरान।अज़कल छि पीरस ति थफ कऺरिथ यॆकीनस ति थफ कऺरिथ। ज़ानि दय यि ख्वखॖमॊत कर तुलि थफ।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

11.04.2020

11.04.2020, वह्यक (वैशाख) गटॖ पछॖ (कृष्ण पक्ष) च़ोरम (चतुर्थी) बटॖवार (शनिवार/ शनिश्चरवार) श्री सप्तर्षि सम्वत 5096, राश वृश्चिक (चलान) ऋतु बसंत (चलान)....अज़ छि संकट च़ोरम (संकट निवार्ण चतुर्थी)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
          क्षमा-प्रार्थना
अपराधशतं कृत्वा जगदम्बेति चोच्चरेत।
या गतिं समवाप्नोति न तां ब्रह्मादय: सुरा:।।
**************************
         महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
        नुंदॖ ऱेशिन्य श्रुक्य
वादॖ कॊरुथ तॖ करबा
ति करबा च़्यतस प्यॆयी
ऒत च़्यॆय च़ोनुथ खरबा
यि सऻन्च़मॖच़ॖय क्वंगॖ वऻर ख्यॆयॆ
तति कुस बा दारी फॊरबा
यॆति ज़रबा करतलॖ प्यॆयी
मरनस ब्रोंठुय मर बा
अदॖ मऺरिथ मरतबॖ बनी
        *********
माने:- वादॖ कऺरिथ कर यादि ख्वदा। यॆमि सॗत्य च़्यॆ च़्यतस प्यॆयिय च़ॖ मा छुख तऺम्यसुन्द अंश। च़्यॆ बॊरुथ पनुन नफस वुन्युखताम । यि नफ़स रूप हऺस्य ख्यॊय खऻर बॊद। ॳमिस खसिय नॖ ज़ांह ति यड। यॊतान्य च्यऻन्य प्रकरथ डलिय पूरॖ पऻठ्य। अक्लि रूप सऻन्च़मॖच़ॖय क्वंग वऻर ख्यथ न्यॆरीय नॖ कांह ति ज़िम्मॆवार। ज़न प्यॆयि करतल हऺटिस गछ़िय खश। यॊद ज्ञान प्रऻविथ व्यवॖहारस मंज़ अनख त्यॆलि ह्यन मऺरिथ यज़तॖ सान लूख च्योन नाव। याने युस  तसॖन्दिस यादस मंज़ ब्रंज़ि ब्रंज़ि मरि, सु ह्यकि मऺरिथ ज़ऻनिथ
**************************
पंचान्ग:-  व्हाटसापस प्यठ छि च़ोर पांछ़ नफ़र पंचान्ग सोज़ान ब्यॊन ब्यॊन ग्रुपन मंज़। कॆंह छि अंग्रीज़स मंज़ कऻशुर ल्यीखित पनॖन्य कऻम म्वकलावान तॖ कॆंह छि देवनागरीयस मंज़ कऻशिर्य पऻठ्य पंचान्ग ल्यॆखनॖच कऻम करान। बॖ छुस कऻशिर्य ज़बऻन्य मंज़ यि पंचान्ग ल्यीखित सोज़ान मगर अथ मंज़ छु ऱयथ, द्वह देवनागरीयस मंज़ ति आसान युस नॖ बाकय ह्यकान छि ल्यीखित। म्यॆ कऺर पनॖन्यन तिमन बायन वारिहायि लटि व्यनती ज़ि अगर नॖ तॊह्य ह्यकान छिवॖ कऻशिर्य पऻठ्य पंचान्ग ल्यीखित, तॊह्य मतॖ ॴस्यतवॖ सोज़ान मगर तिमन बास्येयि क्याहताम ल्यखा हिश म्योन वनुन तॖ गोख नॖ असरा कॆंह वुन्युखताम तॖ वुनि ति छि तिम सोज़ान रोज़ान। तिहॖन्दि यि करनॖ सॗत्य छॆ नॖ म्यॆ कांह फरॖख प्यवान मगर त्युहुन्दुय वख छु ज़ायि गछ़ान तॖ ब्यॆयि छे नॖ तिहॖन्दि अंग्रीज़स मंज़ कऻशुर ल्येखनॖ सॗत्य सऻनिस समाजस कांह फऻयदॖ वातान। म्यानि पंचान्गॖ प्यठॖ ह्यॊछ वारिहाव लूकव कऻशुर परुन तॖ ल्यॆखुन, बॖ छुस यि कथ फखरॖ सान वनान मगर तिहॖन्दि पंचानगुक फऻयदॖ छु नॖ ह्यकान कांह तुलिथ ति क्याज़ि सु ल्यूखमुत छु नॖ कऻशिर्य ज़बऻन्य मंज़। असि छि पनॖन्य माजि ज़्यव रऺछ़रावॖन्य पऺरिथ तॖ ल्यीखित। असि छु नॖ पानॖवुन्य मुकाबलॖ करुन ज़ि कुस छु ल्येखान ज़्यादॖ तॖ कुस छु ल्येखान कम या कुस छु ल्येखान सुलि तॖ कुस ल्येखान  च़ीर्य। वुछुन छु अल्बतॖ ज़ि वख्तॖच मांग क्याह छि। वुछुन छु ज़ि  सऻन्य ज़रूरथ छि क्याह। पंचान्ग यानि जंत्री छे नॖ वारिहान तगान पनॖनिस ज़ऻच़ मंज़ परॖन्य ति, कऻशुर ल्यॆखुन छु दर किनारॖ अवॖ म्वखॖ छुस बॖ आडियो ति सोज़ान। यि ह्यॊत म्यॆ सोज़ुन लूकन हॖन्दिस गरि गरि मंगनस प्यठ युस दुनिहॗक्यन ब्यॊन ब्यॊन जायन मंज़ छु यऺड्य दादि बिहिथ पऻन्सॖ च़ोर कमावान। अम्रीका, न्युज़ीलैन्ड, दुबय, कन्नडा, आस्ट्रेलिया, आस्ट़ेया, अफ्रीका, जापान, जर्मनी वगैरा वगैरा। बॖ छुस ख्वशकॖस्मत पनुन पान ज़ानान ज़ि यीत्यन दूर दूर जायन बिहित म्यऻन्य बऻय ब्यॆनि छि ह्यकान बूज़िथ कऻशिर आवाज़ तॖ छुख ननान कऻशुर पंचान्ग। कथ छि जऻरी
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

10.04.2020

10.04.2020 वह्यक (वैशाख) गटॖ पछॖ (कृष्ण पक्ष) त्रय (तृतीया) शॊकुरवार (शुक्रवार/जुम्मा) श्री सप्तर्षि सम्वत 5096, राश वृश्चिक (दुहॖचि 4.25 बजि प्यठ, ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
          क्षमा-प्रार्थना
सापराधोsस्मि शरणं प्राप्तस्त्वां जगदम्बिके।
इदानीमनुकम्प्योsहं यथेच्छसि तथा कुरु।।
**************************
        महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
         नुंदॖ ऱेशिन्य श्रुक्य
स्रॊगुय ऒनुय द्रॊगुय कुनुम
नुन्नॖ बार लोयुम सरॖ
मॊदरि ज़बऻन्य ब्यॆयन प्रॖनुम
पानस वुनुम नॖ राह कस करॖ
        *************
माने:- इन्द्रियन हॖन्दि बूगॖ करनॖ बापथ ऒनुम क्वमव सोरुय तॖ बास्योम तिम सपदन त्रप्तॖ अमि सॗत्य। मगर सु करुन प्योम स्यठाह द्रॊग तॖ ह्यॆतुम तम्युक नतीजि पापन हॖन्द्य बऻर्य पनॖनिस कलस प्यठ। मॊदुरि ज़बऻन्य सॗत्य परॖनऻविथ ह्यॆछॖनऻविम लूख मगर पानस वुनिथ कस खारॖ राह यॆलि बॖ पानय तम्युक ज़िमॖवार छुस
**************************
पंचान्ग:- बिहिथ बिहिथ ति छि करनवऻल्य कॆंह न तॖ कॆंह कऻम करान रोज़ान अज़कल ति। यथ क्रूठ वखतस मंज़ ति। दफतरॖच कऻम गरि प्यठॖ, च़ाटॖहालुक सबक़ परान गरि प्यठॖ, ल्वकुट म्वकुट कारॖबार वरतावान गरि प्यठॖ, वगैरा वगैरा। ॳथ्य दौरानस वुछ म्यॆ ज़ि वैयकुण्ठ मंडली, फरीदाबादॖ प्यठ छु कॊरमुत अख प्रोग्राम शुरु गरि बिहथॖय, यथ नाव छु आमुत दिनॖ "पऻर्यज़ान"। अथ प्रोग्रामस तहत छि मंडलीहॖन्द्य कॆंह सदस्य मोबायलस प्यठॖय पनॖनि समाजिक्यन शुर्यॆन सॗत्य राब्तॖ कऻयिमथाविथ तॖ तिमन सॗत्य कऻशिर्य ज़बऻन्य मंज़ वार्तालाप करान रोज़ान। विषय छु कॆंह ति आसान। कऺशीरि मुतलक, रस्मन रिवाजन मुतलक, धर्मस मुतलक, परनस लेखन मुतलक यि दप्यज़ि ति पनॖनि कऻशिर्य सभ्यतायि मुतलक पृछ़गऻर करान तॖ पनॖनिस समाजस सॗत्य पऻर्यज़ान करनावान। यिथय पऻंठ्य छु दॊयिमि तरफॖ जे के विचार मंच गरि बिहॖथॖय समाजॖक्यन कलाकारन यू-ट्यूबस सॗत्य संपर्क कऺरनऻविथ ब्यॊन ब्यॊन ज़बान्यन मंज़ बऻथ ग्यवनावान यिम छि तिम कलाकार यिम अमि संस्थायि हॖन्द्य गाशॖ तारख ति छि रूद्यमॖत्य  यिमन कलाकारन मंज़ छि तिम ति यिम ग्वडनिचि लटि छि स़स्थायि दऺस्य यू-ट्यूबॖस प्यठ पनॖन्य कला हावान। यथ प्रोग्राम्स छु संजीव रैना गौतम जी कमान रऺटिथ तॖ बाकय सदस्य छिस सहायतस यि प्रोग्राम अंद वातॖनावनॖ बापथ। वैयकुण्ठ मंडली तरफॖ छु संजय पंडिता जी, मनोज पंडिता जी कमान सम्बऻलिथ। लऺगिथ छि कुनि न तॖ कुनि कामि सॗत्य। ब्यॆयि तरफॖ छु गुरुग्राम प्यठॖ अजय पंडिता जी गाटा गामस मंज़ चलान गौ शालायि मंज़ गऻवन चारॖ वातॖनावनॖच व्यवस्था करनस लॊगमुत। यथ जनता करफ्युस मंज़ छु नॖ जानवरन पूरॖ ख्यन वातान। युथ नॖ यिम जानवर ब्वछि हति मरन,यिहॖन्दि ख्यनुक प्रबंध ति छि कॆंह संस्थायि वुन्यक्यनस करान। महामऻरी छि पनॖन्य पर वाहरऻविथ तॖ पनॖन्य रफ़तार रऺटिथ   ॳस्य छि लाकम कऺसिथ यि कूशिश करान ज़ि ज़्यादॖ ज़ख गॊछ़ नॖ वातुन लूकन यिम यथ जायि छि या यथ मुल्कस मंज़ छि। महामीरी सॗत्य छु जंग बराबर जऻरी। दय करि पनॖन्य यऻरी तॖ ॳसि कासि खऻरी।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

09.04.2020

09.04.2020, वह्यक (वैशाख)  गटॖ पछॖ (कृष्ण पक्ष) द्वय (द्विती) ब्रसवार (वीरवार/बृहस्पतिवार/गुरुवार) श्री सप्तर्षि सम्वत 5096  राश तुला (चलान) ऋतु बसंत (चलान)...ऒक्दॊह छु रावान
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ दाय मॊह्यनिव
**************************
        क्षमा-प्रार्थना
अज्ञानाद्विस्मृतेर्भ्रान्त्या यन्न्यूनमधिकं कृतम्।
तत्सर्वं क्षम्यतां देवी प्रसीद परमेश्वरी
**************************
             महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
         नुंदॖ ऱेशिन्य श्रुक्य
दऻनिशमंद छुय अमृत ग्वरो
फ्यॊर फ्यॊर आस्यस पशपान
ब्रोंह कनि ह्यथ आसि किताबॖ लॊरो
वुछिथ आसि टांजिरान
वुछुन ह्यॊत छु ॳंदॖरॖ छ़ॊरो
परस प्रनिथ मशस पान
        **********
माने:- अख ज्ञानॖवान छु अमृत गडस बराबर यथ न्यॆबऱॖय फ्यॆरि फ्यॆरि पशपान ति आसि तस ब्रोंहकनि आसन किताबन बनॖ गऻमॖच़, यिमन वुछ्य वुछ्य सुति आसि हऻरान सपदान। मगर यॆलि तस ति गोरॖ सान वुछव, तऺम्य आसि सिर्फ पॊरमुतुय योत ॳन्दॖर्य आसि छ़ॊरुय। यॊद सु यि ज्ञान व्यवहारस मंज़ ॳनिथ परहे, तस कुन फेरिहे तस मशिहे पनॖनुय पान तॖ बनिहे प्वख्तॖ ज्ञानॖवान
**************************
पंचान्ग:- असि कऻशिर्य बट्टॖन गव व्यॊख्तुय विज़ि विज़ि। गाह सु कुनॖवुहशत नमथ ओस या सु ज़ॖ सास वुह छु। आतंकवाद्यव च़ऺलॖरऻव्य ॳस्य नमतस मंज़ यानि अज़ त्रॖह वऺरी ब्रोंठ तॖ च़लान च़लान कऺशीरि प्यठॖ आयि ॳस्य छऺकॖरनॖ अख उधमपोरॖ तॖ ब्याख बंगॖलोरॖ। मगर कुनि न तॖ कुनि रन्ग्य रूद्य जुडिथ ज्यॆमिस सॗत्य। त्रॖह वऺरी द्रायि दहरायि मगर बटॖ छु  नॖ वुनि ति मुक्कमल पऻठ्य बऺसिथ कुनि ॳकिस जायि। यि ननान छु वुन्यक्यनस ति। कोरोनावयरस महामऻरी मूजूब किन्य छि सऻरी लूख पनुन पान बचावनॖ खऻतरॖ पनॖन्यन पनॖन्यन गरन मंज़ दारि बर त्रॊपरिथ रूज़िथ पऺत्यम्यव पान्च़व-दऺहव दॊहव प्यठॖ मगर मर्ग छु नॖ च़कि शॆहलॖ बॆहनॖ दिवान। जनता करफ्यू छु च़्वापऻर्य, अख ॳकिस निश वातुन छु मुहाल। ख़बर अतर छि यिवान प्रॖछ़नॖ फोनन प्यठॖय। मगर मर्गस कऺर्यज़ि क्याह। युस आव यॊर तस वापस गछ़ुन, मोतस क्याह करि सोन पश्युन। कान्सि ॳकिस सपुद देहान्त राथ ऊतरॖ तॖ अन्तिम संस्कार करनॖ खऻतरॖ वोत नॖ कान्ह मृतकॖ सुन्द गरॖ तिक्याज़ि तम्यसॖन्द्य पनॖन शुर्य कऺट्य ॴस्य  छऺकरिथ, अख ज्यॆमि,अख व्यलायतॖ, अख बंगलोरॖ वगैरा वगैरा। मृतक सॖन्ज़ पनॖन्य आश्यन्य छि ज़ुवन रऺटमॖच़ तॖ छि  दर-बिस्तर। ह्वदॖहऺर वऺछ़ मृतक सॖन्द्यन अंगन ॴश्यनावन,तमि पतॖ ति ह्यॆक्य नॖ सऻरी वऻतिथ सारिवॖय जायन प्यठॖ। ॴखरस बूज़ुम ज़ि वातनोवुख यि शव शमशानघाठ ताम बडॖ मुश्किलन तॖ स्यठाह कम लूकव दऺस्य। यि छु हाल वुन्यक्यनस गोमुत असि महामऻरी कोरोनावयरस आसनॖ किन्य। लाचार छि, मजबूर छि, बॆवसीलॖ तॖ बॆसबब छि। दोष ह्यकव नॖ खऻरिथ कऻन्सि ति। न हऺकीमस तॖ न हऻक्यमसॖय। यि छु क्वदऱयतुक क़हर ज़गतस मंज़ च़्वपऻर्य फॗलिथ। प्रथ कांह छु ज़िन्दॖ रोज़न बापथ,यि पिल्यस तॖ ति,अज़मावनस मंज़ लऺगिथ। दूर्यर थऺविथ, ॴस बंद, नस बंद थऻविथ, अथॖवास नॖ करान, सॗत्य सॗत्य नॖ ब्यॆहान। कुनि ति चीज़स सूंचिथ समजिथ छेडान, बस गरस मंज़ बिहित दय नाव स्वरान तॖ प्रारान तथ गरि, तथ च़िहिस यॆलि यि ख्वखॖमॊत यानि कोरोनावयरस च़लि या गलि तॖ ॳस्य वाहरावव नऺरि ज़ंगॖ खुलॖ-डुलॖ तॖ बॆफ्रूख पऻठ्य। तॊत ताम छि माजि शर्ण।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

08.04.2020

08.04.2020 च़िथ्थॖर (चैत्र) ज़ूनॖ पछॖ (शुक्ल पक्ष) पुनिम (देवादेव) (पूर्णिमा) ब्वदवार (बुधवार) श्री सप्तर्षि सम्वत 5096, राश तुला (दुहचि 4.33 बजि प्यठॖ) ऋतु बसंत (चलान)...चूंकि पगाह छु ऒक्दॊह रावान, पगहुक वॊहरवोद यी ॳज़्य यानि ॷठमि अप्रील
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
             क्षमा-प्रार्थना
कामेश्वरि जगन्मात: सच्चिदानन्दविग्रह।
गृहाणार्चामिमां प्रीत्या प्रसीद परमेश्वरी।।
**************************
         महामऻरी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
*****************"********
        नुंदॖ ऱेशिन्य श्रुक्य
फ़र्ज़ आव तय राथ गऺयि अदा
अति क्या ब्यूठुख रादा दिथ
बान्ग तॖ सलवात तोरुक नादा
तति किहो आखो वादा दिथ
फ़र्ज़ तॖ सुनत कर मालि अदा
निनॖयो जनतस नादा दिथ
          ***********
माने:- हे इन्सानॖ! जवऻनी मंज़ रूदुख मस न्यॆन्दरि मंज़। अज्ञानॖ किन्य रूदुख ज़ंगन वाश कऺडिथ अजि वुम्बरि तान्य शंगिथ। वुद्यूख कऺरिथ वॊथ प्रभातस तिक्याज़ि बान्ग तॖ अज़ान छुय तोरुक नाद। युस याद छुय पावान ज़ि दयस सॗत्य वादॖ कऺरिथ छु च़्यॆ दर संसऻर्य ज़न्म ह्यॊतमुत। पनुन सु फ़र्ज़ याद करुन गव दयि नाव स्वरुन, तिक्याज़ि पनुन फ़र्ज़ तॖ सनत निबावुन छॆय च्यऻन्य कऻम। यॆमि किन्य जनतॖक्य दरवाज़ॖ गछ़ॖनय पानय यलॖ
**************************
पंचान्ग:- वुछव यॊदवय क़रीबन छि चतजिह पंचान्ग चलान यथ संसारस मंज़ तॖ सऻनिस मुल्कस यानि हिन्दुस्तानस मंज़ छि च़ोरि कॖस्मिक पंचान्ग चलान अज़कल।सु गव सप्तर्षि (च़िथ्थॖर ज़ून् पछि ऒक्दॊह प्यठॖ च़िथ्थॖर गटॖपछि मावसि ताम), बिक़मी (प्रथम चैत्र प्यठॖ त्रॖह्यमिस फाल्गुनस ताम), ईस्वी (प्रथम जनवऺरी प्यठॖ त्रॖह्यमिस दिसम्बरस ताम) तॖ साक़ा (शाका)। चूंकि सप्तर्षि सम्वतस मंज़ छि द्वह रावान लबान रोज़ान प्रथ ऱयतॖ अवॖ म्वखॖ छु नॖ कऻशिर्य बटन हुन्द वॊहरवोद ॳकिस मुकर्र तिथियस प्यठ रूज़िथ ह्यकान। पनुन वॊहरवोद तिथि हर वऺरियि ज़ानॖनॖ बापथ छु ज़रूरी असि पंचान्गुक सहारॖ न्युन प्यवान। अमि कॖसमॖच दिक्कत छॆ नॖ यिवान बाकयन ज़ऻच़न म्यॆ छु बासान। यि छु ख़ास वजह ज़ि सान्यन सरकऻर्य खातन मंज़ छु ईस्वी पंचान्ग असि मददगार सऻबित सपदान। ख्वखॖमॊत छु वुनि खोच़ॖनऻविथ कुल्य जहानस  तॖ ॳस्य ति छि यॆती पनॖन्यन पनॖन्यन मुर्यन मंज़ छ़्यफ दिथ तॖ छ़्वपॖ-दम कऺरिथ प्रारान कर च़लि तॖ गलि यि ख्वखॖमॊत तॖ ॳस्य त्रावहऻव फ्रख ह्यु। यम छु पनॖन्य कऻम करान, दिवान नाद ॳकिस ॳकिस। ॳस्य छि नॖ वऻतिथ ह्यकान मातमदऻरी करनि तिहॖन्द्यन गरन ताम तॖ न छि ह्यकान तिमन अथ मोकस प्यठ कामि रन्ग्य कॆंह यॊगदान दिथ। बोज़ान ओसुस ज़ि ॳकिस म्यॆथॖरस सपॖज़ मऻज्य स्वर्गवास ज्यॆमिस मंज़ तॖ पानॖ ओस सु गुरुग्राम रोज़ान। माजि हॖन्ज़ मरनॖच शॆछ बूज़िथ द्राव दिल्लि प्यठॖ पनॖनि गाडि मंज़ ज्यॊम कुन मगर ज्यॊम वऻतिथ द्युतुख नॖ तऺमिस पनुन गरॖ ताम वातनस इजाज़थ ततिक्यव हऻक्यम्यव यि दऺप्यज़ि ति तऺमिस प्यव वापस युन मोयूस गऺछ़िथ। ॳम्यसॖन्द्य अथॖ पाद लऺग्य नॖ ॳम्यसॖन्ज़ि पनॖनि माजि अन्तिम समयस प्यठ तिक्याज़ि कॊरोनावयरसन छु दऺहशथ फऻलोवमुत च़्वापऻर्य। अमि ख्वतॖ बदनसीबी क्या? यिथ्य कॖसॖ आसन ब्यॆयि ति ख़बर कऻत्याह दय ज़ानि। बस अख व्वपाय छु ज़ि माजि सुबॖ शाम हलम दऻरिथ मंगुन रहम।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

07.04.2020

07.04.2020 च़िथ्थॖर(चैत्र) ज़ूनॖ पछॖ (शुक्ल पक्ष) च़्वदह (देवादेव) (चतुर्दशी) बॊम्वार (मंगलवार) श्री सप्तर्षि सम्वत 5096, राश कन्या (चलान) ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
          क्षमा-प्रार्थना
गुह्यातिगुह्यगोप्त्री त्वं ग्रहाणास्मत्कृतं जपम्।
सिद्धिर्भवतु में देवी त्वत्प्रसादात्सुरेश्वरी।।
**************************
        महामऻरी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
        नुंदॖ ऱेशिन्य श्रुक्य
माशोकन येलि दर्शुन होवुन
दर्शुन दीवॖवुन मंसूरसॖय
शोकुक शराब सु येलि चोवुन
क़तॖल क्रोवनस ज़न च़ूरसॖय
क्वंग तॖ कॊस्तूर तति येलि नोवुन
मन मनोवुन तऺम्य दारसय
आशकन आरिफन वथा हऻवॖन
कथा थऻवॖन सम्सारसॖय
          ***********
माने:- यारॖ दऻदिस प्यठ मरनवाल्यन येलि दयन दर्शुन द्युत, तथ मंज़ आव मंसूर ति। मंसूरस ज़ॆवरॖन लोलॖ ज़ितिन्य सोनस मंज़ यॆमि सॗत्य तसन्द्य नफसी ख्वाहिशात फना सपदेय। ज्ञानॖ रूपॖ क्वंगॖ तॖ कॊस्तूर कॊरुन श्रान तॖ तमि मुशकॖ सॗत्य सपदुस मन श्वद। यॆमि किन्य आशिकन तॖ ज्ञऻनियन वथ हऻविथ थऺवॖन यॆमि सम्सऻर्य पनॖनि शानॖ तॖ मानॖच कथ।
**************************
पंचान्ग:- ज़ूल ति कॊर, थाल ति वऻय, शेंकॖ शबॖद ति दित्य, बजन कीर्तन ति थॊव पकवुन तॖ वुनि ति छि करान रोज़ान सिरिफ अकि मकसदॖ किन्य  सु गव ज़ि म्वकजार प्रावुन कोरोनावयरस महामऻरी निशि। अमि महामऻरी मऻर्य राथ शाम ताम क़रीबन पांच़सतथ सास लूख सम्सारक्यन ब्यॊन ब्यॊन जायन मिलऻविथ यानि अम्रीका, इटली, फ्रांस, चीन बेतरी। सऻनिस वतनस भारतस मंज़ ति गऺयि यि महामऻरी हतॖबऺद्य नफ़र गिलविथ वतनॖक्यन ब्यॊन ब्यॊन जायव प्यठॖ तॖ वुनि ति छुनॖ यि जानॖमर्ग थफ तुलान। गरन मंज़ छि श्रऺपिथ, न नेरनस वार न अच़नस वार। न कऻन्सि निश गछ़ुन तॖ न कांह गरॖ च़ानुन। सोरुय ज़गत छु बन्योमुत अख कऻदखानॖ ह्यु। च़ाटॖहाल बंद, दफ़तर बंद, कारखानॖ बंद। व्यॊखतुय माहौला छु बन्यॊमुत। सऻरी छि अख ॳकिस प्रॖछ़ान फोनन प्यठ ज़ि क्याह माहरा छि नऺव ताज़ॖ ख़बरा। टी वी प्यठॖ छु हालांकि ननान ज़ि क्याह छु सपदान आलमस मंज़ मगर सवाल छु यि बंदॖ कॗतिस कालस रोज़ि चिपकिथ टी वीयस सॗत्य ति। व्हाटसाप, फ़ेस बुक, ट्विटर वगैरा प्यठय छु ननान ज़ि कति कोताह तनाव छु, कति कऻत्याह रूद्य या मूद्य। बस शाह छु चलान अथ विश्वासस प्यठ ज़ि मऻज्य चण्डी यि कुनि रूपस मंज़ तॖ करि नाश अथ महामऻरी तॖ त्रावि असि बख्तन पनॖनि ज़ंगि तऺल्य। आशा छि ज़ि यि संकट म्वकलि जलदॖय यॊछ़ हय भगवानन। वऺलिव सऻरी मंगव पनॖनि पनॖनि जायि बिहिथ माजि शारिकायि अनुग्रह तॖ अथॖरॊट।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

06.04.2020

06.04.2020, च़िथ्थॖर (चैत्र) ज़ूनॖ पछॖ (शुक्ल पक्ष) त्रुवाह (देवादेव) (त्रॆयॊदशी) च़ऺन्दॖरवार (सोमवार) श्री सप्तर्षि सम्वत 5096, राश कन्या (शामचॖ 5.31 बजि प्यठॖ)ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
**************************
    असाध्य रोग निवृति मंत्र
रोगान्-अशेषान्-अपहंसि-तृष्टा
रुष्टा तु कामन्-सकलान्-अभीष्टान्
त्वाम-आश्रितानां न विपत्-नराणाम्
त्वाम-आश्रिता ह्यश्रियतां प्रयान्ति
**************************
       महामऻरी नाश - मंत्र
जयन्ती मन्गला काली भद्रकाली  कपालिनी दुर्गा क्षमा शिवा धात्री स्वहा स्वधा नमोस्तुते
**************************
        नुंदॖ ऱेशिन्य श्रुक्य
नफ़स च़ूर बुछे
दॊहय बॖ कॊछ़ दिमहऻय
ॴखॖर तूर्य गछ़ुन गछ़े
यथ ज़लस हो पऺछ़्य आय
        ************
माने:- नफस़ च़ूर छु लाखऻर, दॊहय कॊछ़ दिय दिय ति गछ़ि बुछिथ या नफसॖन नारॖ ह्यॆकि इन्सान दऺज़िथ प्यथ। यि कोनु छु इन्सानस फिक्रि तरान ज़ि यॆम संसऻर्य रूप सऺदरस छि ॳस्य पऺछ़ॖय आमॖत्य, मऺरिथ छु ब्यॆयि तूर्य गछ़ुन यॆति प्यठॖ योर छि आमॖत्य।
**************************
पंचान्ग:- अख मान्यता छि यि ज़ि भगवान विष्णुहन छु हिरण्यकशिपु सुन्द वध करनॖ म्वखॖ वर्युक त्रुवऻहिम ऱयथ बनोवमुत तॖ तमि र्यतुक नाव पुरुषोत्तम मास द्युतमुत। वनॖनॖ छु आमुत ज़ि अमि अधिक मासुक अधिपति छु पानॖ भगवान विष्णु तॖ अमि अधिक मासुक महत्व ति छु ब्यॊन। जंत्री मंज़ छु यी ल्यीखित। म्वखसरॖ छु वनुनुक मक़सद यि ज़ि पंचान्गॖस मंज़ वरियुक द्वह बकाया पंचान्गक्यन दॊहन सॗत्य बराबर करनॖ म्वखॖ छि ज्योतिष्यव पनॖनि पनॖनि हिसाबॖ ग्रन्द कऺरिथ पनॖन्य पनॖन्य पंचान्ग बनऻव्यमॖत्य। पंचान्ग ति छि ब्यॊन ब्यॊन मसलन सप्तर्षि, बिक्रमी, ईसवी, वगैरा वगैरा। ब्यॊन ब्यॊन ज़ऻच़ छि ब्यॊन ब्यॊन पऺचान्ग वरतावान ब्यॊन ब्यॊन काम्यव बापथ। ॳस्य कऻशिर्य बट्टॖ छि सप्तर्षि सम्वत पंचान्ग आमॖत्य वरतावान पनॖन्यव रीति रिवाजव बापथ, ज़ातक मिलाप बापथ, खान्दर या बाकय बऺड्य द्वह मनावनॖ बापथ। अल्बतॖ सरकऻर्य काम्यव खऻतरॖ छि ईसवी सम्वतुक पंचान्ग पानॖनोवमुत। मंज़ॖ ओस कॆंच़स कालस बिक्रमी सम्वतुक पंचान्ग ति बारसस आमुत असि बटन हॖन्दि बापथ मगर अमि पंचान्गुक प्रभाव रूदमुत छु व्वंय स्यठाह महदूद या न आसनस बराबर। पीर छा बॊड किनॖ यॆकीन्। यि द्युत लूकव हऻविथ राथ नवि बजि शामन यॆमि सातन बिजली आयि पनॖन्यन पनॖन्यन गरन मंज़ बंद करनॖ तॖ च़ऻन्ग्य या मोम-बति आयि ज़ालनॖ नवन मिनटन बापथ मुल्कस मंज़ फऻल्यऻमॖच़ कोरोनावयरस महामऻरी च़ऺलरावनॖ बापथ। राथ शामन ओस प्रज़लान सोन वतन च़ऻन्ग्य गाशस तॖ शम्मा गाशॖ सऺत्य तॖ अख अद्धभुत नज़ारॖ आव वुछनस तल। यॆकीन छु ज़ि ॳस्य ज़्यॆनव यि जंग जलदॖय यॊछ़ हय भगवानन। यि महामऻरी किथॖ पऻठ्य त्रावि ॶसि, व्वपाय छि छ़ारान सऻरी लूख यिकॖवटॖ मीलिथ  हालांकि कॆंह शेतान तॖ मूर्ख लूख छि नॖ बाज़ यिवान। तिम छि बे-रोक-टोक नच़ान रोज़ान तॖ महामऻरी हुन्द शिकार बनान रोज़ान। असि पज़ि हिरासॖ करुन, पनुन पान बचावुन, लूकन हुन्द ज़ुव बचावुन। माजि दीवी पान पुशॖरावुन तॖ तऺम्यसुन्द अथॖरॊट तॖ अनुग्रह मंगुन। युथ शारिका माता कांह रूप दऻरिथ यी तॖ कुल जहानस दी शफा तॖ म्वकॖलावि अमि महामऻरी निशि।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

05.04.2020

05.04.2020 च़िथ्थॖर (चैत्र) ज़ूनॖ पछॖ (शुक्ल पक्ष) बाह (द्वादऺशी) आथवार (रविवार/एतवार), श्री सप्तर्षि सम्वत 5096, राश सिंह (चलान) ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
           क्षमा प्रार्थना
न मन्त्रं नो यन्त्रं तदपि च न जाने स्तुतिमहो
न चाह्वानं ध्यानं तदपि च न जाने स्तुति कथा:
न जाने मुद्रास्ते तदपि च न जाने विलपनम्
परं जाने मातस्त्वदनुसरणं क्लेश हरणम्।
**************************
         महामऻरी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
        नुंदॖ ऱेशिन्य श्रुक्य
श्रावन सूर तॖ कॊस्तूर कल्यॊव
रंगॖ बुलबुलस गऺयम गलि ज़्यव
यावन सूर कुनि सॗत्य नॖ बल्यॊव
अदॖ व्वयॆस न कन्द नाबद तॖ ग्यव
         *************
माने:- यिथॖ मोसमॖ बहारुक ऱयथ श्रावन सूरिथ छि कऺस्तूर कलान तॖ रंगॖ बुलबुलस गलि ज़्यव गछ़ान तिथय पऻठ्य यावुन सूरिथ यियि नॖ ब्यॆयि कॆंह वापस, यानि यावनुन बल यियि नॖ पॊत फीरिथ ज़ांह ति। शरीरस कन्द, नाबद तॖ ग्यव सग दिनॖ बलि नॖ बुजरुक ज़र ज़ांह। यि छु पज़र ज़ि यावनॖ पतॖ छु इन्सान बुजरस लथ त्रावान। अमि छि वनान यादि दयुक ग्वड गछ़ि जवऻनी मंज़ॖय बरुन, न कि बुजरस मंज़, यॆलि इन्सान अबल छु सपद्योमुत आसान। कन्द, नाबद तॖ ग्यव ति छॆ नॖ जवऻनी ब्यॆयि फीरिथ यिवान।
**************************
पंचान्ग:- राथ वुछ असि मलॖ मास तॖ भानु मास कथ छि वनान तॖ यिति वुछ असि ज़ि त्रॆयि वुहॖर्य पतॖ किथॖ पऻठ्य या क्याज़ि छु बाहव बजाय त्रुवाह ऱयॊत वऺरी बनान। मानॖनॖ छु यिवान ज़ि कऺशीरि मंज़ यॆलि लूख आयि, यिम ॴस ॳड्य भानु मास्य तॖ ॳड्य ॴस्य मलॖ मऻस्य। यानि यिम राम जीनि वंशिक ॴस, तिम ॴस भानु मऻस्य तिक्याज़ि दपान राम जी छु ओसमुत सूर्य वंशुक अख अंग। यिम ॴस्य सिरियस पूज़ान तवॖकिन्य ॴस्य यिम सूर्य वंशी युस बनान बनान बनऻयव भानॖ मऻस्य। यिथय पऻठ्य दपान दॊयिम तबकॖ गऺयो चन्द्रवंशीय। यिम ॴस्य कृष्ण वंशॖक्य यानि यि तबकॖ लूकन हुन्द ओस ज़ूनि पूज़ान तॖ यिमन आयि वनान मलॖ मऻस्य। कृष्ण जी छु ओसमुत चन्द्रॖ वन्शकि खानदानुक तॖ ॳम्यसॖन्दि वंशॖक्य लूकन आव वनॖनॖ मलॖ मऻस्य। मगर वखतस सॗत्य पकान पकान बदल्यव यिमन द्वन तबकन हुन्द व्वथुन बिहुन ति, संस्कारन मंज़ ति आव बदलाव। व्वंय छि ॳड्य सिरियसॖय योत पूज़ान, ॳड्य छि ज़ूनी योत पूज़ान तॖ ॳड्य छि द्वनवऺनीय थफ कऺरिथ। यानि सिरियस ति पूज़ान तॖ ज़ूनि ति पूज़ान। सोन याने कऻशिर्यन हुन्द पंचान्ग छु ज़ूनि सॗत्य सम्बंध थऺविथ याने सप्तर्षि सम्वत तॖ सिरियस सॗत्य सम्बंध वोल पंचान्ग छु बिक्रमी सम्वत। हालांकि ज़्यनस तॖ मरनस छि ॳस्य सूर्य अस्त तॖ सूर्य उदय हिसाब थाविथ मगर बाकय रसमन तॖ रिवाजन छि ज़ून खसनस तॖ ज़ून वसनस सॗत्य पकान। अमि अलावॖ छु सोन पंचान्ग शुक्लॖ पक्ष यानि ज़ूनॖ पछॖ ऒक्दॊह प्यठॖ गटॖ पछॖ मावसि ताम ऱयथ बनावान, बिक्रमी ऱयथ छु अकि सऻंक्रऻच़ प्यठॖ ब्यॆयिस सऻंक्रऻच़ ताम यिवान मानॖनॖ। कथ छि जऻरी। महामऻरी यानि कोरोनावयरस सॗत्य जंग छु चलान। सोरुय विश्व छु बंद। क्वदर्यतुक कऺहर ति ह्यकव यथ माहोलस वऺनिथ। ॳक्य मऻच़ॖक्रॗल जरासीमन युस नॖ ॳछ तऺल्य ति छु यिवान, थोव सोरुय दुनियाह ॳक्यसॖय ज़ंगि प्यठ खड़ा तॖ त्रऺहरऻविथ। गरन मंज़ छि लूख बंद। जानवर तॖ जानावार छि हऻरान तॖ परेशान। बर नॖ मुच़रावुन कऻन्सि ज़ि युथ नॖ ख्खॖमॊत अंदर गछ़ि ॳछ़िथ तॖ थफ दिथ नीय पानस सॗत्य गिलविथ तॖ नी वुठकऻविथ। दूरि दूरि छि करॖन्य सलाम, आदाब, नमस्कार, सतसरियाकार,गुडमार्निंग, सुप्रभात, हाय, हैलो तॖ बाकय मसलॖ फोनन प्यठ हल करॖन्य। दय नाव सहवरुन, पाठ पूज़ा करुन तॖ मंगान रोज़ुन माजि दीवी हुन्द अनुग्रह।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

04.04.2020

04.04.2020, च़िथ्थॖर (चैत्र) ज़ूनॖ पछॖ (शुक्ल पक्ष) काह (एकादशी) बटॖवार (शनिवार/ शनिश्चरवार),श्री सप्तर्षि सम्वत 5096, राश सिंह (दुहचि 5.7 बजि प्यठॖ) ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
**************************
   आरोग्य तथा सौभाग्य मंत्र
देहि सौभाग्यम आरोग्यं देहि मे परमं सुखम्,
रूपं देहि जयं देहि यशो देहि द्विषो जहि
**************************
       महामऻरी नाश- मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
         नुंदॖ ऱेशिन्य श्रुक्य
नफ़सी कऺरॖम अदल तॖ वदल
नफ़स म्योन शेतानस बदल आव
नफ़स मानिह्यम क्रॆयि हॖन्द्य कदल
नफ़स म्योन दोज़खस बदल आव
       *****************
माने:- शेतान सॖन्ज़ जाय रऺटिथ कऺरनम नफसन छलॖ छांगॖर। स्वक्रच़ हॖन्द्य कऺदॖल नाहनऻविथ आम बुथि यॆमिकिन नर्क छुस दर संसऻर्य बूगान
**************************
पंचान्ग:- पनॖनि जंत्री यानि विजयेश्वर पंचान्गकिस सफॖ शॆ तॖ सतस प्यठ छु मलमास, भानुमास, अधिकमास, पुरुषोत्तम मासस मुतलक आमुत ल्यॆखनॖ ज़ि  कुस मास कति प्यठॖ कॊत ताम छु तॖ किथॖ पऻठ्य छु। ज्योतिष नज़रि मुतऻबिक दपान वर्ष यानि वऺरी छु द्वयव कॖसमव यानि सौर वर्ष तॖ चान्द्र वर्ष। सौर वर्षस मंज़ छि 365 द्वह आमॖत्य मानॖनॖ तॖ चान्द्र वर्षस मंज़ दपान छि 354 द्वह आमॖत्य मानॖनॖ। सौर वर्ष छु रोज़ान सऻंन्क्रऻच़ प्यठॖ सऻन्क्रऻच़ ताम तॖ चान्द्र वर्ष छु रोज़ान ज़ूनॖ पछॖ ऒक्दॊह प्यठॖ गटॖ पछॖ मावसि ताम। सौर मास छु सिरियि सॖन्ज़ि गति हिसाबॖ रोज़ान तॖ चान्द्र मास छु ज़ूनि हॖन्ज़ि गति हिसाबॖ रोज़ान। सौर माने गव सिरियि, भानु ति गव सिरियि, चान्द्र माने ज़ून, मल ति छु माने ज़ून। अम्युक मतलब गव ज़ि कऻशुर बटॖ सुन्द पंचान्ग छु द्वन हिसन मंज़ पकान। ॳस्य छि सिरियस ति पूज़ान तॖ ज़ूनि ति। यिम सौर मासस सॗत्य पकान छि तिमन छि वनान भानॖमऻस्य तॖ यिम ज़ूनि पूज़ान छि तिमन छि वनान मलॖमऻस्य। द्वनवॖनी पंचान्गन मंज़ छि काहन दॊहन हॖन्ज़ फरॖख यिवान। यि फरख छि त्र्यन वऺरियन मंज़ त्यॆयत्रॖहन दोहन हॖन्ज़ फरख पऻदॖ करान तॖ तमि म्वखॖ छि त्रॆयि त्रॆयि वुहॖर्य पतॖ बाहन ऱयतव बजाय त्रुवाह ऱयेत्युन वऺरियि गछ़ान तॖ यथ ॳस्य वनान छि अधिक मास या पुरुषोतम मास। अथ मुतलक ब्यॆयि कथबाथ करव पगाह। अज़ च़ायि ॳस्य जन-़करफ्युकिस पॗन्च़मिस दोहस मंज़। बऺड्य ल्वकॖट्य, लऺडकॖ कोरि, मर्द ज़नानॖ छि च़मेमॖत्य पनॖन्यन पनॖन्यन कमरन मंज़। पलि छु नॖ प्यवान ज़ि ॴखॖर करव हय तॖ करव कयाह।  मोबाइल छु अख बॊड सहारॖ अज़ कल पानॖवुन्य रऻब्यतॖ कऻयिम करनॖ बापथ। जिस्मऻनी तोर पऻठ्य अख ॳकिस निश वातुन छु महामऻरी बुथि युन युस नॖ वऻजिब छु। ख्वखॖमॊत छु ज़ागि नॆबॖर कनि प्रारान पनॖनिस शिकारस मगर ॳस्य ति छि कमर कऺसिथ तॖ छ़ान्डान कांह नतॖ कांह व्वपाय ज़ि यि महामऻरी किथॖ पऻठ्य ह्यकोन दफ़ा कऺरिथ जल-जल। बदनऺसीब लूख छि लगातार वलनॖ यिवान अथ मौतॖ क्वन्डस मंज़। दय करि पनुन सबब तॖ अथॖरॊट। यिम छि सऻनी पाफ ज़ि ॳस्य आयि ह्यनॖ अथ कऺन्ड्य ज़ालस मंज़।
 **************************
कऻशुर ह्यॆछव कऻशुर परव।
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

03.04.2020

03.04.2020, च़िथ्थॖर (चैत्र) ज़ूनॖ पछॖ (शुक्ल पक्ष) दऺहम (दशमी) शॊकुरवार (शुक्रवार/ जुम्मा) श्री सप्तर्षि सम्वत 5096, राश कर्कट (चलान) ऋतु बसंत (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
       मंगल प्राप्ति - मंत्र
सर्व मंगल मंगल्ये, शिवे सर्वार्थ साधिके,
शरण्ये त्र्यम्बके, गौरी नारायणि नमोस्तुते
**************************
          महामऻरी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते।
**************************
         नुंदॖ ऱेशिन्य श्रुक्य
तंदरुस्ती छॆय न्यामऺच़ सासा
गासू फरासा शुक्र कर
क्रॆय कारन स्वखन अवॖलासा
तगिये राथ द्यन ख्वदाय सर
ग़रीबी छय ख़ास अलॖखासा
खरीदार छुय ख्वदा सोदा कर
दुनियादऻरी बुकॖर्य सासा
तवाल तॖ अन्दकार मोच़ॖ बर
       ************
माने:- ज़ुव ऒर तॖ वथॖरुन गासॖ यॊद आसि, तमि खऻतरॖ गछ़ि दय सुन्द शुक्रगुज़ार रोज़ुन। क्रॆय तॖ कारन छु स्वखन व्वलॖसावान यॊद तगि तमि खऻतरॖ स्वरुन रात द्वह दय। ग़रीबी (शराफ़त) छि अख नेक सिफत। यॆम्युक खऺरीदार पानॖ दय छु। अमि खऻतरॖ पज़नय नामनबल च़िह्य च़िह्य श्रान करॖन्य। संसऻऱय व्यवहारस छि सास बुथ्य, यथ दिकऺच़ तॖ अज्ञानॖक्य छि दरवाज़ॖ।
**************************
पंचान्ग:- मरुन ति गव मुश्किल। यथ जनता कऺरफ्युहस मंज़ यॆम्य कऻन्सि ति ॳछ वऺट, सु गव या गऺयि पानॖ स्वर्गस मगर तथ दिवंगत शऺरीरस अंतिम संस्कार करुन छि स्यठाह मुश्किल कऻम मृतकसॖन्दि परिवारॖ खऻतरॖ। अख बॊड मसलॖ बन्याव यि। अंतेष्टी करॖन्य, ब्रह्मा जी मेलुन, मीलिथ तऺम्यसुन्द क्रिया करॖन्य मानुन, अंतिम संस्कारॖच सामग्री सॊम्बरावॖन्य, मृतकस श्रान वान करनॖ बापथ नफ़र आसॖन्य,ॳर्थी नख दिनॖ बापथ च़ोर नफ़र मूजूद आसॖन्य यि छि यथ क्रूठ वखतस प्यठ अख बोड मसलॖ। मृतकॖ सॖन्द्य अंग ॴश्यनाव वातॖन्य दर्शनार्थ बापथ ति गव दुशवार।
यस नॖ गरस मंज़ आलव दिनस सॊम्ब आसि कान्ह, कथ करनस आसि कांह, थफ करनस आसि कांह तऺम्यसुन्द हाल क्याह आसि यि च़्यॆनुन छु स्यठाह मुश्किल। इन्सान छु हऺच़्य च़ापान यि वुछिथ तॖ बूज़िथ ज़ि ॴखॖर गव हय तॖ गव क्याह। अकि गरॖच मऻल्यक्यन आसॖन्य बसॖन्य वाज्यन, सॊन्य सामठ वाज्यन, न्वशि कोरि ज़ामतुर आसन वाज्यन गऺयि राथ स्वर्गस मगर दूर्यॆर आसनॖ म्वखॖ तॖ जनता करफ्यु आसनॖ म्वखॖ, यातायात न आसनॖ म्वखॖ ह्यॆक नॖ वारियाह अमिस मऻल्यक्यनहॖन्द्य दऺह दऺर्य वऻतिथ। महामऻरी हुन्द प्रकोप रूद ज़बर्दस्त। यॆमि शानॖ सान अमिस मऻल्यक्यन हॖन्ज़ ॳर्थी गऺछ़ नेरॖन्य सु सपुद नॖ मुम्किन म्यॆ बासान। कऻच़ाह सख्ती आसि आमॖच़ मृतक सॖन्द्यन गरिक्यन गऻमॖच़ यि गर्युक बऻच़ शुमशानबलस ताम वातनावनॖस तॖ तऺमिस तति दाह संस्कार करनावनस, यि व्यथा ह्यकन तिमय बऻविथ यॆमिस यि गुदरिथ आव।ॳस्य ह्यकव सिरिफ सूंचथॖय योत। द्वन ॴशनावन म्यान्यन आव राथ दाह संस्कार करनॖ मगर बॖ रूदुस असहाय, बेबस, मजबूर, बॖ ह्यॊकुस नॖ पनॖनि अहातॖ न्यबर ति नीरिथ। वुन्यक्यनुक दोर छु सख़, महामऻरी हुन्द ज़ोर छु सख़। मगर ॳस्य छि न ह्यकान दिथ चिख तॖ न ह्यकान दिथ क्रख। बस माजि दीवी छु पुशॖरोवमुत पान। सॊय करि पनुन अनुग्रह तॖ सॊय हावि असि व्यसतार तॖ दी असि यथ कठिनिस म्वॊकस स्यॆदि बुथि तार।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

02.04.2020

02.04.2020,च़िथ्थॖर (चैत्र) ज़ूनॖ पछॖ (शुक्ल पक्ष) नवम (नवमी) ब्रसवार (वीरवार/ब्रहस्पथवार/ गुरुवार)श्री सप्तर्षि सम्वत 5096, राश कर्कट (दूहचि 1.32 बजि प्यठॖ)ऋतु बसंत(चलान)...नवरात्र (चलान)..अज़ छि रामनवम ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
       पाप नाश तथा भक्ति
           प्राप्त का मंत्र
नतेभ्य: सर्वदा भक्त्या चण्डिके दुरितापहे।
रूपं देहि जयं देहि यशो देहि द्विषो जहि।।
**************************
         महामऻरी नाश का मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
        नुंदॖ ऱेशिन्य श्रुक्य
आदनॖ खूच़ुख वज़ूहस तॖ श्रानस
याम नादानस दऻर गऺयी छऺच़ॖय
सऺन्य च़्यथ द्युतुथ दॊसलिस तॖ छानस
छुख लदान आस्मानस म्यॆच़ॖय
डाय गज़ ज़ऺमीन लानि छय पानस
लज़लव यि लऺर लऺज़ॖथ कथ किच़ॖय
         **************
माने:- जवऻनी मंज़ खूच़ुख तॖ ओय व्वज़ू तॖ श्रान करनस आलुछ़ यॊतान्य वखॖत गव नीरिथ। दऻर छऺच़ गछ़नॖ पतॖ यॆलि पनॖन्यन कारन हुन्द अन्जाम ह्यॊतनय ब्रोंठकुन युन च़्यॆ ह्यॆच़ॖथ तस थुरनगऺरिस म्यॆच़ बुज़ॖन्य। ॴखॖर छय मऺरिथ डाय गज़ ज़मीन च्यानि कॖस्मतॖ लेखनॖ आमॖच़। यॊद शर्मदार छुख त्यॆलि प्यतॖ च़ॖ पायस वुनि ति। च़्यॆ कथ किच़ बनऻवॖथ यि यीच़ बऺड लऺर यस च्यानि बापथ छि बेमाने, ति क्याज़ि च़ॖति छुख नॖ रोज़वुन दर दुनियाह।
**************************
पंचान्ग:- रामॖ नवम या नवरात्रॖ नवम द्वह छु अज़। यि द्वह ओस यिवान बडॖ चिकॖचावॖ सान मनावनॖ ब्यॊन ब्यॊन वतीर ब्यॊन ब्यॊन ज़ऻच़व दऺस्य ब्यॊन ब्यॊन जायन मगर यॆमि लटि गऺयि तिम सऻरी वऺतीरॖ बंद। कारण छु कोरोनावयरस महामऻरी यॆमिकि आसनॖ मूजूब रूद्य सऻरी तर्क लबिताकस। कऺशीरि ॳज़्यकि द्वह च़ॊट खारुन छु नॖ कुनी, कनिकॖ सॊम्बरावॖनि नॖ कुनी, सॊम्बरऻविथ तिमन पूज़ा करॖन्य नॖ कुनी, छोलॖ पूर्य ख्यावॖन्य नॖ कुनी, रामॖ नवम द्वह नच़ुन फ़ेरुन नॖ कुनी। बिहित छि सऻरी लूख पनॖन्यन पनॖन्यन गरन मंज़ अज़ ति। बुथिस सॗत्य नॖ बुथ मिलनावुन, अथस सॗत्य नॖ अथॖ मिलनावुन, कऻन्सि ब्रोंठ कनि नॖ ॴस मुच़रिथ च़ास करॖन्य, कऻन्सि ब्रोंठॖ कनि नॖ प्वंद ति त्रावॖन्य। हिरासॖ करुन गरि न्यबर नेरनस। ति क्याज़ि ख्वखॖमॊत छु वुनि यॆती पनुन खौफ ह्यथ, रोब दाब ह्यथ तॖ पनुन दऺहशत तॖ तनाव ह्यथ। अथ महामऻरी छु शुप द्युन बुथि। अमिच्यन तारन छु छ़्यन्यर द्युन। यि सपदि मुम्किन त्यॆली, यॆलि ॳस्य पनुन पान बचऻविथ थऻवव तॖ अथ महामऻरी बुथि यिमव नॖ। सावदऻनी छि वर्तावॖन्य असि सारिनी ब्यॆयि कॆंच़स कालस। रऻछ छि करॖन्य पनॖनिस जानस। जान छु तॖ जहान् छु। दय छु नॖ मऺशरावुन। माजि दीवी छु अनुग्रह मंगान रोज़ुन। सॊय कडि असि अमि कऺन्ड्य-ज़ालॖ मंज़ॖ, अमि महामऻरी कोरोनावयरस मंज़ॖ अंसान तॖ गिन्दान।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबाथ करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)